AYEGHLE 24
ZA 24 Zaghane nkôô Jehôva
Ntsinighan ôsu ya bo beyeng Jehôva mbèmbèè !
« A Jehôva, za a ye bo n’neng ye ébem duè été ? »(BYA 15:1).
É DZAM BIA YE YEN
Bia ye yen é mam bia yiène bo naa bi tsini naa bia baghle angom dèè ya Jehôva, ye aval a kômô naa bi tobe ya menvuiñ mèñ mevoo.
1. Amu dzé bi ne ñong abuan éyong bia yeghe nten Bya 15:1-5 ?
AYEGHLE é ndaghe man lôt di, bi va yeghe naa é bôt ba ve Jehôva éning deba ye baghle mbemba élat ya ñe, ébe be ne bo beyeng be ye ébem dèñ. Ve, za dzam bia yiène bo naa bi bo beyeng be ye ébem dèñ ? Nten Bya 15 wa ye bia yeghele abuiñ mam nfa té (A lang Bya 15:1-5). Nten Bya té, wa lere bia é mam bia yiène bo naa angom biabe Jehôva é tsini naa da ke ôsu.
2. Za dzam David a mbe a bele ôsiman éyong a nga kobe adzô ébem Jehôva ?
2 Nten Bya 15, wa sum ya minsili mi : « A Jehôva, za a ye bo n’neng ye ébem duè été ? Za a ne tobe nfufup nkôô wiè ? » (Bya 15:1) Éyong a nga tiè adzô « ébem » Jehôva, ntsili David a nga tem ngeng ézing tabernáculo nge ki tabernacle, éñi a mbe metam Guibéôn. David a nga tu fe « nfufup nkôô » Nzame, ngeng ézing é tem nkôô Sión ya Jerusalén. Ébe abuiñ bekilometros nfa nkèñ ya Gibeón, vôm té, éwô David a nga long moan ébem, naa a tele arca ye élat ébem té été, yakekuiñ éyong a ye bele é ña étobgha dèñ (2 Sam. 6:17).
3. Amu dzé bia yiène tugha wokh é mam ba tiè nten Bya 15 ? (A daghe fe évaghle).
3 É ne été naa, abuiñ bisraelitas béé mbe ki ke sèñ a tabernáculo, nge ki añii ébem été, é vôm arca ye élat a mbe a tele. Besôsôe bebo-bisèñ Jehôva besese, be mbe bo beyeng be ye ébem Jehôva, ye tsini ôsu a bo menvuiñ mèñ. A ne é dzam bia besese bia kômô bo. Nten Bya 15, wa dzô bia me fulu bia yiène bele, naa bi tsini ôsu ye tobe mengom Jehôva.
É mbe ébubu akal bisraelitas be mbe metam David naa be siman é dzam a tobe n’neng ye ébem Jehôva é nga yili (A daghe abong 3)
A WULU KAA ÉKOP YE BO É DZAM É NE SÔSÔE
4. Aval avé bia yem naa nduban wéé se ki é dzam étam Jehôva a yane naa bi bo ? (Esaïe 48:1)
4 Nten Bya 15:2, ba dzô été naa, é môr a ne angom Jehôva, a ne « é môr a wulu kaa ékop, é bo é mam me ne sôsôe. » Bifiè « a wulu » ye « a bo », bia yili naa, môr a bo dzam ézing mban, ye tsini naa a bo de. Ve, ye môr a ne faa ‘wulu kaa ékop’ ? Ôwé. Amben moan môr ézing éé se ki kaa ékop, Jehôva a yen naa bia « wulu kaa ékop », éyong bia ve mengu’u mèè mesese, naa bia bo ñe mewokh. Éyong bia ve Jehôva éning dèè ye duban, vèè, éñe bia sum ékena dèè ya Nzame. Éfônan, metam me ya Bible, se ki amu môt ézing a mbe moan israelita, éde é mbe ve naa a bo n’neng Jehôva. Bevoo be mbe bé wumu ñe ve, « se ki ya bebela ye sôsôe » (A lang Esaïe 48:1). É bisraelitas be mbe sôsôe, be nga yiène bo metsing Jehôva mewokh ya béé mo. Aval dèè fe, naa bi bele ayebe Jehôva ému, biaa yiène ki fave ñong bautismo ye kôan ya Bengaa Jehôva. Bia yiène ke ôsu naa « bia bo é mam me ne sôsôe. » Dzam té da yili yè ?
