1. Aval avé kalate Besam 15:​1-5 a ne volô bia?

 AYÉ’É ya mvus, bi nga yé’é na bôte ba ve bebiene ngumba be Yéhôva a yemete élat jap a nye, be ne ngule ya bo beyeñe ya éndelé jé. Ve jé bi ne bo asu na bi bo beyeñe bé? Kalate Besam 15 a ne ye’ele bia abui mame mfa’a ôte. (Lañe’e Besam 15:​1-5.) Sam ate a ne ve bia abui miñye’elan é ne volô bia na bi subu Zambe bebé.

2. Jé é nga tindi David, ntili besam na a kobô ajô ya nda éndélé Yéhôva?

² Besam kabetôlô 15 a taté a mejô ma: “A Yéhôva, za a ye tabe nda éndelé jôé? Za a ye tabe nkôle wôé ô ne étyi?” (Bsa. 15:1) Éyoñe David, ntili Besam a mbe a kobô ajô “nda éndelé” Yéhôva, éko éziñ a mbe a simesa’an éyoñe tabernacle a mbe e Gabaon. David fe a kobô ajô “nkôle” Zambe “ô ne étyi,” éko éziñ a mbe a kômbô’ô kobô ajô ya nda éndelé é mbe nkôle Sion e Jérusalem. Asu na môt a kôlô vôm ate a ke Sud ya Gabaon, a mbe a yiane wulu abui bekilimeta, vôm ate nnye David a nga telé nda éndelé asu na a ba’ale éwolé ya élat azukui éyoñe be nga lôñe Temple.—2 Sam. 6:17.

3. Amu jé kalate besam 15 a ne mfi asu dangan? (Fombô’ô fe fôtô.)

³ É ne été na, abui be Israëlite é nji be é bili ôva’a ngule ya ke saé Temple, fo’o ve abime bôt éziñe nde é mbe é nyiine wôé. Ve bebo bisaé be Yéhôva bese be mbe ve bo beyeñe ya nda éndelé jé éyoñe be mbe be kañese bo bemvôé bé a ba’ale élat a nye. A ne jame bia bese bia kômbô bo. Kalate Besam kabetôlô 15 a kobô ajô mefulu méziñe bia bese  bia yiane jeñe na liti a mimboone miangan asu na bi ke ôsu a bo bemvôé be Yéhôva.

WULU’U AVAL É NE MVO’É A BO’O MAME ME NE ZÔSÔ

4. Amu jé bi ne jô na sake nduban étame ñwô Yéhôva a yange be bia? (Ésaïe 48:1)

⁴ Kalate Besam 15:2 a liti na, môt a ne mvôé Zambe a ne nyu a “wulu mvo’é a bo zôsô.” A ne jame bia bese bia yiane ke ôsu a bo. Ve ye bi ne fo’o kôme ‘wulu zôsô été?’ Ôwé. Yéhôva a ye ke ôsu a yene bia ane bôte ba “wulu zôsô” nge bia ke ôsu a ve ngule jangan ése na bi bo nye mewôk, akusa bo môta binam éziñ a nji bo zôsô ne tiññ. Éyoñe bia ve biabebiene ngumba be Zambe a duban, a ne fo’o ve atata’a ya dulu bia zu wulu a Zambe. Éve’an é ne na melu mvus, môt a nji be a bo’o nneñ Yéhôva été été fo’o ve amu na a ne mone Israëlite. Bôte béziñe be mbe be loone nye ve sake a “benya mejôô, nge a zôsô.” (Lañe’e Ésaïe 48:1.) Asu na bone be Israël be kôme liti na ba yi na ba bo beyeñe be Yéhôva, be mbe be yiane yeme nkômbane Yéhôva a jeñe na be bo avale yi. Avale te da da, asu na bi bu’uban a ébotane Yéhôva melu ma, bi nji yiane su’u ve na bia duban a tabe bisulan. Bia yiane ke ôsu “a bo zôsô.” Nalé a tinan aya?

