ADZESUA ASƐM 24
NDWOM 24 Bra Jehovah Ne Bepɔw Do
Tsena Jehovah Ne Ntamadan No Mu Afebɔɔ!
‘Ao Jehovah, woana na ɔbɔsoɛ wo ntamadan mu?’—NDW. 15:1.
DZA YEBOSUA
Yɛbɔhwɛ dza ɔsɛ dɛ yɛyɛ ama yaakɔ do ayɛ Jehovah ne nyɛnko. Afei so, yɛbɔhwɛ kwan a Jehovah pɛ dɛ yɛnye n’anyɛnkofo dzi.
1. Sɛ yesusu Ndwom 15:1-5 no ho a, obesi dɛn aboa hɛn?
ADZESUA a odzi iyi enyim mu no, yebohun dɛ Jehovah n’asomfo a woehyira hɔnho do ama no no, sɛ wobotum atsena ne ntamadan mu a, ɔsɛ dɛ wɔnye no nya anyɛnkofa a no mu yɛ dzen. Naaso, yebesi dɛn nye no enya dɛm anyɛnkofa no? Nsɛm a ɔwɔ Ndwom 15 no botum aboa hɛn ma yeehu dza ɔsɛ dɛ yɛyɛ. (Kenkan Ndwom 15:1-5.) Dɛm ndwom yi ka ndzɛmba pɔtsee bi a sɛ yɛyɛ a ɔbɔboa hɛn ma yeetum abɛn Nyankopɔn kɛse.
2. Aber a David kaa Jehovah ne ntamadan ho asɛm no, ɔbɛyɛ dɛ nna ebɛnadze na ɔwɔ n’adwen mu?
2 Ndwom 15 no hyɛ ase dɛ: ‘Ao Jehovah, woana na ɔbɔsoɛ wo ntamadan mu? Woana na ɔbɛtsena wo bepɔw krɔnkrɔn no do?’ (Ndw. 15:1) Aber a ɔdwontofo David reka Jehovah ne “ntamadan” ho asɛm no, ɔbɛyɛ dɛ ntamadan a nna wɔsom wɔ mu a ɔwɔ Gibeon dɛm aber no na ɔwɔ n’adwen mu. Afei so, David kaa Nyankopɔn ne “bepɔw krɔnkrɔn” ho asɛm. Ɔbɛyɛ dɛ nna Bepɔw Zion a ɔwɔ Jerusalem no ho asɛm na ɔwɔ n’adwen mu. David sii ntamadan wɔ hɔ, na ɔdze ahyɛmudaka no sii mu kesi dɛ wosii asɔrfie no. Nna ofi beebi a David sii ntamadan no dze rokɔ Gibeon no mu nnwar pii.—2 Sam. 6:17.
3. Ebɛnadze ntsi na yɛpɛ dɛ yɛtse nsɛm a ɔwɔ Ndwom 15 no ase yie? (Hwɛ mfonyin no so.)
3 Nna Israelfo no mu pii nnyi hokwan dɛ wɔsom wɔ ntamadan no mu na akantam woewura beebi a ahyɛmudaka no si wɔ ntamadan no mu. Naaso, Jehovah n’asomfo anokwafo nyina botum abɔsoɛ ne ntamadan no mu na wɔaakɔ do ayɛ n’anyɛnkofo. Iyi yɛ biribi a hɛn nyina yɛpɛ. Sɛ yɛhwɛ Ndwom 15 no a, yehu su ahorow bi a sɛ yenya a ɔbɔboa hɛn ma yaakɔ do ayɛ Jehovah n’anyɛnkofo.
