TƆM ÑƲƲ ŊGƲ ÐƖKPƐLƖKƖƔ YƆ 24
HENDU 24 Ɩkɔɔ Yehowa pʋʋ yɔɔ
Wɛɛ Yehowa kizinziku tɛɛ tam
«Oo Yehowa, apɩzɩɣ nɛ ɛkɔɔ ɛgɔndʋ ñe-kizinziku tɛɛ?»—KEƔ. 15:1.
MBƲ PƖ-YƆƆ PƖWƐƐ SE ŊKA ÑA-LƖMAƔZA YƆ
Ðɩkaɣ naʋ mbʋ pɩpɔzʋʋ se ɖɩla nɛ ɖiwolo pɩ-yɔɔ nɛ ɖɩkɛ Yehowa taabalaa yɔ, nɛ ɖɩkaɣ naʋ ɖɔɖɔ wɛtʋ ndʋ Yehowa sɔɔlaa se ɖɩwɛɛnɩ ɛ-taabalaa yɔɔ yɔ.
1. Ɛzɩma Keɣa 15:1-5 taa tɔm pɩzɩɣ nɛ tɩsɩnɩ-ɖʋ?
TƆM ñʋʋ ŋgʋ kɩɖɛwa yɔ kɩ-taa, ɖɩnawa se mba pakpaɣ pa-tɩ nɛ paha Yehowa yɔ, ye peyeba nɛ taabalɩyɛ kɩbanɖɛ wɛɛ pa nɛ ɩ pɛ-hɛkʋ taa yɔ, ɛpɩzɩɣ nɛ ɛmʋ-wɛ ɛgɔndʋ e-kizinziku tɛɛ. Ɛlɛ ɛbɛ pɩpɔzʋʋ se ɖɩla nɛ taabalɩyɛ kɩbanɖɛ wɛɛ ɖa nɛ ɩ ɖɛ-hɛkʋ taa? Keɣa 15 yɔɔdɩ pɩ-tɔm. (Kalɩ Keɣa 15:1-5.) Keɣa ŋga katasɩɣ-ɖʋ lɔŋ kɩbaŋ weyi ɩsɩɣnɩ-ɖʋ se ɖɩñɔtɩnɩ Yehowa nɛ pɩkɩlɩ yɔ.
2. Pʋtɔma, ɛbɛ yɔɔ Keɣa maɖʋ Daviid maɣzaɣ alɩwaatʋ ndʋ ɛyɔɔdɩ Yehowa kizinziku tɔm yɔ?
2 Keɣa 15 paɣzɩnɩ tɔm pɔzʋʋ pʋnɛ: «Oo Yehowa, apɩzɩɣ nɛ ɛkɔɔ ɛgɔndʋ ñe-kizinziku tɛɛ? Apɩzɩɣ nɛ ɛcaɣ ña-pʋʋ kiɖeɖeu taa?» (Keɣ. 15:1) Keɣa maɖʋ Daviid yɔɔdɩ Yehowa «kizinziku» tɔm; pʋtɔma yɔ, ɛmaɣzaɣ Ɛsɔ sɛtʋ kɩɖanɖʋʋ ŋgʋ kɩɩwɛ Gabawɔɔ alɩwaatʋ natʋyʋ yɔ kɩ-yɔɔ. Daviid yɔɔdɩ ɖɔɖɔ «pʋʋ kiɖeɖeu» tɔm; pʋtɔma yɔ, ɛmaɣzaɣ Siyɔŋ pʋʋ ŋgʋ kɩɩwɛ Yeruzalɛm yɔ kɩ-yɔɔ. Daviid kaasiɣ kizinziku nakʋyʋ peeɖe se pasɩɩ ɛgbɛyɛ ɖʋʋ aɖakaɣ kɩ-tɛɛ pɩkɔɔ nɛ pɩsɩɩnɩ alɩwaatʋ ndʋ pama templo yɔ. Lone nɖɩ ɖɩɩwɛ Gabawɔɔ hadɛ kiŋ nɛ ɖiiposini Gabawɔɔ nɛ kilomɛtawaa sakɩyɛ.—2 Sam. 6:17.
3. Ɛbɛ yɔɔ ɖɩsɔɔlaa se ɖɩnɩɩ Keɣa 15 taa? (Cɔnɩ ɖɔɖɔ kɩlɛmʋʋ.)
