XTUUTYUM ARTIKEL 24
LIIT 24 Khomt tsu Yeehoowa sayn përich
Say Yeehoowa sayn fraaynt fer imer!
“Oo Yeehoowa, weer khan in tayn parak woone?”(PSALM 15:1)
WAS TUUN MER SIIN?
Meyer tuun ferxteen was mer mache mise fer wayter Yeehoowa sayn fraaynte wëre un aach wii eyer wil hon tas mer sayn fraaynte pehantele.
1. Wii khan Psalm 15:1-5 uns helfe?
IN TËM letste artikel, hon mer kelërnt tas tii woo sich tsu Yeehoowa tetikiire un een ticht fraayntxaft mit tëm hale, khene inkelaatne in tëm sayn parak sin. Awer was mise meyer mache fer Kot sayn tichte fraaynte sin? Te Psalm 15 xprecht fiil too triwer. (Lees Psalm 15:1-5.) a
2. Aan was waar fiilaycht Tawi am tenke wii eyer iwer Yeehoowa sayn parak kexproch hot?
2 Te Psalm 15 fangt soo aan: “Oo Yeehoowa, weer khan in tayn parak woone? Weer khan uf tayn haylich përich woone?” (Psal. 15:1) Te psalmist Tawi hot kexproch iwer Yeehoowa sayn “parak”. Fiilaycht waar eyer am tenke aan tëm tapernakel, woo in Kipeoon torich een tsayt waar. Tawi xprecht aach iwer Kot sayn “haylich përich”; im xtant waar tee am tenke aan tëm parak woo ufm përich Syoon, in Yeruusalem waar. Tat, phaar kilometer am siit fon Kipeoon, hot Tawi een parak uf kextelt un ti arich fom pakt tat rin ketuun. Ti arich is tat keplip pis te thempel kepaut waar. (2 Sam. 6:17)
3. Warom wole mer te Psalm 15 xtutiire? (Kuk aach tas pilt.)
3 Kewis, ti meyerste israeliiter hon nii im tapernakel ketiint. Ploos weeniche fon tëne sin im parak rin kang woo ti arich fom pakt waar. Awer al Yeehoowa sayn troye tiiner khente inkelaatne in tëm sayn parak sin. Fer tas hin kriin, miste se een fraayntxaft mit Tëm paue un hale. Tas is sicher unser wunx aach. Te Psalm 15 xprecht iwer etliche tinge woo mer mache mise fer unser fraayntxaft mit Yeehoowa hale.
Ti israeliiter in Tawi sayn taache khonte sich laycht foer xtele was es petayt een inkelaatne in Yeehoowa sayn parak sin (Kuk te apsats 3.)
KEE OONE FEELER UN MACH WAS RICHTICH IS
4. Yeehoowa waart mee fon uns wii ploos uns taafe lose. Wii wise mer tas? (Isayas 48:1)
4 Im Psalm 15:2, is Kot sayn fraaynt pexrip wii yemant “woo oone feeler keet, [un] woo macht was richtich is”. Tas is etwas woo mer wayter mache mise. Awer khene mer wërklich “oone feeler” keen? Ia. Es is woer tas khee mënx perfekt is, awer wën mer uns aan xtrenge fer Yeehoowa aan heere, tuut eyer uns siin wii yemant woo “oone feeler keet”. Wën mer uns tsu Yeehoowa tetikiire un uns taafe lose, tas is ploos te aanfang. Tsum payxpiil: in te piiplixe tsayte, ploos wayl een persoon een israeliiter waar, es wolt net saan tas eyer Yeehoowa sayn inkelaatne waar. Etliche hon tëm aan keruuft, “awer net mit eerlichkheet un kerechtichkheet”. (Lees Isayas 48:1.) b Ti eerliche israeliiter miste iwer Yeehoowa sayn kesetse lërne un tëne foliche. Kraat soo, fer een ticht fraayntxaft mit Yeehoowa hayt hon, mise mer mee mache wii uns taafe lose un kenënt sin wii Yeehoowa sayn Tsayer. Meyer mise wayter mache “was richtich is”. Wii khene mer tas hin kriin?
