1. Apyobwuna oyina ahị tị́ ka yé bwula ọ-kụ ẹhị yẹ ẹla ọla ụpwụ nya Eje Ọnyịịla 15:1-5?

 Ẹ-ẸPWỤ nya ang ọjẹ́jẹ ọlẹ kọ jene nya ọlẹ, ahị jẹ́ nyori angịlẹ kị hu ịlaa ju iJihova ụ-ụbwọ bala ọ-kịnyaa la o-ri igu o-chii balọọ ka jẹ́-ẹ ri angga ẹ-ẹpwụ nya ọdụ nyamwụ. Ma ịyẹ ahị tị́ baba nyọka họ kahị ka jẹ́-ẹ ri igu ọlịnyị balọọ? Eje Ọnyịịla 15 la ẹla lụmẹ-lụmẹ ka ya u-uhye nya egbeju nya ẹlẹwẹ. (Wa Eje Ọnyịịla 15:1-5.) Eje Ọnyịịla ọwẹ ya ẹla ọlẹ kọ ka dahị ụbwọ nyọka jẹ́-ẹ tụ ju iJihova chwẹẹ gụ́ ọọwa.

2. Ịyẹ iDevidi à tị́ kpa i-irya ụka kọ gu ẹnyị nya ọdụ nya iJihova?

² Eje Ọnyịịla 15 dọmwụ la ịtọ ọlẹ: “[IJihova] ee, oowo à tị́ ka jụ ka ube ịgọgọ [lee ọdụ] nyang myị-ị̀? Oowo à tị́ ka nọ ẹpwa ị-ịSayọn ọgbọdọ ọlịgọgọ nyang myị-ị̀?” (Eje. 15:1) Ụka ká iDevidi ọngọ da eje ọnyịịla wẹẹ ya ẹla rụ “ube ịgọgọ” lee ọdụ, ọ chịkpẹẹ myị́ kọ ka ja kụ irya nya ube ịgọgọ ọlẹ ko ji iGibyọn la ụka ọhẹ. IDevidi myị́myị́ ya ẹla u-uhye nya “ọgbọdọ ọlịgọgọ” nya Ohe, ọhẹka irya ka kpọọ ka ẹga nya ọdụ ọla ọgbọdọ nya ịSayọn ị-iJerusalẹm myị́. Ụ-ụwa, kọ lụrụ tụ ahị ju ịmayịlị 10 ka oye edii nya epweji nya iGibiyọn, iDevidi nwụ ọdụ ọhẹ ká akpa nya iro nya Ohe ji gbe ụka kị ka nwụ ẹpwa ọlam-ọlam họọ.—2 Sam. 6:17.

3. Ịyẹ tị́ du ká ẹla ọla Eje Ọnyịịla 15 ka háahị la ọjẹ́jẹ? (Ye ifoto ịnyịnyị.)

³ Ịlẹhị lẹ ụmụmẹ nya ala Isirẹlụ á kaa la iwe nyọka họ ụkụrwọ u-ube ịgọgọ ka, angị ịmanyị-manyị nyaa kem à tị́ dọmwụ la iwe nyọka ka ẹpwụ nya ọdụ ọlẹ ká akpa nya iro ji lẹ. Ma angị gbịgba ha iJihova alẹ wuu ka jẹ́-ẹ ju ụga ka ọdụ nyamwụ bwula ọ-kịnyaa la o-ri oligu nyamwụ. Ang ọlẹ kahị wuu tịtọ a wẹ lẹ.  Eje Ọnyịịla 15 ya abwẹla ịlẹ kahị baba nyọka la chajị kahị ka jẹ́-ẹ ri oligu nya iJihova kịnyaa.

CHEJI BA ABWẸLA ỌTỊPYỌ KÁ KỊNYAA LA ANG ỌNYỊỊLA ỌHỌHỌ

4. Ányị ahị tị́ họ kahị jẹ́ nyori e-enyi Ohe o-huhu kem iJihova a tịtọ bwu ẹga nyahị ka? (Ayịsaya 48:1)

