1. ¿Jamüsü anakaʼa wekirajaale sünain tü sümakat Salmo 15:1-5?

 WEKIRAJAAITPA ANAIN sünain ekirajaaya 23 eein süpüla nipialuʼuin waya Jehová aleewale waya nümaa. Ashajünüsü suluʼu Salmo kapiitulo 15 tü waaʼinrajatkat süpüla wountuin tia (paashajeʼera Salmo 15:1-5). Anashii wekirajaale sünain tü sümakat.

2. ¿Kasa eeka süpüla jülüjain naaʼin David wanaa sümaa nümüin: «¿Jarai chi kepieechikai suluʼu pipia?»?.

² Müsü Salmo 15:1: «Jehovákalee, ¿jarai chi kepieechikai suluʼu pipia? ¿Jarai chi kepieechikai saaʼu puʼuuchise?». ¿Kasa eeka süpüla jülüjain naaʼin David wanaa sümaa nümüin: «¿Jarai kepieechikai suluʼu pipia?»?. Eesüjaʼa shiale jülüjain naaʼin tü aʼwaajülee aainjuushikat süka loona tü chajatkat Gabaón soʼu tia. ¿Kasa eeka süpüla jülüjain naaʼin David wanaa sümaa nümüin: «¿Jarai chi kepieechikai saaʼu puʼuuchise?»?. Eesüjaʼa shiale jülüjain naaʼin tü Sion chajatkat Jerusalén. Chajatü Sion uuchijeeruʼu sünain Gabaón, eetaasü maʼaka jeʼra kilómetro yalejeechiki. Nukumajirüin yala David wanee miichi aainjuushika süka loona eeinjatüle shiʼitaanüin tü kojon shiyaawasekat süpansaajünüin pütchi, nukolojeʼeraka shia David kettaapa tü miichi aʼwaajüleekat (2 Sam. 6:17).

3. ¿Jamüsü anakaʼa wayaawatüle saaʼu tü sümakat Salmo 15:1? (Piirakaa sümüin tü ayaakuaakat).

³ Palitchon na israelita aʼyataakana suluʼu tü aʼwaajülee aainjuushikat süka loona otta nnojoishii jeʼrashiin na ekerotokana eejatüle shiʼitaanüin tü kojon shiyaawasekat süpansaajünüin pütchi. Mayaainjeʼe müin tia, müshii nuunejaakai aaʼin Jehová nipialuʼumüin napüshuaʼa na aʼyataakana nümüin, naya nuunejaaka na aleewakana nümaa. Shia wachekaka wapüshuaʼa tia. Nüküjain David suluʼu Salmo kapiitulo 15  waneirua kasa waaʼinrajatka süpüla ayatüin aleewain waya nümaa Jehová.

CHI EEKAI LOTUIN AKUWAʼIPA OTTA CHI AKÜJAKAI TÜ SHIIMAINKAT WANEEPIA

4. ¿Kasa wayaawataka akajee nnojoleerüin lotuin wakuwaʼipa noʼuluʼu Jehová sünainjee neʼe woutiisain waya? (Isaías 48:1).

⁴ Ashajünüsü suluʼu Salmo 15:2 aleewain Maleiwa nümaa chi wayuu lotokai akuwaʼipa otta nümaa chi aainjakai kasa anasü. Ayatüinjatü waaʼinrüin waneepia tia. ¿Shiimainchejeʼe eein süpüla lotuin wakuwaʼipa? Jamüsaʼa shia. Mayaainjeʼe waleʼeruʼuin süchiki kaainjalaa meerü lotokoi saaʼin wakuwaʼipa noʼuluʼu Jehová wachajaale maʼin sukuwaʼipa süpüla woonooin nümaa. Nnojotsü jülüjainjatüin waaʼin kettaaitpain tü waaʼinrakat süpüla lotuin wakuwaʼipa noʼuluʼu Jehová sükajee waapüin waaʼin nümüin jee woutiisain waya. Sümaiwa paala nnojoishi aleewain Jehová nümaa wanee wayuu sünainjee neʼe israelitain nia. Eejana waneinnua israelita aʼwaajayaakana Maleiwa sümaa nnojoluin lotuin nakuwaʼipa (paashajeʼera Isaías 48:1). Shiimainrejeʼe aleewain wanee israelita nümaa Jehová ekirajaainjachi nia sünain tü nümakat jee noonooinjatü sümaa. Müsia maaʼulu, süpüla talatüinjachin Maleiwa wamaa ayatüinjatü waaʼinrüin kasa anasü, nnojoishii neʼe woutiisainjanain waya jee woutkajaainjanain. ¿Jarat tü kasa anasü waaʼinrajatkat?