5. Jé ja tinane na e bo Yéhôva mewô’ô mame mese?

⁵ E mise me Yéhôva, “e wulu mvo’é” a “bo zôsô” a dañe nyoñane ngap a mame ma boban Aba Éjôé mban. (1 Sam. 15:22) Bia yiane bibane na bi bo Zambe mewô’ô bone be mame bese ya ényiñe jangan, to’o éyoñe bi ne étam. (Mink. 3:6; Eccl. 12:​13, 14) É ne mfi na bi bo Yéhôva mewôk, to’o mame bia yene na me nji dañe mfi. Éyoñe bia bo de, bia liti na bia nye’e nye a nye fe a ye nye’e bia.—Jean 14:23; 1 Jean 5:3.

6. Avale kalate Behébreu 6:​10-12 a liti, jé ja dañe mfi a lôte mbamba be mame bi nga bo melu mvus?

 ⁶ Yéhôva a kôme nye’e mbamba be mame bese bi nga bo asu dé melu mvus. Ve sa ke mbamba be mame bete étame mbe ba ye bo na bi ne ke ôsu a bo beyeñe ya nda éndelé Yéhôva. Nde Kalate Zambe a kôme liti nalé e kalate Behébreu 6:​10-12. (Lañek.) Yéhôva a vuane ki mbamba be mame bi nga bo melu mvus. Ve a yi na bi ke ôsu a kañe nye a nleme wongan ôse “akekui asu’ulan.” A ye bo mvôé jangane nnôm éto “nge bia bo te tek.”—Gal. 6:9.

KOBÔ’Ô BENYA MEJÔÔ BA SO NLEME WÔÉ ÉTÉ

7. Jé ja tinane na e kobô benya mejôô a nleme wongan ôse?

⁷ Môt a yi na a bo nneñe ya nda éndelé Yéhôva, a yiane bo nyu a “kobô benya mejôô nleme wé été.” (Bsa. 15:2) Nalé a tinane na, bi nji yiane su’u ve na bia kobô benya mejôô, Yéhôva a yi na bi bo zôsô mame mese bia jô a mame bia bo. (Héb. 13:18) Jam éte é ne nya mfii, “amu ékotekote môt é ne mbia jôme be Yéhova; Ve a ñbwaane bôt be ne mvaé.”—Mink. 3:32.

8. Avale mimboon avé bia yiane sa’ale?

⁸ Bôte ba ‘kobô benya mejôô a nlem ôse’ ba bo ke Zambe mewôk ve éyoñe be ne bôt été, éyoñe ke be ne étame be nga tyame metiñe mé. (Ésa. 29:13) Ba sa’ale na be bo bôte medu’an. Môte medu’an a ne taté na a simesane na metiñe me Yéhôva me nji bo mvo’é kom ése. (Jacq. 1:​5-8) A ne taté na a bo Yéhôva melo mam a simesane na me nji dañe bo mfi. Mvuse ya valé, nge da yené ve ane mbia jam éziñ a nji kui nye éyoñ a te bo melo, a ne taté na a bo mame ma dañ abé. Akusa bo a simesane na a ngenane mbo ésaé Zambe, ve Yéhôva a ye ke kañese ékaña’a jé. (Eccl. 8:11) Ve bi bia yi na bi bo zôsô mfa’a ya mame mese.

9. Jé bi ne yé’é a lat a éyoñ ôsu Yésus ba Nathanaël be nga tôban? (Fombô’ô fe fôtô.)

⁹ Bi ne ñhe kôme yé’é mfi ya bi ‘nlem ô ne zôsô’ éyoñe bia yene jam é nga lôtan éyoñ ôsu Yésus a nga tôbane Nathanaël. Éyoñe Philippe a nga loone mvôé jé  Nathanaël na be ke tôbane Yésus, beta jam éziñ a nga boban. Akusa bo Yésus ba Nathanaël be mbe be ngenane teke tame yenane môs éziñ, ve Yésus a nga jô nye na: “Yene’e nya mone ya Israël a ne teke medu’an.” (Jean 1:47) É ne été na Yésus a mbe a yeme’e na beyé’é bé bevok be ne zôsô, ve Nathanaël a mbe a dañe zôsô. Aval ane bia, Nathanaël fe a mbe a be’e metyi ya abé, ve a nji be môta medu’an. Yésus a nga nye’e mimboone mi mame mié jôme te nje a nga se’e Nathanaël. É ne été na bia bese bia ye wô’ô mvaé nge Yésus a se’e bia avale te!

