1. How Songs Fo God 15 can help us?

 IN DA las lesson, we wen learn dat da guys who wen give dea life to Jehovah an stay one a his close frenz can be one guest in his tent. Wat we gotta do fo be his guest? Songs Fo God 15 talk about dis. (Read um Songs Fo God 15:1-5.) Dis song tell us wat we gotta do fo be one a God’s close frenz.

2. Wat David coulda been tinking wen he had talk about Jehovah’s tent?

² Songs Fo God 15 start wit, “Eh! You Da One In Charge! Tell me who get da right fo live wit you, in da place you stay. Who get da right fo stay long time on top da mountain dat stay spesho fo you?” (Songs 15:1) Wen talking about “da place [Jehovah] stay,” o his “tent,” maybe David was tinking about da big tent dat was in Gibeon. David wen also talk about “da mountain dat stay spesho fo [Jehovah],” so maybe he was tinking about da tent at Mount Zion in Jerusalem. Ova dea, coupo miles south a Gibeon, David wen set up one tent fo put Da Box Fo No Foget Da Deal in dea, till afta dey wen build da temple.​—2 Sam 6:17.

3. How come we like undastan Songs Fo God 15? (Go look da picha.)

³ Mos a da Israel peopo no could work at da tent, an not too many a dem could go inside wea Da Box was. But all a Jehovah’s worshippas can be one guest in his tent by coming an staying his fren. Dass someting all us like. Songs Fo God 15 tell us wat we gotta do fo stay Jehovah’s frenz.

 LIVE SO DAT NOBODY CAN POIN FINGA AN DO DA RIGHT TING ERYTIME

4. How we know dat fo get baptize, az not da ony ting Jehovah like us do? (Isaiah 48:1)

⁴ At Songs Fo God 15:2, one fren a God is somebody “dat live so dat nobody can poin finga dem. Dey do da right ting erytime.” Da words “live” an “do” show dat dis is someting we gotta keep doing. So wat, we can “live so dat nobody can poin finga” us? Can. If we do oua bes fo lissen him, Jehovah going look at us lidat even if we not perfeck. Wen we give oua life to Jehovah an get baptize, dass jus da start fo us. Fo exampo, in Bible times, jus cuz somebody was one Israelite, dat neva mean automatic he was going be one a Jehovah’s guest. Some wen pray to him but dey “no mean wat [dey] tell, an no do wass right.” (Read um Isaiah 48:1.) Fo show dey really wanted fo be Jehovah’s guest, Israelites had fo learn wat dey gotta do, an do um. Same same today, fo be Jehovah’s close fren take moa den getting baptize an being called one Witness Fo Jehovah. We gotta “do da right ting erytime.” How we can do dat?

5. Wat dat mean fo obey God in eryting dat we do?

⁵ To Jehovah, fo “live so dat nobody can poin finga” an fo “do da right ting erytime” az moa den jus going meetings erytime at da Kingdom Hall. (1 Sam 15:22) We gotta try hard fo obey God in eryting dat we do, even wen we stay by ouaself. (Smart Guys 3:6; Teacha 12:13, 14) Az importan we try lissen Jehovah even wen come to tings dat seem pretty mynah. Wen we do dis, dat show we love him, an dis make him love us even moa.​—John 14:23; 1 John 5:3.

6. From wat Fo Da Hebrew Peopo 6:10-12 tell, wat moa importan den da good kine tings we awready wen do?

 ⁶ Jehovah stay supa happy wit wat we awready wen do fo him. But jus cuz we wen do good kine tings befoa, dat no mean we going stay guests in Jehovah’s tent. We know dis cuz a wat tell at Fo Da Hebrew Peopo 6:10-12. (Read um.) Jehovah no foget da good kine tings we wen do fo him befoa. But he like us fo keep going all out fo worship him till da end come. He going be oua fren foeva “if we no give up.”​—Gal 6:9.

