1. Étɛ́wú Ðɛhan 15:1-5 gbígbéjé kpɔ́n ka sixú hɛn le wá nú mǐ?

 ÐO XÓTA e wá yi é mɛ ɔ, mǐ kplɔ́n ɖɔ mɛ ɖěɖěe sɔ́ yěɖée jó nú Jexóva bo húzú mɛsɛntɔ́ tɔn lɛ́ é sixú nyí jǒnɔ ɖo goxɔ tɔn nǔjlɛ́dónǔwú tɔn ɔ mɛ gbɔn tíntɛ́nkpɔ́n bo zun xɔ́ntɔn vívɛ́ xá ɛ gblamɛ. Amɔ̌, nɛ̌ mǐ ka sixú jɛxá xɔ́ntɔn zunzun mɔ̌hun gbɔn? Ðɛhan 15​gɔ́ ɔ ɖó nǔ gěgé bá ɖɔ dó xó énɛ́ wú. (Xa Ðɛhan 15:1-5.) Ðɛhan énɛ́ kplɔ́n nǔ tawun tawun e sixú d’alɔ mǐ bɔ mǐ ná vɛ́ kpó Mawu kpó é gěgé mǐ.

2. Étɛ́ ka sixú ko sísɛ́ ɖɛhanwlántɔ́ Davídi bɔ é kɛ nu dó goxɔ Jexóva tɔn wú?

² Ðɛhan 15​gɔ́ ɔ bɛ́ gbɔn lě: ‘Jexóva, mɛ̌ wɛ ná nɔ xwé towe gbe? Mɛ̌ wɛ ná nɔ só mímɛ́ towe jí?’ (Ðɛh. 15:1) É sixú nyí “goxɔ” ɔ, éé nɔ Gabawɔ́ɔ́n nú hwenu ɖé é jí lin tamɛ dó wɛ ɖɛhanwlántɔ́ Davídi ná ko ɖe hwenu e é ɖɔ “xwé” alǒ “goxɔ” Jexóva tɔn xó é. Davídi lɛ́ ɖɔ xó dó “só mímɛ́” Mawu tɔn wú, bóyá, Sinyɔ́ɔ éé ɖo Jeluzalɛ́mu é dó gesí wɛ é ná ko ɖe. Kilomɛ́tlu mɔ̌kpán wɛ fí énɛ́ ɖó dó tofɔligbé Gabawɔ́ɔ́n tɔn. Davídi gbá goxɔ ɖé bo sɔ́ akɔjijɛgbá ɔ d’é mɛ b’ɛ nɔ fínɛ́ káká jɛ hwenu e è wá gbá tɛ́npli ɔ é.—2 Sam. 6:17.

3. Étɛ́wú Ðɛhan 15​gɔ́ ɔ ka ɖó ná dɔn mǐ? (Kpɔ́n ɖiɖe ɔ lɔmɔ̌.)

³ É ɖo wɛn ɖɔ Izlayɛ́li ví gěgé tíin bɔ è kún yí gbe nú yě bónú yě wa sinsɛnzɔ́ ɖo goxɔ ɔ mɛ kpɔ́n ó, bɔ mɛ kwínwe ɖé jɛ́n yi goxɔ ɔ mɛ, fí e è sɔ́ akɔjijɛgbá ɔ ɖó é kpɔ́n. Amɔ̌, mɛsɛntɔ́ gbejínɔtɔ́ Jexóva tɔn lɛ́ bǐ sixú nyí jǒnɔ ɖo goxɔ tɔn nǔjlɛ́dónǔwú tɔn ɔ mɛ, ényí yě hǔzú xɔ́ntɔn tɔn bo lɛ́ kpo ɖo mɔ̌ nyí  wɛ ɔ nɛ́. Nǔɖé wɛ bɔ mǐ mɛ bǐ nɔ ba. Ðɛhan 15​gɔ́ ɔ kɛ nu dó jijɔ ɖěɖěe é byɔ́ ɖɔ mǐ ní tɛ́n kpɔ́n bo ɖó, bo nɔ lɛ́ ɖe xlɛ́ bá dó kpo ɖo xɔ́ntɔn Jexóva tɔn nyí wɛ é ɖé lɛ́ wú.