5. ¿Kasa waaʼinrajatka süpüla woonooin nümaa Jehová sünain kasa süpüshuaʼa?

⁵ Nnojoleerü lotuin nukuwaʼipa wanee wayuu noʼuluʼu Jehová sünainjee neʼe nuʼunuin suluʼumüin tü Piichi Outkajaaleekat (1 Sam. 15:22). Kachiiruainjatü waaʼin woonooin sümaa nünüiki Jehová sünain kasa süpüshuaʼa, jaʼitainna wamüiwaʼapa ayatajatü waaʼinrüin kasa anasü noʼuluʼu Jehová (Prov. 3:6; Ecl. 12:13, 14). Chi wayuu oonookai  nümaa Jehová naaʼinreerü tü nümakat jaʼitairü sünain palit kasa. Waaʼinrüle tia atüjaaneerü aaʼu alin wapüla Jehová otta aijeena waya nüpüla (Juan 14:23; 1 Juan 5:3).

6. Sünainjee tü sümakat Hebreokana 6:10-12, ¿jarat tü kasa alanaʼaleekalü ojutu nümüin Jehová?

⁶ Kojutusü maʼin nümüin Jehová süpüshuaʼa tü waaʼinrakat sünain aʼyatawaa nümüin. Nnojoliipejeʼe aleewain waya nümaa sünainjee neʼe tia. Wayaawata aaʼu tia sünainjee tü sümakat Hebreokana 6:10-12 (paashajeʼera). Mayaainjeʼe nnojoluin motuin naaʼin Jehová tü kasa anasü waaʼinrakat, ayatüsia nücheküin waʼyataainjanain nümüin süka süpüshuaʼa waaʼin. «Nnojoliireje wakulajaain aaʼin sümaa tia» aleeweena waya nümaa Jehová süpüla kaʼikat süpüshuaʼa (Gal. 6:9).

CHI AKÜJAKAI TÜ SHIIMAINKAT WANEEPIA

7. ¿Kasa waaʼinrajatka süpüla waküjain waneepia tü shiimainkat?

⁷ Chi eekai suluʼuweein nipia Jehová acheküshi nüküjain tü shiimainkat waneepia (Sal. 15:2). Süpüla waküjainjatüin waneepia tü shiimainkat wuleinjatü tü suluʼukat waaʼin. Keeʼireesü naaʼin Jehová lotuinjatüin wakuwaʼipa sünain kasa süpüshuaʼa (Heb. 13:18). «Nülerajüin Jehová chi wayuu mojulaakai, aleewapejeʼe nia nümaa chi wayuu lotokoi akuwaʼipa» (Prov. 3:32).

8. ¿Kasa eejüinjatka oulia waaʼin?

