1. Kaba un líderaguawa Sálumu 15:​1-5?

 LIDAN aturiahani le lubaragiñebei le, furendeitiwa ha lan lubúeingu Heowá ha deregeguaañabaña houngua lun gayaraati gamadagua hamá luma, gayaraati giñe haganóun liñúarü kamá hamuga haganóunña tidan likianpun. Ida lubati wibihini lubuidun umadaguaü le? Wadarirubei óunabagülei le lidan Sálumu 15, lugundun anihein arufudahani huuti lidan lun líderaguniwa lúntima wayarafadun lun Bungiu (aliiha huméi Sálumu 15:​1-5).

2. Ka funa meha san uagu lasaminara Dawidi dan meha le layanuhanbei tuagu likianpun Heowá?

² Gumeseti Sálumu 15 ítara: “Aburemei, Ka gayaraabei laganóun biñuarü? Ka gayaraabei laganóun lidan buwübüri le sándubei?” (Sal. 15:1). Lau lálügüdahan Dawidi ka lan gayaraabei laganóun liñúarü Heowá, másiñati layanuhaña lan meha tuagu kianpu to meha gabaóunboun lidan dan ligía. Ani dan le meha lariñagunbei Dawidi “buwübüri le sándubei”, másiñati layanuhaña lan luagu Sión, wübü le Herusalénbei le erederubei saragu kilometuru suru lun Gabaón. Ñein meha ladügagüda Dawidi aban kianpu lun líchugunu bágüsi to lánina daradu ñein darime buga lachülürün aban dan lun tábunawagun aban ténpulu (2 Sam. 6:17).

3. Ka uagu lunti lubéi lun wasubudiruni le lariñagubei Sálumu 15? (Ariha huméi giñe dibuhu).

³ Migirúntiña meha hiibe-agei ísüraelina lun hebelurun tidoun sanduariu, gúbudigiameti tidoun kianpu to ñein tubéi bágüsi to lánina daradu! Gayaraati herederun sun lubúeingu Heowá ha úaraguabaña liñúarü. Ánhaña gamadagua luma, ítara liña katei le kamá hamuga herederuña tidan likianpun. Ani ligía wabusenrubei súngubei wagía. Ayanuhati Sálumu 15 luagu fiu igaburi le lunbei gagaburi wamani lun gayara lan gamadagua wamá luma Heowá.

 HARUMALÁ WAGABURI, ADÜGA WAMEIME LE BUÍDUBEI

4. Ida liña wasubudiruni ua lan buídurügü lan wabadiseirun lun lagundaarun Heowá wau? (Isaíasi 48:1).

⁴ Lidan Sálumu 15:​2, ayanuhóuati hawagu lumadagu Heowá ‘ha richaguabei habagaridunʼ ani “adüga haméi le buídubei”, aban katei le lunbei wasigirun adügei lun sun wabagari. Le san lúgubu gayara lan ‘richagua lan wabagaridunʼ? Anha, gayaraati. Íbini chará wamá sun wagía; ánhawa áfaagua saragu lun gaganbadi wamá lun Heowá, larihibadiwa kei gürigia ha richaguati habagaridun. Wederegeragun woungua lun luma wabadiseirun, ligía lagumesehabei ibagari le. Haritagua waméi le, lidan tidaani Bíbülia, úati meha buídurügü lan lau ísüraelina lan aban gürigia lun laganóun liñúarü Bungiu. Lugundun añahein meha hádangiñe, agúahatiña lun Bungiu “gama lumoun mama lau arumani ni lau úaraguni” (aliiha huméi Isaíasi 48:1). Ha meha harumabaña anigi, mosu meha hasubudiruni lilurudun Heowá ani gúnfuli hameime. Ligiaméme asuseredubei uguñe weyu: lun gayara lan lagundaarun Bungiu wau, úati buídurügü lan lau wabadiseirun nírügü lau lílana wamá damuriguaü. Lunti wasigirun adügei le buídubei. Kati lílabei le?

5. Ida liña larihini Heowá richagua lan wabagaridun ani adüga waméi le buídubei?

⁵ Lun richagua lan labagaridun aban gürigia ligibugiñe lagu Heowá ani adügaléi “le buídubei”, úati buídurügü lan lau labasiihan adamuridagua sagü dimaasu (1 Sam. 15:22). Wagía kristiánugu, lunti wáfaagun lun gaganbadi wamá lun Bungiu lidan sun wagararaagun, íbini dan le wábuguarügü wamá (Ari. 3:6; Apur. 12:​13, 14). Súdiniti lun gaganbadi wamá lun Heowá íbini lidan katei le genegeti maweirin lan lisudinin. Lau wadügüni lira, warufuduña hínsiñe lan woun, aba giñeti hínsiñe wamá lun (Huan 14:23; 1 Huan 5:3).

