1. Paano makabulig sa aton ang Salmo 15:​1-5?

 NATUN-AN naton sa nagligad nga artikulo nga kon idedikar sang isa ka tawo ang iya kabuhi kay Jehova kag kon magpabilin sia nga suod sa Iya, puede sia mangin bisita ni Jehova sa Iya malaragwayon nga tolda. Pero ano ang dapat naton himuon para mangin suod kita sa iya? Madamo kita sing matun-an sa Salmo 15 parte sa sini. (Basaha ang Salmo 15:​1-5.) Matun-an naton sa sini nga salmo kon ano ang dapat naton himuon para mangin suod pa gid kita sa Dios.

2. Ano ang posible ginahunahuna ni salmista David sang ginsambit niya ang tolda ni Jehova?

² Ang umpisa sang Salmo 15 nagasiling: “O Jehova, sin-o ang makaduaw sa imo tolda? Sin-o ang makaistar sa imo balaan nga bukid?” (Sal. 15:1) Sang ginsambit ni salmista David ang tolda ni Jehova, posible ginahunahuna niya ang tabernakulo. May tion nga ara sadto sa Gibeon ini nga tabernakulo. Ginsambit man ni David ang “balaan nga bukid” sang Dios nga posible nagapatuhoy sa Sion sa Jerusalem. Didto sa Sion, nga mga pila ka kilometro ang kalayuon sa bagatnan sang Gibeon, may ginpatindog si David nga tolda para butangan sang kaban sang katipan samtang wala pa mahuman ang templo.​—2 Sam. 6:17.

3. Ngaa dapat naton tun-an ang Salmo 15? (Tan-awa man ang piktyur.)

³ Wala nakaalagad sa tabernakulo ang kalabanan nga Israelinhon, kag pila lang gid ang nakasulod sa tolda nga ginbutangan sang kaban sang katipan. Pero puede mangin bisita ni Jehova sa iya tolda ang tanan niya nga matutom nga alagad. Paano? Dapat nila panikasugan nga mangin abyan si Jehova asta sa wala sing katapusan. Gusto gid naton ini tanan. Ginsambit sa Salmo 15 ang pila ka kinaiya nga dapat naton ipakita para mangin abyan naton si Jehova asta sa wala sing katapusan.

 MAGKABUHI NGA WALA SING KASAYPANAN KAG MAGHIMO SING MATARONG

4. Ngaa masiling naton nga indi lang pagpabawtismo ang ginapatuman sa aton ni Jehova? (Isaias 48:1)

⁴ Sa Salmo 15:​2, ang abyan sang Dios ginlaragway bilang “isa nga nagakabuhi nga wala sing kasaypanan, [kag] nagahimo sing matarong.” Ang mga tinaga nga “nagakabuhi” kag “nagahimo” nagapahangop nga dapat padayon naton ini nga himuon. Pero posible bala nga ‘magkabuhi kita nga wala sing kasaypanan’ bisan pa indi kita tanan perpekto? Huo. Paano? Kabigon kita ni Jehova nga “nagakabuhi nga wala sing kasaypanan” kon tumanon naton sia sa bug-os naton nga masarangan. Sang gindedikar naton ang aton kaugalingon sa Dios kag nagpabawtismo kita, umpisa pa lang ini sang aton paglakat upod sa Dios. Halimbawa, sang panahon sang Biblia, indi awtomatiko nga mangin bisita ni Jehova ang isa ka Israelinhon bangod lang Israelinhon sia. May pila ka Israelinhon nga nagpanawag kay Jehova pero indi “sa kamatuoran kag pagkamatarong.” (Basaha ang Isaias 48:1.) Para mapakita sang mga Israelinhon nga gusto gid nila mangin bisita ni Jehova, dapat nila tun-an kag sundon ang iya mga ginapatuman. Sing kaanggid, para mangin suod naton nga abyan si Jehova subong, indi bastante nga magpabawtismo lang kita kag magpakig-upod sa Cristianong kongregasyon. Dapat padayon kita nga ‘maghimo sing matarong.’ Paano naton ini mahimo?

