MUTWE WA KULILONGESA 24
MWASO 24 Tweyenu ku Mulundu wa Yehova
Nunga mu Mbalaka ya Yehova ku Miaka Yeswe!
“Yehova, iya matwama mu mbalaka ye?”—SAMU 15:1.
YIZE MUTULILONGESA
Mutumona yize twatamba kulinga mba tununge ni kupwa masepa ja Yehova ni chize mutuhasa kutwama ni masepa akwo a Yehova.
1. Kuchi Samu 15:1-5 muyihasa kutukwasa?
HA MUTWE wapalika, twalilongesanga ngwetu, waze akuhana mwono wo kuli Yehova ni kufunga usepa wo ni iye, mahasa kutwama mu mbalaka yenyi. Mba kuchi mutuhasa kununga ni kutwama mu mbalaka ya Yehova? Samu 15, yinahanjika ha chikuma chino. (Tanga Samu 15:1-5.) Samu yino, yinasolola yize mutuhasa kulinga mba tununge ni kupwa ni usepa upema ni Yehova.
2. Ha yika hanji Ndawichi apwile ni kunyonga muze ahanjikile ha mbalaka ya Yehova?
2 Samu 15 yinaputuka ni maliji wano ngwo: “Yehova, iya matwama mu mbalaka ye? Iya matunga ha mulundu we usandu?” (Samu 15:1) Muze ahanjikile ha “mbalaka” ya Yehova, kota Ndawichi kanyongene ha tabernakulu yize yapwile ku Ngibeone ha limwe shimbu. Ndawichi kahanjikile nawa hakutwala ku mulundu usandu wa Zambi. Iye kota te kanahanjikila ha mulundu wa Zaione uze wapwile mu Yerusaleme. Mulundu wacho uze te watwama ha kilometro jinji ku sule ya Ngibeone, Ndawichi kaseleko mbalaka muze atulikile mushete wa usendo ndo haze atungile chihela chalita muze te muutwama ha miaka yinji.—2 Samue. 6:17.
3. Mumu liaka chili chilemu kunyingika kanawa yize anahanjika ha Samu 15? (Tala nawa chizulie.)
3 Tunanyingika ngwetu, A-Izalele anji te kechi kuhasa kukalakala mu tabernakulu. Chahiana yeswe, ayo te kechi kuhasa kunjila mu mbalaka muze mwapwile mushete wa usendo. Alioze tuvumbi eswe ashishika a Yehova te mahasa kupwa ngeji mu mbalaka yenyi ya chijimbikilo. Ayo te kakuchilinga ha kupwa masepa jenyi, ni kununga kufunga usepa wacho. Chuma chino che yetu eswe tunazange. Samu 15, yinasolola yitanga yimwe yize twatamba kupwa nayo, mba tusolole ngwetu tunazange kununga ni kupwa masepa ja Yehova.
A-Izalele waze atwamine ha mashimbu ja Ndawichi, kanyingikine kanawa ulumbunwiso wa kutwama mu mbalaka ya Yehova (Tala paragrafu 3)
ENDA CHAKUHONA CHITELA NI KULINGA ULULI
4. Kuchi tunanyingika ngwetu kuli Yehova, twatamba kulinga yuma yinji hi wika ko kutupapachisa? (Izaia 48:1)
4 Samu 15:2, yinasolola ngwo, sepa lia Zambi, kali mutu “yoze wakwenda keshi chitela; yoze wakulinga ululi.” Maliji ‘kwenda’ ni ‘kulinga,’ kanasolola ngwo, twatamba kununga ni kuchilinga. Alioze, shina twakuhasa lume ‘kwenda chakuhona chitela’? Ewa. Tunanyingika ngwetu, kukushi mutu mungunu, alioze kuli Yehova, yetu twakwenda kutushi chitela muze twakulinga yize mutuhasa hanga tumwononokene. Muze twakulihana kuli Yehova ni kutupapachisa, ha shimbu liacho twakuputuka kwenda ni Zambi. Alioze, talenu chikuma chino. Kunyima, kusemukina wika mu vungu lia Izalele kuchakapwile ni kutwala mutu hanga apwe ngeji wa Yehova. Amwe kapwile ni kwamba ngwo kakulingila Zambi, alioze te keshi kuchilinga ni “umwenemwene ni ululi.” (Tanga Izaia 48:1.) A-Izalele waze te akuzanga kupwa ngeji a Yehova, katambile kulilongesa shimbi jize Yehova asele ni kujikaula ku mwono wo. Chizechene nawa, mba tupwe ni utayizo wa Yehova musono, twatamba kulinga yuma yinji hi wika ko kutupapachisa ni kwamba ngwo, tuli Yela ja Yehova. Twatamba kununga ni ‘kulinga yuma ya ululi.’ Yika maliji wano analumbunuka?
