1. Stotr 15:1-5-antlean amkam koxi modot zata?

 FATTLEA lekhant ami xiklolim ki jim konn Jehova Devak aplem jivit somorpit kortat ani tachea sangata lagxilʼli ixttagot zoddttat, tankam Jehova aplea tombunt ieukar dita. Punn ami tachea tombunt sodanch ravonk sodhtat zalear ami kitem korunk zai tem amkam Stotr 15-nt sanglam. (Stotr 15:1-5, NW vachat. a) Hea stotrant, Jehova Deva sangata amchi ixttagot koxi ghott dovrunk zai tem sanglam.

2. Jehovachea tombu vixim Davidan boroilem tednam to ghoddie kitea vixim chintʼtalo?

² Stotr 15-chea survatek he prosn vicharlole asat: “Jehova Deva, tujea tombunt konn ieun ravonk xokta? Tujea povitr dongrar konnank ravonk mellot?” (St. 15:1, NW) Tor hea versant, Jehovachea ‘tombu’ vixim uloitana, David ghoddie Devachea povitr tombu vixim chintʼtalo zait, zo thoddea vella pasot Gibeonant aslo. Toxench, David Devachea ‘povitr dongra’ vixim uloilo tednam to Jeruzalemant aslolea Sion Dongra vixim uloitalo zait. Gibeonachea dokxinne vatte thaun zaite kilometr pois Davidan ek tombu bandlolo ani tea tombunt tannem korarachi arkpett dovorloli. Karonn tea vellar, Devmondir bandunk naslem.​—2 Sam. 6:17.

3. Stotr 15-nt jem sanglam tem ami kiteak zannam zaunk sodhtat? (Chitr pasun polloiat.)

³ Choddxea Izraelitkarank Devachea povitr tombunt seva  korunk mellonasli. Ani fokot bhov thoddeank korarachi arkpett asa thoim vochonk mellttalem. Punn Jehovachim soglim visvaxi sevokam, eka orthan tachea tombunt vochon ravonk xoktalim. Mhunnche, tachim ixttam zaunk xoktalim. Ani amkam pasun toxench korunk zai nhoi? Tor Jehova sangata amchi ixttagot ghott urtoli zalear ami kosle thodde gunn vaddounk zai tem Stotr 15-nt sanglam.

CHUKI VINNEM CHOLAT ANI SARKEM TEM KORIT RAVAT

4. Jehova sangata ghott ixttagot korunk ami fokot bautizm ghetlearuch puro nhoi oxem ami kiteak mhunnonk zata? (Izaias 48:1)

⁴ Stotr 15:2-ant (NW), zo munis “chuki vinnem cholta” ani “sarkem tem korit ravta” toch Jehovacho ixtt zaunk xokta mhunn sanglam. Hea versant sanglolea “cholta” ani “korit ravta” hea utrantlean, tem korit ravonk zai mhunn kollon ieta. Punn ek munis ‘chuki vinnem cholonk’ xokta kai? Ami opurnn asat tem khorem. Punn Jehovacheo adnea pallunk ami amchean zata tem soglem kortat zalear, ami ‘chuki vinnem choltat’ mhunn Jehova lekhta. Ami amchem jivit taka somorpit korun bautizm ghetat tednam ami chuki vinnem cholonk suru kortat. Tor bautizm fokot ek survat zaun asa. Punn dhean diat ki Bible kallar ek munis Izrael raxttracho bhag aslo hacho orth, to Jehovachea tombunt vochonk xoktalo oxem nhoi. Karonn thodde Izraelitkar Jehovak ulo martale khore, punn ‘khorea monan ani promannikponnan nhoi.’ (Izaias 48:1 vachat.) Tor ek Izraelitkar khoreponnim Jehovachea tombunt vochonk sodhtalo zalear, tannem kitem kelʼlem Jehovak zai tem xikon pallunk zai aslem. Teach bhaxen, aiz ami pasun Jehova sangata ghott ixttagot korunk sodhtat zalear, ami fokot bautizm gheun Kristi sobhecho bhag zalearuch puro nhoi. Ami ‘sarkem tem korit ravonk zai.’ Hantunt kitem mellon asa?

