EKICWEKA C’OKWEGA 24
ECESHONGORO CA 24 Ija aha Rushozi rwa Yehova
Guma ori omugenyi wa Yehova ebiro byona!
‘Yehova, ni oha oritura omu ihema ryawe?’—ZAB 15:1.
ENTEGO
Twaza kushwijuma ebi turi kushabwa kugira ngu tugume twine obunywani burungi na Yehova, kandi turebe n’oku ari kwenda ngu tutwarize banywani beye.
1. Ahabw’enki turi kubasa kugasirwa n’okushwijuma ebiri omuri Zaburi ya 15:1-5?
OMU kicweka ecabandirize eki, tukega ku abahereza ba Yehova abamwehire bari kubasa kuba abagenyi beye omu ihema ryeye ry’ekigereraniso bari kugira obunywani burungi na we. Konka shi ni enki eki turi kushabwa ngu twijuze ebiri kushabwa abari kugira obwo bunywani na we? Zaburi ya 15 negarukamu eco kibuzo. (Shoma omuri Zaburi ya 15:1-5.) Eyi zaburi netuha amashomo g’omugasho agari kubasa kutukwasa kugira obunywani bwa hihi na Ruhanga.
2. Ni enki ekiri kubasa kuba catumire Dawudi yagamba ah’ihema rya Yehova omuri zaburi yeye?
2 Omuri Zaburi ya 15 nihatandika hari kugira hati: ‘Yehova, ni oha oritura omu ihema ryawe? Ni oha oritura aha kibungo cawe ekiri kwera?’ (Zab 15:1) Omuhandiki wa zaburi ari we Dawudi ari kugamba ah’‘ihema’ rya Yehova, nabasa kuba yabire ari kutecereza ah’ihema ry’okubuganiramu eryabire ririho omuri Gibeyoni. Nambwenu Dawudi akagamba aha ‘kibungo ekiri kwera’ ca Ruhanga ari kumanyisa Sayuni y’omuri Yerusalemu. Omuri kiromita nyingi ori kuza omu mashuma ga Gibeyoni Dawudi akombekayo ihema ry’okutamu eshanduku y’endagano kuhisa obu hekalu yayombekirwe.—2 Sam 6:17.
3. Ahabw’enki tushemerire kushoborocerwa ebiri omuri Zaburi ya 15? (Nambwenu reba ekishushani.)
3 N’amazima, Abisirayeli bingi bakaba batari kwikirizibwa kukorera omu ihema ry’okubuganiramu, kandi abace omuri bo ni bo ababire nibaza ahu eshanduku y’endagano yabire nebikwa. Konka abahereza ba Yehova b’abesigwa bona bakaba bari kubasa kuba abagenyi b’omu ihema ryeye ry’ekigereraniso kandi baguma bari banywani beye. Kandi eco ni co eki twena turi kwenda. Zaburi ya 15 negamba emicwe emwe eyi tushemerire kwereka kugira ngu tugume turi banywani ba Yehova.
Abisirayeli b’omu bwire bwa Dawudi bakaba bari kubasa kwehuriza eki kuba abagenyi b’omu ihema rya Yehova kiri kumanyisa (Reba paragurafu ya 3)
GUMA ORI OMWESIGWA KANDI OKORE EBIRUNGI
4. Nitumanya tuta ku okubatiziba atari co eki Yehova ari kwenda ngu tukore? (Isaya 48:1)
4 Omuri Zaburi ya 15:2, munywani wa Ruhanga nagambwa ku ari ‘kugendera omu muhanda murungi kandi ku ari kukora eby’okuhikirira.’ Ebigambo ‘okugenda’ n’‘okukora’ nibimanyisa ekintu ekiri kugumizamu. Konka shi nobasa ‘kugendera omu muhanda murungi’? Yego nikibasika. N’obu abantu bona batahikirire, Yehova nayija kukureba nk’‘ori kugendera omu muhanda murungi’ wakora cona eki ori kubasa kugira ngu omworobere. Ku turi kweha Yehova kandi tukabatizibwa, nituba twatandika kugenda na Ruhanga . Ecokureberaho: Omu bwire bwa Bibuli, kuba omuntu ari Omwisirayeli kikaba kitari kumanyisa ngu naba omugenyi wa Yehova. Abamwe bakaba nibashaba Yehova kandi babikora ‘omu mazima n’omu buryo burungi.’ (Shoma omuri Isaya 48:1.) Abisirayeli b’emitima mirungi bakaba bashemerire kumanya ebi Yehova ari kwenda kandi babyorobera. Ni co kimwe, kugira ngu tugume twine obunywani burungi na Yehova, tushemerire kukora ekiri kukira aha kubatizibwa n’okwetwa Abahamya ba Yehova. Tushemerire kugumizamu ‘kukora ebyokuhikirira.’ Konka shi ni bata oku turi kubasa kubikora?
