1. ¿Salmo 15 ye tä dre mike gare nie?

 KUKWE ja tötikara käne yebätä rababa gare nie nitre ja ngwanka metre Jehovai raba nüne ju Jehovakwe yete, yekäre rabadre ja kete kwin ben. Akwa ¿ja keta raba ño ben? Salmo 15 tä kukwe ye mike gare nie, yete kukwe keta kabre kwin ni kräke rökrakäre bäri Ngöbö ken ye tä mike gare nie (ñäkädre Salmo 15:​1-5 yebätä). a

2. David blitabare ju Jehovakwe yebätä ngwane, ¿drebätä nämäne blite raba ruin nie?

² Salmo 15 ye kömikata ne kwrere: “Oh, Jehová, ¿nire raba nemen ju mäkwe yete? ¿Nire raba nemen nüne ngutuä deme mäkwe yekänti?” (Sal. 15:1). Salmista David käkwe “ju” Jehovakwe kädekaninte ye ngwane, nämäne blite tabernáculo nämäne Gabaón yebätä kwrere raba ruin nie. Arato David käkwe “ngutuä deme” Ngöbökwe kädekaninte ye ngwane, nämäne blite Sion nämäne Jerusalén yekänti yebätä raba ruin nie. Ye nemenkä mäbe mento juta Gabaón yebätä, yekänti David käkwe ju ganinkä arca del pacto ye kräke ken, nememe ju sribedre te tädre kärekäre yekäre (2 Sam. 6:17).

3. ¿Ñobätä kukwe Salmo 15 ye mikadre ütiäte jai? (Üai mikadre ñärärä).

³ Metrere nitre israelita kwati ye ñaka sribibare tabernáculo yete aune ñaka janamane arca del pacto mika nämäne yekänti. Akwa nitre Jehová mikaka metre täte ye raba nemen ju Jehovakwe ja üaire yete tädre ja kete Jehovabe ye ngwane.  Ye erere ni töita nengwane. Salmo 15 yete töi kwin keta kabre kädekateta abokän ni raba ja kitebätä rabakäre jankunu ja ketamuko Jehovakwe.

ÑAKA KUKWE KÄME NUAINDRE

4. ¿Nikwe ja ngökadre ñöte ye ñan aibebätä Jehovakwe ni kadre ngäbiti ye ñokänti gare nie? (Isaías 48:1).

⁴ Salmo 15:2 yekänti ni ja ketamuko Ngöbökwe ye abokän “ñan kukwe käme nuainne” nieta. Ni kukwe kwin nuainkä ye erere ja ngwandre. Akwa, ¿ni raba “ja ngwen kwin”? Jän, raba nemen bare nie. Ni jökrä ngite akwa ni raba ja di ngwen jankunu Jehová mikakäre täte, nikwe ne erere nuaindi ngwane ni ja ngwanka metre ye erere ni mikai tuin kwe jai. Nita ja denkä mento Ngöbökrä aune ja ngökö ñöte ye ngwane krire nita kite ngoto gainkä. Ni israelitare ye ñan aibe nämäne nemen ju Jehovakwe yete mikata gare Bibliabätä ye ngwandre törö jai. Ni ruäre nämänentre Jehová kädeke ñan “töi bökänbiti aune töi kwinbiti” yebiti ta (ñäkädre Isaías 48:1 yebätä). b Akwa nitre ruäre nämäne ja töi mike bökän ye ngwane nämäne ja kite kukwe Jehovakwe yebätä aune mike täte. Ye erere nemen bare nengwane, ni tätre konkrekasionte aune nikwe jä ngökadre ñöte ye ñan aibe nuaindre ne kwe Ngöbökwe ni kadre ngäbiti. Ñakare aune ni rabadre jankunu kukwe metre ye nuainne. ¿Kukwe metre ye meden?

5. ¿Jehovata ni ño mike tuin jai ni kukwe kwin nuainkä erere?

⁵ Ni iti tä niken bämä kratire kratire gätäbätä yebätä ni ye “ni kukwe kwin nuainkä” Jehová ñan niere (1 Sam. 15:22). Ni kristiano jökrä rabadre ja di ngwen Ngöbö mike täte kä jökrä ngwane aune kukwe jökräbätä (Prov. 3:6; Ecl. 12:​13, 14). Jondron ñan tä  nemen tuin ütiäte nie yebiti ta Jehová mikadre täte. Nikwe ja ngwain ne erere ngwane niara tare nikwe bämikadi aune niara ni taredi bäri (Juan 14:23; 1 Juan 5:3).