⁴ Ụpwụ nya Eje Ọnyịịla 15:2 chabwọ nya oligu nya Ohe lala “ọngọlẹ ká ọhịhị nyamwụ-ụ́ ju abyị ka, kọọ họ ang ọlẹ kọ pwoku.” Ang ọlẹ kahị baba nyọka họ ka ịlahị-ịlahị à wẹ lẹ. Ma ahị ka jẹ́-ẹ jẹdịyẹ ụ-ụgbeyị ọlẹ ká ‘ọhịhị nyahị ka ju abyị ka’ ị-ịlẹhị? Ee. Nanana nyori ọngịnyị ehe ọhẹ-lọhẹ á la kpẹẹkpẹẹ ka, iJihova ka yẹhị lala o-ri ọhịhị nyahị nyị́ “ju abyị ka” kori kahị kaa maga da ịlọhị nyọka jwoo ihi. Ụka kahị hu ịlọhị ju iJihova ụ-ụbwọ kahị hu enyi Ohe, ọwẹ ri ọmwụ ọdada nya ẹdịyẹ ọ-jẹ́ bala Ohe wẹẹ. Kpịtịya nyori lụka onyogo, ọngịnyị o-ri ala ẹpwụma nya Isirẹlụ kem á mẹjẹ nyori ọngọọwa ri ọngga nya iJihova lẹka. Angịhyẹ kaa wụrọọ, ma ị́ tị kaa họ ịnyị ẹ-ẹpwụ nya ‘ẹla nya ịlẹhị kpong-kpong ka.’ (Wa Ayịsaya 48:1.) Ọ-ka mẹjẹ nyori ala Isirẹlụ tịtọ nyọka ri angga nya iJihova ọlam-ọlam, ị baba nyọka jẹ́ ẹla ọlẹ ká iJihova tịtọ bwu ẹga nyaa bala ọ-ka kpa ẹla ọọwa họ ụkụrwọ. Ịnyịnyị-ịnyịnyị, nyọka jẹ́-ẹ ri igu o-chii bala iJihova alẹ, ọ́ ka ba oo-ri ahị tị́ hu enyi Ohe lẹ bala o-ri ị wẹẹ wụrụhị ọngọhẹ nya Alibeenu nya iJihova lẹ kem ka. Ahị ka kịnyaa la ọ-ka “họ ang ọlẹ kọ pwoku.” Ányị ahị tị́ ka bwu họ ịnyị?

5. Ịyẹ à tị́ ri etu nyọka ju ihi nya iJihova ẹ-ẹpwụ nya ang myị́ ang wuu?

⁵ A-ahị nya iJihova, ọhịhị nya ọngịnyị ọ-ka “ju abyị ka” bala ọ-juwa “họ ang ọlẹ kọ pwoku” á ba ọọ-ka ka ọjịra-jịra ụka myị́ ụka kem ka. (1 Sam. 15:22) Ahị ka maga nyọka ju ihi nya Ohe ụpa nya ọhịhị nyahị ọnyị myị́ ọnyị pyii, tụ́ ụka kahị ji ụbwọọhị. (Etu 3:6; Ọngọ. 12:13, 14) Ọ baba kahị ka ju ihi nya  iJihova ẹ-ẹpwụ nya ẹla ịlẹ kị dọmwụ lala o-ri nyị́ ju apyobwuna gbuu ka. Ọ-họ ịnyị mẹjẹ nyori ahị la ọháha ẹ-ẹga nyamwụ ịnyịlẹhị, ọọwa tị du kahị ka họ́ọ ịnyịnyị.—Jọn. 14:23; 1 Jọn. 5:3.

6. Jaabwọ ká ụpwụ nya Ala iHiburu 6:10-12 ya, ịyẹ à tị́ baba gụ́ ang ịnyịịla ịlẹ kahị họ kam kẹkpẹ?

⁶ Ang ịlẹ kahị họ ha iJihova la ụka ọkẹkpẹ wuu myọọ lẹhị yẹẹyẹẹ. Ma chajị nyori ahị họ ang ọnyịịla ụka ọkẹkpẹ lẹ á ka ya iwe da hahị nyọka ri ọngga kịnyaa ẹ-ẹpwụ nya ọdụ nya iJihova ka. Ẹlẹwẹ la gbabgịla ụ-ụpwụ nya Ala iHiburu 6:10-12. (Wọọ.) IJihova á kaa deeri nya ang ọnyịịla ọlẹ kahị họ ka. Ma ọ tịtọ kahị ka kịnyaa la ọ-gbịgba họọ la ọkịlẹtụ nyahị wuu “kịlahị-ịlahị” gbee da ka ocheju. Ọ ka ri oligu nyahị pịyọọ “ó-ri kahị kpụ ịbwọ ẹ-ẹpwụ nya ụkụrwọ nyahị ọọwa ọhọhọ ka aalẹ.”—Gal. 6:9.

