1. ?Olsem wanem Ol Sam 15:​1-5 i save halpem yumi?

 LONG las stadi, yumi lanem se ol man we oli givim laef blong olgeta long Jehova, oli save stap olsem ol gest long tent blong hem taem oli traehad blong fren gud wetem hem. ?Be yumi mas mekem wanem blong fren gud wetem hem? Ol Sam 15 i ansa long kwestin ya. (Ridim Ol Sam 15:​1-5.) Hem i tokbaot samting we yumi mas mekem blong fren gud wetem God.

2. ?Deved i tingbaot wanem taem hem i tokbaot tent blong Jehova?

² Ol Sam 15 i stat wetem ol kwestin ya: “O Jehova, ?hu i save stap olsem gest long tent blong yu? ?Hu i save stap long bigfala hil blong yu we i tabu?” (Sam 15:1) Taem Deved i tokbaot “tent” blong Jehova, maet hem i stap tingbaot tabenakel we i stap smoltaem long Gibeon. Mo tu, taem Deved i tokbaot ‘bigfala hil blong God we i tabu,’ maet hem i stap tokbaot Saeon long Jerusalem we i stap sam kilometa long saot blong Gibeon. Mo long ples ya, Deved i stanemap wan tent mo i putum bokis blong kontrak i stap long hem kasem taem we bambae oli bildim wan tempol.—2 Saml. 6:17.

3. ?From wanem yumi wantem kasem save moa long Ol Sam 15? (Mo tu, yu luk pija.)

³ I tru, plante man Isrel oli neva wok long tabenakel. Mo i gat smol man nomo oli go insaed long tent, long ples we bokis blong kontrak i stap long hem. Be olgeta gudfala man we oli wosipim Jehova, oli save stap olsem ol gest long tent blong hem taem oli gohed blong fren gud wetem hem. Hemia wan samting we yumi evriwan i wantem. Ol Sam 15 i tokbaot sam fasin we yumi mas wokem mo soemaot, blong yumi save gohed blong stap olsem ol fren blong Jehova.

 WOKBAOT FOLEM STRET FASIN MO MEKEM SAMTING WE I STRET

4. ?Olsem wanem yumi save se i no naf nomo blong baptaes? (Aesea 48:1)

⁴ Ol Sam 15:2 i tokbaot se wan fren blong God se hem i wan ‘man we i stap wokbaot folem stret fasin, mo i stap mekem ol samting we i stret.’ Tok ya “wokbaot” mo “mekem” i soemaot wan aksen we yumi mas gohed blong mekem. ?Be olsem wanem? ?Yumi naf blong “wokbaot folem stret fasin”? Yes. I no gat wan man we i stret gud olgeta, be sipos yumi mekem bes blong yumi blong obei long Jehova, bambae hem i luk yumi se yumi stap “wokbaot folem stret fasin.” Taem yumi givim laef blong yumi long God mo baptaes, yumi stat blong wokbaot wetem God. Eksampol, bifo nating se wan man i kamaot long nesen blong Isrel, be hemia i no min se hem i wan gest blong Jehova. Samfala oli singaot long Jehova, be oli no “mekem folem trutok mo stret fasin.” (Ridim Aesea 48:1.) Sipos wan man Isrel i wantem stap olsem gest blong Jehova, hem i mas save ol samting we Jehova i wantem mo i folem olgeta. Tede, sipos yumi wantem we Jehova i glad long yumi, i no naf nomo blong baptaes mo joen wetem Kristin kongregesen. Yumi mas gohed blong “mekem ol samting we i stret.” ?Olsem wanem blong mekem samting ya?

5. ?I minim wanem blong obei long Jehova long olgeta samting?

⁵ Long ae blong Jehova, wan ‘man we i stap wokbaot folem stret fasin mo i stap mekem ol samting we i stret,’ hem i mekem plante moa samting i bitim we hem i go nomo long ol miting long Haos Kingdom. (1 Saml. 15:22) Yumi mas traehad blong obei long God long evri haf blong laef blong yumi, nating sipos yumi stap yumi wan. (Prov. 3:6; Pri. 12:​13, 14) Yumi mas traehad blong obei long Jehova tu long ol smosmol samting we yumi ting se oli no impoten. Long rod ya, yumi soemaot se yumi rili lavem Jehova mo bambae hem i lavem yumi moa.—Jon 14:23; 1 Jon 5:3.