6. Según Ebüréu 6:​10-12, ka uagu ua lubéi buídurügü lan lau úaragua wamá lidan dan le sügühalibei?

 ⁶ Wéiriti lugundan Heowá lau le adüga wamaalibei luagu. Lau sun lira, úati buídurügü lan úaraguni le warufudubei lidan dan le sügühalibei lun tidan wamá likianpun, lunti wasigirun úaraguameme lun ítara kei larufuduni Ebüréu 6:​10-12 (aliiha huméi). Íbini mabulieidun lani Heowá buiti le wadügübei lidan weseriwidun lun, busenti lun wasigirun eseriwida lun tídangiñe sun wanigi “darí lumoun lagumuhóun”. Anhein ‘mabuchadun wawaguʼ gamadaguabadiwa luma lun súnwandan (Gal. 6:9).

ARIÑAGA WAMÉI INARÜNI TÍDANGIÑE SUN WANIGI

7. Ka mini lubéi dimurei ayanuha huméi inarüni tídangiñe sun hanigi?

⁷ Ariñagati Sálumu 15:2 gürigia lan ha “ariñagubalin inarüni tídangiñe sun hanigi” hagía lan gürigia ha lagunbirahabaña Heowá tidoun likianpun. Úati buídurügü lan lau meyeehan wamá. Busenti giñe lun wariñaguni inarüni ani haruma ligíame wóuserun lidan sun katei (Ebü. 13:18). Súdiniti katei le lugundun “mínsiñetiña ha wuribabaña igaburi lun Bungiu, ánheinti hama ha buídubaña, gamadaguati lungua” (Ari. 3:32).

8. Ka igaburi mabuidunti moun lubéi lun wáyeihani?

⁸ Ha “ariñagubalin inarüni tídangiñe sun hanigi”, mafamuruntiña gaganbadi hamá lun Bungiu dan le hádanñanu lan gürigia ani dan le hábugua hamá, aba hadügün amu (Isa. 29:13). Mabuidunti igaburi lira ani mabusenrúntiwa wáyeihani. Ida liña léiguadun aban gürigia lidoun igaburi le? Másiñati aba lan lagumeserun asandira machouruni luagu fiu lídangiñe lilurudun Heowá (Sant. 1:​5-8). Háfuga larufudun maganbadi lidan kesi le genegeti maweirin lan lisudinin. Lárigiñe, dan le larihin madügün lan luriban lóuserun wuribani lun, aba lárügüdün ganigi lun ladügün katei le hanarimetimati luriban. Ábati lóuserun kei biangua tigibu lidan láhuduragun lun Bungiu (Apur. 8:11). Mabusenrúntiwa wóuserun ítara, busentiwa haruma lan wóuserun ligibugiñe Bungiu.

9. Ka wafurendeirubei lídangiñe le asuseredubei dan le lasubudirunbalin Hesusu Natanaéli? (Ariha huméi dibuhu).

⁹ Súdiniti lun haruma lan ligaburi gürigia, kei  larufuduni le asuseredubei dan le lasubudirunbalin Hesusu Natanaéli. Dan le lanügünbalin Felipe Natanaéli lun lasubudiruni Hesusu, aba lasuseredun aban katei le aweiridagüdübarun anigi. Íbini marihinñaha lágili lan meha Hesusu Natanaéli, aba lariñagun luagu: “Anitén aban ladügawagun Ísüraeli le tímatimaati; úati yeeguaü lidan” (Huan 1:47). Chóuruti subudi lan meha lun Hesusu haruma lan hagaburi ha híbiri lani disipulugu, íbini ítara, wéiritu lanigi Hesusu lau Natanaéli ladüga lau sun chará lan meha kei furumiñeguarügü wádangiñe, aban meha wügüri furanguti ani ariñagati Hesusu lun buidu lan ladüga. Buiti hamuga giñe lun lariñaguni Hesusu ligiaméme wawagu!

