1. ¿Kʼãrẽ ʉ̃rʉ jara ũrĩbibʉ Salmo 15:​1-5 bayeda?

 NÃÃBEMA artikulode kʼawuasida ẽbẽrarã Jeowaʼa bebʉ diaya adara akʉza iyiʉ̃me neũdukʼawua biara trʉ̃seabʉta Jeowa de karpade bamarẽã mamina, ¿kʼãrẽta odaibara mawũã iyi de karpade eda bʼaita? Salmo 15​ba naʉ̃ ʉ̃rʉ jara ũrĩbibʉ (akʉra Salmo 15:​1-5). Naʉ̃ testoba audre jara ũrĩbibʉ dayirãba kʼãrẽta oibarata audre Jeowa kʼawa bʼaita.

2. ¿Davidba Jeowa de karpa ʉ̃rʉ jarasidera kʼãrẽ ʉ̃rʉ krĩchabasiba?

² Salmo 15​de jara jʉ̃drʉbʉ: «Jeowa, ¿kʼaita bʉ karpa dede baseabʉ? ¿Kʼaitrʉ baseabʉ bʉ katʉmanera?» (Sal. 15:1). Davidba de karpa ʉ̃rʉ jarasidera iya krĩchasibaibara tabernakulo ʉ̃rʉ, maʉ̃ra chʉasi Gabaónʼne adewara Davidbara jarasi katʉmata, maʉ̃ jarasidera krĩchasibaibara Sionta Jerusalénʼne badata, maʉ̃ra Gabaónʼneba ara jĩga chʉasi. Mainʉ Davidbara parãsi de karpata mama wuagaita arka bedʼea abarika zedata, templo maparãñiena (2 Sam. 6:17).

3. ¿Kʼãrẽa kʼawuadaibara Salmo 15​ba jarabʉra? (Akʉra potota).

³ Tabernakulodera israelita jõmaʉ̃ta trajada ẽ basi, adewara ʉ̃kʉrʉ israelitaratrʉ arka bedʼea abarika zeda wuagabʉma wãpanasi, mamina jõma iyi ode kʼẽrẽpapanʉrãra Daizeze de karpede eda baseapanʉ iyi neũdukʼawuabʉrʉ akʉza maʉ̃ta idubʉda ẽ bʉrʉ. Mawũẽra dayirã jõmaʉ̃ta iyi neũdukʼawua bakĩrãpanʉ, Salmo 15de jarabʉ dayirãba kʼãrẽta odaibarata ewari jõmaʉ̃nẽ Jeowa neũdukʼawua bʼaita.

KʼẼRẼPA BARA AKɄZA BIA OBARA

4. ¿Sãwũã kʼawuapanʉ Jeowa neũdukʼawua bʼaira bari buru kʼoeibara ẽãta? (Isaías 48:1).

⁴ Salmo 15:2​de jarabʉ kʼãrẽta oibarata Daizeze neũdukʼawua bʼaira, jarabʉ Daizeze neũdukʼawuarãra «kʼẽrẽpapanʉta»  akʉza «biata opanʉta». Nama jarabʉ kʼẽrẽpa panʉ akʉza bia opanʉ, naʉ̃bara jarakĩrãbʉ maʉ̃ mawũã obʉta badua obaibarata idubʉ ẽ baibarata. Mamina, ¿wãrĩnu dayirãra kʼẽrẽpa baseabʉka Daizeze nããra? Dayirã jõmaʉ̃ta nemitia omiamina zarea opanʉbʉrʉ Jeowaba zokʼabʉta aripe odaita, Jeowa dabʉ nããra dayirãra kʼẽrẽpabʉ kĩrãkʼabʉ, mawũẽra dayirãba Daizeze Jeowaʼa dayi bebʉ diaya aside akʉza buru kʼoeside maʉ̃neba ʉ̃tabʉrʉ Daizeze neũdukʼawua ba jʉ̃drʉsi. Bari jaraita, nawedara israelita baera naʉ̃ba jarakĩrãkʉa ẽ basi Daizeze neũdukʼawuata mawũã Daizeze dedabʉta, ʉ̃kʉrʉbara Daizeze Jeowaba zokʼabʉta soidʉba oda ẽ basi baera (akʉra Isaías 48:1). Israelita abaʉta Daizeze de karpade bakĩrãbasibʉrʉ biʼia ũdukʼawua baibarabasi Jeowaba kʼãrẽta omarẽã zokʼabʉta, abarikabʉ idi ewade dayirãta Jeowa neũdukʼawua bia bʼaira bari buru kʼoeibara ẽ akʉza jaraibara ẽ Jeowa ʉ̃rʉ Kʼawuabipanʉrãta awuarabʉrʉ oũdubibara aripe opanʉta, ¿sãwũã oseapanʉ maʉ̃ra?

