1. Mósĩ́ deè ní e nú ea di mm̀ kpá Psalm 15:​1-5 é láá nvèè bá nèi ẽ́?

 MM̀ TOGÓ bel e ã́àa nòa, e beè nó kọọ̀ gbò e ba ni kin lóó nè Jìhóvà é láá dú gbò kyáà mm̀ a tọ kàn e dẽè nen náa moàa, tení dú ló gè zọ̀ẹ bã̀àà díì-díílá kóò. Sõò, éé ní eé láá naa kọbé è láá zọ̀ẹ bã̀àà kóò é? Kpá Psalm 15 togó kọ́ gbò nú eé láá naa. (Bugi Psalm 15:​1-5.) Èé nó gã́bug nu ea é agẹlẹ ló bẹẹ gbaa ló kilma ló Bàrì lọl mm̀ kpá psalmí.

2. Éé ní ea beè láá naa kọọ̀ neǹ ọ́lì sọ́l Dévìd á ló bel kilma ló tọ kàn Jìhóvà ẹ?

² Gbò bíb ea kọ́ọ̀: “Oló Jìhóvà, mée ní eo é kólí kyáà nvee mm̀ o tọ kàn ẽ? Mée ní ea é tõó boo o gù ea di káí é?” ní ea daaà togó kpá Psalm 15 togó é (Ps. 15:1) Tṍó e neǹ ọ́lì sọ́l Dévìd ló bel kilma ló “tọ kàn” Jìhóvà, àé láá dú kọọ̀ à géè bugi togó boo tọ kàn káí ea beè di Gíbìòn. Dévìd beè lo nagé bel kilma ló boo ‘gù Jìhóvà ea di káí’ e be à sẹlẹ àé láá dú boo “gù Záíọ̀n” ea beè di Jèrúsalẹ̀m. Deè kpọ̀lọ̀-kpọ̀lọ̀ ea di Gíbìòn ní e Dévìd beè tìb tọ kàn e ba beè tú kpó zíl Jìhóvà sẹlẹ́ m dọ̀ọ̀mà tṍó e bà tib tọọ̀ káíá lọ̀l ẹ.​—2 Sám. 6:17.

3. Éé ní ea náa vaá à dú bíi kọ é ié lèèma mm̀ nú ea di mm̀ kpá Psalm 15 togóé? (Ẹ̀b nàgé fòtó.)

³ À dú kà-kà kọọ̀ gã́bug pá Ízràẹ̀l náa géè sí tóm mm̀ tọ kàn káíá, vaá bà náa beè sọ̀ nágé tọ́ deè kọ bàá bã mm̀ tọ kàn e kpó zílá beè dì. Sõò, kọ̀láá kà gbò gyóòlo  Jìhóvà e bà bọ́ló dẹ̀lẹ̀ nyíé boo é láá dú neǹ kyáà mm̀ a tọ kàn e dẽè nen náa moàa, tení dú ló gè bã̀ààe kóò vaá kilsĩ́ gè naa gbò nú ea é agẹlẹ ló ba gbaa ló kilma ló Jìhóvà. Níà nú e dénè bẹ̀ì gbĩ́ gè naa ẽ́. Kpá Psalm 15 togó kọ́ gbò kpãa ea dú bíi kọ é toní kọbé è láá kilsĩ́ gè dú kóò Jìhóvà.

NAA NÚ E KỌ̀BÈL Á GÉ LÓ VAÁ Ò NÁA NÚ EA LELÀ

4. Éé ní ea náa vaá è nyimá kọọ̀ níì áá ge dììa múú ní e Jìhóvà gbĩ́ kọ é náa ẽ́ nì ẽ? (Àìzáíà 48:1)