NƆ ÐI ZƆNLIN JLƆ́JLƆ́ BO NƆ WA NǓ E SƆGBE É

4. Nɛ̌ mǐ ka wa gbɔn bo tuun ɖɔ é kún nyí batɛ́mu bíbló kɛ́ɖɛ́ ɖó nukún wɛ Jexóva ɖe ɖo mǐ sí ó? (Ezayíi 48:1)

⁴ Ðɛhan 15:2 ɖɔ ɖɔ, mɛ e nyí xɔ́ntɔn Mawu tɔn é ɔ, mɛɖé wɛ bɔ è “nɔ mɔ nǔɖé ɖɔ dó wǔ tɔn ǎ,” bo “nɔ wa nǔ jlɔ́jlɔ́.” Xógbe “nɔ mɔ nǔɖé ɖɔ dó wǔ tɔn ǎ” kpó “nɔ wa nǔ jlɔ́jlɔ́” kpó e è zán ɖo wěmafɔ énɛ́ mɛ é xlɛ́ ɖɔ nǔɖé wɛ bɔ mǐ ɖó ná kpo ɖo wiwa wɛ. Amɔ̌, è ka sixú ‘nɔ ma mɔ nǔɖé ɖɔ dó mǐ wú’ nǔgbó a? Ganjí. Mɛ ɖě nyí mɛ maɖóblɔ̌ ǎ có, ényí mǐ nɔ wa nǔ e wú mǐ kpé é bǐ bo nɔ se tónú nú Jexóva ɔ, é ná mɔ mǐ dó mɔ ‘mɛ e wú è ma nɔ mɔ nǔɖé ɖɔ dó ǎ é.’ Ényí mǐ zé mǐɖée jó nú Mawu bo bló batɛ́mu hǔn, ali ɔ jí jɛ́n mǐ jɛ kɛ́ɖɛ́ nɛ́. Ði kpɔ́ndéwú ɔ, ɖo Biblu sín táan mɛ ɔ, ényí mɛɖé nyí Izlayɛ́li ví kpowun ɔ, énɛ́ ko xlɛ́ ɖɔ é nyí jǒnɔ Jexóva tɔn ǎ. Mɛɖé lɛ́ ylɔ́ ɛ, é ka nyí “ɖó sɛ́nxwi jí ǎ.” (Xa Ezayíi 48:1.) Izlayɛ́li ví ɖěɖěe ba vɛ́návɛ́ná bo ná nyí jǒnɔ Jexóva tɔn lɛ́ é ɖó ná kplɔ́n nǔ dó nǔ e ɖó nukún wɛ Jexóva ɖe ɖo yě sí lɛ́ é wú, lobo xwedó. Ðo ali ɖokpó ɔ nu ɔ, cóbónú nǔ mǐtɔn ná nyɔ́ Mawu nukúnmɛ ɖo égbé ɔ, mǐ ɖó ná wa nǔ hú batɛ́mu blóbló bo ɖó nyǐkɔ Kúnnuɖetɔ́ Jexóva tɔn ta. Mǐ ɖó ná kpo ɖo “nǔ jlɔ́jlɔ́” wa wɛ. Nɛ̌ mǐ ka sixú wa énɛ́ gbɔn?

5. Étɛ́ ka nyí tínmɛ è ní se tónú nú Jexóva ɖo nǔ bǐ mɛ tɔn?

