1. Naegbọn mí gán mọaleyi eyin mí gbadopọnna Salmu lẹ 15:1-5?

 TO HOSỌ he jẹnukọn mẹ, mí mọdọ devizọnwatọ Jehovah tọn he klan yede do wiwe lẹ gán yin jonọ to gòhọ yẹhiadonu tọn etọn mẹ eyin yé wleawuna haṣinṣan mẹdetiti tọn pẹkipẹki de hẹ ewọ. Amọ́, nawẹ mí gán pegan na haṣinṣan mọnkọ gbọn? Salmu lẹ 15​tọ dọho susu do hosọ ehe ji. (Hia Salmu lẹ 15:1-5.) Salmu ehe bẹ nuplọnmẹ yọ́n-na-yizan susu hẹn ehe gán gọalọna mí nado dọnsẹpọ Jiwheyẹwhe dogọ.

2. Etẹwẹ gán ko sisẹ́ salmu-kantọ Davidi nado donù gòhọ Jehovah tọn go?

² Salmu lẹ 15​tọ bẹjẹeji po kanbiọ lọ po dọ: “Jehovah E, mẹnu wẹ sọgan yin jonọ to gòhọ towe mẹ? Mẹnu wẹ sọgan nọ osó wiwe towe ji?” (Salm. 15:1) Whenue salmu-kantọ lọ Davidi to hodọ gando “gòhọ” Jehovah tọn go, e gán yindọ gòhọtúntún he nọ Gibeọni na ojlẹ de wẹ to ayiha mẹ na ẹn. Davidi sọ donù “osó wiwe” Jehovah tọn go, vlavo nado dlẹnalọdo Ziọni to Jelusalẹm. To finẹ, yèdọ nudi kilomẹtlu 10 to hùwaji Gibeọni tọn, Davidi pẹ́n gòhọ de na apotin alẹnu tọn lọ kakajẹ whenue nọtẹn tẹgbẹ tọn de na yin gbigbá na ẹn.—2 Sam. 6:17.

3. Naegbọn mí dona do ojlo to Salmu lẹ 15​tọ mẹ? (Sọ pọ́n yẹdide lọ.)

³ Na nugbo tọn, suhugan Islaelivi lẹ tọn ma tindo dotẹnmẹ pọ́n gbede nado sẹ̀n to gòhọtúntún lọ mẹ, podọ vude poun to yé mẹ wẹ biọ gòhọ lọ mẹ pọ́n, enẹ wẹ fie apotin alẹnu tọn lọ nọ nọ̀. Amọ́, devizọnwatọ nugbonọ Jehovah tọn lẹpo gán yin jonọ to gòhọ yẹhiadonu tọn etọn mẹ eyin yé lẹzun họntọn etọn bosọ zindonukọn nado to mọwà. Ojlo mímẹpo tọn niyẹn. Salmu 15​tọ zinnudo jẹhẹnu delẹ he mí dona wleawuna bosọ nọ dohia nado to họntọn Jehovah tọn lẹ yin zọnmii ji.

 NỌ ZINZỌNLIN MATIN OBLỌ BOSỌ NỌ WÀ DODO

4. Nawẹ mí wagbọn do yọnẹn dọ e ma yin baptẹm kẹdẹ wẹ Jehovah biọ to mí si? (Isaia 48:1)

⁴ To Salmu lẹ 15:2 mẹ, họntọn Jiwheyẹwhe tọn de yin zẹẹmẹ basina taidi “mẹhe to zọnlinzin matin oblọ, bo nọ wà dodo.” Hogbe lọ lẹ “to zọnlinzin” po “nọ wà” po bẹ nuyiwa gbesisọ tọn he sọ zindonukọn hẹn. Amọ́, be mí gán ‘zinzọnlin matin oblọ’ nugbonugbo ya? Gbau. Na gbẹtọvi pipé de ma tin wutu, Jehovah na pọ́n mí di “mẹhe to zọnlinzin matin oblọ,” eyin mí nọ wà nuhe go mí pé lẹpo nado setonuna ẹn. Whenue mí klan míde do wiwe na Jiwheyẹwhe bo yí baptẹm, bẹjẹeji de poun wẹ enẹ yin to gbejizọnlin mítọn hẹ Jiwheyẹwhe mẹ. Doayi e go dọ to ojlẹ Biblu tọn lẹ mẹ, e ma yin na mẹde ko wá sọn akọta Islaeli tọn mẹ poun wẹ na zọ́n bọ e na pegan nado yin jonọ Jehovah tọn de. Mẹdelẹ dawhá ylọ ẹ, amọ́ e ma yin “to nugbo po dodowiwa po mẹ.” (Hia Isaia 48:1.) Islaelivi ahundoponọ lẹ dona plọnnu gando nubiọtomẹsi Jehovah tọn lẹ go bosọ setonuna yé. Mọdopolọ, nado tindo nukundagbe Jiwheyẹwhe tọn to egbehe, e ma ko pé dọ mí ni yí baptẹm bosọ nọ kọnawudopọ hẹ agun Klistiani tọn. Mí dona zindonukọn nado “nọ wà dodo.” Etẹwẹ enẹ nọ biọ?

