ESTUDIO 24
CʼAY 24 Laʼ letsiconla tiʼ wits Jehová
Laʼ ajñiconla tiʼ yotot Jehová tiʼ pejtelel ora
«C Yum, ¿majqui miʼ caj ti ajñel ti a wotot?» (SAL. 15:1).
TEMA
Chuqui miʼ pijtan Jehová ti lac tojlel chaʼan chʌn i yamigojonla i bajcheʼ yilal yomonla tiʼ tojlel i yamigojob.
1. ¿Bajcheʼ miʼ coltañonla Salmo 15:1-5?
TI JIÑI yambʌ estudio tsaʼ laj qʼuele chaʼan jiñi tsaʼix bʌ la cʌcʼʌ lac bʌ ti Jehová mi lac mejlel ti sujtel tiʼ yamigo i mi la cajñel tiʼ yotot. Pero ¿chuqui miʼ mejlel lac mel chaʼan mi lac sujtel ti wem bʌ i yamigo Dios? Yaʼ ti Salmo 15 mi caj lac taj i jacʼbal yicʼot mi caj laj cʌn wen ñuc tac bʌ i cʼʌjñibal muʼ bʌ caj i coltañonla chaʼan mi lac ñumen lʌcʼtesan lac bʌ ti Dios (pejcan Salmo 15:1-5).
2. Cheʼ bʌ David tsiʼ taja ti tʼan jiñi i yotot Jehová, ¿chuqui woliʼ ñaʼtan?
2 Jiñi Salmo 15 miʼ tech i yʌl: «C Yum, ¿majqui miʼ caj ti ajñel ti a wotot? ¿Majqui miʼ caj ti chumtʌl ti chʼujul bʌ a bujtʌl [o wits]?» (Sal. 15:1). Cheʼ bʌ David tsiʼ taja ti tʼan jiñi i yotot Jehová, tajol jin woli (choncol) i ñaʼtan jiñi tabernáculo. Ti jimbʌ ora, jiñi tabernáculo tsaʼ jumucʼ ajñi ti Gabaón. Cheʼ jaʼel, tsiʼ taja ti tʼan jiñi chʼujul bʌ i wits Dios, tajol jiñʌch woliʼ taj ti tʼan jiñi wits Sion am bʌ ti Jerusalén. Ili wits lʌcʼʌ 10 kilómetro i ñajtlel ti Gabaón, David tsiʼ mele jumpʼejl pisil bʌ otot yaʼi, i yaʼ tsiʼ yʌcʼʌ jiñi arca chaʼan bʌ trato, jinto baʼ ora miʼ mejlel jiñi templo (2 S. 6:17).
3. ¿Chucoch i cʼʌjñibalʌch lac chaʼan muʼ bʌ i yʌl jiñi Salmo 15? (Qʼuele jaʼel jiñi dibujo).
3 Cabʌl israelitajob maʼañic tsiʼ chaʼleyob eʼtel yaʼ ti tabernáculo i mi tsaʼicto mejliyob ti ochel yaʼ ti pisil bʌ otot baqui lotol jiñi arca chaʼan bʌ trato. Pero pejtelel jiñi israelitajob miʼ mejlelob ti sujtel tiʼ yamigojob Jehová, i cheʼ bajcheʼ jiñi lajal bajcheʼ miʼ yochelob tiʼ yotot. I jiñʌch la com bʌ jaʼel. Jiñi Salmo 15 miʼ yʌl chuqui miʼ pijtan Jehová ti lac tojlel chaʼan mi lac chʌn ajñel bajcheʼ i yamigo.
Jiñi israelitajob tiʼ yorajlel David mach wocolic tsiʼ chʼʌmbeyob i sujm chuqui yom i yʌl cheʼ mi la cochel tiʼ yotot Jehová. (Qʼuele jiñi párrafo 3).
LAʼ LAC MEL CHUQUI TOJ
4. ¿Chucoch mach jasʌlic cheʼ chʼʌmʌlix lac chaʼan jaʼ chaʼan Jehová wen miʼ qʼuelonla? (Isaías 48:1).