YA ẸLỊLẸHỊ Ẹ-ẸPWỤ ỌKỊLẸTỤ NYANG

7. Ịyẹ à tị́ ri etu nya ẹlịlẹhị ọ-ya bwụ ọkịlẹtụ nyahị?

⁷ Ọngọlẹ kọ ka jẹ́-ẹ ju ụga ọ-ọdụ nya iJihova ka ri ọngọlẹ kọ kaa “ya ẹla nya ịlẹhị bwu ọkịlẹtụ nyamwụ.” (Eje. 15:2) Ọọwa á ba ọọ-ka me ọnọọkịla ka kem ka. IJihova tịtọ kahị ka ya ẹlịlẹhị ẹ-ẹpwụ nya ang myị́ ang wuu. (Hib. 13:18) Ọọwa baba yẹẹyẹẹ chajị, “angị họ ang onyobyi wụ [iJihova] ẹjẹ, ọ tịị ri igu ta angị họ ang ọnyịịla.”—Etu 3:32.

8. Abwẹla iyina ahị tị́ baba nyọka cheji ba hi?

⁸ Angịlẹ kị kaa ya ‘ẹlịlẹhị bwu ọkịlẹtụ nyaa’ á kaa ju ihi nya Ohe ẹ-ẹga nya angịnyị, rụ ka ẹkpẹ ka họ ang ọtịpyọ ka. (Ayị. 29:13) Ị kaa yẹ abwọ hi abwẹla nya ẹla ọ-họ ọnụ-ọnụ ka. Ọngọ họ ẹla ọnụ-ọnụ ka kaa kụ irya nyori e-ehile nya iJihova wuu nyị à ju apyobwuna ka. (Jem. 1:5-8) Ọngọlịnyị kaa bịrị ehile nya Ohe u-uhye nya ang ịlẹ kị lọọ lala o-ri nyị baba nwa ka. Ụka kọ lala o-ri ịngịhẹ ọtịpyọ nyị́ họ nyọlẹ kọ biri ehile kaka lẹ, ọ ka dọmwụ nyọka họ ang ịlẹ kị tịpyọ gụ́ ọọwa lẹlẹ. Ọ ka me ọwa nyị wẹẹ gbịgba ha Ohe, ma iJihova á ja ye ịgba ọgbagba nyamwụ myị ka. (Ọngọ. 8:11) Ma ahị lẹ, ahị tịtọ nyọka ya ẹlịlẹhị ẹ-ẹpwụ nya ang myị́ ang wuu.

9. Ịyẹ ahị tị́ ka jẹ́ bwu ẹla ọlẹ kọ họ ụka ka iJisọsị ta ịNatanẹlụ bwaa? (Yẹ ifoto ịnyịnyị.)

⁹ Ahị yẹ ang odudu ká ẹla ọ-họ ọnụ-ọnụ  baba lụmẹ bwu ẹga ịNatanẹlụ ụka ká iJisọsị tọọ bwaa wẹẹ. Ụka ká iFilipu kpa ịNatanẹlụ oligu nyamwu wẹ ẹga nya iJisọsị, ang ọ-la ẹbyẹbyị ọhẹ họ. IJisọsị á yẹ ịNatanẹlụ ẹnẹhẹ lẹka, ma iJisọsị yẹkẹẹ: “Ọlẹng ọlẹ ri ọla Isirẹlụ ọlam-ọlam, ọlẹ ká ọnọọkịla omeme, á ji ẹpwụ nyamwụ ka.” (Jọn. 1:47) Ịlẹhị lẹ iJisọsị jẹ́ angịjụgbẹyị nyamwụ nyị ri angị họ ẹla ọnụ-ọnụ, ma iJisọsị yẹ nyori ịnya ịNatanẹlụ nyị kpa gụ́. ỊNatanẹlụ ri ọngọ la kpẹẹkpẹẹ ka lala ahị-ahị alẹ. Ma ọ́ kaa la ọhịhị nya ahị imiiye ẹnẹnẹhẹ ka, ọ kaa họ ọkpakpa ẹ-ẹpwụ nya ang myị́ ang wuu. Abwẹla nya ịNatanẹlụ ọọwa myị iJisọsị lẹhị du kọ dọọ ọlẹẹkwaa u-uhye nya ọọwa. Ọ ka ri ihi ọtụka hahị kori ká iJisọsị á ka jẹ́-ẹ ya ẹla ọlịnyị-ịnyị u-uhye nyahị!

