1. Didie ke Psalm 15:1-5 ekeme ndin̄wam nnyịn?

 KE IBUOTIKỌ emi ekebede, ima ikpep ke mbon emi ẹyakde idem ẹnọ Jehovah ẹnyụn̄ ẹdide ata ufan esie ẹkeme ndidi isenowo ke ndamban̄a tent esie. Edi nso ke ikeme ndinam man idot ndidi isenowo Jehovah? Awak se Psalm 15 etịn̄de aban̄a n̄kpọ oro. (Kot Psalm 15:1-5.) Psalm oro etịn̄ mme akpan n̄kpọ emi ikemede ndinam man ẹn̄wam nnyịn inen̄ede ikpere Abasi.

2. Ikere ke nso ikanam David emi ekewetde Psalm 15 etịn̄ aban̄a tent Jehovah?

² Ntọn̄ọ ntọn̄ọ Psalm 15 ọdọhọ ntem: “O Jehovah, anie edidi esen ke tent fo? Anie edidụn̄ ke edisana obot fo?” (Ps. 15:1) Enyene ini emi tent utuakibuot ekesidude ke Gibeon. Ini David emi ekewetde Psalm oro eketịn̄de aban̄a “tent” Jehovah, etie nte tent oro okodụk enye ekikere. David ama etịn̄ n̄ko aban̄a “edisana obot” Abasi. Etie nte enye eketịn̄ aban̄a Zion emi okodude ke Jerusalem. Ndito usụk usụk Gibeon n̄ka Zion ekedi n̄kpọ nte kilomita duop. Ke Zion oro ke David okowụk tent emi ẹkesịnde ekebe ediomi tutu ẹbọp temple emi ẹdimende enye inịm; owo idịghe ẹmen ẹka mi, ẹmen ẹka ko.​—2 Sam. 6:17.

3. Ntak emi ikpoyomde se Psalm 15 etịn̄de an̄wan̄a nnyịn? (Se ndise n̄ko.)

³ Imọdiọn̄ọ ke ibat ibat nditọ Israel ẹkesinam utom ke tent utuakibuot, ke owo ifan̄ kpọt ẹkedụk esịt itie emi ẹkenịmde ekebe ediomi ke tent oro. Edi kpukpru nti ikọt Jehovah emi ẹkedide ufan esie ẹnyụn̄ ẹkade iso ẹdi ẹma ẹkeme ndidi  isenowo ke ndamban̄a tent Jehovah. Se idọn̄de kpukpru nnyịn edi oro. Psalm 15 asiak ndusụk edu emi ọfọnde inyene man ika iso idi ufan Jehovah.

SAN̄A NTE ỌFỌNDE AMA NYỤN̄ NAM SE INENDE

4. Inam didie idiọn̄ọ ke ndina baptism idịghe n̄kukụre n̄kpọ emi Jehovah oyomde inam man idi ufan esie? (Isaiah 48:1)

⁴ Psalm 15:2 ọdọhọ ke ufan Abasi edi “owo eke asan̄ade nte ọfọnde ama onyụn̄ anamde se inende.” Ikọ iba oro, “asan̄ade” ye “anamde” ẹwụt ke idịghe n̄kpọ ini kiet. Edi ndi imekeme ndinen̄ede ‘nsan̄a nte ọfọnde ama’? Ih, imekeme. Idụhe eke ọfọnde ama, edi edieke inamde ofụri se ikemede man ikop uyo Jehovah, enye ayada nnyịn nte mbon emi ‘ẹsan̄ade nte ọfọnde ama.’ Ima iyak idem inọ Abasi inyụn̄ ina baptism, ini oro ke isan̄ nnyịn ye Abasi ọtọn̄ọ. Ke eyo Bible, ikọwọrọke ke owo ama ededi eyen Israel, ke enye odot ndidi esenowo Jehovah idahaoro. Ndusụk nditọ Israel ẹma ẹsikot Abasi, edi mmọ ikokotke enye “ke akpanikọ ye ke edinen ido.” (Kot Isaiah 48:1.) Akana nditọ Israel emi ẹkenen̄erede ẹyom ndidi isenowo Jehovah ẹdiọn̄ọ se Jehovah oyomde mmọ ẹnam, ẹnyụn̄ ẹnam n̄kpọ oro. Ukem oro ke edi mfịn. Edieke iyomde ndinen̄ede n̄kpere Abasi, ididịghe ima ina baptism idi Ntiense Jehovah enye okụre ke oro, ana ika iso ‘inam se inende.’ Enye oro esịne nso ye nso?