4 Ti Salmo 15:2 miʼ yʌl chaʼan jiñi i yamigo Dios «maʼanic i sajtemal» yicʼot chaʼan «miʼ mel chuqui tac toj». I cheʼʌch yom mi la cajñel tiʼ pejtelel ora tiʼ tojlel Jehová. Pero ¿yom ba i yʌl iliyi chaʼan maʼañix baʼ ora mi caj lac mel mach bʌ weñic? Mach cheʼiqui, come ti lac pejtelel xmulilonla. Pero mi tsaʼ lac chaʼle wersa lac jacʼben i tʼan Jehová, mi caj i qʼuelonla ti toj. Cheʼ mi la cʌcʼ lac bʌ ti Jehová yicʼot mi lac chʼʌmeʼ jaʼ woli (yʌquel) jaxto lac tech xʌmbal yicʼot Jehová. Ti wajali, chaʼan juntiquil miʼ mejlel ti ajñel tiʼ yotot Jehová mach jasʌlic mi israelitajʌch, come an cabʌlob tsaʼ bʌ i lon pejcayob Dios pero mach xucʼulobic i mach ti jumpʼejlobic i pusicʼal miʼ melob (pejcan Isaías 48:1). Jiñi yomoʼ bʌ i lʌcʼtesañob i bʌ ti Jehová tiʼ sujm, yomʌch miʼ cʌñob jiñi i mandar tac yicʼot miʼ tsʼʌctesañob. I cheʼʌch miʼ yujtel jaʼel ili ora. Chaʼan Jehová wen miʼ qʼuelonla mach jasʌlic cheʼ mi lac chʼʌmeʼ jaʼ i añonla yaʼ ti congregación. Yom mi lac chʌn mel chuqui toj. ¿Chuqui yom i yʌl jiñi?
5. ¿Chuqui yom i yʌl cheʼ maʼañic lac sajtemal yicʼot mi lac mel chuqui toj?
5 Tiʼ tojlel Jehová, jiñi maʼañic bʌ i sajtemal yicʼot toj chuqui miʼ mel mach jiñic jiñi jujumpʼejl bʌ semana miʼ yajñel ti tempa bʌ (1 S. 15:22). Yomʌch mi lac chaʼlen wersa lac jacʼben i tʼan Jehová tiʼ pejtelel muʼ bʌ lac mel, cheʼ bʌ añonla la quicʼotob yambʌlob yicʼot cheʼ lac bajñel jach (Pr. 3:6; Ec. 12:13, 14). I cheʼʌch yom mi lac mel anquese an tacʌch mach bʌ wen ñuquix i cʼʌjñibal mi lac ñaʼtan. Mi tsaʼ lac mele bajcheʼ jiñi mi caj lac pʌs chaʼan mi laj cʼuxbin Jehová i wen mi caj i qʼuelonla (Juan 14:23; 1 Juan 5:3).
6. Cheʼ bajcheʼ miʼ yʌl Hebreos 6:10-12, ¿chucoch mach jasʌlic jiñi an taquix bʌ lac mele chaʼan mi lac chʌn ajñel tiʼ yotot Jehová?
6 Jehová miʼ wen qʼuel ti ñuc pejtelel am bʌ lac mele tiʼ tojlel. Pero chaʼan mi lac chʌn ajñel tiʼ yotot mach jasʌlic jiñi an taquix bʌ lac mele, cheʼ bajcheʼ miʼ yʌl Hebreos 6:10-12 (pejcan). Jehová maʼañic miʼ ñajʌtesan pejtelel am bʌ lac mele, pero yom chaʼan mi lac chʌn melben i yeʼtel (troñel) ti jumpʼejl lac pusicʼal «cʼʌlʌl tiʼ yujtibal». «Mi maʼañic mi lac lujbʼan» mi caj i chʌn qʼuelonla bajcheʼ i yamigo tiʼ pejtelel ora (Gál. 6:9).
LAʼ LA CɅL CHUQUI I SUJM TI LAC PUSICʼAL
7. ¿Chuqui yom i yʌl cheʼ mi la cʌl chuqui i sujm ti lac pusicʼal?