6. Hebreos 6:​10-12 tä mike gare erere, ¿ni nämäne ja ngwen metre ye ñobätä ñan aibe rabadre debe ni kräke?

⁶ Nikwe dre nuainbarera Jehová kräke ye tuin ütiäte ie. Akwa ni ja ngwani metre ye ñan aibätä ni täi kärekäre ju Jehovakwe yete, mikata gare Hebreos 6:​10-12 (ñäkädrebätä). Erametre nikwe ja ngwani ño ye Jehová ñan käi kwitekä jabiti, akwa nikwe niara mikadre täte ja di tätebiti “nememe mrä” ye ie niara tö. “Ni ñan ja di ngwain nekä ngwane” ni rabai ja ketamuko kärekäre kwe käbämikata kwe (Gál. 6:9).

KUKWE TÄ NI BRUKWÄTE YE ERERE NIEDRE

7. ¿Ni kukwe metre niekä ja brukwäte ye abokän ni ño?

⁷ Salmo 15:2 tä niere ni “kukwe metre niekä ja brukwäte” ye Jehovata nübaire ja gwirete. Akwa ni ñan ni ngökö ye ñan aibe gärätä. Nikwe ja ngwandre metre aune kukwe metre niedre kä jökrä ngwane ye ie Jehová tö (Heb. 13:18). Kukwe ne ütiäte krubäte, “ñobätä ñan aune ni ja ngwen blo ye käme krubäte Jehová kräke akwa niarata ja kete bäri kwin nitre kukwe metre nuainkä yebe” (Prov. 3:32).

8. ¿Ni ñaka tö ja ngwain ño?

⁸ “Ni kukwe metre niekä ja brukwäte” ye ñan tä ja bämike jerekäbe ni mada okwäbiti. O tä Ngöbö kukwe mike täte ye kwrere biti kukwe blo nuainne kä kaibete (Is. 29:13). Ni ne kwrere ye ñaka ja ngwen metre, nikwe ja ngübadrebiti ni ye kwrerebätä. ¿Ñokänti ni iti raba nakain kä okwä yete? Jehovata kukwe mikamana täte ye ñan kwin aune ñaka ütiäte raba kite nütüre (Sant. 1:​5-8). Kukwe kia ye ñan tä mike täte. Yebätä kukwe tare ñan tä nemen bare bätä ngwane ja raba kite nüke törö ie kukwe bäri blo nuainkäre. Ye köböire, ñan tä kite Ngöbö mike täte töi bökänbiti (Ecl. 8:11). Akwa ni abokän tö kukwe metre niei aune ja ngwain metre kä jökrä ngwane.

9. ¿Natanael namani gare Jesús ie ye ngwane kukwe namani bare, ye tä dre driere nie? (Üai mikadre ñärärä).

⁹ Kukwe bökän niedre ye ütiäte krubäte nemen  gare nie Jesukwe kukwe niebare Natanael ie yebätä. Felipe nikani ja ketamuko kwe Natanael ngwena Jesús mike gare jai ngwane Jesukwe kukwe niebare yekwe Felipe mikani töi niä. Natanael ñaka nämäne gare jire Jesús ie akwa niebare kwe: “¡Tua ri! Ni israelita töi erametre kite nüke nete. Niara ne abko ni ngökö ñakare” (Juan 1:47). Gare nie nitre ja tötikaka Jesukwe ye nämäne kukwe metre niere ye nämäne gare ie, akwa Natanael ye abokän nierare töi kore. Niara ye ngite ni jökrä kwrere akwa nierare niara töi bökän ye namani ütiäte Jesús kräke aune kukwe kwin niebare kwe ie yebätä. Jesús kukwe ne erere niedre nie ye rabadre kwin krubäte ni kräke ¡ñan ña!

10. ¿Ñobätä ja ngübadrebiti dre nieta yebätä? (Santiago 1:26).

¹⁰ Ni mada mikata tuin ño jai yebätä Salmo 15 tä kukwe keta kabre mike gare. Salmo 15:3 tä mike gare ni “ñaka kukwe ngwarbe niere ja tidrä yebiti, ñaka kukwe blo nuainne ni madabätä aune ñaka ja ketamuko kwe ye bämike käme” ye aibe Jehovata kain ngäbiti ju kwe yete. Kukwe blo niedre ja tidräbiti ye raba ni mada mike ja tare nike, ne madakäre Jehová ñaka raba ni kain ngäbiti ju kwe yete (ñäkädre Santiago 1:26 yebätä).

