1. Beni n sɔi ti la ana soŋa ti to sɔsɛ yelese’a n boi Yooma 15:​1-5?

 ZASEŊƆ seko n tole la, to zamesɛ baŋɛ ti sɛba n kã bamea bo Yehowa ge me tara bɔnsoŋa la en la n wan ta’an bɔna a tɛnti deo la poan. Ge la nari ti to eŋɛ la bem ta’an dɛna a saama? Yooma 15 tɔɣɛ la yeledena wa yele. (Kaalɛ Yooma 15:​1-5.) Yelese’a n boi bim la wan soŋɛ tɔ ti to ana du’a du’a la Naayinɛ.

2. Bem n yuun ta’an basɛ ti David tɔɣɛ Yehowa tɛnti deo la yele?

² Yooma 15 pi’ilum yeti: ‘O Yehowa, ani n wan ta’an dɛna saana ho tɛnti deo la poan? Ani n wan ta’an bɔna ho zilam zoore la zuo?’ (Ym. 15:1) David n yuun yeti Yehowa ‘tɛnti deo’ la, daanse’ere a yuun ti’iseri la suɣerɛ la n yuun boi Gibeon saŋa fii ma’a la yele. David yuun le tɔɣɛ la Naayinɛ ‘zilam zoore’ la yele. Daanse’ere a yuun tɔɣeri la Zion zoore la n yuun boi Yerusalem la yele. Bilam ti David yuun tĩ tɛnti deo nyaa dekɛ nɔbiŋere daka la ze’ele bim ta paɛ se’em ma’a ti ba yuun mɛ pu’usegɔ yire la.—2 Sa. 6:17.

3. Beni n sɔi ti la nara ti to zamesɛ yelese’a n boi Yooma 15 la? (Bisɛ foote la.)

³ Yelemɛŋɛrɛ, Israeldoma zo’e zo’e yuun ka tari yɔ’ɔ ti ba tuna suɣerɛ la poan kan benti ba nyaa kɛ̃ tɛnti deo la poan, zɛsɛka ti nɔbiŋere daka la bɔna la. Ge Yehowa yelemɛŋɛrɛ yamesi san wan dɛna ge kelum dɛna a saama, ba wan bɔna a tɛnti deo la poan. To za’a n  boti sɛla n bala. Yooma 15 pa’alɛ la ton wan eŋɛ se’em ta’an kelum dɛna Yehowa zɔdoma.

DƐNA SE’EM N KA TARI DAAŊƆ GE TUNA SƐLA N ANI SOŊA

4. To eŋɛ la wani baŋɛ ti Yehowa ka yeen bɔta la to muse ko’om ma’a? (Isaiah 48:1)

⁴ Yooma 15:2 yeti se’em n de Naayinɛ zɔ ‘ka tari daaŋɔ ge me tuna sɛla n ani soŋa.’ La nari ti to kɔ’ɔn ita bala. Ge la wan ta’an eŋɛ ti to da ‘tara daaŋɔ’? Ɛ̃ɛ. To ka di mi’a ge to san kɔ’ɔn tiregera ti to nana Yehowa, to kan ‘tara daaŋɔ.’ To san kã tomea bo Naayinɛ ge muse ko’om, pɔsega n nan bala. Makerɛ, diimi sa la nɛra san yeen dɛna Israel nɛra ka pa’alɛ ti a dela Yehowa saana. Basɛba yuun pɔ ti bamam pu’useri la Naayinɛ ge ka tara ‘yelemɛŋɛrɛ bii tuna tontɔɔ tuuma.’ (Kaalɛ Isaiah 48:1.) Yelemɛŋɛrɛ Israeldoma yuun nari ti ba zamesɛ Yehowa yɛla ge me dɔla a. Bala mea nɔɔ ti la ka nara ti to yeen muse ko’om ge naɛ la Kristakɔma bɔna ti la pa’alɛ ti to dela Naayinɛ zɔdoma. La nari ti to ‘tuna sɛla n ani soŋa.’ To wan eŋɛ la wani ta’an eŋɛ bala?

5. To nana Yehowa sɛla woo poan vuurɛ?

⁵ Yehowa nɛŋan, ton kan ‘tara daaŋɔ’ ge ‘tuna sɛla n ani soŋa’ yeen daɣɛ la to kena zamesegɔ Na’am Pu’usegɔ Deo poan ma’a. (1 Sa. 15:22) To nari ti to nana Naayinɛ to sɛla woo poan, hali to san bɔna to ma’a. (Mag. 3:6; Pa. 12:​13, 14) La yele pakɛ mɛ ti to tiregɛ nana Yehowa hali yelepiɣesi poan. Bala wan pa’alɛ ti to sirum nɔŋɛ en ti eŋa me wan nɔŋɛ tɔ.—Yon 14:23; 1 Yo. 5:3.