⁸ Chi wayuu aküjakai waneepia tü shiimainkat nnojoleechi neʼe oonooin nümaa Maleiwa suʼupala wayuu oonoojeechiaʼaya nia nümaa nümüiwaʼapa (Is. 29:13). Chi wayuu aküjakai waneepia tü shiimainkat niyouteerü achiki piamain nukuwaʼipa. Chi wayuu nnojoikai lotuin akuwaʼipa, wainmajeerü naaʼin sünain tü nümakat Maleiwa (Sant. 1:5-8). Niʼrayaajeerü amüin tü nümakat Maleiwa süchiki waneirua kasa. Niʼrüle nnojoluin mojuin nukuwaʼipa sünainjee tia ayateeria naaʼinrüin kasa eekai mojuin sümaa jülüjeerüin naaʼin anain tü naaʼinrakat sünain aʼyatawaa nümüin Jehová (Ecl. 8:11). Eekajasaʼa wayakana loteesü wakuwaʼipa sünain kasa süpüshuaʼa.

9. ¿Kasa watüjaka sünainjee tü nümakat Jesús niʼraiwaʼaya Natanael? (Piirakaa sümüin tü ayaakuaakat).

⁹ Choʼujaasü waküjainjanain waneepia tü  shiimainkat. Watüjaa aaʼulu tia sünainjee tü nümakat Jesús nüchiki Natanael, chi nüntirakai Felipe nümaʼanamüin. Müshi Jesús nüchiki Natanael niʼraiwaʼaya nia: «Iseeichi wanee israelita loto akuwaʼipachi» (Juan 1:47). Nütüjaa aaʼulu Jesús anain tü suluʼukat naaʼin na wane nikirajüinkana, shiasaʼa niʼrapa Natanael niyaawata aaʼulu alanaʼaleeinña suluʼu anain nukuwaʼipa. Mayaainjeʼe nüleʼeruʼuin süchiki kaainjalaa Natanael, nnojotsü piamain nukuwaʼipa otta lotusü nukuwaʼipa sünain kasa süpüshuaʼa. Kojutusü nümüin Jesús süka niʼrüin müin nukuwaʼipa Natanael otta anasü nünüiki nüchiki. Kasataalejeseʼe müin nünüiki Jesús wachiki.

10. ¿Jamüsü jülüjainjatkaʼa waaʼin tü wamakat? (Santiago 1:26).

¹⁰ Wanee kasa ashajünaka suluʼu Salmo 15 shia tü wakuwaʼipainjatkat namaa na waneinnua. Na wayuu nuunejaakana Jehová nipialuʼumüin nnojoishii aküjain alawaa süchiki wayuu, nnojoishii aainjain kasa mojusü sümüin wayuu otta nnojoishii aküjain süchiki wanee kasa mojuteenaka atuma naʼaleewainyuu (Sal. 15:3). Nnojorüle jülüjain waaʼin tü wamakat eesüjaʼa mojeerüle nakuwaʼipa na waneinnua watuma. Meena nujuʼitirakai aaʼin waya Jehová nipialuʼujee waaʼinrüle tia (paashajeʼera Santiago 1:26).

11. ¿Jameerü nukuwaʼipa chi anoujashi macheʼekai süchiirua aküjaa alawaa?

¹¹ Saashin Salmo 15:3, chi wayuu suluʼukai nipia Jehová nnojoleechi aküjain alawaa süchiki wayuu. Macheʼere wanee anoujashi süchiirua nüküjain alawaa ojuʼitinneechi nia naʼakajee na wawalayuukana (Jer. 17:10).

12, 13. ¿Jamüsü süpüla waküjain wanee pütchi mojuteenaka atuma na waʼaleewainyuukana? (Piirakaa sümüin tü ayaakuaakat).

¹² Saashin Salmo 15:3 chi wayuu suluʼukai nipia Jehová nnojoleechi aainjain kasa  mojusü sümüin wayuu otta nnojoleechi aküjain wanee kasa mojuteenaka atuma naʼaleewainyuu. Wekirajaa süchiki waneirua kasa eeka süpüla mojutuin watuma na waʼaleewainyuukana.

