1. Shakawn 15:1-5 gaw anhte hpe gara hku karum ya lu ai kun?

 YEHOWA kaw apnawng hkalup hkam da ai ni, Karai hte hku hkau lam nga ai ni gaw, ga shadawn sum hta manam byin lu na ngu, shawng na sumhpa hta bawngban wa ai. Karai a manam matut byin mayu yang hpa galaw ra na kun? Dai lam hpe Shakawn 15 hta law law tsun da ai. (Shakawn 15:1-5 hpe hti u.) Shakawn 15 hta lawm ai tatut re ai hpaji jaw ga ni gaw, Karai hte hku hkau lam nga na matu karum ya lu ai.

2. Yehowa a sum a lam tsun ai shaloi, shakawn kungdawn sara Dawi hpa hpe myit hkrup chye ai kun?

² Shakawn 15 hpe “Yehowa e, na a Sum hta kadai shanu lu na rai nga a ta? Na a chyoi pra ai bum hta kadai nga lu na rai nga a ta?” ngu ai ga san hte hpang da ai. (Shk 15:1) “Sum” ngu nna shakawn kungdawn sara Dawi tsun ai shaloi, Gibeon mare hta aten ladaw mi daram nga wa ai sum a lam myit hkrup ai rai na re. “Chyoi pra ai bum” ngu nna mung tsun ai. Gibeon mare a ding da maga, loi tsan tsan kaw nga ai Yerusalem mare na Ziun bum hpe tsun ai re. Dawi gaw, dai bum kaw sum gap da ai. Nawku htingnu n nga shi ai aten du hkra, ga shaka sumpu hpe dai sum hta tawn da ai. Dai majaw, dai sum a lam myit hkrup ai mung rai chye ai.—2 Sa 6:17.

3. Shakawn 15 hpe hpa majaw grau chye na mayu ai kun? (Sumla hpe mung yu u.)

³ Israela law malawng gaw, sum kaw magam gun na ahkang n lu ai. Ga shaka sumpu nga ai sum de, masha loi mi sha shang ga ai. Raitim, Yehowa a ga shadawn sum hta gaw, sadi dung ai mayam yawng manam hku nna shingbyi lu ai. Yehowa a jinghku byin yang she, matut byin nga yang she  shingbyi lu na re. Anhte yawng Yehowa a jinghku matut byin mayu ai. Gara hku byin lu na kun? Shakawn 15 hta tsun dan da ai.

TARA HKAN U, DING HPRING AI AMU GALAW U

4. Hkalup hkam na matu sha Yehowa n hpyi shawn ai lam gara hku chye lu ai kun? (Esaia 48:1)

⁴ Karai a jinghku gaw, “Tara hkan ai myit hte hkawm nna, ding hpring ai amu galaw” ai wa re ngu Shakawn 15:2 hta tsun da ai. Tara hpe galoi mung hkan ra na, ding hpring ai amu hpe galoi mung galaw ra na. “Tara hkan ai myit hte” nga lu na kun? Nga lu ai. N hkum tsup tim, Karai Kasang a ga hpe dang lu ai made madat nga dingsa, “tara hkan ai myit hte” nga ai wa ngu Karai Kasang mu mada ai. Apnawng hkalup hkam ai gaw, Karai a jinghku byin na matu lahkam nnan hkam dat ai sha naw re. Ga shadawn, Chyum Laika prat hta, masha langai gaw Israela amyu byin ai hte sha, Karai a manam shi hkrai shi n byin mat ai. Nkau gaw, “Karai Kasang a mying gang ti mung, teng man ai hte ding hpring ai hku n hkan ai.” (Esaia 48:1 hpe hti u.) Israela ni gaw, Karai a manam byin mayu yang, Karai hpyi shawn da ai lam ni hpe sharin la nna, hkan sa ra ai. Dai ni aten hta mung, anhte hkalup hkam ai hte sha, Yehowa Sakse byin ai hte sha, Karai a jinghku n byin mat ai. “Ding hpring ai amu galaw” nga ra ai. Gara hku galaw lu na kun?

