1. Wa Saam chapta 15 tel wi we kyan elp wi?

 IINA di lesn bifuo da wan ya, wi lorn se wen wi gi wi laif tu Jeuova an wi du wa wi fi du fi kip kluos tu im, it komiin laik se wi iina im ous. Bot ef wi waahn fi ton Jeuova fren, wa wi fi du? Saam 15 tel wi som gud sitn we wi kyan du so dat wi kyan kip kluos tu Jeuova.​—Riid Saam 15:1-5.

2. Wen Dievid taak bout Gad ous, a wa im mait-a did a tingk bout?

² Saam chapta 15 staat wid dem wod ya: “Jeuova Gad, wa kain-a sumadi yu waahn iina fi yu ous? An uu kyan get fi liv pan fi yu uoli mountn?” (Sa. 15:1) Wen Dievid se Gad “ous” ya-so, im mait-a did a tingk bout Gad ous we did de a Gibiyan fi wan likl taim. Bot wen im did a taak bout Gad “uoli mountn,” im mait-a did a taak bout Zaiyan we did de iina Jeruusilem. Zaiyan did de bout 6 mail fram Gibiyan an a de-so Dievid did mek op wan tent fi put di baks we tan fi di pramis we Gad mek. Im did put it de-so til dem kuda bil op wan ous fi put it iina.​—2 Sam. 6:17.

3. Wa mek wi fi waahn andastan wa Saam 15 a se? (Luk pan di picha tu.)

³ Wi nuo se muos a di Izrelait dem neva get fi wok a Gad ous, moch les fi go iina di paat we dem kip di baks we tan fi di pramis we Gad mek. Bot ef dem did wok aad fi ton Jeuova fren an kip kluos tu im, den it wuda komiin laik se dem de iina im ous. An dat a sitn we aal a wi waahn fi du. Iina Saam 15, wi si som a di wiez dem we wi fi av so dat wi kyan kip kluos tu Jeuova.

 CHRAI AAD FI DU WA JEUOVA SE WI FI DU, AN WOK AAD FI DU WA RAIT

4. A ou wi nuo se a no jos baptaiz Jeuova waahn wi fi baptaiz? (Aizaiya 48:1)

⁴ Saam 15:2 mek wi nuo se sumadi we a Gad fren ‘eva a chrai aad fi du wa im se dem fi du, an dem eva a wok aad fi du wa rait.’ An kaa it se “eva,” dat miin se dis a sitn we dem fi aalwiez a du. Wi nuo se wi no porfek, bot wen wi eva a chrai aad fi du wa Jeuova waahn wi fi du, dat a-go mek im api wid wi. Wen wi gi wi laif tu Jeuova an baptaiz a staat wi dis a staat fi ton im fren. Bot memba se iina Baibl taim, no jos chuu sumadi a did wan Izrelait dat did miin tu se im iina Jeuova ous. Kaa som a dem did kliem se dem a worship Gad, bot dem neehn a worship im iina di rait an prapa wie. (Riid Aizaiya 48:1.) Ef wan Izrelait did riili waahn fi sorv Jeuova, im wuda afi lorn bout wa Gad waahn im fi du an den dwi’it. A siem so tide, ef wi waahn fi mek Jeuova api wi kyaahn jos se kaa wi baptaiz an a go a miitn an so a it dat. Wi afi “eva a wok aad fi du wa rait.” Bot a ou wi kyan du dat?

5. Ou wi kyan shuo se wi eva a du wa Jeuova waahn wi fi du?

⁵ Ef Jeuova fi luk pan wi an se wi a sumadi we ‘eva a chrai aad fi du wa im se wi fi du an we eva a wok aad fi du wa rait,’ wi kyaahn jos a go a di miitn dem an so, wi afi du muo dan dat. (1 Sam. 15:22) Wi fi aalwiez a du di sitn dem we Jeuova waahn wi fi du, aal ef nobadi els no di de wid wi. (Pr. 3:6; Iik. 12:13, 14) An wi fi du wa Jeuova waahn wi fi du aal wen it luk laik a wan likl ting. Wen wi du dat, it shuo se wi riili lov Jeuova an im a-go lov wi tu.​—Jan 14:23; 1 Jan 5:3.