TELL DA TRUT ERYTIME CUZ NO MOA NOTTING FO HIDE

7. Wat dat mean, tell da trut erytime cuz no moa notting fo hide?

⁷ Somebody who like be one guest in Jehovah’s tent gotta “tell da trut erytime cuz no mo notting inside dem dey like hide.” (Songs 15:2) Dis no ony mean dat we no going bulai. Jehovah like us fo be honest in eryting we tell an do. (Heb 13:18) Dass importan, “cuz Da One In Charge, he no like crooked kine peopo, dey make him sick. But da peopo dat stay do wass right, dey stay his good frenz.”​—Smart Guys 3:32.

8. Wat tings we gotta make shua fo no do?

⁸ Da guys who “tell da trut erytime cuz no mo notting” fo hide, no make like dey lissen God in front peopo, but den do bad kine stuff wen dey by demself. (Isa 29:13) Dey no do stuff jus fo ack. Somebody who ony ack might tink dat Jehovah’s rules, not da bes. (Jam 1:5-8) He might not lissen Jehovah wen come to tings he tink az pretty mynah. Den, if notting bad happen wen he no lissen, he might start fo do tings dass moa worse. Even tho he tink he serving God, Jehovah no going tink wat he do az ok. (Teacha 8:11) But fo us, we like be honest erytime.

9. Wat we learn wen Jesus had meet Natanael fo da firs time? (Go look da picha.)

⁹ Az supa importan fo be somebody  who “tell da trut erytime.” We can see dis from wat had happen wen Philip wen invite his fren Natanael fo meet Jesus. Even tho Jesus neva wen meet Natanael befoa, Jesus had tell, “Dis guy one fo real kine Israel guy. No mo notting fake inside him! He erytime tell da trut.” (John 1:47) Jesus wen know dat his odda guys was honest, but Natanael was even moa so. Like us, Natanael no was perfeck, but still yet he neva ack. He was honest erytime. Jesus wen like dat about Natanael an wen let him know. All us like Jesus tink dat about us aah?

10. How come we gotta watch oua mout? (From James 1:26)

¹⁰ Mos a da tings we gotta do dat stay in Songs Fo God 15 have to do wit how we treat oddas. Like wat tell at Songs 15:3, one guest in Jehovah’s tent “no talk bad bout odda peopo. Dey no do notting fo hurt dea frenz. Dey no talk harsh kine to dea neighba guys.” If we talk lidat, dat can really hurt oddas an we no going be one guest in Jehovah’s tent no moa.​—Read um From James 1:26.

11. Wat dat mean fo no talk bad about odda peopo, an wat going happen to somebody who dat?

¹¹ Wen da songwrita wen tell “no talk bad about odda peopo”, wat he wen mean? Mos times, dat mean telling one bulai about somebody dat can jam up dea rep. If somebody do dat an no stay sorry about um, dey no can be one Witness Fo Jehovah anymoa.​—Jer 17:10.

12-13. Wat kine ways we might hurt oua frenz witout knowing it? (Go look da picha.)

¹² Songs 15:3 also tell us dat Jehovah’s guest no talk stink about dea neighbas an no do notting fo hurt dea frenz. How we might end up doing dat?

 ¹³ We can hurt somebody witout knowing it by telling bad kine stuff about dem. Fo exampo: (1) one sistah stop pioneering, (2) one married coupo leave Bethel, o (3) one braddah not one elda o helpa guy anymoa. Would be bad fo tell oddas dat dose tings wen happen cuz maybe dey wen do someting wrong. Maybe had plenny reasons dat we donno about. One guest in Jehovah’s tent “no do notting fo hurt dea frenz. Dey no talk harsh kine to dea neighba guys.”

GET RESPECK FO DA PEOPO DAT STAY SKED A DA ONE IN CHARGE

14. Tell how Jehovah’s guests stay away from “peopo [who] do stuff dat God tell no good.”

¹⁴ Songs 15:4 tell dat one fren a Jehovah “tink az bad wen peopo do stuff dat God tell no good.” How we know if somebody bad? We no can tell wedda somebody stay no good jus cuz a how we tink o feel. How come? Cuz we no stay perfeck, maybe easy fo us get along wit some peopo, but den no like oddas jus cuz we tink dey irraz. So den, da ony guys we gotta stay away from is da guys Jehovah tell az “no good.” (1 Cor 5:11) Dis da guys who know dey do bad kine stuff an no stay sorry bout um, no moa respeck fo wat we believe, o try jam up oua frenship wit Jehovah.​—Smart Guys 13:20.

