1. Ki mannyer Psonm 15:1-5 i kapab ed nou?

 DAN sa lartik avan, nou’n aprann ki bann serviter Zeova ki’n dedye zot lavi avek li, i kapab vin bann envite dan son latant par devlop en lanmitye pros avek Zeova. Me ki nou bezwen fer pour vin bann envite dan latant Zeova? Psonm 15 i reponn sa kestyon. (Lir Psonm 15:1-5.) Sa psonm i dir nou ki nou bezwen fer pour nou annan en lanmitye pros avek Bondye.

2. Petet kwa ki ti motiv psalmis David pour mansyonn latant Zeova?

² Sa premye verse dan Psonm 15 i dir: “O Zeova, lekel ki pou ganny envite dan ou latant? Lekel ki pou reste lo ou montanny sen?” (Ps. 15:1) I kapab ki ler psalmis David ti mansyonn “latant” Zeova, i ti pe mazin tabernak ki ti baze Gibeonn pour en serten letan. David ti osi mansyonn “montanny sen” Bondye e i kapab ki i ti pe refer avek Montanny Siyon ki ti Zerizalenm. Lo Montanny Siyon ki ti plizyer kilomet sid avek Gibeonn, David ti mont en latant e met lars lalyans ladan ziska ki tanp i ganny konstrir.—2 Sam. 6:17.

3. Akoz nou anvi konpran sa ki Psonm 15 i dir? (Vwar portre.)

³ Laplipar Izraelit ti napa drwa servi kot tabernak e zis detrwa ki ti annan drwa antre dan latant kot lars lalyans ti ete. Me tou bann serviter Zeova ki ti fidel ti kapab vin bann envite dan son latant senbolik par vin son zanmi e reste son zanmi. Sa i en keksoz ki nou tou nou anvi. Psonm 15 i koz lo serten kalite ki nou bezwen devlope e demontre pour nou kapab reste zanmi Zeova.

RESTE SAN DEFO E KONTINYEN FER SA KI BYEN

4. Ki mannyer nou konnen ki nou bezwen fer plis ki zis batize? (Izai 48:1)

⁴ Psonm 15:2 i dir ki en zanmi Bondye i en dimoun “ki san defo ki kontinyen fer sa ki byen.” Sa i en keksoz ki  nou bezwen kontinyen fer. Me eski nou vreman kapab reste “san defo”? Wi. Napa personn ki parfe me Zeova pou vwar nou konman en dimoun ki “san defo” si nou fer nou mye pour obei li. Ler nou dedye nou lavi avek Bondye e batize, sa i zis en konmansman. Rapel ki dan letan Labib zis akoz en dimoun ti en Izraelit, sa pa ti vedir ki i ti en envite dan latant Zeova. Menm si serten ti priy Zeova, “zot pa [ti] senser e zot pa [ti] fer sa ki byen.” (Lir Izai 48:1.) Bann Izraelit ki ti senser ti bezwen aprann sa ki Zeova ti ekspekte avek zot e obei. I menm parey ozordi. Pour nou kapab ganny laprouvasyon Zeova, i pa ase zis pour nou batize e ganny apele en Temwen Zeova. Nou bezwen “kontinyen fer sa ki byen.” Ki sa i enplike?

5. Ki i vedir obei Zeova dan tou sa ki nou fer?

⁵ Pour Zeova kapab vwar nou konman en dimoun ki “san defo” e konman en dimoun ki “kontinyen fer sa ki byen,” nou bezwen fer plis ki zis asiste renyon regilyerman. (1 Sam. 15:22) Nou bezwen fer zefor pour obei Bondye dan tou laspe nou lavi menm ler nou tousel. (Prov. 3:6; Ekle. 12:13, 14) I enportan ki nou fer zefor pour obei Zeova menm dan bann keksoz ki pa paret enportan. Ler nou fer sa, nou montre ki nou vreman kontan Zeova e sa i fer li kontan nou plis.—Zan 14:23; 1 Zan 5:3.

6. Dapre Ebre 6:10-12, menm si nou’n fer bann bon keksoz dan lepase, kwa ki pli enportan?

⁶ Zeova i vreman apresye sa ki nou’n fer pour li dan lepase. Me zis akoz nou’n fer bann bon keksoz dan lepase, sa pa neseserman vedir ki nou pou reste konman bann envite dan latant Zeova. Nou kapab vwar sa dan Ebre 6:10-12. (Lir.) Zeova pa oubliy bann  bon keksoz ki nou’n fer dan lepase. I anvi ki nou kontinyen servi li avek tou nou leker “ziska lafen.” Zeova pou reste nou zanmi pour touzour “si nou pa abandonnen.”—Gal. 6:9.

DIR LAVERITE DAN OU LEKER

7. Ki i vedir pour dir laverite dan nou leker?

⁷ En dimoun ki anvi vin en envite dan latant Zeova, i bezwen “dir laverite dan son leker.” (Ps. 15:2) Sa i enplik plis ki pa koz lalang. Zeova i anvi ki nou onnet dan tou sa ki nou dir e fer. (Ebr. 13:18) Sa i enportan “parski Zeova pa kontan en dimoun ki anbet lezot, me i bon zanmi avek en dimoun ki fer sa ki drwat.”—Prov. 3:32.