David n’aber do no, nna Israelfo no botum etwa obi a ɔabɔsoɛ Jehovah ne ntamadan mu no ho mfonyin wɔ hɔn adwen mu na woehu dza ɔkyerɛ (Hwɛ nkyekyɛmu 3)
MMA MMA WOHO MMBA ASƐM NA YƐ DZA ƆTSEN
4. Yesi dɛn hu dɛ ɔnnyɛ dza Jehovah pɛ ara nye dɛ wobonuma hɛn? (Isaiah 48:1)
4 Ndwom 15:2 ka obi a ɔyɛ Nyankopɔn ne nyɛnko ho asɛm dɛ, “ɔnantsew tɔɔtsenn [anaa noho nnyi asɛm], na ɔyɛ ndzeyɛtsenenee.” Nkasafua “ɔnantsew” nye “ɔyɛ” no ma yehu dɛ ɔyɛ biribi a ɔsɛ dɛ yɛkɔ do yɛ. Naaso, yebotum ayɛ nkorɔfo a ‘asɛm nnyi hɛnho’ anaa? Nyew. Ɔwɔ mu, nyimpa biara nnyi hɔ a bɔn nnyi noho, naaso sɛ yɛyɛ dza yebotum biara tsie Jehovah a, obobu hɛn dɛ ‘asɛm biara nnyi hɛnho.’ Sɛ yehyira hɛnho do ma Nyankopɔn na wonuma hɛn a, nna afei na yɛahyɛ ase nye Nyankopɔn refa nyɛnko. Sɛ yɛhwɛ Bible mu a, yehu dɛ sɛ nna obi yɛ Israelnyi a, ɔno ara kɛkɛ nnkyerɛ dɛ obotum abɔsoɛ Jehovah ne ntamadan no mu. Nna binom bɔ Nyankopɔn ne dzin anaa wɔsom no, naaso nna wɔnnyɛ no “nokwar anaa tsenenee mu.” (Kenkan Isaiah 48:1.) Israelfo a wɔpɛ dɛ wofi hɔn akoma nyina mu som Jehovah no, nna ɔsɛ dɛ wohu dza ɔpɛ na wɔyɛ. Ndɛ so, sɛ yɛpɛ dɛ yɛnye Jehovah nya anyɛnkofa a no mu yɛ dzen a, ɔnnyɛ dza ohia ara nye dɛ wobonuma hɛn na yɛnye Christianfo asafo no abɔ, mbom ɔsɛ dɛ yɛkɔ do “yɛ ndzeyɛtsenenee.” Yebesi dɛn ayɛ dɛm?
5. Sɛ wɔka dɛ yentsie Jehovah wɔ biribiara mu a, ɔkyerɛ dɛn?
5 Sɛ wɔka dɛ ‘hɛnho nnyi asɛm’ na ‘yɛyɛ ndzeyɛtsenenee’ wɔ Jehovah n’enyi do a, ɔnnyɛ dza ɔkyerɛ ara nye dɛ yɛbɔkɔ asafo nhyiamu da biara. (1 Sam. 15:22) Ɔsɛ dɛ yɛyer hɛnho dɛ yebetsie Nyankopɔn wɔ biribiara mu, na ɔsɛ dɛ yɛyɛ dɛm aber mpo a obiara nnhu hɛn. (Mbɛ. 3:6; Ɔsɛnk. 12:13, 14) Ɔsɛ dɛ yɛbɔ mbɔdzen tsie Jehovah wɔ ndzɛmba nketsenketse mpo mu. Sɛ yɛyɛ dɛm a, ɔkyerɛ dɛ yɛdɔ no paa na ɔbɛma ɔno so adɔ hɛn kɛse.—John 14:23; 1 John 5:3.
6. Dɛ mbrɛ Hebrewfo 6:10-12 ma yehu no, ebɛnadze na no ho hia kyɛn ndzɛmba pa a yɛyɛe mber bi a abɛsen kɔ no?
6 Ndzɛmba pa a yɛyɛe mber bi a abɛsen kɔ no, Jehovah n’enyi sɔ paa. Naaso, dɛm ndzɛmba pa a yɛayɛ no ara kɛkɛ nnkyerɛ dɛ Jehovah bobu hɛn dɛ yɛda ho ara fata dɛ yɛkɔ do tsena ne ntamadan mu. Hebrewfo 6:10-12 no kyerɛkyerɛ dɛm asɛm yi mu ma no mu da hɔ. (Kenkan.) Jehovah no werɛ mmfiir ndzɛmba pa a yɛayɛ no, naaso ɔpɛ dɛ yefi hɛn akoma nyina mu som no ‘dze kodu ewiei.’ ‘Na sɛ yɛammpa abaw a,’ ɔbɔkɔ do ayɛ hɛn nyɛnko afebɔɔ.—Gal. 6:9, Ahyɛmu Fofor.