⁴ Kpá Psalm 15:2 kọ́ọ̀, nen ea dú kóò Bàrì dú “nen e náa íe kọ̀bèl, ea gé náa nú ea lelà.” Moǹ bel e bà lóómá bel mm̀ dọ̀ Kpá Káíí tõó dọ̀ ge kilsĩ́ gè naa. Sõò é kọ èé láá naa nú e “kọ̀bèl” á gé ló? Ẽei. À dú kà-kà kọọ̀ tọ́ọ̀ nen náa gbõoma, sõò Jìhóvà é ẹbvíi naamá gbò e née íè “kọ̀bèl” be è piigà bé e bẹẹ kpóó sim tùlà naa ge gbànee tṍ ló. Ge kìn lóó nè Bàrì vaá dììa múú ní ea dú dààà togó bẹẹ gè naa nú ea léémá Bàrì e. Dì belí nu dòòmà bá, tṍó e bà géè emí Kpá Káíá, áá gè kọọ̀ nen dú Ízràẹ̀l náa beè túe naamá kóò Jìhóvà. Sìgà gbò beè kolí béè Bàrì, sõò bà náa beè naa vó “mm̀ kà-kà nè lé lab dògò.” (Bugi Àìzáíà 48:1.) A beè dú bíi kọọ̀ pá Ízràẹ̀l e bà gbĩ́ gè naa nú ea léémá Jìhóvà á nó gbò nú e Jìhóvà gbĩ́ kọ bàá naa. Mm̀ tẽ̀ènè sĩ́deèá, deè nieí, kọbé è láá ié kà lé gbaa ló kilma ló Jìhóvà níì áá gè dììa múú vaá kọ̀là Gbò Neǹ Ditõ̀ò Jìhóvà ní ea dú bíi kọ é naa ẽ́ nì. Sõò èé íè ge kilsĩ́ gè ‘naa nú ea lelà.’ Mósĩ́ deè ní eé láá naa vó é?

5. Éé ní e gè gbàntṍ ló Jìhóvà mm̀ kọ̀láá kà nu bãàà m ẽ́?

⁵ Kilma kĩée e Jìhóvà dì, ge kọọ̀ nen “náa íe kọ̀bèl” vaá à gé “náa nú ea lelà” bọọ èlmà áá gè sí nònù. (1 Sám. 15:22) Mm̀ kọ̀láá kà nú e gé náa, à bọ́ló kọ é  pììgà ge naa nú ea léémá Bàrì, bã̀àna tṍó ea dú áá bẹ̀ì. (Pró. 3:6; Ẹ̀klì. 12:​13, 14) Kọbèè tṍó e nú e gé náa dú ńkem, à palàge dú bíi kọ é gbàntṍ ló Jìhóvà. Tṍó e náà vó, è zógè kọọ̀ è vulèe, vaá níí é náa kọọ̀ Jìhóvà á palàge vùlèi.​—Jọ́ọ̀n 14:23; 1 Jọ́ọ̀n 5:3.

6. Dẹ̀ẹ̀a boo nú ea di mm̀ kpá Híbrù 6:​10-12, éé ní ea palàge dú bíi èlmà gbò tóm e beè sí mm̀ bọ́ọ̀ló dẹ̀lẹ̀ nyíé boo nè Jìhóvà ẹ?

⁶ Jìhóvà palàge nvèè ka ló gbò nú e ni náa nèe. Sõò, áá gè kọọ̀ e beè bọ́ló dẹ̀lẹ̀ nyíé boo nèe tṍó ea kil nvéeá náa é náa kọ é kilsĩ́ gè dú a kóò. Níí dọa bàlà kẽ mm̀ kpá Híbrù 6:​10-12. (Bugi.) Gbò nú e beè naa nè Jìhóvà náa ólò táẹ́ nyíe. Sõò, à gbĩ́ kọ é fãèe tẹlẹ “ke kùbmà” lọa mm̀ dénè bẹẹ nyíe. Àé dú bẹẹ kóò dọ̀ọ̀mà dè-dè ‘be née gbaaà aa nvéè’ ge naa nú ea dú lé.​—Gàl. 6:9.

