1. Ifa ussun Kölfel 15:​1-5 a tongeni álisikich?

 SIA káé lón ewe lesen mwen ei pwe chókkewe mi fangoló manawer ngeni Jiowa, ra tongeni néún waséla lón imwan we “imw mangaku” iká repwe sópweeló le chiechiéch ngeni. Nge met a lamot sipwe féri pwe sipwe chiechiéch ngeni? Kölfel 15 a fós ussun ena pwóróus. (Álleani Kölfel 15:​1, 2 seni ewe footnote, pwal álleani wokisin 3-5.) a Ena sópwun, a áiti ngenikich met a lamot sipwe féri pwe sipwe chiechiéch ngeni Kot.

2. Eli met Tafit a ekieki atun a fós ussun imwen Jiowa imw mangaku?

² Kölfel 15 a poputá ren ekkeei kapas eis: “Jiowa, ié epwe tongeni waséla lón imwom imw mangaku? Ié epwe tongeni nónnóm wóón chukum mi pin?” (Kölf. 15:​1, NW) Lupwen ewe soumakken kélfel Tafit a fós ussun imwen Jiowa we “imw mangaku,” eli a ekieki ussun ewe imwenfel mangaku mi nóm Kipeon lón eú atun. Lupwen Tafit a pwal fósun ‘chukun [Kot] mi pin,’ eli a ekieki ussun ewe imw mangaku mi nóm wóón ewe Chukun Sion lón Jerusalem. Me ikena ie, ina epwe 6 mwail towauan seni éérún Kipeon, Tafit a aúetá eú imw mangaku pwe epwe onómu ewe pwórófel lón tori epwe aúetá ewe imwenfel.—2 Sam. 6:17.

3. Pwata sia mochen weweiti masouen Kölfel 15? (Pwal ppii ewe sasing.)

³ Ewer, lape ngeni ekkewe chón Israel rese angang lón ewe imwenfel mangaku, nge fókkun fitemén chék ra tongeni tolong ikewe ewe pwórófel a nóm ie. Nge meinisin néún Jiowa kewe aramas mi túppwél ra tongeni waséla lón imwan we imw mangaku lón kapas áwewe ren ar wiliiti chiechian me sópweeló  le chiechi ngeni. Ina och mettóch kich meinisin sia mochen. Kölfel 15 a fósun ekkóch napanap mi lamot sipwe ámááraatá pwe sipwe chiechien Jiowa tori feilfeiló.

FEFFETÁL FÁN TÚPPWÉL ME FÉFFÉRI MINNE MI PWÚNG

4. Ifa ussun sia silei pwe esap chék papatais ina met Jiowa a mochen sipwe féri? (Aisea 48:1)

⁴ Kölfel 15:2 (NW) a áweweei pwe emén chiechien Kot, i “emén mi feffetál fán túppwél, féfféri minne mi pwúng.” Ekkeei kapas “feffetál” me “féfféri,” ra pwáári pwe och mettóch mi chék sópwósópwoló. Nge kich mi tongeni “feffetál fán túppwél”? Kich mi tongeni. Ewer, ese wor emén aramas mi unuséch, nge me ren Jiowa kich mi “feffetál fán túppwél” iká sia achocho úkúúkún ach tongeni le álleasochisi i. Lupwen sia fangoló manawach ngeni Kot me papatais, sia kerán chék poputá le feffetál me Kot. Áwewe chék, lón fansoun lóóm, esap chék pokiten emén i chón Israel iwe epwele emén néún Jiowa waséla. Ekkóch ra kéri itan, nge esap “fän let me pwüng.” (Álleani Aisea 48:1.) Ekkewe chón Israel mi letipwenechar ra káé ussun án Jiowa kewe allúk me álleasochisiir. Pwal ina chék ussun lón ei fansoun, ren ach sipwe chiechiéch ngeni Kot, sisap chék papatais me chichchiechi ngeni chón mwichefel, nge a pwal lamot ach sipwe “féfféri minne mi pwúng.” Ifa ussun sia tongeni féri ena?

