1. Kijan Sòm 15:1-5 pé édé-nou ?

 ADAN awtik-la ki té avan la, nou aprann kè lèwvwè on moun ba Jéova vi a-y, Jéova pé envité-y anba tant a-y si moun-lasa ka fè sa ki fo pou rété bon zanmi èvè-y. Men ka pou nou fè pou nou rété bon zanmi èvè-y ? Sòm 15 la ka aprann-nou onlo biten asi sa (li Sòm 15:1-5). Sòm-lasa ka ban-nou plizyè konsèy ki ké édé-nou rété bon bon zanmi èvè Bondyé.

2. Lè David palé dè tant a Jéova, ka i dwèt té ka sonjé ?

² Mi konsa Sòm 15 la ka koumansé : « O Jéova, kimoun ki ké envité adan tant a-w ? Kimoun ki ké pé rété adan montangn a-w ki sakré ? » (Sòm 15:1). Lèwvwè David palé dè « tant » a Jéova adan sòm-lasa, pétèt sé tabèwnak-la i té ka sonjé. Pannan on tan, tabèwnak-la té Gabaon. Men David palé osi dè ‘montangn a Bondyé ki sakré’. Alò pétèt i té ka sonjé tant-la ki té asi mòn Syon la, a Jérizalèm. Koté-lasa té ka touvé-y a plizyè kilomèt o sid a Gabaon é sé koté-lasa David té monté on tant pou mèt awch a alyans-la annatandan yo té konstwi tanp-la (2 Sam. 6:17).

3. Poukwa nou bizwen konprann sa Sòm 15 la ka di ? (gadé imaj-la osi).

³ Kon nou sav, lamajorité a sé Izraélit-la pa té ni dwa travay adan tabèwnak-la. Sé on tikrazi moun sèlman ki té pé rantré adan tant-la, koté-la awch a alyans-la té yé la. Men adan on sans, Jéova té’é pé akéyi tout sèwvitè a-y ki té fidèl anba tant a-y siwvwè yo té ka vin bon zanmi èvè-y é si yo té ka fè ansòt pou yo pa jen pèd lanmityé-lasa. Nou osi, sé sa noutout anvi. Sé pousa nou ké ègzaminé Sòm 15 la. Adan sòm-lasa, yo ka palé dè sèwten kalité pou nou ni pou nou rété bon zanmi èvè Jéova.

 TOUJOU AJI BYEN É PRAN LABITID FÈ SA KI DWÈT

4. Menmsi nou batizé, sa pa ka sifi pou nou bon bon zanmi èvè Jéova. Poukwa nou ka di sa ? (Izayi 48:1).

⁴ An Sòm 15:2, yo ka di kè moun-la ki zanmi èvè Bondyé sé « sila ki toujou ka aji byen » é « ki ni labitid fè sa ki dwèt ». Sé mo-la « toujou ka aji » é « ni labitid fè » ka montré kè sé on biten pou nou fè akontinyé. Men ès nou pé aji byen toutlè ? Wi nou pé fè sa. Menmsi pa ni pon moun ki pawfè asi latè, pou Jéova, nou ka aji byen siwvwè nou ka fè tousa nou pé pou fè sa i ka mandé-nou fè. Lèwvwè nou ba Jéova vi an nou é kè nou pran lèbatèm, sé koumansé nou koumansé vwayajé èvè-y. Pa ègzanp, an tan a Labib, a pa paskè on moun té ka fè pawti a nasyon a Izrayèl kè Jéova té oblijé envité-y anba tant a-y. Ni sèwten moun ki té ka priyé-y men sé té dé moun « ki pa [té] ni tchè sensè é ki pa [té] jis » (li Izayi 48:1). Pou on Izraélit té montré kè i té vréman anvi rété anba tant a Jéova, fò i té aprann sa Jéova té ka mandé-y é fò i té apliké sa i té aprann. Sé menm biten-la jòdijou. Menmsi nou batizé é kè nou k’ay adan sé réinyon-la, sa pa ka sifi pou nou bon bon zanmi èvè Jéova. Fò-nou « ni labitid fè sa ki dwèt ». Ka sa vé di ojis ?