3 Pɩkɛ toovenim se pataaha waɖɛ Izrayɛɛlɩ mba hɔɔlʋʋ sɔsɔʋ se pala tʋmɩyɛ Ɛsɔ sɛtʋ kɩɖanɖʋʋ tɛɛ, nɛ pa-taa nabɛyɛ pazɩ yem pɩzaɣna se pasʋʋ Ɛsɔ sɛtʋ kɩɖanɖʋʋ tɛɛ ɖenɖe ɛgbɛyɛ ɖʋʋ aɖakaɣ kaawɛɛ yɔ. Ɛlɛ Yehowa sɛyaa siɣsiɣ tɩnaa tɩŋa pɩzaɣ se pɛkɛ agɔma e-kizinziku tɛɛ ye papɩsɩ ɛ-taabalaa nɛ pa nɛ ɩ pa-taabalɩyɛ wɛɛ tam yɔ. Nɛ mbʋ ɖa-tɩŋa ɖɩsɔɔlaa. Keɣa 15 yɔɔdʋʋ wɛtʋ kɩbandʋ ndʋ pɩpɔzʋʋ se ɖɩwɛɛna nɛ mbʋ pɩpɔzʋʋ se ɖɩla nɛ ɖɩkɛ Yehowa taabalaa tam yɔ pɩ-tɔm.
Izrayɛɛlɩ ñɩma mba paawɛ Daviid alɩwaatʋ taa yɔ, papɩzaɣ se pamaɣzɩ nɛ panɩɩ mbʋ ɛgɔm kɛʋ Yehowa kizinziku tɛɛ kɛnaa yɔ pʋ-tɔbʋʋ (Cɔnɩ tayʋʋ 3)
KƖWƐƐKƖTƲ NATƲYƲ ƐTAAWƐƐ ÑƆ-ÐƆNƐ TAA, LA MBƲ PƖTƲƲZAA YƆ
4. Ɛzɩma ɖɩlaba nɛ ɖɩna se pɩsa nɛ ɖɔ-tɔm kɛdɩnɩ Ɛsɔ lɛ, lɩm mɩyɩsʋʋ ɖeke tɩmaɣ? (Izaayii 48:1)
4 Keɣa 15:2 yɔɔdɩ Ɛsɔ taabalʋ tɔm se ɛkɛ «ɛyʋ weyi kɩwɛɛkɩtʋ natʋyʋ fɛyɩ ɛ-ɖɔnɛ taa yɔ, weyi ɛlakɩ mbʋ pɩtʋʋzaa» yɔ. Tɔm pee wena palabɩnɩ tʋmɩyɛ mayaɣ kanɛ ka-taa yɔ, awɩlɩɣ se pɩkɛ mbʋ pɩpɔzʋʋ se ɖiwolo pɩ-yɔɔ nɛ ɖɩlakɩ tam yɔ. Ɛlɛ ɛzɩ toovenim taa lɛ, ɖɩpɩzɩɣ nɛ ɖɩɖɔ ɖɔnɛ nɖɩ ɖɩ-taa «kɩwɛɛkɩtʋ natʋyʋ fɛyɩ» yɔ? Ɛɛɛ. Paa ɖɩtɩtalɩ pilim yɔ, ye ɖɩlakɩ ɖo-ɖoŋ ɖeɖe se ɖɩña Yehowa yɔ, ɛkaɣ-ɖʋ kpaɣʋ ɛzɩ mba «kɩwɛɛkɩtʋ natʋyʋ fɛyɩ [pɔ-ɖɔnɛ] taa yɔ.» Alɩwaatʋ ndʋ ɖɩhaɣ ɖa-tɩ Ɛsɔ nɛ pamɩyɩsɩ-ɖʋ lɩm yɔ, ɖa nɛ ɩ ɖɩpaɣzɩɣ nʋmɔʋ ɖɔm. Tɩlɩ se Bibl alɩwaatʋ taa, paa ɛyʋ ɛkɛ Izrayɛɛlɩ tʋ yɔ, pɩtɩwɩlɩ se paa pɩɩlabɩ ɛzɩma yɔ ɛpɩsɩ Yehowa tɛ ɛgɔm. Nabɛyɛ yaɣaɣ-ɩ, ɛlɛ pataalakɩ «mbʋ nɛ toovenim nɛ siɣsiɣ wɛtʋ.» (Kalɩ Izaayii 48:1.) Pɩsa nɛ Izrayɛɛlɩ piya wɩlɩ se pɔsɔɔlɩ siŋŋ se pɛkɛ agɔma Yehowa kizinziku tɛɛ lɛ, pɩɩwɛɛ se pɛkpɛlɩkɩ nɛ patɩlɩ ɛ-paɣtʋ nɛ pɔɖɔ tɩ-yɔɔ. Mbʋ ɖɔɖɔ sɔnɔ, ye pamɩyɩsɩ-ɖʋ lɩm nɛ ɖɩpɩsɩ Yehowa Aseɣɖe Tʋ yɔ, pi-ɖeke pɩtɩmaɣ se pɩsa nɛ ɖɔ-tɔm kɛdɩnɩ Ɛsɔ. Pɩpɔzʋʋ se ɖɩwɛɛ nɛ «[ɖɩlakɩ] mbʋ pɩtʋʋzaa» yɔ. Ɛzɩma ɖɩpɩzɩɣ nɛ ɖɩla mbʋ?