5. ¿Kʼãrẽta jarakĩrãbʉ nekʼãrẽ jõmaʉ̃nẽ Jeowaba kãgabʉta oita?

⁵ Dayirãta Jeowa nãã kʼẽrẽpa bakĩrãpanʉbʉrʉ akʉza biata okĩrãpanʉbʉrʉ bari ewariza ãba yi jʉrebari eda wãpana ẽ baibara (1 Sam. 15:22). Dayirãra zarea odaibara ewari jõmaʉ̃nẽ odaita Jeowaba kãgabʉta, dayirã abapai panʉnebida (Prov. 3:6; Ecl. 12:​13, 14). Mejãchade biga dayirãba oũdubidaita nekʼãrẽ wĩkabʉde bida Jeowaba kãgabʉta, mawũãra dayirãba Jeowaʼa mejãcha kãgabʉta ũdubidayi akʉza iyabida dayirãta kãga bayi (Juan 14:23; 1 Juan 5:3).

6. Hebreos 6:​10-12 bayeda jarabʉdebara ¿Jeowaʉ̃me kʼẽrẽpabʉta dããrababʉrʉ kʼãrẽa krĩcha ẽ baibara wua kʼãrẽ oira nesida ẽãta?

⁶ Daizeze Jeowabara bia akʉbʉ dayirã zarea ozebʉrʉra iya kãgabʉ oita,  mamina krĩcha ẽ baibara Daizeze de karpade eda bʼaira wua kʼãrẽ oira nesida ẽãta Jeowaitara, Hebreos 6:​10-12 bayeda jarabʉ kĩrãkʼa (akʉra). Jeowabara jõma kĩrãbebʉ dayirãba kʼãrẽ nebiata ozebʉrʉta, mamina kãgabʉ dayirãba ewari jõmaʉ̃nẽ iya kãgabʉta obamarẽã, mawũã odara iya dayirãʼa nebiata diayi ewari jõmaʉ̃nẽ iyi neũdukʼawua bia bʼaita (Gál. 6:9).

SOIDɄBA WÃRĨNUTA JARARA

7. ¿Kʼãrẽta jarakĩrãbʉ soidʉba wãrĩnu jaraibara?

⁷ Salmo 15:2​de jarabʉ Jeowabara iyi de karpama trʉ̃bʉta ẽbẽrarã soidʉba wãrĩnu jarabʉrata, mamina maʉ̃bara bari jarakĩrãbʉ ẽ sewidata jara ẽ baibarata awuarabʉrʉ dayirãba nekʼãrẽ jõma obʉdeba ũdubibarata wãrĩnuta jarabʉta (Heb. 13:18). Maʉ̃ra jipade yibia, Jeowabara jʉra baera ẽbẽra kayiruara, mamina iyira neũdukʼawua bia ẽbẽrarã kʼẽrẽpa panʉmera (Prov. 3:32).

8. ¿Kʼãrẽta oẽ baibara dayirãbara?

⁸ Ẽbẽra abaʉba wuabemara kĩrãbitabʉde ũdubira iyira Daizezeba zokʼabʉde bʉta mamina iyi dobabʉde Daizezeba zokʼabʉde bʉ ẽ bʉrʉ, maʉ̃ ẽbẽrabara soidʉba wãrĩnuta jarabʉ ẽ (Is. 29:13). Iya obʉra kayirua, dayirãra maʉ̃ kĩrãkʼa bakĩrãpanʉ ẽ. Ẽbẽra abaʉba mawũã ora tẽã jʉ̃neane krĩcha zeseabʉ Jeowaba nekʼãrẽ omarẽã zokʼabʉra bigabʉ ẽãta (Sant. 1:​5-8). Maʉ̃ ẽbẽrabara nekʼãrẽ aña owãseabʉ wiña wiñane, iya mawũã nekʼãrẽ wiña aña oda tẽã ũdura iya kʼãrẽ bedʼea zroma ũdu ẽãta, tẽã jʉ̃neanera audre kayirua zromata oseabʉ. Maʉ̃ ẽbẽrama iya Jeowaba kãgabʉta obʉ kĩrãkʼabʉmina Jeowabara bia akʉ ẽ bayi iyira (Ecl. 8:11). Mamina dayirãbara nekʼãrẽ jõmaʉ̃nẽba ũdubikĩrãpanʉ soidʉba jarapanʉta wãrĩnuta.