5. Soglea amchea kamamnim Jehovak manvota tem korop mhunnttlear kitem?

⁵ Jehovachea nodren ‘chuki vinnem cholop’ ani ‘sarkem tem korit ravop’ hacho orth, fokot  chukonastana Raj-ghorant mellon ievop itlench nhoi. (1 Sam. 15:22) Punn soglea amchea kamamnim, ani ami ekttinch astat tednam pasun, Jehova sangta tem korunk ami vavr korit ravonk zai. (Mho. 3:6; Up. 12:13, 14) Toxench, amkam titlim mhotvachim mhunn disonant tea kamamnim pasun taka manvota tem korop khub gorjechem. Oxem kelear ami tacho mog kortat mhunn dakhoitolim ani amchea pasot tacho mog anikui vaddttolo.​—Ju. 14:23; 1 Ju. 5:3.

6. Hebrevank 6:10-12-ntlean ami adim kelʼlea borea kamam poros kitem chodd mhotvachem mhunn kolltta?

⁶ Ami adim kelʼlea borea kamancho Jehova khub valor korta ani to tim kednanch visorna. Punn fokot amchea adlea borea kamank lagon ami sodanch Jehovachea tombunt ravonk pavtolim oxem nhoi. Hem amkam Hebrevank 6:10-12-ntlean kollon ieta. (Vachat.) Ami “xevott mhunnosor” purnn kallzan apleachi seva kelʼli Jehovak zai. Ani ami borim kamam korop ‘soddun dinant’ zalear to sasnak amcho Ixtt mhunn ravtolo.​—Gal. 6:9.

KALLZANT THAUN SOT ULOIAT

7. Kallzant thaun sot ulovop mhunnttlear kitem?

⁷ Ami sodanch Jehovachea tombunt ravonk sodhtat zalear ami ‘kallzant thaun sot ulounk zai.’ (St. 15:2, NW) Hacho orth, ami fott marop na itlench nhoi. Punn ami kortat tea soglea kamamnim, toxench amchea utramnim pasun ami promannik aslolim Jehovak zai. (Heb. 13:18) Ani oxem korop ekdom mhotvachem. Karonn “khottea monxak Dev vitteta, punn promannik monxacher To visvas tthevta.”​—Mho. 3:32.

8. Ami kosli vagnnuk apnnaunk sodhinant?

⁸ Zo munis ‘kallzant thaun sot uloina,ʼ to lokam mukhar apunn Devache kaide palltta mhunn dakhoita, punn eklo astana to te moddtta. (Iz. 29:13) To munis don tonddancho asta vo fottingponnam korta. Jehovache thodde kaide kainch faideache nhoi, oxem to chintʼta. (Jak. 1:5-8) Tea pasot, taka mhotvache mhunn disonant tea kamamnim to Jehovache kaide pallina. Jea mhunnosor aplea kamancho vaitt porinnam taka bhogcho poddona, tea mhunnosor to Devache kaide moddit ravta, ani anikui vaitt korit ravta. Taka ghoddie disot ki to Jehovachi bhokti korta. Punn Jehovak tachi bhokti manvona. (Up. 8:11) Ami oslim munxam kednanch zaunk sodhinant! Tachea bodlek, amchea soglea kamamnim ami promannik ravonk sodhtat.

9. Jezu poilech pavtt Nathanaelak mellʼllo tednam kitem zalem, ani tantuntlean ami kitem xiktat? (Chitr pasun polloiat.)

 ⁹ Kallzant thaun sot ulovop kitlem mhotvachem tem amkam Bible-antle eke ghoddnnentlean kolltta. Filipan aplo ixtt Nathanaelak Jezuk mellonk haddlo tednam kitem ghoddlem tacher dhean diat. Jezu Nathanaelak kednanch mellonk naslo. Tori astana, tannem tache vixim oxem mhunnttlem: “Polloiat, ho ek khoro Izraelitkar. Tachea bhitor koslench dhongiponn na.” (Ju. 1:47) Aple herui xis promannik asat mhunn Jezu zannam aslo. Punn Nathanaela vixim Jezun kitem tori khas polloilem. Nathanael amcheach bhaxen opurnn aslo tem khorem. Punn tachea bhitor koslench dhongiponn naslem. To soglea vostumnim promannik aslo. Tacho ho gunn Jezuk khub avoddlo ani tea pasot Jezun taka xabaski dili. Tor Jezun amkam-i oslech nodren polloilʼlem amkam zai nhoi?