7 Jiñi Salmo 15:2 miʼ yʌl chaʼan Jehová miʼ pʌy tiʼ yotot jiñi muʼ bʌ i yʌl «chuqui i sujm tiʼ pusicʼal», TNM. Iliyi mach cojach yom i yʌl chaʼan maʼañic mi caj lac chaʼlen lot. Jehová yom chaʼan pejtelel chuqui mi la cʌl yicʼot mi lac mel, i sujmlelʌch (Heb. 13:18). Ili wen ñucʌch i cʼʌjñibal, «come jini xjontolil tsʼaʼ miʼ qʼuejlel ti lac Yum, pero lac Yum miʼ pʌsben jini toj bʌ [o jiñi i yamigo] jini mucul tac bʌ i chaʼan» (Pr. 3:32).
8. ¿Chuqui mach bʌ yomic mi lac mel?
8 Jiñi muʼ bʌ i yʌl chuqui i sujm tiʼ pusicʼal maʼañic miʼ poj pʌs chaʼan mi jacʼben i mandar tac Jehová cheʼ an majqui woliʼ qʼuel, pero cheʼ i bajñel jach miʼ ñusan ti pʼis (Is. 29:13). Jehová tsʼaʼ miʼ qʼuel cheʼ bʌ miʼ melob bajcheʼ jiñi, i mach la comic chaʼan cheʼ mi lac mel. ¿Chuqui miʼ mejlel i yʌcʼ chaʼan mi la cujtel bajcheʼ iliyi? Tajol an majqui miʼ ñaʼtan chaʼan an i mandar tac Jehová mach bʌ wen ñuquic i cʼʌjñibal i miʼ mejlel i ñusan ti pʼis (Sant. 1:5-8). Ti wiʼil, mi maʼañic miʼ taj wocol miʼ qʼuel, tajol maʼañix miʼ chaʼlen bʌqʼuen i miʼ mel ñumen tsʌts tac bʌ. Tajol miʼ ñaʼtan chaʼan weñʌch an come woliʼ bej mel i yeʼtel Jehová, pero tiʼ sujm, Jehová mach utsʼatix woliʼ qʼuel (Ec. 8:11). Jin chaʼan la comʌch lac chaʼlen wersa la cʌl yicʼot lac mel chuqui utsʼat.
9. ¿Chuqui mi laj cʌn chaʼan tsaʼ bʌ ujti cheʼ bʌ Jesús tsiʼ cʌñʌ Natanael? (Qʼuele jaʼel jiñi dibujo).
9 Wen ñuc i cʼʌjñibal cheʼ mi la cʌl chuqui i sujm ti lac pusicʼal, jiñʌch muʼ bʌ i pʌsbeñonla tsaʼ bʌ ujti cheʼ bʌ Jesús tsiʼ cʌñʌ Natanael. Cheʼ bʌ Felipe tsiʼ pʌyʌ majlel i yamigo Natanael chaʼan miʼ cʌn Jesús an chuqui wen ñuc bʌ tsaʼ ujti. Jesús mach i cʌñʌyic Natanael, pero cheʼ bʌ tsiʼ qʼuele, tsiʼ yʌlʌ: «Qʼuelela, tiʼ sujm juntiquil israelita mach bʌ añic lot tiʼ tojlel» (Juan 1:47). Jesús yujil chaʼan jiñi yambʌ xcʌntʼañob i chaʼan i sujm chuqui miʼ yʌlob yicʼot chuqui miʼ melob, pero ñumento tsaʼ bʌ i qʼuele tiʼ tojlel Natanael i jiñi tsiʼ yʌcʼʌ ti toj sajtel i pusicʼal. Natanael i tilelʌch bajcheʼ jiñi, mach tsaʼic jach i pʌsʌ. Jin chaʼan, Jesús tsiʼ wen qʼuele ti ñuc bajcheʼ yilal. ¡Wen utsʼatax cheʼ muqʼuic i mejlel ti ajlel ti lac tojlel bajcheʼ jiñi!
