1. Asuh öp mihôiṅ yanöölen hī yěi chumkūöṙen ngëichkö ṙô ngam Salmai 15:1-5?

 NGAICH in vahë mikahtökūöre in nuk urěh ātiköl, tö yip kamëtöre nö löklōn Yāvē hēk vī ngam innôlöre inrē nö in ò nö mihôiṅ cha-a nö iyöng el ngam inrūkui ò. Asuh pöri mihôiṅ inlahen hī yěi hòṅ iyöng el ngam inrūkui Yāvē? Vënyö inlahen e an ngam Salmai tö 15 mirūlö. (Vë-evkūö Salmai 15:1-5.) Pōyen nun minë tövai inlēnö imat e, minë tö mihôiṅ nö hāngö tö hī ngaich röhta min öi in Yāvē.

2. Asūp afēkö Tāvit ik sā ò nö kakken ngam inrūkui Yāvē im Salmai tö 15 mirūlö?

² Ngö ṙô ön ngam raněhnyö ṙô ngam Salmai tö 15 mirūlö, “Mā Tēv, Achīö ap min mi-iyöng el ngam inrūkui meh? achīö min mi-iyöng kui ngam rung meh töhet?” (Sal. 15:1) Ik sā Tāvit nö kakkö ngam “inrūkui” Yāvē nö in ngam Salmai, ngaich lohten anga-aṅ nö fēkö inlahen ök töhet chūök ök mi-i Kīpiön sin. Kakkö ngam “töhet rôngö” inrē ang Tāvit nö lohten nö fēkö inlahen ngam rôngö Siyôn i Yarusalem ngam chūök ngam “inrūkui” Yāvē. 10 kilōmītör ṙôvat angū-ö tö Kīpiön, nö i lā sūng. El e inrē ngam kasòng chööngö misī. Höng köp ngam kasòng chööngö nö in e hanöng sā ngam chūök Yāvē nö öl nö vīlöre.—2 Sa. 6:17.

3. Kūö yòh öi hòṅ chumkūöṙen tö minë tökūichi im Salmai tö 15 mirūlö? (Ngëichkö ngam nyat.)

³ Öt uroh nö ṙôklöre yik aṅ misī nö la-evṙen nö el ngam töhet chūök. Höng kūönen yik tarik tö mihôin nö kuhēthötre nö el ngam chūök ngam kasòng chööngö. Ngatī töngamuh më taṙòkhöre tarik nö mihôiṅ nö hanôlö Yāvē hēk vī-i ò inrē nö holre ngaich mihôiṅ cha-a nö iyöng el ngam inrūkui Yāvē hēk lōn hī inrē angū-ö öi ṙòkhöre. Minë ṙô tö vënyu im Salmai tö 15 mirūlö  yěi örheūheu min öi hāngö u, ngaich köp min ayī-ö öi hanôlö Yāvē.

HAVAI NGAM TINRĪKENRE LA-EVṘEN TÖ TÖLÖÖK

4. Kūö yòh öi ötkô tölngö im vinôkö yěi hòṅ hanôlö Yāvē? (Isayā 48:1)

⁴ Vënyu angū-ö nö im Salmai 15:2 tö ngòh mahanôl ngam Tēv nö ‘tö hetö tinrīken’ hēk “örheūheu inrē nö la-evṙen tö tölöök.” Löktö in ngih miröökö öi akahakūö tö hī yěi hòṅ köp öi hanôlö Yāvē, ngaich hòṅ ngatī inlahen ayī-ö. Mihôiṅ hòng pöri ayī-ö öi hetö tinrīken? Heūṅ, mihôiṅ in. Ṙòkhöre in öi tö vaichköreṙen, yē hī pöri min öi hang chööngö Yāvē öi mā-ainyre ngaich ‘hetö tinrīken’ min ayī-ö öi ikūö ò. Hòṅ kētöre ayī-ö öi in Yāvē hēk kē ngam vinôkö. Pön angū-ö raněhlö röön hī öi vī ngam innôlöre in ò. Kööpölōn tö yik tarik tö fötnyu nö im panam Israel, öt kanahngenre cha-a nöng löö nö iyöng el ngam inrūkui Yāvē. Tö sā yik rīkre aṅ Israel nöng ha-öinyö Yāvē, öt holtö ngam “kanô-en hēk lanöököre” pöri nö ha-öinyan. (Vë-evkūö Isayā 48:1.) Yik aṅ Israel tö lōnu nö iyöng el ngam inrūkui Yāvē, hòṅ mikahtökūöre misī cha-a tö inlahen minë chööngö Yāvē hēk hòṅ hāngö u inrē. Ngatī inlahen ayī-ö töngamuh yěi hòṅ iyöng el ngam inrūkui Yāvē hēk hòṅ hanôlö ò inrē, ngaich rö-ö ayī-ö öi höng hòṅ kē ngam vinôkö hēk kētöre inrē öi Vamënyen Yāvē. Pöi hòṅ ‘örheūheu öi la-veṙen tö nup tölöng.’ Öi sitih inlahen?

