1. How Saam 15:​1-5 ku help wi?

 EENA di laas aatikl, wi mi laan dat dehn wan weh don geh baptaiz ahn weh werk haad fi ga wahn kloas frenship wid Jehoava ku bee wahn ges eena ih spirichwal tent. Bot da how wee ku du dat? (Reed Saam 15:​1-5.) Saam chapta 15 tel wi weh wi ku du fi help wi kantinyu jraa kloasa tu Jehoava.

2. Weh Dayvid praabli mi-di tink bowt wen ih mi taak bowt Jehoava tent?

² Saam 15 staat aaf di seh: “Oa Jehoava, da hoo ku bee wahn ges eena yu tent fareva? Da hoo ku liv pahn yu hoali mongtin?” (Saa. 15:1) Wen Dayvid mi-di taak bowt Jehoava “tent,” ih ku bee dat Dayvid mi akchwali di taak bowt di tabernakl weh mi deh da Gibiyan. Ahn wen ih mi seh Jehoava “hoali mongtin,” ih mi praabli di rifaa tu Mongt Zaiyan da Jeroosalem weh deh wahn lee wayz fahn Gibiyan. Da rait deh Dayvid mi set op wahn tent fi di aak a di kovenant til di templ mi geh bil.—2 Sam. 6:17.

3. Wai wi shuda bee inchrestid eena weh Saam 15 seh? (Koment pahn di picha.)

³ Bak den, moas a di Izrelait dehn neva serv da di tabernakl, an onli wahn fyoo a dehn mi geh fi goh eena di tent weh di aak a di kovenant mi deh. Bot tudeh day,  aala dehn wan weh serv Jehoava ku stay eena ih spirichwal tent wen dehn geh fi noa hihn ahn kantinyu bee ih fren. Saam 15 taak bowt sohn kwalitiz weh wi need fi ga soh dat wi ku kantinyu bee Jehoava fren.

LIV WAHN KLEEN LAIF AN AALWAYZ DU WEH RAIT

4. How wi noa dat baptizm da noh aal weh wi need fi du fi bee wahn ges eena Jehoava tent? (Isaiah 48:1)

⁴ Da Saam 15:​2, ih seh dat wahn fren a Gaad need fi “liv wahn kleen laif” an “aalwayz du weh rait.” Dis da sohnting weh wi need fi kip di du. Bot wi mait wanda if wi ku reeli “liv wahn kleen laif”? Yes! Wi ku du dis wen wi du wi bes fi obay Jehoava eevn doa wi noh perfek. Wen wi mek wi dedikayshan tu Gaad ahn geh baptaiz, dis da jos di biginin. Eena Baibl taimz, jos bikaaz wahn persn da-mi wahn Izrelait neva meenz dat dehn da-mi wahn ges eena Jehoava tent. Som a dehn mi-di pray tu ahn bot dehn neva ‘sinsyaa ahn dehn neva mi-di du weh rait.ʼ (Reed Isaiah 48:1.)  a Di Izrelait dehn weh mi waahn deh eena Jehoava tent mi haftu laan weh hihn ekspek fahn dehn ahn du it. Sayhn way soh, fi mek wi ku geh invaitid ahn stay eena Jehoava spirichwal tent wi need fi du moa dan jos geh baptaiz ahn goh da meetin. Wi need fi “aalwayz du weh rait.” How wi ku du dat?

5. Weh ih meenz fi obay Jehoava eena evriting?

⁵ Tu Jehoava, fi “liv wahn kleen laif” ahn fi “aalwayz du weh rait” meenz moa dahn jos fi goh da di meetin dehn.  (1 Sam. 15:22) Wi waahn chrai obay Jehoava eena evriting weh wi du eevn wen wi deh bai wiself. (Prov. 3:6; Eccl. 12:​13, 14) Soh ih impoatant fi obay Jehoava eevn eena di smaalis a tingz. Wen wi du dat, wi shoa dat wi reeli lov Jehoava ahn dat mek hihn lov wi eevn moa.—Jan 14:23; 1 Jan 5:3.

6. Akaadn tu Heebrooz 6:​10-12, weh moa impoatant dan di gud tingz weh wi mi du eena di paas?

⁶ Jehoava apreeshiayt aal weh wi don du far ahn. Bot noh bikaaz wi mi du lata gud tingz eena di paas meenz dat wi ku stay eena Jehoava tent. Wi ku si dat eena Heebrooz 6:​10-12. (Reed.) Jehoava noh ferget di gud tingz weh wi don du. Bot ih waahn wi kantinyu du wi bes rait “dong tu di en.” Hihn wahn bee fi wee fren fareva “if wi noh taiyad owt.”—Gal. 6:9.