⁵ Ðo Jexóva nukúnmɛ ɔ, ‘mɛ e wú è ma nɔ mɔ nǔɖé ɖɔ dó ǎ é’ kpó “mɛ e nɔ wa nǔ jlɔ́jlɔ́ é” kpó nyínyí nɔ byɔ́ nǔ hú kplé lɛ́ yiyi hwɛhwɛ ɖo kpléxɔ Axɔ́súɖuto ɔ tɔn mɛ. (1 Sam. 15:22) Mǐ ɖó ná tɛ́n kpɔ́n bo ná nɔ se tónú nú Mawu ɖo akpáxwé gbɛzán mǐtɔn tɔn lɛ́ bǐ mɛ, é ná bo tlɛ nyí hwenu e mǐ ɖo mǐɖokpónɔ é ɔ nɛ́.  (Nǔx. 3:6; Nǔt. 12:13, 14) É ɖo tají ɖɔ mǐ ní nɔ tɛ́n kpɔ́n bo nɔ se tónú nú Jexóva, é ná bo tlɛ nyí ɖo nǔ e é cí ɖɔ yě kún hwɛ́n nǔɖé ó lɛ́ é mɛ ɔ nɛ́. Mɔ̌ wiwa nɔ xlɛ́ ɖɔ mǐ yí wǎn n’i nǔgbó nǔgbó, bɔ énɛ́ nɔ zɔ́n bɔ é tlɛ nɔ yí wǎn nú mǐ hú gǎn.—Jaan 14:23; 1 Jaan 5:3.

6. Sɔgbe xá Eblée lɛ́ 6:10-12 ɔ, étɛ́ ka ɖo tají hú gǎn gbejíninɔnú ɖěbǔ e mǐ ko wa wá yi lɛ́ é?

⁶ Nǔ e mǐ ko wa nú Jexóva wá yi lɛ́ é nɔ su nukún tɔn mɛ tawun. É ɖo mɔ̌ có, gbejíninɔnú e mǐ wa wá yi lɛ́ é kɛ́ɖɛ́ ko kpé nú mǐ ná jɛxá bo kpo ɖo jǒnɔ nyí wɛ ɖo goxɔ Jexóva tɔn mɛ ǎ. Énɛ́ jɛ wě ɖo Eblée lɛ́ 6:10-12 mɛ. (Xa.) Jexóva nɔ wɔn nǔ ɖagbe e mǐ wa wá yi lɛ́ é ǎ. Amɔ̌, é nɔ ba ɖɔ mǐ ní kpo ɖo émí sɛn wɛ kpó lǐndɔ̌n mǐtɔn bǐ kpó “káká jɛ vivɔnu.” É ná zun xɔ́ntɔn xá mǐ káká sɔ́yi “ényí nǔ ma ci kɔ nú mǐ ǎ ɔ nɛ́.”—Ga. 6:9.

NƆ ÐƆ NǓGBÓ LĚE É ÐE GBƆN ÐO AYI TOWE MƐ É

7. Étɛ́ ka nyí tínmɛ mǐ ní nɔ ɖɔ nǔgbó lěe é ɖe gbɔn ɖo ayi mǐtɔn mɛ é tɔn?

⁷ Mɛ e ba ná nyí jǒnɔ ɖo goxɔ Jexóva tɔn mɛ é ɖó ná “nɔ ɖɔ nǔgbó lěe é ɖe gbɔn ɖo ayi tɔn mɛ é.” (Ðɛh. 15:2) Énɛ́ byɔ́ nǔ hú alɔ nyinyi nú adingbanɖíɖó. Jexóva ba ɖɔ mǐ ní nɔ ɖɔ nǔgbó ɖo nǔ e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó bǐ mɛ. (Ebl. 13:18) É ɖo tají, ɖó Jexóva “gbɛ́ wǎn nú mɛdídá lɛ́, (alǒ mɛblɛ́tɔ́ lɛ́) bo ka nɔ zun xɔ́ntɔn xá mɛ e nɔ wa nǔ jlɔ́jlɔ́ lɛ́” é.—Nǔx. 3:32.

