BAROKUN KALANTA KAFO KƆNƆ 24
DƆNKILI 24 A’ ye na Jehova ka kulu kan
To Jehova ka soo kɔnɔ fɔɔ abada!
“Masaba, jɔn le bena to i ka soo kɔnɔ?”—ZAB. 15:1.
BAROKUN KƆNƆNAKOW
Barokun nin bena an dɛmɛ k’a lɔn an ka ɲi ka min kɛ walisa ka to ka teriya kɛ ni Jehova ye ani a b’a fɛ an k’a teriw minɛ cogo min na.
1. Zaburuw 15:1-5 be se k’an nafa cogo di?
BAROKUN tɛmɛnin na, an y’a ye ko minw ye u yɛrɛkun di Jehova ma, a be olu lo bisimila a ka soo kɔnɔ, o kɔrɔ, u be teriya sɔbɛ kɛ n’a ye. Nka, an ka ɲi ka mun lo kɛ tigitigi walisa k’o teriya kɛ ni Jehova ye? Zaburuw 15nan be se k’an dɛmɛ kosɔbɛ o la (Zaburuw 15:1-5 kalan). An be kalan nafamanw sɔrɔ o Zaburu kɔnɔ minw b’an dɛmɛ an k’an magwɛrɛ kosɔbɛ Ala la.
2. N’a sɔrɔ Zaburu sɛbɛbaga Dawuda tun be miirila mun lo la tuma min na a kumana Jehova ka soo koo la?
2 Zaburuw 15nan be daminɛ ni ɲiningali nunu ye: “Masaba, jɔn le bena to i ka soo kɔnɔ? Jɔn le bena sigi e ka kulu senuman kan?” (Zab. 15:1). Tuma min na Zaburu sɛbɛbaga Dawuda kumana Jehova ka “soo” koo la, n’a sɔrɔ a tun be miirila fanibugu lo koo la, o min tun be Gabawɔn wagati dɔ la. N’a sɔrɔ a tun be miirila fana Siyɔn kulu lo koo la Zeruzalɛmu, tuma min na a kumana Ala ka “kulu senuman” koo la. O kulu be Gabawɔn dugu worodugu fan fɛ ani kilomɛtɛrɛ caaman b’u ni ɲɔgɔn cɛ. Dawuda tun ye fanibugu dɔ lɔ yen ani ka Ala ka layidu tagamasiɲɛ kɛsu bila a kɔnɔ. O kɛsu tora yen fɔɔ tuma min na u ye Alabatosoba lɔ.—2 Sam. 6:17.
3. Mun na an ka ɲi k’a ɲini ka Zaburuw 15nan faamu? (jaa lajɛ fana).
3 Israɛldenw fanba ma baara kɛ ka ye fanibugu kɔnɔ ani u damanin yɛrɛ lo tun be se ka don layidu tagamasiɲɛ kɛsu bilayɔrɔ la. Nka, Jehova sagokɛla kantigiw bɛɛ be se ka don a ka soo kɔnɔ, u kɛtɔ ka teriya kɛ n’a ye fɔɔ abada. An bɛɛ b’o lo fɛ. Zaburuw 15nan b’a yira an ka ɲi ka koo minw kɛ walisa an ni Jehova ka teriya kana sa.
Dawuda ka wagati la, a tun ka nɔgɔ Israɛldenw fɛ k’a faamu a kɔrɔ ye min ye ka kɛ Jehova ka soo kɔnɔ (dakun 3nan lajɛ).