5. Etẹwẹ tonusisena Jehovah to nulẹpo mẹ nọ bẹhẹn?

⁵ To nukun Jehovah tọn mẹ, nado nọ ‘zinzọnlin matin oblọ’ podọ nado “nọ wà dodo” bẹ nususu hẹn hú nado nọ doalọ to nuwiwa delẹ mẹ to gbesisọ mẹ to nọtẹn sinsẹ̀n-bibasi tọn de. (1 Sam. 15:22) Mí dona dovivẹnu nado nọ setonuna Jiwheyẹwhe to adà gbẹzan tọn mítọn lẹpo mẹ, etlẹ yin to whenue mí to mídeṣo. (Howh. 3:6; Yẹwh. 12:13, 14) Nujọnu wẹ e yin nado nọ dovivẹnu bo nọ setonuna Jehovah etlẹ yin to whẹho flinflin lẹ mẹ. Mọwiwà nọ dohia dọ mí yiwanna ewọ nugbonugbo, ehe nọ zọ́n bọ  ewọ lọsu nọ yiwanna mí dogọ.—Joh. 14:23; 1 Joh. 5:3.

6. Sọgbe hẹ Heblu lẹ 6:10-12, etẹwẹ sọ yin nujọnu hugan nuyiwa nugbonọ-yinyin tọn depope he mẹ mí ko do mahẹ te wayi?

⁶ Jehovah nọ yọ́n pinpẹn nuhe mí ko wà na ẹn wayi lẹ tọn taun. Etomọṣo, nuyiwa nugbonọ-yinyin tọn he wayi lẹ kẹdẹ ma ko pé na mí nido to jonọ Jehovah tọn lẹ yin zọnmii to gòhọ etọn mẹ. Heblu lẹ 6:10-12 hẹn ehe họnwun hezeheze. (Hia.) Jehovah ma nọ wọn nudagbe he mí wà wayi lẹ. Amọ́, e nọ jlo dọ mí ni to ewọ sẹ̀n zọnmii po alindọn lẹpo po “kakajẹ opodo.” E na to họntọn mítọn yin kakadoi “eyin agbọ́ ma pé mí.”—Gal. 6:9.

NỌ DỌ NUGBO TO AHUN TOWE MẸ

7. Etẹwẹ nugbodidọ to ahun míde tọn mẹ zẹẹmẹdo?

⁷ Mẹhe jlo dọ Jehovah ni kẹalọyi emi taidi jonọ do gòhọ etọn mẹ de dona nọ “dọ nugbo to ahun ede tọn mẹ.” (Salm. 15:2) Ehe bẹ nususu hẹn hú nado dapana lalodido. Jehovah nọ jlo dọ mí ni nọ dọ nugbo to nulẹpo mẹ. (Heb. 13:18) Nujọnu wẹ ehe yin, “na Jehovah gbẹwanna mẹhe nọ yinuwa po oklọ po, ṣigba, nugbonọ lẹ wẹ nọ jihọntọn pẹkipẹki hẹ Ẹ.”—Howh. 3:32.

8. Walọyizan tẹwẹ mí dona dapana?

⁸ Mẹhe nọ ‘dọ nugbo to ahun yede tọn mẹ’ lẹ ma nọ do yede hia di tonusetọ to mẹmẹ bo ka sọ nọ to osẹ́n Jiwheyẹwhe tọn gbà to nuglọ. (Isa. 29:13) Yé ma nọ yinuwa po oklọ po. Mẹhe nọ yinuwa po oklọ po gán nọ lẹndọ gbedide Jehovah tọn lẹ ma nọ yin nuyọnẹnnu to whelẹponu. (Jak. 1:5-8) E gán nọ vẹtolina Jehovah to whẹho he gán taidi nuhe ma yin nujọnu sọmọ na ẹn lẹ mẹ. To whenẹnu, eyin e taidi dọ tolivivẹ etọn ma hẹn kọdetọn ylankan depope wá, ahun etọn gán tliji bọ e nasọ gbà osẹ́n Jiwheyẹwhe tọn devo lẹ, bọ sinsẹ̀n-bibasi etọn na lẹzun yẹnuwiwa tọn. (Yẹwh. 8:11) Amọ́, mí nọ jlo na yin nugbonọ to nulẹpo mẹ.

