1. Finshi tusambilila mu Amalumbo 15:​1-5?

 MU CIPANDE cafumineko, twasambilile ukuti ababomfi ba kwa Yehova abaipeela kabili ababa ifibusa fyakwe, kuti baba abeni mwi tenti lyakwe ilya mampalanya. Nomba finshi tulingile ukucita pa kuti tube ifibusa fyakwe? Amashiwi yaba mu Amalumbo 15 yalalanga ifyo tufwile ukucita. (Belengeni Amalumbo 15:​1-5.) Yalatusambilisha ifyo tufwile ukulacita pa kuti twingaba ifibusa fya kwa Lesa.

2. Cinshi nalimo icalengele Davidi alumbule itenti lya kwa Yehova?

² Amalumbo 15 yatampa na mashiwi ya kuti: “Mwe Yehova, nani engaba umweni mwi tenti lyenu? Nani engekala mu lupili lwenu ulwa mushilo?” (Amalu. 15:1) Ilyo kemba wa malumbo Davidi alandile pe “tenti” lya kwa Yehova, nalimo aletontonkanya pe tenti lya mushilo ilyali mu musumba wa Gibeone pa nshita imo. Na kabili ilyo Davidi alandile pa “ulupili lwa mushilo,” nalimo alepilibula ulupili lwa Sione ulwali mu Yerusalemu. Pali ulu ulupili ulwali ukutali ku kapinda ka ku kulyo aka musumba wa Gibeone, e po Davidi atanike itenti lya kusungilamo icipao ca cipangano mpaka ilyo bakuulile icikuulwa umwa kucisungila.—2 Sam. 6:17.

3. Mulandu nshi tulingile ukusambilila ifyaba mu Amalumbo 15? (Moneni ne cikope.)

³ Kwena, abena Israele abengi tabalebasuminisha ukubombela pe tenti lya mushilo, kabili banono fye baleingila muli ili tenti umo balesungila icipao ca cipangano. Lelo ababomfi  ba kwa Yehova bonse aba cishinka bali no kuba abeni mwi tenti lyakwe ilya mampalanya nga ca kuti batwalilila ukuba ifibusa fyakwe. Ifi e fyo bonse tufwaya. Mu Amalumbo 15, Baibo yalitweba imibele imo iyo tufwile ukukwata pa kuti twingatwalilila ukuba ifibusa fya kwa Yehova.

MULEBA ABA KAELE KABILI MULECITA ICALUNGAMA

4. Twaishiba shani ukuti Yehova tafwaya twapelela fye pa kubatishiwa? (Esaya 48:1)

⁴ Pa Amalumbo 15:​2, Baibo ilondolola cibusa wa kwa Lesa ukuti “muntu wa kaele, uucita icalungama.” Ifi e fyo tulingile ukutwalilila ukucita. Bushe kuti twaba ‘aba kaele’? Ee kuti twaba. Nangu ca kuti fwe bantu tatwapwililika, Yehova kuti alatumona ukuti tuli ‘ba kaele’ nga ca kuti tule-esha na maka yonse ukulamumfwila. Nga twaipeela kuli Lesa twabatishiwa no kubatishiwa, ninshi twatendeka ukulaenda na Lesa. Ku ca kumwenako, kale umuntu taleba umweni wa kwa Yehova pa mulandu fye wa kuti afyalilwe mu luko lwa bena Israele. Bamo balemupepa lelo tabalemupepa ‘mu cishinka kabili tabalecita ifyalungama.’ (Belengeni Esaya 48:1.) Ifi fine e fyo caba na muno nshiku. Pa kuti tube ifibusa fya kwa Lesa, tatufwile ukupelela fye pa kubatishiwa no kuba mu cilonganino ca Bena Kristu. Lelo tulingile ‘ukulacita icalungama.’ Bushe aya mashiwi yalola mwi?