5. Ye pɔtɔm se ɖɩña Yehowa pɩtɩŋa pɩ-taa yɔ, pʋ-tɔbʋʋ lɛ suwe?
5 Yehowa ɛsɩndaa lɛ, pɩtɩkɛ kediɣzisi wobu ɖoŋ ɖoŋ ɖeke wɩlɩɣna se «kɩwɛɛkɩtʋ natʋyʋ fɛyɩ [ɖɔ-ɖɔnɛ] taa.» Nɛ pɩtɩkɛ mbʋ wɩlɩɣna ɖɔɖɔ se «[ɖɩlakɩ] mbʋ pɩtʋʋzaa» yɔ. (1 Sam. 15:22) Pɩpɔzʋʋ se ɖɩñaɣ pana nɛ ɖɩña Ɛsɔ ɖe-wezuu caɣʋ hɔɔlɩŋ kpeekpe taa, halɩ pɩkpɛndɩnɩ alɩwaatʋ ndʋ ɖɩwɛ ɖe-ɖeke yɔ. (Adu. 3:6; Ekl. 12:13, 14) Pɩcɛyaa se ɖɩñaɣ pana nɛ ɖɩña Yehowa pɩkpɛndɩnɩ wɛtʋ ndʋ ɖɩmaɣzɩɣ se tɩ-tɔm tɩkɩlɩ cɛyʋʋ yɔ tɩ-taa. Ye ɖɩlakɩ mbʋ yɔ, pɩwɩlɩɣ se ɖɩsɔɔlɩ-ɩ siŋŋ; piyeki nɛ ɛsɔɔlɩ-ɖʋ nɛ pɩkɩlɩ.—Yoh. 14:23; 1 Yoh. 5:3.
6. Ɛzɩ Ebree mba 6:10-12 yɔɔdʋʋ yɔ, ɛbɛ tɔm cɛyaa nɛ pɩkɩlɩ lakasɩ kɩbanzɩ nzɩ payɩ ɖɩlaba nɛ pɩɖɛɛ yɔ?
6 Yehowa taa wɛ leleŋ siŋŋ nɛ mbʋ ɖɩtɛm labʋ nɛ pɩɖɛɛ yɔ. Ɛlɛ lakasɩ kɩbanzɩ nzɩ ɖɩtɛm labʋ nɛ pɩɖɛɛ yɔ sɩɩwɩlɩɣ se paa pɩɩlabɩ ɛzɩma yɔ, ɖɩkaɣ wobu pɩ-yɔɔ nɛ ɖɩkɛ agɔma Yehowa kizinziku tɛɛ. Tɔm ndʋ tɩ-taa tʋ kpayɩ kpayɩ Ebree mba 6:10-12 taa. (Kalɩ Ebree mba 6:10-12.) Yehowa tɩsɔɔ tʋma kɩbana wena ɖɩlaba nɛ pɩɖɛɛ yɔ a-yɔɔ. Ɛlɛ ɛsɔɔlaa se ɖiwolo pɩ-yɔɔ nɛ ɖɩsɛɛ-ɩ nɛ ɖa-laŋɩyɛ pilim «nɛ pɩkɔɔ pɩtalɩ tɩnaɣ yɔɔ.» «Ye pɩtɩnɩɩ-ɖʋ yɔ» ɛkaɣ kɛʋ ɖa-taabalʋ tam.—Gal. 6:9.