LÓ KÀ-KÀ BEL LỌL MM̀ O NYÍE

7. Éé ní e gè ló kà-kà bel lọa mm̀ dénè o nyíe bãàa m ẽ́?

⁷ Nen ea gbĩ́ gè dú kóò Jìhóvà é íè ge ló “kà-kà bel lọl mm̀ a nyíe.” (Ps. 15:2) Níí bọọ èlmà ge kọ nóo kpọ́ọ̀ kyáá bel. Jìhóvà gbĩ́ kọ é ló kà-kà bel mm̀ kọ̀láá kà nú e náà nè bel e lóò. (Híb. 13:18) À palàge dú bíi kọ é naa vó, “boo béè kọọ̀ Jìhóvà ọ́bví neǹ kẹ̀lẹ̀, sõò à ólò zọ̀ nen ea tõo lèlà bã̀àà díì díílá kóò.”​—Pró. 3:32.

8. Mókà láb ní ea bọ́ló kọ é kpòòlà lóó lọl ló é?

⁸ Gbò e bà ‘ló kà-kà bel lọl mm̀ dénè ba nyíe’ náa ólò sẹlẹ ló belí kọ bà gbanìè tṍ ló Bàrì gbẹá kĩée e gbò nen dì, vaá tṍó ea é dú áá ọ̀và bà náa nú ea dú pọ́lọ́. (Àìz. 29:13) Bà náa ólò tõó dùm ge kẹ̀lẹ̀ nen. Neǹ kẹ̀lẹ̀ ólò ẹ̀b kọ nyìmànù á gé mm̀ gbò log e Jìhóvà ne. (Jém̀z 1:​5-8) À ólò lọ̀l togó kèbá Jìhóvà tṍó ea tõó ẽ́ ló kọọ̀ logá náa bọọgẹ̀ dú bíi. Beè tọ́ọ̀ kà pọ́lọ́ nu náa silà aa mm̀ a lọ̀l togó kèbá, à ólò gbóó kilsĩ́ gè náa nú ea bẽ́émá Bàrì vaá dú neǹ bààsĩ́. (Ẹ̀klì. 8:11) Vóà naa, è gbĩ́ gè bọ́ló dẹ̀lẹ̀ nyíé boo mm̀ kọ̀láá kà nú eé náa.

9. Éé ní eé láá nó lọl ló nú ea beè naaá túá tṍó e Jíízọ̀s mon Nàtánìẹ̀l e? (Ẹ̀b nàgé fòtó.)

 ⁹ À palàge dú bíi kọ é ló kà-kà bel. Nú ea beè naaá túá tṍó e Fílìp kólí a kóò Nàtánìẹ̀l kọ á dù gé mòn Jíízọ̀s zógè kọ níí palàge dú bíi. Náa kal ló béè kọọ̀ níà túá tṍó e Jíízọ̀s gé mon Nàtánìẹ̀l e, Jíízọ̀s beè kọọ̀: “Ẹlẹí ní kà lèlà sĩ́ neǹ Ízràẹ̀l e. Tọ́ọ̀ kà kẹ̀lẹ̀ á géé m.” (Jọ́ọ̀n 1:47) À dú kà-kà kọọ̀ Jíízọ̀s beè ẹ̀b kọ pá a gbò nyòòne nvéè ólò ló kà-kà bel, sõó a beè mòn kọọ̀ Nàtánìẹ̀l dú nen e tọ́ọ̀ kà kẹ̀lẹ̀ á géé m. Nàtánìẹ̀l náa beè gbõoma belí nágé beele, sõò náa beè dú neǹ bààsĩ́ tãa vó, a beè olòó ló kà-kà bel dénè tṍó. Bé ea tõó dùm naa beè palàge leemá Jíízọ̀s naa ní ea leelàẹ. Àé léémá nágé dénè bẹ̀ì kọ Jíízọ̀s á ẹ̀bvii naa vó!