5. Bushe calola mwi ukumfwila Yehova muli fyonse?

⁵ Nga kulingana ne fyo Yehova amona ifintu ukuba ‘aba kaele’ no ‘kulacita icalungama,’ takupelela fye pa kulaya lyonse mu kulongana ku Ng’anda ya Bufumu. (1 Sam. 15:22) Tulingile ukulaesha na maka yesu yonse pa kuti tuleumfwila Lesa muli fyonse ifyo tucita na mu fyo tucita ilyo tuli fweka. (Amapi. 3:6; Luk. Mil. 12:​13, 14) Calicindama ukulaumfwila Yehova na mu tuntu utunono. Nga tulecita ifi ninshi tulelanga ukuti twalimutemwa sana  kabili ifi filenga na o atutemwa.—Yoh. 14:23; 1 Yoh. 5:3.

6. Ukulingana na AbaHebere 6:​10-12, cinshi cacindama ukucila pa milimo iisuma iyo twabombela Yehova?

⁶ Yehova alatasha pa milimo yonse iyo twamubombela. Nomba imilimo iyo twabombela Yehova teingalenga twatwalilila ukuba abeni mwi tenti lyakwe. Ifi fine e fyo Baibo ilanda pa AbaHebere 6:​10-12. (Belengeni.) Yehova talaba imilimo iisuma iyo twamubombela. Lelo afwaya twatwalilila ukumubombela no mweo onse mpaka “na ku mpela.” Yehova akatwalilila ukuba cibusa wesu umuyayaya “nga tatutompweke.”—Gal. 6:9.

MULELANDA ICINE MU MITIMA YENU

7. Bushe calola mwi ukulanda icine mu mutima?

⁷ Onse uulefwaya ukuba umweni mwi tenti lya kwa Yehova afwile ‘ukulalanda icine mu mutima wakwe.’ (Amalu. 15:2) Ici tacipilibula fye ukuti tafwile ukulabepa. Yehova afwaya tuleba aba cishinka mu fyo tulanda na mu fyo tucita. (Heb. 13:18) Ici calicindama “pantu Yehova amona uwa bucenjeshi ukuti wa bunani, lelo abalungama e baba sana ifibusa fyakwe.”—Amapi. 3:32.

8. Finshi ifyo tushifwile ukulacita?

⁸ ‘Abalanda icine mu mitima yabo’ tabacita kwati balakonka amafunde ya kwa Lesa nga bali na bantu, e lyo balapula mu mafunde ya kwa Lesa nga ca kuti bali beka. (Esa. 29:13) Te ncenjeshi. Umuntu incenjeshi kuti atampa ukutontonkanya ukuti amafunde ya kwa Yehova yamo tayawama. (Yako. 1:​5-8) Te kuti aleumfwila Yehova mu fintu ifyo umwine alemona ukuti tafyacindama sana. Lyena, nga ca kuti mu fyo alecita tamufumine ifyabipa, kuti atampa no kucita ifyabipisha. Umuntu wa musango uyo nangu ca kutila kuti alamona kwati alebombela Lesa, Lesa te kuti atemwe ifyo amubombela. (Luk. Mil. 8:11) Lelo ifwe tufwaya ukuba aba cishinka muli fyonse.

9. Finshi twingasambilila ku fyo Yesu alandile pali Natanaele ilyo bamonene pa muku wa kubalilapo? (Moneni ne cikope.)

⁹ Kuti twasambilila ifyo ukuba aba cishinka kwacindama ku fyo Yesu alandile pali Natanaele ilyo amonene nankwe pa muku wa  kubalilapo. Ilyo Filipi atwele cibusa wakwe Natanaele kuli Yesu, Yesu alilandile ifintu ifisuma pali Natanaele. Nangu ca kuti uyu e wali umuku wa kubalilapo Yesu amonenepo na Natanaele, alandile ati: “Moneni, umwina Israele wine wine, uwa cishinka.” (Yoh. 1:47) Ukwabula no kutwishika Yesu alemona abasambi bambi ukuti bali aba cishinka lelo amwene Natanaele ukuti ali wa cishinka sana. Natanaele ali uushapwililika nge fi fine bonse twaba, lelo tali no bumbimunda. Ali uwa cishinka muli fyonse. Yesu alitemenwe ifi Natanaele ali, kabili alimutashishe. Ala kuti cawama sana nga ca kuti ifi fine e fyo Yesu alatumona!

