1. Kasano a makatulong kadatayo ti Salmo 15:1-5?

 ITI napalabas nga artikulo, nasursurotayo a dagiti dedikado nga adipen ni Jehova a nasinged ti relasionda kenkuana ket posible nga agbalin a sangailina iti simboliko a toldana. Ngem ania ti masapul nga aramidentayo tapno agbalintayo a sangailina? Adu ti isuro kadatayo ti Salmo 15. (Basaen ti Salmo 15:1-5.) Ipakita daytoy a salmo dagiti masapul nga aramidentayo tapno agbalintayo a nasingsinged iti Dios.

2. Ania ti mabalin a pampanunoten ni David idi dinakamatna ti tolda ni Jehova?

² Nairugi ti Salmo 15 kadagitoy a saludsod: “O Jehova, asino ti sangailiem iti toldam? Asino ti makapagyan iti bantaymo a nasantuan?” (Sal. 15:1) Idi dinakamat ni salmista David ti “tolda” ni Jehova, mabalin a ti pampanunotenna ket ti tabernakulo nga adda idi iti Gibeon iti dayta a tiempo. Dinakamatna met ti ‘nasantuan a bantay’ ti Dios a posible a tumukoy iti Bantay Sion iti Jerusalem. Ti kaadayo dayta ket sumagmamano a kilometro iti abagatan ti Gibeon, a sadiay ti nangibangonan ni David iti maysa a tolda a pakaikabilan ti lakasa ti tulag agingga a maibangon ti templo.—2 Sam. 6:17.

3. Apay a paginteresantayo ti Salmo 15? (Kitaen met ti ladawan.)

³ Siempre, kaaduan nga Israelita saanda a pulos napadasan ti agserbi iti tabernakulo, ken manmano laeng ti nakastrek iti tolda nga ayan ti lakasa ti tulag. Ngem amin a matalek nga agserserbi ken Jehova ket posible nga agbalin a sangailina iti simboliko a toldana no agbalin ken agtalinaedda a gagayyemna. Kayattayo amin dayta. Ipakita ti Salmo 15 dagiti kualidad a masapul a maadda kadatayo ken ipakitatayo tapno agtalinaedtayo a gagayyem ni Jehova.

 MAGNA NGA AWAN PAKABABALAWANNA KEN ARAMIDEN TI UMISO

4. Kasanotayo nga ammo a saan laeng a ti panagbautisar ti kidkiddawen ni Jehova kadatayo? (Isaias 48:1)

⁴ Iti Salmo 15:2, ti gayyem ti Dios ket nadeskribir kas ‘daydiay awan pakababalawanna ken kanayon nga umiso ti ar-aramidenna.’ Ipakita daytoy a teksto a masapul a kanayon nga itultuloytayo ti agbiag a kasta. Ngem talaga kadi a posible ti agbiag nga “awan pakababalawanna”? Wen. Uray imperpektotayo, ibilangnatayo ni Jehova kas “awan pakababalawanna” no aramidentayo ti amin a kabaelantayo nga agtulnog kenkuana. Kas pagarigan, idi tiempo ti Biblia, saan a gapu a ti maysa ket Israelita, automatikon a makualipikar kas sangaili ni Jehova ta adda dagiti immawag kenkuana ngem saan met nga “iti kinapudno ken kinalinteg.” (Basaen ti Isaias 48:1.) Masapul idi nga ammuen dagiti napudno nga Israelita dagiti pagalagadan ni Jehova ken surotenda dagita no kayatda ti agbalin a sangailina. Kasta met laeng ita. Agpayso a nangrugitayo a makipagna iti Dios idi nagdedikartayo kenkuana ken nagpabautisartayo. Ngem saan laeng a ti panagpabautisar ken pannakikadua kadagiti kakabsat ti kasapulan tapno agbalintayo a gayyem ti Dios. Masapul a ‘kanayon nga umiso ti aramidentayo.’ Kasanotayo nga aramiden dayta?