10. Éé ní ea náa vaá à dú bíi kọ é kìn ge ló bel e náa bọ́ló é? (Jém̀z 1:26)

¹⁰ Gã́bug nú ea di mm̀ kpá Psalm 15 togó kọ́ nú ea kil ló bá eé láá sẹ̀ẹ̀mà dõona gbò. Kpá Psalm 15:3 kọ́ọ̀, nen ea dú kóò Jìhóvà “Náa ólò tenmà dém ló nen, náa ólò naa tọ́ọ̀ nú ea dú pọ́lọ́ kilma ló dõona nèn, vaá náa ólò kyọ̀ béè pá a kóò.” Be è ló bel e náa bọ́ló àé láá kyọ̀ nu ló dõona gbò vaá naa kọ é gá du ná kóò Jìhóvà.​—Bugi Jém̀z 1:26.

11. Éé ní e gè tenmà dém ló nen tõó dọ̀ ẹ, vaá éé ní e bà ólò naa nen ea ólò tenmà dém ló nen e náa zigà ge nyaaá ẽ́?

¹¹ Neǹ ọ́lì sọ́l kọ́ nú ea kil ló gè tenmà dém ló nen. Éé ní e gè tenmà dém ló nen tõó dọ̀ ẹ? Ge tenmà dém ló nen tõó dọ̀ ge ló bel e náa dú kà-kà ea é kyọ béè dõona nen. Bà ólò kpó nen ea ólò tenmà dém ló nen vaá náa zigà ge nyaaá lọl mm̀ bõ̀ònatõ̀ò.​—Jèr. 17:10.

12-13. Kèbá mókà gbò dìtõ̀ò ní eé láá kyọ̀ béè dõona gbò e? (Ẹ̀b nàgé fòtó.)

¹² Kpá Psalm 15:3 kẽeí nyíe kọọ̀ nen ea dú kóò Jìhóvà náa ólò naa tọ́ọ̀ kà  nú ea dú pọ́lọ́ kilma ló dõona nèn, vaá náa ólò kyọ̀ béè pá a kóò. Éé ní e níá tõó dọ̀ ẹ?

¹³ Èé láá kyọ̀ béè dõona nèn tṍó e néè noo, be è dõgẽ ló bel ea dú pọ́lọ́ kìlmà va ló. Dì belí nu dòòmà bá, be ò nyímà ló: (1) enè kà vígà pábia e náa dú ná neǹ gyà deèsĩ́ tóm kọ̀ kpẹ̀a, (2) ene kà dóm nè va e ba beè olòó sí tóm bẹ́tẹẹ̀l e bà náa gé sí ná, àbèè (3) ene kà vígà págbálà ea géè sí tóm dì belí neǹ kànen àbèè neǹ nvèè bá sìtóm e náa gé sí ná. Àé dú pọ́lọ́ be è dõgẽ kọ́ nè dõona gbò kọọ̀ ba beè naa nú ea dú pọ́lọ́ vaá níà nú ea náa kọ bàá lọ̀l va gbò dọ̀ tómá báẹ́. Àé láá ié gã́bug nú ea náa kọ bàá lọ̀l va gbò dọ̀ tómá bá e née nyímà. Vóà naa, nen ea dú kóò Jìhóvà “náa ólò naa tọ́ọ̀ nú ea dú pọ́lọ́ kilma ló dõona nèn, vaá náa ólò kyọ̀ béè pá a kóò.”