9. ¿Kʼãrẽta berabarisi Jesuba Natanael ũdukata ũduside? (Akʉra potota).

⁹ Soidʉba wãrĩnu jaraira jipade yibia, maʉ̃ta ũdupanʉ Felipeba Natanaelta Jesu ũdukʼawuamarẽã edeside. Jesuba Natanael ũdukata ũdusidera jarasi naʉ̃ yumakẽrãbara mia abaʉ ẽbẽrata sewa ẽãta (Juan 1:47). Jesuba kʼawuabasi iyi kʼaidubemara wuabemarabida wãrĩnuta jarabasita,  mamina Natanaelba audre wãrĩnuta jarasi. Natanaelʼra dayirã kĩrãkʼa kayirua omiabasi, mamina iyara wuabemara kĩrãbitabʉdebʉrʉ nekʼãrẽ biata obasi ẽ awuarabʉrʉ iya nekʼãrẽ jõma obʉde ũdubibasi wãrĩnu jarabʉta. Jesubara bia akʉbasi Natanaelʼra. Abarika kãgapanʉ Jesuba dayirãsida bia akʉmarẽã, dayirãba soidʉba wãrĩnuta jarapanʉ kʼarea.

10. ¿Kʼãrẽã jʉra kʼawuabaibara daya kʼãrẽ jarabʉ kʼarea? (Santiago 1:26).

¹⁰ Salmo 15​de Jeowaba jara ũrĩbibʉ dayirãba kʼãrẽta omarẽã kãgabʉta, maʉ̃nera audre jara ũrĩbibʉ dayirãba wuabemara sãwũã edaibara ʉ̃rʉ. Salmo 15:3​de jara ũrĩbibʉ sãwũãbʉta ẽbẽra Jeowa de karpadebʉra, jarabʉ naʉ̃ ẽbẽrarã «awuru ʉ̃rʉ sewa nebʉrʉ jara ẽãta, wuabemara ʉ̃rʉ nemitia oẽãta akʉza iyi neũdukʼawuara ʉ̃rʉ i kayirua jara ẽãta». Dayirãba awuru ʉ̃rʉ sewa nebʉrʉta jarara mawũãra zʉbʉriabiseabʉ awururata adewara Jeowa de karpadeba ãĩ wãseabʉ (akʉra Santiago 1:26).

11. ¿Kʼãrẽba sãwũãi ẽbẽra abaʉba awuru ʉ̃rʉ i kayirua jarabʉrʉde maʉ̃ kʼarea jẽda krĩcha ẽ bʉrʉ?

¹¹ Salmistaba jara ũrĩbibʉ ẽbẽra abaʉba awuru ʉ̃rʉ i kayirua bedʼeabʉ ʉ̃rʉ, maʉ̃ ẽbẽrabara sewidata jarabʉ wuabemara ʉ̃rʉ. Ẽbẽra abaʉta awuru ʉ̃rʉ i kayirua bedʼeara akʉza iya kʼãrẽ oda kʼarea jẽda krĩcha ẽ bʉrʉ, maʉ̃ ẽbẽrarã ãĩ wãñi Jeowa odeba (Jer. 17:10).

12, 13. ¿Kʼãrẽ berabaribʉrʉde jʉra kʼawuabaibara wuabemara ʉ̃rʉ i kayirua bedʼea ẽ baita? (Akʉra potota).

¹² Salmo 15:3​ba kĩrãbebibʉ Jeowa de karpadebʉbara wuabemara ʉ̃rʉ nemitia o ẽãta akʉza iyi neũdukʼawuara ʉ̃rʉ i kayirua jara ẽãta. ¿Sãwũã i kayirua bedʼeaseapanʉ dayirã neũdukʼawua ʉ̃rʉ?