6. Folem Hibru 6:​10-12, ?wanem i moa impoten i bitim ol wok we yumi mekem bifo?

 ⁶ Jehova i glad tumas long yumi from ol samting we yumi mekem blong hem long ol yia we i pas. Be nating se yumi bin mekem ol gudfala wok bifo, hemia i no min se yumi save gohed blong stap olsem ol gest long tent blong Jehova. Yumi save luk samting ya long Hibru 6:​10-12. (Ridim.) Jehova i no fogetem ol gudfala wok we yumi bin mekem. Be hem i wantem se yumi gohed blong wosipim hem long fulhat blong yumi “gogo kasem en.” “Sipos yumi mekem olsem,” bambae yumi fren gud wetem hem olwe.—Gal. 6:9.

LONG HAT BLONG YU, YU MAS TOK TRU OLTAEM

7. ?I minim wanem se long hat blong yumi, yumi tok tru oltaem?

⁷ Wan man we i wantem kam wan gest long tent blong Jehova, ‘long hat blong hem, hem i mas tok tru oltaem.’ (Sam 15:2) Hemia i no minim nomo se hem i no mas giaman. Jehova i wantem se yumi tok tru long olgeta samting we yumi talem mo mekem. (Hib. 13:18) Hemia i impoten from we “Jehova i no laekem nating ol man blong trik, be Hem i fren gud wetem ol man we oli gat stret fasin.”—Prov. 3:32.

8. ?Yumi mas blokem wanem fasin?

⁸ Olgeta we ‘long hat blong olgeta, oli stap tok tru oltaem,’ oli obei oltaem long God nating se oli stap wetem ol narafala, o oli stap olgeta wan. (Aes. 29:13) Mo tu, oli no gat tu fes. Wan man we i gat tu fes, maet hem i stat blong gat tu tingting long ol loa blong Jehova. (Jem. 1:​5-8) Maet hem i no obei long Jehova long ol samting we hem i luk se oli no rili impoten. Mo sipos hem i luk se i no gat nogud frut i kamaot from, maet hem i stat blong mekem plante moa nogud samting. Nating sipos hem i ting se hem i stap wosipim God, be Jehova bambae i no glad long wosip blong hem. (Pri. 8:11) Be yumi, yumi wantem tok tru long olgeta samting.

9. ?Samting we i hapen long faswan taem we Jisas i mitim Nataniel, i tijim yumi long wanem? (Mo tu, yu luk pija.)

⁹ Samting we i hapen long faswan taem we Jisas i mitim Nataniel, i tijim yumi se i impoten we yumi tok tru oltaem long hat blong yumi. Taem Filip i tekem fren blong hem Nataniel i kam mitim Jisas, wan nambawan samting  i hapen. Nating se Jisas i neva mitim Nataniel, be hem i talem se: “Yufala i luk. Man ya i wan prapa man Isrel. Hem i no save giaman.” (Jon 1:47) Jisas i save se ol narafala disaepol blong hem tu oli tok tru. Be Nataniel i tok tru long hat blong hem. Nataniel i wan sinman olsem yumi, be hem i no gat tu fes mo hem i tok tru long olgeta samting. Jisas i luksave samting ya mo hem i talem gudfala toktok long hem from. !Bambae i naes tumas sipos Jisas i save tokbaot yumi tu olsem!

10. ?From wanem yumi mas lukaot gud long ol toktok blong yumi? (Jemes 1:26)

¹⁰ Bighaf blong ol samting we Ol Sam 15 i tokbaot, oli joen wetem ol fasin we yumi mekem long ol narafala. Ol Sam 15:3 i talem se wan gest long tent blong Jehova “i no yusum tang blong hem blong spolem nem blong ol narafala, hem i no mekem nogud long neba blong hem, mo i no talem ol giaman tok long saed blong ol fren blong hem.” Sipos yumi talem ol tok we i spolem ol narafala, hemia bambae i mekem oli harem nogud, mo yumi no moa save stap olsem ol gest long tent blong Jehova.—Ridim Jemes 1:26.