KA NOKWAR WƆ W’AKOMA MU
7. Sɛ wɔka dɛ obi ka nokwar wɔ n’akoma mu a, ɔkyerɛ dɛn?
7 Sɛ obi pɛ dɛ ɔkɔ do tsena Jehovah ne ntamadan no mu a, ɔsɛ dɛ “ɔka nokwar wɔ n’akoma mu.” (Ndw. 15:2) Ɔnnyɛ dza iyi kyerɛ ara nye dɛ yerinndzi ator. Jehovah pɛ dɛ yedzi nokwar wɔ biribiara mu. (Heb. 13:18) Iyi ho hia paa, osiandɛ ‘Jehovah kyir ɔkɔnkɔnsanyi, na atseneneefo mbom na ɔnye hɔn dzi etsirmsɛm.’—Mbɛ. 3:32.
8. Ebɛn suban na ɔnnsɛ dɛ yɛda no edzi?
8 Hɔn a ‘wɔka nokwar wɔ hɔn akoma mu’ no, ɔnnyɛ aber a nyimpa wɔ hɔ nkotsee na wodzi Nyankopɔn ne mbra do. Sɛ ɔka hɔn nkotsee mpo a, wɔyɛ dɛm. (Isa. 29:13) Wɔmmfa kwan bi do nnhyɛ da ara mmbu Nyankopɔn ne mbra do. Naaso obi a n’akwan mu nntsen no, n’adwen yɛ no dɛ ɔnnyɛ aber nyina na mfaso wɔ do dɛ ɔdze Nyankopɔn n’akwankyerɛ bɛyɛ edwuma. (Jas. 1:5-8) Bi a Jehovah ne mbra a ɔtse nka dɛ mfaso biara nnyi do no, ɔremmfa nnyɛ edwuma. Afei sɛ ɔyɛ dɛm na wɔanntwe n’asowa wɔ dza ɔyɛe no ho a, ɔbɛma oesi no bo dɛ ɔbɛyɛ bɔn akɛseakɛse. N’adwen bɛyɛ no dɛ ɔrosom Nyankopɔn araa ma, naaso Jehovah renngye no som nnto mu. (Ɔsɛnk. 8:11) Naaso hɛn dze, yɛpɛ dɛ yedzi nokwar wɔ biribiara mu.
9. Ber a odzi kan a Jesus hyiaa Nathanael no, ebɛn asɛm sii na ebɛnadze na yebotum esua efi mu? (Hwɛ mfonyin no so.)
9 Asɛm a Jesus kae aber a odzi kan a ohyiaa Nathanael no ma yehu dɛ ohia dɛ yɛka nokwar wɔ hɛn akoma mu. Aber a Philip dze ne nyɛnko Nathanael baa Jesus ne nkyɛn no, Jesus kaa asɛm bi faa Nathanael ho a nna ɔyɛ nwanwa. Ɔwɔ mu, nna Jesus nnhyiaa Nathanael da, naaso Jesus kaa dɛ: “Hom nhwɛ! Oyi Israelnyi ara ampa. Ndaadaa biara nnyi no mu.” (John 1:47, Ahyɛmu Fofor.) Nna Jesus bu n’esuafo nkaa no dɛ wodzi nokwar. Naaso Jesus hun dɛ Nathanael nedze no yɛ soronko. Nna Nathanael yɛ nyimpa tse dɛ hɛnara. Naaso nna ɔnnyɛ nyaatwem mbom nna odzi nokwar wɔ biribiara mu. Jesus n’enyi gyee Nathanael no suban yi ho, na ɔkamfoo no wɔ ho. Sɛ Jesus ka biribi a ɔtse dɛm fa hɛnho a, hwɛ mbrɛ obesi ayɛ hɛn dɛw afa!