5. Met weween ach sipwe álleasochisi Jiowa lón mettóch meinisin?

⁵ Me ren Jiowa ach “feffetál fán túppwél” me “féfféri minne mi pwúng,” ese chék wewe ngeni ach fiffiti mwiich iteitan lón Leenien Mwiich. (1 Sam. 15:22) A lamot sipwe fókkun achocho le álleasochisi Kot lón mettóch meinisin sia féri, pwal mwo nge atun sia chék áláeménúló. (SalF. 3:6; SalAf. 12:​13, 14) A lamot sipwe achocho le álleasochisi Jiowa pwal mwo nge lón ekkewe mettóch mi kisikis.  Ach féri ena, a pwáári pwe sia enletin tongei Kot, iwe ena epwe alapaaló an tongekich.—Jon 14:23; 1 Jon 5:3.

6. Me ren Ipru 6:​10-12, met a kon lamot seni ekkewe mettóch mi múrinné sia féri me lóóm?

⁶ Jiowa a fókkun pwapwa ren met sia féri fán itan lón ekkewe fansoun lóóm. Iwe nge, esap pokiten chék sia féri ekkena mettóch mi múrinné lón ekkewe fansoun lóóm, iwe sipwele néún Jiowa waséla lón imwan imw mangaku tori feilfeiló. A ffat ena me lón Ipru 6:​10-12. (Álleani.) Jiowa ese ménúkaaló ekkewe féffér mi múrinné sia féri me lóóm. Nge a mochen ach sipwe sópweeló le angang ngeni seni unusen letipach “tori lesópwólóón.” I epwe chiechiach feilfeiló “iká sise achanú.”—Kal. 6:9.

EÁNI KAPAS MI ENLET SENI LÓN LETIPOM

7. Met weween ach sipwe eáni kapas mi enlet seni lón letipach?

⁷ Emén mi mochen án Jiowa epwe néúni waséla lón imwan we imw mangaku, epwe “eáni kapas mi enlet seni lón letipan.” (Kölf. 15:​2, NW) Ena ese chék wewe ngeni ach sisap kapas chofona. Jiowa a mochen ach sipwe wenechar lón meinisin met sia apasa me féri. (Ipru 13:18) A lamot ena, pún Jiowa “a oput eman aramas mi chök föri mine a ngau, nge a lükülükü eman mi wenechar.”—SalF. 3:32.

8. Met sókkun féffér sipwe túmúnúkich seni?

⁸ Chókkewe mi ‘eáni kapas mi enlet seni lón letiper’ rese tipin emén mi álleasochis lein aramas, nge álleasolapa án Kot allúk atun ra chék áláemén. (Ais. 29:13) Rese eáni féffér mi likótuputup. Emén mi likótuputup, a tongeni poputá le ekieki pwe esap fansoun meinisin a múrinné án Jiowa kewe allúk. (Jem. 1:​5-8) Eli epwe álleasolap ngeni Jiowa wóón ekkewe mettóch a ekieki pwe ese kon lien lamot. Nge mwirin, iká a kúna pwe ese wor och mettóch mi ngaw a fis mwirin an álleasolap, iwe eli epwe poputá le féri ekkewe mettóch mi fen kon ngaw seni. Inaamwo iká a ekieki pwe a angang ngeni Jiowa, nge an fel esap ketiw me ren Jiowa. (SalAf. 8:11) Iwe nge, kich sia mochen wenechar lón mettóch meinisin.

9. Met sia tongeni káé seni án Jises we áeúin chuuri Nataniel? (Pwal ppii ewe sasing.)

⁹ Sia tongeni káé lamoten ach sipwe eáni eú  letip mi wenechar seni án Jises áeúin chuuri Nataniel. Lupwen Filip a emmwenaato chienan we Nataniel an epwe chuuri Jises, a fis och mettóch mi amwarar. Inaamwo iká Jises a kerán chuuri Nataniel, nge iei met a erá: “Nengeni, wesewesen i re Israel ese wor otuputup ren.” (Jon 1:47) Ewer, Jises a silei pwe néún kewe ekkóch chón káé iir mi wenechar, iwe nge a kúna pwe án Nataniel wenechar a kkóló aúchean. Nataniel a ussun chék kich, i ese unuséch. Nge ese likótuputup me a wenechar lón mettóch meinisin. Ina minne, Jises a ingeiti me apúnga Nataniel. A ifa me pwapwaach iká Jises epwe pwal apasa ena ussuch!