5. Ndikop uyo Jehovah ke kpukpru n̄kpọ ọwọrọ nso?

⁵ Ke enyịn Jehovah, ‘ndisan̄a nte ọfọnde ama’ ndinyụn̄ ‘nnam se inende’ idịghe ndika mbono esop kpukpru ini kpọt. (1 Sam. 15:22) Ana inen̄ede idomo ndikop uyo Abasi kpukpru ini idem ke ini idude ikpọn̄. (N̄ke 3:6; Eccl. 12:13, 14) Edi akpan n̄kpọ nnyịn ndidomo ndikop uyo Jehovah idem ke mme n̄kpọ emi ẹtiede nte n̄kpri n̄kpri n̄kpọ, ke inyeneke se ẹdide. Nnyịn ndinam ntre owụt ke ima  enye ke ofụri esịt, oro oyonyụn̄ anam enye enen̄ede ama nnyịn.​—John 14:23; 1 John 5:3.

6. Mme Hebrew 6:10-12 owụt ke nso idi akpan n̄kpọ ikan nti n̄kpọ ekededi emi ima ikananam ke ini edem?

⁶ Jehovah enen̄ede ama se ikanamde inọ enye ke ini edem. Edi idịghe nti n̄kpọ emi ikanamde ke ini edem kpọt ẹnam idot ndika iso ndi isenowo ke tent Jehovah. Imenen̄ede ikụt oro ke Mme Hebrew 6:10-12. (Kot.) Jehovah ifreke nti n̄kpọ emi ikanamde ke ini edem. Edi enye oyom ika iso inam n̄kpọ inọ enye ke ofụri esịt “tutu esịm utịt.” Enye eyedi ufan nnyịn ke nsinsi nsinsi “edieke nnyịn mîkpaha mba.”​—Gal. 6:9.

TỊN̄ AKPANIKỌ KE ESỊT FO

7. Nnyịn nditịn̄ akpanikọ ke esịt nnyịn ọwọrọ nso?

⁷ Owo emi oyomde ndidi esenowo ke tent Jehovah ana edi owo emi “etịn̄de akpanikọ ke esịt esie.” (Ps. 15:2) Enye oro idịghe nditre ndisu nsu kpọt. Jehovah oyom yak edi se ededi emi itịn̄de m̀mê inamde n̄kari ndomokiet isịneke. (Heb. 13:18) Ata akpan n̄kpọ edi oro “koro owo abian̄a edide mbubiam ke iso Jehovah, edi Enye edi ata ufan ye ndinen owo.”​—N̄ke 3:32.

8. Nso utọ uwem ke nnyịn mîyomke ndinyene?

⁸ Mbon emi ‘ẹsitịn̄de akpanikọ ke esịt mmọ’ isidịghe mme owo ẹkpedu mmọ ẹnịm ibet Abasi, edem ekpedịbe mmọ ẹbiat ibet Abasi. (Isa. 29:13) Mmọ isinamke n̄kpọ nyakri nyakri. Owo nyakri ekeme nditọn̄ọ ndikere ke ndusụk ibet Jehovah inyeneke ibuot. (Jas. 1:5-8) Ke n̄kpọ emi enye ekerede ke inen̄ekede inyene se edide, enye ekeme nditre ndinam n̄kpọ nte Jehovah ọdọhọde ẹnam. Ekem, ama etie nte ke enye ibọhọ ufen ke ibet Abasi emi enye akabiatde do, enye ekeme ndikpụp esịt akanam se idiọkde ikan oro. Ananam do, enye ke ọdọhọ idemesie ke imọ ke inam n̄kpọ Jehovah, edi Jehovah inyịmeke utuakibuot esie. (Eccl. 8:11) Nnyịn iyomke nditie ntre. Iyom ndinam akpanikọ ke kpukpru n̄kpọ.