AN KA KƐ JALAKIBALIW YE ANI KA TO KA KOO TILENNIN KƐ
4. An b’a lɔn cogo di ko Jehova t’a ɲini an fɛ ko an ka batize dɔrɔn le? (Ezayi 48:1).
4 Zaburuw 15:2 kɔnɔ, a fɔra ko Ala teri ye “mɔgɔ jalakibali ye, min be kotilennin kɛ” tuma bɛɛ. Nka, yala an be se ka kɛ ‘mɔgɔ jalakibaliw ye’ tiɲɛn na wa? Ɔnhɔn. Tiɲɛn lo ko an bɛɛ ye mɔgɔ dafabaliw ye. Nka, n’an b’an seko bɛɛ kɛ ka mɛnni kɛ Jehova fɛ, a bena an jati ‘mɔgɔ jalakibaliw ye.’ N’an y’an yɛrɛkun di Ala ma ani ka batize, o ye koow daminɛ dɔrɔn lo ye. A to i hakili la ko Bibulu sɛbɛwagati la, ka kɛ Israɛlden ye, o dama tun t’a to Ala be sin k’i bisimila a ka soo kɔnɔ. U dɔw tun be Ala tɔgɔ weele, nka u tun t’o kɛ ‘ni sɔbɛ ye, tilenniya fana tun t’a la.’ (Ezayi 48:1 kalan). Israɛlden minw tun b’a fɛ sɔbɛ la ka to Jehova ka soo kɔnɔ, olu tun ka ɲi k’a ɲini ka Jehova ka sariyaw lɔn ani k’u labato. Bi fana, ka batize ani ka jɛn ni kerecɛn kafo ye, o dama tɛ bɔri kɛ walisa ka kɛ Ala teri ye. An ka ɲi ka to ka “kotilennin kɛ.” An be se k’o kɛ cogo di do?
5. Ka mɛnni kɛ Jehova fɛ koo bɛɛ la, o kɔrɔ ko di?
5 Jehova ɲɛɛ kɔrɔ, ka kɛ “mɔgɔ jalakibali ye, min be kotilennin kɛ,” o kɔrɔ tɛ dɔrɔn ka to ka taga lajɛnw na Masaya Boon kɔnɔ (1 Sam. 15:22). An ka ɲi k’an jija ka to ka mɛnni kɛ Jehova fɛ an ka ɲɛnamaya faan bɛɛ la, hali n’an b’an kelen na (Talenw 3:6; Waaj. 12:13, 14). A kɔrɔtanin lo an ka to ka mɛnni kɛ Jehova fɛ hali koo den-denninw na. N’an b’o kɛ, o b’a yira ko an b’a kanu sɔbɛ la ani an koo be diya a ye kosɔbɛ.—Zan 14:23; 1 Zan 5:3.
6. Ka kɛɲɛ ni Eburuw 6:10-12 ka fɔta ye, an ye koo ɲuman minw kɛ ka tɛmɛ, mun lo kɔrɔtanin lo kosɔbɛ ka tɛmɛ o kan?
6 An ye koo ɲuman minw kɛ Jehova ye ka tɛmɛ, o ka di a ye kosɔbɛ. Nka, hali n’an ye kantigiya kɛ wagati tɛmɛninw na, o dama lo t’a yira ko an bena to Jehova ka soo kɔnɔ. O yirala ka gwɛ Eburuw 6:10-12 kɔnɔ (a kalan). An ye koo ɲuman minw kɛ, Jehova tɛ ɲinɛ o kɔ. Nka, a b’a fɛ an ka to k’ale bato n’an dusu bɛɛ ye “fɔɔ ka taga se a laban ma.” “N’an ma dɛsɛ k’o dabila,” an bena kɛ a teriw ye fɔɔ abada.—Gal. 6:9.
TIƝƐN FƆ NI KƆNƆGWƐ YE
7. Ka tiɲɛn fɔ ni kɔnɔgwɛ ye, o kɔrɔ ko di?
7 Mɔgɔ min b’a fɛ Jehova k’a bisimila a ka soo, o tigi ka ɲi ka to ka “tiɲɛ fɔ ni kɔnɔgwɛ ye.” (Zab. 15:2). O kɔrɔ ko an man ɲi ka ngalon tigɛ, nka o dɔrɔn tɛ. Jehova b’a fɛ fana an ka kɛ hɔɔrɔnw ye an ka kumaw n’an ka kɛtaw bɛɛ la (Eburuw 13:18). O kɔrɔtanin lo sabu “mɔgɔjugu koo ka go Masaba ye. Nga a be mɔgɔɲumanw kɛ a teriw ye.”—Talenw 3:32.