8. Nǔwalɔ tɛ́ é ka byɔ́ ɖɔ mǐ ní nɔ nyi alɔ ná?

⁸ Mɛ ɖěɖěe ‘nɔ ɖɔ nǔgbó lěe é ɖe gbɔn ɖo ayi yětɔn mɛ’ lɛ́ é nɔ wa nǔ cí nǔ ɖɔ yě ɖo tónú se wɛ ɖɔhun ɖo agbawungba bo ka nɔ ɖo sɛ́n Mawu tɔn lɛ́ gba wɛ ɖo nǔglɔ́ ǎ. (Eza. 29:13) Yě nɔ nyi alɔ nú nǔ wa dó blɛ́ mɛ ɖěvo lɛ́. Mɛ e nɔ blɛ́ mɛ é ɖé sixú jɛ nǔ xo kpɔ́n dó nǔnywɛ́ e ɖo gbetakɛ́n Jexóva tɔn mɛ lɛ́ é ɖé lɛ́ wú jí. (Ja. 1:5-8) Ðo nǔ e ma hwɛ́n nǔɖé sɔmɔ̌ ɖo nukún tɔn mɛ ǎ lɛ́ é mɛ ɔ, é sixú gɔn gbejí nɔ nú Jexóva. Énɛ́ gúdo ɔ, ényí é cí ɖɔ é tlí tó ɔ, nǔ nyanya ɖě kún nɔ jɛ ó ɖɔhun ɔ, é sixú jɛ nǔ e nylá hú mɔ̌ lɛ́ é wa jí. É nɔ lin ɖɔ émí ɖo Mawu sɛn wɛ, amɔ̌, Jexóva ná yí gbe nú mawusinsɛn tɔn ǎ. (Nǔt. 8:11) Amɔ̌, mǐdɛɛ lɛ́ ba bo ná nɔ ɖɔ nǔgbó ɖo nǔ bǐ mɛ.

9. Étɛ́ nǔ e jɛ hwenu e Jezu xo go Natanayɛ́li azɔn nukɔntɔn ɔ é ka sixú kplɔ́n mǐ? (Kpɔ́n ɖiɖe ɔ lɔmɔ̌.)

 ⁹ Mǐ sixú kplɔ́n lě do é ɖo tají sɔ ɖɔ mǐ ní nɔ ɖɔ nǔgbó sín ayi mɛ é ɖo lěe Jezu wa nǔ gbɔn hwenu e é xo go Natanayɛ́li azɔn nukɔntɔn ɔ é mɛ. Hwenu e Filípu kplá xɔ́ntɔn tɔn Natanayɛ́li wá Jezu gɔ́n é ɔ, nǔ tají ɖé jɛ. Jezu ko xo go Natanayɛ́li kpɔ́n ǎ có, é ɖɔ: “Mi kpɔ́n, Izlayɛ́li ví nǔgbó ɖokpó ɖíe, é nɔ wa mɛblɛ́blɛ́nú ɖěbǔ ǎ.” (Jaan 1:47) É ɖo wɛn ɖɔ Jezu mɔ ɖɔ ahwanvú émítɔn ɖě lɛ́ nɔ ɖɔ nǔgbó, amɔ̌, é ɖó ayi wú ɖɔ Natanayɛ́li nɔ ɖɔ nǔgbó titewungbe tɔn. Gbɛtɔ́ hwɛhutɔ́ wɛ Natanayɛ́li nyí mǐɖɔhun. Amɔ̌, é nɔ wa yɛmɛnú ǎ, é nyɔ́ wa ɔ, é nɔ ɖɔ nǔgbó ɖo nǔ bǐ mɛ. Jezu yí wǎn nú jijɔ énɛ́ e é ɖó é bo kpa ɛ ɖó énɛ́ wú. Ényí Jezu ɖ’ayi nǔ ɖokpó ɔ wú dó mǐ lɔ wú ɔ, susu wɛ é ná nyí nú mǐ.

10. Étɛ́wú mǐ ka ɖó ná nɔ nɔ acéjí dó nǔ e mǐ nɔ ɖɔ lɛ́ é wú? (Jaki 1:26)

¹⁰ Nǔ ɖěɖěe è slɛ́ ɖo Ðɛhan 15​gɔ́ ɔ mɛ bɔ mǐ ɖó ná wa lɛ́ é gěgé kunkplá lěe mǐ nɔ wa nǔ gbɔn xá mɛ ɖěvo lɛ́ é. Ðɛhan 15:3 ɖɔ ɖɔ mɛ e nyí jǒnɔ ɖo goxɔ Jexóva tɔn mɛ é ‘kún nɔ ɖɔ mɛ nú ó, kún nɔ wa nyanya nú nɔzo tɔn ó, é kún ka nɔ kɔ́n mɛ tɔn lɛ́ sín wi ó.’ Ðɛ̌ mǐtɔn zínzán nyi do ɖo ali mɔ̌hun lɛ́ nu sixú hɛn nǔ gblé dó mɛ ɖěvo lɛ́ wú tawun, bo ná zɔ́n bɔ mǐ sɔ́ ná jɛxá bo ná nyí jǒnɔ ɖo goxɔ Jexóva tɔn mɛ ǎ.—Xa Jaki 1:26.

