1. Masalmo 15:​1-5 onnikamihedha dhavi?

 NSUNZO nivirile, nihoha wi muttu oniviperheka wa Yehova onokala marho waye vina onowodha okala muleddo vatakulu vaye. Kito ninawodhe dhavi okala muleddo vatakulu va Yehova? Masalmo 15 onologa makani aba. (Kengesa Masalmo 15:​1-5.) Masalmo oddu onotapulelamo enfwanyelihu okosa wi nidhowegevi nikanaga mandano ofiyedheya na Yehova.

2. Txini yobuwela Davidi alogaga mwaha wa nyumba ya Yehova?

² Masalmo 15 onoroma na mazu aba: “Nabuya [Yehova], bani onfwanyela okala mba mwenyu, ofwasa vamwangoni venyu wokoddela?” (Masal. 15:1) Mulogiliye mwaha wa nyumba ya Yehova, txino Davidi wobuwela musana, wakala o Gabaón nsaka nttile. Davidi vina wahiloga sabwa ya “[mwango] wokoddela,” txino iyene walogana mwango Sioni wakala o Jeruzalemi. Mwango obu, wakala makilometuru menjene o sul y’o Gabaón, Davidi wahisasanyedha musasa wi ekemo yobo ya nipagano mpaka omagiwa mburho wofwanyelela.—2 Sam. 6:17.

3. Ekalele nni yamakamaka ononelamo ejile enloga Masalmo 15? (Koona vina foto.)

³ Ebaribari wi ana Izrayel enjene kawodha okamihedha mmusanani, ttabwa-ttabwa ovolowa mmusasani mwafwanyeya yobo ya nipagano. Adhari otene ororomeleya a Yehova agahiwodha okala vatakulu vaye vanladdaniho modhela odhowagavi akalaga amarho aye. Jakene enfunihu okosa. Masalmo 15 onologa mikalelo dhinfwanyelihu wunuwiha wi nidhowegevi nikalaga amarho a Yehova.

 WEDDE NOROROMELEYA VINA OKOSE ELI YAPAMA

4. Ottiya obatiziwavi elobo gani ennijedhelana Yehova? (Izaiya 48:1)

⁴ Masalmo 15:​2, onologa wi marho wa Mulugu ddule onedda nororomeleya, onira dhomyala. Mazu aba wedda vina wira anolagiha wi ninofwanyela odhowagavi nikosaga ejuwene. Kito enowodheya-wene wedda nororomeleya? Ndde. Ebaribari wi iyo notene nili attu ohiligana, mbwenyi mwa Yehova ninowedda nororomeya nigavilibihedha omwiwelela. Nigaviperheka wa Yehova vina nibatiziwa, ninoroma wedda na Mulugu. Mbwenyi karoma otanalela wi masaka awale okosa mpaddi wa nlogo na Izrayel kiyamuttukulela muttu okala muleddo vatakulu va Yehova. Ena aloga wi animulabela Mulugu mbwenyi kamulabela na “murima webaribari.” (Kengesa Izaiya 48:1.) Ana Izrayel afuna okala aleddo vatakulu va Yehova anfwanyela osunza dhàfunana Yehova vina ovirihamo magano aye. Na mukalelo wakene, wi nirumeliwe na Yehova masaka abano ninofwanyelela okosa elobo yina ottiya obatiziwavi vina ologa wi nili Anamoona a Yehova. Ninofwanyela odhowagavi “[nikosaga] dhomyala.” Eji entapulela eni?

5. Txini entapulela omwiwelela Yehova mwa dhetene?

⁵ Vamentoni va Yehova, wedda nororomeleya vina “[okosa] dhomyala” enopitta odhowa mmatugumanoni o Nyumbani ya Omwene. (1 Sam. 15:22) Ninofwanyela ovilibihedha omwiwelela Yehova, vipaddi dhotene dha mwigumini mwehu masiki nigakala nooka. (Gano 3:6; Koh. 12:​13, 14) Ninofwanyela odhowavi nivilibihedhaga omwiwelela Yehova masiki na dhilobo dhinoneya ninga kadhili dhamakamaka. Nigakosa ejuwene ninele olagiha wi txibarene ninomukwela Yehova vina sabwa ya ejuwene iyene onele onikwela venjene.—Jo. 14:23; 1 Jo. 5:3.