5. Ania ti kayat a sawen ti panagtulnog ken Jehova iti amin a banag?

⁵ Para ken Jehova, umdas kadin a regular a makigimgimongtayo tapno ibilangnatayo nga “awan pakababalawanna” ken ‘kanayon nga umiso ti ar-aramidentayo?’ Saan. (1 Sam. 15:22) Masapul nga ikagumaantayo ti agtulnog iti Dios iti amin nga ar-aramidentayo uray no agmaymaysatayo. (Prov. 3:6; Ecl. 12:13, 14) Napateg ken Jehova nga agtulnogtayo uray kadagiti babassit a bambanag. No aramidentayo dayta, ipakpakitatayo nga ay-ayatentayo  isuna, ket manamnamatayo a lallalo pay nga ayatennatayo.—Juan 14:23; 1 Juan 5:3.

6. Sigun iti Hebreo 6:10-12, ania ti napatpateg ngem iti aniaman a nasayaat a naaramidantayo iti napalabas?

⁶ Ap-apresiaren unay ni Jehova dagiti naaramidantayo para kenkuana iti napalabas. Ngem saan a gapu ta naaramidantayo dagita ket kualipikadotayon nga agtalinaed a sangaili ni Jehova iti toldana. Paneknekan dayta ti Hebreo 6:10-12. (Basaen.) Saan a malipatan ni Jehova dagiti nasayaat a naaramidantayo iti napalabas. Ngem kayatna nga itultuloytayo ti naimpusuan nga agserbi kenkuana “agingga iti panungpalan.” Ibilangnatayo a gayyemna iti agnanayon “no ditay mabannog.”—Gal. 6:9.

AGSAO ITI AGPAYPAYSO KEN NAIMPUSUAN

7. Ania ti kaipapanan ti panagsao iti agpaypayso ken naimpusuan?

⁷ Asinoman a mayat nga agbalin a sangaili ni Jehova iti toldana ket masapul nga agsao iti “agpaypayso ken naimpusuan.” (Sal. 15:2) Saan laeng a basta di panagulbod ti kaipapanan dayta. Kayat ni Jehova nga agbalintayo a mapagtalkan iti amin nga ar-aramiden ken ibagbagatayo. (Heb. 13:18) Napateg dayta “ta kagura ni Jehova ti nasikap a tao, ngem nasinged a gayyemna ti nalinteg.”—Prov. 3:32.

8. Ania a kababalin ti masapul a liklikantayo?

⁸ Dagidiay agsasao iti “agpaypayso ken naimpusuan” ket saan nga agintutulnog no adda dagiti makakitkita ngem suksukirenda met dagiti linteg ti Dios no awan ti makakitkita. (Isa. 29:13) Saanda a kayat ti agbalin a nasikap. Ti nasikap a tao mabalin nga ibilangna a saan a kanayon a pagsayaatan dagiti paglintegan ni Jehova. (Sant. 1:5-8) Mabalin a sukirenna dagiti paglintegan ni Jehova nga ibilangna a saan unay a napateg. Ket no awan ti makitana a pagdaksan ti panagsukirna, mabalin a naturturedto payen a mangsukir kadagiti linteg ti Dios. Isu nga uray no ti panagkunana ket agserserbi ken Jehova, saan nga awaten ti Dios ti panagdaydayawna. (Ecl. 8:11) Ngem kayattayo ti agbalin a mapagtalkan wenno napudno iti amin a banag.

9. Ania ti masursurotayo idi damo a naam-ammo ni Jesus ni Natanael? (Kitaen met ti ladawan.)

 ⁹ Nakapatpateg ti agsao iti agpaypayso ken naimpusuan. Dayta ti masursurotayo iti napasamak idi inawis ni Felipe ti gayyemna a ni Natanael tapno maam-ammona ni Jesus. Uray no damo pay laeng a makita ni Jesus ni Natanael, imbaga ni Jesus: “Kitaenyo, ti pudno nga Israelita nga awanan panangallilaw.” (Juan 1:47) Siempre, ammo ni Jesus a napudno ti dadduma pay nga adalanna, ngem nangnangruna a nakitana dayta a kababalin ken Natanael. Imperpekto met a kas kadatayo ni Natanael, ngem saan a peke wenno sinsinan ti panagbalinna a napudno. Naapresiar ken kinomendaran ni Jesus ni Natanael gapu iti dayta. Kayattayo amin a kasta met koma ti marikna ni Jesus kadatayo!