8. An man ɲi ka mun lo kɛ?
8 Minw be “tiɲɛ fɔ ni kɔnɔgwɛ ye,” olu tɛ mɛnni kɛ Ala fɛ dɔrɔn ni mɔgɔw ɲɛɛ b’u la ani k’a ka sariyaw tiɲɛ n’u b’u kelen na (Ezayi 29:13). U be ban ka nanbarakow kɛ. Nanbaramɔgɔ be se k’a daminɛ k’a miiri ko Jehova ka sariya dɔw bɛnnin tɛ (Zaki 1:5-8). N’a sɔrɔ a be Jehova ka sariyaw tiɲɛ koo dɔw la, ale be minw jati koo denninw ye. O kɔ, ni foyi m’a sɔrɔ, a b’a daminɛ ka kojugubaw kɛ ani a laban a ka batoli be kɛ filankafoyako ye (Waaj. 8:11). Nka an kɔni, an b’a fɛ ka kɛ hɔɔrɔnw ye koo bɛɛ la.
9. Mun lo kɛra siɲɛ fɔlɔ min na Yezu ye Natanayɛli kunbɛn ani an be kalan juman lo sɔrɔ o la? (jaa lajɛ fana).
9 Siɲɛ fɔlɔ min na Yezu ye Natanayɛli kunbɛn, a ye koo dɔ fɔ min b’an dɛmɛ k’a faamu ko a kɔrɔtanin lo an ka kɛ mɔgɔ kɔnɔgwɛw ye. Tuma min na Filipu tagara n’a teri Natanayɛli ye Yezu fɛ, koo kabakoman dɔ kɛra. Yezu tun ma deli ka Natanayɛli ye, nka a ko: “Nin ye Isirayɛliden yɛrɛ ye tigitigi. Namaramɔgɔ tɛ.” (Zan 1:47). Yezu tun b’a lɔn ko a ka kalanden tɔɔw fana ye hɔɔrɔnw ye. Nka, Natanayɛli ka hɔɔrɔnya y’a kabakoya. Natanayɛli tun ye mɔgɔ dafabali ye i ko anw. Nka, filankafoya tun t’a ka koow la ani a tun ye hɔɔrɔn ye koo bɛɛ la. O diyara Yezu ye ani a y’a tando o kosɔn. Tiɲɛn na, an bɛɛ b’a fɛ Yezu k’an jati o cogo la!
Yezu siɲɛ fɔlɔ ka Natanayɛli kunbɛn, a y’a fɔ ko nanbaramɔgɔ tɛ. Yala u be se k’o ɲɔgɔn fɔ an koo la wa? (dakun 9nan lajɛ).
10. Mun na an ka ɲi k’an janto an kumacogo la? (Zaki 1:26).
10 Jehova be koo minw ɲini an fɛ Zaburuw 15nan kɔnɔ, u fanba b’a yira an ka ɲi ka mɔgɔ wɛrɛw minɛ cogo min na. Zaburuw 15:3 b’a fɔ ko mɔgɔ min b’a fɛ ka to Jehova ka soo kɔnɔ, o tigi “te mɔgɔ tɔgɔjugu fɔ, a te kojugu kɛ a tɔɲɔgɔn na, a fana t’a sigiɲɔgɔn nɛni.” N’an t’an kumacogo kɔrɔsi, an be se ka koo jugu kɛ tɔɔw la ani Jehova tɛna sɔn an be to a ka soo kɔnɔ.—Zaki 1:26 kalan.
11. Ka mɔgɔ tɔgɔjugu fɔ, o kɔrɔ ko di? Mɔgɔ min b’o kɛ ani a tɛ nimisa, mun lo bena o tigi sɔrɔ?
11 Ka mɔgɔ tɔgɔjugu fɔ, Zaburu sɛbɛbaga kumana o koo la. Nka, o kɔrɔ ko di do? Tuma caaman na, o ye ka ngalon la mɔgɔ dɔ kan min be se k’a tigi tɔgɔ tiɲɛ. Mɔgɔ min be to k’o kɛ ani a tɛ nimisa, u be se k’a tigi gwɛn ka bɔ kafo kɔnɔ.—Zer. 17:10.
12-13. Koo minw na an be se k’an teriw tɔgɔ tiɲɛ an ɲina ma, u dɔw ye jumanw ye? (jaa lajɛ fana).
12 Zaburuw 15:3 b’an hakili jigi fana ko Jehova be minw bisimila a ka soo, olu tɛ koo jugu kɛ u tɔɲɔgɔn na ani u t’u teriw nɛni wala k’u tɔgɔ tiɲɛ. An be se ka mɔgɔ tɔgɔ tiɲɛ cogo di?