5. Ka sa vé di obéyi Jéova adan tout domenn a vi an nou ?

⁵ Pou Jéova, a pa pas on moun kay réinyon chak simenn adan on sal di Wayòm kè i « toujou ka aji byen » é kè i « ni labitid fè sa ki dwèt » (1 Sam. 15:22). Kifè, fò-nou fè bon éfò pou nou obéyi Bondyé adan tout domenn a vi an nou, menm lèwvwè nou tousèl (Pwov. 3:6 ; Ékl. 12:13, 14). É sa enpòwtan kè nou fè sa osi menm lèwvwè nou ka fè on biten ki pa ni tèlman enpòwtans. Lè nou ka aji konsa, nou ka montré kè nou enmé  Bondyé an nou vréman é davwa nou ka fè sa, i pi enmé-nou ankò (Jan 14:23 ; 1 Jan 5:3).

6. Dapré Ébré 6:10-12, ka ki pi enpòwtan ki tout sé bon biten-la nou ja ni lokazyon fè la pou Jéova ?

⁶ Pou Jéova, tousa nou ja ni lokazyon fè ba-y ni onlo valè. Men a pa enki paskè nou ja fè onlo bon biten nou ké pé rété anba tant a Jéova. Sé sa nou ka vwè an Ébré 6:10-12 (li-y). Jéova pa ka oubliyé tout sé bon biten-la nou ja fè la. Men sa i vé, sé kè nou kontinyé sèvi-y èvè tout nanm an nou « jiskatan lafen rivé ». Pou rékonpansé-nou, i ké rété zanmi èvè nou pou létèwnité « si nou pa las fè sa ki byen » (Gal. 6:9).

DI LAVÉRITÉ ADAN TCHÈ A-W

7. Lè on moun ka ‘di lavérité adan tchè a-y’, ka sa vé di ?

⁷ Pou nou rété bon zanmi èvè Jéova, kivédi pou nou rété anba tant a-y, fò nou ‘di lavérité adan tchè an nou’ (Sòm 15:2). Ès sa vé di kè dépi nou pa’a manti, nou bon ? Awa. Jéova vé pa nou aji kon moun ki malonnèt lè nou ka di on biten oben lè nou ka fè on biten (Ébr. 13:18). É sa enpòwtan pas « Jéova hay on kouyonnè, men i bon zanmi èvè moun ki ka maché dwèt » (Pwov. 3:32).

8. Ka nou pa dwètèt fè ?

⁸ Moun ki ‘ka di lavérité adan tchè a yo’ pa ka fè sanblan obéyi Bondyé douvan lézòt alòskè lèwvwè yo tousèl, yo pa’a suiv lwa a-y (Iz. 29:13). Yo pa ka éséyé kouyonné ponmoun. On moun ki ka éséyé kouyonné lézòt pé mété-y ka pansé kè délè sa pa vo lapenn kè nou suiv lwa a Jéova (Jak 1:5-8). I pé rivé a pa kouté Jéova adan sèwten domenn pas pou-y sé biten-lasa pa ni enpòwtans. Aprésa, si i ka vwè kè ayen pa’a rivé-y magré i ka dézobéyi, i pé pran sa pou labitid é fè dé biten ki pi mové. Menmsi i ka kwè kè i ka sèvi Bondyé, pou Jéova moun-lasa ka aji kon on moun ki ipokrit (Ékl. 8:11). Men nou, nou vé aji kon moun ki réglo adan tousa nou ka fè.

9. Ka ki pasé 1^é fwa Jézi jwenn Natanaèl, é ka sa ka aprann-nou ? (gadé imaj-la osi).

⁹ Sa vréman enpòwtan kè on moun di lavérité adan tchè a-y. Nou pé vwè sa adan sa ki  rivé lè Jézi é Natanaèl jwenn pou 1^é fwa. Lè Filip menné Natanaèl owa Jézi, ni on biten èstraòwdinè ki fèt. Mi sa Jézi ni lokazyon di lè i vwè Natanaèl : « Mi on Izraélit ki vréman pa ni pon lidé a kouyonné moun an tèt a-y » (Jan 1:47). Sèten pou Jézi sélézòt disip-la sé té dé moun ki té sensè, men i vwè sa plis ankò lè i gadé Natanaèl. Natanaèl té enpawfè kon noumenm. Pawkont, i pa té ni pon tras a ipokrizi an tchè a-y. Jézi touvé sa bèl toubònman é i félisité-y pou sa. A pa ti kontan nou té’é kontan siwvwè Jézi té ka di sa osi pou nou !