5. Kwononokena Yehova mu yuma yeswe, yika chinalumbunuka?
5 Kumeso ja Yehova, ‘kwenda cha kuhona chitela’ ni ‘kulinga ululi,’ chinalumbunuka yuma yinji hi wika ko kuya ku kukunguluka. (1 Samue. 15:22) Twatamba kusa tachi hanga twononokene Yehova mu yuma yeswe ku mwono wetu, chipwe muze tuli ukawetu. (Yishi. 3:6; Chilu. 12:13, 14) Chili chilemu kununga ni kusa tachi hanga twononokene Yehova, chipwe mu yuma yize tunamono ngwetu kuyishi ni ulemu. Nyi twachilinga, mutusolola ngwetu twakuzanga Yehova mba ni iye matuzanga chinji.—Yoa. 14:23; 1 Yoa. 5:3.
6. Kulita ni A-Hepreu 6:10-12, chuma chika chikwete ulemu kuhiana yuma yipema yize hitunalingi kunyima?
6 Yehova kakulemesa chinji yuma yize hitunamulingila. Alioze, hi wika ko yuma yize twalingile kunyima yili chijikilo chize muchisolola ngwo, mutununga ni kupwa ngeji mu mbalaka ya Yehova. Chikuma chino kanachisolola ha A-Hepreu 6:10-12. (Tanga.) Tunanyingika ngwetu, Yehova keshi kuvulama yuma yize twamulingilile kunyima. Alioze, iye kanazange hanga tununge ni kumuwayila ni mbunge yeswe “ndo kusongo.” “Nyi kutwakokolokele,” mutununga ni kupwa masepa jenyi ku miaka yeswe.—Ngala. 6:9.
HANJIKA UMWENEMWENE MU MBUNGE YE
7. Kuhanjika umwenemwene mu mbunge yetu, yika chinalumbunuka?
7 Mutu yoze unazange kupwa ni utayizo wa kutwama mu mbalaka ya Yehova, katamba ‘kuhanjika umwenemwene mu mbunge yenyi.’ (Samu 15:2) Maliji wano, kanalumbunuka yuma yinji hi wika ko kuhona kulionga. Yehova kanazange hanga tuhanjike umwenemwene mu yuma yeswe ku mwono wetu. (Hepre. 13:18) Chino chili chilemu mumu Yehova keshi kuzanga mukwa-mahuza, iye “kakulikata, ni mukwa ululi.”—Yishi. 3:32.
8. Yika kutwatambile kulinga?
8 Mutu yoze ‘wakuhanjika umwenemwene mu mbunge yenyi,’ keshi kupwa ngwe nongwena ha kwononokena Yehova ha mbunga, alioze muze ali ukawenyi mahona kumwononokena. (Iza. 29:13) Mutu wacho kakwehuka mahuza eswe. Mutu yoze keshi kuhanjika umwenemwene, mahasa kunyonga ngwenyi, hi chilemu ko kukaula shimbi ja Yehova. (Tia. 1:5-8) Iye mahasa kuputuka kuhona kwononokena Yehova mu yuma yize yakusoloka ngwe kuyishi ulemu, mumu kananyingika ngwenyi, nyi mahona kwononoka kukuchi kulingiwa chuma nichimwe. Hachino, maputuka kulinga yuma yipi kuhiana. Chipwe ngwe manyonga ngwenyi, kanalingila Yehova, nihindu Yehova kechi kutayiza uwayilo wenyi. (Chilu. 8:11) Alioze, yetu tunazange kusolola umwenemwene mu yuma yeswe.