9. Se iketịbede akpa ini emi Jesus okosobode ye Nathanael ekeme ndikpep nnyịn nso? (Se ndise n̄ko.)

⁹ Se iketịbede akpa ini emi Jesus okosobode ye Nathanael ekpep nnyịn ntak emi ọfọnde  inyene eti esịt. Ini Philip ekemende Nathanael ufan esie yak edisobo Jesus, n̄kpọ n̄kpaidem ama etịbe. Kpa ye edide akananam Jesus ikosoboke ye Nathanael, Jesus ama ọdọhọ ete: “Sese, ata eyen Israel, emi abian̄a mîdụhe enye ke esịt.” (John 1:47) Jesus akada kpukpru mme mbet esie nte mbon akpanikọ, edi esịt akpanikọ emi Nathanael ekenyenede emi Jesus okokụtde, utọ oro ikodụhe kan̄a. Ukem nte nnyịn, Nathanael ikọfọnke ima. Edi enye ikedịghe mbubịk; ama esinam akpanikọ ke kpukpru n̄kpọ tutu esịm akpatre mben̄e n̄kpọ ntem. Jesus ama ama ido esie oro onyụn̄ otoro enye ke oro. Jesus ekpetịn̄ ukem n̄kpọ oro aban̄a nnyịn ikpedịghe ekpri ukpono ke ekpedi-o!

10. Ntak emi ikpekpemede-kpeme se itịn̄de? (James 1:26)

¹⁰ Ata ediwak se idude ke Psalm 15 aban̄a nte ikemede ndinam n̄kpọ ye mbon en̄wen. Psalm 15:3 ọdọhọ ke owo emi edide esenowo ke tent Jehovah “idọkke edidọk ke edeme esie. Inamke nsan̄a esie baba idiọk kiet, inyụn̄ itịn̄ke ikọ esuene idian owo emi enye etịmde emehe.” Ikpọdọk mbon en̄wen edidọk mîdịghe itịn̄ ikọ esuene idian mmọ, imekeme ndinen̄ede mbiat mmọ enyịn̄ ndien oro ekeme ndinam nnyịn idotke ndidi aba isenowo ke tent Jehovah.​—Kot James 1:26.

11. Nso idi edidọk? Ẹsinam nso owo emi esịnede ke esop ọdọk edidọk imaha ndikabade esịt?

¹¹ Andiwet Psalm oro ama asiak edidọk ke otu mme n̄kpọ emi enye akabatde. Edidọk edi nso? Edi owo nditịn̄ ikọ emi mîdịghe akpanikọ mban̄a owo en̄wen, emi ekemede ndibiat owo oro enyịn̄. Mme owo ẹkpesịne ke esop ẹdọk edidọk imaha ndikabade esịt, ẹsisio utọ mme owo oro ẹfep ke esop.​—Jer. 17:10.

12-13. Tịn̄ ndusụk ini emi ikemede ndidue ntịn̄ ikọ esuene ndian mme ufan nnyịn. (Se ndise n̄ko.)

¹² Psalm 15:3 eti nnyịn n̄ko ke isenowo Jehovah isinamke nsan̄a mmọ m̀mê mbọhọidụn̄ mmọ idiọk ndomokiet, isinyụn̄ itịn̄ke ikọ esuene idian owo emi mmọ ẹtịmde ẹmehe  m̀mê mme ufan mmọ. Didie ke ikeme nditịn̄ ikọ esuene ndian mme ufan nnyịn?

¹³ Nte ikemede ndidue nnam oro edi nditịn̄ n̄kpọ emi mîfọnke mban̄a owo. Oro ekeme nditịbe: (1) ini sista nnyịn mîdịghe aba asiakusụn̄ ofụri ini, (2) ini ebe ye n̄wan emi ẹkesidude ke Bethel mîdụhe do aba, m̀mê (3) ini brọda nnyịn mîdịghe aba ebiowo m̀mê asan̄autom unamutom. Ndi ọkpọfọn ikere ke etie nte ntem ye ntem ẹkedi ntak, ekem imen se ikerede oro isan̄a itịn̄ inọ mbon en̄wen? Mme ntak emi ẹkenamde ekededi ke otu owo ita oro okûdi aba se enye ekedide ẹkeme ndiwak, nnyịn inyụn̄ idiọn̄ọke. Imenen̄ede ikụt ke owo emi edide esenowo ke tent Jehovah “[isinamke] nsan̄a esie baba idiọk kiet, inyụn̄ itịn̄ke ikọ esuene idian owo emi enye etịmde emehe.”