¹³ Dayirãta jʉra kʼawuapanʉ ẽ bʉrʉ wuabemara ʉ̃rʉ i kayirua bedʼeaseabʉ, krĩchadaya naʉ̃ra yiza ũbea ʉ̃rʉ: yi  nããrabemata, mebẽã wẽrã abaʉba yi nãã edebari obʉta idubʉebʉ, yi ũmeta mebẽrã juwa jidapanʉrata Beteldeba ãĩ wãpanʉ, yi ũbeata jarapanʉ mebẽã aba wua zõrãrã ẽãta mawũã ẽ bʉrʉ zõrãrã kʼarebabari ẽãta. Jipade biga ẽ bayi dayirãba jaraita maʉ̃ra mebẽrãra mawũã berabarisita ãya nei aña osi baera, wãrĩnu bʼaira dayirãbara kʼawua ẽ baera kʼãrẽa mawũã berabarisita maʉ̃ra. Jeowa de karpadebʉbara wuabemara ʉ̃rʉ nekʼãrẽ mitia oẽ akʉza iyi neũdukʼawua ʉ̃rʉ i kayirua jara ẽ.

WAWIARA JEOWA KÃGAPANɄRÃRA

14. ¿Wãrĩnu bʼaira kʼãĩraneba jĩga bʼaibara?

¹⁴ Salmo 15:4​ba jarabʉ Jeowa neũdukʼawuara jĩgabʉta ẽbẽra nebia oẽãnebara, ¿sãwũã kʼawuaseapanʉ kʼaiba nebia oẽãta? Dayirãbara kʼawua jara beda ẽ saʉ̃ ẽbẽraba bia ẽãta obʉra dayirãra kayirua omia baera, maʉ̃ba dayirãbara dayiʉ̃me yibiara bia edabʉ mamina dayiʉ̃me yibia ẽãra bia eda ẽ. Maʉ̃ba dayirãra jĩga baibara ẽbẽrarã Jeowa dabʉ nãã nebia obʉ ẽãnebara (1 Cor. 5:11). Maʉ̃ra ẽbẽrarã bia ẽãta oberane edapanʉ jari ẽbẽrarã yi kayirua opanʉrata, maʉ̃ kʼarea jẽda krĩcha ẽãrata adewara dayirãba ĩjãbʉa wawia ũdubida ẽãta akʉza nekʼãrẽ jõma opanʉrata dayirãba Jeowata idubʉdamarẽã (Prov. 13:20).

15. ¿Sãwũã wawia ũdubipanʉ Jeowa kãgapanʉrãra?

¹⁵ Adewara Salmo 15:4​ba jarabʉ dayirãbara wawiaibarata Jeowa kãgapanʉrãra, maʉ̃ba dayirãra nekʼãrẽ jõma obʉ ãyaʼa wawia ũdubidaita akʉza bia edadaita (Rom. 12:10). Maʉ̃ kʼarea Jeowa de karpadebʉbara Salmo 15:4ba jarabʉ kĩrãkʼa oibara, «aripe obʉ iya jaradata bia wã ẽ mina». Dayirãba nekʼãrẽ oya adata aripe oẽ bʉrʉ wuabemata sopuabiseabʉ (Mat. 5:37). Bari jaraita, Jeowabara jʉ̃ãbʉ juwa jidapanʉraba ãyi ʉ̃rabʉrʉ juwa jidaside kʼãrẽ oya adara aripe odamarẽã adewara jʉ̃ãbʉ yibarirabara ãyi wũãwũã kʼãrẽ oita jarabʉra maʉ̃sida aripe odamarẽã. Dayirãba Jeowata akʉza wuabemata kãgapanʉ baera dayirãra nekʼãrẽ jõma opanʉ dayirãba nekʼãrẽ oya adara aripe oita.

16. ¿Adewara sãwũã wawia ũdubipanʉ Jeowa neũdukʼawuara?

¹⁶ Adewara dayirãba Jeowa kãgapanʉraʼa wawia ũdubira nekʼãrẽ diakĩrã diabaibara akʉza bia edaibara (Rom. 12:13). Dayirãra ãba yi jʉrebarima wãbʉrʉde mawũã ẽ bʉrʉ Daizeze Bedʼea jaradia wãbʉrʉde mebẽrãbawara ãbapanʉ, mamina maʉ̃ awuara nekʼãrẽ awuru obʉde ãyiʉ̃me ãbapanʉbʉrʉ naʉ̃ba kʼarebayi audre ũdukʼawuaita ãyita, adewara dayirãba mebẽrã kʼãwũã bia edabʉba ũdubibʉ dayirãba Jeowade kĩrãkʼa opanʉta.