5. Lam shagu hta Yehowa hpe madat mara ai kaw hpa ni lawm ai kun?

⁵ Yehowa a man hta, “tara hkan ai,” “ding hpring ai amu galaw ai” ngu ai gaw, zuphpawng ayan lung ai daram sha n ga ai. (1 Sa 15:22) Langai hkrai nga ai aten hta pyi, lam shagu hta Yehowa hpe madat mara ra ai. (Gsh 3:6; Hpj 12:13, 14) Nau n ahkyak ai zawn re ai lam ni hpe madat na matu mung grai ahkyak ai. Dai zawn madat ai gaw,  Yehowa hpe teng sha tsawra ai lam madun ai re. Yehowa mung anhte hpe grau tsawra wa na re.—Yhn 14:23; 1 Yh 5:3.

6. Hebre 6:10-12 hku nga yang, lai wa sai aten hta galaw wa ai kaja ai lam ni hta na grau ahkyak ai gaw hpa rai kun?

⁶ Yehowa gaw, lai wa sai aten hta shi hpe galaw ya ai lam shagu a matu, grai chyeju dum ai. Raitim, dai lam ni galaw wa ai hte sha, Yehowa a sum hta manam matut byin nga na n re. Dai hpe Hebre 6:10-12 hta asan sha mu lu ai. (Hti u.) Anhte galaw wa ai kaja ai lam ni hpe Yehowa n malap ai. Raitim, myit masin mahkra hte “prat htum hkra” nawku shangun mayu ai. “Anhte myit n yaw” ai sha shakut na nga yang, Karai a htani htana jinghku byin lu na re.—Gal 6:9.

DINGMAN AI GA TSUN U

7. Myit hta dingman ai ga tsun ai ngu ai gaw hpa rai kun?

⁷ Yehowa a manam byin mayu ai wa gaw, “myit hta ding man ai ga tsun ai.” (Shk 15:2) N masu ai daram sha n re. Tsun ai, galaw ai lam shagu hta dingman nga ra ai. (Heb 13:18) ‘Yehowa gaw myit magaw ai ni hpe matsat nga ai. Teng man ai ni hpe chyawm gaw jinghku hku ai.’—Gsh 3:32.

8. Gara zawn lailen hpe koi ra ai kun?

⁸ “Dingman ai ga tsun ai” wa gaw, masha man hta Karai a tara ni hpe hkan sa nna, shingdu hta gaw n hkan ai baw n galaw ai. (Esa 29:13) Myit n magaw ai. Myit magaw ai wa gaw, Karai a tara ni ayan akyu gaw nga ai kun? ngu ntsen ai myit shang wa chye ai. (Yak 1:5-8) Nau n ahkyak na zawn re ai lam ni hta, Karai a tara ni hpe n hkan sa ai. Dai zawn n hkan sa tim, n kaja ai lam ni hpe kalang ta n hkrum sha ai. Dai majaw, Karai a tara ni hpe tawt lai na matu grau gwi wa ai. Karai Kasang hpe nawku nga ai ngu shi sawn la tim, shi a nawku daw jau ai lam hpe Karai Kasang n hkap la ai. (Hpj 8:11) Anhte yawng, lam shagu hta ding man na matu grai ahkyak ai.

9. Nahtanela hpe shawng nnan mu ai aten hta, Yesu hpa tsun ai kun? Hpa sharin la lu ai kun? (Sumla hpe mung yu u.)

⁹ Dingman ai ga tsun na matu grai ahkyak  ai lam, Nahtanela hpe Yesu shawng nnan mu ai aten hta tsun ai ga kaw na chye lu ai. Hpilip shaga wa ai Nahtanela hpe Yesu kalang mung n mu ga ai. Raitim, “sa yu rit, . . . Sawt ai myit n rawng ai, Israela masha majing hpe yu yu mu” ngu tsun ai. (Yhn 1:47) Yesu a kaga sape ni mung dingman ai. Raitim, Nahtanela chyawm gaw, lak lak lai lai dingman ai. Shi gaw anhte zawn n hkum tsup ai wa re. Raitim, ntsa lam sha dingman ai wa n re. Lam shagu hta dingman ai. Dai majaw, Yesu grai yu kaba mat nna, shakawn ai. Anhte yawng mung dai zawn shakawn hkrum mayu na re.

