1. Engkai maka perlu sibahas Masmur 15:​1-5?

 BAS artikel sebelumna, enggo sibahas maka kalak si banci jadi tamu Jahwe bas kemahNa eme kalak si enggo mbaktiken diri man Jahwe janah tetap rembak ras Ia. Tapi uga carana gelah banci kita terus jadi tamu bas kemah Jahwe? Jawapenna lit bas Masmur 15. (Baca Masmur 15:​1-5.) Arah masmur e, banci siteh kai si arus silakoken gelah banci kita rembak ras Dibata.

2. Banci saja kai si ukuri Daud sanga katakenna kerna kemah Jahwe?

² Masmur 15 ibenaken alu penungkunen enda, “O Jahwe, ise si banci jadi tamu bas kemahNdu? Ise si banci tading bas gunungNdu si badia?” (Ms. 15:1) Sanga ikataken Daud ‘kemah’ Jahwe, banci saja si ukurina eme kemah ingan ersembah, si paksa si e lit bas Gibeon. Sanga turiken Daud kerna ‘gunung Dibata si badia,’ banci saja maksudna Gunung Sion si lit i Jerusalem. Gunung e dauhna piga-piga kilometer i sebelah selatan Gibeon. I je, iban Daud sada kemah jadi ingan Peti Perjanjin seh ngasa ibangun rumah pertoton.—2 Sam. 6:17.

3. Engkai maka merhat kita mpelajari Masmur 15? (Nen ka gambar.)

³ Memang, teremen kalak Israel labo ngelayani bas kemah ingan ersembah, janah sitik ngenca si banci masuk ku kemah ingan Peti Perjanjin e. Tapi kerina umat Jahwe  si setia banci jadi tamu bas kemah Jahwe adi kalak e enggo jadi temanNa janah tetap rembak ras Ia. Bage me sura-surata kerina. Bas Masmur 15 lit ikataken kerna kai si perlu silakoken gelah tetap jadi teman Jahwe.

SETIA RAS NGELAKOKEN KAI SI BENAR

4. Ja nari siteh maka labo bias kita iperidiken saja? (Jesaya 48:1)

⁴ Bas Masmur 15:​2, teman Dibata ikataken ‘kalak si setia ras si ngelakoken kai si benar.’ Si e arus terus silakoken. Tapi banci kin kita tuhu-tuhu jadi “kalak si setia?” Banci. Amin pe kita la sempurna, banci ianggap Jahwe kita “kalak si setia” adi siusahaken asa bancina matuhi Ia. Sanga sibaktiken dirita man Dibata janah iperidiken kita, si e awalna denga. Contohna bas jaman Pustaka, labo perban sekalak jelma bangsa Israel, enggo pasti ia jadi tamu Jahwe. Lit si erlebuh man Jahwe, tapi labo “bas kebenaren ras keadilen.” (Baca Jesaya 48:1.) Kalak Israel situhu-tuhu atena jadi teman Jahwe, arus tehna perentah Jahwe janah dalankenna. Bage ka pe gundari, gelah banci kita rembak ras Jahwe, labo bias kita iperidiken ras itandai selaku Saksi Jahwe. Arus ka terus ‘silakoken kai si benar.’ Kai maksudna?

5. Kai maksudna sipatuhi Jahwe bas kerina perbahanenta?

⁵ Menurut Jahwe, kalak si ratur reh ku perpulungen, lenga bo banci ikataken “kalak si setia” ras “ngelakoken kai si benar.” (1 Sam. 15:22) Emaka, arus terus siusahaken patuh man Jahwe bas kerina perbahanenta termasuk sanga kita sisada. (Kua. 3:6; Peng. 12:​13, 14) Arus ka kita patuh man Jahwe termasuk bas hal-hal si kurang penting siakap. Adi  silakoken e, sibuktiken maka tuhu-tuhu keleng ateta Ia. Alu bage, reh kelengna ateNa kita.—Joh. 14:23; 1 Joh. 5:3.

6. Menurut Heber 6:​10-12, kai si pentingen asangken kerina si mehuli si enggo silakoken?

⁶ Iergai Jahwe kel kai si enggo silakoken man baNa. Tapi, kerina perbahanenta e labo bias erban kita tetap jadi tamu bas kemah Jahwe. Jelas ituriken kerna si e bas Heber 6:​10-12. (Baca.) Memang, labo ilupaken Jahwe kerina si mehuli si enggo silakoken, tapi ateNa terus min silayani Ia alu bulat ukur “seh ku kedungenna.” Alu bage, banci kita jadi temanNa seh rasa lalap “adi la kita nyerah.”—Gal. 6:9.