10. Amu jé bia yiane sa’ale fulu ya koñe bôte bevok? (Jacques 1:26)

¹⁰ Abui miñye’elane bia koone de kalate Besam 15 mia liti avale bia yiane nyiñ a bôte bevok. Kalate Besam 15:3 a liti na nneñe ya nda endélé Yéhôva a ne “nyu a ne te [koñe] a ôyeme wôé, nge bo mvôé jé abé, nge kalan ajô ba tote môt ba nye be to.” Nge bia koñe bôte bevok, jam éte é ne balé be a bo na bi bo te beta bo beyeñe ya nda éndélé Yéhôva.—Lañe’e Jacques 1:26.

11. Jé ja tinane na e koñe môt, a jé é ne kui môt a koñe bôt a teke jôban?

¹¹ Ntili besam a kobô ajô nkoñane bôt. Jé ja tinane na e koñe môt? Be wô’ô dañe jô na ba te koñe môt éyoñe ba kobô mame me ne minsos a lat a môt ate, mame me ne ngule ya ve nye éyôlé mvit. Nge môt a koñe bôte bevok a teke jôban, be ne telé nye feñ ékôane bekristen.—Jér. 17:10.

12-13. Mame mevé me ne bo na bi ve bemvôé bangan éyôlé mvite teke vañ? (Fombô’ô fe fôtô.)

¹² Kalate Besam 15:3 a jô fe na beyeñe be Yéhôva ba bo ki bôte bevo’o abé a ba ve ki biyôlé bemvôé bap mvit. Nalé a tinan aya?

¹³ É ne kui na bi ve éyôlé môt éziñe mvite teke vañ éyoñe bia kalane mefoé me ne minsos a lat a môt ate. Bi tame nyoñe  bone bive’ane bi, bia wô’ô na: (1) sita éziñ a nji beta bo nkpwa’a mefane ya éyoñ ése, (2) na mojañ éziñe ba ngale be nji beta saé Béthel, nge ke (3) na mojañ éziñ a nji beta bo mvendé nge ki mvolô ya ékôane bekristen. Da ye bo angôndô ya mbia jame na bi ke bia kate bôte bevo’o na bobejañ a besita bete ba ke bo jam é ne abé jôme te nje été jap ja ke tyendé. Éko éziñe bi nji yeme mame ma ke soo mintyendane mite. Nde fe môt a ne nneñe ya nda éndélé Yéhôva “a bo ki bôte bevo’o mame me ne abé nge ke ve éyôlé bemvôé bé mvit.”

SEME’ENE BÔTE BA KO YÉHÔVA WOÑ

14. Za a ne mbia môte beyeñe be Yéhôva ba yiane sa’ale, timi’in.

¹⁴ Kalate Besam 15:4 a jô na mvôé Yéhôva ja ‘tebe mbia môt ôyap.’ Aval avé bi ne yeme za a ne mbia môt? Nge bia belane ñyenane mame wongan biabebien, bi vo’o yeme nge môt a ne mbia môt nge momo. Amu jé? Mbôle bi be’e metyi ya abé é ne kui na bi nye’e bôte bia simesane na bia be be bi ne wô’ane mame tyi’ibi, a taté na bia vini ba ba tya’a bia nlem. Jôme te bia yiane sa’ale ve bôte Yéhôva a yen ane “mbia be bôt.” (1 Cor. 5:11) Bôte bete be ne ba ba bo mbia be mame teke jôban, ba ba biasé mame bia buni a ba ba jeñe na be ndamane mbamba élate bi bili a Yéhôva.—Mink. 13:20.

15. Aval avé bi ne liti na bia semé “bôte ba ko Yéhôva woñ?”

¹⁵ Kalate Besam 15:4 a jô na bia yiane semé bôte “ba ko Yéhôva woñ.” Jôme te nje bia jeñe mezene mese na bi bo mbamba nlem a bemvôé be Yéhôva a semé be. (Rom. 12:10) Aval avé? Jame da bi ne bo é ne kalate Besam 15:​4, a liti na môt a ne nneñe ya nda éndélé Yéhôva a ne nyu a tôé ngaka’a jé, to’o da sili na a tôbane minjuk. Éyoñe bia tôé ki bengaka’a bangan, nalé a ne ndeñele bôte bevok. (Matt. 5:37) Éve’an é ne na, Yéhôva a yi na beyeñe bé be semé ngaka’a be nga bo éyoñe be nga luk. Yéhôva a wô’ô fe angôndô ya mevak éyoñe bebiaé ba ve ngule jap ése na be tôé bengaka’a ba bo bone bap. Amu bia nye’e Zambe a bôte bevok, bia ye ve ngule jangan ése na bi tôé bengaka’a bia bo.

