1. Paquemodo kita beneficia si considera kita con el Salmo 15:1-5?

 DEL ya pasa articulo, ya aprende kita que el maga siervo de Jehova puede queda maga visita na de suyu figurativo tolda si tiene sila buen relacion con ele. Paquemodo kita puede cultiva con ese clase de relacion? Puede ayuda kanaton el Salmo 15. (Le con el Salmo 15:1-5.) Este salmo ta enseña kanaton maga practical leccion si paquemodo kita queda mas cerca con Dios.

2. Porque posible ya menciona si David con el tolda de Jehova?

² El Salmo 15:1 ta habla: “O Jehova, quien puede visita na de tuyu tolda? Quien puede queda na de tuyu sagrao monte?” Cuando ya menciona si David con el “tolda” de Jehova, posible ta pensa le con el tabernaculo que ya esta na Gibeon por cuanto tiempo. Ya menciona tambien le con el “sagrao monte” del Dios que posible ta refiri con el Sion na Jerusalem. Ya planta si David un tolda cuanto kilometro na sur parte de Gibeon. Alli le ya pone con el arca de contrata hasta puede construi con el templo.—2 Sam. 6:17.

3. Porque kita debe queda interesao na Salmo 15? (Mira tambien con el letrato.)

³ El mayoria del maga Israelita gendeh puede sirvi na tabernaculo y bien poco lang el quien puede entra na tolda donde puede incuntra con el arca de contrata. Maskin pa ansina, el todo fiel siervo de Jehova puede queda maga visita na de suyu figurativo tolda si esta sila de suyu maga amigo. Todo kita quierre con ese. El Salmo 15 ya menciona cuanto calidad que necesita kita cultiva para continua queda maga amigo de Jehova.

 TENE LIMPIO MANERA DE VIDA Y PRACTICA EL COSAS JUSTO

4. Porque kita puede habla que gendeh bastante el bautismo para tene el favor de Jehova? (Isaias 48:1)

⁴ Ya menciona el Salmo 15:2 que el un amigo del Dios “tiene limpio manera de vida [y] ta practica el cosas justo.” Un cosa este que debe kita continua hace. Pero puede ba gayot kita ‘tene un limpio manera de vida’? Si. Maskin pa gendeh kita perfecto, hay considera siempre kanaton si Jehova que “tiene limpio manera de vida” si hace kita el todo para obedece con ele. Cuando ya dedica kita diaton vida con Dios y ya bautiza, principio pa lang quel del diaton relacion con ele. Na tiempo del Biblia, maskin pa parte del nacion de Israel el un persona, gendeh este quierre decir que queda ya le dayun visita de Jehova. Gane, el cuanto ya llama con ele pero “gendeh harmonia na verdad y pagka-recto.” (Le con el Isaias 48:1.) Para puede dale mira el maga Israelita que sincero sila, debe sila aprende el maga mandamiento de Jehova y obedece con ese. Na igual manera, para tene el favor del Dios ahora, gendeh bastante que bautiza lang kita y asocia na Cristiano congregacion. Debe kita continua “practica el cosas justo.” Paquemodo se kita puede hace?

5. Cosa quierre decir que obedece con Jehova na todo cosas?

⁵ Para con Jehova, para ‘tene un limpio manera de vida’ y “practica el cosas justo,” gendeh bastante que regular lang atende na maga miting. (1 Sam. 15:22) Debe kita hace esfuerzo que obedece con Dios na todo aspeto del diaton vida, maskin pa nuay otro el quien ta puede mira kanaton. (Prov. 3:6; Ecl. 12:13, 14) Importante que pricura kita obedece con Jehova maskin na maga simple cosas. Si hace kita se, ta dale kita mira que ta ama gayot kita con ele. Como resulta,  hay ama tambien le kanaton.—Juan 14:23; 1 Juan 5:3.

6. Cosa el mas importante compara na maga buen cosas que ya hace kita de antes? (Maga Hebreo 6:10-12)

⁶ Ta aprecia gayot si Jehova con el maga cosas que ya hace kita de antes para con ele. Pero gendeh se bastante si quierre kita que continua queda maga visita na de suyu tolda. Claro se ya menciona na Maga Hebreo 6:10-12. (Le.) Gendeh gayot ulvida si Jehova el maga buen cosas que ya hace kita de antes. Pero quierre le que continua kita sirvi con ele con todo corazon “hasta el fin.” “Si gendeh kita ay perde el animo” o descanza, hay queda kita de suyu amigo hasta para cuando.—Gal. 6:9.

CON TODO CORAZON HABLA EL VERDAD

7. Cosa quierre decir que con todo corazon habla el verdad?

⁷ Para queda un visita na tolda de Jehova, el un persona debe “con todo corazon ta converza el verdad.” (Sal. 15:2) Gendeh se quierre decir que evita lang kita man imbusterias. Quierre si Jehova que queda kita honesto na todo cosa kita ta habla y ta hace. (Heb. 13:18) Importante se “cay no quierre si Jehova con el un persona deshonesto, pero tiene Le buen amistad con el maga recto.”—Prov. 3:32.