10. Ka uagu lunti lubéi wóunigirunu wañeñe? (Santiagu 1:26).

¹⁰ Liibe-agei adundehani le lídanbei Sálumu 15, layanuhaña luagu ida luba lan wóuseruniña amu. Ariñagati Sálumu 15:3 resibi lániña Heowá gürigia “ha mayanuhanbaña wuriba ni ka uagu ha madügünbaña wuribati houn hamadagu”. Dan le wuriba lan layusurunu gürigia liñeñe, mámarügüñein houn amu ladüga wuribani, ladügüña giñe wuribani lúniwagua ladüga siñabei lan lerederun liñúarü Heowá o tidan likianpun (aliiha huméi Santiagu 1:26).

11. Kaba asusereda lun aban gürigia le abahüdahabei iyeeni hawagu amu ani masakürihanti?

¹¹ Ayanuhati abürühati Sálumu hawagu ha ayanuhabaña wuriba hawagu amu. Ka mini lubéi le? Mini lan layanuhan gürigia iyeeni luagu amu lun lawiyeduni liri gürigia ligía. Gürigia ha ganigibaña hariñagun iyeeni hawagu amu ani masakürihantiña, habugúba lídangiñe damuriguaü (Her. 17:10).

12, 13. Ida luba hamuga wawiyeduni hiri wamadagu míchugunga wagía fe? (Ariha humóun giñe iyawaü).

¹² Haritaguagüda lumutiwa Sálumu 15:3 gürigia lan ha erederubaña liñúarü Heowá ‘mayanuhantiña wuriba ni ka uagu ani madügüntiña wuribati houn hamadaguʼ. Ida liña san gayara lan wawiyeduni hiri wamadagu?

 ¹³ Lau wayanuhan katei wuribati hawagu míchugunga wagía fe. Samina wamá luagu sügǘ le: 1) aba tígiruni aban íbiri teseriwidun lidan dan dayarüti, 2) aba háfuridun aban feru maríeitiña Betelirugugiñe, 3) aba lichugún awisahani luagu mámaali lan wéiyaali lidan afiñeni o ídehati lidan damuriguaü ítaga íbiri. Lunti san wasaminarun amu katei dan le liabin asansiruni libe le houn wábirigu ani ayanuha wagía houn amu luagu? Uá, chóuruti ibidiñe lan sun lácharagun katei woun. Haritagua waméi ha lan erederubaña liñúarü Heowá o tidan likianpun ‘mayanuhantiña wuriba ni ka uagu ani madügüntiña wuribati houn hamadaguʼ.

RU WAMÁ INEBESEI HOUN HA HÍNSIÑEHABUBAÑA LUN HEOWÁ

14. Afuranguagüda huméi ida luba lan hamahadun ha erederubaña liñúarü Heowá houn gürigia ha larihubaña Heowá lau mabahüdǘni.

¹⁴ Ariñagati Sálumu 15:4 lau lan mabahüdǘni hariha lumadagu Heowá “luagun katei le gadünabei lun larihín luagun lau mabahüdüni”. Ida liñati wasubudirun anhein gadüna lubéi aban gürigia lun larihín luagun lau mabahüdǘni? Kei chará wabéi, siñati wafiñerun luagu wasaminan lidan katei le. Lugundun añahein gürigia, buiti hábürühan woun, ani añahein amu, wuribati hábürühan woun darí lun mabusenrun wamá nírügü lun werederun harugabu. Ligíati, lunti lubéi gürigiarügü lan ha larihubaña Heowá lau mabahüdǘni un wamahada (1 Ko. 5:11). Hadan gürigia hagía, añahein ha adaagubaña figóu ani masakürihantiña, ha úabei inebe lan wafiñen houn, hámati ha álugubaña hadügün lun weferidiruni wamadagua luma Heowá (Ari. 13:20).

15. Ida luba wíchugun inebesei houn ha inebehabubaña lun Heowá?

¹⁵ Luagu le aban oubaü, arufudati Sálumu 15:4 woun lunti lan wíchugun inebesei “lun le íchugubei inebesei lun Aburemei”. Ligía lubeiti wáfaagunbei lun wóuseruniña lumadagu Bungiu lau gamadóuni luma inebesei (Rom. 12:10). Ida liñati wadügüni? Ariñagati Sálumu 15:4 woun, ha lan erederubaña tidan likianpun Heowá, gúnfuli hamani “le füramase hamaalibei, íbini dan le wuriba lan lidin houn”. Anhein magunfulirun wamá le füramase wabéi, gayaraabei ladügün katei le lun hasandiragun amu houngua wuriba (Mat. 5:37). Kéiburi füramasei le hadügübei lubúeingu dan le hamarieidun o le hadügübei agübürigu houn hasaanigu, agurabati Heowá lun hagunfuliruni. Kei le hínsiñe lubéi Bungiu woun hau sun gürigia wáledigu, wadügübei sun wayaraati lun wagunfulirun lau wererun.