16. Aval avé éfe bi ne liti na bia semé bemvôé be Yéhôva?

¹⁶ Zene fe bi ne liti na bia semé bemvôé be Yéhôva é ne éyoñe bia yeme nyoñe bôt a éyoñe bi ne akap. (Rom. 12:13) Ane ô vaa éyoñe bia lôte bisulan a minkañete a bobejañ a besita, nge bia lôte fe éyoñ a be na bi bo mame mefe, bia ye tu’a subu be bebé a subu fe Yéhôva bebé. Nde fe éyoñe bia yeme nyoñe bôt, bia vu Yéhôva.

SA’ALE NYE’ANE MONÉ

17. Amu jé kalate Besam 15 a kobô ajô moné?

¹⁷ Kalate Zambe a jô na nneñe Yéhôva a ne nyu ‘a bo te kôlé moné wé amu nsenge, nge kañese ébotezel mfa’a ya kpwé môt a ne te bijô.’ (Bsa. 15:5) Amu jé sam nyi a kobô ajô moné? Amu nge bi dañe beme ôsimesane wongan moné, a ne su’ulane bo jame da dañe mfi ényiñe jangan a lôte bôt a nalé a ne ndaman élate jangan a Zambe. (1 Tim. 6:10) Melu mvus, bôte béziñe be mbe be dimine nyoñe bobenyañe bap be mbe azoé, be mbe be jô’ô be na be ya’an a lôt abime moné be nga kôlé be. Nde fe betyi’i mejô béziñe be nga kañese ébotezel a tyi’i bingôngole bi bôte mejô ékotekot été. Yéhôva a vini avale mboone te angôndô.—Ézé. 22:12.

18. Minsili mivé mi ne volô bia na bi yem avale bia yene moné? (Behébreu 13:5)

¹⁸ É ne mfi na bi fas avale bia yene  moné. Sili’i womiene minsili mi: ‘Ye ma fas ajô moné éyoñ ése a biôme me ne kus a nye? Éyoñe ma kôlé moné ye é wô’ô bo ma ayaé ya bulane nye amu ma simesane na môt a nga kôlé ma nye a ngenane teke kômbô belane moné wé? Éyoñe me bili moné ye ma yene na ma dañe bôte bevok, a ye me wô’ô bo ôkak? Ye me wô’ô jô na bobejañ a besita be ne ôzañ akum amu be bili moné? Ye ma jeñe na me bi ve bemvôé be bili abui moné me te ke ki dañe bisi bôte be ne azoé?’ Bi nga bi beta mvome ya bo beyeñe be Yéhôva. Bi ne ngule ya kamane mvom éte éyoñe bia vak a abime bi bili. Nge bi bo nalé, Yéhôva a ye ke bia lume mvuse môs éziñ!—Lañe’e Behébreu 13:5.

YÉHÔVA A NYE’E BEMVÔÉ BÉ

19. Amu jé Yéhôva a yi na bi bo mame mese bia koone me kalate Besam 15?

¹⁹ Kalate Besam 15 a man a ngaka’a nyi: “Nyô a bo mame ma a ye bo te fô’ôsane nnôm éto.” (Bsa. 15:5) Ntili besam a kate bia amu jé Yéhôva a yi na bi bo mame bia ke yene Kalate ate. Yéhôva a yi na bi nyiñe meva’a été. Jôme te éyoñe bia bo mame Zambe a yi na bi bo, bia bi mbamba ényiñ a a ba’ale bia.—Ésa. 48:17.

20. Mbamba be mame bevé ba yange beyeñe be Yéhôva?

²⁰ Beyeñe be Yéhôva bese ba yange mbamba be mame melu ma zu. Bôte be ne miñwo’one bé ke nyiñe yôp été, vôme Yésus a nga kôme be “abui bevôme ya tabe.” (Jean 14:2) Ba ki be bili ndi nleme ya nyiñe si va, ba yange a ôjeja’a ôse na ngaka’a bia koone je Nlitan 21:3 é tôéban. A ne beta jame mevak na Yéhôva a bañete bia na bi bo beyeñe ya nda éndélé jé nnôm éto!