8. Cosa kita debe evita hace?

⁸ Aquellos quien “con todo corazon ta converza el verdad” gendeh ta pretende que ta obedece con el maga ley del Dios si ta mira kanila el maga gente pero ta desobedece con ese si nuay quien ta puede mira kanila. (Isa. 29:13) Pero, el un deshonesto persona posible principia pensa que gendeh justo el cuanto ley de Jehova. (Sant. 1:5-8) Baka desobedece le con Jehova na maga cosas que dol gendeh tanto importante para con ele. Despues, si dol nuay mal resulta el cosa le ya hace, posible motiva este con ele que mas desobedece pa con el maga ley del Dios. (Ecl. 8:11) Maskin pa ta pensa le que ta sirvi le con Dios, gendeh acepta si Jehova con el de suyu adoranza. No quierre kita que sucede se kanaton poreso ta pricura kita queda honesto na todo cosas.

9. Cosa kita puede aprende na cosa ya sucede cuando ya mira si Jesus con Natanael? (Mira tambien con el letrato.)

 ⁹ Bien importante que con todo corazon kita habla el verdad. Puede kita este mira na cosa ya sucede cuando ya manda conoce si Felipe con el de suyu amigo que si Natanael con Jesus. Maskin no conoce pa si Jesus con Natanael, ya puede habla si Jesus: “Taqui un deverasan Israelita quien gendeh gayot ta engaña.” (Juan 1:47) Asigurao que honesto el todo maga dicipulo de Jesus pero ya puede nota si Jesus que bien sincero si Natanael. Imperfecto si Natanael igual kanaton pero honesto le y gendeh ta pretende. Ya gusta gayot se si Jesus poreso ya comenda le con Natanael. Quierre kita que ansina tambien el cosa ta mira si Jesus kanaton!

10. Porque kita debe queda con cuidao na cosa kita ta habla? (Santiago 1:26)

¹⁰ Mayoria del maga cosas que ya menciona na Salmo 15 amo acerca si paquemodo kita debe trata con otro. El Salmo 15:3 ta habla que el un visita na tolda de Jehova “gendeh . . . ta usa con el de suyu lenggua para mal habla con otro, gendeh le ta hace cosas malo na de suyu vecinos y gendeh le ta hace malo con el de suyu maga amigo.” Si gendeh kita queda con cuidao na cosa kita ta habla, puede este hace sinti duele con otro. Mas pa, gendeh mas kita puede queda visita na tolda de Jehova.—Le con el Santiago 1:26.

11. Cosa quierre decir del falso acusacion y cosa sucede con aquellos quien ta hace con ese y gendeh ta arripinti?

¹¹ Ya habla el salmista que el maga visita na tolda de Jehova gendeh ta mal habla o ta hace falso acusacion con otro. Cosa quierre decir del falso acusacion? Maga palabra este que gendeh deverasan que puede hace malo con el reputacion del un persona. Ta quita na congregacion con aquellos quien ta mal habla con otro y gendeh ta arripinti.—Jer. 17:10.

12-13. Cosa el cuanto situacion donde posible kita hace malo con el diaton maga amigo? (Mira tambien con el letrato.)

 ¹² El Salmo 15:3 ta hace tambien acorda kanaton que el maga amigo de Jehova gendeh ta hace cosas malo con otro maga gente y gendeh ta hace malo con el diila maga amigo. Na cosa manera kita posible hace malo con otro?

¹³ Maskin gendeh intencional, puede kita hace malo con otro si hace kita calayat maga negativo informacion acerca kanila. Por ejemplo: (1) gendeh mas pioneer el un hermana, (2) gendeh mas ta sirvi na Bethel el un man maridable o (3) gendeh mas anciano o siervo ministerial el un hermano. Justo ba que hace maga especulacion si porque este ya sucede y despues habla se con otro? Posible, manada razon si porque se ya sucede que no sabe kita. Claro gayot que el un visita na tolda de Jehova “gendeh . . . ta hace cosas malo na de suyu vecinos y gendeh le ta hace malo con el de suyu maga amigo.”

HONRA CON AQUELLOS QUIEN TIENE MIEDO CON JEHOVA

14. Cosa quierre decir que ‘evita con el maga mal gente’?

¹⁴ El Salmo 15:4 ta habla que el amigo de Jehova ‘ta evita con el maga mal gente.’ Paquemodo se kita puede hace? Gendeh kita puede determina si deverasan ba malo el un gente base lang na diaton mismo opinion. Porque? Imperfecto kita poreso baka quierre-quierre kita con el un persona cay ta gusta kita con el de suyu custumbre pero con otro ta consumi kita. Entonces, debe kita evita con aquellos lang “maga mal gente” na ojos de Jehova. (1 Cor. 5:11) Incluido aqui aquellos quien ta hace malo pero gendeh ta arripinti, ta gangguia con el diaton creencia y aquellos quien ta hace luya con el diaton espiritualidad.—Prov. 13:20.