KPONO MBON EMI ẸBAKDE JEHOVAH

14. Ndisịn “owo ekededi emi edide oburobụt owo” ọwọrọ nso?

¹⁴ Psalm 15:4 ọdọhọ ke ufan Jehovah “[esisịn] owo ekededi emi edide oburobụt owo.” Didie ke ikeme ndinam oro? Sia nnyịn mîfọnke ima, nnyịn ikemeke ndida ekikere idem nnyin m̀mê se imade mbiere m̀mê owo edi oburobụt owo m̀mê idịghe. Ntak-a? Imekeme ndima mbon emi mîsọn̄ke nnyịn ndidian idem inyụn̄ ikabade isua mbon emi ẹsinamde se iyatde nnyịn. Ke ntak oro, mbon emi Jehovah ọdọhọde ke mmọ ẹdi “oburobụt” owo kpọt ke nnyịn ikpesịn. (1 Cor. 5:11) Oro esịne mbon emi ẹnamde se idiọkde imaha ndikabade esịt, mbon emi ẹdade se inịmde ye se ikpepde ẹnam n̄kpọ imam, m̀mê mbon emi ẹdomode ndinam nnyịn ikûkpere Jehovah.​—N̄ke 13:20.

15. Nso idi usụn̄ kiet emi ikemede ndikpono “mmọ eke ẹbakde Jehovah”?

¹⁵ Ke Psalm 15:4 ama ọkọdọhọ yak isịn owo ekededi emi edide oburobụt owo, enye ama ọdọhọ yak ikpono “mmọ eke ẹbakde Jehovah.” Ntre imesiyom nsio nsio usụn̄ ndifọn ido ye mme ufan Jehovah nnyụn̄ n̄kpono mmọ. (Rome 12:10) Didie? Psalm 15:4 owụt usụn̄ kiet emi ikemede ndinam oro ete ke owo emi edide esenowo ke tent Jehovah ama ọn̄wọn̄ọ n̄kpọ, ke enye isikpụhọkede ọkpọkọm n̄kpọ oro ifọnke ye enye. Ima in̄wọn̄ọ ke iyanam n̄kpọ ekem nnyịn inamke, oro ekeme ndisịn mbon en̄wen ke mfịna. (Matt. 5:37) Ke uwụtn̄kpọ, Jehovah oyom isenowo esie ẹnam se mmọ ẹken̄wọn̄ọde ẹnọ iban mmọ ye mme ebe mmọ ke usen ndọ mmọ. Esinem Jehovah mme ete ye eka ẹma ẹdomo ndinam se mmọ ẹken̄wọn̄ọde ẹnọ nditọ mmọ. Ima emi imade Abasi ye mbọhọidụn̄ nnyịn ẹsinam idomo nte ikekeme ndinam se ikọn̄wọn̄ọde.

16. Nso idi usụn̄ en̄wen emi ikemede ndikpono mme ufan Jehovah?

¹⁶ Usụn̄ en̄wen emi ikemede ndikpono mme ufan Abasi edi nnyịn ndisikama mme owo esen nnyụn̄ ntat ubọk. (Rome 12:13) Ima inyene ini isitie ye nditọete nnyịn irenowo ye iban ineme, ibre, isak, ita, in̄wọn̄, iyenen̄ede ikpere mmọ ye Jehovah. N̄kpọ en̄wen edi ke ima ikama mme owo esen, ikpebe Jehovah.