5. Sitih inlahen öi hameuktöre hang chööngö Yāvē?

⁵ Öt höng tölngö im chinūhu el mīting ngam inlahen hī ngaich öi ‘hetö tinrīken’ öi imat Yāvē hēk lööngö kahë tö ‘tölöök la-en.’ (1 Sa. 15:22) Töt ṙanāngen ön ngam inlahen hī öi hòṅ hang minë chööngö Yāvē in nup töng sitih kahëkenre la-en, pòrô öi ikūö tömaṙôngö hēk yěi hěngtak inrē. (Inch. 3:6; Mum. 12:13, 14) Rö-ö nöng anū-ö pöi hòṅ kalahkenre inrē öi hang minë törahëichyen chööngö Yāvē. Inmeuktö hī min angū-ö öi kô-en hanangenlōn tö Yāvē ngaich hēk min ang Yāvē nö hangenlōn tö hī.—Yôh. 14:23; 1 Yôh. 5:3.

6. Pòrô ngaich öi kēken nup tölöök la-en in nuk lā urěh, asuh pöri hēk öp tö hòṅ iṙūöhen nö inlahen hī? (Heprāi 6:10-12)

 ⁶ Milēḵṙen ang Yāvē tö nup urěh inlahen hī öi hang chööngö ò hēk chiplö öi i linökö lōn ò pòrô öi kihngen. Rö-ö ayī-ö öi höng kūö nup tölöök la-enre öi örheūheu köp el ngam inrūkui Yāvē. Mikahtu elnang in öi in ngam Heprāi 6:10-12. (Vë-evkūö.) Vënyu angū-ö nö in e tö Yāvē nö öt vaichngen nup tölöök la-en hī. Lōnu pöri anga-aṅ tö hī öi “söl manā-aṅ” keūheuttö ellōnre öi la-evṙen im linökö lōn ò. Yē hī “öt heūlngöre” hēk iṙūöhen im linökö lōn ò ngaich köp min ang Yāvē nö hanôlö hī.—Kal. 6:9.

LÖKNYÖ ELLŌNRE KÒ-ÒṘÔ

7. Tö sitih manah öng ngam inlahen hī löknyö ellōnre kô-òṙô?

⁷ Yěi hòṅ iyöng el ngam inrūkui Yāvē ngaich hòṅ ‘kô-òṙô ayī-ö öi löknyö ellōnre.’ (Sal. 15:2) Hö-ö in ṙung öi minyôny aṅ, ngam manah ngam inlahen hī pöri löknyö ellōnre öi kô-òṙô öi hòṅ chiplö in nup töng sitih. (Hep. 13:18) Kūö yòh angū-ö nö töt ṙanāngen? ‘Pön sa-òkkūö ang Yāvē tö yip tötlöök tarik, nyanatlö ò pöri yip töchiplö.’—Inch. 3:32.

8. Tö sitih inlahen öng ngòh tarik mahanyatkö elmat?

⁸ Ngòh tarik töt lamöknyö ‘ellōnre nö kô-òṙô,’ mihôiṅ min anga-aṅ nö ulāiykenre nö filal chööngö Yāvē ngaich höng hameuktöre pöri anga-aṅ nö ikūö yip tahëng nö hang chööngö ò. (Isa. 29:13) Kaheukö yin cha-a tarik nö mahanyatkö elmat. Mihôiṅ min anga-aṅ nö ngö ṙô lōn tö nup rīkre chööngö Yāvē nö öt uroh nö hòṅ hāngö. (Yāk. 1:5-8) Lohten min anga-aṅ nö öt hang chööngö Yāvē nö in minë töng rahëichyen. Hēk yěn öt meuk ṙòng ngam inlahenre anga-aṅ nö öt hang chööngö, pi-a min anga-aṅ nö filal minë chööngö Yāvē nö i tö pōiyen. Pòrô anga-aṅ tö lōnre nö ha-öinyö Yāvē, öt hō-en nup ṙô ngòh mahanyatkö elmat pöri ang Yāvē yěn ha-öinyö ò. (Mum. 8:11) Öt lōnu in töre öi sā tinrīken ngòh tarik, hòṅ örheūheu pöri ayī-ö chiplö in nup töng sitih.