6. Azkaadn tu Iibruu 6:10-12, aal ef wi du som uol iip a gud sitn fi Jeuova aredi, wa im waahn wi fi a du ya nou?

 ⁶ Aal a di sitn dem we wi du fi Jeuova aredi mek im riili api. Bot wi afi memba se it no mata wa wi du ar umoch wi du fi Jeuova aredi, dat naa elp wi ef wi no gwaan du di sitn dem we im waahn wi fi du rait ya nou. An wi si dis klier klier iina Iibruu 6:10-12. (Riid.) An a no laik se Jeuova a-go figet di gud sitn dem we wi du fi im, bot im waahn wi fi worship im wid aal a wi aat “til [wi] ded.” An ef wi “no gi op,” wi an im a-go bi gud fren fi eva.​—Gya. 6:9.

YU FI EVA A TAAK DI CHUUT IINA YU AAT

7. Wa di Baibl miin wen it se wi fi taak di chuut iina wi aat?

⁷ Di kain-a sumadi we Jeuova tek iina im ous a sumadi we “iivn iina im aat, im eva a taak di chuut.” (Sa. 15:2) Dat no jos miin tu se sumadi no tel lai, bot it miin se im anis iina evriting we im du an wa im se tu. (Iib. 13:18) An dat a wan big ting kaa “Jeuova iet di sumadi we lov fi du wa rang, bot Im a gud gud fren wid di sumadi we a du wa rait.”​—Pr. 3:32.

8. Wa wi no fi du?

⁸ Di wan dem we ‘eva a taak di chuut iina dem aat’ no gwaan laik se dem a du wa Gad se dem fi du wen piipl a si dem, an a aid an du wa rang wen dem de bai demself. (Aiz. 29:13) Dem no tuu-fies. Sumadi we tuu-fies mait-a fiil se som a di sitn dem we Jeuova tel dem fi du no mek no sens. (Jmz. 1:5-8) So som a di sitn dem we Jeuova se wi fi du we im no tingk impuotant, im mait-a no du dem. An ef im tingk se im get we wid dat, im mait-a fiil se it aarait fi du som ada sitn we Jeuova se im no fi du. Bot Jeuova naa go api wid sumadi laka dat. (Iik. 8:11) Wi no waahn fi tan so, wi waahn fi mek shuor se wi anis iina evriting we wi du.

9. Wa wi kyan lorn fram wa did apm di fos taim Jiizas did miit Nataniyel? (Luk pan di picha tu.)

⁹ Wa did apm di fos taim Jiizas did miit Nataniyel mek wi si se a wan big ting fi wi  ‘eva a taak di chuut iina wi aat.’ Filip an Nataniyel a did fren. Wen Filip did kya Nataniyel kom miit Jiizas, Jiizas se dis bout im: “Ku ya! Da man ya a wan Izrelait fi chuu! Da man ya no tel no lai.” (Jan 1:47) A no laik se Jiizas ada falara dem neehn lov fi taak di chuut, bot Nataniyel did jos difrant, im did anis bad. Nataniyel neehn porfek, bot im neehn tuu-fies. An kaaz a dat, Jiizas did lov im an big im op fi it tu. Duohn it wuda nais ef Jiizas kuda se di sed ting bout yu tu?

10. Wa mek wi no fi yuuz wi mout fi tier dong ada piipl? (Jiemz 1:26)

¹⁰ Muos a di sitn dem we Saam 15 taak bout av fi du wid di wie ou wi chriit ada piipl. Saam 15:3 tel wi se sumadi we de iina Jeuova ous “no chat bad bout nobadi, im no du notn bad tu piipl, an im no shiem im fren dem niida.” Jeuova naa go waahn wi iina im ous ef wi yuuz wi mout fi tier dong ada piipl.​—Riid Jiemz 1:26.