10. Pwata a lamot sipwe túmúnú met sia apasa? (Jemes 1:26)

¹⁰ Lape ngeni ekkewe mettóch mi mak lón Kölfel 15 a weneiti féfférúch ngeni ekkewe ekkóch. Kölfel 15:​3, a erá pwe emén waséla lón imwen Jiowa we imw mangaku “esap aitengaua [“pweni,” NW] eman, esap föri mine a ngau ngeni chienan, esap pwal ngününgünüfetalei chon arun.” Ach áeámwáálli ach tufichin kapas lón ekkena esin napanap, a tongeni ámeteki letipen emén me esap chúen fichiitikich ach sipwe emén waséla lón imwen Jiowa we imw mangaku.—Álleani Jemes 1:26.

11. Met weween pweni, me met epwe fis ngeni emén chón pweni ese áier?

¹¹ Ewe soumakken kélfel a fósun “aitengaua” are pweni emén. Met weween pweni? Lape ngeni, a wewe ngeni och itiitin pwóróus mi mwáál mi tongeni angawaaló itéchún emén. Emén mi pweni emén nge ese áier, epwe katowu seni ewe mwichefelin Chón Kraist.—Jer. 17:10.

12-13. Lón menni atun sia tongeni ngúnúngúnúfetálei chienach kewe nge sise meefi? (Pwal ppii ewe sasing.)

¹² Kölfel 15:3 a pwal áchema ngenikich pwe néún Jiowa kewe waséla, rese féri och mi ngaw ngeni chón óruur kewe me rese pwal “ngününgünüfetalei” chiechier kewe. Ifa  ussun sia tongeni ngúnúngúnúfetálei chiechiach kewe?

¹³ Eli sise meefi nge sia fen ngúnúngúnúfetálei chiechiach kewe ren ach achéwú och pwóróus ese éch ussur. Áwewe chék: (1) emén Chón Kraist fefin a úkútiw le pioneer, (2) eú pea pwúpwúlú ra úkútiw le angang lón Bethel, are (3) emén Chón Kraist mwán ese chúen wiseni ewe wis mwán mi ásimaw are chónálillisin mwichefel. Mi éch ach sipwe ereni ekkewe ekkóch pwe chókkana neman ra féri och mettóch mi ngaw ina popun rese chúen eáni ekkena angang? Neman a wor chómmóng popun a fis ekkena siwil nge sise silei ussun. Pwal och, emén waséla lón imwen Jiowa we imw mangaku, “esap föri mine a ngau ngeni chienan, esap pwal ngününgünüfetalei chon arun.”

ASAMOLU CHÓKKEWE MI NIWOKKUSITI JIOWA

14. Áweweei ifa ussun néún Jiowa kewe waséla repwe “oput eman mi manauangau.”

¹⁴ Kölfel 15:4 a apasa pwe emén chiechien Jiowa a “oput eman mi manauangau.” Ifa ussun sipwe silei iká emén a “manauangau”? Sise tongeni apasa iká emén a “manauangau” lóngólóng wóón ach ekiek me meefiach. Pwata? Pún kich sise unuséch, iwe, neman sipwe efich chókkewe sia ekieki pwe a mecheres ach sipwe chiechi ngeniir, nge oputa ekkewe ekkóch pokiten ra asongakich. Ina minne, sipwe túmúnúkich seni chókkewe chék me ren Jiowa iir mi “manauangau.” (1 Kor. 5:11) A kapachelong chókkewe rese mochen áier seni ar kewe féffér mi ngaw, súfélúngaweiti met sia eáni lúkú, are mochen atai ach chiechi ngeni Jiowa.—SalF. 13:20.

15. Ifa eú alen ach sipwe “asamolu chokewe mi meniniti” Jiowa?

¹⁵ Kölfel 15:4 a pwal apasa pwe sipwe “asamolu chokewe mi meniniti ewe Samol mi Lapalap.” Ina popun, sia kútta alen ach sipwe pwáári kirekiréch me súféliti chiechien Jiowa kewe. (Rom 12:10) Ifa ussun? Eú alen ach sipwe féri ena a lóngólóng wóón Kölfel 15:​4, emén waséla lón imwen Jiowa imw mangaku “a apwönüetä an pwon a eäni fän akapel, inamwo are a weires ren.” Iká sise apwénúetá met sia eáni pwon, a tongeni ámeteki ekkewe ekkóch. (Mat. 5:37) Áwewe chék, Jiowa a ésúkúsúkú seni néún kewe waséla ar repwe apwénúetá ar we pwonen ririin pwúpwúlú. A pwal pwapwa atun ekkewe sam me in ra achocho le apwénúetá ar pwon ngeni néúr kewe. Ach tongei Kot me chón óruch kewe epwe amwékútúkich le apwénúetá ach kewe pwon úkúúkún ach tongeni.