9. Asūp ṙô Yēsū ik sā ò nö möl nö meukkūö Netenīěl? Ngaich asuh öp haköplö hī öi in e? (Ngëichkö ngam nyat.)

⁹ Töt ṙanāngen ön ngam inlahen hī kô-òṙô löknyö ellōnre, in ngih tö hěng inlahngen aṅmat ngam Paipöl in öi mikahtu elmat. Ik sā Filip nö kumten ngam holre Netenīěl nö chuh in Yēsū ngaich vënyö ngam tö hěng ang Yēsū töt  insā-avö inlahen ò. Öt tö hěngheuh ang Yēsū nö meukkūö Netenīěl, ngö ṙô pöri anga-aṅ nö vënyö inlahen ò, “Yĕh meuk, ngòh kūön Israěl takô, ngam töt aṅhaṅv-in tö michīl.” (Yôh. 1:47) Akahakūö ang Yēsū tö yik tahëng mahaköp nö tö chiplö, öt aṅhaṅv-in cha-a tö ngam inyatkö elmat. Meuk ngam tövai pöri anga-aṅ tinrīken Netenīěl. Töng sā hī ang Netenīěl nö töthet, chumkūöṙen pöri ang Yēsū nö meuk inlahen ò nö öt aṅhaṅv-in tö ngam innyatkö elmat. Ööire ang Yēsū nö meuk ngam tinrīken ò lökten nö eū an. Fē-a man, sitih mufē öm öreh yěn ngatī ṙô ang Yēsū nö vënyö inlahen meh?

10. Kūö yòh öi hòṅ holtö mikah elmatre öi ṙô-òvö? (Yāköp 1:26)

¹⁰ Vinënyö inlahen më hol Yāvē an ngih Salmai 15 nö sitih inlahen tinrīken cha-a nö in yip tahëng. In ngam tö 3 miröökö pöri nö kūichi angū-ö tö hī yěi hòṅ köp öi el ngam inrūkui Yāvē ngaich ötkô ayī-ö öi, löknyö rōi litākre ṙô öi vë-eng nang holre, öt rēhĕn öi chōichö tī i holre: öt rēhĕn inrē öi sumrōngngö kūö holre.” Yē hī min öt holtö mikah elmatre öi ṙô-òvö ngaich mihôiṅ min nö ötlöng ngam ṙòng e. Mihôiṅ inrē min ayī-ö öi palaiṙen tī tö yip tahëng hēk angū-ö min lāinyngen hī öt halönghöt vö yôkhötre el ngam inrūkui Yāvē.—Vë-evkūö Yāköp 1:26.

11. Yěn öt halööktitre ngòh tarik samūöchkö inlahen holre, asuh mihôiṅ min öp inlanken ò?

¹¹ Vënyu angū-ö nö im Salmai 15 tö ngòh tarik tö hòṅ iyöng el ngam inrūkui Yāvē, ötkô min anga-aṅ nö samūöchkö inlahen yip tahëng. Ötkô anga-aṅ nö hachōichngö minë-eny holre nö minyôiny-aṅ. ngòh tarik töt mahalōn hēk töt mahalööktitre nö i minë inlahenre ngaich ha-uknyu min anga-aṅ tö ngam maṅ.—Yar. 17:10.

12-13. Asuh nup mihôiṅ inlahen hī öt tölngenre hachōichngö minë-eny yip holre? (Ngëichkö ngam nyat.)

¹² Vënyu angū-ö nö im Salmai 15:3 tö ngòh hol Yāvē nö öt mahakihten holre hēk öt mahachōichngö minë-eny holre inrē. Asuh nup mihôiṅ pöri tö tī-iv tö hī hachōichngö minë-eny yip holre?

 ¹³ Lohten min öi vaichköre ṙô öi vë-eny inlahen yip holre hēk öt tölngenre inrē öi hachōichngö minë-eny cha. Tö sā ṙēngen ngih, (1) Hěngtak ngam sistör ṙamāngenre nö keuheuttö ṙētakre nö la-evṙen, (2) Öt köpsöreṙen minā pamīhöre nö la-evṙen nö el pětēl, (3) Öt köpsöreṙen ngam tö hěngtak prötör nö minröinylen hēk mahayööken töla-evṙen. Tövaich min angū-ö nö inlahen hī yěi höng kakkö inlahen öp holre nö kūö yòh anga-aṅ nö öt köpsören nö la-evṙen. Hòṅ köpölōn ayī-ö tö nup tö lainyngen minë fësla nö harikī, nup töt uroh nö mikahkūö hī. Ötkò öi vaichngö tö yip tarik tö hòṅ iyöng el ngam inrūkui Yāvē, nö ötkò cha-a nö ‘hakihten holre hēk hachōichngö minë-eny holre inrē.’