Cheʼ bʌ Felipe tsiʼ pʌyʌ majlel Natanael chaʼan miʼ cʌn Jesús, Jesús tsiʼ yʌlʌ chaʼan Natanael maʼañic lot tiʼ tojlel. ¿Cheʼ ba miʼ yʌl jaʼel ti lac tojlel? (Qʼuele jiñi párrafo 9).
10. ¿Chucoch yom tsajalonla bajcheʼ mi lac chaʼlen tʼan? (Santiago 1:26).
10 Lʌcʼʌ tiʼ pejtelel muʼ bʌ i yʌl jiñi Salmo 15 miʼ taj ti tʼan bajcheʼ yilal yomonla tiʼ tojlel yambʌlob. Jiñi Salmo 15:3 miʼ yʌl bajcheʼ yilal jiñi yom bʌ ochel tiʼ yotot Jehová, miʼ yʌl: «Mach yujilic jopʼtʼan. Maʼanic chuqui miʼ tumben i cʌñʌ bʌ. Maʼanic miʼ chʌn ñaʼtiben i mul i piʼʌlob». Mi mach tsajalonla bajcheʼ mi lac chaʼlen tʼan, mach cojach mi caj lac low yambʌlob, miʼ mejlel i mʌctañonla jaʼel chaʼan maʼañix mi lac mejlel ti ochel tiʼ yotot Jehová (pejcan Santiago 1:26).
11. ¿Chuquiyes jiñi jopʼtʼan, i chuqui miʼ yujtel mi juntiquil maʼañic miʼ chaʼ ñaʼtan i bʌ?
11 Jiñi salmista tsiʼ taja ti tʼan jiñi jopʼtʼan. ¿Chuqui jiñi? Jiñʌch cheʼ mi la cʌl mach bʌ i sujmic tiʼ tojlel juntiquil, i jiñi muʼ bʌ la cʌl miʼ mejlel i ticʼlan. Jiñi muʼ bʌ i chaʼleñob jopʼtʼan i maʼañic miʼ chaʼ ñaʼtañob i bʌ, miʼ locʼsʌntelob ti congregación (Jer. 17:10).
12, 13. ¿Chuqui mach bʌ yomic mi lac melbeñob jiñi la camigojob? (Qʼuele jaʼel jiñi foto).
12 Jiñi Salmo 15:3 miʼ cʼajtesʌbeñonla jaʼel chaʼan jiñi am bʌ tiʼ yotot Jehová «maʼanic chuqui miʼ tumben i cʌñʌ bʌ». ¿Am ba chuqui miʼ mejlel lac tumben jiñi laj cʌñʌ bʌ o laj camigojob?
13 Tajol miʼ mejlel lac tech la cʌl chuqui mach bʌ weñic tiʼ tojlel yambʌ. Laʼcu lac ñaʼtan iliyi: 1) juntiquil hermana mach precursorajix, 2) jumpʼejl xñujpuñel miʼ loqʼuel ti Betel, 3) miʼ yʌjlel chaʼan juntiquil hermano mach ancianojix o mach siervo ministerialix. ¿Yom ba mi lac tech lac bajñel al chucoch maʼañobix i privilegio i mi lac tech la cʌl yicʼot yambʌlob? Tajol mach luʼ la cujilic chuqui tsaʼ ujti. Cheʼ jaʼel, yom mi laj cʼajtesan chaʼan jiñi am bʌ tiʼ yotot Jehová «maʼanic chuqui miʼ tumben i cʌñʌ bʌ», mi yomic jax i bibʼesʌben i cʼabaʼ.
Mach wocolic chaʼan mi lac tech la cʌl yambʌ hermano i mi lac mejlel ti sujtel ti xjopʼtʼan. (Qʼuele jiñi párrafo 12 yicʼot 13).
LAʼ LAJ QʼUELOB TI ÑUC MUʼ BɅ I BɅCʼÑAÑOB DIOS
14. ¿Bajcheʼ miʼ mejlel lac ñaʼtan majqui jiñi «xjontolil» i maʼañic mi lac ñochtan?