11. ¿Ni ni mada kädriekä blo yebätä dre raba nemen bare?

¹¹ Ni iti tä ni mada kädriere blo bämikakäre käme ni mada okwäte yebätä ni salmista käkwe blitabare. Ni kukwe ne erere nuainkä ñan tä ja töi kwite ngwane kitakata konkrekasionte (Jer. 17:10).

12, 13. ¿Ja ketamuko nikwe bämika raba ño käme? (Üai mikadre ñärärä).

¹² Salmo 15:3 tä ngwenta törö nie, nire nübaita ja gwirete Jehovakwe ye “ñaka kukwe blo nuainne ni madabätä aune ñaka ja ketamuko kwe ye bämike käme”. Akwa, ¿ja ketamuko kädrieta ño blo aune bämika raba ño käme?

¹³ Ni ñan töbike kwin ye ngwane ni raba  ni mada kädriere blo. Töbike kukwe nebätä: 1) meri testiko iti tä sribi köbö täte Jehová kräke ye tuenmetre, 2) nitre gure ñan tä nemena Betelte o 3) ja mräkä iti ñan rabadrera ni umbrere o siervo ministerial erere konkrekasionte ngwane. ¿Töbikadretari kukwe yebätä aune kädriere ni madabe? Ruäre ngwane dre namani bare ye ñan gare metre ta nie. Aune ngwandre törö jai nire nübaita Jehovata ja gwirete ye ñaka kukwe blo nuainne ni madabätä aune ñaka ja ketamuko kwe ye bämike käme.

NIRE TÄ JEHOVÁ MIKE TÄTE YE MIKADRE ÜTIÄTE

14. Nire nübaita Jehovakwe ja gwirete, ¿ye ie ñokänti raba nemen gare Jehová ñaka tä ni iti kai ngäbiti aune ñan raba ja kete ni yebe?

¹⁴ Salmo 15:4 tä niere nire ja ketamuko Jehovakwe ye “ñaka ja kete ni ja ngwanka käme yebe”. Akwa ¿ni iti ja ngwen käme ye ñokänti raba nemen gare nie? Ni töi ngite ye medenbätä ni ñan raba tö ngwen akwle jai. ¿Ñobätä? Ñobätä ñan aune nitre ruäre ja ngwen ño yebätä nierare tä mate tare nibätä o ni brukwäta nemen kräke. Ye medenbätä metrere nire tä ja ngwen käme Jehová okwäkänti yebe ñaka ja ketadre (1 Cor. 5:11). Nitre ne abokän, tä ja ngwen käme aune ñaka ja töi kwite o nita tödeke aune kukwe mikata täte nikwe ye ñan mike ütiäte jai aune töta nemen ni ngwen di nekä ja üairebiti (Prov. 13:20).

15. ¿“Nitre Jehová jürä ngwanka jabätä” ye mika raba ño ütiäte jai?

¹⁵ Ne madakäre, Salmo 15:4 tä mike gare nie “nire tä Jehová jürä ngwen jabätä” ye mikadre ütiäte jai. Ye medenbätä ja ketamuko Ngöbökwe ye kräke nita ja di ngwen ja töi mike kwin aune mike ütiäte jai (Rom. 12:10). Akwa yekäre, ¿dre nuaindre? Salmo 15:4 tä niere nire nübaita Jehovakwe ja gwirete ye “tä kukwe käbämike yebätä ñaka tä ja töi kwiteta dre rabadre barebätä kärera”. Nita ja kukwe kitekä ye ñaka tä nemen bare nie ngwane ni raba ni mada mike ja tare nike (Mat. 5:37). Ñodre, nitre ja mäkäninte tä ja kukwe kitekä ye rabadre mike nemen bare ye ie Jehová tö. Arato nitre rüne rabadre ja di ngwen dre käbämikata kwe monsotre kwe ie ye mike nemen bare. Ngöbö tare nikwe aune ni mada tare nikwe ye medenbätä nikwe ja di ngwain ja kukwei mike nemen bare.