KÛMA OKỤK

17. Nso inam ẹtịn̄ n̄kpọ ẹban̄a okụk ke Psalm 15?

¹⁷ Psalm oro ọdọhọ ke esenowo Jehovah “[isinọhọ] okụk esie ke ebuọt iyom udori, inyụn̄ ibọhọ ubọkedem ndinam owo eke mîduehe idiọk.” (Ps. 15:5) Nso inam ẹtịn̄ ẹban̄a okụk ke Psalm emi edide ufan̄ikọ 5 do kpọt? Ntak edi ke nnyịn mîdaha okụk nte akpanade ida, imekeme ndidue nnam se mîkpanaha inam ye mbon en̄wen inyụn̄ idian̄ade ikpọn̄ Abasi. (1 Tim. 6:10) Ke eyo Bible, ndusụk owo ẹma ẹsibọ nditọete mmọ emi ẹdide ubuene  udori ke okụk emi ẹkebuọtde mmọ. Ata idiọk uwem ekedi oro. Efen n̄ko edi ke ndusụk mme ebiereikpe ẹma ẹsibọ ubọkedem ẹnyụn̄ ẹnam ikpe etịp mbon emi mîkeduehe. Jehovah asasua utọ mme n̄kpọ oro.​—Ezek. 22:12.

18. Mme mbụme ewe ẹkeme ndin̄wam nnyịn itịm ise m̀mê isida didie okụk? (Mme Hebrew 13:5)

¹⁸ Ọfọn itịm ise m̀mê isida didie okụk. Bụp idemfo: ‘Ndi mmesiwak nditie n̄kere mban̄a okụk nnyụn̄ nsikere se n̄kpedepde n̄kpenyene okụk? Edieke owo ọbuọtde mi okụk, ndi esibịghi mbemiso n̄kpede enye sia n̄kerede ke owo oro iyomke okụk oro aba? Ndi ami ndinyene okụk esinam n̄kere ke mmedi n̄kpọ, ndi esinyụn̄ ọsọn̄ mi nditat ubọk? Brọda m̀mê sista nnyịn ekpenen̄ede enyene okụk, ndi mmesikere ke utọ owo oro enen̄ede ama okụk akan Jehovah? Ndi ndi ufan ye mme imọ owo, amaedi mme ubuene ami ndụkke ndụk ye mmọ?’ Jehovah ọdọhọ idi isenowo esie inyụn̄ idịghe ekpri n̄kpọ ke enye anam oro ọnọ nnyịn. Edieke ikụtde ite ke nnyịn imaha okụk, iyaka iso idi ufan esie. Ima inam ntre, Jehovah idikpọn̄ke nnyịn tutu amama!​—Kot Mme Hebrew 13:5.

JEHOVAH AMA MME UFAN ESIE

19. Nso idi akpan ntak emi Jehovah oyomde inam se idude ke Psalm 15?

¹⁹ Un̄wọn̄ọ emi odude ke akpatre ufan̄ikọ ke Psalm 15 oro ọdọhọ: “Owo eke anamde mme n̄kpọ emi idisehekede tutu amama.” (Ps. 15:5) Ke itie oro, andiwet Psalm oro anam ikụt akpan ntak emi Abasi oyomde inam kpukpru se idude ke Psalm oro. Abasi oyom ikop inemesịt. Ntre, enye esiteme nnyịn se ikpanamde emi edinamde enye ọdiọn̄ nnyịn onyụn̄ ekpeme nnyịn.​—Isa. 48:17.

20. Nso ke isenowo Jehovah ẹkeme ndidori enyịn ndikụt?

²⁰ Isenowo Jehovah ẹkeme ndidori enyịn ndikụt ini iso emi uwem edinemde mmọ etieti. Mbon emi ẹyetde aran emi ẹsọn̄ọde ẹda ye Abasi ẹyekodu ke “ediwak ebietidụn̄” emi Jesus eketịmde ọnọ mmọ ke heaven. (John 14:2) Mbon emi ẹdoride enyịn ndidu uwem ke isọn̄ ẹdori enyịn ndikụt nte se ẹn̄wọn̄ọde ke Ediyarade 21:3 osude. Kpukpru nnyịn ida ke edi ata n̄kpọ ukpono Jehovah ndikot nnyịn ididi mme ufan esie, ndinyụn̄ ndi isenowo ke tent esie ke nsinsi!