11. Wa a-go apm tu sumadi we chat bad bout ada piipl an no sari fi wa dem du an chienj dem wiez?

¹¹ Wan a di sitn dem we Saam 15:3 taak bout a dat wi no fi chat bad bout nobadi. Wen sumadi chat bad bout sumadi, it kyan mek ada piipl staat fi luk pan di sumadi a wie. An ef wan breda ar wan sista du dat an dem no sari fi wa dem du an chienj dem wiez, dem a-go get put outa di kanggrigieshan.​—Jer. 17:10.

12-13. Aalduo wi mait-a no fiil se a dat wi a du, wa an wa kuda apm we kuda mek wi shiem wi fren dem? (Luk pan di picha tu.)

¹² Wan neda ting we Saam 15:3 tel wi a dat di wan dem we de iina Gad ous “no du notn bad tu piipl, an [dem] no shiem [dem] fren dem niida.” Bot a ou wi kuda shiem wi fren dem?

¹³ Wan a di wie ou wi kuda shiem wi breda an sista dem a ef wi taak tingz bout dem we no riili go so. An dat kuda apm ef wi ier se: (1) wan sista tap paiyanier,  (2) wan ozban an waif naa wok a Betel agen, ar (3) wan breda a no wan elda ar wan ministiiriyal sorvant agen. It kyan iizi fi wi staat fi se tingz bout wa mek dem naa du dem ting de agen, an tel ada piipl ou wi fiil tu. Bot dat wudn rait kaa wi no nuo evriting bout wa did apm. Pan tap a dat, sumadi we waahn fi tan iina Jeuova ous “no du notn bad tu piipl, an im no shiem im fren dem niida.”

SHUO SE YU AV NOF RIETINZ FI DI PIIPL DEM WE AV NOF RISPEK FI JEUOVA

14. A ou Jeuova fren dem shuo se dem “na’av notn fi du wid wikid piipl,” an wa mek yu se so?

¹⁴ Saam 15:4 mek wi nuo se Jeuova fren dem “na’av notn fi du wid wikid piipl.” Bot ou wi kyan mek shuor se wi na’av notn fi du wid wikid piipl? Kaa wi no porfek, it no op tu wi fi se ef sumadi wikid ar dem no wikid. Wa mek wi se so? Kaa wi mait-a dis laik som piipl muor kaaz a di wiez dem we dem av, bot wi mait-a kyaahn stan som ada piipl kaaz a ou dem tan. So a onggl di piipl dem we Jeuova se “wikid” wi no fi av notn fi du wid. (1 Kor. 5:11) An dem piipl ya a di wan dem we aalwiez a du wa bad an no fiil no wie bout it, an di wan dem we na’av no rispek fi di sitn dem we wi biliiv iina, ar di wan dem we waahn mash op wa wi an Jeuova av.​—Pr. 13:20.

15. Wa a wan sitn we wi kyan du fi shuo se wi “riet di wan dem we av nof rispek fi Jeuova”?

¹⁵ Saam 15:4 tel wi se wi fi “riet di wan dem we av nof rispek fi Jeuova.” So kaaz a dat wi chrai fi mek shuor se wi av nof rispek an wi kain tu di piipl dem we a Jeuova fren. (Ruo. 12:10) Saam 15:4 tel wi wan a di wie dem ou wi kyan du dat. It tel wi se sumadi we de iina Jeuova ous, “ef im se im a-go du sitn, aal ef tingz ton out bad fi’im, im stil dwi’it.” Wen wi pramis sumadi sitn, an wi no du wa wi pramis, it kyan riili ort dem. (Mat. 5:37) Laik Jeuova waahn di ozban an waif dem fi kip di pramis we dem mek tu dem wan aneda wen dem did a marid. An it mek Jeuova api wen di mada an faada dem du wa dem pramis dem pikni dem se dem a-go du fi dem. An kaa wi lov Jeuova an wi nieba dem, a dat mek wi a-go du we wi pramis dem se wi a-go du.