6. Wuu Hebru 6:​10-12 n pa’alɛ se’em la, bem yele n pakɛ gana ton nyaŋɛ eŋɛ yelese’a yuuma n tole la?

 ⁶ Yehowa puurɛ pee mɛ la ton nyaŋɛ eŋɛ yelese’a yuuma n tole la. Ge ton nyaŋɛ eŋɛ yelese’a yuunse’a n tole la ma’a ka pa’alɛ ti to wan kelum dɛna Yehowa saama a tɛnti deo la poan. Hebru 6:​10-12 basɛ ti yele wa niɛ la peelumi. (Kaalɛ.) Yehowa kan malum tamɛ ton yuun tum tuumsoma se’a. Ge a boti la to kelum pu’usa en ta ‘paɛ ba’asegɔ.’ A wan kã bo a yelemɛŋɛrɛ zɔdoma ba san ka ‘taregɛ la itisoŋɔ.’—Ga. 6:9.

TƆƔERA YELEMƐŊƐRƐ HO SUUREN

7. To tɔɣera yelemɛŋɛrɛ to suuren vuurɛ?

⁷ Se’em woo n boti a dɛna saana Yehowa tɛnti deo la poan nari ti a ‘tɔɣera yelemɛŋɛrɛ a suuren.’ (Ym. 15:2) Ton tɔɣeri yelemɛŋɛrɛ ma’a ka seke. Yehowa boti la to tara yelemɛŋɛrɛ to itigɔ la to yetɔɣum poan. (Heb. 13:18) Bala dela ninmɔ’ɔrɛ se’ere n sɔi la ‘Yehowa yaɛ nigum nigumdaana mɛ ge a tari la bɔnsoŋa la tontɔɔdoma.’—Mag. 3:32.

8. Bem n ka nari ti to ita?

⁸ Sɛba n ‘tɔɣeri yelemɛŋɛrɛ ba suuren’ kan ita wuu ba nani Yehowa mɛ nɛreba nɛŋan ge tuna be’em suɣelum poan. (Isa. 29:13) Ba ka tuni nigesi. Nigum nigumdaana ta’an ti’isa ti yɛm ka boi Yehowa pa’alegɔ ase’a poan. (Yam. 1:​5-8) A ta’an ti’isa ti yeledena dela yelepika, bala la a zaɣesɛ Yehowa nɔɔrɛ. Daaŋɔ san ka paɛ en, bala ta’an basɛ ti a nyaa kãbɛ suure tuna yelegaasa. A ta’an ti’isa ti eŋa kelum pu’usa la Yehowa ge Yehowa kan nam a pu’usegɔ. (Pa. 8:11) Tomam boti la to tara yelemɛŋɛrɛ sɛla woo poan.

9. Yezu n yuun seke Natanael la, bem n yuun eŋɛ ge to zamesɛ la bem yele wa poan? (Bisɛ foote la.)

⁹ La yele pakɛ mɛ ti ho ‘tɔɣera yelemɛŋɛrɛ ho suuren.’ To baŋɛ bala la se’em ma’a ti Filip yuun tari a zɔ  Natanael wa’an Yezu zɛ’an na la. La boi bim ti Yezu yuun ka tabelɛ seke Natanael ge Yezu yuun yeti: ‘A dela Israel tiŋa nɛra n ka tari yele.’ (Yon 1:47) La dela yelemɛŋɛrɛ ti Yezu yuun geele a podɔleba la za’a ti ba tari la yelemɛŋɛrɛ ge Natanael yelemɛŋɛrɛ la yuun boi la de to’ore. Natanael yuun ka di mi’a wuu tomam la ge a yuun tari la yelemɛŋɛrɛ a sɛla woo poan ti nigesi ka bɔna bim. Yezu yuun nyɛ la bala ge pɛ̃ɣɛ Natanael. Yelemɛŋɛrɛ, to za’a n boti Yezu geele to se’em n bala!