10. Jehovan amkam dilʼli uloupachi tank ami bore toren kiteak uzar korunk zai? (Jakob 1:26)

¹⁰ Stotr 15-nt sangloleo zaiteo vostu, ami dusrea sangata koxim vagtat tea vixim asat. Punn Stotr 15:3-ant (NW), amchim utram koxim asonk zai tea vixim sanglam. Thoim mhunnttlam ki Jehovachea tombunt aslolo munis “aplea jiben dusreanchem nanv piddʼddear korina, aplea xezareak kainch vaitt korina, nhoi mhunn aplea ixttanchim nanvam piddʼddear korina.” Tor ami hantuntlem kitem-i kortat zalear, ami dusreank khub dukhoitolim ani Jehova amkam aplea tombunt ravonk diunchona.​—Jakob 1:26 vachat.

11. Fott marun dusreanchem nanv piddʼddear korta ani poschatap korinant tankam kitem kortat?

¹¹ Stotrkar hanga fott marun dusreanchem nanv piddʼddear korchea vixim sangta. Zo munis mudʼdom zaun dusreanchem nanv piddʼddear korta ani poschatap korina, taka sobhentlean bhair kaddttat.​—Jer. 17:10.

12-13. Ami koslea poristhitimnim ghoddie chintinastana amchea ixttanchim nanvam piddʼddear korunk xoktat? (Chitr pasun polloiat.)

¹² Toxench Jehovachea tombunt asat tim, tanchea xezareank kainch vaitt korinant ani tanchea ixttanchim nanvam piddʼddear korinant  mhunn pasun Stotr 15:3-ant (NW) amkam ugddas kela. Tor ami amchea ixttanchim nanvam koxim piddʼddear korit?

¹³ Ami ghoddie chintinastana amchea bhav vo bhoinni vixim chukichi mahiti dusreank sangon tanchem nanv piddʼddear korunk xoktat. Hea poristhitim vixim chintat: (1) Ek bhoinn pioneer mhunn seva korop bond korta, (2) ek zoddpem Bethel-ant seva korop bond korta, vo (3) ek bhav, vhoddil vo sobhecho sevok mhunn seva korop bond korta. Tor hea bhav-bhoinnamnim kitem tori chukichem kelam ani hea pasot tanche sovem hem ghoddlam mhunn dusreank sangop sarkem zatolem kai? Ami ugddas dovrunk zai ki he bodol zaunk ghoddie zaitim karonnam asot, jim amkam khobor nant. Toxench ami Jehovachea tombunt asat, ani Jehovachea tombunt aslolim ‘aplea xezareak kainch vaitt korinant, nhoi mhunn aplea ixttanchim nanvam piddʼddear korinant’ mhunn pasun ami ugddas dovrunk zai.

JEHOVACHI BHIRANT ASLOLEANK MAN DIAT

14. ‘Kanttallo haddtta toslea munxak pois korop’ mhunnttlear kitem?

¹⁴ Stotr 15:4-ant (NW) sanglam ki zo munis Jehovachea tombunt asa to “kanttallo haddtta toslea munxak pois korta.” Tor kanttallo haddpi munxam konn tem ami koxim zannam zatolim? Opurnn aslolean, amkam jea munxancho sobhav avoddtta tanchea sangata ami bore toren vagtat astolim. Punn jim amkam bejar kortat vo rag haddttat, tim amkam avoddnant dekhun tankam ami pois kortat zait. Punn ami hem ugddas dovrunk zai ki ami amkam avoddnant tankam nhoi, punn Jehovak “kanttallo” ieta tankam pois korunk zai. (1 Kor. 5:11) Tor Jehova koslea munxank kanttalltta? Oslea munxank jim vaitt kamam kortat ani poschatap korinant, jim amchea patiennek resped dinant, vo jim Jehova sangata amchi ixttagot moddunk proitn kortat.​—Mho. 13:20.

15. “Jehovachi bhirant asloleank” man diunk ek vatt khoinchi?

¹⁵ Stotr 15:4-ant (NW) fuddem sanglam ki Jehovachea tombunt ravta tannem “Jehovachi bhirant asloleank” man diunk zai. Tea pasot, Jehovachea ixttank doia dakhounk ani man diunk ami veg-veglleo vatto sodhtat. (Rom. 12:10) Stotr 15:4-ant (NW) sangloli ek vatt mhunnttlear, Jehovachea tombunt aslolo munis “apnnak luksonn zalear pasun apnnem dilʼlem utor samballtta.” Ami dusreank dilʼlem utor pallinant zalear, ami tankam dukhoitolim. (Mt. 5:37) Udharonnak, eka zoddpean kazara disa eka-mekak dilʼlem utor samballʼllolem Jehovak zai. Toxench, avoi-bapui aplea bhurgeank kitem-i promise kortat zalear, tem pallunk tannim apleachean zata tem soglem korunk zai. Oxem kelear Jehova khuxal zata. Tor ami Devacho ani dusreancho mog kortat dekhun, ami dilʼlem utor samballunk amchean zata tem soglem kortolim.