6. Mowiwanana na Ahebreu 6:​10-12, elobo gani eli yamakamaka ottiya dhilobo dhapama dhikosilihu wale?

 ⁶ Yehova onovaha ttima dhilobo dhikosilihu wale. Mbwenyi dhilobo dhikosilihu wale kadhinnikuluveliha wi ninele odhowagavi nikalaga aleddo vatakulu va Yehova. Ahebreu 6:​10-12 onotapulelamo mwahaya. (Kengesa.) Ebaribari wi Yehova kandduwala dhapama dhikosilihu wale. Mbwenyi iyene onfuna wi nidhowegevi nimwebedhaga na omuttu wehu wetene mpaka omagomo. Ninele owodha okala amarho aye namukalakala nigahitxelele.—Gal. 6:9.

KALOGA EBARIBARI MMURIMANI MWAWO

7. Txini entapulela ologa ebaribari mmurimani?

⁷ Muttu onfuna orumeliwa ninga muleddo vatakulu va Yehova onofwanyela ologa ebaribari mmurimani mwaye. (Masal. 15:2) Eji enopitta ohizivala. Ottiya okala ororomela na esile dhinlogihu bahi ninofwanyelela okala ororomeleya na dhotene dhinkosihu. (Aheb. 13:18) Eji jamakamaka “vowi Nabuya [Yehova] onowugiwa mara n’athu ahinna magano, oku andanaga n’abele anvirihamo.”—Gano. 3:32.

8. Txini ehinfwanyelihu okosa?

⁸ Muttu onloga ebaribari mmurimani mwaye kanlagiha wi onomwiwelela Yehova agakala na attu ena oku akala yeka kanimwiwelela. (Iza. 29:13) Ottiya ejuwenevi iyene onorabela okala musarhapitta. Muttu wosarhapitta onodhaga wubuwela wi masaka mena kilitxi yofuneya omwiwelela Yehova. (Tia. 1:​5-8) Iyene onoroma ohimwiwelela Yehova na dhilobo dhinoneya ninga kahiye dhamakamaka. Agoona wi kinimpadduwela elo sabwa ya ohimwiwelela Yehova, onoroma okosa dhilobo dhottabwa. Masiki obuwelaga wi iyene onomulabela Mulugu, Yehova kanrumela webedha waye. (Koh. 8:11) Iyo ninfuna nikale ororomeleya mwa dhilobo dhotene.

9. Dila yoroma emuziwile Yezu Nataniyel elobo gani epadduwile, nanda ninsunzavo eni? (Koona vina foto.)

⁹ Enowodheya osunza venjene sabwa ya ttima yokala attu anloga ebaribari nigoona epadduwile dila yoroma emuziwile Yezu Nataniyel. Mudhidhi omulagihile Filipi mukwaye  Nataniyel Yezu, ehipadduwa elobo yotikiniha vaddiddi. Masiki Yezu ahimuziwaga Nataniyel, ohiloga: “Oddu ddi mukadda Izrayel, ohinna murima wosarhapitha.” (Jo. 1:47) Ebaribari wi Yezu wanziwa wi anamasunza ena àli attu ororomeleya, mbwenyi Yezu wahona wi Nataniyel wahikana murima webaribari. Dhahene ninga iyo, Nataniyel wali muttu wohiligana. Mbwenyi iyene kali mugwarhagwambi wali wororomeleya mwa dhilobo dhotedhene. Yezu wahitikina sabwa ya ejuwene vina omutamalela venjene Nataniyel. Yezu kowulogela mazu aba kunona ninga egali elobo yottittimiheya!