¹³ Eesüjaʼa waküjale wanee kasa nnojotka pansaain mojuteetka atuma wayuu. Eesüjaʼa waküjale wanee pütchi nnojotka pansaain weʼrüle suuʼulaain wanee wawala suulia pürekutsoolüin, nuuʼulaale wanee wawala sümaa nuʼwayuuse suulia aʼyatawaa suluʼu Weteet, nuuʼulaale wanee wawala suulia laülaashin nia jee shiale niʼipajanain nia na laülaashiikana. ¿Anasüche waküjakuʼu wamüle süchiki tü jülüjakat waaʼin jamüin nooʼulaaka naya wawalayuukana suulia tü naʼyataainkat? Eesüjaʼa nnojorüle watüjaain saaʼu jamüin nooʼulaaka suulia tü naʼyataainkat. Anuu tü jülüjainjatkat waaʼin: suluʼuweere waya nipia Jehová nnojoliinjana waya aainjain kasa mojusü sümüin wayuu otta nnojoleerü waküjain wanee kasa mojuteenaka atuma na waʼaleewainyuukana.

KOJUTUSHII NÜMÜIN NA WAYUU KOJUTUKANA AMÜIN JEHOVÁ

14. ¿Jaralii na wayuu nnojoliinjanakana wamaain naashin Jehová?

¹⁴ Chi wayuu naʼaleewainkai Jehová nnojoishi nümaain chi wayuu mojukai akuwaʼipa (Sal. 15:4). ¿Jarai chi aküjakai wamüin jaraliin na nnojoliinjanakana wamaain? Nia Jehová. Wayalejeʼe aneeküin jaraliinjanain na wayuu nnojoliinjanakana wamaain nayeena waneekaka na wayuu mojukana ashoʼu wamüin (1 Cor. 5:11). Na wayuu nnojoliinjanakana wamaain naashin Jehová naya na wayuu macheʼekana süchiirua aainjaa kasa mojusü, na mojutukana amüin tü wanoujakalü anain otta na amojujeʼereekana sukuwaʼipa wanoula (Prov. 13:20).

15. Püküja wanee kasa waaʼinrajatka süpüla kojutuin wamüin na wayuu kojutukana amüin Jehová.

¹⁵ Saashin Salmo 15:4 kojutuinjana wamüin na wayuu kojutukana amüin Jehová. Wachajaainjatü sukuwaʼipa süpüla kamaneeinjanain waya namüin na wayuu aleewakana nümaa Jehová otta kojutuinjana naya wamüin (Roma 12:10). Waaʼinrüin tia wanaa sümaa wekeraajüin wanüiki jaʼitairü kapüleein shia wamüin maʼaka süküjain Salmo 15:4. Eesüjaʼa mojeerüle naaʼin na waneinnua jee mojeerüle nakuwaʼipa nnojorüle wekeraajüin wanüiki (Mat. 5:37). Nücheka achiki Jehová napüleerua na naʼaleewainyuukana nekeraajüinjatüin nanüiki wanaa sümaa kasaalüin naya. Talatüsü naaʼin Jehová niʼrüle nekeraajüin nanüiki na wayuukana namüin nachonnii. Süka alin wapüla Maleiwa otta na wayuukana wekeraajüin wanüiki namüin.

16. ¿Jarat tü wane kasa waaʼinrajatkat süpüla kojutuin wamüin na naʼaleewainyuukana Jehová?

¹⁶ Wanee kasa waaʼinrajatka süpüla kojutuin wamüin na naʼaleewainyuukana Maleiwa shia kamaneere waya namüin (Roma 12:13). Walatirüle kaʼi namaa na wawalayuukana aleeweena waya namaa otta aleeweena waya nümaa Jehová. Kamaneere waya washateerü nukuwaʼipa Jehová.

NNOJOTSÜ KACHIIRUAIN NAAʼIN WASHIRÜÜ

17. ¿Jamüsü saashajaanakaʼa achiki nneerü suluʼu Salmo 15?