9. Etẹwẹ jọ whla tintan he Jesu dukosọna Natanaeli, podọ etẹwẹ ehe plọn mí? (Sọ pọ́n yẹdide lọ.)

⁹ Etẹwẹ jọ whla tintan he Jesu dukosọna Natanaeli, podọ etẹwẹ ehe plọn mí? To whenue Filipi plan họntọn etọn Natanaeli wá  Jesu dè, onú ayidego tọn de jọ. Dile etlẹ yindọ e ma ko dukosọna Natanaeli pọ́n, Jesu dọmọ: “Pọ́n, Islaelivi nugbo de die, mẹhe mẹ oklọ depope ma tin te.” (Joh. 1:47) Matin ayihaawe, Jesu pọ́n devi etọn he pò lẹ hlan taidi nugbonọ, amọ́ e mọdọ nugbonọ-yinyin Natanaeli tọn jẹna ayidego. Mapenọ wẹ Natanaeli yin taidi mílọsu. Amọ́ oklọ depope ma tin to ewọ mẹ. Jesu yiwanna jẹhẹnu Natanaeli tọn enẹ bosọ pà ẹ. Gbégbò nankọ wẹ e na yin dọ Jesu ni tindo numọtolanmẹ dopolọ gando mílọsu go!

10. Nawẹ mí gán dapana nunina hodidọ tọn mítọn ṣiṣizan gbọn? (Jakọbu 1:26)

¹⁰ Suhugan nubiọtomẹsi he yin sislẹ to Salmu lẹ 15​tọ mẹ lẹ tọn wẹ tindo kanṣiṣa hẹ lehe mí nọ yinuwa hẹ mẹdevo lẹ do. Salmu lẹ 15:3 dọ dọ mẹhe na yin jonọ to gòhọ Jehovah tọn mẹ “ma nọ yí odẹ́ etọn do hẹnmẹgble, bo ma nọ wà nuylankan depope do kọmẹnu etọn, bo masọ nọ hẹn yinkọ gble na họntọn etọn lẹ.” Odẹ́ mítọn yiyizan to aliho mọnkọ lẹ mẹ gán gbleawuna mẹdevo lẹ sinsinyẹn bo na zọ́n bọ mí ma na pegan nado yin jonọ to gòhọ Jehovah tọn mẹ.—Hia Jakọbu 1:26.

11. Etẹwẹ mẹhẹngble yin, podọ afọdide tẹwẹ nọ yin zize sọta mẹhẹngbletọ de he ma lẹnvọjọ?

¹¹ Na taun tọn, salmu-kantọ lọ donù mẹhẹngble go. Etẹwẹ nọ yin mẹhẹngble? To paa mẹ, e nọ yin lalo he gán hẹn yinkọ dagbe mẹde tọn gble de. Mẹhẹngbletọ he ma lẹnvọjọ lẹ nọ yin didesẹ sọn agun Klistiani tọn mẹ.—Jel. 17:10.

12, 13. Etẹwẹ yin delẹ to ninọmẹ he mẹ mí gán hẹn yinkọ dagbe họntọn mítọn lẹ tọn gble te to mayọnẹn mẹ lẹ mẹ? (Sọ pọ́n yẹdide lọ.)

¹² Salmu lẹ 15:3 sọ flinnu mí dọ jonọ Jehovah tọn lẹ ma nọ wà nuylankan depope do kọmẹnu yetọn, podọ yé ma nọ hẹn họntọn yetọn lẹ gble. Etẹwẹ ehe gán zẹẹmẹdo?