10. Ninfwanyelela nni okala pasope na dhinlogihu? (Tiago 1:26)

¹⁰ Magano menjene anfwanyeya munivuruni na Masalmo 15 aniwanana na mukalelo onawedhihehu attu ena. Masalmo 15:3 onologa wi muleddo wa vatakulu va Yehova “ddule ohinaba, ohinimwirela yabure muthu ddi muthu, ohinpuja-wene.” Iyo nigawabaga attu obe nigamuloga bure muttu, eji enodhaga wakumula attu ena, sabwa ya ejuwene Yehova kaganirumelile ninga aleddo aye.—Kengesa Tiago 1:26

11. Waba txini vina elobo gani enimpadduwela muttu ohintxinuwa?

¹¹ Davidi ohiloga sabwa ya waba. Waba entapulela eni? Waba eniwanana na ovuwiha miselu dhottambi mwaha wa muttu esuwene dhigadhile opigidha mweddelo wa muttuya. Oddule onaba obe onazivalela attu ena vina ohintxinuwa kanfwanyelela okala Munamoona wa Yehova.—Jer. 17:10.

12-13. Midhidhi gani dhigadhilihu wapuja amarho ehu? (Koona vina foto.)

¹² Masalmo 15:3 ononubutxedha wi aleddo a Yehova kanakosela obure attu ena vina kanapuja amarho awa. Ejo entapulela eni?

¹³ Txino nihiziwaga ninodhaga ompuja muttu sabwa ya ovuwiha miselu dhohifwanyelela. Katanalela dhotagiha esi: (1) murogora  ottiyile okala pionera, (2) atelani abudduwile o Beteli, obe (3) mbali ottiyile okala munddimuwa wa mulogo obe mudhari wokamihedha. Egali elobo yabure ologa wi abali aba ahipadduweliwa dhilobo esi sabwa yokosa elobo yabure. Txino dhikalawo mwaha dhinjene dhihinziwihu. Nona muleddo wa Yehova kanfwanyela wakosela attu ena obure vina wapuja akwaye.

WARIHE ABALE ANIMOVA YEHOVA

14. Muleddo oli vatakulu va Yehova agawodhile dhavi omurabela mvuti?

¹⁴ Masalmo 15:4 onloga wi marho wa Yehova “ddule ohinimulaza mvuti.” Ninamuziddiyele dhavi muttu oli mvuti? Vowi nili attu ohiligana, kanina ewodhelo ya wona akala muttu nvuti obe nne. Sabwaya? Sabwa yohiligana ninodhaga oziveliwa na muttu ona mikalelo dhakakene dhinna iyo vina oroma ohiziveliwa na muttu onnisilidha. Mbwenyi ninofwanyela warabela bahi abale analoga Yehova wila avuti. (1 Kor. 5:11) Kuloga abale ankosa dhilobo dhabure vina ahintxinuwa, ahinriha esile dhinrumelihu vina antamela wobaniha mandano ehu na Yehova.—Gano. 13:20.

15. Ninawodhe dhavi wariha abale animova Yehova?

¹⁵ Mwa mpaddi mwina, Masalmo 15:4 onologa wi ninofwanyela omuriha “ole onimova Nabuya [Yehova].” Ninkosa ejuwene modhela otamela marhe dhawalagiha oderetu vina nriho amarho a Yehova. (Rom. 12:10) Dhavi? Mukalelo mmodha onfwanyeya va Masalmo 15:​4, wi oddule oli muleddo vatakulu va Yehova onokosa empikireliye masiki emutotele segedho. Nigahikose epikirhelihu ninodhaga wanyimula attu ena. (Mt. 5:37) Motagiha, Yehova onjedhela wi amamuni vina ateliwi akwanihedhe nipikirhelo nikosilani atelagana. Yehova onowagalala venjene amambali agavilibihedha wakwanihedha mapikirhelo anakoselani aniwa. Sabwa ya omukwela Yehova vina attu ena ninovilibihedha wakwanihedha dhimpikirhelihu.