Ber a odzi kan a Philip dze ne nyɛnko Nathanael baa Jesus nkyɛn no, Jesus kaa no ho asɛm dɛ ndaadaa biara nnyi no mu. Wobotum aka biribi dɛm afa hɛn ho anaa? (Hwɛ nkyekyɛmu 9)
10. Ebɛnadze ntsi na ɔsɛ dɛ yɛhwɛ hɛn kasaa yie? (James 1:26)
10 Dza Jehovah pɛ dɛ yɛyɛ a wɔaka ho asɛm wɔ Ndwom 15 no, no mu piinara fa mbrɛ ɔsɛ dɛ yɛnye afofor dzi ho. Ndwom 15:3 ka dɛ obi a ɔabɔsoɛ Jehovah ne ntamadan mu no, ‘ɔmmfa ne tɛkyerɛma mmbɔ nseku, ɔnnyɛ ne nyɛnko bɔn, na ɔnnsɛɛ n’anyɛnkofo hɔn dzin.’ Sɛ yɛkeka nsɛm a ɔnnyɛ nokwar fa nkorɔfo ho dze sɛɛ hɔn dzin a, obotum ahaw hɔn paa na Jehovah so botu hɛn efi ne ntamadan mu.—Kenkan James 1:26.
11. Sɛ wɔka dɛ obi asɛɛ obi ne dzin a, ɔkyerɛ dɛn, na sɛ obi yɛ dɛm na oenngyaa a, ebɛn asɛm na ɔbɔto no?
11 Ɔdwontofo no hyɛɛ da ara kaa dzinsɛɛ ho asɛm. Sɛ wɔka dɛ obi asɛɛ obi ne dzin a, ɔkyerɛ dɛn? Dza ɔkyerɛ nye dɛ obi bɛka atorsɛm afa obi ho dze asɛɛ ne dzin. Sɛ obi sɛɛ nkorɔfo dzin na sɛ wɔbɔ no kɔkɔ na oenngyaa a, wobotu no efi Christianfo asafo no mu.—Jer. 17:10.
12-13. Ebɛn tsebea ahorow na yebotum akeka ho nsɛm dze asɛɛ hɛn anyɛnkofo hɔn dzin aber a hɛn enyi nnda? (Hwɛ mfonyin no so.)
12 Ndwom 15:3 san so ma yehu dɛ hɔn a wɔabɔsoɛ Jehovah ne ntamadan mu no, wɔnnyɛ hɔn anyɛnkofo bɔn na wɔnnsɛɛ hɔn dzin so. Ebɛn nsɛm dɛm na sɛ yɛka a obotum asɛɛ hɛn anyɛnkofo hɔn dzin?
13 Sɛ yɛannhwɛ no yie a, yɛbɛkeka nsɛm bi a ɔnnyɛ nokwar dze asɛɛ obi ne dzin aber mpo a hɛn enyi nnda. Ɔwodze ma yɛnhwɛ tsebea ahorow a odzidzi do yi: (1) akyerɛbaa bi egyaa akwampaa edwuma no, (2) awarfo bi efi Bethel, anaa (3) onua bi nnyɛ asafo mu panyin anaa asafo mu somfo bio. Ehwɛ a, ɔbɛyɛ papa dɛ edze w’adwen bobu dɛ bi a wɔyɛɛ biribi bɔn bi ntsi na hokwan a ɔtse dɛm efi hɔn nsa, na aasan so aka ho asɛm akyerɛ nkorɔfo anaa? Ebɔhwɛ mu no, nna siantsir a hokwan no fii hɔn nsa no no mu pii wɔ hɔ a yennyim. Afei so, ɔsɛ dɛ yɛkaa dɛ obiara a wɔabɔsoɛ Jehovah ne ntamadan mu no, ‘ɔnnyɛ ne nyɛnko bɔn na ɔnnsɛɛ n’anyɛnkofo hɔn dzin.’
Ɔnnyɛ dzen koraa dɛ yɛbɛkeka atorsɛm afa nkorɔfo ho dze asɛɛ hɔn dzin (Hwɛ nkyekyɛmu 12-13)