YƆƆDƖ TOOVENIM ÑA-LAŊƖYƐ TAA
7. Ye pɔtɔm se ‘ɖɩyɔɔdʋʋ toovenim ɖa-laŋɩyɛ taa yɔ,’ pʋ-tɔbʋʋ lɛ suwe?
7 Ɛyʋ weyi ɛsɔɔlaa se ɛ-tɔm ɛkɛdɩnɩ Yehowa nɛ ɛkɛ ɛgɔm e-kizinziku tɛɛ yɔ, pɩpɔzʋʋ se «ɛyɔɔdʋʋ toovenim ɛ-laŋɩyɛ taa.» (Keɣ. 15:2) Tɔm ndʋ, tɩɩwɩlɩɣ se ye ɖɩɩcɛtɩɣ yɔ pɩmaɣaa. Yehowa sɔɔlaa se ɖɩwɛɛ toovenim tɔm ndʋ payɩ ɖɩyɔɔdʋʋ nɛ mbʋ payɩ ɖɩlakɩ yɔ pɩ-taa. (Ebr. 13:18) Pɩ-tɔm cɛyɩ kpem, «mbʋ pʋyɔɔ yɔ Yehowa paɖɩɣ pɩ-tɛɛ nɛ pɩ-yɔɔ tʋ, ɛlɛ ɛɖʋʋ taabalɩyɛ kɩbanɖɛ nɛ ɛyʋ siɣsiɣ tʋ.»—Adu. 3:32.
8. Lakasɩ nzɩ pɩpɔzʋʋ se ɖikizi?
8 Mba «[pɔyɔɔdʋʋ] toovenim pa-laŋɩyɛ taa» yɔ, ɛyaa ɛsɩndaa lɛ, paacɛtɩɣ nɛ palakɩ ɛzɩ pañaŋ Ɛsɔ yɔ; ɛlɛ pamaɣnɩ ɛ-paɣtʋ yɔɔ alɩwaatʋ ndʋ pɛwɛɣ pe-ɖeke yɔ. (Iza. 29:13) Pekiziɣ pɩ-tɛɛ nɛ pɩ-yɔɔ lakasɩ. Pɩ-tɛɛ nɛ pɩ-yɔɔ tʋ pɩzɩɣ nɛ ɛpaɣzɩ maɣzʋʋ se Yehowa paɣtʋ ɛɛwazɩɣ paa ɛzɩmtaa. (Yak. 1:5-8) Ɛpɩzɩɣ nɛ ɛmaanɩ Yehowa paɣtʋ natʋyʋ yɔɔ hɔɔlɩŋ weyi ɛmaɣzɩɣ se ɩ-tɔm tɩcɛyɩ yɔ ɩ-taa. Pʋwayɩ, ɛkɔŋ nɛ ɛna se pɩwɛ ɛzɩ ɛ-kaañamtʋ lakasɩ nzɩ sɩtɩkɔnɩ-ɩ kɩdɛkɛdɩm nabʋyʋ lɛ, ɛpɩzɩɣ nɛ ɛpaɣzɩ labʋ kɩdɛkɛdɩm mbʋ pɩkɩlɩ mbʋ yɔ; ɖɩnɛ ɛlɛ ɛ-Ɛsɔ sɛtʋ pɩsɩɣ pɩ-tɛɛ nɛ pɩ-yɔɔ lakasɩ. (Ekl. 8:11) Ɛlɛ ɖa lɛ, ɖɩsɔɔlaa se ɖɩwɛɛ toovenim pɩtɩŋa pɩ-taa.
9. Mbʋ pɩlaba alɩwaatʋ ndʋ Yesu calɩ katʋʋ Nataanayɛɛlɩ yɔ, ɛbɛ pɩpɩzɩɣ nɛ pɩkpɛlɩkɩ-ɖʋ? (Cɔnɩ ɖɔɖɔ kɩlɛmʋʋ.)
9 Mbʋ pɩlaba alɩwaatʋ ndʋ Yesu calɩ katʋʋ Nataanayɛɛlɩ yɔ, pɩpɩzɩɣ nɛ pɩkpɛlɩkɩ-ɖʋ mbʋ pʋyɔɔ pɩcɛyaa se ɖɩwɛɛ toovenim ɖa-laŋɩyɛ taa yɔ. Alɩwaatʋ ndʋ Filiipu woni ɛ-taabalʋ Nataanayɛɛlɩ Yesu cɔlɔ yɔ, nabʋyʋ laba nɛ pɩwɛɛ piti. Yesu taakatɩ Nataanayɛɛlɩ wiɖiyi nɛ ɛna, paa mbʋ yɔ ɛna-ɩ lɛ ɛyɔɔdɩ se: «Ɩna, Izrayɛɛlɩ pɩɣa siŋŋ ŋga ka-taa cɛtɩm nabʋyʋ fɛyɩ yɔ.» (Yoh. 1:47) Pɩtʋʋ fɛyɩ se Yesu kaanawa se ɛ-tɔmkpɛlɩkɩyaa lalaa wɛ toovenim, ɛlɛ eeɖiɣzinaa se Nataanayɛɛlɩ ñaawɛ toovenim nɛ pɩkɩlɩ. Nataanayɛɛlɩ taatalɩ pilim ɛzɩ ɖa ɖɔɖɔ yɔ, ɛlɛ ɛtaakɛ pɩ-tɛɛ nɛ pɩ-yɔɔ tʋ, ɛɛwɛ toovenim pɩtɩŋa pɩ-taa. Nataanayɛɛlɩ wɛtʋ ndʋ tɩɩkɛdɩnɩ Yesu nɛ ɛsamɩ-ɩ tɩ-yɔɔ. Pɩtʋʋ fɛyɩ se ɖa-tɩŋa payɩ ɖɩsɔɔlaa se Yesu ɛyɔɔdɩ tɔm kʋɖʋmtʋ ndʋ ɖɔ-yɔɔ.