16. Na mukalelo gani mwina onawodhihu wariha amarho a Yehova?

¹⁶ Mukalelo mwina wowariha amarho a Mulugu bwa okala anamakela aleddo vina anamavaha. (Rom. 12:13) Okala na abalihu vina na arogorihu ottiya omatugumanonivi vina mmabasani a olaleya onele onikamihedha olibiha mandano ehu na awene vina na Yehova. Ottiya ejo, nigakala anamakela aleddo, ninimutagiha Yehova.

KUKWELE KOBIRI

17. Masalmo 15 onlogelani sabwa ya kobiri?

¹⁷ Va Masalmo 15:5 ninowengesavo wi onkala muleddo vatakulu va Yehova “ddule ohinlogosa nranjulo nothabwa voboleyiwani kobiri, ohinrumela onyigaliwa wi amukone ohinna muladdu.” Sabwaya jani Davidi aloga mwaha wa kobiri va masalmuni oddu mung’ono? Sabwani iyo nigazuzumela venjene kobiri enodhaga okala elobo yamakamaka mwigumini mwehu opitta attu ena obe Yehova. (1 Tim. 6:10) Masaka a mundduni, ena anapuja abalawa àli ayelegi modhela waboleya kobiri wi alogose na nranjulo ejuwene yahawodhani opitxa. Ottiya ejuwenevi, anamattonga ena anrumela manyigalo wi àkone attu ahana muladdu na mukalelo wohiligana. Mbwenyi Yehova onosilidhiwa na attu ankosa dhilobo esi.—Ezek. 22:12.

18. Mavuzo gani anfwanyelihu ovikosa wi niziwe monelo wehu mwaha wa kobiri? (Ahebreu 13:5)

¹⁸ Egali yapama iyo notene otamela oziwa monelo gani onihuna mwaha wa kobiri. Kavivuze: ‘Miyo ddinotanalela venjene kobiri vina ejile egawodhilimi ogula kowiliwa ddahikana  kobiri yinjene? Miyo ddiganfiyari muttu kobiri, ddinogonela opitxa ddubuwelaga wi muttuya kanfuna? Ddinoviwona ninga wa makamaka opitta attu ena sabwa yokana kobiri yinjene? Ddinorutxiwa okala muttu wotapuwa mada? Miyo ddinologa wi muttu namafunetxa dhokana sabwa ya iyene okana kobiri vaddiddi? Ddinandanetxa na attu orela ddapwazaga ahawi?’ Iyo notene nihikana gari ya owobiwa ninga aleddo vatakulu va Yehova. Mbwenyi ninofwanyela okala pasope wi ninakwele kobiri. Nigamukwela Yehova opitta kobiri, iyene txipo kananinyanyale!—Kengesa Ahebreu 13:5.

YEHOVA ONOWAKWELA AMARHO AYE

19. Mwahaya wamakamaka onnivahela Yehova magano buvi?

¹⁹ Masalmo 15 ongoma na nipikirhelo ntti: “Ole onedda dhahene kanagulugudheye-wene.” (Masal. 15:5) Va masalmo oddu Davidi onologa mwaha wamakamaka onimuttukulela Yehova onikumbirha dhilobo dhinjidhene. Iyene onfuna wi nagalale. Nona, nigakosa ejile ennikumbirha Mulugu ninokana egumi yapama vina iyene ononibarela.—Iza. 48:17.

20. Aleddo a Yehova anna njedhelo gani na musogorho?

²⁰ Aleddo a Yehova ahikana njedhelo na pama na musogorho. Attikitteliwi ororomeleya anele okonvidariwa okala “mimburo dhinjene.” (Jo. 14:2) Mwa abale anna njedhelo na okala velaboni ya vati anojedhela wakwanihedheya wa nipikirhelo ninfwanyeya va Ovuhulela 21:3. Mohaganyedha, iyo ninowagalala venjene sabwa ya okonvidariwa na Yehova wi nikale amarho aye vina nikale aleddo vatakulu vaye namukalakala!