11. ?Spolem nem blong narafala i minim wanem? ?Mo wanem i save hapen long wan man olsem?

¹¹ Man blong raetem sam i tokbaot moa fasin ya blong spolem nem blong narafala. ?Be spolem nem blong narafala i minim wanem? Hemia i min se man i talem ol giaman tok we i spolem gudnem blong narafala. Sipos wan Kristin we i gat fasin ya i no tanem tingting blong hem, bambae kongregesen i putumaot hem.—Jer. 17:10.

12-13. ?Wanem sam eksampol we i save pulum yumi blong talem ol giaman tok? (Mo tu, yu luk pija.)

¹² Ol Sam 15:3 i talem tu se ol gest blong Jehova oli no mekem i nogud long ol neba blong olgeta, mo oli no talem ol giaman tok long saed blong ol fren blong olgeta. ?Be olsem wanem yumi save talem ol giaman tok long saed blong ol fren blong yumi?

¹³ Maet samtaem yumi mestem, nao yumi pasem wan giaman toktok long saed blong olgeta. Tingbaot ol eksampol ya: (1) wan sista i no moa mekem wok blong Jehova fultaem, (2) wan kapol i no moa wok long Betel, o (3) wan brata i no moa mekem wok blong elda o man blong givhan. ?Yu ting se i stret we  yumi talem long ol narafala se maet ol brata mo sista ya oli mekem wan samting we i no stret, taswe oli no moa mekem ol wok ya? Nogat, from maet yumi no save evri risen we i mekem se oli stop blong mekem ol wok ya. Mo tu, wan gest long tent blong Jehova “i no mekem nogud long neba blong hem, mo i no talem ol giaman tok long saed blong ol fren blong hem.”

TINGHAE LONG OLGETA WE OLI FRAET LONG JEHOVA

14. Eksplenem olsem wanem ol gest blong Jehova oli sakemaot “eni man we i rabis olgeta.”

¹⁴ Ol Sam 15:4 i talem se wan fren blong Jehova i “sakemaot eni man we i rabis olgeta.” ?Olsem wanem yumi save se wan man i rabis olgeta? Yumi no naf blong luksave sipos wan man i rabis olgeta o nogat. ?From wanem? From we yumi sinman, maet yumi laekem wan man we i isi blong yumi joen gud wetem hem, be yumi no laekem ol narafala we oli mekem yumi kros. Nating se i olsem, yumi mas sakemaot nomo ol man we Jehova i luk se oli “rabis olgeta.” (1 Kor. 5:11) Hemia i minim tu ol man we oli no tanem tingting blong olgeta from ol nogud fasin blong olgeta, oli no respektem bilif blong yumi, o traem blong spolem frensip blong yumi wetem Jehova.—Prov. 13:20.

15. ?Olsem wanem blong ona long “olgeta we oli stap fraet long Jehova”?

¹⁵ Ol Sam 15:4 i talem se yumi mas ona long “olgeta we oli stap fraet long Jehova.” Taswe, yumi lukaot rod blong kaen mo respektem ol fren blong Jehova. (Rom 12:10) ?Yumi mekem samting ya olsem wanem? Ol Sam 15:4 i tokbaot wan rod hemia se, wan gest long tent blong Jehova “i no stap jenisim promes blong hem, nating se hem i save kasem trabol from.” Taem yumi brekem promes blong yumi, hemia i save mekem ol narafala oli harem nogud. (Mat. 5:37) Eksampol, Jehova i wantem se ol gest blong hem oli holem promes we oli mekem taem oli mared. Mo tu, hem i glad taem ol perens oli traehad blong holem ol promes we oli mekem long ol pikinini blong olgeta. Lav we yumi gat long God mo ol neba blong yumi, bambae i pulum yumi blong holem ol promes we yumi mekem.