16. Ka amu igaburi ídanbei wíchiga inebesei houn lumadagu Heowá?

¹⁶ Ábanya igaburi lun wíchugun inebesei houn lumadagu Bungiu, lau geresibiradi wamá houn luma lau gíchigadi wamá (Rom. 12:13). Dan le wásügürün dan hama wábirigu, aba lederebugudun wamadagua dandu hama kei luma Heowá. Lau geresibiradi wamá houn wábirigu wábiñe, wáyeihañein Heowá.

SÉFUÑU LUÉI LÍNSIÑEGU SEINSU

17. Ka uagu layanuhóua luagu seinsu lidan Sálumu 15?

¹⁷ Sigiti Sálumu 15 ariñaga gürigia lan ha lúnbaña herederun liñúarü Heowá o tidan likianpun, hagía lan “ha afuredeihabalin haseinsun mamuriahanga lanwoun, ha máhabaña lun hariñagun luagu gadurun lan le madurunbei lúnrügü heresibirun seinsu” (Sal. 15:5). Ka san uagu layanuhóua luagu seinsu lidan aban Sálumu chátiti kei le? Lugundun ménrengunti lun léiguadun gürigia lidoun línsiñegu seinsu. Lun hamuga lasuseredun katei le woun, ménrengunbei hamuga wadügün wuribani houn amu gürigia ani weferidiruñein hamuga wamadagua luma Bungiu  (1 Tim. 6:10). Lidan tidaani Bíbülia, añahein meha ha afuredeihatiña seinsu houn hábirigu ha gudemebaña ani aba haguburahan lóugiñe. Añahein meha giñe aguseragüdütiña ha eresibirubaña seinsu lun híchugun hadurun ha madurunbaña. Iyereeguti igaburi le lun Heowá (Ese. 22:12).

18. Ka álügüdahani lunbei wadügüni wóuniwagua? (Ebüréu 13:5).

¹⁸ Buídubei wakutihani ida liña lan ligaburi warihini seinsu. Álügüdagua wamá woungua: “Súnwandan san nasaminarun luagu seinsu luma kaba lan nagañeihan? Anhein afuredeiha aban gürigia seinsu nun, lǘtina san lubá nafayeiruni, ladügarügü nasaminarun memegeirun lani? Barüguatina san nungua ladüga gaseinsun nan? Hángitina san lau le númabei? Saminatina san sun lan íbirigu ha gaseinsunbaña ganigi hamá umegeguni? Hínsiñeti san nun gamadagua nan hama rísitiña ani meberesegúntina hau gudemetiña?”. Anihein aban óunwenbu chansi wama lun werederun liñúarü Heowá o tidan likianpun. Meferidira waméi chansi le! Ani dise wamá luéi igaburi lánina línsiñegu seinsu. Ánhawa adügei katei le, maweiyasunbei Heowá ígirawa (aliiha huméi Ebüréu 13:5).

HÍNSIÑETIÑA LUMADAGU HEOWÁ LUN

19. Ka uagu líchigei Heowá eweridihani le wadarirubei lidan Sálumu 15?

¹⁹ Gumuti Sálumu 15 lau burí dimurei le: “Ha abagaridutiña ítara, méiguadundügübaña” (Sal. 15:5). Ariñagati abürühati Sálumu ladüga lan busén lan Heowá lun gunda wamá líchugunbalin adundehani le. Ítara liña larufuduni woun ka lan lunbei wadügüni lun labiniruniwa luma lun lóunigiruniwa (Isa. 48:17).

20. Ka lubuidun abiniruni lunbei heresibiruni ha erederubaña tidan likianpun Heowá?

²⁰ Ha erederubaña liñúarugu Heowá lau úaraguni, heresibiruba aban lubuidun abiniruni ámuñegü. Lidan hakesin kristiánugu anuadirúaaña, aranseeli Hesusu ‘saragu ubaraü habá’ sielu (Huan 14:2). Ánhañati ha híbiri kristiánugu, yáabaña ubouagu eresibirei abiniruni le füramasewabei lidan Arufudúni 21:3. Ma lubuidun chansi le weresibirubei lau lumadagu wamá Heowá! Gayaraabei wawinwandun liñúarugu o tidan likianpun lun sun dan!