16. ¿Kukwe meden madabiti nita ja ketamuko Jehovakwe ye mike ütiäte jai?

¹⁶ Kukwe madabiti nita ja ketamuko Jehovakwe ye mike ütiäte jai ye abokän nita kain ngäbiti kwin ja gwirete aune ja töi mike mantiame kräke (Rom. 12:13). Ja mräkätre ye nita nübaire kukwe ruäre nuainta nikwe yebätä ngwane tä ni dimike ja kete bäri kwin bentre aune Jehovabe. Ne madakäre, nita kain ngäbiti kwin ja gwirete ye ngwane ja ngwanta Jehová erere.

ÑAKA NGWIAN TAREDRE

17. ¿Salmo 15 yete ñobätä blitata ngwian yebätä?

¹⁷ Salmo 15 tä niere jankunu, nire nübaita Jehovakwe ja gwirete ye “ñaka ngwian bien ne kwe ütiä biandreta bäri ie aune ñaka ngwian kain ngäbiti kukwe nuainkäre ni ñaka ngite ye rüere” (Sal. 15:5). Salmo oto chi nekänti, ¿ñobätä blitata ngwian yebätä? Ñan ñobätä aune nuäre ngwian ye tarekäre. Köböire ni raba ni mada mike ja tare nike aune ni ñaka raba kite ja kete jankunu Jehovabe (1 Tim. 6:10). Kirabe nitre bobre nämäne ngwian kärere biankäreta bitikäre ye ngwane mräkätre kwe ye nämäne ngwian käreretabiti chi ie kraikärebätä. Arato nitre kukwe ükatekä o ji ngwanka nämäne ngwian kain ngäbiti nitre ie, nitre bobre ye kitakäre ngite,  ye kädrieta Bibliabätä. Ja ngwanta ne erere ye tuin blo krubäte Jehovai (Ezeq. 22:12).

18. ¿Dre ngwandretari jai? (Hebreos 13:5).

¹⁸ Ngwian ye mikata tuin ño jai yebätä töbikadretari ye ütiäte krubäte. Kukwe ne ngwentari jai: “¿Käre tita töbike ngwian yebätä aune dre kökai tikwe jai yebätä? Tita ngwian kärere ni iti ie ngwane, ¿tita kä mike niken raire ta ngwian ye biankäreta ie ñaka tä ribere jai yebätä nütüta tikwe? ¿Ja ruin ütiäte tie ngwian ta tikwe yebätä? ¿Ñan nuäre ti kräke ja töi mikakäre mantiame ye? ¿Ja mräkätre ngwian bäkänä ye tä jondron kä nebätä tarere nütüta tikwe? ¿Ni ngwian bäkäne krubäte yebe ti töta nemen ja ketai aune ñaka ni bobre yebe?”. Jehovata ni nübaire ja gwirete ye kwin krubäte. ¡Ni ñaka tö tuai niken ja bäre! Ñaka ja töi mikadre ngwian tarere. Nikwe ne erere nuaindi ngwane Jehová ñaka ni tuainmetre jire (ñäkädre Hebreos 13:5 yebätä).

JEHOVÁ TÄ JA KETAMUKO KWE TARERE

19. ¿Ñobätä kukwe bianta mikakäre täte nie Salmo 15 yete?

¹⁹ Salmo 15 mrä yekänti kukwe ne käbämikata nire tä ja ngwen kwin ye ie: “Nire tä ja ngwen ye erere ye ñaka rikai jire tibien” (Sal. 15:5). Nete salmista tä mike gare nie, Jehovata kukwe bien nie mikakäre täte tö kä tuai juto nibätä yebätä. Ye medenbätä tä ni jie ngwen, kukwe kwin mike nemen bare ni kräke aune ni kriemike (Is. 48:17).

20. ¿Jehovata nitre nübaire ja gwirete yekwe dre kwin rabai?

²⁰ Nitre ja ngwanka metre Jehovai yekwe kukwe kwin rabai ja känenkäre. Aune nitre braibe dianinkä nänkäre kä kwinbiti ye kräke “kä tärä kabre nünankrä” (Juan 14:2). Nitre kristiano mada ye abokänkwe kukwe kwin rabai kä tibienbätä käbämikata Apocalipsis 21:3 yete. ¡Jehovata ni nübaire nemen ja ketamuko kwe ye kwin krubäte ni kräke! ¡Ni rabadi nüne kärekäre ju kwe yete!