8. Ki nou pa devret fer?

⁸ Bann dimoun ki ‘dir laverite dan zot leker’ pa fer krwar ki zot obei Bondye ler lezot dimoun i vwar zot kan salerla, zot pe dezobei Bondye ler zot tousel. (Iza. 29:13) Zot pa fer bann keksoz mal anba anba. En dimoun ki pa onnet e ki fer bann keksoz mal anba anba, i kapab konmans krwar ki bann lalwa Zeova i pa toultan sa ki pli meyer. (Zak 1:5-8) I kapab pa obei Zeova dan bann keksoz ki pour li pa paret enportan. Apre, si i paret napa okenn konsekans pour son move aksyon, sa dimoun i kapab konmans fer keksoz ki pli grav. Menm si i krwar ki i pe servi Zeova, Zeova pa pe aksepte son ladorasyon. (Ekle. 8:11) Me nou, nou anvi onnet dan tou keksoz.

9. Ki ti arive ler Zezi ti rankontre Natanael pour premye fwa e ki sa i ansenny nou? (Vwar portre.)

⁹ I vreman enportan pour nou dir laverite dan nou leker. Nou kapab vwar sa avek sa ki ti arive ler Filip ti anmenn son zanmi Natanael pour rankontre Zezi. Menm si Zezi pa ti’n zanmen rankontre Natanael, Zezi ti dir: “Gete, la en vre Izraelit ki napa okenn lipokrizi dan li.” (Zan 1:47) Zezi ti konnen ki son bann lezot disip ti onnet. Me i ti vwar ki Natanael ti vreman senser. Parey nou, Natanael  ti enparfe me i pa ti en ipokrit. O kontrer i ti onnet dan tou keksoz. Zezi ti apresye sa kalite e i ti felisit Natanael pour sa. Nou tou nou anvi ki Zezi i santi koumsa anver nou.

10. Akoz nou devret vey byen sa ki nou dir? (Zak 1:26)

¹⁰ Laplipar keksoz ki Psonm 15 i koz lo la i annan pour fer avek lafason ki nou tret lezot. Psonm 15:3 i dir ki en envite dan latant Zeova “pa servi son lalang pour fer kalonmni. I pa fer nanryen mal son prosen e i pa koz an mal lo son bann zanmi.” Si nou fer kalonmni, sa i kapab fer ditor lezot e nou pou nepli kapab reste konman en envite dan latant Zeova.—Lir Zak 1:26.

11. Kisisa kalonmni e ki pou arive avek en dimoun ki fer kalonmni e ki pa repantir?

¹¹ Sa psalmis ti spesifikman mansyonn kalonmni. Kisisa kalonmni? An zeneral, kalonmni i en mansonz ki ganny dir pour gat repitasyon en lot dimoun. En dimoun ki fer kalonmni lo en lot dimoun e ki pa repantir, i kapab ganny tire dan kongregasyon Kretyen.—Zer. 17:10.

12-13. Ki mannyer i kapab arive ki nou koz an mal lo nou bann zanmi san ki nou fer par ekspre? (Vwar portre.)

¹² Psonm 15:3 i osi fer nou rapel ki bann envite dan latant Zeova pa fer nanryen mal son prosen e i pa koz an mal lo son bann zanmi. Ki sa i enplike?

¹³ I kapab arive ki nou dir en keksoz mal lo en dimoun san ki nou fer par ekspre par dir bann keksoz negatif lo li. Reflesir lo sa bann sityasyon: (1) en ser i aret fer pionye, (2) en koup marye nepli servi kot Betel oubyen (3) en frer nepli servi konman ansyen ouswa serviter kongregasyon. I ti pou mal pour dir avek lezot ki petet sa bann frer ek ser in fer en keksoz mal e sa i rezon akoz zot  sirkonstans in sanze. I kapab annan plizyer rezon ki sirkonstans sa bann frer ek ser in sanze ki nou pa konnen. Apre tou, en envite dan latant Zeova “pa fer nanryen mal son prosen e i pa koz an mal lo son bann zanmi.”

ONOR BANN KI ANNAN EN GRAN RESPE POUR ZEOVA

14. Ki i vedir pour “rezet bann dimoun degoutan”?

¹⁴ Psonm 15:4 (not.), i dir ki en zanmi Zeova i “rezet bann dimoun degoutan.” Ki mannyer nou konnen si en dimoun i en dimoun degoutan? Konman bann imen enparfe, nou pa kalifye pour dir si en dimoun i en dimoun degoutan oubyen non. Akoz? Parski nou annan nou prop lopinyon ek preferans e sa i fer ki nou dakor avek bann dimoun ki nou vwar li fasil pour pas letan avek e pa tonm dakor avek bann dimoun ki irit nou. Alor nou devret rezet zis bann dimoun ki fer bann keksoz ki Zeova i dir i “degoutan.” (1 Kor. 5:11) Sa i enkli bann ki kontinyen fer bann move keksoz e ki pa oule repantir, bann ki napa okenn respe pour nou krwayans oubyen ki esey gat nou lanmitye avek Zeova.—Prov. 13:20.