10. Ịyẹ tị́ du kahị ka dụmwọ-dụmwọ ẹ-ẹpwụ nya ẹla ọyaya nyahị? (iJemsi 1:26)

¹⁰ Ụmụmẹ nya ẹla ịlẹ ká ụpwụ nya Eje Ọnyịịla 15 wa cheji kahị baba nyọka họ gu abwọlẹ kahị kaa kpa angịkịla. Eje Ọnyịịla 15:3 ya nyori ọngọ ju ụga ọ-ọdụ nya iJihova nyị́ kaa “me ọnọọkịla ba ọngịnyị ka, ọ́ọ họ oligu nyamwụ ang onyobyi ka. Ọ́ tịị kpa ọngịnyị ehe ọọnamwụ kụ ka ịnyịnyị.” Kori kahị ja kpa ẹlẹlẹ nyahị ya ẹla ịtịpyọ ịlịịwẹ aalẹ, ahị ka bịrị ang ha angịkịla, ọọwa tị ka du ká iJihova á ka myị ahị ka ju ụga ka ọdụ nyamwụ ka.—Wa iJemsi 1:26.

11. Ịyẹ à tị́ ri etu nya ọngịnyị ọ-bịrị ẹnyị? Ịyẹ à tị́ ka họ ta ọngọ bịrị ọngịnyị ẹnyị ọlẹ kọ myị yẹda ka?

¹¹ Ọngọ da Eje Ọnyịịla yẹ ẹla u-uhye nya ọngịnyị ọ bịrị ẹnyị. Ịyẹ à tị́ ri ẹtu nya ọngịnyị ọ-bịrị ẹnyị? O ri ẹla ọtịpyọ nya ọgịnyị o-yaya lẹẹ ọnọọkịla o-me ba ọngịnyị chajị ká angịkịla ka kpa ẹhị ọtịpyọ yọọ. Kori ká ọngọhẹ á ri ọngọ bịri angịnyị ẹnyị kọ tị myị yẹda ka, ọngọlịnyị á ka jẹ́-ẹ kịnyaa la o-ri ọngga ọ-ọdụ nya iJihova ka.—Jer. 17:10.

12-13. Ẹpwụ nya iwe-ahụrụ iyina ahị tị́ ka bịrị ongịnyị ẹnyị la ọjẹ́jẹ ka myị́? (Yẹ ifoto ịnyịnyị.)

¹² Eje Ọnyịịla 15:3 myị́myị́ kpụhị ịtịya nyori angị ri angga ẹ-ẹpwa nya iJihova nyị́ kaa họ angị kụ ẹpwa balaa ang ọtịpyọ ka, ị tị kaa bịrị  aligu nyaa ẹnyị ka ịnyịnyị. Ányị ahị tị́ ka bwu bịrị aligu nyahị myị́?

¹³ Ahị ka bịrị ọngịnyị ẹnyị la omeme ka myị́, kori kahị ja kpa oja ọtịpyọ nya ọngọlịnyị pyẹ. Ọ-chụ pwokwita: (1) ọọnahị ọnyang hu abwọ la ịlahị nya ụgbẹyị o-ye kpụrụrụ, (2) ahụ bala ọrụ ba la ụkụrwọ ọhọhọ ị-ịBẹtẹlụ, lee (3) ọọnahị ọlẹng ọhẹ á ri ọngọgbahị nya ọjịra-jịra lee ọngọ myị ẹrụ kaka. Ọ ka tịpyọ lụmẹ nyọka kpa ya ju angịnyị nyori aanahị ịwẹ nyị ja họ ang ọtịpyọ pyii à du ká iwe-ahụrụ nyaa nyị yẹda kpịraka wẹ lẹ. Ịlẹhị lẹ ẹlẹhẹ ka du ká iwe-ahụrụ nyaa yẹda myị́, ma ahị jẹ́ ẹla ọọwa kpangga ka. Ahị kpịtịya nyori, ọngọ ju ụga ọ-ọdụ nya iJihova á kaa “họ oligu nyamwụ ang onyobyi ka. Ọ́ tịị kpa ọngịnyị ehe ọọnamwụ kụ” nyọka bịrọọ ẹnyị ka ịnyịnyị.

CHỊ IHI JU ANGỊLẸ KỊ JUHI NYA OHE

14. Ịyẹ à tị́ ri etu nyọka cheji ba hi “alachị”?