16. Jehovachea ixttank man diunk anik ek vatt khoinchi?

¹⁶ Devachea ixttank man diunk anik ek vatt mhunnttlear, poramos korop ani udar kallzachim zavop. (Rom. 12:13) Mitting vo porgottnne bhair, ami her vellar bhav-bhoinnam sangata vell sartat tednam, tanchea sangata ani Jehova sangata amchi ixttagot ghott zata. Toxench, ami dusreancho poramos kortat tednam ami Jehovachi dekh ghetat.

POIXEANCHO MOG KORINAKAT

17. Stotr 15-nt poixeam vixim kiteak sanglam?

¹⁷ Jehovachea tombunt aslolo munis “jur ghenastana udar dita,” ani “niropradiak guneanvkari tharaunk lonch ghena” mhunn vers 5-ant sanglam. (St. 15:5, NW) Tor hea stotrant poixeam vixim kiteak sanglam? Karonn ami poixeam vixim chodduch chintʼtat zalear, dusream poros ami poixeank chodd mhotv ditolim. Toxench, Jehova sangata amchi ixttagot piddʼddear zatoli. (1 Tim. 6:10) Bible kallar, thodde zann gorib aslolea aplea bhavank rinn ditale tednam, tankam dilʼle tachea poros chodd poixe te  tanchea koddlean ghetale, ani hea toren tankam luttʼttale. Toxench, neai korpi lonch ghetale ani guneanv nasloleam sangata onʼneai kortale. Punn oslim kamam kortat tanchi Jehovak vitt ieta.​—Ez. 22:12.

18. Poixeam vixim amchem chintop koxem asa tem zannam zaunk ami amkanch kosle prosn vicharunk zata? (Hebrevank 13:5)

¹⁸ Poixeam vixim amchem chintop koxem asa tem zannam zaunk ami amkanch he prosn vicharunk zatat: ‘Hanv sogloch vell poixeam vixim ani tea poixeamnim hanv kitem viktem gheunk xoktam, teach vixim chintʼtam kai? Konnam-i koddlean rinn ghetana, taka tea poixeanchi goroz na mhunn chintun tem rinn farik korunk hanv chodduch vell ghetam kai? Mhojea lagim poixe asat dekhun heram poros hanv vorto asa mhunn hanv lekhtam kai? Mhoje poixe uzar korun dusreank modot korunk hanv fattim sortam kai? Thoddim bhav-bhoinnam girest asat dekhun Jehova poros tankam poixeancho chodd mog asa mhunn hanv chintʼtam kai? Fokot girest aslolea bhav-bhoinnam lagim ixttagot korun gorib asat tankam hanv pois kortam kai?’ Amkam Jehovachea tombunt bhitor soronk ek vhodd sueog mellʼlla. Punn ami poixeancho mog korinant zalearuch, ami sodanch hea tombunt ravonk pavtolim ani Jehova amkam kednanch soddchona!​—Hebrevank 13:5 vachat.

JEHOVA APLEA IXTTANCHO MOG KORTA

19. Stotr 15-nt sangloleo sogleo vostu ami kiteak kelʼleo Jehovak zai?

¹⁹ Stotr 15-chea xevottak hi bhas dilea: “Zo konn hem soglem korta to sodankal thir urtolo.” (St. 15:5, NW) Hea stotrant sangloleo sogleo vostu ami kiteak kelʼleo Jehovak zai, tem stotrkaran sanglam. Tachem karonn mhunnttlear, ami khuxal aslolim Jehovak zai. Tor Jehova sangta tem ami kortat tednam, ami amchea jivitant khuxal astat ani to amchi rakhonn korta.​—Iz. 48:17.

20. Jehovachea tombunt asloleancho fuddar koso astolo?

²⁰ Jehovachea tombunt asloleank ek khub boro fuddar asa. Visvaxi aslolea makhlolea Kristanvank, Jezun sorgar ‘ravonk zaite zage’ toiar keleat. (Ju. 14:2) Ani prithumer jieunk bhorvonso asloleank, Prokasovnni 21:3-ant sangloli bhasaunni purnn zata ti pollounk mellttoli. Khorench, Jehovachea tombunt ravonk ani sasnak tachim ixttam zaunk amkam kitlo vhoddlo sueog mellʼlla nhoi!