9. Yika yalingiwile muze Yesu anyingikine Natanele; mba yika mutuhasa kulilongesa ha chikuma chino? (Tala nawa chizulie.)
9 Mutuhasa kulilongesa yuma yinji hakutwala ku ulemu wa kupwa atu amwenemwene, ha yize yalingiwile muze Yesu anyingikine Natanele ha chisuho chitangu. Muze Fwilipe asolwele sepa lienyi Natanele kuli Yesu, kwalingiwile chimwe chuma cha kukomwesa. Chipwe ngwe Yesu te kanda achinyingika Natanele, iye yamba ngwenyi: “Talenu Ka-Izalele wamwenemwene kaneza, yoze keshi kalimbalimba.” (Yoa. 1:47) Ewa, Yesu kanyingikine ngwenyi, tumbaji twenyi eswe kapwile ni kuhanjika umwenemwene, alioze iye kamwene muli Natanele umwenemwene walipwila. Chizechene ngwe yetu, Natanele neye kapwile chihenge, alioze kakapwile ni kalimbalimba. Iye kapwile ni kuhanjika umwenemwene mu yuma yeswe. Yesu yakomoka ha utu wa Natanele, chocho yamuchichimieka. Muchipwa uhenya unene nyi Yesu mamba chuma cha mutapu au hali yetu.
Fwilipe kanasolola Yesu kuli sepa lienyi Natanele, lunga washishika yoze wakuhanjika umwenemwene. Shina Yesu mahasa kwamba yuma yacho hali yetu? (Tala paragrafu 9)
10. Mumu liaka twatamba kukeya ha yuma yize mutuhanjika? (Tiangu 1:26)
10 Shimbi jinji jize tunawane mu Samu 15, jinatale chinji ha mutapu uze twakutwama ni akwetu. Samu 15:3 yinambe ngwo, mutu yoze Yehova atambula mu mbalaka yenyi “keshi kulamikiza ni limi lienyi; keshi kulinga chipi kuli sepa lienyi.” Nyi mutulamikiza akwetu, hanji kwaliongela yuma, chino muchihasa kwevwisa yikola yinji ku mbunge. Hachino, Yehova kechi kututayiza nawa mu mbalaka yenyi.—Tanga Tiangu 1:26.
11. Kulamikiza mutu yika chinalumbunuka; yika muyihasa kulingiwa kuli mutu yoze wakuhanjika mahuza nyi kalikonyekene?
11 Ndawichi katongwele kulamikiza hanji mahuza. Yika liji lino linalumbunuka? Kanji-kanji, liakulumbunuka kumwanga sango ja mahuza hakutwala kuli umwe, jize mujihasa kupihisa lufuma wa mutu wacho. Mutu yoze wakulamikiza akwo hanji kuhanjika yuma ya mahuza hakutwala kuli ayo, nyi kalikonyekene kakumusosolola mu chikungulwila.—Jere. 17:10.
12-13. Ha yuma yika mutuhasa kupihisa lufuma wa masepa jetu? (Tala nawa chizulie.)
12 Samu 15:3 yinatwiwulula nawa ngwo, atu waze ali mu mbalaka ya Yehova, keshi kulinga akwo yuma yipi. Chikwo nawa, keshi kupihisa lufuma wa masepa jo hanji kwaevwisa sonyi. Yika yino yinalumbunuka?