10. Poukwa fò-nou fè atansyon a sa nou ka di ? (Jak 1:26).

¹⁰ Pawmi sé konsèy-la nou ka touvé adan Sòm 15 la, onlo adan yo ka konsèwné jan nou ka aji èvè lézòt. Vèwsé 3 la ka di kè on moun Jéova envité anba tant a-y « pa ka manti pou fè moun mal èvè lang a-y, i pa ka fè pwochen a-y ditò anponjan, é i pa ka sali répitasyon a zanmi a-y ». On moun ki ka di dé biten pou fè lézòt ditò pé fè moun soufè onlo é anfinaldikont pétèt Jéova pé ké lésé on moun konsa rété anba tant a-y ankò (li Jak 1:26).

11. Siwvwè on moun ka manti asi ondòt moun pou fè-y ditò é siwvwè i pa ka rèpanti-y, ka i ké rivé-y ?

¹¹ Moun-la ki maké Sòm-lasa ka palé dè sa on moun pé di asi ondòt moun pou sali répitasyon a-y alòskè sa pa vré. Si on moun ka aji konsa é kè i pa ka rèpanti-y, i pé pa rété adan lasanblé-la (Jér. 17:10).

12-13. Adan ki sitiyasyon nou té’é pé sali répitasyon a on zanmi an nou san nou fè-y pa èspré ? (gadé imaj-la osi).

¹² Sòm 15:3 ka fè-nou sonjé osi kè on moun Jéova envité anba tant a-y pa ka fè pwochen a-y ditò anponjan é i pa’a sali répitasyon a zanmi a-y nonplis. Kijan nou té’é pé rivé a fè on biten konsa ?

¹³ Nou té’é pé sali répitasyon a on moun san nou fè-y pa èspré siwvwè nou té ka  rakonté dé biten ki négatif anlè moun-lasa. Pa ègzanp, imajiné sé sitiyasyon-lasa : 1) On sè pa pyonyé ankò, 2) on frè é madanm a-y ka lésé Bétèl-la é 3) on frè pa ansyen oben pa asistan ankò. Sa pa té’é byen siwvwè nou té ka di dòt frè é sè kè sé pétèt pas i fè on mové biten sa rivé-y. Pétèt ni dé biten nou pé pa menm imajiné dèyè sa. Anplisdisa, an-nou sonjé kè sila Jéova envité anba tant a-y la « pa ka fè pwochen a-y ditò anponjan, é i pa ka sali répitasyon a zanmi a-y. »

ONORÉ MOUN KI KA KRENN JÉOVA

14. Èspliké kijan sé moun-la Jéova envité anba tant a-y la ka ba « vyé jan-dè-moun » do a yo.

¹⁴ Sòm 15:4 ka di kè on moun ki zanmi èvè Jéova « pa ka mélé-y èvè vyé jan-dè-moun ». Kijan nou pé sav kè on moun sé on vyé jan-dè-moun ? Konm noutout enpawfè, nou pé pa pran asi nou pou di kè tèl moun oben tèl moun sé on vyé jan-dè-moun. Poukwa nou ka di sa ? Paskè pi souvan ki rarman, lè nou byen enmé jan a on moun, nou ka antann-nou byen èvè-y, men lèwvwè nou pa gè enmé jan a on moun, nou ka ni dimal a enmé moun-lasa. Sé pousa, sé enki moun Jéova ka di kè yo sé dé « vyé jan-dè-moun » pou nou bay do an nou (1 Kor. 5:11). Pa ègzanp, pawmi sé moun-lasa ou ka touvé moun ki ka fè mové biten é ki pa ka rèpanti-yo, moun ki pa ka rèspèkté kwayans an nou oben ki ka éséyé fè-nou pèd lanmityé an nou èvè Jéova (Pwov. 13:20).

15. Kijan nou pé ba ‘moun ki ka krenn Jéova lonnè’ ?

¹⁵ Men Sòm 15:4 aprézan ka mandé-nou-nou ba ‘moun ki ka krenn Jéova lonnè’. Sé pousa nou ka chèché a vwè kijan nou pé aji èvè bonté é èvè rèspé épi zanmi a Jéova (Wom. 12:10). Kon nou ka vwè-y an fen a vèwsé-lasa, nou pé fè sa osi lèwvwè nou ‘ka tchenn a mo an nou, menmsi sa ka kouté-nou chè’. Si nou pa ka tchenn pwomès nou ka fè, nou pé rivé a fè lézòt ditò toubònman (Mat. 5:37). Pa ègzanp, Jéova vé kè moun i envité anba tant a-y rèspèkté pwomès-la yo fè la lèwvwè yo mayé. É i kontan lèwvwè sé paran-la ka fè éfò pou tchenn a mo a yo lè yo pwomèt timoun a yo on biten. Lanmou nou ni pou Bondyé é lanmou nou ni pou pwochen an nou ké pousé-nou a fè tousa nou pé pou nou tchenn a mo an nou.