5. A bo Jehôva mewokh ébe mam mesese da yili ya ?
5 É mis Jehôva, bifiè « a wulu kaa ékop » ye « a bo é dzam é ne sôsôe », biaa yili ki fave naa, bia ke bisulan bi ye ékôan bia (1 Sam. 15:22). Bia yiène ve mengu’u naa bi bo Nzame mewokh ébe minfa mise mi ye éning dèè, amben éyong bi ne étam (Mink. 3:6 ; Eccl. 12:13, 14). É ne fe éban naa bi bo Jehôva mewokh, amben ébe boan bemam. Éyong bia bo de, bia lere naa bia dzing faa ñe, dzam té da ve naa, ña fe a bira bia dzing (Jean 14:23 ; 1 Jean 5:3).
6. Aval ane nten Behébreu 6:10-12 wa lere de, za dzam da dang éban a lôt mimboan mi sôsôe misese bi nga bo melu ô nvus ?
6 Jehôva a bira dzing é mam mesese bi nga bo akal dèñ melu ô nvus. Ve, se ki mimboan mi sôsôe mi ye ô nvus étam, émie mi ne ve naa, bi tsini naa bia bo beyeng be ye ébem Jehôva ému. Dzam té éde bia tugha yen nten Behébreu 6:10-12 (A lang). Jehôva aa vuène ki é mbemba bemam bi nga bo melu ô nvus. Ve, a yi naa, bi ke ôsu ye sèhane ñe, ya « n’nem wèè ôse. » A ye tobe angom dèè mbèmbèè « nge bi bo kaa sili mo ôsi » (Begal. 6:9).
KOBEGHE BEBELA A N’NEM WIÈ ÉTÉ
7. A kobe bebela a n’nem wèè été da yili ya ?
7 É môr a kômô bo n’neng ye ébem Jehôva, « a yiène kobe bebela a n’nem wèñ été » (Bya 15:2). Daa yili ki fave naa, aa yiène ki kobe minèè. Jehôva a kômô naa bi bo bebela nfa é mam mesese bia dzô ye bo (Behéb. 13:18). Dzam té, é ne éban, amu « Jehôva a vini é bôr ba chale aval bôr be ne, ve, a tobe angom ya é bôr be ne sôsôe » (Mink. 3:32).
8. Abo dulu avé bia yiène saalé ?
8 É bôt ba ‘kobe bebela min’nem mièba’ été, baa bo ki Jehôva mewokh fave éyong é bôr bevoo ba yen bo, éyong té ba bo é mam mene abé éyong be ne étam (Esaïe 29:13). Baa wulu ki mesu mebèñ. É môr a wulu ya mesu mebèñ, a ne sum naa a bele bisô nfa n’yeman wa so ébe melepgha Jehôva (Jacq. 1:5-8). A ne fe sum naa a bo Jehôva melo ébe é mam émièn a tem naa maa dang ki éban. Ye de, nge a wôrane naa, é dzam é ne abé daa biane ki ñe éyong a bo Jehôva melo, a ne sum naa a bo é mam ma bera dang abé. Amben a tem naa a sèhane Nzame, Jehôva aa yebe ki ékang dèñ (Eccl. 8:11). Ve bia, bia kômô bo sôsôe ébe mam mesese.
9. Za dzam é nga boban éyong Yésu a nga tuban Natanael éyong ôsua, ye naa, za ayeghle bia ñong été ? (A daghe fe évaghle).
9 Bi ne yeghe éban é ne a bele n’nem ô ne sôsôe, éyong bia binane nlang wa tsinane atubane ôsua Yésu ba Natanael. Éyong Felipe nge ki Philipe a nga ke angom dèñ Natanael naa a ke tubane Yésu, éyaghane dzam ézing, é nga boban. Amben abong té Yésu aa be ki tare tubane Natanael, Yésu a nga dzô naa : « Yeneghan é moan israelita a ne kaa medukh » (Jean 1:47). Yesu a mbe é yen beyeghe bèñ bevoo ane é bôt be ne bebela, ve, a nga yen fe naa Natanael, ña mbe fe édedèè bebela. Ane bia, Natanael a mbe môt minsem, ve, aa mbe ki é môr a mbe medukh, nge ki é môt a mbe a bele mesu mebèñ. A mbe fe bebela ébe é mam mesese mèñ. Éde Yésu a nga dzing a tèè ñe ye saghe ñe. Ke é né mbemba dzam ébe bia, naa Yésu a yen aval dèè fe nfa wèè !