10. Anhte tsun ai ga hpe hpa majaw sadi ging ai kun? (Yaku 1:26)

¹⁰ Shakawn 15 hta hpyi shawn da ai lam law malawng gaw, kaga ni hpe gara hku kanawn mazum ging ai ngu ai lam re. Yehowa a manam gaw, “shinglet hte baw law ai ga n tsun ai: Shi a jinghku wa hpe n shawp ai hku n galaw ai, Shi a htingbu wa hpe kaya kahpa n jahkrum ai” ngu Shakawn 15:3 hta tsun da ai. Kaga ni hpe jahpyak tsun ai shaloi, shanhte hkra machyi chye ai. Yehowa a sum hta manam hku nna anhte matut nga lu na n re.—Yaku 1:26 hpe hti u.

11. Baw law ai ga tsun ai ngu ai gaw hpa rai kun? Myit malai n lu yang hpa byin mat chye ai kun?

¹¹ Shakawn kungdawn sara gaw, baw law ai ga hte seng nna laksan tsun da ai. Baw law ai ga ngu ai gaw hpa rai kun? Masha langai a mying hten mat hkra, n teng n man ai hku tsun ai re. Baw law ai ga tsun ai wa gaw, myit malai n lu yang, nawku hpung hta matut nga lu na n re.—Yer 17:10.

12-13. Kaga ni hpe kaya kahpa hkrum hkra tsun hkrup chye ai masa nkau gaw hpa ni kun? (Sumla hpe mung yu u.)

¹² Yehowa a manam gaw, “Shi a jinghku wa hpe n shawp ai hku n galaw ai: Shi a  htingbu wa hpe kaya kahpa n jahkrum ai” ngu Shakawn 15:3 hta matut tsun da ai. Gara hku nna kaya kahpa jahkrum chye ai kun?

¹³ N yaw shada ai sha, marai langai ngai hpe kaya kahpa hkrum hkra tsun hkrup chye ai. Ga shadawn, (1) nauna langai ningshawng hkring mat ai, (2) yanla langai Behtela hta magam n gun mat ai, (3) hpunau langai myitsu salang (sh) magam tau n rai mat ai. Shanhte mara langai ngai galaw wa ai majaw rai na re ngu, hkan tsun ai gaw jaw na kun? Lit galai shai mat ai lam hte seng nna anhte n chye ai lam ni grai law hkra nga chye ai. Yehowa a manam gaw, “Shi a jinghku wa hpe n shawp ai hku n galaw ai, Shi a htingbu wa hpe kaya kahpa n jahkrum ai.”

YEHOWA HPE HKRIT KAMYIN AI NI HPE HKUNGGA U

14. Yehowa a manam ni gaw, “matsat shabat re ai wa” hpe gara hku koi yen ai kun?

¹⁴ Yehowa a jinghku gaw, “matsat shabat re ai wa hpe koi yen ai.” (Shakawn 15:4, NWT) Gara hku koi yen lu na kun? Anhte gaw n hkum tsup ai majaw, kadai gaw matsat shabat masha re ai hpe ginhka lu ai atsam n nga ai. Masha langai a akyang lailen hpe yu nna hku hkau chye, myit daw chye ai. Dai majaw, matsat shabat re ai wa ngu Yehowa masat da ai ni hpe sha koi ra ai. (1 Ko 5:11) Dai ni hta, mara galaw nna myit malai n lu ai ni, anhte a makam masham hpe n hkungga ai ni, Karai hte hku hkau lam hkra machyi hkra galaw ai ni lawm ai.—Gsh 13:20.

15. “Yehowa hpe hkrit kamyin ai ni” hpe hkungga ai lam gara hku madun mai ai kun?

¹⁵ “Yehowa hpe hkrit kamyin ai ni” hpe hkungga na matu, Shakawn 15:4 hta hpyi shawn da ai. Dai majaw, Karai a jinghku ni hpe tsawra matsan dum na matu, hkungga na matu anhte shakut ai. (Rom 12:10) Gara hku nna kun? Shakawn 15:4 hta tsun da ai hte maren, lam langai gaw, “tinang a akyu hten ti mung, shi a dagam ai ga n lai ai” lam re. Dagam ai hte maren n galaw yang, kaga ni a akyu hten chye ai. (Mat 5:37) Ga shadawn, Yehowa gaw yanla ni hpe hkungran ga shaka grin shangun mayu ai. Ma ni hpe kanu kawa ni ga sadi jaw da yang, grin hkra galaw shangun mayu ai. Yehowa hte kaga ni hpe tsawra ai majaw, ga sadi grin na matu anhte yawng dang lu ai made shakut ai.