10. Apay a masapul nga annadantayo ti panagsasaotayo? (Santiago 1:26)

¹⁰ Kaaduan kadagiti nadakamat iti Salmo 15 a masapul nga aramidentayo ket konektado iti panangtratotayo iti dadduma. Kuna ti Salmo 15:3 a ti maysa a sangaili iti tolda ni Jehova ket masapul nga “awan ti padpadaksen ti dilana, saan nga agaramid iti pakadaksan ti kaarrubana, ken dina ibabain dagiti gagayyemna.” No padaksentayo ti sabsabali, masaktantayo unay ida ken saantayo a makapagtultuloy a kualipikado a sangaili ni Jehova iti toldana.—Basaen ti Santiago 1:26.

11. Ania ti panangpadakes, ken ania ti mapasamak kadagiti di agbabbabawi a manangpadakes?

¹¹ Espesipiko a dinakamat ti salmista ti panangpadakes. Ania ti panangpadakes? Kaaduanna, dayta ket saan nga agpaypayso a sasao a mabalin a mangdadael iti reputasion ti maysa a tao. Dagiti di agbabbabawi a manangpadakes ket mailaksid iti kongregasion Kristiano.—Jer. 17:10.

12-13. Ania ti dadduma a situasion a mabalin a ditay mapupuotan a maibabaintayo dagiti gagayyemtayo? (Kitaen met ti ladawan.)

¹² Ipalagip met kadatayo ti Salmo 15:3 a  dagiti sangaili ni Jehova saanda nga agaramid iti pakadaksan ti kaarrubada, ken dida ibabain dagiti gagayyemda. Kasano a mabalin a maibabaintayo dagiti gagayyemtayo?

¹³ Mabalin a ditay mapupuotan a maibabaintayo ti maysa a tao no agiwarastayo iti negatibo nga impormasion. Kas pagarigan: (1) simmardeng a payunir ti maysa a sister, (2) rimmuar iti Bethel ti maysa nga agassawa, wenno (3) saanen a panglakayen wenno ministerial nga adipen ti maysa a brother. Umiso kadi nga iwarastayo iti sabsabali ti opiniontayo a baka adda dakes a naaramid dagita a kakabsat isu a napasamak dayta kadakuada? Mabalin nga adu ti rason a ditay ammo isu a napasamak dayta a panagbalbaliw kadakuada. Laglagipentayo a ti maysa a sangaili iti tolda ni Jehova ket “saan nga agaramid iti pakadaksan ti kaarrubana, ken dina ibabain dagiti gagayyemna.”

PADAYAWAN DAGITI AGBUTENG KEN JEHOVA

14. Ilawlawag no siasino dagiti “maag” a masapul a guraen dagiti sangaili ni Jehova.

¹⁴ Kuna ti Salmo 15:4 a ti gayyem ni Jehova kagurana “ti asinoman a maag.” Kasanotayo nga ammo a ti maysa ket maag? Kas imperpekto a tattao, saantayo a kualipikado a mangammo no maag ti maysa a tao. Apay? Natural laeng ngamin a magustuantayo dagiti nalakatayo a pakibagayan ken masurontayo kadagiti ditay kayat ti ugalida. No kasta, dagidiay laeng “maag” nga ibagbaga ni Jehova ti masapul a guraentayo. (1 Cor. 5:11) Karaman kadakuada dagiti di agbabbabawi nga agar-aramid iti dakes, saan a mangraraem iti pammati ken patpatientayo, wenno mangpakpakapuy iti relasiontayo ken Jehova.—Prov. 13:20.

15. Ania ti maysa a pamay-an a mapadayawantayo “dagiti agbuteng ken Jehova”?

¹⁵ Ibaga pay ti Salmo 15:4 a padayawantayo “dagiti agbuteng ken Jehova.” Mangpanunottayo ngarud kadagiti pamay-an a maipakitatayo ti kinaimbag ken panagraem kadagiti gagayyem ni Jehova. (Roma 12:10) Kasano? Ti maysa a pamay-an ket naibatay iti Salmo 15:4: Ti maysa a sangaili iti tolda ni Jehova “dina ibabawi ti karina, uray saan a nasayaat ti epekto dayta kenkuana.” No saantayo a tungpalen dagiti karitayo, sigurado a masaktantayo ti sabsabali. (Mat. 5:37) Kas pagarigan, ekspektaren ni Jehova kadagiti sangailina a tungpalenda ti karida idi nagkasarda. Maragsakan met no tungpalen dagiti nagannak dagiti karida kadagiti annakda. Gapu ta ay-ayatentayo ti Dios ken ti dadduma, aramidentayo ti amin a kabaelantayo a mangtungpal kadagiti karitayo.