5. Paano naton mapakita nga ginatuman gid naton si Jehova?

⁵ Para kay Jehova, indi bastante ang regular nga pag-attend sa mga miting sa Kingdom Hall para masiling naton nga “nagakabuhi [kita] nga wala sing kasaypanan” kag “nagahimo [kita] sing matarong.” (1 Sam. 15:22) Dapat naton panikasugan nga tumanon ang Dios sa tanan nga bahin sang aton kabuhi bisan sa mga tion nga nagaisahanon kita. (Hulu. 3:6; Man. 12:​13, 14) Importante nga tumanon naton si Jehova bisan sa gamay nga mga butang. Kon himuon naton ini, ginapakita naton nga palangga naton sia.  Kag bilang resulta, mas palanggaon pa gid niya kita.​—Juan 14:23; 1 Juan 5:3.

6. Suno sa Hebreo 6:​10-12, ano ang mas importante sangsa mga nahimo naton nga maayo sang una?

⁶ Ginapabaloran gid ni Jehova ang mga ginhimo naton para sa iya sang una. Pero indi buot silingon nga bangod may mga nahimo na kita nga maayo sang una, mangin permanente na kita nga bisita ni Jehova sa iya tolda. Ginpaathag ini sa Hebreo 6:​10-12. (Basaha.) Indi pagkalimtan ni Jehova ang mga nahimo naton nga maayo sang una. Pero gusto niya nga padayon kita nga mag-alagad sa iya sing bug-os tagipusuon “tubtob sa katapusan.” Kon “indi kita paglapyuon,” mangin abyan naton sia asta sa wala sing katapusan.​—Gal. 6:9.

MAGHAMBAL SING KAMATUORAN SA IMO TAGIPUSUON

7. Paano naton mapakita nga nagahambal kita sing kamatuoran sa aton tagipusuon?

⁷ Kon gusto naton nga mangin bisita kita ni Jehova sa iya tolda, dapat kita ‘maghambal sing kamatuoran sa aton tagipusuon.’ (Sal. 15:2) Kon wala kita nagabinutig, bastante na bala ini? Indi. Gusto ni Jehova nga mangin honest kita sa tanan naton nga ginasiling kag ginahimo. (Heb. 13:18) Importante gid ini “kay ginakangil-aran ni Jehova ang mga malimbungon, apang nagapakig-abyan Sia sing suod sa mga matarong.”​—Hulu. 3:32.

8. Ano nga paggawi ang dapat naton likawan?

⁸ Ginatuman gid sang mga ‘nagahambal sing kamatuoran sa ila tagipusuon’ ang mga kasuguan sang Dios. Wala sila nagapakunokuno nga nagatuman sila kon may makakita sa ila pero nagahimo sila sing malain kon nagaisahanon sila. (Isa. 29:13) Indi sila malimbungon. Kon malimbungon ang isa ka tawo, posible duhaduhaan niya ang pila sa mga kasuguan ni Jehova. (Sant. 1:​5-8) Posible indi niya pagtumanon ang mga kasuguan ni Jehova nga sa banta niya indi masyado importante. Kag kon daw wala man sing malain nga natabo sa iya bisan pa wala sia nagtuman, posible nga indi man niya pagtumanon ang iban pa nga mga kasuguan sang Dios. Posible hunahunaon niya nga nagaalagad sia kay Jehova, pero indi gid pagbatunon ni Jehova ang iya pagsimba. (Man. 8:11) Gani, gusto gid naton nga mangin honest sa tanan nga butang.

9. Ano ang matun-an naton parte sa ginsiling ni Jesus sang nakilala niya si Natanael? (Tan-awa man ang piktyur.)

 ⁹ Importante gid nga ‘maghambal kita sing kamatuoran sa aton tagipusuon.’ May matun-an kita parte sa sini sang gindala ni Felipe ang iya abyan nga si Natanael kay Jesus para makilala niya sia. Bisan pa amo ato ang pinakauna nga tion nga nakilala ni Jesus si Natanael, nagsiling si Jesus: “Tan-awa, ang matuod nga Israelinhon nga wala nagapangdaya.” (Juan 1:47) Kabalo si Jesus nga honest ang iya mga disipulo, pero nakita niya nga tumalagsahon gid ang pagkasinsero ni Natanael. Indi man perpekto si Natanael pareho sa aton. Pero, ginpakita niya kon sin-o gid sia kag honest sia sa tanan nga butang. Gani gindayaw ni Jesus si Natanael. Isa gid ka kadungganan kon ihambal man sa aton ni Jesus ang ginhambal niya kay Natanael.