Felipe a lere Yésu mvuiñ dzèñ Nathanael, éñi a ne kaa medukh. Ye be ne fe dzô aval dèè nfa wèè ? (A daghe abong 9)
10. Amu dzé bia yiène tobe nkee ya é mam bia dzô ? (Jacques 1:26)
10 Abuiñ mam me ne ntsilan nten Bya 15, ma larane ye aval bia yiène ñong é bôr bevoo. Nten Bya 15:3 wa dzô naa n’neng ye ébem Jehôva « aa bo ki bibôra ya ôyem wèñ, kaa ki bo é môt mboo mbia dzam ye kaa ki ve biyôla menvuiñ mèñ mvîn ». Nge bia bo é bôr bevoo bibôra, dzam té é ne be ve édedèè n’nem mintèñ, ye likh bia naa, bi taa bera bo beyeng be ye ébem Jehôva (A lang Jacques 1:26).
11. Dzé é ne ébôra, ye naa, za dzam da ye kuiñ é môr a bo bibôra kaa naa a dzôban ?
11 Ntsili bya a nga tu é mam ma tsinane ébôra. Ébôra é ne dzé ? Ébôra é ne éyong môt a kobe minèè nfa ye naa a ve é môt mboo éyôla mvîn. Nge moadzang ézing a ve é bôt bevoo biyôla mvîn ékôan été, éé se ki fe bera bo moan Bengaa (Jér. 17:10).
12-13. Bitéñ bi vé bi ne likh naa bi bo menvuiñ mèè bibôra kaa naa bi va kômô de ? (A daghe fe évaghle).
12 Nten Bya 15:3 wa simane fe bia naa, beyeng Jehôva baa bo ki é bôr bevoo é mam me ne abé, ye naa, baa ve ki mengom meba biyôla mvîn. Dzam té é ne yili ya ?
13 Bi ne sia bôre môr dzam, kaa naa bi va kômô de, éyong bia kane é mam me ne abé nfa wèñ. Éfônan : édi (1) kal dzaa ézing da tele ngum aval ésèñ minkanghle, édi (2) minlughane mia tele ésèñ deba ô Bethel, nge ki édi (3) moadzang ézing aa sèñ ki fe ane mvene nge ki amvene. É ne bo abé, nge bia ke bia kane é bobedzang ye bekal baa bevoo naa, nge be va dzimle meyem meba, é ne amu be va bo é dzam é ne abé. Bebela a ne naa, biaa yem ki mekalgha me va ve naa étèñ deba é tsen, ya fe naa, n’neng ye ébem Jehôva « aa bo ki bibôra ya ôyem wèñ, kaa ki bo é môr mboo mbia dzam, ye kaa ki ve biyôla menvuiñ mèñ mvîn. »
É ne ébubu naa be mièman minèè ébe é bôr bevoo, éyong té dzam té é ne sughlane bo ébôra (A daghe mebong 12-13)
A VE É BÔR BA KO JEHÔVA WONG NGANG
14. Lereghe aval beyeng Jehôva ba tep « é môr ase a bo é mam me ne kaa éban. »
14 Nten Bya 15:4 wa dzô naa, angom Jehôva « da tep é môr asese a bo é mam me ne kaa éban. » Aval avé bi ne de bo ? Bii se ki kikh naa môr ôsi môr ôkè a bo é mam me ne kaa éban fave ya n’yenan mam wèè étam. Amu dzé ? Amu naa bi ne bôr a minsem éde da ve naa, bi ne dzing bitèè é bôr bia tem naa bia bebe bi ne ébubu a wôghan, ve biaa dzing ki éba bevoo amu naa ba tobe bia abé. Mekalgha meté éme ma ve naa, bia yiène tep é bôr besese Jehôva a yen naa « ba bo é mam me ne kaa éban » (1 Becor. 5:11). Bia lang été, é môr a bo abé kaa naa a dzôban, é môr a biane mbunan wèè ya é mam bia bunu, nge ki faa é bôr ba dzeng naa ba ndaman élat dèè ya Jehôva (Mink. 13:20).
15. Aval avé bi ne ve « é bôt ba ko Jehôva wong » ngang ?
15 Nfa mboo ki, nten Bya 15:4 wa sili bia naa, bi ve « é bôr ba ko Jehôva wong » ngang. Akal té, éde bia dzeng mefakh mesese naa, bi lere mengom Jehôva mbemba fulu ye ngang (Bero. 12:10). Aval avé ? Aval évoo bi ne de bo bi kuane de nten Bya 15:4, é vôm wa dzô naa n’neng ye ébem Jehôva « a dzale é mam mese a kiagh, amben aa wun ki dzôm été. » Bi ne ve é bôr bevoo n’nenm mintèñ, éyong bia dzale ki mengiagh mèè (Mat. 5:37). Éfônan, Jehôva a yane naa beyeng bèñ be ne minlughan be kang é ngiagh be nga bo. Jehôva a ne fe mevakh, éyong a yen ane bebyèñ ba ve mengu’u naa be dzale mengiagh ba bo é boan beba. Amu bia dzing Jehôva ya é bôt bevoo, bia ye ve mengu’u mèè mesese, naa bi dzale mengiagh bia bo.