16. ?Wanem narafala rod blong ona long ol fren blong Jehova?

¹⁶ Wan narafala rod blong ona long ol fren blong God, hemia blong welkamem olgeta mo givim samting long olgeta. (Rom 12:13) Taem yumi spenem moa taem wetem ol brata mo sista, bambae yumi fren gud moa wetem olgeta mo antap moa wetem Jehova tu. Mo tu, taem yumi welkamem gud olgeta long haos blong yumi, yumi stap folem fasin blong Jehova.

YUMI NO MAS LAEKEM MANE TUMAS

17. ?From wanem Ol Sam 15 i tokbaot mane?

¹⁷ Man blong raetem sam i talem se, wan gest blong Jehova “i stap givim lonmane, we i no mekem man i pem intres, mo hem i no save akseptem dotimane blong agensem man we i no gat fol.” (Sam 15:5) ?From wanem man blong raetem sam i tokbaot mane? Hemia from se sipos yumi no gat stret tingting long saed blong mane, bambae yumi save mekem narafala i harem nogud mo spolem frensip blong yumi wetem Jehova. (1 Tim. 6:10) Long Isrel bifo, samfala oli mekem i no stret long ol brata blong olgeta we oli pua, taem oli askem olgeta blong pem intres blong ol lonmane we oli karem. Mo tu, sam jaj oli glad nomo blong kasem dotimane blong jajem ol man we oli no gat fol, long fasin we i  no stret. Ol fasin olsem, Jehova i no laekem nating.—Esik. 22:12.

18. ?Wanem ol kwestin we yumi save askem blong jekem tingting we yumi gat long mane? (Hibru 13:5)

¹⁸ I gud blong jekem tingting we yumi wanwan i gat long saed blong mane. Maet yu save askem yu wan se: ‘?Mi tingbaot mane oltaem mo samting we mi save pem? ?Sipos mi tekem mane long narafala, mi mi slo blong givimbak from mi gat tingting ya se hem i no nidim? ?Mi mi harem se mi impoten taem mi gat plante mane, be mi faenem i had blong givim samting long narafala? ?Taem mi luk se ol brata mo sista oli gat plante samting, mi mi jajem olgeta se oli laekem mane moa i bitim Jehova? ?Mi mi fren gud moa wetem olgeta we oli rij, be mi no intres tumas long olgeta we oli pua?’ I wan bigfala ona blong stap olsem ol gest blong Jehova, taswe i impoten we yumi tingbaot ol kwestin ya. Sipos yumi blokem fasin ya blong laekem mane tumas, yumi save gohed blong stap olsem ol gest blong Jehova, mo Jehova bambae i neva lego yumi.—Ridim Hibru 13:5.

JEHOVA I LAVEM OL FREN BLONG HEM

19. ?From wanem Jehova i wantem se yumi mekem ol samting we Ol Sam 15 i tokbaot?

¹⁹ Ol Sam 15 i finis wetem promes ya se: “Man we i stap mekem ol samting ya, bambae i no gat wan samting i seksekem hem.” (Sam 15:5) Long vas ya, man blong raetem sam i eksplenem from wanem yumi mas mekem evri samting we Jehova i talem. Hemia from we hem i wantem se yumi glad. Taem yumi mekem samting we God i askem , yumi gat wan gudfala laef mo bambae hem i protektem yumi.—Aes. 48:17.

20. ?Ol gest blong Jehova oli wet long wanem?

²⁰ Ol gest we Jehova i glad long olgeta, oli stap wet long wan gudfala fiuja. Olgeta we tabu spirit i makemaot olgeta, bambae oli go long ples ya we i gat “plante spes i stap” we Jisas i rerem finis blong olgeta long heven. (Jon 14:2) Mo olgeta we oli gat hop blong laef olwe long wol, oli stap wet long promes ya we i stap long Revelesen 21:3. !Yes, yumi evriwan i harem se i wan bigfala ona we Jehova i invaetem yumi blong kam ol gest long tent blong hem blong olwe!