PLATATA AUKʼARA KÃGADA Ẽ BAIBARA

17. ¿Salmo 15dera kʼãrẽa plata ʉ̃rʉ bedʼeabʉ?

¹⁷ Jeowa de karpadebʉbara plata presta ẽ audre ganaita, mia wuabemata kayirua oẽ plata kʼarea (Sal. 15:5). ¿Naʉ̃ Salmonera kʼãrẽa bedʼeabʉ plata ʉ̃rʉ? Ẽbẽraba plata ʉ̃rʉ aukʼara krĩchabʉbʉrʉ, krĩcha ẽ bayi ẽbẽrarã ʉ̃rʉ adewara naʉ̃ba Daizezedeba jĩga babiseabʉ baera (1 Tim. 6:10). Nawedara ʉ̃kʉrʉ mebẽrãbara yi audre kʼãrẽ neẽbeara plata prestabasi intere bara adewara ʉ̃kʉrʉ juezʼrabara platabari zʉbʉria obasi yi nekʼãrẽ kayirua oẽ badata. Jeowabara jipade jʉra maʉ̃ oira (Ezeq. 22:12).

18. ¿Dayirãba plata sãwũã akʉbʉ kʼawuaira kʼãrẽ ʉ̃rʉ widibara dayikʉza? (Hebreos 13:5).

 ¹⁸ Jipade yibia dayikʉza krĩchaita plata sãwũã akʉbʉ ʉ̃rʉ, maʉ̃itara dayikʉza widiseabʉ: «¿Mʉ̃ara ewari jõmaʉ̃nẽ krĩchanʉmʉka plata ʉ̃rʉ akʉza kʼãrẽta edai ʉ̃rʉ? ¿Mʉ̃aʼa plata prestabʉdadera atia paga ẽ ka krĩchabʉ baera maʉ̃ ẽbẽrabara plata mejãcha erbʉta akʉza nesida ẽãta? ¿Mʉ̃a platata erbʉ baera krĩchabʉka mʉ̃ra wuabemaraira audre yi zromata? ¿Mʉ̃itara zareabʉka wuabemara nekʼãrẽ diakĩrãira? ¿Mebẽrãba platata mejãcha erbʉ kʼarea krĩchabʉka ãyara platata audre kãgata Jeowaira? ¿Mʉ̃ra yi plata erbʉrabawarabʉrʉ bakĩrãbʉka?». Dayirãta Jeowa de karpadeba ãĩ wãmabʉbʉrʉ jipade yibia bayi maʉ̃ ʉ̃rʉ krĩchaita. Mawũẽra dayirãta Jeowa de karpade ewari jõmaʉ̃nẽ bakĩrãpanʉbʉrʉ zarea odaibara platata aukʼara kãgada ẽ baita. Mawũã opanʉbʉrʉ Jeowaba dayirãra doba amae ẽ bayi (akʉra Hebreos 13:5).

JEOWABARA KÃGA IYI NEŨDUKʼAWUARÃRA

19. ¿Jeowabara kʼãrẽa kãgabʉ Salmo 15​de nekʼãrẽ omarẽã zokʼabʉra jõma aripe odamarẽã?

¹⁹ Salmo 15 jõbodoare jarabʉ: «Yi mawũãbʉra neida berabari ẽ bayi» (Sal. 15:5). Nama salmistaba ũdubibʉ dayirãba Jeowaba nekʼãrẽ omarẽã zokʼabʉta jõma opanʉbʉrʉ dayirãra sobia bʼaita, maʉ̃ kʼarea Jeowaba dayirã jaradiabʉ kʼãrẽ oita akʉza nebiata diabʉ adewara bia akʉbʉ dayirãra (Is. 48:17).

20. ¿Jeowa de karpade panʉrabara kʼãrẽta jʉ̃ãpanʉ?

²⁰ Jeowa de karpade panʉrabara jõmaʉ̃ba nebiata jʉ̃ãpanʉ, 144.000rabara jʉ̃ãpanʉ ʉ̃ta wãita, mama Jesuba ãyita erbʉ baera sama bʼaita (Juan 14:2). Adewara yi nama egorode panairabara sobiade jʉ̃ãpanʉ Apocalipsis 21:3​ba jarabʉta aripe berabarimarẽã. Jipade yibia Jeowaba kãgabʉ baera dayirãra iyi de karpade ewari jõmaʉ̃nẽ panamarẽã.