15. Wat one way fo respeck da peopo dat stay sked a Jehovah?

¹⁵ Nex, Songs 15:4 tell dat we gotta respeck “da peopo dat stay sked a Da One In Charge.” So we look fo ways we can show respeck an be nice to Jehovah’s frenz. (Rome 12:10) How? One way stay in Songs 15:4 wea it tell dat one guest in Jehovah’s tent “stick erytime wit wat dey wen promise in front God, no matta someting bad happen to dem cuz a dat.” If we break oua promise, dat going hurt oddas. (Mat 5:37, NWT) Fo exampo, Jehovah expeck husbands an wifes fo keep da promise dey wen make to each odda wen dey got married. An he happy wen parents try fo keep promises dey wen make to dea kids. Cuz we love God an oddas, we going do eryting we can fo keep oua promises.

16. Wass anodda way fo show respeck to Jehovah’s frenz?

¹⁶ Anodda way fo show respeck to Jehovah’s frenz is fo take kea dem wit aloha. (Rome 12:13) Wen we hang out wit oua braddahs an sistahs, an not jus at meetings o field service, we come moa close to dem an to Jehovah. An wen we show aloha, we copy Jehovah.

LIVE SO YOU NO MO PLENNY LOVE FO MONEY

17. How come Songs 15 talk about money?

¹⁷ One guest a Jehovah “no charge extra interes wen dey lend money. Dey no take dirty money from somebody dat like hurt one guy dat neva do notting bad.” (Songs 15:5) How come dis song talk about money? Cuz if we love money, dat can come moa importan to us den peopo an even God. (1 Tim 6:10) Back in Bible times, some guys wen rip off dea braddahs by charging dem interes on da money dey wen lend um. Not ony dat, some judges wen take bribes an judge da guys dat neva  do notting bad az guilty. Jehovah hate wen peopo ack lidat.​—Eze 22:12.

18. Wat we can ask ouaself fo see how we feel about money? (Fo Da Hebrew Peopo 13:5)

¹⁸ Az good fo us tink about how we feel about money. Try ask, “I tink about money all da time an wat I can buy wit um? If I borrow money, I take long time fo pay um back cuz I tink da guy no need um? If I get money, dat make me feel like I betta den oddas? Az hard fo me share wit oddas? I tink dat if braddahs an sistahs get plenny money, az cuz dey love money moa den Jehovah? I radda hang out wit da guys who get plenny money, an not wit da guys who stay pooa, o wat?” Good fo us ask dese questions, cuz we wen get da invite from Jehovah fo be his guest. But we can ony be his guest if we make shua we no love money. If we do dat, Jehovah neva going bag from us!​—Read um Fo Da Hebrew Peopo 13:5.

JEHOVAH LOVE HIS FRENZ

19. How come Jehovah like us do all da tings in Songs 15?

¹⁹ Songs 15 end wit da promise, “Dat kine peopo, dey da ones dat goin stan solid foeva!” (Songs 15:5) Da songwrita explain how come Jehovah like us do all dese tings. Az cuz he like us fo be happy. Wen we do wat God ask us fo do, we going have one betta life, an he going proteck us.​—Isa 48:17.

20. Wat Jehovah’s guests no can wait fo?

²⁰ Da future going be unreal fo Jehovah’s guests. Da guys who Jehovah wen pick fo go heaven going “get plenny place fo stay” dat Jesus had make ready fo dem. (John 14:2) Da guys who get da hope fo live on earth no can wait fo da promise at Jesus Show 21:3, come true. Dass one big deal fo get da invite fo be Jehovah’s fren, an be guests in his tent foeva!