16. Wa a wan neda ting we wi kyan du fi shuo se wi riet Jeuova fren dem?

¹⁶ Wan neda ting we wi kyan du fi shuo se wi riet Jeuova fren dem, a wen wi kain tu dem an invait dem a wi yaad fi nyam som fuud. (Ruo. 12:13) An wen wi spen taim a enjai wiself wid wi breda an sista dem, dat mek wi get kluosa an kluosa tu dem an Jeuova. An wi fi memba se wen wi tek iin piipl iina wi ous an luk afta dem, a du wi a du laik Jeuova.

GWAAN WOK AAD FI NO LOV MONI

17. Wa mek Saam 15 taak bout moni?

¹⁷ Di sumadi we Jeuova lou fi kom iina im ous a sumadi we “wen im len moni, im no dwi’it so dat im kyan get bak muo moni pan it, an nobadi kyaahn gi’im moni ar notn els fi se sitn bad bout sumadi we no du notn rang.” (Sa. 15:5) Aalduo Saam 15 shaat, it taak bout moni. Wa mek? It taak bout it kaa ef wi lov moni, wi kyan ort ada piipl an mash op wa wi an Jeuova av. (1 Tim. 6:10) Iina Baibl taim, som a di piipl dem wuda tek set pan di puor piipl dem an len dem moni so dat dem kuda get muor moni pan tap a wa dem len dem. An som a di joj dem neehn fier kaaz dem wuda tek moni an ada tingz fram piipl wen dem a  joj di kuot kies dem. Jeuova iet wen piipl du dem sitn de.​—Izii. 22:12.

18. Wa a som kwestiyan we wi kyan aks wiself fi si ou wi riili fiil bout moni? (Iibruu 13:5)

¹⁸ It wuda gud fi wi sidong an tingk bout ou wi riili fiil bout moni. So wi kyan aks wiself dem kwestiyan ya: ‘Mi fain se mi eva a tingk bout moni an di sitn dem we moni kyan bai? Wen mi baro moni fram sumadi, mi uol aan pan dem moni wen mi fi pie dem bak kaa mi fiil se dem no niid it? Wen mi av moni, mi fiil se mi big an impuotant? An wen mi av moni, mi fain it aad fi shier wa mi av wid ada piipl? Ef wan breda ar sista av wol iip a moni, mi joj dem an se dem lov moni? Mi onggl kip fren wid piipl we av moni an no pie di wan dem we puor no main?’ A wan big ting se wi get di chaans fi de iina Jeuova ous. An wen wi no lov moni, dat elp wi fi gwaan bi Jeuova fren an fi tan iina im ous. An ef wi du dat, Jeuova naa go lef wi non taal!​—Riid Iibruu 13:5.

JEUOVA LOV IM FREN DEM

19. Wa mek Jeuova waahn wi fi du aal a di sitn dem we de iina Saam 15?

¹⁹ Di laas paat a Saam 15 se: “Di sumadi we du dem sitn ya, eva a-go tan op chrang.” (Sa. 15:5) So di man we rait da Saam ya a mek wi nuo se di riizn wa mek Jeuova a aks wi fi du aal a dem sitn ya a kaa im waahn wi fi api. An im a-go bles wi an protek wi wen wi du dem sitn ya.​—Aiz. 48:17.

20. A wa di piipl dem we de iina Jeuova ous a luk faawod fi get?

²⁰ A nof blesn di wan dem we de iina Jeuova ous a luk faawod fi get iina di fyuucha. Jiizas se im saat out “nof ruum iina [im] Faada ous” fi di wan dem we get pik fi go a evn. (Jan 14:2) An fi di wan dem we a-go liv pan di ort, dem a luk faawod fi get wa Revilieshan 21:3 se dem a-go get. Wi wel api se Jeuova waahn wi fi bi im fren so dat wi kyan tan iina im ous fi eva!