16. Yehowa a jinghku ni hpe hkungga ai lam madun mai ai kaga lam langai gaw hpa rai kun?

¹⁶ Karai a jinghku ni hpe hkungga ai lam madun mai ai kaga lam langai gaw, gam jaw gam ya nna, manam daw ai lam re. (Rom 12:13) Zuphpawng hta, hkaw tsun bungli hta sha n-ga, hpunau nauna ni hpe aten jaw kanawn mazum ai shaloi, shanhte hte mung, Yehowa hte mung grau hku hkau wa ai. Manam daw ai gaw, Yehowa hpe kasi la ai re.

GUMHPRAW HKUM MAK

17. Shakawn 15 hta gumhpraw a lam hpa majaw tsun ai kun?

¹⁷ Yehowa a manam gaw, “tinang a gumhpraw hpe ladu lai ai amyat hte n hkoi, Mara n kap ai wa a jaw e sake manawn n la ai.” (Shk 15:5) Ndai daram kadun ai shakawn kungdawn laika hta gumhpraw a lam hpa majaw tsun da ai kun? Gumhpraw mak wa yang, masha hte mung, Karai hte mung, hku hkau lam hten mat chye ai majaw re. (1 Tm 6:10) Chyum Laika prat hta, masha nkau gaw, matsan ai hpunau wa hpe ladu lai amyat sha nna hkoi ya ai. Tara agyi  nkau mung, mayun kumhpa sha nna, mara n kap ai wa hpe n tara ai hku jeyang ai. Dai zawn lailen ni hpe Yehowa matsat ai.—Eze 22:12.

18. Gumhpraw hte seng nna tinang a myit jasat hpe gara hku jep yu mai ai kun? (Hebre 13:5)

¹⁸ Gumhpraw hte seng nna tinang a myit jasat hpe jep yu ra ai. Ndai hku san mai ai: Gumhpraw a lam sha myit taw ai kun? Gumhpraw nga yang gaw hpa ni hpe lu mari na ngu nna sha myit taw ai kun? Gumhpraw jan ai majaw hkoi ya ai she re ngu myit nna, alawan bai n wa ai sha nga taw ai kun? Gumhpraw nga yang she kaga ni hta na grau na ngu sawn la ai kun? Maji ai kun? Lusu ai hpunau nauna ni hpe mu ai shaloi, Karai Kasang hta na gumhpraw hpe grau tsawra nga ai ni re ngu dawdan ai kun? Lusu ai ni hpe grau hkau nna, matsan ai ni hpe koi ai kun? Anhte yawng hpe manam hku nna, Yehowa saw shaga da ai majaw, dai ga san ni hpe san jep ging ai. Gumhpraw n mak yang she, Karai a jinghku matut byin lu na. Jinghku ni hpe Yehowa galoi kau da na n re.—Hebre 13:5 hpe hti u.

YEHOWA GAW SHI A JINGHKU NI HPE TSAWRA

19. Shakawn 15 hta lawm ai lam ni hpe Yehowa hpa majaw hkan sa shangun mayu ai kun?

¹⁹ Dai wa gaw, “galoi mung shamu shamawt hkrum na n rai” ngu nna Shakawn 15 hpe hpungdim dat da ai. (Shk 15:5) Shakawn 15 hta lawm ai lam yawng hpe Yehowa hpa majaw galaw shangun mayu ai lam, shakawn kungdawn sara tsun dan ai. Yehowa gaw anhte hpe ngwi pyaw shangun mayu ai. Dai majaw, shi hpyi shawn ai lam yawng hpe anhte hkan sa yang, Karai a shaman chyeju, makawp maga lam lu na.—Esa 48:17.

20. Yehowa a manam ni gaw hpa hpe myit mada mai ai kun?

²⁰ Yehowa a manam ni gaw, grai kaja ai htawm hpang prat lu la na. Sadi dung ai namman chya hkam ai ni a matu, sumsing lamu hta Yesu lajang da ya ai “nga shara law law nga ai.” (Yhn 14:2) Mungkan ga myit mada lam nga ai ni gaw, Shingran 21:3 hta lawm ai ga sadi ni hpring tsup ai hpe mu lu na. Yehowa a sum hta, htani htana manam byin na matu saw shaga hkrum ai gaw laksan ahkaw ahkang re.