5. Okorobera Yehova omu bintu byona nikimanyisa ki?
5 Omu misho ga Yehova, ‘okugendera omu muhanda murungi’ n’‘okukora eby’okuhikirira’ nikimanyisa ekiri kukira aha kuza omu nterane burijo. (1 Sam 15:22) Tushemerire kutaho amani kugira ngu tworobere Yehova omu bi turi kukora byona, n’omu bwire obu turi kuba turi twenka. (Emi 3:6; Mub 12:13, 14) Nambwenu tushemerire kugezaho korobera Yehova n’omu tuntu oturi kurebeka nka tuce. Eco ku turi kukikora, nicereka ku turi kumukunda kandi kituma na we yatukunda.—Yoh 14:23; 1 Yoh 5:3.
6. Tukuratize ebiri omu Baheburayo 6:10-12, ni enki ekiri kukira ebikorwa by’obwesigwa ebi twakozire omu bwire bwa kare?
6 Yehova nashemerererwa munonga ebi twamukorire omu bwire bwa kare. Konka ebyo bikorwa tibyo ebiri kubasa kutuma twaguma omu ihema ryeye. Eco nikirebecera omu bigambo ebiri omu Baheburayo 6:10-12. (Hashome.) Yehova tari kubasa kwebwa ebintu birungi ebi twamukorire omu bwire bwa kare. Konka nayenda ngu tugumizemu kumukorera omu bwesigwa ‘kuhisya aha muheru.’ Nayija kutuha omugisha g’okubaho ebiro byona ‘twaba tutaruhire.’—Gal 6:9.
GUMA OGAMBE AMAZIMA OYIHIRE AHA MUTIMA
7. Okugamba amazima twihire aha mutima nikimanyisa ki?
7 Omuntu ori kwenda kuguma ari omugenyi wa Yehova omu ihema ryeye ashemerire ‘kugamba amazima ayihire aha mutima.’ (Zab 15:2) Eco nikimanyisa okukora ebiri kukira aha kutagamba ebishuba. Yehova nayenda ngu tube abesigwa omuri byona ebi turi kugamba n’ebi turi kukora. (Heb 13:18) Eco ni ec’omugasho ahakuba, ‘omuntu ori kwehabagiza ni ekiri kunugwa ahari Yehova, konka ab’omutima ogugororokire nabesiga.’—Emi 3:32.
8. Ni guha mutwarize ogu tushemerire kwerinda?
8 Abari ‘kugamba amazima bihire aha mutima’ tibari korobera Yehova haba hariho abantu kusha, ahobwe nibamworobera na baba bari bonka. (Isa 29:13) Niberinda oburyarya. Omuntu w’endyarya nabasa kutandika kubanganisa aha bwenge oburi omu biragiro bya Yehova. (Yak 1:5-8) Nabasa kugomera ebiragiro bya Yehova ebi ari kutecereza ku bitari kumukwataho. Bwanyima ku ari kureba hatagira engaruka ezaruga omu bugomi bweye, nabasa kutandika kukizaho kushisha ebiragiro bya Yehova, kandi kituma atayikiriza okuramya kweye. (Mub 8:11) Konka itwe nitwenda kuba abesigwa omuri byona.
9. Ni enki eki turi kwegera aha bigambo ebi Yesu yagambire ahari Nataniyeli ku babugine aha murundi g’okubanza? (Nambwenu reba ekishushani.)
9 Nitubasa kwega omugasho g’okugira omutima ogutine buryarya ogu Yesu yabwine ahari Nataniyeli obu yamubugine aha murundi g’okubanza. Filipo ku yaresire munywani weye Nataniyeli ngu arebe Yesu hine ekintu ecabireho. Nobu bwabire buri obw’okubanza Yesu abwine Nataniyeli akamugabaho ati: ‘Reba Omwisirayeli kashushu, otine buryarya!’ (Yoh 1:47) Ni amazima Yesu akaba nareba abandi begi beye ku batine oburyarya, konka akareba ku Nayaniyeli yabire arengeserize okugira omutima ogutine buryarya. Nataniyeli akaba atahikirire nk’itwe. Konka akaba ari omwesigwa omuri byona. Yesu akabimurebaho kandi yabimusimira. N’itwe kikatushemeza Yesu atugambireho baso.