14 Jiñi Salmo 15:4 miʼ yʌl chaʼan jiñi i yamigo Jehová «mach wenic miʼ qʼuel jini xjontolil». Pero ¿bajcheʼ mi lac ñaʼtan majqui jiñi xjontolil? Mach jiñic mi caj lac chʼʌm ti ñuc bajcheʼ yilal mi laj qʼuel lac piʼʌlob come xmulilonla. Tajol an muʼ bʌ lac mulan bajcheʼ yilalob i melbal (chaʼlibal) i an maʼañic bʌ. Jin chaʼan, cojach mach weñic mi caj laj qʼuelob jiñi mach bʌ utsʼatic miʼ qʼuejlelob ti Jehová, bajcheʼ jiñi muʼ bʌ i chaʼleñob mulil i maʼañic miʼ chaʼ ñaʼtañob i bʌ, jiñi maʼañic bʌ miʼ qʼuelob ti ñuc jiñi ñopol bʌ lac chaʼan yicʼot jiñi yomoʼ bʌ i ñajtʼesañonla ti Jehová (Pr. 13:20; 1 Cor. 5:11).
15. ¿Bajcheʼ miʼ mejlel lac pʌs chaʼan mi laj cʼuxbin jiñi muʼ bʌ i bʌcʼñañob Dios?
15 Jiñi Salmo 15:4 miʼ yʌl chaʼan yom mi laj cʼuxbin jiñi muʼ bʌ i bʌcʼñañob Dios. Jin chaʼan, mi lac sʌclan bajcheʼ mi lac pʌsbeñob la cutslel yicʼot mi laj qʼuelob ti ñuc (Rom. 12:10). ¿Bajcheʼ miʼ mejlel lac mel? Jiñi Salmo 15:4 miʼ yʌl chaʼan jiñi am bʌ tiʼ yotot Dios «miʼ tsʼʌctesan i tʼan anquese wocol miʼ yubin». Mi maʼañic mi lac mel iliyi, miʼ mejlel lac low yambʌlob (Mat. 5:37). Jumpʼejl ejemplo, Jehová miʼ pijtan chaʼan jiñi ñujpuñemoʼ bʌ miʼ tsʼʌctesañob jiñi tʼan tsaʼ bʌ i yʌqʼueyob i bʌ cheʼ bʌ tsaʼ ñujpuñiyob. Cheʼ jaʼel, miʼ pijtan chaʼan jiñi tatʌlob miʼ tsʼʌctesañob muʼ bʌ i subeñob i yalobil. Mi lac chaʼlen wersa lac tsʼʌctesan lac tʼan come mi laj cʼuxbin Jehová yicʼot yambʌ lac piʼʌlob.
16. ¿Bajcheʼ yambʌ mi lac pʌsbeñob cʼuxbiya jiñi i yamigojob Dios?
16 Yambʌ bajcheʼ mi lac pʌsben cʼuxbiya jiñi i yamigojob Dios jiñʌch cheʼ mi lac ñusan qʼuin la quicʼotob yicʼot mi lac tʼoxbeñob chuqui an lac chaʼan, i mach jiñic jach mi lac mel cheʼ bʌ añonla ti tempa bʌ o ti subtʼan (Rom. 12:13). Mi tsaʼ lac mele iliyi, mi caj lac ñumen lʌcʼtesan lac bʌ tiʼ tojlelob yicʼot tiʼ tojlel Jehová. I cheʼ jaʼel, woli lac lajin Jehová.
MACH LAJ CʼUXBIN TAQʼUIN
17. ¿Chucoch miʼ yʌjlel chaʼan bʌ taqʼuin ti jiñi Salmo 15?