KATAKENLAH KAI SI BENAR BAS PUSUHNDU

7. Kai maksudna ngataken kai si benar bas pusuhta?

⁷ Kalak si atena jadi tamu bas kemah Jahwe arus “ngataken kai si benar bas pusuhna.” (Ms. 15:2) Enda labo saja maksudna la kita erbual. Ate Jahwe jujur min kita bas kerina rananta ras perbahanenta. (Heb. 13:18) Enda penting, “sebap ciga ate Jahwe man kalak si licik, tapi kompak Ia erteman ras kalak si bujur.”—Kua. 3:32.

8. Perbahanen kai si arus sipedauh?

⁸ Kalak si “ngataken kai si benar bas pusuhna” patuh man Jahwe sanga lit si ngidahsa ntah pe sanga ia sisada. (Jes. 29:13) La kalak e pura-pura ngelakoken kai si mehuli. Tapi, kalak si munapik banci saja mulai erpengakap maka perentah Jahwe labo si mehulina. (Jak. 1:​5-8) Banci saja la patuhina Jahwe bas hal-hal si kurang penting kapna. Kenca si e, perban la mis datna akibat arah perbahanenna si la patuh e, mulai lakokenna si terparahen. Amin pe akapna ia ngelayani Jahwe, labo aloken Jahwe pelayanenna e. (Peng. 8:11) Emaka, jujur ateta bas kerinana.

9. Kai si terjadi sanga tangtangna Jesus jumpa ras Natanael, janah kai pelajarenna? (Nen ka gambar.)

⁹ Penting kel ngataken kai si benar bas  pusuhta. Si e banci siidah arah kai si terjadi sanga iajak Pilipus temanna, Natanael, jumpa ras Jesus. Amin pe Jesus lenga pernah jumpa ras Natanael, nina Jesus, “Ia me kalak Israel si asli, ia labo kalak si munapik.” (Joh. 1:47) Memang, rasul-rasul Jesus si debanna pe labo munapik, tapi sipat e jelas kel teridah bas Natanael. Bali bagi kita, Natanael pe labo sempurna. Tapi, jujur ia bas kerinana janah la ia munapik. Mejile kel akap Jesus sipatna e, emaka pujina Natanael. Kita pe pasti merhat itandai Jesus selaku kalak si la munapik.

10. Engkai maka kita arus hati-hati kerna rananta? (Jakup 1:26)

¹⁰ Buen perentah si ituriken bas Masmur 15 eme kerna perbahanenta man kalak si deban. Bas Masmur 15:3 ikataken maka tamu bas kemah Jahwe eme kalak si “la pitnahna kalak alu rananna, la ia jahat man kalak, la banna mela temanna.” Adi sipitnah kalak si deban, banci getem kel pusuhna janah kita pe lanai banci jadi tamu bas kemah Jahwe.—Baca Jakup 1:26.

11. Kai nge pitnah e, janah kai nge si banci terjadi man tukang pitnah si la nggit robah?

¹¹ Jelas kel ikataken pemasmur gelah ula kita jadi tukang pitnah. Kai kin pitnah e? Pitnah eme kata-kata si la tuhu si banci ncedai gelar kalak. Tukang pitnah si la nggit robah banci ipedarat arah runggun nari.—Jer. 17:10.

12-13. Bas situasi kai saja nge banci kita la sengaja erban mela temanta? (Nen ka gambar.)

¹² Masmur 15:3 pe ngingetken kita maka tamu Jahwe la ia jahat man kalak janah la banna mela temanna. Kai maksudna?

¹³ Banci saja la kita sengaja enggo siban mela temanta alu nceritaken  informasi si negatip. Contohna: (1) sekalak turang seninata si diberu lanai jadi perintis, (2) sepasang turang seninata lanai ngelayani i Betel, ntah (3) sekalak turang seninata lanai jadi pertua ntah pe sinampati runggun. La cocok adi sikataken maka kalak e dat perubahen tugas perban lit si salah si lakokenna. Banci saja lit alasen si la siteh. Selain si e, tamu Jahwe ‘la ia jahat man kalak janah la banna mela temanna.’

MEHAMAT MAN KALAK SI MBIAR MAN JAHWE

14. Jelasken kai maksudna tamu Jahwe la nggit ngaloken “kalak si itulak Dibata.”

¹⁴ Bas Masmur 15:4 ikataken maka teman Jahwe ‘la nggit ngaloken kalak si itulak Dibata.’ Tapi labo banci kita si nentuken ise kalak si itulak Dibata. Engkai? Perban kita la sempurna, meriah siakap erteman ras kalak si cocok ras kita. Tapi la kita nggit erteman ras kalak si la teta bage. Jadi, si la banci sitemani eme kalak “si itulak” Jahwe ngenca. (1 Kor. 5:11) Enda termasuk kalak si lalap ngelakoken si la mehuli janah la ia nggit robah, kalak si la ngergai kinitekenta, ntah pe kalak si lemah banna hubungenta ras Jahwe.—Kua. 13:20.