16. Ifa pwal eú alen ach sipwe asamolu chiechien Jiowa kewe?

¹⁶ Pwal eú alen ach sipwe asamolu chiechien Kot kewe, ina ach awasélaéchúúr me fangafangéch ngeniir. (Rom 12:13) Ach awora ach fansoun le chiechi ngeni pwiich kewe me kunou ngeniir, ina met epwe apéchékkúlaló ach riri ngeniir me pwal ngeni Jiowa. Pwal och, atun sia awasélaéchúúr, sia áppirú Jiowa.

SÓPWEELÓ LE TTII SONUK MOCHENIAN MONI

17. Pwata Kölfel 15 a fós ussun moni?

¹⁷ Sia káé pwe emén néún Jiowa waséla epwe “mwütawu nöün moni, nge esap angei winnan, esap pwal angei lifangen amichimich pwe epwe aturu eman esap wor an tipis.” (Kölf. 15:5) Pwata Kölfel 15 a fós ussun moni? Pún iká sia eáni ekiek ese pwúng wóón moni, iwe, eli sipwe kon aúcheani moni lap seni aramas me pwal mwo nge lap seni Kot. (1 Tim. 6:10) Lón fansoun lóóm, ekkóch ra kirikiringaw ngeni pwiir kewe mi osupwang ren ar apachaatá manawen néúr kewe moni ra paaroni. Pwal och, ekkóch ekkewe soukapwúng  ra etiwa liffangen emichimich me etipisi ewe emén ese wor tipisin. Jiowa a oputa chókkewe mi féri ekkena esin mettóch.—Is. 22:12.

18. Ikkefa ekkewe kapas eis epwe álisikich le etittina ach ekiek ussun moni? (Ipru 13:5)

¹⁸ A éch ach sipwe etittina met ach ekiek ussun moni. Pwisin eisinuk: ‘Úa kan ekkekieki ussun moni me met úa tongeni kamé? Iká úa paaro moni, úa kan mmang le omusa, pokiten úa ekieki pwe ewe ú paaro seni ese osupwangan? An wor nei moni a efisi ái úpwe meefi aúcheai nge áweiresi ái úpwe fangafangéch? Úa ekieki pwe iká a wor néún pwiich kewe watteen moni, iwe iir ra kon aúcheani moni lap seni ar tongei Jiowa? Úa kan chiechiéch ngeni ekkewe mi wéúéch lap seni ekkewe mi wéúngaw?’ A mmen lamot ach sipwe eisini pwisinkich ekkena kapas eis pokiten sia ketiw ach sipwe néún Jiowa waséla. Nge sia tongeni chék wiliiti néún Jiowa waséla tori feilfeiló, iká sise mochenian moni. Iká sia féri ena, Jiowa esap fókkun likitikicheló!—Álleani Ipru 13:5.

JIOWA A TONGEI CHIECHIAN KEWE

19. Pwata Jiowa a mochen ach sipwe féri meinisin ekkewe mettóch mi mak lón Kölfel 15?

¹⁹ Kölfel 15 a muchúló ren ei pwon: “Ätewe mi föri ekei mettoch epwe nomopos won chukum mi pin.” (Kölf. 15:5) Ewe soumakken kélfel a affata ewe popun pwata Jiowa a mochen ach sipwe féri meinisin ekkena mettóch mi mak lón ena puken Kölfel 15. I a mochen ach sipwe pwapwa. Lupwen sia féri met a apasa ach sipwe féri, manawach epwe múrinné me i epwe túmúnúkich.—Ais. 48:17.

20. Met néún Jiowa kewe waséla ra mwétéresiiti?

²⁰ Néún Jiowa kewe waséla ra tongeni mwétéresiiti ar we ápilúkúlúk mi amwarar fán iten mwachkkan. Ekkewe mi kepit, repwe nóm lón láng ikewe Jises a ammólnatá eú leeni fán iter. (Jon 14:2) Nge ekkewe mi eáni ápilúkúlúkún manaw wóón fénúfan, ra ésúkúsúkú pwénútáán ewe pwon lón Pwáraatá 21:3. Ewer, kich meinisin sia fókkun feiéch pwe Jiowa a etiwakich ach sipwe chiechian, sipwe néún waséla lón imwan imw mangaku tori feilfeiló.