10. Ngaa dapat kita maghalong sa aton ginahambal? (Santiago 1:26)

¹⁰ Ang kalabanan nga ginsambit sa Salmo 15 nagatudlo sa aton kon paano naton dapat trataron ang iban. Ang Salmo 15:3 nagasiling nga ang bisita sa tolda ni Jehova “wala nagapasipala, wala nagahimo sing malain sa iya isigkatawo, kag wala nagapakahuya sa iya mga abyan.” Kon kabaliskaran sa sini ang himuon naton, posible mahalitan gid naton ang iban kag indi na kita mangin bisita sa tolda ni Jehova.​—Basaha ang Santiago 1:26.

11. Ano ang pagpasipala, kag ano ang himuon sa isa ka utod nga nagapasipala sa iban?

¹¹ Ginsambit sang salmista ang pagpasipala. Ano ang pagpasipala? Nagapatuhoy ini sa kabutigan parte sa isa ka tawo nga puede makaguba sa iya reputasyon. Kon pasipalahan sang isa ka utod ang iban kag indi sia maghinulsol, paguaon sia sa Cristianong kongregasyon.​—Jer. 17:10.

12-13. Sa ano nga mga sitwasyon posible mapakahuy-an naton ang aton mga abyan sing indi hungod? (Tan-awa man ang piktyur.)

¹² Ang Salmo 15:3 nagapahanumdom man sa aton nga ang mga bisita ni Jehova wala nagahimo sing malain sa ila isigkatawo kag wala nila ginapakahuy-an ang ila mga abyan. Sa ano nga  mga sitwasyon posible mapakahuy-an naton ang aton mga abyan?

¹³ Posible mapakahuy-an naton sila sing indi hungod kon nagapalapta kita sang negatibo nga impormasyon parte sa ila. Binagbinaga ini nga mga sitwasyon: (1) indi na payunir ang isa ka sister, (2) indi na Bethelite ang isa ka mag-asawa, ukon (3) indi na isa ka gulang ukon ministeryal nga alagad ang isa ka brother. Husto bala nga maghaumhaum kita nga wala sila nakapadayon sa ila pribilehiyo kay may ginhimo sila nga malain? Kag husto bala nga ipanugidsugid naton sa iban ang aton ginahaumhaum? Madamo sang posible nga rason nga wala naton nabal-an kon ngaa wala sila nakapadayon sa ila pribilehiyo. Dugang pa, ang bisita sa tolda ni Jehova “wala nagahimo sing malain sa iya isigkatawo, kag wala nagapakahuya sa iya mga abyan.”

PADUNGGI ANG MGA NAGAKAHADLOK KAY JEHOVA

14. Ipaathag kon sin-o “ang mga talamayon” nga dapat sikwayon sang mga bisita ni Jehova.

¹⁴ Ang Salmo 15:4 nagasiling nga “ginasikway” sang abyan ni Jehova “ang mga talamayon.” Paano naton mabal-an kon sin-o “ang mga talamayon”? Bangod indi kita perpekto, indi kita makasiling nga talamayon ang isa ka tawo ukon indi. Ngaa? Kay man, ang mga kinaiya lang sang mga tawo ang aton ginatan-aw. Posible nanamian kita mag-upod sa iban nga mga tawo pero naugot naman kita sa iban. Gani, dapat naton siguraduhon nga ang ginasikway lang naton amo “ang mga talamayon” suno sa pagtamod ni Jehova. (1 Cor. 5:11) Nalakip sa ila ang mga nagahimo sing malain nga wala nagahinulsol, ang mga nagapakalain sang aton mga ginapatihan, ukon ang mga nagapaluya sang aton espirituwalidad.​—Hulu. 13:20.

15. Ano ang isa ka paagi para mapadunggan naton “ang mga nagakahadlok kay Jehova”?

¹⁵ Dayon, ang Salmo 15:4 nagasiling nga dapat naton padunggan “ang mga nagakahadlok kay Jehova.” Gani ginapanikasugan gid naton nga pakitaan sing kaayo kag respeto ang mga abyan ni Jehova. (Roma 12:10) Paano? Ginsambit sa Salmo 15:4 ang isa ka paagi nga mahimo naton ini. Nagsiling ini nga ang bisita sa tolda ni Jehova ‘nagatuman sang iya saad, bisan pa mabudlay ini tumanon.’ Kon indi naton pagtumanon ang aton mga saad ukon promisa, makasakit gid kita sa iban. (Mat. 5:37) Halimbawa, gusto ni Jehova nga tumanon sang bana kag asawa ang ila ginpromisa sa isa kag isa sang ginkasal sila. Nalipay man sia kon ginapanikasugan sang mga ginikanan nga tumanon ang ila mga promisa sa ila kabataan. Bangod palangga naton ang Dios kag ang aton isigkatawo, himuon gid naton ang aton bug-os nga masarangan para matuman naton ang aton mga promisa.