11. Étɛ́ ka nɔ nyí mɛnúɖiɖɔ? Étɛ́ ka ná jɛ dó mɛ e nɔ ɖɔ mɛ ɖěvo lɛ́ sín nǔ bɔ hwɛ tɔn lɛ́ ma ka vɛ́ n’i ǎ é wú?

¹¹ Ðɛhanwlántɔ́ ɔ tɛ ɖɛ̌ mɛnúɖiɖɔ jí. Étɛ́ ka nyí mɛnúɖiɖɔ? Ðo kpaa mɛ ɔ, adingbanxó ɖěɖěe è ɖɔ bɔ yě sixú hɛn nyǐkɔ ɖagbe mɛɖé tɔn gblé lɛ́ é wɛ nɔ nyí mɔ̌. È nɔ ɖe mɛnúɖɔtɔ́ ɖěɖěe hwɛ yětɔn ma vɛ́ nú yě ǎ lɛ́ é sín agun mɛ.—Jel. 17:10.

12-13. Ninɔmɛ tɛ́ lɛ́ mɛ mɔ̌ mǐ ka sixú kɔ́n wi xɔ́ntɔn mǐtɔn lɛ́ tɔn ɖo manywɛ́ mɛ ɖe? (Kpɔ́n fɔtóo ɔ lɔmɔ̌.)

¹² Ðɛhan 15:3 lɛ́ flín mǐ ɖɔ jǒnɔ Jexóva tɔn lɛ́ kún ɖó ná wa nǔ nyanya ɖě nú nɔzo yětɔn lɛ́ ó, yě kún ka ɖó ná lɛ́ kɔ́n wi mɛ yětɔn lɛ́ alǒ xɔ́ntɔn yětɔn lɛ́ tɔn, kabǐ ɖɔ xó gblégblé ɖé  dó yě wú ó. Nɛ̌ mǐ ka sixú dó ji mɛ mǐtɔn lɛ́ alǒ xɔ́ntɔn mǐtɔn lɛ́ gbɔn?

¹³ Mǐ sixú dó ji mɛɖé ɖo manywɛ́ mɛ gbɔn xó masɔgbe lɛ́ fúnfún kpé dó wú tɔn gblamɛ. Ði kpɔ́ndéwú ɔ: (1) nɔví nyɔ̌nu ɖé ɖó sinsɛnzɔ́ hwebǐnu tɔn e wa wɛ é ɖe é te, (2) asú kpó asi kpó ɖé sɔ́ ɖo sinsɛnzɔ́ wa wɛ ɖo Betɛ́li ǎ, alǒ (3) nɔví súnnu ɖé sɔ́ nyí mɛxó agun tɔn alǒ mɛsɛntɔ́ agun tɔn ǎ. É ka sɔgbe ɖɔ è ní ɖɔ nú mɛ ɖěvo lɛ́ ɖɔ nɔví súnnu kpó nɔví nyɔ̌nu kpó énɛ́ lɛ́ ɔ, nǔ nyanya ɖé wɛ yě ná ko wa wɛ zɔ́n bɔ ninɔmɛ yětɔn húzú a? Hwɛjijɔ e wú è bló hǔzúhúzú énɛ́ é gěgé sixú tíin bɔ mǐ nɔ ma tuun. Gɔ́ ná ɔ, mɛ e nyí jǒnɔ ɖo goxɔ Jexóva tɔn mɛ é ɖé ‘nɔ wa nyanya nú nɔzo tɔn ǎ, é nɔ kɔ́n mɛ tɔn lɛ́ alǒ xɔ́ntɔn tɔn lɛ́ sín wi ǎ.’