DZI HƆN A WOSURO JEHOVAH NO NYI
14. Hɔn a wɔabɔsoɛ Jehovah ne ntamadan mu no, wɔnye ‘nyimpa huhuw’ nnantsew. Kyerɛkyerɛ mbrɛ wosi yɛ dɛm no mu.
14 Ndwom 15:4 ma yehu dɛ obi a ɔyɛ Jehovah ne nyɛnko no, “nyimpa ehuw nntɔ n’enyiwa mu,” kyerɛ dɛ, ɔnnye nyimpa huhuw nnantsew. Yebesi dɛn ehu dɛ obi yɛ nyimpa huhuw? Yɛyɛ nyimpa a bɔn wɔ hɛnho ntsi ɔnnyɛ hɛn na yɛbɛkyerɛ dɛ obi yɛ nyimpa huhuw. Ebɛnadze ntsi a? Osiandɛ bi a ɔrennyɛ dzen dɛ yɛbɛpɛ hɔn a hɔn suban yɛ hɛn fɛw no asɛm na yɛatwe hɛnho efi hɔn a hɔn suban nnyɛ hɛn fɛw no ho. Ntsi hɔn a Jehovah hu hɔn dɛ wɔyɛ nyimpa ‘huhuw’ no nkotsee na ɔnnsɛ dɛ yɛnye hɔn nantsew. (1 Cor. 5:11) Dɛm nkorɔfo yi mu bi nye hɔn a wonnu hɔnho aber a wɔayɛ bɔn, hɔn a wɔkasa tsia hɛn gyedzi, nye hɔn a wɔbɔ mbɔdzen dɛ wɔbɛsɛɛ yɛnye Jehovah ntamu anyɛnkofa no.—Mbɛ. 13:20.
15. Ebɛnadze na yebotum ayɛ dze edzi ‘hɔn a wosuro Jehovah’ no nyi?
15 Naaso, Ndwom 15:4 ka dɛ ɔsɛ dɛ yedzi ‘hɔn a wosuro Jehovah’ no nyi. Ntsi yɛhwehwɛ hokwan ahorow dze da ayamuyie na obu edzi kyerɛ Jehovah n’anyɛnkofo. (Rom. 12:10) Yesi dɛn yɛ dɛm? Yehu kwan kor a yebotum afa do ayɛ dɛm no wɔ Ndwom 15:4. Hɔ ma yehu dɛ obi a ɔabɔsoɛ Jehovah ne ntamadan mu no, ‘sɛ ɔka ntam na ɔbɛma oenya amandze mpo a, ɔnnsesa n’ano.’ Sɛ yɛhyɛ nkorɔfo bɔ na yeenndzi do a, obotum ahaw hɔn paa. (Matt. 5:37) Iyi ntsi na Jehovah pɛ dɛ awarfo dzi hɔn awar ntam do no. Afei so, sɛ awofo hyɛ hɔn mba bɔ na wɔyɛ dza wobotum biara dzi do a, ɔma Jehovah n’enyi gye. Osiandɛ yɛdɔ Nyankopɔn na nkorɔfo ntsi, yɛyɛ dza yebotum biara dzi bɔ biara a yɛahyɛ no do.
16. Ebɛnadze bio na yebotum ayɛ dze edzi Jehovah n’anyɛnkofo nyi?
16 Adze fofor so a yebotum ayɛ dze edzi Nyankopɔn n’anyɛnkofo nyi nye dɛ yɛbɛgye hɔn ahɔho na yɛayɛ hɔn adɔyɛ. (Rom. 12:13) Sɛ asafo nhyiamu na asɛnka a yɛnye hɛn nuanom bɔ mu kɔ no da nkyɛn a, ɔsɛ dɛ yɛgye ber nye hɔn bɔ. Sɛ yɛyɛ dɛm a, ɔbɛma anyɛnkofa a yɛnye hɔn wɔ no no mu ayɛ dzen. Afei so, ɔbɛma yɛabɛn Jehovah kɛse. Bio so, sɛ yɛgye hɛn nuanom ahɔho a, nna yerusuasua Jehovah.
MMA MMA W’ENYI MMBER SIKA
17. Ebɛnadze ntsi na Ndwom 15 no ka sika ho asɛm?
17 Bible no ka dɛ obi a ɔabɔsoɛ Jehovah ne ntamadan mu no, ‘ɔmmfa ne sika mmfɛm nngye nsiho, na ɔnngye nyia odzi bem hɔ mboaba.’ (Ndw. 15:5) Ebɛnadze ntsi na wɔkaa sika ho asɛm wɔ dɛm ndwom a no mu nsɛm nndɔɔ so yi mu? Siantsir no nye dɛ, sɛ hɛn enyi ber sika a, obotum asɛɛ yɛnye Nyankopɔn na afofor ntamu. (1 Tim. 6:10) Sɛ yɛhwɛ Bible no mu a, yehu dɛ nna Israelfo binom bɔ hɔn nuanom ehiafo no bi bosa gye nsiho, aber a nna ɔnnsɛ dɛ wɔyɛ dɛm. Afei so, nna atsɛmbuafo binom gye mboaba anaa bribe na wobu hɔn a hɔnho nnyi asɛm no atsɛnkyew. Jehovah kyir ndzeyɛɛ ahorow a ɔtse dɛm no kɔkɔɔkɔ.—Ezek. 22:12.