Filipo akareta munywani weye Nataniyeli omushija owabire atine buryarya, ahari Yesu. N’itwe tushemerire kuba nka Nataniyeli. (Reba paragurafu ya 9)
10. Ahabw’enki tushemerire kwerinda kukoresa kubi ekiconco c’okugamba? (Yakobo 1:26)
10 Ebintu bimwe ebi turi kushabwa ebiri omuri Zaburi ya 15 nibikwata aha ku turi kutwariza abandi. Zaburi ya 15:3 negamba ku omugenyi w’omu ihema rya Yehova atari ‘kubeherera bandi na rurimi rwe, n’obu kwakuba okukora kubi mugenzi weye, ninga okushisha izina rya mutahi weye.’ Okukoresa kubi ekiconco c’okugamba omuri obwo buryo nikibasa kugira engaruka aha bandi kandi kituma tutaba abagenyi b’omu ihema rya Yehova.—Shoma omuri Yakobo 1:26.
11. Okushubagura nikimanyisa ki, kandi shi ni enki eki ari kukorerwa yaba atari kwehana?
11 Omuhandiki wa zaburi akagamba aha kubeherera abandi. Okubeherera abandi nikimanyisa ki? Nikimanyisa kugamba aha muntu ebintu ebitahikire ebiri kubasa kushisha izina ryeye. Omuntu ori kubeherera abandi otari kwehana nabingwa omu kibina.—Yer 17:10.
12-13. Ni ziha mbera ezi turi kubasa kushishamu izina rya banywani bitu tutakigenderire? (Nambwenu reba ekishushani.)
12 Nambwenu Zaburi ya 15:3 negamba ku omugenyi wa Yehova atari kukorera kubi batahi beye ninga ngu ashishe izina rya mugenzi weye. Eco nikitwariramu enki?
13 Nitubasa kushisha izina ry’omuntu turi kumugambaho ebintu ebitahikire. Ecokureberaho: (1) omunyanyaza yayemereza omurimo g’obwire bwona, (2) mwenetata na munyanyazi tibacakora ahari Beteli, ninga (3) mwenetata tacari omuzehe ninga omuhereza w’ekibina. Mbehi nikiba kihikire kurondesa enshonga ezatumire baruga ahari eyo mirimo rero tutandika kubigambira abandi? Nihaba hariho enshonga ezatumire habaho ezo mpinduka ezi itwe tutari kubasa kumanya. Nambwenu, omugenyi w’omu ihema rya Yehova tari ‘kukora kubi mugenzi weye, ninga okushisha izina rya mutahi weye.’
Nikibasa koroba kugamba aha bandi ebintu ebitari byo, kirugemu okushubagura (Reba paragurafu ya 12-13)
HA EKITINISA ABARI KUTINA YEHOVA
14. Shoborora oku abagenyi ba Yehova bari kwanga omuntu ori kukora ebibi.
14 Zaburi ya 15:4 negamba ku munywani wa Yehova ari ‘kwanga omuntu wena ori kugaywa.’ Ni bata oku turi kubasa kukikora? Ahakuba turi abantu abatahikirire, tituri kubasa kumanya yaba omuntu ari kugaywa. Ahabw’enki? Nitubasa kukunda abantu ahakuba turi kuhurira kubana na bo byorobi, konka abandi turemwa kubakunda ahakuba bari kukora ebintu ebiri kutushasha. Konka abu tushemerire kwerinda ni abu Yehova ari kureba nk’abari ‘kugaywa.’ (1 Kor 5:11) Omuri abo harimu abari kukora ebibi batari kwehana, abatari kuha ekitinisa okwikiriza kwitu n’enyikiriza zitu, ninga abari kugezaho kututanisa na Yehova.—Emi 13:20.
15. Ni buha buryo bumwe obu turi kubasa kuhamu ekitinisa ‘abari kutina Yehova’?
15 Nambwenu Zaburi ya 15:4 negamba ku tushemerire kuha ekitinisa ‘abari kutina Yehova.’ Niturondesa oburyo bw’okwereka embabazi n’okuha ekitinisa banywani ba Yehova. (Rom 12:10) Ni bata oku turi kubasa kukikora? Oburyo bumwe oburi kugambwa omuri Zaburi ya 15:4, ni oku omugenyi wa Yehova ‘yarahora, n’obu aferwa, atari kuhinduka.’ Ku turi kuraganisa abandi tutabihikirize nibibashasha. (Mat 5:37) Ecokureberaho: Yehova nayenda ngu abagenyi b’omu ihema ryeye bahikirize endahiro yabo y’obushwere. Nambwenu nashemererwa yareba abazire bari kukora cona eki bari kubasa kugira ngu bahikirize ebi bari kuraganisa abana babo. Rukundo eyi turi kukunda Ruhanga n’eyi turi kukunda batahi bitu ni yo eri kutuma twakora cona eki turi kubasa kugira ngu tuhikirize ebi turi kubaraganisa.