NVÈÈ KA LÓ GBÒ E BÀ SÍÍÁ PỌ̀ LÓ JÌHÓVÀ

14. Baatẽ́ bé e nen ea dú kóò Jìhóvà é láá “kìn kọ̀láá nen ea íe pọ́lọ́ dùm” naa.

¹⁴ Kpá Psalm 15:4 kọ́ọ̀, nen ea dú kóò Jìhóvà “ólò kìn kọ̀láá nen ea íe pọ́lọ́ dùm.” Mósĩ́ deè ní eé láá naa vó é? Boo béè kọ née gbõomà, náa bọ́ló kọ é beelá bel ló nen kọ à íe pọ́lọ́ dùm boo béè bé e beele ẹb nu naa. Ló éé? Boo béè kọọ̀ sìgà gbò é láá leemái naa ní eé láá zọ̀va naaá nu boo tṍó e sìgà gbò é láá bẽemái. Boo béè vó, èé kin áá gbò e bà tõó dùm e Jìhóvà ẹb kọ à dú “pọ́lọ́.” (1 Kọ́r. 5:11) Naamá gbò e bà náa zigà ge ọgá aa ló gè naa nú ea dú pọ́lọ́, gbò e bà náa fã dẽè gbò nú e zigà ló, nè gbò e bà ólò naa nú ea é ọọvẹ ló bẹẹ gbaa ló kilma ló Jìhóvà.​—Pró. 13:20.

15. Mósĩ́ deè ní eé láá zogè kọ è nveè ka ló “gbò e bà sííá pọ̀ ló Jìhóvà ẹ”?

¹⁵ Kpá Psalm 15:4 kọ́ọ̀ é “nvèè ka ló gbò e bà sííá pọ̀ ló Jìhóvà.” Vóà naa, èé gbĩ́ gbò sĩ́deè eé láá fã̀ dẽe vaá íe lé nyíe kilma ló pá kóò Jìhóvà. (Róm̀ 12:10) Mósĩ́ deè ní eé láá naa vó é? Kpá Psalm 15:4 kọ́ enè sĩ́deè eé láá naamá vó. Kilma ló nen ea dú kóò Jìhóvà à kọ́ọ̀, “náa ólò òòà aa ló gè naa nú ea beè zìgà, bã̀àna tṍó e gè naa vó náa é lée é ló.” Tṍó e née náà nú e beè zìgà, nyíè dõona gbò ólò bììlà. (Máát. 5:37) Dì belí nu dòòmà bá, Jìhóvà gbĩ́ kọọ̀ dóm nè va á mm-mè nú e ba beè ziga deè ba ílà dóm nè va. Nyíè Jìhóvà ólò ẹẹ nagé tṍó e tẹ̀ nè kà mm-mè nú e ba beè zìgà nè ba gbò nvín. Vulè e íè kilma ló Bàrì nè gbò nen é náa kọ é mm-mè gbò nú e beè zìgà.

16. Mósĩ́ deè ní eé láá kpáá zogè kọ è nveè ka ló pá kóò Jìhóvà ẹ?

¹⁶ Dõona sĩ́deè eé láá nvèè ka ló pá kóò Jìhóvà dú gè kolí va kyáà vaá dõo nu nè va. (Róm̀ 12:13) Tṍó e zọọ̀ pá vígà naaá nu, à ólò naa kọọ̀ gbaa ló é íè kilma lò Jìhóvà nè ọ̀và á kpáá agaló. Nagé, è nóò Jìhóvà tṍó e kólì kyáà gbò nen.

Ó GÁ VÙLÈ KPÈGÈ ZELMÁ KẼ

17. Éé ní ea náa vaá neǹ ọ́lì sọ́l à ló bel kilma ló kpègè mm̀ kpá Psalm 15 togó é?

¹⁷ È bugì kọọ̀ nen e Jìhóvà é kọlí kyáà é dú nen e “náa ólò nè bọ́ọ̀lẹ̀ kpègè vaá tú nvín boo, náa ólò dé kpẽ́ nvée vaá ló bel bẽè nen e náa beè sí tọ́ọ̀ kà pọ́lọ́.” (Ps. 15:5) Éé ní ea náa vaá neǹ ọ́lì sọ́l à ló bel ea kil ló kpègè e? Boo béè kọọ̀ be è bọọgẹ̀ ká bùlà gbẹẹ́ boo kpègè, àé bọọí ló èlmà gbaa ló e íè kilma ló Jìhóvà nè dõona gbò. (1 Tím. 6:10) Tṍó e bà  géè emí Kpá Káíá, sìgà gbò beè tú pọ́lọ́ bá sẹ̀ẹ̀mà ba vígà boo béè kọ bà dú tãa, vaá tú nvín boo kpègè e bà bọọlẹ́ va. Nagé, sìgà gbò bèèla géè dé kpẽ́ nvée vaá beelá bel bẽè nen e náa beè sí tọ́ọ̀ kà pọ́lọ́. Gbò láb ea dì belí vóí palàge bẽemá Jìhóvà.​—Èzí. 22:12.