¹⁴ Eje Ọnyịịla 15:4 ya nyori ọngọ ri oligu nya iJihova nyị́ kaa je ogu bala “alachị” ka. Ányị ahị tị́ ka bwu jẹ́ kori ká ọngịnyị á ri ọlụchị? Nyọlẹ kahị la kpẹẹkpẹẹ ka wẹẹ, áhị nwa ahị ka cheje nyori ọngịnyị ri ọlụchị ka. Ịyẹ tị́ du? Chajị angịhyẹ ka chịhịkpẹẹ la ọ-ka wu igu ọọlajị nya abwẹla nyaa, ma ẹla nya angịkịla tị ka wụụhị ẹjẹ myị́. Lẹ angị họ abwẹla ịtịpyọ ịlẹ ká iJihova wụrụ nyị “alachị” kem ahị baba nyọka cheji ba lẹ. (1 Kọr. 5:11) Angịlịnyị ri angịlẹ wuu kịị họ ang ọtịpyọ kị tị myị yẹda ka, angịlẹ kị myị ju ọmyịmyị nyahị ihi ka, tụ angịlẹ kị tịtọ ká igu o-riri nyahị bala iJihova ka la dẹwụ-dẹwụ.—Etu 13:20.

15. Ụgbẹyị oyina ahị tị́ ka jẹ́-ẹ chị ihi ju “angịlẹ kị ju iJihova ihi”?

¹⁵ Eje Ọnyịịla 15:4 tị byihi ịnyịnyị nyori ahị nyị “chị ihi ju angịlẹ kị ju [iJihova] ihi.” Lẹ ahị baba nyọka mwahị nya agbẹyị ịlẹ kahị ka bwu họ aligu nya iJihova ọnahị bala ọ-chị ihi jwaa. (Rom. 12:10) Ányị ahị tị́ ka bwu họ ịnyị? Jaabwọ ká Eje Ọnyịịla 15:4 ya, ụgbẹyị ọhẹ ọlẹ kahị ka jẹ́-ẹ họ ịnyị ri, ọngga ọla ọdụ nya iJihova kaa “họ ọnụ ọmyịmyị nyamwụ jịra, ó-riri kọ kpụ ọtẹ lee ọ kpụ okiro họọ.” Ọnụ ọmyịmyị ọ-họ jịra ka kaa jụ ọngọlẹ kahị myọnụ ha. (Mat. 5:37) Ọ-chụ pwokwita, iJihova ya ahị guru ká angị ji ẹpwụ nya ọdụ nyamwụ ka họ ọnụ ọmyịmyị nya awụlẹ oyeye nyaa jịra. Ọ kaa myịmyị kpọọ ịpyo kori ká adịda bala ịnịna á họ ọnụ ọmyịmyị nyaa jịra ẹ-ẹga nya anyị nyaa. Ọháha ọlẹ kahị la ẹ-ẹga nya Ohe bala aanahị du kahị ka họ ịngịngịhyẹ ọlẹ kahị ka jụ họ myị́ nyọka họ ọnụ ọmyịmyị nyahị jịra.

16. Ụgbẹyị ọkịla oyina ahị tị́ ka jẹ́-ẹ chihi ju angịlẹ kị ri aligu nya iJihova?

¹⁶ Ụgbẹyị ọkịla ọlẹ kahị ka jẹ́-ẹ chị ihi ju aligu nya Ohe ri ọ-ka họ angịkịla ụga bala o-hu ha pyẹ ụbwọ maa. (Rom. 12:13) Datị hi ụka nya ẹrụ ọnyịịla ọ-kpa pyẹ, kori kahị kaa bịrị ụka nya ịnyọ ọmwụmwụ bala aanahị alẹng bala anyang, igu o-riri nyahị balaa ka wu yẹẹyẹẹ, igu nyahị bala iJihova tị ka wu ịnyịnyị. Kori kahị tị họ angịkịla ụga, ọ mẹjẹ nyori ahị gbịla iJihova.

GBOCHO BWỤ ẸPWỤ NYA ỌHÁHA NYA OKPOKO

17. Ịyẹ tị́ du ka Eje Ọnyịịla 15 ya ẹla rụ okpoko?