16. Ni buha bundi buryo obu turi kubasa kuhamu ekitinisa banywani ba Yehova?
16 Obundi buryo obu turi kubasa kuhamu ekitinisa banywani ba Yehova ni okubakira omu maka gitu kandi tukabaha ebi bacenire. (Rom 12:13) Twamarana obwire na benetata na banyanyazi nikituma twakizaho kukundana kandi tukizaho kukunda Yehova. Ekiri kukira ebyo, ku turi kwakira abandi nituba turi kutoreza Yehova.
YERINDE KUKUNDA ESENTE
17. Ahabw’eni Zaburi ya 15 eri kugamba aha bikwatirine n’esente?
17 Omuri eyo Zaburi nitushomamu ku omugenyi wa Yehova ‘atari kuguza empiha zeye ahabw’enshagi ehingurine n’obu kwakuba okurya empongano, ngu asingise orubanja abatarwine.’ (Zab 15:5) Konka shi ahabw’enki omuri eyo zaburi ngufu hari kugambwamu esente? Ni ahabw’okuba okukunda esente nibibasa kushasha abandi kandi bishisha obunywani obu twine na Ruhanga. (1 Tim 6:10) Omu bwire bwa Bibuli, abamwe bakaba nibaguza esente benetata b’abacene bari kwenda kubihamu amagoba mingi. Nambwenu bamwe omu baramuzi bakaba nibarya bituga, rero basingisa orubanja omwere. Ebyo bintu ni ebiri kunugwa ahari Yehova.—Ezek 22:12.
18. Ni biha bibuzo ebi turi kubasa kwebuza kugira ngu tweshwijume oku turi kureba esente? (Abaheburayo 13:5)
18 Ni ec’omugasho kweshwijuma tukareba oku turi kureba eby’esente. Yebuze ngu: ‘Mbehi ninkira kutecereza aha sente n’ebi ndi kubasa kugura? Mbehi omuntu yanguza esente, nincerererwa kuzimwihura ndi kutecereza ku atari kuzetenga? Mbehi naba nyine esente ninyehurira nk’omuntu oshambire kandi kingumira ku efura? Mbehi ninkira kucwera benetata na banyanyazi orubanja ahabw’esente ezi bine? Mbehi ninkira kuronda abanywani b’abagiga kusha rero abacene ntabafeho?’ Twine omugisha gw’amani g’okuba abagenyi ba Yehova. Nitubasa kurinda ogo musisha turi kugumizamu kwerinda kukunda esente munonga. Twakikora tusyoya, Yehova tarije kutusigaho!—Shoma omu Baheburayo 13:5.
YEHOVA NAKUNDA BANYWANI BEYE
19. Ni eha nshonga nkuru eri kutuma Yehova yatushaba kukora ebintu byona ebiri omuri Zaburi ya 15?
19 Zaburi ya 15 nehendera eri kuturaganisa eti: ‘Ori kukora ebyo taritengesibwa ebiro byona.’ (Zab 15:5) Omuhandiki wa zaburi akatwereka enshonga tushemerire kukora ebintu ebirimu. Ni ahabw’okuba Yehova nayenda ngu tushemererwe. Obwe rero twakora ebi Yehova ari kwenda, nitugira amagara marungi kandi nayija kuturinda.—Isa 48:17.
20. Ni eha migisha eyi abagenyi ba Yehova barije kutunga?
20 Abagenyi abu Yehova ari kwikiriza bategerize n’ekihika ebirungi by’omu biro eby’omu misho. Abakristo abashukirweho omwika b’ebesigwa nibija kutaha omu ‘myanya yabo y’okuturamu’ eyi Yesu yabategurire omu iguru. (Yoh 14:2) Abine amasiko g’okutura omu nsi bine amasiko g’okureba ekiraganiso c’omu Kushururwa 21:3 kiri kuhikirira. mazima, twena nitwesima ahakuba twatungire omugisha g’okuba banywani ba Yehova, ni okugamba okuba abagenyi b’omu ihema ryeye ebiro byona!
ECESHONGORO CA 39 Okukora Eiziina Rirungi na Ruhanga