13 Chakuhona kunyingika, mutuhasa kuputuka kupihisa lufuma wa umwe, ha kumwanga sango ja mahuza hakutwala kuli iye. Tuchinyongenu ha yikuma yino: (1) umwe ndumbu wa pwo mecha upionelu, (2) lunga ni pwo makatuka ku Mbetele, ni (3) ndumbu yoze wecha kupwa mukulwana hanji kavumbi. Muchipwa chipi chinji nyi mutuputuka kuhanjika ngwetu, mandumbu jacho kalinga chuma chipi kashika ahichika milimo hanji yiteli yacho. Hanji kwalingiwa yuma yinji yize yetu kutwanyingikine. Hachino, mutu yoze uli mu mbalaka ya Yehova, ‘katambile kulinga akwo yuma yipi hanji kupihisa lufuma wa masepa jenyi.’
Chakuhona kunyingika, mutuhasa kuputuka kumwanga sango jize kujalitele hakutwala kuli akwetu ni kwalamikiza (Tala paragrafu 12-13)
LEMESA WAZE AKUVWILA YEHOVA WOMA
14. Lumbununa chize mutu yoze uli mu mbalaka ya Yehova mahasa kwehuka “chizazali?”
14 Samu 15:4 yinambe ngwo: Sepa lia Yehova kakulituna “chizazali.” Kuchi mutuhasa kunyingika ngwetu, mutu umwe kali chizazali? Mumu lia kupwa yihenge, kutuchi kuhasa kwamba pundu ngwetu, mutu nganji kali chizazali hanji ka. Mumu liaka? Mumu lia uhenge, mutuhasa kuputuka kuzanga atu waze tunalivu no ni kwecha kuzanga atu waze akutuvwisa kupihia. Kwamba umwenemwene, twatamba kwehuka wika atu waze Yehova akumona ngwenyi, kali ‘yizazali’ hanji ngwetu, kalitele. (1 Kori. 5:11) Atu jacho kanachingi, waze akulinga yuma yipi nawa keshi kulikonyeka, waze akulelesa yuma yize twafuliela ni waze akufupa kupihisa usepa wetu ni Yehova.—Yishi. 13:20.
15. Kuchi twakulemesa atu waze ‘akuvwila Yehova woma’?
15 Alioze Samu 15:4 yinambe ngwo, twatamba kulemesa atu waze akuvwila Yehova woma. Chino twakuchilinga muze twakufupa majila eka ni eka akusolwelamo umbovu ni vumbi hali masepa ja Yehova. (Roma 12:10) Kuchi twakuchilinga? Jila yimwe kanayitongola ha Samu 15:4. Mutu yoze uli mu mbalaka ya Yehova ‘keshi kwalumuka chipwe ngwe chuma chize alakenya muchimulinga upi.’ Nyi twecha kumanununa yize hitunalakenya, chino muchihasa kupinjisa akwetu. (Mateu 5:37) Ngwe chilweza, Yehova kanashimbwila hanga malunga ni mapwo, amanunune chilakenyo chize alingile hali umwe ni mukwo muze alimbachile. Yehova nawa kakuwahilila chinji muze yisemi akusa tachi hanga amanunune yilakenyo yize akulinga kuli ana jo. Mumu lia zango lize tukwete hali Yehova ni hali akwetu, yetu twakulinga yeswe yize mutuhasa hanga tumanunune yilakenyo yetu.
16. Mutapu ukwo uka uze twakulemeselamo masepa ja Yehova?
16 Mutapu ukwo wakulemeselamo masepa ja Zambi, uli kuzumbula ngeji ni kupwa yihanyi. (Roma 12:13) Kupalikisa mashimbu hamwe ni mandumbu jetu a malunga ni a mapwo, muze kutushi ha kukunguluka ni muze kutushi mu mulimo wa kwambujola, chakutukwasa kukolesa usepa wetu ni ayo ni usepa wetu ni Yehova. Chikwo nawa, kuzumbula ngeji hanji kupwa yihanyi, chakusolola ngwo tunembulula Yehova.