10. Mulandu nshi tushilingile ukula-ambila abantu? (Yakobo 1:26)

¹⁰ Ifingi ifyo tufwile ukukonka ifyaba mu Amalumbo 15 filanda pa fyo tufwile ukulaumfwana na bantu banensu. Baibo pa Amalumbo 15:3 itila, uufwile ukuba umweni wa kwa Yehova “talanda ifya bufi pa bantu bambi, tacita umunankwe ifyabipa, kabili tonawila abanankwe ishina.” Nga tuleamba abantu kuti twabakalifya kabili te kuti tutwalilile ukuba abeni mwi tenti lya kwa Yehova.—Belengeni Yakobo 1:26.

11. Bushe ulwambo ni cinshi, kabili umuntu uwa lwambo uushilapila bamucita shani mu cilonganino ca kwa Yehova?

¹¹ Kemba wa malumbo alilandile pa kulanda ifya bufi pa bantu. Nga tulelanda ifya bufi pa bantu kuti twabonawila ishina. Abacita ulwambo abashilapila balabatamfya mu cilonganino ca kwa Yehova.—Yer. 17:10.

12-13. Kuti twaonawila shani abanensu ishina ukwabula no kuti twishibe? (Moneni ne cikope.)

¹² Na kabili Amalumbo 15:3 yatweba ukuti abeni ba kwa Yehova tabacita abanabo ifyabipa kabili tabonawila abanabo ishina. Bushe kuti twaonawila shani abanensu ishina?

¹³ Kuti twaonawila abanensu ishina nga ca kuti tulelanda ifyabipa pali bena ukwabula no  kuti twishibe. Ku ca kumwenako: (1) nkashi aleka ukubomba bupainiya bwa nshita yonse, (2) abaupana baleka ukubombela pa Bethel, nelyo (3) munyinefwe aleka ukuba eluda nelyo umubomfi utumikila. Te kuti ciwame ukulaeba abantu ukuti icilengele aba aba bwananyina baleke ukubomba iyi imilimo, nalimo ni co balicita ifyabipa. Kuti kwaba ifintu ifingi ifilengele ukuti baleke ukubomba iyi milimo ifyo tushingeshiba. Umweni mwi tenti lya kwa Yehova “tacita umunankwe ifyabipa, kabili tonawila abanankwe ishina.”

MULECINDIKA ABATIINA YEHOVA

14. Londololeni ifyo abeni ba kwa Yehova bakaana “ukuba pamo no muwelewele.”

¹⁴ Baibo pa Amalumbo 15:4 itweba ukuti cibusa wa kwa Yehova “tafwaya ukuba pamo no muwelewele.” Kuti twaishiba shani umuntu umuwelewele? Pa mulandu wa kuti tatwapwililika, te kuti twishibe umuntu umuwelewele. Cinshi twalandila ifi? Pantu kuti twatemwa abantu bamo pa mulandu wa kuti cilatwangukila ukumfwana nabo, lelo kuti twapata bambi pa mulandu wa kuti balatukalifya. Kanshi abo tushifwile ukulaumfwana nabo bantu abo Yehova amona ukuti ‘fiwelewele.’ (1 Kor. 5:11) Pa bantu abo Yehova amona ukuti fiwelewele paba abacita ifyabipa abashifwaya ukulapila, abashacindika ifyo twasuminamo, nelyo abafwaya twaleka ukuba ifibusa fya kwa Yehova.—Amapi. 13:20.

15. Finshi fimo twingacita pa kucindika “abatiina Yehova”?

¹⁵ Na kabili Baibo pa Amalumbo 15:4 itweba ukuti tulecindika “abatiina Yehova.” E ico tulaba ne cikuuku kabili tulacindika ifibusa fya kwa Yehova. (Rom. 12:10) Cimo ico Baibo yalandapo pa Amalumbo 15:4 ca kuti umweni mwi tenti lya kwa Yehova “alafikilisha ifyo alaya, nangu ca kuti ifintu fyamubipila.” Kuti twakalifya abantu nga ca kuti tatufikilishe ifyo twabalaile. (Mat. 5:37) Ku ca kumwenako, Yehova enekela abaupana ukufikilisha ifyo bapangene ilyo baleupana. Na kabili alatemwa sana nga ca kuti abafyashi balefikilisha ifyo balaya abana babo. Apo twalitemwa Yehova na bantu banensu, twakulaesha na maka yesu yonse ukufikilisha ifyo twalaya.