13 An be se ka mɔgɔ dɔ tɔgɔ tiɲɛ an ɲina ma, an kɛtɔ ka kunnafoni juguw jɛnsɛn a koo la. Miiri koo saba nunu na: 1) Balimamuso dɔ y’a ka cidenya baara lalɔ. 2) Balimacɛ dɔ n’a muso tɛ baara kɛra Betɛli la tugun. 3) Balimacɛ dɔ tɛ diinan mɔgɔkɔrɔ wala kɔrɔsigi ciden ye tugun. Yala a bɛnnin lo an k’a fɔ tɔɔw ye ko o balimaw ye koo jugu dɔ lo kɛ o lo kama u ka koow cogoya yɛlɛmana wa? N’a sɔrɔ o koow kɛra kuun dɔ lo kama an tɛ min kala ma. Ka fara o kan, Jehova be mɔgɔ min bisimila a ka soo kɔnɔ, o tigi “te kojugu kɛ a tɔɲɔgɔn na, a fana t’a sigiɲɔgɔn nɛni” wala k’a tɔgɔ tiɲɛ.
A ka nɔgɔ ka kunnafoni juguw jɛnsɛn tɔɔw koo la ani o be se ka yɛlɛma ka kɛ tɔgɔtiɲɛ ye (dakun 12-13nan lajɛ).
JEHOVA ƝƐSIRANBAGAW BONYA
14. Mɔgɔ min be Jehova ka soo, kɔrɔ juman na “Ala te minw fɛ, a fana t’o fɛ”?
14 Zaburuw 15:4 b’a fɔ Jehova teri koo la ko: “Ala te minw fɛ, a fana t’o fɛ.” An b’a lɔn cogo di ko mɔgɔ dɔ koo man di Ala ye? An tɛ se ka basigi an ka miiriyaw n’an diyanyekow kan k’a fɔ ko mɔgɔ dɔ koo man di Ala ye. Mun na do? Sabu an ye mɔgɔ dafabaliw ye minkɛ, an be bɛn ni mɔgɔ minw ye, o tigiw koo ka teli ka diya an ye. Nka an tɛ bɛn ni minw ye, o tigiw koo be gwoya an ye. K’a sɔrɔ Jehova “te minw fɛ,” olu dɔrɔn lo koo ka ɲi ka gwoya an ye (1 Kor. 5:11). O mɔgɔ dɔw ye nunu ye: minw be koo jugu kɛ ani u tɛ nimisa, minw b’an ka lannakow mafiɲɛya, wala minw b’a ɲini k’an ni Jehova ka teriya nagasi.—Talenw 13:20.
15. An be “Masaba ɲasiranbagaw boɲa” cogo minw na, u dɔ ye juman ye?
15 Zaburuw 15:4 b’a fɔ fana ko an ka “Masaba ɲasiranbagaw boɲa.” O la, an be sababuw ɲini ka Jehova teriw minɛ ni ɲumanya ani bonya ye (Ɔrɔm. 12:10). An be se k’o kɛ cogo minw na, u la dɔ kofɔra Zaburuw 15:4 kɔnɔ. O ye ko ‘n’an kalila koo minw na, an b’o kɛ, hali n’o b’an mako sa.’ N’an t’an ka layiduw dafa, o be tɔɔw dusu tiɲɛ (Mat. 5:37). Misali la, Jehova be minw bisimila a ka soo, u ye layidu min ta u furulon na, a b’a fɛ u k’o dafa. Bangebagaw be layidu minw ta u deenw ye, n’u b’u jija k’o dafa, o ka di Jehova ye fana. An be Ala n’an mɔgɔɲɔgɔnw kanu minkɛ, o b’an lasun k’an seko bɛɛ kɛ k’an ka layiduw dafa.
16. An be se ka Jehova teriw bonya cogo wɛrɛ juman na?
16 An be se ka Ala teriw bonya cogo wɛrɛ min na, o ye k’u ladon an ka soo ani k’an tɛgɛ labila k’u sɔn (Ɔrɔm. 12:13). N’an be wagati kɛ n’an balimaw ye ɲɛnagwɛkow sen fɛ, o b’a to an ni olu ani Jehova ka teriya be sabati. Ka fara o kan, n’an be an balimaw ladon an ka soo, an be Jehova lo ladegira.