¹⁷ Chi wayuu suluʼukai nipia Jehová nnojoishi aʼanapirüin nneerü shiiʼiree kachoinjatüin shia nümüin otta nnojoishi oikiraain nia süpüla aainjaa kasa mojusü namüin na anamiakana (Sal. 15:5). ¿Jamüsü saashajaanakaʼa achiki tia suluʼu Salmo 15? Shia süka eein süpüla mojuin nakuwaʼipa na waneinnua watuma jee mojuin wakuwaʼipa nümaa Maleiwa kachiiruale maʼin waaʼin tü nneetkat  (1 Tim. 6:10). Sümaiwa paala eejana wayuu aʼanapiraka nneerü namüin na maʼletsesaliikana shiiʼiree kachoinjatüin nanneetse. Eejana nekiipüʼü na israelita oikiraakana saaʼu nneerü süpüla naainjain kasa mojusü namüin na anamiakana. Nülerajüin Jehová na wayuu makana akuwaʼipa (Ezeq. 22:12).

18. ¿Kasa wasakireʼerüinjatka anain waaʼin süpüla wayaawatüin saaʼu tü jülüjakat waaʼin süchiki nneerü? (Hebreokana 13:5).

¹⁸ Wasakira waaʼin sünain tüü süpüla watüjaain saaʼu tü jülüjakat waaʼin süchiki nneerü: «¿Jülüjasüche taaʼin waneepia kamaʼanaa wainma nneerü? Kanneetsere taya, ¿jülüjasüche taaʼin waneepia tayaʼlajüin tü kasa keeʼireekat taaʼin? Taʼanapirüle nneerü, ¿kakaliasüche süpüla tawalaajüin shia? ¿Jülüjasüche taaʼin nnojoluin choʼujaain shia nümüin chi wayuu aʼanapajirakai taya? ¿Jülüjasüche taaʼin alanaʼaleein takuwaʼipa sutuma wainmain nneerü tamaʼana? ¿Kapüleesüche tamüin tasülajüinjachin? ¿Tayoujainche na wawalayuukana sünainjee washirüin naya? ¿Nayache neʼe taʼaleewajaaka amaa na wayuu washinnuukana noulialeʼeya na wayuu maʼletsesaliikana?». Kojuta wamüin süka suluʼuin waya nipia Jehová. Eejüle waaʼin suulia kachiiruain waaʼin washirüü ayateena waya suluʼuin nipia Jehová. Waaʼinrüle tia nnojoleena nüpütüin waya Jehová wamüiwaʼa (paashajeʼera Hebreokana 13:5).

AISHII NÜPÜLA JEHOVÁ NA NAʼALEEWAINKANA

19. ¿Kasapülajatü tü nuluwataakalü anain waya Jehová?

¹⁹ Müsü sajaʼttiamüin Salmo 15: «Chi wayuu makai akuwaʼipa, aneerü nukuwaʼipa waneepia» (Sal. 15:5). Naashin chi salmistakai nuluwataain waya Jehová sünain aaʼinraa waneirua kasa süpüla talatüinjanain waya. Müsüjeseʼe nuʼunirüin wakuwaʼipa süpüla weʼrüinjanain anaa otta süpüla naaʼinmajüinjanain waya (Is. 48:17).

20. ¿Kasa aapüneetka namüin na wayuu nuunejaakana Jehová nipialuʼumüin?

²⁰ Aapüneerü kasa anasü namüin na wayuu nuunejaakana Jehová nipialuʼumüin. Anuu nünüiki Jesús süchiki tü kasa neʼreetkat na anoujashii aneekuushikana: «Miyoʼu maʼin nipia chi Tashikai [...]. Oʼunushi paala taya süpüla yapainjatüin shia tatuma jüpüla» (Juan 14:2). Otta na anoujashii yaainjanakana kepiain mmapaʼa naʼatapajüin shikeraajüin tü sümakat Apocalipsis 21:3. Anataʼaleesüjaʼa wakuwaʼipa süka eein süpüla aleewain waya nümaa Jehová süpüla kaʼikat süpüshuaʼa.