16. Kidòt biten nou pé fè pou onoré zanmi a Jéova ?

¹⁶ Ondòt biten nou pé fè pou onoré zanmi a Jéova, sé akéyi-yo byen é pawtajé sa nou ni èvè yo (Wom. 12:13). Lèwvwè nou ka pasé dé ti moman pou détann-nou èvè frè é sè an nou, nou ka vin pi bon zanmi èvè yo é èvè Bondyé an nou osi. Anplisdisa, lèwvwè nou ka akéyi lézòt byen, nou ka imité Jéova.

VÉYÉ-W POU-W PA VIN ENMÉ LAJAN

17. Poukwa yo ka palé dè lajan adan Sòm 15 la ?

¹⁷ An Sòm 15:5, nou ka li kè on moun ki envité anba tant a Jéova « pa ka prété lajan a-y pou i mandé on entéré asi-y, i pa ka pran lajan anba tab pou i akizé on inosan ». Poukwa yo ka palé dè lajan adan sòm-lasa ? Pas siwvwè nou enmé lajan, nou pé rivé a fè lézòt lapenn é nou pé rivé a pèd lanmityé an nou èvè Bondyé osi (1 Tim. 6:10). An tan a Labib, sèwten moun té ka pwofité asi do a frè a yo ki té maléré. Yo té ka prété-yo lajan men yo té ka mandé on entéré asi-y. Anplisdisa, sèwten jij té ka aksèpté lajan anba tab pou kondanné moun ki té inosan. Jéova hay sé kalté biten-lasa (Ézék. 22:12).

18. Ki kèsyon nou pé pozé-nou pou sav ka nou ka pansé dè lajan ? (Ébré 13:5).

 ¹⁸ Siwvwè nou ka analizé-nou pou sav ka nou ka pansé dè lajan, sé ké on bon biten pou nou. Alò, mi sa pou mandé-w : « Ès an toujou ka sonjé lajan é tout sé biten-la an té’é pé achté la èvè lajan-lasa ? Siwvwè an mandé on moun prété-mwen lajan, ès an ka tadé pou woumèt-li lajan a-y pas an ka di-mwen kè i pa bizwen lajan-lasa ? Ès an ka santi-mwen pi gran jan dè moun ki ponmoun pas an ni lajan ? Ès an ka rivé wouvè men an mwen fasilman pou pawtajé èvè lézòt ? Ès pou mwen, dépi on frè oben on sè ni lajan sa vé di kè i pi enmé lajan kè i enmé Jéova ? Ès lè an ka jwenn on moun ki ni onlo onlo lajan, an ka chèché a vin zanmi a-y é lè sé on ti maléré aprézan, an pa menm ka lévé-y di gad ? » Lèwvwè Jéova envité-nou, sé on bèl lonnè i fè-nou toubònman. Men pou nou pa pèd bèl lonnè-lasa, fò nou véyé-nou pou nou pa vin enmé lajan. Si nou ka fè sa, Jéova pé’é jen lagé-nou ! (li Ébré 13:5).

JÉOVA ENMÉ ZANMI A-Y

19. Poukwa Jéova vé kè nou suiv sa i ka mandé-nou fè adan Sòm 15 la ?

¹⁹ Sòm 15 la ka fin èvè pwomès-lasa : « On moun konsa pé ké jen bigidi » (Sòm 15:5). Moun-la ki maké sòm-lasa ka èspliké poukwa Jéova vé kè nou suiv sa i ka mandé-nou fè. Sé pas i vé nou ni tchè-kontan. Lè i ka mandé-nou fè on biten, sé pou byen an nou é sé pou pwotéjé-nou (Iz. 48:17).

20. Ki bèl landèmen moun Jéova envité anba tant a-y ké ni ?

²⁰ Sé moun-la Jéova envité anba tant a-y la ké ni on landèmen ki ké bèl toubònman. Sé wen-la ké viv ‘koté-la Jézi préparé’ pou yo la an syèl-la (Jan 14:2). Séla ki ka èspéré viv asi latè pou touttan ké vwè sé pwomès-la nou ka touvé an Révélasyon 21:3 réyalizé é yo ké kontan vwè sa. Asirésèten, nou ni on bèl lonnè toubònman davwa Jéova envité-nou a vin zanmi a-y, é a rété anba tant a-y pou touttan !