15. Uga carana mehamat man “kalak si mbiar man Jahwe”?

¹⁵ Selain si e, bas Masmur 15:4 ikataken maka kita arus mehamat man “kalak si mbiar man Jahwe.” Emaka, sidarami kesempaten guna ncidahken kiniulin janah siergai kalak si jadi teman Jahwe. (Rom. 12:10) Uga carana? Salah sada carana ituriken bas Masmur 15:4. I je ikataken maka kalak si jadi tamu bas kemah Jahwe “tepatina janjina amin pe ia rugi.” Adi la sitepati janjita, banci ceda siban ukur kalak si deban. (Mat. 5:37) Contohna, ipindo Jahwe gelah tamuNa si enggo erjabu tepatina janji perjabunna. Selain si e, ate Jahwe, orang tua pe tepatina janjina man anakna. Perban keleng ateta Dibata bage pe kalak si deban, siusahaken asa bancina nepati janjita.

16. Kai cara si deban mehamat kita man teman-teman Jahwe?

¹⁶ Cara si deban ncidahken maka mehamat kita man teman-teman Jahwe eme adi nggit kita ngalo-ngalo kalak janah nggit mere. (Rom. 12:13) Banci kita ergaul ras turang senina sanga perpulungen bage pe sanga bas pelayanen. Tapi banci ka sidarami kesempaten si deban guna ergaul ras turang senina gelah reh rembakna kita ras kalak e bage pe ras Jahwe. Si pentingna, adi nggit kita ngalo-ngalo kalak, siusih me Jahwe.

ULA MATA DUITEN

17. Engkai maka bas Masmur 15 lit ituriken kerna sen?

¹⁷ Bas Masmur 15 ituriken maka tamu Jahwe “pinjamkenna senna tapi la banna erbunga, la ia nggit isogok guna nalahken si la ersalah.” (Ms. 15:5) Engkai maka bas masmur e lit ituriken kerna sen? Perban adi la seimbang perukurenta kerna sen, banci dungna ceda hubungenta ras kalak si deban bage pe ras Jahwe. (1 Tim. 6:10) Bas jaman Pustaka, lit kalak si la adil perbahanenna man turang seninana si mesera. Pinjamkenna sen man kalak e tapi galang banna bungana. Selain si e, lit ka hakim si ngaloken sogok janah hakimina kalak si la ersalah alu la adil. Perbahanen  si bage segat kel ate Jahwe.—Esek. 22:12.

18. Penungkunen kai saja si banci nampati kita mereksa cara rukurta kerna sen? (Heber 13:5)

¹⁸ Perlu sipereksa cara rukurta kerna sen. Banci siukuri penungkunen-penungkunen enda: ‘Rusur nge kuukuri kerna sen bage pe kai si banci kutukur? Adi kupinjam sen kalak, ndekah nge maka kugalari perban kuakap labo ia perlu sen? Adi ersen aku, hebaten nge kuakap aku asangken kalak si deban? Pelit nge aku? Kuanggap nge turang seninaku mata duiten perban lit senna? Ras kalak si bayak saja nge aku erteman, janah la aku nggit erteman ras kalak si mesera?’ Luar biasa kel kesempatenta banci jadi tamu Jahwe. Tapi, banci kita tetap jadi tamu Jahwe adi sipastiken maka la kita mata duiten. Alu bage, ndigan pe labo kita tadingken Jahwe!—Baca Heber 13:5.

KELENG ATE JAHWE TEMAN-TEMANNA

19. Engkai maka isuruh Jahwe kita ngelakoken kai si itulis bas Masmur 15?

¹⁹ Bas akhir Masmur 15 lit sada janji: “Kalak si ngelakoken si e kerina tetap pagi paguh.” (Ms. 15:5) Je nari siteh maka isuruh Jahwe kita ndalanken kai si itulis bas Masmur 15 perban ateNa meriah min ukurta. Adi silakoken kai si pindo Jahwe, reh ulina geluhta janah lindungi Jahwe kita.—Jes. 48:17.

20. Kai nge pagi si idat tamu Jahwe?

²⁰ Luar biasa kel masa depan si banci idat tamu Jahwe. Man kalak si ipilih guna nggeluh i surga, enggo isikapken Jesus “ingan” man kalak e bas surga. (Joh. 14:2) Kalak si erpengarapen guna nggeluh i doni, timaina janji bas Ketangkasen 21:3 terjadi. Luar biasa kel perban undang Jahwe kita jadi tamu bas kemahNa seh rasa lalap!