18. Ebɛn nsɛmbisa na obotum aboa hɛn ma yeehu mbrɛ yesi yɛ hɛn adze wɔ sika ho? (Hebrewfo 13:5)
18 Oye paa dɛ yɛhwɛ mbrɛ yesi yɛ hɛn adze wɔ sika ho. Bisa woho dɛ: ‘Ɔyɛ a, m’adwen taa yɛ me sika sika na metaa dwendwen dza minya sika a medze bɛyɛ ho anaa? Sɛ mobɔ bosa a, ɔyɛ a ɔkyɛr ana meetua osiandɛ mususu dɛ obi a ɔbɔɔ me bosa no nnhia dɛm sika no anaa? Sika kakra a mowɔ no, ɔma metse nka dɛ mekyɛn afofor na ɔyɛ dzen ma me so dɛ mubobue me nsamu akyɛ afofor adze anaa? Enuanom a wɔwɔ sika no, muhu hɔn dɛ hɔn enyi ber sika na wɔnndɔ Jehovah anaa? Mefa hɔn a wɔyɛ esikafo no nyɛnko na mutwa hɔn a wɔyɛ ehiafo no bɔ anaa?’ Ohia paa dɛ yesusu dɛm nsɛmbisa yi ho osiandɛ ɔyɛ hokwan kɛse na yeenya dɛ yɛabɔsoɛ Jehovah ne ntamadan mu. Ntsi sɛ yɛmmpɛ dɛ hokwan a ɔtse dɛm fi hɛn nsa a, ɔsɛ dɛ yɛhwɛ yie na yaamma hɛn enyi ammber sika. Sɛ yɛyɛ dɛm a, Jehovah rinngyaa hɛn dabiarada!—Kenkan Hebrewfo 13:5.
JEHOVAH DƆ N’ANYƐNKOFO
19. Ebɛnadze ntsi na Jehovah pɛ dɛ yɛyɛ ndzɛmba a ɔaka ho asɛm wɔ Ndwom 15 no nyinara?
19 Asɛm a ɔdze Ndwom 15 no ba ewiei no yɛ bɔhyɛ, na ɔka dɛ: “Nyia ɔyɛ iyinom no betsim hɔ daa.” (Ndw. 15:5) Dɛm asɛm yi ma yehu siantsir a Nyankopɔn pɛ dɛ yɛyɛ ndzɛmba a ɔaka ho asɛm wɔ Ndwom 15 no nyinara. Ɔno nye dɛ ɔpɛ dɛ hɛn enyi gye. Dɛm ntsi sɛ yedzi akwankyerɛ a Jehovah dze ma hɛn no do a, obehyira hɛn na ɔbɔbɔ hɛn ho ban so.—Isa. 48:17.
20. Ebɛnadze na hɔn a wɔwɔ Jehovah ne ntamadan mu no botum ahwɛ kwan?
20 Hɔn a wɔabɔsoɛ Jehovah ne ntamadan mu no botum ahwɛ daakye papabi kwan. “Tsenabew pii” a Jesus kaa dɛ orikesiesie ama n’esuafo no wɔ sor no, anokwafo a wɔasera hɔn no benya hokwan akɛtsena hɔ. (John 14:2) Hɔn a wɔwɔ enyidado dɛ wɔbɛtsena asaase yi do no so rohwɛ kwan dɛ bɔhyɛ a ɔwɔ Nyikyerɛ 21:3 no bɛba mu. Nokwasɛm nye dɛ, ɔyɛ hɛn dɛw paa dɛ Jehovah ato nsa afrɛ hɛn dɛ yɛmbɛyɛ n’anyɛnkofo na yɛntsena ne ntamadan no mu daa!
NDWOM 39 Nya Dzin Pa Wɔ Nyankopɔn Enyim