MILĒḴREN TÖ YIP TÖ PA-EKŪÖ TÖ YĀVĒ

14. Sitih inlahen öng ngòh hol Yāvē nö mikahtökūöre tö öp tarik yěn ‘töt milēḵṙen’ tö holre?

¹⁴ Kūichi ön nö im Salmai 15:4 nö ötkô ngò hol Yāvē nö ‘hanòltöre nö in yip töt milēḵren tö holre.’ Sitih inlahen mikahkūö pöri ayī-ö tö ngô tarik yěn tö milēḵren tö holre hēk yěn hö-ö? Kūö ngam töt hanetöre in ötkô öi höng vī mufēre tö inlahen yip holre. Kūö yòh? Kūö hī ṙung ṙōlheuh öi lök in nup mufēre hēk inup kuilōnre öi vī inlahen yip holre. Tö sā ngih inchōḵ-elmat, ōtre ṙung nup kumchik elmat hī tinrīken yip tahëng, ōtre ṙung nup laniplö hī tinrīken yip tahëng. Lökten nö töt ṙanāngen ngam inlahen hī öi mikahtökūöre tö yip tarik ‘surikhö’ Yāvē hēk uh inrē öi nôlta in cha. (1 Kòr. 5:11) Cha-a yin vē tarik töng iṙūöhen nö kēken minë tötlöök la-en hēk töt mahalööktitre, öt milēḵren inrē tö minë inköphöti aṅ mat ngam Paipöl hěnghöre hòṅ pisū ngam innôlö hī inrē in Yāvē.—Inch. 13:20.

15. Asūp mihôiṅ inlahen hī hameuktö minlēḵṙen re in yip tö pa-ekūö tö Yāvē?

¹⁵ Rūöhnyu ṙô an nö hēk im Salmai 15:4 tö hī öi hòṅ ‘milēḵren tö yip tö pa-ekūö tö Yāvē.’ Lökten ayī-ö hòṅ chöh nup inlahenre öi hameuktö ngam hanangenlōnre hēk minlēḵṙen re tö yip hanôl Yāvē. (Rōm. 12:10) Vënyu an ngam tö hěng inlahen hī nö im tö 4 miröökö. Ngö kinūichngö angū-ö nö in e ngò mahanôlö Yāvē nö ‘hateungngö nup ṙôre pòrô min anga-aṅ nö kihngen tö kūö e.’ Mihôiṅ min yip tahëng nö kihngen yěi öt hateungngö nup ṙôre hēk haṙivlōn inrē. (Mët. 5:37) Lökten ang Yāvē nö lōnu tö më holre nö hateungngö minë ṙôre. Tö sā ò nö lōnu tö minā pamīhöre nö hateungngö ngam kinlēngôre nö in höö hēk më inyöngö inrē nö mā-ainyre nö hateungngö minë kinlēngôre nö in më kūönre. Hangenlōn in tö Yāvē hēk tö më holre inrē, lökten öi mā-ainyre öi hateungngö minë kinlēngôre.

16. Asuh öp ihih hēk töhěng inlahen hī hameuktö minlēḵṙen re in më hol Yāvē?

¹⁶ Hěng ön ngih hēk inlahen hī yěi hameuktö minlēḵṙen re in më hol Yāvē, öi hòṅ meukṙen cha hēk örheūheu inrē hīnöre hayööken cha. (Rōm. 12:13) Yēḵ hī ṙung meuk kūö yip prötör sistör re, kē-ěny ṙētakre inrē öi in cha, ngaich lökten in e ngam innôlö hī in cha nö ngönlöre hēk in Yāvē inrē. Rö-ö nöng angū-ö pöi yěi meukṙen yip holre, ngaich sā ma-asīnken Yāvē min ayī-ö.