¹⁷ Ahị wa nyori ọngọ ju ụga ka ọdu nya iJihova á kaa “ya okpoko kpịla, la ọ-tịtọ nya apyobwuna ọ-haju ka. Ọ́ kaa ye okpoko ochikiriju nyọka họ ibeenu ọnọọkịla ba ọngịnyị ka.” (Eje. 15:5) Ịyẹ tị́ du ká Eje Ọnyịịla ya ẹla u-uhye nya okpoko? Chajị kori ká okpoko á háahị lụmẹ, ọ ka nọ chẹẹ lẹ okpoko a ka juhi apyobwuna gụ́ aanahị dọmwụ tụ́ iJihova lẹlẹ. (1 Tim. 6:10) Lụka onyogo nya ịBayịbụụ, angịhyẹ kaa kpa alẹbyahị aanaa yẹ ụhị bwula o-ye apyobwuna ọ-haju u-uhye nya okpoko ọlẹ kị ya kpịlaa. Ịnyịnyị, angịleje ịhyẹ kaa ye okpoko ochikiriju, du kị kaa ya abyị ha ọngọ ri  oku nya ẹla. Ọhọhọ ọlịịwẹ wu iJihova ẹjẹ kaka kpoye.—Isi. 22:12.

18. Ịtọ iyina ahị tị́ ka kpa wụlẹ ịlọhị yẹ chajị kahị ka jẹ́ jaabwọ ka okpoko háahị kaka ba? (Ala iHiburu 13:5)

¹⁸ Ọ há kahị ka wụla ịlọhị yẹ u-uhye nya abwọlẹ kahị kaa họ ẹla ẹ-ẹga nya okpoko. Tọ ịlọng wo wẹẹ: ‘M̀ kaa ja kụ irya u-uhye nya okpoko ụka wuu bala ang ọlẹ kọ ka ra myị́? Kori kam kpịla okpoko, m̀ kaa họ atịmẹ la ọ-ka nwụ uri tịrẹkpẹ la irya nyori ọngọ ya okpoko kpịlam á baba nyamwụ ka? Okpoko ọlala du kam kaa yẹ ịlọm nya ọngọ ju apyobwuna gụ́ angịkịla, lee ọ-hu ha kaa jum a-abwọ? M̀ kaa yẹ aanahị alẹng bala anyang nya angịlẹ ká okpoko há lụmẹ chajị nyori ị la ang gụm? M̀ kaa wu angị lang igu kem be ikpehika deeji?’ Ahị baba nyọka tọ ịlọhị ịtọ ịwẹ chajị ihi ọtụka o ri hahị nyọka ju ụga ka ọdụ nya iJihova lẹ. Kori kahị ka jẹ́-ẹ kịnyaa ẹ-ẹpwụ nya ọdụ nya iJihova aalẹ, ahị baba nyọka yẹ okpoko melabwo. Kori kahị họ ịnyị, iJihova á ka myịị tụụbwọ hihi ẹnẹnẹhẹ ka!—Wa Ala iHiburu 13:5.

IJIHOVA LA ỌHÁHA Ẹ-ẸGA NYA ALIGU NYAMWỤ

19. Ịyẹ tị́ du ka iJihova tịtọ kahị ka họ ang ịlẹ wuu ká Eje Ọnyịịla 15 ya?

¹⁹ Ẹla ọla Eje Ọnyịịla 15 chejwu la ehe ọnyịịla ọlẹ: “Ọngọlẹ kọ la ọhịhị ọlịịwẹ lẹ aalẹ, ịngịngịhyẹ-ẹ́ ka wọọ ugbe myị kaka.” (Eje. 15:5) Ọngọ da eje ọnyịịla ya ang odudu ká Ohe tịtọ kahị ka họ ang ịlẹ wuu kị ji ẹpwụ nya ụpwụ ọwẹ. IJihova tịtọ kahị ka chị ọkẹkẹnị à du lẹ. Kori kahị họ ang ọlẹ ka Ohe byihi nyị họ, ọhịhị nyahị ka há, ọ tị ka chewu kehi ịnyịnyị.—Ayị. 48:17.

20. Ịyẹ angị ju ụga ọ-ọdụ nya iJihova wuu à tị́ ka ya ẹhị rịrị gbe?

²⁰ Angị ji ẹpwụ nya ọdụ nya iJihova ka jẹ́-ẹ ya ẹhị rịrị gbe ijuju ọnyịịla. Angịlẹ ká Ohe ya ida wụ ka hịhị e-epwoohe, ẹga ọlẹ ká iJisọsị ya ebe “lụmẹ-lụmẹ” nọ gbaa. (Jọn. 14:2) Angịlẹ kị ka ri ugu nya odehe ọlẹ wẹẹ ya ẹhị rịrị gbe ẹla ọlẹ ká ụpwụ nya Ọwụrụụ-wụrụ 21:3 chehe. Ihi ọtụka o ri hahị nyọlẹ ká iJihova wụrụhị nyọka ju ụga ọ-ọdụ nyamwụ gboyi myị́ oyi lẹ!