NƆ WLÍ YƐ̌YI NÚ MƐ ÐĚÐĚE NƆ SÍ JEXÓVA LƐ́ É

14. Tín lěe jǒnɔ Jexóva tɔn lɛ́ ma ‘nɔ kpɔ́n mɛ e Jexóva gbɛ́ wǎn ná lɛ́ sín jɛ jí’ ǎ gbɔn é mɛ.

¹⁴ Ðɛhan 15:4 ɖɔ ɖɔ mɛ e nyí xɔ́ntɔn Jexóva tɔn é ɖé kún “nɔ kpɔ́n mɛ e [Jexóva] gbɛ́ wǎn ná lɛ́ sín jɛ jí” ó. Nɛ̌ mǐ ka sixú wa énɛ́ gbɔn? Ðó mǐ nyí gbɛtɔ́ hwɛhutɔ́ lɛ́ wútu ɔ, mǐ sixú tuun nú Jexóva gbɛ́ wǎn nú mɛɖé alǒ gbɔ ǎ. Étɛ́wú? Mǐ sixú yí wǎn nú mɛ ɖěɖěe mǐ lin ɖɔ kpɔ́ ninɔ xá yě bɔ wǔ lɛ́ é, bo ka gbɛ́ wǎn nú mɛ ɖěvo lɛ́ ɖó yě nɔ dó xomɛsin nú mǐ wútu. È ná ɖɔ ɔ, mɛ ɖěɖěe ‘Jexóva gbɛ́ wǎn ná lɛ́’ é kɛ́ɖɛ́ sín jɛ jí wɛ mǐ ma ɖó ná nɔ kpɔ́n ǎ. (1 Kɔ. 5:11) Mɛ ɖěɖěe nɔ wa nǔ nyanya, ma nɔ ɖó sísí nú nǔ e mǐ ɖi nǔ ná lɛ́ é ǎ é, abǐ nɔ tɛ́n kpɔ́n bá vɔ́ da nú mǐ ɖo gbigbɔ lixo bɔ hwɛ yětɔn ma vɛ́ nú yě ǎ lɛ́ é ɖo mɛ énɛ́ lɛ́ mɛ.—Nǔx. 13:20.

15. Ðɔ ali e nu è nɔ ‘wlí yɛ̌yi nú mɛ e nɔ sí Jexóva lɛ́’ é ɖe é ɖokpó.

¹⁵ Ðo alɔ ɖěvo mɛ ɔ, Ðɛhan 15:4 byɔ́ mǐ ɖɔ mǐ ní nɔ ‘wlí yɛ̌yi nú mɛ e nɔ sí Jexóva lɛ́’ é. Énɛ́ wú ɔ, mǐ nɔ ba ali ɖěɖěe nu mǐ ná nyɔ́ xomɛ dó xɔ́ntɔn Jexóva tɔn lɛ́ wú bo lɛ́ ɖó sísí nú yě ɖe lɛ́ é. (Hlɔ̌. 12:10) Gbɔn nɛ̌ é? Ali e nu mɛ e nyí jǒnɔ ɖo goxɔ Jexóva tɔn mɛ é ɖé nɔ wa mɔ̌ ɖe bɔ Ðɛhan 15:4 ɖɔ é ɖokpó wɛ nyí ɖɔ “é dó akpá ɖé ɔ, é nɔ ɖe. Nǔ ɖěbǔ ná bo gbo è ɖ’é mɛ ɔ, é nɔ ɖe.” É ɖo wɛn ɖɔ, ényí mǐ ma ɖe akpá e mǐ dó lɛ́ é ǎ ɔ, mǐ ná dó xomɛsin nú mɛ ɖěvo lɛ́. (Mat. 5:37) Ði kpɔ́ndéwú ɔ, Jexóva nɔ ɖó nukún ɖo jǒnɔ tɔn lɛ́ sí ɖɔ yě ní ɖe alɔwlíwlí sín akpá e yě dó é. Ényí mɛjitɔ́ lɛ́ dó gǎn kpó ayi yětɔn bǐ kpó, bo ɖe akpá e yě dó nú vǐ yětɔn lɛ́ é ɔ, é nɔ lɛ́ víví n’i. Wǎn e mǐ yí nú Mawu kpó nɔzo mǐtɔn lɛ́ kpó é ná sísɛ́ mǐ bɔ mǐ ná kpo ɖo akpá e mǐ dó lɛ́ é ɖe wɛ lěe mǐ kpé wú gbɔn é bǐ.