17 Jiñi Salmo 15 miʼ bej al chaʼan jiñi am bʌ tiʼ yotot Jehová «maʼanic miʼ chʼʌm i jol taqʼuin cheʼ miʼ yʌcʼ ti majan. Maʼanic miʼ chʼʌm taqʼuin chaʼan miʼ ticʼlan jini mach bʌ anic i mul» (Sal. 15:5). ¿Chucoch miʼ yʌjlel chaʼan bʌ taqʼuin ti ili salmo cheʼ mach wen tamic? Come mach wis wocolic chaʼan mi lac tech lac mulan jiñi taqʼuin i jin jach mi lac chʌn ñaʼtan. Mi tsaʼ ujtiyonla bajcheʼ jiñi miʼ mejlel lac ticʼlan yambʌlob i mi lac ñajtʼesan lac bʌ ti Jehová (1 Tim. 6:10). Ti wajali, an tsaʼ bʌ i ticʼlayob jiñi pʼumpʼuñoʼ bʌ cheʼ tsiʼ cʼajtiyob i jol taqʼuin cheʼ miʼ yʌcʼob ti majan. I cheʼ jaʼel, an juezob tsaʼ bʌ i chʼʌmʌyob taqʼuin chaʼan miʼ ticʼlañob jiñi maʼañic bʌ i mul. Jehová tsʼaʼ miʼ qʼuel pejtelel iliyi (Ez. 22:12).
18. ¿Chuqui tac ti cʼajtiya yom mi lac melben lac bʌ? (Hebreos 13:5).
18 Wen cheʼ mi lac ñaʼtan bajcheʼ mi laj qʼuel jiñi taqʼuin. Laʼ laj cʼajtiben lac bʌ: «¿Taqʼuin jach ba mic ñaʼtan yicʼot chuqui tac com bʌ c mʌn? Mi tsaʼ c majña taqʼuin, ¿ti ora ba mic sutqʼuin o mic ñaʼtan chaʼan mach i cʼʌjñibalic i chaʼan? ¿Muʼ ba j qʼuel c bʌ ti ñuc tiʼ caj an c taqʼuin? ¿Wocol ba mi cubin chaʼan mij cʼʌn c taqʼuin chaʼan mic tʼox chuqui an c chaʼan? ¿Muʼ ba c ñaʼtan chaʼan jiñi hermanojob añoʼ bʌ i taqʼuin jin jach miʼ wen cʼuxbiñob taqʼuin? ¿Jin jach ba mic wen ñochtañob jiñi añoʼ bʌ i taqʼuin?». Wen utsʼatax cheʼ añonla tiʼ yotot Jehová, mach lac choc loqʼuel lac bʌ yaʼi tiʼ caj jiñi taqʼuin. Cheʼ bajcheʼ jiñi, Jehová maʼañic baʼ ora mi caj i cʌyonla (pejcan Hebreos 13:5).
JEHOVÁ MIʼ CʼUXBIN JIÑI I YAMIGOJOB
19. ¿Chucoch yom Jehová chaʼan mi lac jacʼ muʼ bʌ i yʌl jiñi Salmo 15?
19 I yujtibal jiñi Salmo 15 miʼ yʌl: «Jini toj bʌ muʼ bʌ i mel pejtel iliyi, chʌn xucʼul miʼ caj ti ajñel» (Sal. 15:5). Ili miʼ pʌsbeñonla chaʼan pejtelel muʼ bʌ i pijtan Jehová ti lac tojlel chaʼañʌch yom tijicñayonla. Jin chaʼan miʼ pʌsbeñonla chuqui yom mi lac mel chaʼan utsʼat miʼ qʼuelonla yicʼot chaʼan miʼ cʌntañonla (Is. 48:17).
20. ¿Bajcheʼ yilal mi caj i yajñelob jiñi añoʼ bʌ tiʼ yotot Jehová?
20 Jiñi añoʼ bʌ tiʼ yotot Jehová chʌn xucʼuloʼ bʌ miʼ yajñelob añob i chaʼan utsʼatax bʌ pijtaya. Jiñi ungidojob mi caj i majlelob ti panchan, baqui Jesús tsiʼ chajpʌbeyob i chumlib (Juan 14:2). I yonlelob mi caj i chumtʌlob ila ti Pañimil i mi caj i tajob jiñi bendición muʼ bʌ i yʌl Apocalipsis 21:3. ¡Wen utsʼatax cheʼ tsaʼ lac jacʼʌ ochel tiʼ yotot Jehová, yaʼ mi lac mejlel ti ajñel tiʼ pejtelel ora!
CʼAY 39 Utsʼat bʌ laj cʼabaʼ tiʼ tojlel Dios