UM YAHLÖ LŌN TÖ RUPĪÖ

17. Kūö yòh nö kakka ngam rupīö nö im salmai tö 15?

¹⁷ Vënyu angū-ö hēk nö im Salmai 15 tö yip tarik tö hòṅ köp nö iyöng el ngam inrūkui Yāvē, nö ötkô cha-a nö ‘kētö hötṙeh hēk ötkô rēhěn nö kē rupīö nö vīlö fālen öp holre öp töng öt faluṙen.’ (Sal. 15:5) Kūö yòh nö kakka ngam rupīö nö in ngam Salmai tö kūönen mirūlö? Pön yēḵ hī yahlölōn min tö ngam rupīö, ngaich ötvai min ngam innôlö hī in më tarik hēk in Yāvē inrē. (1 Tim. 6:10) Ngatī inlahen misī nö in nuk urěh ṙētak. Rīkre yik aṅ Israel kamëtö hötreh yik yāich hol maneukre hēk höng ngëichkö nup yanöölenre cha-a nö in u. Rö-ö nöng angū-ö pön ōt inrē yik kamhôka kamë minë rupīö hēk sūöchkö fālen më tarik töng öt faluṙen.  Haṙivlōn ang Yāvē nö meuk në tö ngatī. Taich ing töngamuh an inrē nö surikhö minë la-en tö ngatī.—Isi. 22:12.

18. Asūp mufē hī i alaha ngam rupīö, yěi hòṅ mikahtökūöre tö u asuh nup intöönö mihôiṅ hatön hī in re? (Heprāi 13:5)

¹⁸ Kūö yòh nö töt ṙanāngen ngam inlahen hī hòṅ mikahtökūöre tö ngam mufēre i alaha ngam rupīö? Lökten öm hatöönöre, ‘örheūheu öich chū-ö höng fēkö inlahen minë rupīö hēk tö nup tö hòṅ havaha chehen? Yēḵ chu öich kē hötṙeh re in yip tahëng, ngaich vīkö inlahenre hòng chu-ö öich sō löhnyen u hēk ngö ṙô lōn ṙöng töp holre nö öl nö hòṅ lōnu tö minë rupīö re hēk unôich min hönglö öich löhnyěn u? Kūöre hòng inrē öich aṅhaṅv-in tö ngam rupīö lökten öich kūön elmat tö yip tahëng hēk milip inrē? Ngö ṙô lōn hòng chū-ö öich fēkö inlahen më prötör sistör tökòlô nö töng hangenlōn cha-a tö rupīö? Höng hanôl yip tökòlô hòng chū-ö ngaich öt chumkūöṙen tö yip yāich?’ Tökiröng ön ngam inlahen hī öi iyöng el ngam inrūkui Yāvē. Yěi hòṅ iyöng el ngam inrūkui ò, ngaich töt ṙanāngen ngam inlahen hī ötkô öi yahlö hanangenlōn tö minë rupīö. Möl min Yāvē nö öthō nö ṙāngen hī hēk öt sō-en hī inrē!—Vë-evkūö Heprāi 13:5.

HANGENLŌN ANG YĀVĒ TÖ MË HOLRE

19. Kūö yòh ang Yāvē nö lōnu tö hī hang ngam ṙô ò tö kūichi im Salmai tö 15?

¹⁹ Hěng an ngam kinlēngô im manā-a ṙô ngam Salmai 15 ngam tö ngöh, ‘ngò tö ngatī la-en tö në, öt hanlöinyken min anga-aṅ.’ (Sal. 15:5) In e mikah elmat ayī-ö tö Yāvē nö kūö yòh nö lōnu tö hī hang minë tö kūichi ṙô im Salmai. Lōnu ang Yāvē tö öi ṙamlōn, lökten nö kūichngö nup tö hòṅ inlahen hī. Yēḵ hī min öi hang minë ṙô ò, ngaich kuchiken min ayī-ö hēk laklen hī inrē min anga-aṅ.—Isa. 48:17.

20. Asūp mihôiṅ maheukkö yip tarik mi-iyöng el ngam inrukui Yāvē?

²⁰ Yip tarik mi-iyöng el ngam inrūkui Yāvē, mihôiṅ cha-a nö meūkkö öp tövai yamih ṙētak. Maheūkku yin më tö hachāmö elkui Kristīön nö el halīöngö ngam chūök cha tö halēnlöng tö Yēsū. (Yôh. 14:2) Ngaich më chöö cha örheūheu min cha-a nö aṅ nö ikūö ngih panam, nö meuk taneungtökūö ngam ṙô min cha-a im Inmeukhömat 21:3. Tökiröng ön ngih nö minlēken hī öi kētu ṙētak tö Yāvē öi hanôlö ò. Havëten hī anga-aṅ öi iyöng el ngam inrūkui ò öi örheūheu!