16. Ðɔ ali ɖěvo e nu è nɔ wlí yɛ̌yi nú xɔ́ntɔn Jexóva tɔn lɛ́ ɖe é.

¹⁶ Ali ɖěvo e nu mǐ ná nɔ wlí yɛ̌yi nú xɔ́ntɔn Mawu tɔn lɛ́ ɖe é wɛ nyí ɖɔ mǐ ná nɔ yí yě, bo ná nɔ hun alɔ dó ná nǔ yě. (Hlɔ̌. 12:13) Ényí mǐ nɔ zán hwenu ɖó kpɔ́ xá nɔví mǐtɔn lɛ́ dó ɖe ayi ɖ’ayǐ ɔ, é nɔ d’alɔ mǐ bɔ mǐ nɔ ná hlɔ̌nhlɔ́n xɔ́ntɔn e mǐ zun xá yě kpó Jexóva kpó é. Gɔ́ ná ɔ, ényí mǐ nɔ yí mɛ ɖěvo lɛ́ hǔn, kpɔ́ndéwú Jexóva tɔn xwedó wɛ mǐ ɖe.

NYI ALƆ NÚ WǍN YÍ NÚ AKWƐ́

17. Étɛ́wú akwɛ́xó ka wá tɔ́n ɖo Ðɛhan 15​gɔ́ ɔ mɛ?

¹⁷ Mǐ xa ɖɔ mɛ e nyí jǒnɔ Jexóva tɔn é ‘kún nɔ sa akwɛ́ ó. É kún ka nɔ ɖu nǔ ɖo nǔ mɛ dó táfú xomɛvɔ́nɔ ó.’ (Ðɛh. 15:5) Aniwú akwɛ́xó ka tɔ́n ɖo Ðɛhan énɛ́ mɛ? Ðó linlin e ma ɖo jlɛ̌ jí ǎ é ɖíɖó dó akwɛ́ wú sixú dó xomɛsin nú mɛ ɖěvo lɛ́ bo lɛ́ hɛn xɔ́ntɔn e mǐ zun xá Mawu é gblé. (1 Tim. 6:10) Ðo Biblu sín táan mɛ ɔ, mɛɖé lɛ́ nɔ kpa ɖo nɔví yětɔn e nyí wamamɔnɔ lɛ́ é wú gbɔn akwɛ́ví yí dó akwɛ́ e yě nya nú yě lɛ́ é jí gblamɛ. Gɔ́ ná ɔ, hwɛɖɔtɔ́ ɖé  lɛ́ nɔ yí gbe nú nǔɖuɖonǔmɛ bo nɔ dá hwɛ agɔ nú xomɛvɔ́nɔ lɛ́. Jexóva gbɛ́ wǎn nú nǔwalɔ mɔ̌hun lɛ́.—Ezek. 22:12.