10. Beni n sɔi ti la nara ti to bisɛ tomea soŋa la ton tɔɣeri yelese’a? (Yames 1:26)

¹⁰ Yelese’a n boi Yooma 15 la tɔɣeri la ton wan ita nɛreba se’em. Yooma 15:3 yeti se’em n boti a dɛna saana Yehowa tɛnti deo la poan ‘ka tari a zɛleŋa sa’ana nɛreba yu’ura, a ka tuni be’em bɔ’ɔra a tadaana, a me ka pareni yɛla bɔ’ɔra a zɔdoma.’ To san tɔɣera yelese’a n ka ani soŋa, la wan daam nɛreba ti to me kan ta’an le dɛna saama Yehowa tɛnti deo la poan.—Kaalɛ Yames 1:26.

11. Hon sa’ani nɛra yu’urɛ vuurɛ ge bem n wan paɛ sɛba n kɔ’ɔn sa’ana nɛreba yu’ura?

¹¹ Yuumadaana la kɔ’ɔn purɛ la sɛba n sa’ani nɛreba yu’ura yele. Ho sa’am nɛra yu’urɛ vuurɛ? La dela hon parum yɛla dɔɣelɛ nɛra zuo ti a zuo fakɛ. Sɛba woo n sa’ani nɛreba yu’ura ge ka bɔta ti ba tee la, ba ni yese ba mɛ tansugere la poan.—Yer. 17:10.

12-13. Bɔnkani poan ti la wan ta’an ta dɛna ti to parum bo la to zɔdoma? (Bisɛ foote la.)

¹² Yooma 15:3 le tiɛ tɔ ti sɛba n de Yehowa saama ka iti ba tadaandoma be’em bii parena yɛla bɔ’ɔra ba zɔdoma. Bala vuurɛ?

¹³ To ta’an ta parum yɛla bo nɛra mɛ ge ka mina. Geele yele ana wa bisɛ:  (1) mabipɔka n ka le dɛna sore ŋmɛ’adaana, (2) mabia la a pɔɣa n ka le tuna Betel, bii (3) mabia n ka le dɛna keema bii keendoma soŋera. La kan ana soŋa ti to siisum yɛla bo mabiisi wa ge yɛta nɛreba ti ba tum la be’em n sɔi ti ba tee ba tuunɛ la. Yɛla ase’a ta’an ta’asɛ ti ba tee ba tuunɛ la ti to ka mina. Bala la, se’em n de Yehowa saana ‘ka tuni be’em bɔ’ɔra a tadaana, a me ka pareni yɛla bɔ’ɔra a zɔdoma.’

NA’ASA SƐBA N ZOTI YEHOWA LA

14. Tɔɣɛ pa’alɛ Yehowa saama n ‘zaɣeseri se’emdaana tuuma n fɛ̃’ɛ’ se’em.

¹⁴ Yooma 15:4 yeti Yehowa zɔ ‘zaɣeseri se’emdaana tuuma n fɛ̃’ɛ’ mɛ. To wan eŋɛ la wani ta’an eŋɛ bala? Ton ka di mi’a la zuo, to kan ta’an yeti abunɔ tuuma n fɛ̃’ɛ. Beni n sɔi? Nɛra n iti a yɛla se’em ta’an basɛ ti to nɔŋɛ bii yaɛ en. Bala la, la nari ti to zaɣesɛ la se’em ti Yehowa mea yeti a ‘tuuma n fɛ̃’ɛ.’ (1 Ko. 5:11) Sɛba n zaɣesɛ ti ba tee ge kelum tuna be’em, la sɛba n ka sakɛ ton sakɛ bo yelese’a bii tiregera ti ba sa’am tomam la Yehowa bɔnsoŋa la laɣum pa’asɛ mɛ.—Mag. 13:20.

15. Sore kani poan ti to wan na’asa ‘sɛba n zoti Yehowa’ la?

¹⁵ Leyɛ’ɛsa, Yooma 15:4 yele to ti to na’asa ‘sɛba n zoti Yehowa’ la. To ni kɔ’ɔn tiregera mɛ ti to ita Yehowa zɔdoma soŋa ge me bɔ’ɔra ba gilema. (Arom 12:10) Wani wani? Sore deyima ti to wan ta’an eŋɛ bala boi la Yooma 15:4. La yeti se’em n de saana Yehowa tɛnti deo la poan ‘san biŋe nɔɔrɛ a ka leberi pooren, hali la san puɣum ka ana soŋa bɔ’ɔra en.’ To san biŋe nɔɔrɛ ge vie, la wan daam nɛreba. (Mt. 5:37) Makerɛ, Yehowa boti la nɛra la pɔɣa dɔla ba pɔɣedire nɔbiŋere la. Dɔɣereba me san tiregɛ tum ban biŋe nɔɔrɛ ti ba eŋɛ sɛla bo ba kɔma, Yehowa puurɛ wan pee. Ton nɔŋɛ Yehowa la to tadaandoma la wan basɛ ti to tiregɛ dɔla ton biŋe nɔɔrɛ ti to eŋɛ sɛla la.