BEE AANIS WID YUSELF

7. Weh ih meenz fi bee aanis wid wiself?

⁷ Sombadi weh waahn bee wahn ges eena Jehoava spirichwal tent need fi bee “aanis wid ihself.” (Saa. 15:2) Dis da moa dan jos di tel di chroot; ih meenz dat wi wahn bee aanis eena evriting weh wi seh ahn du. (Heeb. 13:18) Dis impoatant bikaaz “Jehoava hayt wahn chriki persn, bot Hihn da kloas fren wid di raichos persn.”—Prov. 3:32.

8. Weh kaina atichood wi need fi avoid?

⁸ Wahn persn weh “aanis wid ihself” noh priten fi obay Jehoava fronta adaz ahn den wen ih deh bai ihself ih disobay Jehoava. (Isa. 29:13) Insteda dat, ih chrai fi bee aanis eena evriting weh ih du. Wahn persn weh noh aanis mait staat tu tink dat Jehoava laa dehn tu schrik. (Jay. 1:​5-8) Dis persn mait staat tu disobay Jehoava eena smaal tingz bikaaz ih tink dat dehn tingz noh impoatant. Ahn wen ih riyalaiz dat ih noh di sofa di kansikwens a ih akshanz, ih mait staat tu du tingz weh wers, ahn Jehoava noh wahn aksep ih wership (Eccl. 8:11) Wee noh waahn bee laik dat, insted, wi waahn bee aanis eena evriting.

9. Weh wi ku laan fahn wen Jeezas mi fers meet Natanyel? (Koment pahn di picha.)

 ⁹ Ih impoatant fi mek wi ga wahn sinsyaa haat, dis da sohnting weh Natanyel mi gat. Di fers taim wen Jeezas mi meet Natanyel ih mi seh: “Luk, dis da wahn gud Izrelait weh wuda neva tel yu wahn lai.” (Jan 1:47) Jeezas mi noa dat di ada disaiplz mi aanis, bot Natanyel mi reeli aanis. Natanyel mi imperfek jos laik wee, bot hihn da neva wahn hipokrit. Jeezas mi admaiya Natanyel fi dis an ih mi komen ahn. Fi shoar aala wi wuda waahn Jeezas feel di saym way bowt wi!

10. Wai wi need fi bee kyaaful bowt weh wi seh? (Jaymz 1:26)

¹⁰ Saam 15 taak bowt how wi ku chreet peepl eena di rait way. Saam 15:3 seh dat wahn ges eena Jehoava tent noh “slanda enibadi, ih noh du notn fi hert ih nayba, an ih noh damij ih fren dehn repyutayshan.” If wi slanda sombadi naym wi wahn kyaahn bee wahn ges eena Jehoava tent.—Reed Jaymz 1:26.

11. Weh ih meenz fi slanda, ahn weh wahn hapm tu sombadi weh noh ripent afta dehn slanda wahn persn gud repyutayshan?

¹¹ Eena di Baibl, di saamis mi menshan slanda. Weh ih meen fi slanda? Ih meenz dat yu tel wahn lai weh ku mes op wahn persn gud repyutayshan. If sombadi du dat ahn dehn noh ripent, den dehn wahn geh disfeloship.—Jer. 17:10.

12-13. How wi ku en op di tel wahn lai weh ku mes op wi fren dehn repyutayshan? (Koment pahn di picha.)

¹² Saam 15:3 rimain wi dat wahn persn hoo da wahn ges eena Jehoava tent noh du notn bad tu ih nayba an ih noh damij ih fren dehn repyutayshan. How wi ku en op di du dis?

 ¹³ Wi ku damij wahn persn repyutayshan wen wi spred laiz bowt dehn. Fi egzampl, wat if: (1) wahn sista stap painyaa, (2) wahn hozban ahn waif noh di serv da Betel nohmoh, er (3) wahn brada noh di serv az wahn elda er ministeeryal servant agen? Yu tink ih wuda bee lovin fi shayr wid adaz weh yoo tink mi hapm? Wi mait noh noa wai dehn noh ga da privilij nohmoh. Pan tap a dat, wahn ges eena Jehoava tent “noh du notn fi hert ih nayba, an ih noh damij ih fren dehn repyutayshan.”

AANA DEHN WAN WEH RISPEK JEHOAVA

14. How wi wahn noa if sombadi “wikid”?

¹⁴ Saam 15:4 seh dat wahn persn weh da Jehoava fren noh wahn “ga notn fi du wid enibadi weh wikid.” How wi wahn noa if sombadi wikid? Wi imperfek, soh wi kyaahn disaid weda wahn persn wikid er nat. How komz? Bikaaz wi mait laik sertn peepl sayka dehn persnaliti, ahn wi mait noh laik ada peepl bikaaz dehn geh pahn wi nervz. Bot yoo tink wee ga di rait fi joj da persn weh geh pahn wi nervz ahn vyoo dehn az wikid? Sins wee imperfek, onli Jehoava ga di rait fi disaid if wahn persn wikid er nat. (1 Kor. 5:11) Di peepl weh Jehoava si az wikid da peepl weh du bad tingz fi spait, mek fon a weh wi bileev eena, er chrai fi damij wi rilayshanship wid hihn.—Prov. 13:20.