KANA WARI KANU
17. Mun na Zaburuw 15nan kumana wari koo la?
17 A fɔra Zaburuw 15:5 kɔnɔ ko Ala be mɔgɔ min bisimila a ka soo, o tigi “te wari juru don tɔnɔ kama, a fana te fɛɛn minɛ ka mɔgɔ jalakibali ka tiɲɛ munumunu.” Mun na o Zaburu kumana wari koo la? Sabu n’an tɛ wari jati ka dama kɛɲɛ, an be se ka koo jugu kɛ tɔɔw la ani ka an ni Ala ka teriya tiɲɛ (1 Tim. 6:10). Bibulu sɛbɛwagati la, dɔw tun be u balima fantanw tɔɲɔ, u kɛtɔ ka juru don u la tɔnɔ kama. Ka fara o kan, kititigɛla dɔw tun be surafɛn minɛ walisa ka kiti tilenbali tigɛ mɔgɔ jalakibaliw kan. O koow ka gwo Jehova ye.—Ezek. 22:12.
18. An be se k’an yɛrɛ ɲininga mun ni mun lo la walisa k’a lɔn an be wari jati cogo min na? (Eburuw 13:5).
18 A ka ɲi an k’an yɛrɛ sɛgɛsɛgɛ k’a filɛ an be wari jati cogo min na. I yɛrɛ ɲininga ko: “Yala n’ ka teli ka miiri wari koo la ani n’ be se ka fɛɛn minw san n’a ye wa? Ni n’ ye juru ta mɔgɔ dɔ fɛ, yala n’ be mɛɛn ka sɔrɔ k’a sara sabu n’ b’a miiri ko a tigi mako t’a la wa? Ni wari be n’ fɛ, yala n’ b’a miiri ko n’ ka fisa ni tɔɔw ye ani a ka gwɛlɛ n’ ma k’u sɔn wa? Yala n’ b’a miiri ko ni wari ka ca balima dɔ fɛ, o kɔrɔ ko a be wari kanu ka tɛmɛ Jehova kan wa? Yala n’ be teriya kɛ ni waritigiw lo ye ka fantanw to yen wa?” A kɔrɔtanin lo an k’an yɛrɛ ɲininga o koow la sabu Jehova ye nɛɛmaba kɛ an ye a kɛtɔ k’an weele a ka soo kɔnɔ. N’an b’an yɛrɛ tanga wari kanuya ma, o bena an dɛmɛ ka to Jehova ka soo kɔnɔ. O la, Jehova tɛna an to yen abada!—Eburuw 13:5 kalan.
JEHOVA TERIW KOO KA DI A YE
19. Koo minw fɔra Zaburuw 15nan kɔnɔ, mun na Jehova b’a fɛ an k’u bɛɛ kɛ?
19 Zaburuw 15nan be laban ni layidu nin ye: “Mɔgɔ min be koo kɛ ten, o tigi te ben fewu.” (Zab. 15:5). O vɛrise b’a ɲɛfɔ kuun jɔnjɔn min kama Ala b’a fɛ an k’o Zaburu kɔnɔkumaw sira tagama. A b’a fɛ an ka ninsɔndiya sɔrɔ. O la, a be min ɲini an fɛ, n’an b’o kɛ, o b’an latanga ani an ka ɲɛnamaya kɛcogo be fisaya.—Ezayi 48:17.
20. Jehova be minw bisimila a ka soo, olu jigi b’a la ka mun lo sɔrɔ?
20 Jehova be minw bisimila a ka soo, olu jigi b’a la ka siniɲasigi ɲuman sɔrɔ. Kerecɛn mɔlen kantigiw bena taga sankolo la, yɔrɔ min na Yezu ye “yɔrɔ labɛn” u ye (Zan 14:2). Minw jigi b’a la ka ɲɛnamaya kɛ dugukolo kan, olu kɔrɔtɔnin lo Yirali 21:3 kɔnɔnakumaw ka dafa. Nɛɛmaba lo k’a ye ko Jehova b’a fɛ an ka to a ka soo kɔnɔ fɔɔ abada!
DƆNKILI 39 Une bonne réputation auprès de Dieu (Tɔgɔ ɲuman Ala ɲɛɛ kɔrɔ)