16. Ania pay ti maysa a pamay-an a mapadayawantayo dagiti gagayyem ni Jehova?

¹⁶ Ti maysa pay a pamay-an a mapadayawantayo dagiti gagayyem ti Dios ket ti panagbalin a managpadagus ken naparabur. (Roma 12:13) No agrelrelakstayo a kadua dagiti kapammatiantayo, suminged ti pannakigayyemtayo kadakuada ken ti relasiontayo ken Jehova. Kasta met a no managpadagustayo, tultuladentayo ni Jehova.

DITAY PULOS AYATEN TI KUARTA

17. Apay a dinakamat ti Salmo 15 ti maipapan iti kuarta?

¹⁷ Mabasatayo a ti sangaili ni Jehova “dina ipautang ti kuartana nga addaan iti interes, ken saan nga umawat iti pasuksok maibusor iti tao nga awan basolna.” (Sal. 15:5) Apay a nadakamat ti kuarta iti daytoy nga ababa a salmo? Ngamin, no sobra ti panangipategtayo iti kuarta, masaktantayo ti dadduma ken madadael ti pannakigayyemtayo iti Dios. (1 Tim. 6:10) Idi tiempo ti Biblia, adda dagiti nanggundaway kadagiti pobre a kapammatianda ta pinautanganda ida nga addaan iti interes. Nangawat met iti pasuksok ti dadduma nga  ukom ken saan a patas ti panangukomda kadagiti inosente a biktima. Kagura ni Jehova dagita nga aramid.—Ezek. 22:12.

18. Ania dagiti isaludsodtayo iti bagitayo tapno maammuantayo ti panangmatmattayo maipapan iti kuarta? (Hebreo 13:5)

¹⁸ Nasayaat no isaludsodtayo dagitoy iti bagitayo tapno maammuantayo ti panangmatmattayo maipapan iti kuarta: ‘Sangkapanunotko kadi ti kuarta ken dagiti kayatko a gatangen? No umutangak, ibaybayagko kadi a bayadan ta pampanunotek a saan a kasapulan dayta ti immutangak? Nangatngato kadi ti panagkitak iti bagik gapu ta adda kuartak? Adda nga agpayso kuartak, ngem adda kadi im-imutko? Ibilangko kadi dagiti kapammatiak a materialistiko gapu laeng ta adu ti kuartada? Dagiti laeng kadi babaknang ti pakigaygayyemak ken ipuerpuerak dagiti marigrigat?’ Napateg nga isaludsodtayo dagita iti bagitayo ta naaddaantayo iti naisangsangayan a pribilehio nga agbalin a sangaili ni Jehova. Mataginayontayo dayta a pribilehio no saantayo nga ayaten ti kuarta. Iti kasta, dinatayto pulos panawan ni Jehova!—Basaen ti Hebreo 13:5.

AY-AYATEN NI JEHOVA DAGITI GAGAYYEMNA

19. Apay a kayat ni Jehova nga aramidentayo ti amin nga ibagbaga ti Salmo 15?

¹⁹ Nagpatingga ti Salmo 15 iti daytoy a kari: “Dinto pulos maan-ano ti asinoman a mangaramid kadagita.” (Sal. 15:5) Imbaga ti salmista no apay a kayat ni Jehova nga aramidentayo ti amin a nadakamat iti dayta a salmo. Kayat ni Jehova nga agbalintayo a naragsak. Isu nga isursurona dagiti aramidentayo tapno bendisionan ken salaknibannatayo.—Isa. 48:17.

20. Ania ti manamnama dagiti sangaili ni Jehova?

²⁰ Naraniag a masakbayan ti manamnama dagiti sangaili ni Jehova. Dagiti dinutokan ti espiritu ket agnaedto idiay langit a nangisaganaan ni Jesus kadakuada iti ‘adu a pagyanan.’ (Juan 14:2) Padpadaanan met dagidiay addaan iti naindagaan a namnama ti kaitungpalan ti kari iti Apocalipsis 21:3. Sigurado nga ibilangtayo amin a naisangsangayan a pribilehio ti panangawis kadatayo ni Jehova nga agbalin a gagayyemna, ti panagbalintayo nga agnanayon a sangailina iti toldana!