15. How wee ku aana “dehn wan weh ga rispek fi Jehoava”?

¹⁵ Di neks ting weh Saam 15:4 aks wi fi du da fi “aana dehn wan weh ga rispek fi Jehoava.” Soh wi aalwayz di luk fi wahn apachooniti fi bee kain ahn fi shoa rispek tu Jehoava fren dehn. (Roam. 12:10) Saam 15:4 tel wi how wi ku du dat. Ih tel wi dat wahn ges eena Jehoava tent “aalwayz kip ih pramis, eevn if ih ton owt bad far ahn.” If wi noh kip wi pramis dehn, wi ku hert adaz. (Mach. 5:37) Fi egzampl, Jehoava ekspek wahn hozban ahn wahn waif fi kip dehn pramis tu wan anada afta dehn geh marid. Jehoava aalso hapi wen payrents chrai kip di pramis dehn weh dehn mek tu dehn pikni. Bikaaz a wi lov fi Gaad ahn fi peepl wi wahn du aal weh wi kud fi kip di pramis dehn weh wi mek.

16. Wat da wahn nada way wee ku shoa aana tu wi bradaz ahn sistaz?

¹⁶ Wahn nada way how wi shoa lov tu wi bradaz ahn sistaz da wen wi shoa haspitaliti ahn wen wi jenaros wid dehn. (Roam. 12:13) Wen wi spen taim ahn ga fon wid di bradaz ahn sistaz wi geh kloasa tu dehn ahn tu Jehoava. Wi kapi Jehoava egzampl wen wi shoa haspitaliti tu wi bradaz ahn sistaz.

NOH LOV MONI

17. Wai Saam 15 taak bowt moni?

¹⁷ Wahn ges eena Jehoava tent “noh chaaj inchres wen ih len owt moni, an ih noh aksep wahn braib fi hert inosent peepl.” (Saa. 15:5) Wai dis vers eena Saamz di taak bowt moni? Bikaaz if wi lov moni tu moch dat ku staat bee moa impoatant tu wi dan Jehoava ahn peepl. (1 Tim. 6:10) Eena di Izrelait dehn taim, som a dehn neva fyaa wid dehn bradaz ahn sistaz weh mi poa, ahn dehn mi mek dehn pay bak moa moni dan weh dehn mi baro. Aalso, som a dehn wan weh da-mi joj mi aksep braib ahn neva joj dehn  wan weh mi poa eena wahn fyaa way. Jehoava hayt it wen peepl du dehnya tingz.—Ezek. 22:12.

18. Bays pahn Heebrooz 13:​5, weh kweschanz wi ku aks wiself fi si how wi feel bowt moni?

¹⁸ Ih gud fi mek wi tink bowt how wi feel bowt moni. Aks yuself: ‘Ai aalwayz di tink bowt moni ahn weh Ai ku bai wid it? If Ai baro moni, Ah tek lang fi pay it bak bikaaz Ai tink dat di persn weh Ah baro it fram noh need it? Ai feel laik Ai beta dan adaz bikaaz Ai ga moni? Ih haad fi mek Ai bee jenaros wid adaz? Ai tink dat bikaaz mai bradaz ahn sistaz ga lata moni dat meen dat dehn lov moni moa dan Gaad? Ai onli waahn bee frenz wid peepl weh rich ahn noh wid dehn wahn weh poa?ʼ Di onli way wi ku kip aan di bee wahn ges eena Jehoava tent da fi mek shoar wi noh lov moni. Den if wi du dat, Jehoava wahn neva lef wi!—Reed Heebrooz 13:5.

JEHOAVA LOV AALA IH FRENZ

19. Wai Jehoava waahn mek wi du evriting weh deh eena Saam 15?

¹⁹ Saam 15 en aaf wid di saamis di seh: “Da kaina persn wahn aalwayz bee schrang.” (Saa. 15:5) Rait ya di saamis tel wi wai Jehoava waahn wi du evriting weh geh menshan eena dis Saam. Jehoava waahn wi bee hapi, dats wai ih tel wi dat. Wen wi du weh Gaad aks wi fi du, wi wahn ga wahn beta laif ahn hihn wahn protek wi.—Isa. 48:17.

20. Weh Jehoava ges dehn ku luk faawod tu?

²⁰ Jehoava ges ku luk faawod tu wahn wandaful fyoocha. Dehn wan weh anointid wahn liv eena wahn plays da hevn weh Jeezas set op fi dehn. (Jan 14:2) Dehn wan weh ga di hoap fi liv fareva pahn ert di luk faawod tu di pramis dehn weh deh eena Revilayshan 21:3. Soh da wahn privilij dat Jehoava invait wee fi bee wahn ges eena ih tent fareva!