16. Ano ang isa pa ka paagi para mapadunggan naton ang mga abyan ni Jehova?

¹⁶ Ang isa pa ka paagi para mapadunggan naton ang mga abyan sang Dios amo ang pagpakita sing pagkamaabiabihon kag kaalwan. (Roma 12:13) Kon nagapain kita sang tion para maglingawlingaw upod sa aton mga kauturan, mas magasuod pa gid kita sa ila kag kay Jehova. Kag kon maabiabihon kita, ginailog naton si Jehova.

PADAYON NGA IPAKITA NGA WALA MO GINAHIGUGMA ANG KUARTA

17. Ngaa ginsambit sa Salmo 15 ang parte sa kuarta?

¹⁷ Mabasa naton sa Salmo 15 nga ang bisita ni Jehova ‘nagapahulam nga wala sing saka, kag wala sia nagabaton sing hamham batok sa tawo nga wala sing sala.’ (Sal. 15:5) Ngaa ginsambit sa sining malip-ot nga salmo ang parte sa kuarta? Kay kon ginahigugma naton ang kuarta, posible makasakit kita sa iban kag maguba ang aton kaangtanan sa Dios. (1 Tim. 6:10) Sang panahon sang Biblia, may pila nga nagpamentaha sa ila imol nga mga utod. Ginpahulam nila sing kuarta ang mga imol, pero ginpasakaan nila ini. Nagbaton  man sing hamham ang pila sa mga hukom, kag indi patas ang ila paghukom sa mga tawo nga wala sing sala. Naakig gid si Jehova sa mga tawo nga nagahimo sini.​—Ezeq. 22:12.

18. Ano ang mga puede naton ipamangkot sa aton kaugalingon para mausisa naton ang aton pagtamod sa kuarta? (Hebreo 13:5)

¹⁸ Maayo gid kon usisaon naton ang aton pagtamod sa kuarta. Pamangkuta ang imo kaugalingon: ‘Pirme ko bala ginapamensar ang parte sa kuarta kag kon ano ang puede ko mabakal sa sini? Kon nag-utang ako sing kuarta, madugay bala ako magbayad bangod ginahunahuna ko nga indi man ini kinahanglan sang nagpautang sa akon? Kon madamo ako sing kuarta, ginahunahuna ko bala nga mas maayo ako sangsa iban pero nabudlayan ako nga mangin maalwan? Kon madamo sing kuarta ang isa ka utod, ginahunahuna ko bala dayon nga materyalistiko sia? Nagapakig-abyan bala ako sa mga manggaranon pero daw wala ako nagapakigsuod sa mga pigado?’ Importante gid nga ipamangkot naton ini bangod isa gid ka daku nga pribilehiyo nga mangin bisita ni Jehova. Maamligan naton ini nga pribilehiyo kon padayon naton nga ipakita nga wala naton ginahigugma ang kuarta. Kon himuon naton ini, indi gid kita pagbayaan ni Jehova.​—Basaha ang Hebreo 13:5.

PALANGGA NI JEHOVA ANG IYA MGA ABYAN

19. Ngaa gusto gid ni Jehova nga himuon naton ang tanan nga ginsambit sa Salmo 15?

¹⁹ Ang katapusan sang Salmo 15 isa ka promisa. Nagasiling ini: “Ang nagahimo sini nga mga butang indi gid malingkang.” (Sal. 15:5) Base sa sining ginsiling sang salmista, mabal-an naton kon ngaa gusto gid ni Jehova nga himuon naton ang mga ginapatuman Niya. Gusto ni Jehova nga mangin malipayon kita. Gani kon himuon naton ang mga ginapatuman niya sa aton, pakamaayuhon niya kita kag amligan.​—Isa. 48:17.

20. Ano ang mapaabot sang mga bisita ni Jehova?

²⁰ Mapaabot sang mga bisita ni Jehova ang isa ka dalayawon nga palaabuton. Ang mga hinaplas magapuyo sa “madamo nga lugar nga mapuy-an” sa langit nga ginhanda ni Jesus para sa ila. (Juan 14:2) Excited naman ang mga may paglaum nga mabuhi sa duta nga matuman ang promisa sa Bugna 21:3. Isa gid ka daku nga kadungganan nga gin-agda kita ni Jehova nga mangin bisita niya sa iya tolda asta sa wala sing katapusan.