16. To wan le na’asɛ Yehowa zɔdoma la wani?

¹⁶ To san bɔ’ɔra yɛri yɛri ge me saana Naayinɛ zɔdoma, to na’aseri ba mɛ. (Arom 12:13) To san ni naɛ la to mabiisi sɔsa, la wan basɛ ti tomam la bamam tara bɔnsoŋa. Tomam la Yehowa zɔtɔ nyɔka la me wan kpe’em. Leyɛ’ɛsa, to san tɔ’ɔsa saama to tɔɣeseri la Yehowa.

DA NƆŊƐ LIGERI

17. Beni n sɔi ti Yooma 15 tɔɣɛ ligeri yele?

¹⁷ Baabule la yeti se’em n de Yehowa saana ‘ka dekeri a ligeri pɛmesa ge tara dɔɣelega pa’asa bim, a me kan to’e mu’ure eŋɛ sɛla giisɛ se’em n ka tari taalɛ.’ (Ym. 15:5) Beni n sɔi ti yuumadaana la tɔɣɛ ligeri yele? Se’ere n sɔi la to san ka tara putɛsonɛ ligeri yɛla poan, la ta’an daam nɛreba ge me sa’am tomam la Naayinɛ bɔŋa la. (1 Tim. 6:10) Diimi sa la, basɛba yuun ni dekɛ la ligeri pɛmesa ba suurɔ n de nasedoma ge tara dɔɣelega pa’asa bim. Leyɛ’ɛsa, gãkereba basɛba yuun ni to’e la mu’ure ge gãkɛ giisɛ se’em n ka tari taalɛ. Yehowa yaɛ itigɔ ana mɛ.—Eze. 22:12.

18. Soke ani ti to wan ta’an dekɛ viisɛ tomea baŋɛ to puti’irɛ n de se’em ligeri yɛla poan? (Hebru 13:5)

¹⁸ La wan ana soŋa ti to viisɛ tomea bisɛ to puti’irɛ n de se’em ligeri  yɛla poan. Soke homea yeti: ‘Saŋa woo mam ni kɔ’ɔn ti’isa la ligeri yele la mam wan da sɛla? Mam san peŋe ligeri, mam ni gu’una mɛ ka bɔta ti n yɔ ge ti’isa ti nɛra la ka eeri ligeri la kalam? Mam n tari ligeri la basɛ ti mam ba’ɛ bisɛ nam la n mea ge ka bɔ’ɔra yɛri yɛri? Mam ni ti’isa ti mabisɛba n tari ligeri la taresum la ka nɔŋɛ Yehowa? Buntateba n de mam zɔdoma?’ La dela yɔ’ɔ kãtɛ ti to dɛna Yehowa saama. To san ka nɔŋɛ ligeri, to wan ta’an kelum dɛna a saama. To san ita bala, Yehowa kan malum zaɣesɛ tɔ!—Kaalɛ Hebru 13:5.

YEHOWA NƆŊƐ A ZƆDOMA MƐ

19. Beni n sɔi to Yehowa bɔta ti to dekɛ yelese’a n boi Yooma 15 la za’a tum tuuma?

¹⁹ Yooma 15 ki’ilum yeti: ‘Se’em woo n iti wana kan malum miim.’ (Ym. 15:5) Yuumadaana la basɛ ti to baŋɛ sɛla n sɔi ti Naayinɛ bɔta ti to dekɛ yele ana wa za’a tum tuuma. Yehowa boti la to tara pupeelum. Bala n sɔi ti a pa’ala tɔ ti to ta’an nyɛ kã’a la gu’a.—Isa. 48:17.

20. Yehowa saama wan ta’an tara la bem puti’irɛ?

²⁰ Yehowa saama ta’an tara puti’irɛ ti beere sa’am wan ta ana soŋa. Looredoma sɛba n tari yelemɛŋɛrɛ la wan ta bɔna ‘deto zo’e zo’e’ la ti Yezu yuun maala saazuo sa la. (Yon 14:2) Sɛba n tari puti’irɛ ti ba wan ta vɔna tingɔŋɔ wa zuo la wan nyɛ nɔbiŋere la n boi Liligere 21:3 la n wan tum tuuma se’em. Yelemɛŋɛrɛ, to za’a zuo zɛ̃kɛ mɛ la ton sakɛ ti to dɛna Yehowa saama bɔna a tɛnti deo la poan wuusa la!