¹³ Mí gán hẹn mẹde gble to mayọnẹn mẹ eyin mí nọ fúnfún nudọnamẹ agọ̀ lẹ pé gando mẹlọ go. Di apajlẹ: (1) mẹmẹyọnnu de doalọtena sinsẹ̀nzọn whenu-gigọ́ tọn etọn,  (2) asu po asi po de masọ to sinsẹ̀n to Bẹtẹli ba kavi (3) mẹmẹsunnu de masọ yin mẹho agun tọn kavi devizọnwatọ ba. Be e na sọgbe nado jlẹhó gando whẹwhinwhẹ́n he wutu diọdo ehelẹ do yin bibasi go bosọ má pọndohlan enẹ hẹ mẹdevo lẹ ya? Whẹwhinwhẹ́n dolido he wutu diọdo ehe do yin bibasi lẹ gán tin fẹẹ bọ mí ma yọnẹn. Na nugbo tọn, mẹhe yin jonọ to gòhọ Jehovah tọn mẹ de “ma nọ wà nuylankan depope do kọmẹnu etọn, bo masọ nọ hẹn yinkọ gble na họntọn etọn lẹ.”

NỌ GBÒGBÉNA MẸHE NỌ DIBUSI JEHOVAH LẸ

14. Nawẹ mí nọ yọnẹn gbọn eyin mẹde yin mẹvọ́nu?

¹⁴ Salmu lẹ 15:4 dọ dọ họntọn Jehovah tọn de “nọ gbẹ́ mẹvọ́nu lẹ dai.” Nawẹ mí gán wàmọ gbọn? Taidi gbẹtọvi mapenọ lẹ, mí ma to otẹn dagbe mẹ nado yọnẹn eyin mẹde yin mẹvọ́nu kavi lala. Etẹwutu? To jọwamọ-liho, onú mẹdelẹ tọn gán nọ jẹ mítọn ji na gbẹtọ-yinyin yetọn wutu, bọ mẹdevo lẹ tọn ma na nọ jẹ mítọn ji. Enẹwutu, mẹhe Jehovah nọ pọnhlan di “mẹvọ́nu lẹ” kẹdẹ wẹ mí dona gbẹ́ dai. (1 Kọl. 5:11) Ehe bẹ mẹhe gbẹ́ nado dealọ sọn nuylankan wiwà mẹ lẹ, ma nọ tindo sisi na nuyise mítọn lẹ, kavi nọ tẹnpọn nado hẹn haṣinṣan mítọn hẹ Jehovah gble lẹ hẹn.—Howh. 13:20.

15. Etẹwẹ yin aliho de nado nọ gbògbéna “mẹhe nọ dibusi Jehovah lẹ”?

¹⁵ To alọ devo mẹ, Salmu lẹ 15:4 biọ to mí si nado nọ gbògbéna “mẹhe nọ dibusi Jehovah lẹ.” Enẹwutu, mí nọ dín aliho lẹ nado do homẹdagbe po sisi po hia họntọn Jehovah tọn lẹ. (Lom. 12:10) Gbọnna? Sọgbe hẹ Salmu lẹ 15:4, aliho de he mẹ mẹhe yin jonọ to gòhọ Jehovah tọn mẹ de nọ wàmọ te wẹ yindọ, e “nọ de opà etọn lẹ, etlẹ yin to whenue enẹ sọgan hẹn awugble wá na ẹn.” Matin ayihaawe, eyin mí ma nọ de opà mítọn lẹ, enẹ gán gbleawuna mẹdevo lẹ. (Mat. 5:37) Di apajlẹ, Jehovah nọ donukun dọ jonọ etọn lẹ ni nọgbẹ̀ sọgbe hẹ opà alọwle tọn yetọn. Homẹ etọn sọ nọ hùn eyin mẹjitọ lẹ dovivẹnu vẹkuvẹku nado de opà he yé do na ovi yetọn lẹ. Owanyi he mí tindo na Jiwheyẹwhe podọ na kọmẹnu mítọn lẹ na whàn mí nado wà nuhe go mí pé lẹpo nado nọ de opà mítọn lẹ.

16. Aliho devo tẹ mẹ wẹ mí na nọ gbògbéna mẹhe yin họntọn Jehovah tọn lẹ te?

¹⁶ Aliho devo nado nọ do gbégbò hia họntọn Jiwheyẹwhe tọn lẹ wẹ nado hẹjómẹ bosọ nọ tlúalọ. (Lom. 12:13) Gbọjẹwhenu mítọn yiyizan dopọ hẹ mẹmẹsunnu po mẹmẹyọnnu mítọn lẹ po nọ gọalọna mí nado vẹ́ hẹ yewlẹ po Jehovah po dogọ. Humọ eyin mí nọ hẹjómẹ, mí na hodo apajlẹ Jehovah tọn.