5. Was petayt es Yeehoowa in ales aan heere?
5 Fer Yeehoowa, “oone feeler” keen un mache “was richtich is”, petayt mee wii ploos ofts tsu te fersamlunge keen. (1 Sam. 15:22) Meyer mise uns aan xtrenge fer Yeehoowa aan heere in ales was mer mache, soo kaar wën mer aleen sin. (Xpr. 3:6; Ekl. 12:13, 14) Es is wichtich tas mer uns aan xtrenge fer Yeehoowa aan heere, soo kaar in te tinge woo net soo wichtich aus siin. Soo tsayche mer tas mer tëm wërklich liipe. Un tas tuut Tëm uf muute uns noch mee liipe. (Yoo. 14:23; 1 Yo. 5:3)
6. Tëm noo Hepreeyer 6:10-12, was is wichticher wii ti kuute tinge woo mer friier kemacht hon?
6 Yeehoowa kept fiil weyert fer was mer tëm kemacht hon in te friirixe yoore. Awer ploos wayl mer kuutes friier kemacht hon, es wil net saan tas mer in Yeehoowa sayn parak plaype khene. Hepreeyer 6:10-12 c lost tas taytlich. (Lees.) Yeehoowa ferkest sich net fon te kuute tinge woo mer friier kemacht hon, awer tee wil hon tas mer wayter tëm mit kanse hërts tiine pis “aans ën”. Tee wërt fer imer unser fraaynt “wën mer net uf kepe”. (Kal. 6:9)
XPRECH TI WOERHEET IM HËRTS
7. Was petayt es ti woerheet im hërts xpreche?
7 Yemant woo wil een inkelaatne in Yeehoowa sayn parak sin, mus “ti woerheet im hërts [xpreche]”. (Psal. 15:2) Es petayt mee wii net liie. Yeehoowa wil hon tas mer eerlich sin in ales was mer saan un mache. (Hep. 13:18) Tas is wichtich, wayl “Yeehoowa hast ti falx persoon, awer hot een ëng fraayntxaft mit te kerechte”. (Xpr. 3:32)
8. Wii sole mer uns net aan xtele?
8 Tii woo “ti woerheet im hërts [xpreche]”, tuun Kot aan heere net ploos wën ti layt tëne siin, awer aach wën se aleen sin. (Isa. 29:13) Tii tuun sich net hinerlistich aan xtele. Yemant woo hinerlistich is, tuut fiilaycht aan fange se tenke tas Yeehoowa sayn kesetse net imer ti peste sin. (Tya. 1:5-8) Fiilaycht tuut eyer Yeehoowa unfoliche in sache woo eyer tenkt net soo wichtich sin. Tan, wëns aus siit tas niks xlimes pasiirt weeche sayn unfolichkheet, tuut eyer fiilaycht aan fange noch xlimer tinge mache. Opwool eyer tenkt tas eyer Kot tiint, tuut Yeehoowa sayn aanpeetung net aan nëme. (Ekl. 8:11) Awer meyer wole eerlich in ales sin.
9. Was is pasiirt tas eyerste mool woo Yeesus Natanaël ketrof hot un was lërne mer too temit? (Kuk aach tas pilt.)
9 Meyer khene een lisyoon lërne iwer wii wichtich es is een eerlich hërts hon, mit was pasiirt is wii Fiilip sayn fraaynt Natanaël keprung hot fer Yeesus khëne lërne. Es waar tas eyerste mool woo Yeesus Natanaël kesiin hot. Awer Yeesus hot kesaat: “Kuk mool! Too khomt een echte israeliiter, aan weem khee falxheet is.” (Yoo. 1:47) Yeesus wust tas sayn anere tisipele eerlich waare. Awer Natanaël hat een ekstra eerlichkheet kehat. Soo wii meyer al, waar Natanaël imperfekt, awer tee waar net falx orer uneerlich kewees. Yeesus hot weyert fer tiise kwaliteet kep un tee hot Natanaël too teweeche keloopt. Es weyer een eer wën Yeesus tas selwiche iwer uns saan khent!
Wii Yeesus Natanaël tas eyerste mool ketrof hot, hot eyer kesaat tas Natanaël eerlich waar. Un meyer? Sin mer aach soo? (Kuk te apsats 9.)
10. Warom sole mer uf phase mit was mer saan? (Tyako 1:26)
10 Ti meyerste tinge woo im Psalm 15 xteen, hon se tuun mit te aat wii mer ti anere pehantele. Te wersikel 3 saat iwer Yeehoowa sayn inkelaatne: “Tee fertseelt net liie fer ti anere sayn naame fersaue. Tee tuut khee xaat fer sayn nochper mache un xprecht net xlechtes iwer sayn fraaynte.” Xlecht iwer ti anere xpreche, khan se wee mache; un tas khent uns um hale inkelaatne in Yeehoowa sayn parak wëre. (Lees Tyako 1:26.) d
11. Was pasiirt mit yemant woo liie fertseelt fer ti anere sayn naame fersaue un sich net peroyt?
11 Te psalmist lost khee tswayfel: meyer sole net liie fertseele fer ti anere sayn naame fersaue. Tii woo tas mache un sich net peroye, wëre tesasosiirt. (Yee. 17:10)
12-13. Was fer sin etliche situatsyoone woo mer khente, oone se mërke, xlecht iwer unser fraaynte xpreche? (Kuk aach tas pilt.)