16. Ni nshila nshi na imbi iyo tucindikilamo ifibusa fya kwa Yehova?

¹⁶ Inshila na imbi iyo tucindikilamo ifibusa fya kwa Lesa, kulabapokelela ku mwesu no kuba bakapekape. (Rom. 12:13) Nga tuleangalila pamo na bamunyinefwe na bankashi, bucibusa bwesu na bena bulakoselako, na bucibusa bwesu na Yehova nabo bwine bulakoselako. Na kabili nga tulepokelela abeni, ninshi tulepashanya Yehova.

MWILATEMWA INDALAMA

17. Mulandu nshi Baibo yalandila pa ndalama mu Amalumbo 15?

¹⁷ Mu Amalumbo 15 tubelenga ukutila umweni wa kwa Yehova “takongwesha indalama shakwe pali kaloba, kabili tapoka amafisakanwa pa kuti afyenge uwa kaele.” (Amalu. 15:5) Mulandu nshi Baibo yalandila pa ndalama mu Amalumbo 15? Pantu nga twatemwa indalama, kuti twashicindika sana ukucila ifyo twacindika abantu na Lesa wine. (1 Tim. 6:10) Mu nshita balelemba Baibo, abantu bamo balefyenga bamunyinabo abali abapiina pantu balebakongwesha kaloba. Na kabili, bakapingula bamo balepoka amafisakanwa pa kuti bafyenge aba kaele. Yehova tatemwa nga ca kuti abantu balecita ifya musango uyu.—Esek. 22:12.

18. Mepusho nshi tulingile ukuipusha pa fyo tumona indalama? (AbaHebere 13:5)

¹⁸ Tufwile ukutontonkanyapo sana pa fyo  tumona indalama. Yipusheni amuti: ‘Bushe ilingi line ntontonkanya pa ndalama na pa fyo ningashitamo? Nga ca kuti nakongola indalama, bushe ndakokola ukubwesha? Bushe ntontonkanya ukuti uo nakongolako indalama taleshikabila? Bushe indalama isho nakwata shilenga ndeumfwa ukuti nalicindama ukucila abantu banandi? Bushe shilalenga cilenkosela ukuba kapekape? Bushe mona bamunyinefwe na bankashi ukuti balitemwisha indalama pa mulandu fye wa kuti balikwata icuma? Bushe mba fye cibusa wa bantu abakankaala? Bushe abantu abapiina mbamona ukuti tabalingile ukuba ifibusa fyandi?’ Tulingile ukuyipusha amepusho ya musango uyu pantu Yehova alitucindamika ifi atwita ukuba abeni bakwe. Kuti twatwalilila ukuba abeni ba kwa Yehova nga ca kuti tatutemenwe sana indalama. Nga tulecita ifi Yehova takatushe!—Belengeni AbaHebere 13:5.

YEHOVA ALITEMWA IFIBUSA FYAKWE

19. Cinshi Yehova afwaila tulekonka fyonse ifyaba mu Amalumbo 15?

¹⁹ Amalumbo 15 yapwa na mashiwi ya kuti: “Uucite fi takaipunune.” (Amalu. 15:5) Uwalembele amalumbo alilondolola ico Yehova afwaila ukuti tulekonka fyonse ifyaba mu Amalumbo 15. Yehova afwaya tuleba ne nsansa. E ico alatutungulula pa kuti engalatupaala kabili engalatucingilila.—Esa. 48:17.

20. Finshi abeni ba kwa Yehova bengenekela?

²⁰ Abeni ba kwa Yehova kuti baenekela ukuti ifintu fikabawamina ku ntanshi. Abasubwa aba cishinka bakaya ku muulu kabili bakekala mu “fifulo fya kwikalamo ifingi” ifyo Yesu abapekanishisha ku muulu. (Yoh. 14:2) Abakwata isubilo lya kwikala pano isonde bakalaikala ukulingana ne fyo Yehova alaya pa Ukusokolola 21:3. Cine cine Yehova alitucindamika ifi atwita pa kuti twingaba abeni mwi tenti lyakwe umuyayaya!