15. Ki en fason ki nou kapab onor “bann ki annan en gran respe pour Zeova”?

¹⁵ Sa lot bout dan Psonm 15:4 i dir ki nou bezwen onor “bann ki annan en gran respe pour Zeova.” Alor nou rod fason pour demontre labonte ek respe anver bann zanmi Zeova. (Rom. 12:10) Psonm 15:4 i mansyonn en fason ki nou kapab fer sa, setadir ki en envite dan latant Zeova “pa kas son promes, menm ler i pa dan son lavantaz.” Si nou kas nou bann promes, nou pou bles santiman lezot. (Mat. 5:37) Par egzanp, Zeova i ekspekte ki son bann serviter i gard zot ve maryaz. I osi kontan ler bann paran i fer zefor pour gard bann promes ki zot fer avek zot zanfan. Sa lanmour ki nou annan pour Bondye ek nou prosen, pou obliz nou pour fer tou sa ki nou kapab pour gard nou bann promes.

16. Ki en lot fason pour onor bann zanmi Zeova?

¹⁶ En lot fason ki nou onor bann zanmi Bondye, i ler nou demontre lospitalite e nou zenere avek zot. (Rom. 12:13) Ler nou pas letan avek bann frer ek ser dan bann moman detant, sa i ed nou pour vin pli pros avek zot e avek Zeova. Osi, ler nou demontre lospitalite anver zot, nou swiv legzanp Zeova.

KONTINYEN FER SIR KI NOU PA KONTAN LARZAN

17. Akoz Psonm 15 i koz lo larzan?

¹⁷ Nou lir ki en envite dan latant Zeova, “pa demann lentere ler i pret larzan e i pa aksepte gous pour fer ditor en dimoun inosan.” (Ps. 15:5) Akoz sa psonm i koz lo larzan? Si nou kontan larzan, larzan i kapab vin pli enportan pour nou ki dimoun e i menm kapab vin pli enportan ki nou lanmitye avek Zeova. (1 Tim. 6:10) Dan letan Labib, serten Izraelit ti tret zot bann frer ki ti pov dan en fason enzis par fer zot bann frer pey lentere ler zot ti pret larzan. Osi, serten ziz ti aksepte gous e ziz bann dimoun inosan dan en fason enzis. Zeova pa kontan ler dimoun i fer sa bann keksoz.—Ezek. 22:12.

18. Ki bann kestyon ki kapab ed nou vwar ki mannyer nou konsider larzan? (Ebre 13:5)

 ¹⁸ I byen pour nou reflesir lo lafason ki nou konsider larzan. Demann ou lekor: ‘Eski mon souvan mazin larzan e sa ki mon kapab aste avek larzan? Si mon demann prete larzan, eski mon tarde rann sa larzan parski mon krwar ki sa dimoun ki’n pret mwan sa larzan pa bezwen? Eski lefet ki mon annan larzan, sa i fer mwan santi ki mon pli enportan ki lezot e eski sa i fer li difisil pour mwan zenere anver lezot? Eski mon krwar ki mon bann frer ek ser ki annan en kantite larzan i kontan larzan plis ki zot kontan Zeova? Eski mon fer zanmi avek zis bann ki ris e mon pa demontre lentere anver bann ki pov?’ Nou’n ganny en zoli loportinite pour vin bann envite dan latant Zeova. Pour nou kapab reste konman bann envite dan latant Zeova, nou bezwen fer sir ki nou pa kontan larzan. Si nou fer sa, Zeova pa pou zanmen kit nou!—Lir Ebre 13:5.

ZEOVA I KONTAN SON BANN ZANMI

19. Akoz Zeova i anvi ki nou fer sa bann keksoz ki ganny mansyonnen dan Psonm 15?

¹⁹ Psonm 15 i fini avek sa promes: “En dimoun ki fer tousala pa pou zanmen tonbe.” (Ps. 15:5) Sa fraz i eksplike akoz Zeova i anvi ki nou fer tou sa bann keksoz ki’n ganny mansyonnen dan psonm. Zeova i anvi ki nou ere. Alor i donn nou lenstriksyon ki pou ed nou annan en pli bon lavi e ki pou protez nou.—Iza. 48:17.

20. Ki bann envite dan latant Zeova pou gannyen dan lavenir?

²⁰ Bann envite dan latant Zeova pou annan en lavenir merveye. Bann Kretyen swazir pou al reste dan lesyel kot Zezi in prepar en “landrwa” pour zot. (Zan 14:2) Bann ki annan lespwar pour viv pour touzour lo later pou eksperyans sa ki Revelasyon 21:3 in promet. I en gran loner ki Zeova i anvi ki nou reste konman bann envite dan son latant pour touzour!