KANDA UZANGA MBONGO
17. Mumu liaka Samu 15 yinahanjika nawa hakutwala ku mbongo?
17 Ha Samu 15:5, twakutangaho ngwetu, mutu yoze uli mu mbalaka ya Yehova, “keshi kuhana mbongo jenyi ha mbwezo; keshi kutambula mbongo ja kuhisa yoze keshi mulonga.” Mumu liaka Ndawichi azangile kuhanjika ha mbongo mu Samu yino? Mumu nyi mutulihulumba chinji ha mbongo, mujihasa kupwa ni ulemu unji kuli yetu kuhiana atu-ni-akwetu hanji lume ni Yehova. (1 Timo. 6:10) Ku shakulu, amwe te kakumwena mandumbu jo yiswale ha kwalevwalisa mbongo jize o kechi kuhasa kufweta. Chikwo nawa, akwa-kuyula amwe kapwile ni kutambula mbongo ja mbenga hanga asambise atu waze ali ni milonga ni kuhisa waze keshi milonga. Alioze, Yehova keshi kuzanga muze atu akulinga yuma ya mutapu au.—Eze. 22:12.
18. Yika mutuhasa kulihula hanga tunyingike chize twakumona mbongo? (A-Hepreu 13:5)
18 Muchilita yetu eswe kunyonga kanawa ha chize twakumona mbongo. Lihule ngwe: ‘Shina nakunyonga wika ha mbongo ni ha yize munguhasa kulanda nyi napwa ni mbongo jinji? Nyi natambula mbongo ja umwe, shina nakushimbula kumufweta jo ni kunyonga ngwami mwene kechi kujifupa? Shina nakulimona ngwe nguli mulemu chinji kuhiana akwetu mumu lia kupwa ni mbongo jinji? Shina chakupwa chikalu kulianyina ni akwetu yize nguli nayo? Shina nakunyonga ngwami, mutu nganji kakuzanga yikumba mumu lia kupwa ni mbongo? Shina nakulikata chinji ni atu waze ali ni mbongo ni kulengulula yiswale?’ Yetu eswe tuli ni chiwape cha kupwa mu mbalaka ya Yehova. Alioze, nyi mutuzanga kununga ni kutwamamo, twatamba kusa tachi hanga tuhone kuzanga mbongo. Nyi mutuzanga chinji Yehova kuhiana mbongo, Yehova kechi keza katwehuka nilimwe tangwa.—Tanga A-Hepreu 13:5.
YEHOVA KAKUZANGA MASEPA JENYI
19. Mumu liaka Yehova anazange hanga tulinge yuma yeswe yize anatongola ha Samu 15?
19 Samu 15 yinahu ni chilakenyo chino: “Yoze wakulinga yino yuma keshi kukokoloka nilimwe tangwa.” (Samu 15:5) Hano, Ndawichi kanasolola chikuma chilemu chize chakutwala Yehova mba atwite tulinge yuma yino yeswe. Iye kanazange hanga tuwahilile, kashika akutwaha usongwelo uze kutufunga.—Iza. 48:17.
20. Yika atu waze ali mu mbalaka ya Yehova anashimbwila?
20 Atu waze Yehova akusanyika mu mbalaka yenyi, kali ni chimwe kutalatala chipema kulutwe lia matangwa. Akwa-Kristu akuwayisa waze manunga ni kushishika, makatwama mu “yipatulo yinji” yize Yesu hanaluliekela mu malilu. (Yoa. 14:2) Waze ali ni kutalatala cha kutwama hano hashi, kanashimbwila ni mbunge yeswe chilakenyo chize chili ha Usolwelo 21:3. Chochene, chili chiwape chinene kutusanyika kuli Yehova hanga tupwe masepa jenyi, ni kupwa ngeji mu mbalaka yenyi ku miaka yeswe.
MWASO 39 Kupwa Ni Jina Lipema Kuli Zambi