15. Cosa el un manera que puede kita honra con “aquellos quien tiene miedo con Jehova”?

¹⁵ Ya habla tambien el Salmo 15:4 que debe kita honra con “aquellos quien tiene miedo con Jehova.” Poreso, ta busca kita manera para dale mira pagka-bueno y respeto con el maga amigo de Jehova. (Roma 12:10) Paquemodo? El Salmo 15:4 ya menciona un manera que puede se kita hace. El amigo de Jehova “ta cumpli . . . con el de suyu promesa, maskin pa resulta este mal para con ele.” Asigurao que puede kita hace sinti duele con otro si gendeh kita cumpli con el diaton promesa kanila. (Mat. 5:37) Por ejemplo, quierre si Jehova que el de suyu maga visita hay cumpli con el cosa sila ya promete na dia del diila casamiento. Alegre tambien le si el maga mayores ta pricura cumpli con el cosa sila ya promete na diila maga anak. Cay ta ama kita con Dios y con otro, ta hace kita el todo para cumpli con el diaton promesa.

16. Cosa el otro manera que puede kita honra con el maga amigo de Jehova?

¹⁶ El otro manera que puede kita honra con el maga amigo del Dios amo si hospitable y bondadoso kita kanila. (Roma 12:13) Si tan junto kita con el diaton maga hermano y hermana na recreacion, ta queda mas fuerte el diaton relacion kanila y con Jehova. Mas pa, si hospitable kita, ta imita kita con Jehova.

NO AMA CON EL SEN

17. Porque ya menciona con el sen na Salmo 15?

¹⁷ El un visita de Jehova “gendeh . . . ta dale presta sen que tiene interes y gendeh le ta acepta suborno para acusa con el inocente.” (Sal. 15:5) Porque ya menciona con el sen na este salmo? Cay si gendeh balance el diaton mirada na sen, puede kita hace sinti duele  con otro y destroza con el diaton relacion con Dios. (1 Tim. 6:10) Na tiempo del Biblia, el cuanto Israelita ya pone interes na sen que ya dale sila presta na diila maga pobre hermano. Tiene tambien maga juez quien ya acepta suborno y ya manipula con el caso del maga inocente. Detestable gayot con Jehova este maga cosas.—Eze. 22:12.

18. Para examina con el diaton mirada na sen, cosa kita debe pregunta na diaton mismo cuerpo? (Maga Hebreo 13:5)

¹⁸ Necesita kita examina si cosa el diaton mirada na sen. Pregunta con el de tuyu mismo cuerpo: ‘Pirmi ya lang ba yo ta pensa acerca na sen y si cosa yo puede cumpra? Si ya presta yo sen, gendeh ba yo dayun ta paga con ese cay ta pensa yo que gendeh necesita con ese el persona con quien yo ya presta? Ta sinti ba yo que bien importante yo cay manada yo sen? Tan dificil ba yo queda bondadoso? Ta pensa ba yo que materialistico el de mio maga hermano y hermana cay manada sila sen? Con el maga rico lang ba yo tan amigo y gendeh con el maga pobre?’ Ya invita kanaton si Jehova que queda de suyu maga amigo. Puede kita dale mira que ta aprecia kita con ese privilegio si gendeh kita ama con el sen. Si hace kita se, gendeh gayot kanaton deja si Jehova!—Le con el Maga Hebreo 13:5.

TA AMA SI JEHOVA CON EL DE SUYU MAGA AMIGO

19. Porque quierre si Jehova que hace kita el maga cosas que ya menciona na Salmo 15?

¹⁹ Na fin del Salmo 15, puede kita le: “Aquellos quien ta hace con este maga cosas hay para duro.” (Sal. 15:5) Este texto ta habla si porque quierre el Dios que hace kita con el maga cosas que ya menciona na este salmo. Quierre si Jehova que queda kita alegre. Poreso, si hace kita con el cosa le ya pidi kanaton, hay ricibi kita el de suyu bendicion y proteccion.—Isa. 48:17.

20. Cosa ta esperanza el maga visita de Jehova?

²⁰ El maga visita de Jehova tiene bonito esperanza na futuro. El maga iscujido hay vivi na cielo na lugar que ya prepara si Jesus para kanila. (Juan 14:2) Aquellos quien tiene esperanza na tierra ta espera con el tiempo que hay experiencia sila con el cosa ya promete na Revelacion 21:3. Alegre gayot kita cay ya invita kanaton si Jehova para queda de suyu maga amigo y queda maga visita na de suyu tolda hasta para cuando!