12 Psalm 15:3 saat aach tas Yeehoowa sayn inkelaatne khee xaat fer sayn nochper mache un niks xlechtes iwer sayn fraaynte saan. Wii khente mer xlecht iwer unser fraaynte xpreche?
13 Meyer khente xlechtes iwer anere xpreche oone se mërke wën mer nekatiiwe informatsyoone iwer tëne aus teele. Tenk iwer tiise situatsyoone: (1) een xwester lost noo wii pyoneerin tiine, (2) een pheyerche tuut net mee in Petël tiine, orer (3) een pruuter is net mee een elteste orer ministeryaale tiiner. Es weyer net richtich fer ti anere saan tas fiilaycht tas pasiirt is wayl se was ferkheertes kemacht hon. Khan sin tas uersache hiner traan sin woo mer kaar net wise tuun. Een inkelaatne in Yeehoowa sayn parak “tuut khee xaat fer sayn nochper mache un xprecht net xlechtes iwer sayn fraaynte”.
Es is laycht nekatiiwe informatsyoone iwer ti anere aus teele, un tas khent tsu wayt keen (Kuk ti apsetse 12-13.)
EER TII WOO YEEHOOWA RESPEKTIIRE
14. Was petayt ap xtose yemant woo khee weyert hot?
14 Psalm 15:4 saat tas Yeehoowa sayn fraaynt “tuut nimant woo khee weyert hot, aan nëme”. Wii khene mer tas mache? Meyer khene net ëntxlise ep yemant weyert hot orer net tëm noo unser aychne mënung. Warom? Meyer sin imperfekt; soo fiilaycht, tuun mer weyert kepe fer tii woo mer kuut rom khome un khee weyert kepe fer tii woo uns pees lose. Tes weeche, tuun mer ploos ap xtose tii woo Yeehoowa saat khee weyert hon. (1 Kor. 5:11) Too tepay sin tii woo tas xlechtes mache oone sich peroye, tii woo unser klaape oone respekt pehantele orer tii woo fersuuche unser fraayntxaft mit Yeehoowa fersaue. (Xpr. 13:20)
15. Was is een aat wii mer eere khene tii “woo Yeehoowa respektiire”?
15 Tan tuut te Psalm 15:4 saan tas mer sole “tii, woo Yeehoowa respektiire, eere”. Meyer suuche aate fer kuutheet un respekt tsayche fer tii woo Yeehoowa sayn fraaynte sin. (Rom. 12:10) Een aat fer tas mache xteet im selwiche wersikel. Es saat tas een inkelaatne in Yeehoowa sayn parak “tuut sayn ferxpreche hale, aach wëns net kuut fer tee is”. Unser ferxpreche net in hale, khent ti anere wee mache. (Mat. 5:37) Tsum payxpiil, Yeehoowa waart tas ti mëner un fraae woo ferhayrat sin, tas ferxpreche hale woo se in sayn hoochtsayt kemacht hon. Kot is aach froo wën ti eltere sich aan xtrenge fer ti ferxpreche hale woo se fer sayn khiner kemacht hon. Wayl mer Kot un ti anere liipe, tuun mer uns aan xtrenge fer unser ferxpreche hale.
16. Wii noch khene mer Yeehoowa sayn fraaynte eere?
16 Een aner aat wii mer Kot sayn fraaynte eere khene, is tëne kuut aan nëme un krooshërtslich sin. Soo, mache mer Yeehoowa noo. (Rom. 12:13) Un wën mer tsayt mit unser priiter un xwestere plaype, net ploos in te fersamlunge un in te preetich, khome mer tichter pay tëne un Yeehoowa.