18. Nǔkanbyɔ́ tɛ́ lɛ́ ka sixú d’alɔ mǐ bɔ mǐ ná gbéjé linlin e mǐ nɔ ɖó dó akwɛ́ wú é kpɔ́n? (Eblée lɛ́ 13:5)

¹⁸ É ná nyɔ́ ɖɔ mǐ ní gbéjé linlin e mǐ nɔ ɖó dó akwɛ́ wú é kpɔ́n. Kan nǔ élɔ́ lɛ́ byɔ́ hwiɖée: ‘Un ka nɔ fɔ́n bo nɔ ɖo tamɛ lin dó akwɛ́ kpó nǔ ɖěɖěe un sixú sɔ́ akwɛ́ dó xɔ lɛ́ é kpó jí wɛ wɛ a? Ényí un nya akwɛ́ ɔ, é ka nɔ lín tawun cóbɔ un nɔ sú, bo nɔ lin ɖɔ mɛ e nya nú mì é kún sɔ́ ɖó hudó tɔn ó wɛ a? Ényí un ɖó akwɛ́ ɔ, é ka nɔ zɔ́n bɔ un nɔ mɔ ɖɔ un nyí mɛ tají ɖé wɛ a? É ka nɔ zɔ́n bɔ alɔ hun dó ná nǔ mɛ nɔ vɛ́ wǔ nú mì wɛ a? Un ka nɔ dó hwɛ nɔví ce lɛ́ ɖɔ nǔ agbaza tɔn lɛ́ wɛ nɔ myá nukún nú yě ɖó yě ɖó akwɛ́ kpowun wútu wɛ a? Un ka nɔ zun xɔ́ntɔn xá dɔkunnɔ lɛ́ bo nɔ gɔn ya káká ɖé ké nú wamamɔnɔ lɛ́ wɛ a?’ É ɖo tají ɖɔ mǐ ní kan nǔ énɛ́ lɛ́ byɔ́ mǐɖée, ɖó Jexóva wlí yɛ̌yi nú mǐ bo byɔ́ mǐ ɖɔ mǐ ní wá nyí jǒnɔ émítɔn lɛ́. Mǐ sixú nya xɛ ɖo wǔ énɛ́ e è jɔ mǐ é jí gbɔn alɔ nyinyi nú wǎn yí nú akwɛ́ gblamɛ. Ényí mǐ wa mɔ̌ ɔ, Jexóva ná jó mǐ dó gbeɖé ǎ!—Xa Eblée lɛ́ 13:5.

JEXÓVA YÍ WǍN NÚ XƆ́NTƆN TƆN LƐ́

19. Étɛ́wú Jexóva ka ba ɖɔ mǐ ní wa nǔ ɖěɖěe xó è ɖɔ ɖo Ðɛhan 15​gɔ́ ɔ mɛ lɛ́ é bǐ?

¹⁹ Ðɛhan 15​gɔ́ ɔ fó kpó akpá élɔ́ kpó: “Mɛ e nɔ wa nǔ gbɔn mɔ̌ ɔ ná jɛ ayǐ gbeɖé ǎ.” (Ðɛh. 15:5) Ðɛhanwlántɔ́ ɔ ɖe nǔ tají e wú Mawu byɔ́ nǔ énɛ́ lɛ́ mǐ é xlɛ́ ɖo fí. Jexóva ba ɖɔ mǐ ní ɖó awǎjijɛ. Énɛ́ wú ɔ, é ɖe wě ɖěɖěe ná zɔ́n bɔ mǐ ná ɖu vǐví nyɔ̌ná kpó xɛnyaɖomɛjí kpó tɔn sín le lɛ́ é xá mǐ.—Eza. 48:17.

20. Étɛ́ lɛ́ mɛ e nyí jǒnɔ Jexóva tɔn lɛ́ é ka sixú ɖó nukún?

²⁰ Jǒnɔ Jexóva tɔn lɛ́ sixú ɖó nukún sɔgúdo ɖaaɖagbe ɖé. Mɛ ɖěɖěe gbigbɔ mímɛ́ sɔ́ lɛ́ é ná nɔ gbɛ ɖo jǐxwé ɖo “nɔtɛn gěgé” ɖěɖěe Jezu ko bló tuto tɔn ɖ’ayǐ nú yě lɛ́ é. (Jaan 14:2) Mɛ ɖěɖěe ɖó nukúnɖíɖó ayǐkúngban jí tɔn lɛ́ é ɖo nukún ɖó akpá e ɖo Nǔɖexlɛ́mɛ 21:3 mɛ lɛ́ é wɛ. É ɖo wɛn ɖɔ, yɛ̌yi wlí nú mɛ sín nǔ ɖaxó wɛ é nyí ɖɔ Jexóva ylɔ́ mǐ ɖɔ mǐ ní wá nyí jǒnɔ ɖo goxɔ émítɔn mɛ káká sɔ́yi!