18. Be è gbĩ́ gè nyimá bé e ẹbvì kpègè naa, mókà gbò bíb ní eé láá bĩiná bẹẹ bá ẹ́? (Híbrù 13:5)

¹⁸ À dú bíi kọ é kpáá ẹ̀à bẹẹ lóó kilma ló bá e ẹbmà kpègè. Bĩiná o bá kọọ̀: ‘É kọ m̀ ólò bọọgẹ̀ bugi togó boo kpègè nè nu em é láá zalí? Be m̀ bọọlẹ kpègè bá nen, é kọ m̀ ólò ọọ ló gè kpẽ̀ vaá bugi togó kọọ̀ náa íena bíi ló? É kọọ̀ ge ié kpègè ólò naa kọ ḿ ẹ̀b nà bá kọ m̀ léè èl dõona gbò? É kọ à ólò tàvàlàḿ ló gè dõo nu taalẹ bá? É kọ m̀ ólò ẹ̀b pá vígà e bà íe gyọ́ belí kọ bà vulè kpègè èlmà Jìhóvà? É kọ à ólò leemám gè bã̀àà kóò gbò méné èlmà gbò tãa?’ È íè kà pọ̀bkà nèà deè ge bã̀àà kóò Jìhóvà. Èé láá nvèè ka ló nakà nèà deèí be née vulè kpègè. Be è náa vó, Jìhóvà náa é sọ́i bá gbẹẹ́ kẽ!​—Bugi Híbrù 13:5.

JÌHÓVÀ ÓLÒ VÙLÈ PÁ A KÓÒ

19. Éé ní ea náa vaá Jìhóvà à gbĩ́ kọ é naa kọ̀láá kà nu ea di mm̀ kpá Psalm 15 é?

¹⁹ Dee-deè nvéè tã́á bel ea di mm̀ kpá Psalm 15 dú zìgànù ea kọ́ọ̀: “Kọ̀láá nen ea náa gbò nuí, tọ́ọ̀ nu náa é kpõonàe.” (Ps. 15:5) Mm̀ dọ̀ Kpá Káíá, neǹ ọ́lì sọ́l kọ́ nú ea náa vaá Jìhóvà à gbĩ́ kọ é naa kọ̀láá kà nu e kpá Psalm 15 togóá kọ́. Jìhóvà gbĩ́ kọọ̀ nyíéi á ẹẹ. Vóà naa, tṍó e náà nú e Bàrì gbĩ́ kọ é naa, àé náa kọ é ié kpènà nè dĩ̀ìnè ló dùm.​—Àìz. 48:17.

20. Éé ní e pá kóò Jìhóvà gé ẹbmà dẽè ge ié é?

²⁰ Gbò e bà dú kóò Jìhóvà íe ẹ̀b dẽesĩ́ gè tõó dùm ea palàge dú lé dì deèsĩ́. Gbò e ba beè tṍ nóo ból e bà bọ́ló dẹ̀lẹ̀ nyíé boo é tõó káála kĩée Jíízọ̀s beè kpoogè dee ló sẹ̀ẹ̀va. (Jọ́ọ̀n 14:2) Gbò e bà íe ból dẽesĩ́ gè tõó mm̀ páradaìs boo kunukẽ̀í gé ẹbmà dẽè mm-me gbò zìgànù ea di mm̀ kpá Kùùà Nù 21:3. Mm̀ kà-kà, nyíéi palàge ẹẹ kọ Jìhóvà nveèi ka ló vaá kolíi kọ é duè pá a kóò dọ̀ dè-dè!