TUU NET TAS KELT LIIPE
17. Warom tuut te Psalm 15 iwer kelt xpreche?
17 Psalm 15:5 saat tas Yeehoowa sayn fraaynt “tuut net sayn kelt mit tsinse leene un tee nëmt khee kexenk aan fer was xlechtes keeche te unxultiche se mache”. Warom tuut tiise khorts Psalm iwer kelt xpreche? Wayl wën mer uns tsu fiil ketanke mim kelt mache, khent tas wichticher fer uns wëre wii ti layt orer soo kaar Yeehoowa. (1 Tim. 6:10) In te piiplixe tsayte, hon etliche sayn aarme priiter unkerecht pehantelt: tii hon se tsinse kopriirt. Un etliche richter hon kexenke aan kenom fer ti unxultiche unkerecht richte. Yeehoowa hast soo een sort aanxtelung. (Ese. 22:12)
18. Was fer frooche khene mer uns mache fer se siin was unser mënung iwer tas kelt is? (Hepreeyer 13:5)
18 Es is kuut se tenke iwer unser mënung iwer tas kelt. Froo tich: ‘Tuun ich kans ofts tenke iwer kelt un was ich too temit khaafe khan? Wën yemant mich kelt poricht, tuun ich een lang tsayt waarte fer tsurik petsaale, wayl ich tenke tas ti persoon es net praycht? Meecht ich tenke tas, wayl ich kelt hon, sin ich peser wii ti anere? Is es xweyer fer mich krooshërtslich mit te anere sin? Tuun ich tenke tas, wën een pruuter fiil kelt hot, is es wayl eyer tas kelt mee wii Yeehoowa liipt? Wil ich ploos fraaynt sin fon tëne woo raych sin un net fon tëne woo aarm sin?’ Es is wichtich uns tiise frooche mache, wayl mer hon ti wunerlich eer kriit fer Yeehoowa sayn inkelaatne sin. Awer meyer khene ploos in Yeehoowa sayn parak plaype, wën mer net tas kelt liipe. Soo tuut Yeehoowa uns nii im xtich lose! (Lees Hepreeyer 13:5.) e
YEEHOOWA LIIPT SAYN FRAAYNTE
19. Warom wil Yeehoowa hon tas mer mache was im Psalm 15 ferlangt is?
19 Te Psalm 15 keet aans ën mit tiise ferxpreche: “Weer soo hantelt, wërt nii kexiitelt.” (Psal. 15:5) Too tuut te psalmist tsayche warom wil Yeehoowa hon tas mer mache ales was in tiise Psalm xteet: Tee wil hon tas mer froo wëre. Tes weeche, kept eyer uns oryentiirunge woo uns helfe een peser leepe hon un uns xitse. (Isa. 48:17)
20. Was khene Yeehoowa sayn inkelaatne im futuer waarte?
20 Yeehoowa sayn inkelaatne khene een xeen futuer waarte. Ti kesalpte tuun im himel leepe, im plats woo Yeesus tëne foer perayt hot. (Yoo. 14:2) Tii woo ti eyertlich hofnung hon, waarte ti erfiilung fon Apokalipsis 21:3. Yawool, Yeehoowa wil hon tas mer sayn inkelaatne un fraaynte fer imer wëre — tas is sicher een kroos eer!
LIIT 39 Mach een kuute naame foer Yeehoowa
a (Psalm 15:1-5) Oo Yeehoowa, weer khan in tayn parak woone? Weer khan uf tayn haylich përich woone? 2 Tee woo oone feeler keet, woo macht was richtich is un woo ti woerheet im hërts xprecht. 3 Tee fertseelt net liie fer ti anere sayn naame fersaue. Tee tuut khee xaat fer sayn nochper mache un xprecht net xlechtes iwer sayn fraaynte. 4 Tee tuut nimant woo khee weyert hot, aan nëme, awer tuut tii, woo Yeehoowa respektiire, eere. Tee tuut sayn ferxpreche hale, aach wëns net kuut fer tee is. 5 Tee tuut net sayn kelt mit tsinse leene un tee nëmt khee kexenk aan fer was xlechtes keeche te unxultiche se mache. Weer soo hantelt, wërt nii kexiitelt.
b (Isayas 48:1) Heert mool, Yaakop sayn haus, teyer woo aych selepst wii Israël nënt un woo ausm waser fon Yutaa khom sayt; teyer woo juramente im naame fon Yeehoowa macht un te Kot fon Israël aan ruuft, awer net mit eerlichkheet un kerechtichkheet.
c (Hepreeyer 6:10-12) Kot is net unkerecht. Soo ferkest eyer sich net fon te aarwayt un ti liip woo teyer tsu sayn naame ketsaycht hot, wii teyer ti hayliche ketiint hot un tii wayter tiine tuut. 11 Awer meyer wole hon tas teyer al flaysich sayt fer aych kans sicher fon te hofnung pis aans ën sin. 12 Soo, sayt net faulënser, awer macht noo tii, woo torich te klaape un ti ketult, ti ferxpreche ërpe.
d (Tyako 1:26) Wën yemant mënt tas eyer Kot aan peete tuut, awer tuut sayn tsung net kontroliire, tan, tuut tee sayn aychne hërts hinerkeen, un sayn aanpeetung hot khee weyert.
e (Hepreeyer 13:5) Ayre leepe mus fray fon te liip tsum kelt sin; sayt tsufriite mit was teyer hot. Wayl eyer hot kesaat: “Ich tuun tich nii lose un ich tuun tich nii im xtich lose.”