16. Aval avé éfe bi ne ve mengom Jehôva ngang ?
16 Aval afe bi ne lere mengom Jehôva ngang, é ne éyong bi ne añep ye akap (Bero. 12:13). Éyong bia lôt éyong ya bobedzang ye bekal bèè, da vole bia naa bi tugha wônô élat bia bebe, ya fe édi Jehôva. Ya fe naa, éyong bia lere añep, bia vu Jehôva.
KEGHAN ÔSU YE BO KAA BELE ÉDZING AKAL MONO
17. Amu dzé nten Bya 15 wa kobe adzô mono ?
17 Bia lang naa, n’neng ye ébem Jehôva « aa kôlô ki é mono wèñ ya ôba, ye naa, aa yebe ki ébuale zee » (Bya 15:5). Amu dzé nten Bya té, wa tiè adzô mono ? Amu naa, nge bia dang kele n’nem ôyô adzô mono, é ne ve naa mono éñe a dang tobe éban asu dèè a lôt é bôr bevoo, ye ndaman élat dèè ya Nzame (1 Tim. 6:10). Metam me ya Bible, bôr bézing be mbe béé buane minjijèñ bobeñang ya bekal beba, bé kôlô be mono ya ôba. Ya fe naa, bekikh minsang be mbe bé yebe ébuale zee, éde é mbe dé ve naa, be kikh bikuar-kuat minsang. Jehôva a vini aval mimboan mité (Ézéch. 22:12).
18. Za minsili bi ne sili bia bebién naa bi yem aval avé bia yen mono ? (Behébreu 13:5)
18 Bia yiène tugha fas bia bebién, ye yem é dzam bia simane nfa mono. Silighane mia bebién minsili mi : ‘Ye me wôla siman mono ya ébiôm a ne som ? Nge me sili môt naa a kôlô me mono, ye me ne ndzukh a bulane ñe mono té, mé tem naa aa dang ki ñe éban ? Éyong me bele mono ye da ve me naa me simane naa ma dang é bôt bevoo ? Ye é ne ndzukh ébe ma naa me tobe akap ya é bôt bevoo ? Ye ma simane naa, nge bobedzang ya bekal bam befe be bele abuiñ mono, é ne amu naa édzing be bele akal mono, da dang édzing deba akal Jehôva ? Ye ma kômô lat angom fave ya é bôt be bele abuiñ mono, méé tep ki angom é bôr béé bele ki mono ?’ É ne édedèè éban naa bi sili bia bebién minsili mité, amu bi va bele môra maa y’a bo beyeng Jehôva. Bi ne tsini naa bia baghle môra maa ya bo beyeng Jehôva, fave nge biaa bele ki édzing mono. Nge bi bo de, Jehôva aa ye ki bia vaghle lame ! (A lang Behébreu 13:5)
JEHÔVA A DZING MENGOM MÈÑ
19. Amu dzé Jehôva a kômô naa bi dzale é mam mesese bia yen nten Bya 15 ?
19 Nten Bya 15 wa ke man ya é ngiagh di : « Aval môr té daa ye ki vaghle teng » (Bya 15:5). E va, ntsili bya a dzô bia amu dzé Jehôva a kômô naa, bi dzale é mam mesese bia yen nten Bya 15 été. Jehôva a yi naa bi tobe mevakh été. Ya dzam té, éyong bia bo é mam mese Jehôva a sili bia naa bi bo, a ye bia ve mbemba éning, ye nkaman wèñ (Esaïe 48:17).
20. Za mam beyeng Jehôva be ne yane ?
20 Beyeng besese be bele ayebe Jehôva, be ne yane naa ba ye bele mbemba éning mel uma zu. Minwaghane mboan misese mia ye ke ning a dzôp é vôm Yésu « a va mane be kôm bitôpgha » (Jean 14:2). É bôr be bele ôyane ye a ning a si va, ba yane ya ôdzibi naa, mengiagh bia yen nten Melere 21:3 me dzalban. É ne môra maa naa, Jehôva a yebe naa bi bo beyeng be ye ébem dèñ mbèmbèè !
ZA 39 Vakh éyôla dwiè mbeng e mis Nzame