ALIHO GBẸNINỌ TỌN TOWE NI TIN MATIN WANYINA AKUẸ

17. Naegbọn whẹho akuẹ tọn do yin hodọdeji to Salmu lẹ 15​tọ mẹ?

¹⁷ Mí hia dọ jonọ Jehovah tọn de ‘ma nọ yàn akuẹ namẹ bo nọ donukun akuẹvi, bo masọ nọ kẹalọyi alọgodo-kuẹ nado sawhẹdokọna homẹvọnọ.’ (Salm. 15:5) Naegbọn salmu ehe do donù whẹho akuẹ tọn go? Na pọndohlan jlẹkaji tọn matindo gando akuẹ go gán gbleawuna mẹdevo lẹ bo hẹn haṣinṣan mítọn hẹ Jiwheyẹwhe gble. (1 Tim. 6:10) To ojlẹ Biblu tọn lẹ mẹ, mẹdelẹ nọ tafu hatọ yetọn wamọnọ lẹ bo nọ biọ akuẹvi to yé si na akuẹ he yé yàn na yé lẹ. Humọ, whẹdatọ delẹ nọ kẹalọyi alọgodo-kuẹ bo nọ dawhẹ agọ̀ na homẹvọnọ lẹ. Jehovah gbẹwanna walọyizan mọnkọ lẹ.—Ezek. 22:12.

18. Kanbiọ tẹlẹ wẹ gán gọalọna mí nado gbeje pọndohlan mítọn gando akuẹ go pọ́n? (Heblu lẹ 13:5)

¹⁸ Mí na wà dagbe nado gbeje pọndohlan  mítọn gando akuẹ go pọ́n. Nọ kanse dewe dọ: ‘Be akuẹ po nuhe e gán họ̀ lẹ po ji wẹ n’nọ saba lẹnnupọndo ya? Eyin n’yàn akuẹ, be n’nọ whleawu nado sú, bo nọ lẹndọ mẹhe yàn akuẹ lọ na mi ma do hudo etọn wẹ ya? Be n’nọ mọdọ n’yin mẹjọmẹ na n’do akuẹ wutu, bọ e sọ nọ vẹawuna mi nado tlúalọ wẹ ya? Be n’nọ mọdọ mẹmẹsunnu po mẹmẹyọnnu ṣie lẹ po yin gbẹtọ agbasanọ na yé do akuẹ poun wutu wẹ ya? Be n’nọ jihọntọn hẹ adọkunnọ lẹ bo nọ yí nukunpẹvi do pọ́n wamọnọ lẹ wẹ ya?’ Mí ko do lẹblanulọkẹyi jiawu lọ nado yin jonọ Jehovah tọn lẹ. Mí gán basi hihọ́na lẹblanulọkẹyi enẹ eyin aliho gbẹninọ tọn mítọn tin matin wanyina akuẹ. Eyin mí nọ wàmọ, Jehovah ma na jo mí do gbede.—Hia Heblu lẹ 13:5.

JEHOVAH YIWANNA HỌNTỌN ETỌN LẸ

19. Yanwle titengbe tẹwẹ to godona nubiọtomẹsi Jehovah tọn lẹ?

¹⁹ Salmu lẹ 15​tọ dotana po opagbe ehe po: “Mẹdepope he to onú ehelẹ wà ma na yin tẹnsẹna gbede.” (Salm. 15:5) Tofi, salmu-kantọ lọ do yanwle titengbe he to godona nubiọtomẹsi Jiwheyẹwhe tọn lẹ hia. Jehovah jlo dọ mí ni do ayajẹ. Enẹwutu, e nọ na mí anademẹ he na hẹn dona po hihọ́ po wá na mí lẹ.—Isaia 48:17.

20. Hẹndi opagbe tẹlẹ tọn wẹ jonọ Jehovah tọn lẹ to nukundo?

²⁰ Mẹhe Jehovah kẹalọyi taidi jonọ etọn lẹ gán pọ́n sọgodo hlan po ayajẹ po. Klistiani nugbonọ yiamisisadode lẹ na mọ ahọsumẹ lọ nado nọ “fininọ susu” he Jesu wleawu etọn na yé do olọn mẹ lẹ. (Joh. 14:2) Mẹhe do todido aigba ji tọn lẹ to nukundo hẹndi opagbe he tin to Osọhia 21:3 mẹ lẹ tọn. Matin ayihaawe, mímẹpo wẹ nọ mọdọ gbégbò daho wẹ e yin dọ Jehovah yí homẹhunhun do basi oylọna mí nado yin họntọn etọn lẹ, enẹ wẹ nado yin jonọ lẹ to gòhọ etọn mẹ kakadoi!