Yesu calɩ katʋʋ Nataanayɛɛlɩ lɛ, ɛyɔɔdaa se «cɛtɩm nabʋyʋ fɛyɩ» ɛ-taa. Ɛzɩ papɩzɩɣ nɛ pɔyɔɔdɩ tɔm kʋɖʋmtʋ ndʋ ɖɔ-yɔɔ? (Cɔnɩ tayʋʋ 9)
10. Ɛbɛ yɔɔ pɩwɛɛ se ɖɩkpa ɖa-tɩ nɛ tɔm ndʋ ɖɩyɔɔdʋʋ yɔ? (Yakubu 1:26)
10 Mbʋ pɩ-tɔm pɔyɔɔdɩ Keɣa 15 taa yɔ, pɩ-taa sakɩyɛ tukuuni wɛtʋ ndʋ pɩwɛɛ se ɖɩwɛɛnɩ ɛyaa lalaa yɔɔ yɔ. Keɣa 15:3 yɔɔdʋʋ se weyi Yehowa mʋ-ɩ ɛgɔndʋ e-kizinziku tɛɛ yɔ, «ɛɛwɛɛkɩɣ nɔɔyʋ hɩɖɛ nɛ ɛ-nzʋlʋmɩyɛ, ɛɛlakɩ ɛyʋ lɛlʋ mbʋ pɩfɛyɩ ɖeu yɔ, nɛ ɛɛyɔɔdʋʋ tɔm kɩdɛkɛdɩtʋ ɛ-taabalaa yɔɔ.» Ye ɖɩwɛɛkɩɣ lalaa hɩla yɔ, pɩpɩzɩɣ nɛ pɩkɔnɩ-wɛ kaɖɛ siŋŋ nɛ piyeki nɛ ɖɩɩtasɩɣ mʋnʋʋ se ɖɩkɛ weyi Yehowa mʋ-ɩ ɛgɔndʋ e-kizinziku tɛɛ yɔ.—Kalɩ Yakubu 1:26.
11. (a) Ɛyʋ lɛlʋ hɩɖɛ wɛɛkʋʋ tɔbʋʋ lɛ suwe? (b) Weyi ɛwɛɛkɩɣ lalaa hɩla yɔ ye etikpiɖi yɔ, ɛbɛ palakɩ-ɩ?
11 Keɣa maɖʋ yɔɔdɩ ɛyʋ lɛlʋ hɩɖɛ wɛɛkʋʋ tɔm. Ɛyʋ lɛlʋ hɩɖɛ wɛɛkʋʋ tɔbʋʋ lɛ suwe? Ðoŋ ɖoŋ lɛ, pɩkɛ cɛtɩm tɔm ndʋ pɔyɔɔdʋʋ nɔɔyʋ yɔɔ se pɛwɛɛkɩnɩ ɛ-hɩɖɛ yɔ. Weyi ɛwɛɛkɩɣ lalaa hɩla yɔ ye etikpiɖi yɔ, palɩzɩɣ-ɩ ɛgbɛyɛ taa.—Yer. 17:10.
12-13. Wɛtʋ ndʋ taa ɖɩpɩzɩɣ nɛ ɖɩyɔɔdɩ tɔm ndʋ tɩtɩmʋna yɔ ɖa-taabalaa yɔɔ nɛ ɖɩɩɖʋʋna? (Cɔnɩ ɖɔɖɔ kɩlɛmʋʋ.)
12 Keɣa 15:3 tɔzʋʋ-ɖʋ ɖɔɖɔ se mba Yehowa mʋ-wɛ ɛgɔndʋ yɔ, paalakɩ lalaa mbʋ pɩfɛyɩ ɖeu yɔ, nɛ paayɔɔdʋʋ tɔm kɩdɛkɛdɩtʋ pa-taabalaa yɔɔ. Tɔm ndʋ, tɩ-tɔbʋʋ lɛ suwe?
13 Ye ɖɩyɛlɩɣnɩ nɔɔyʋ yɔɔ tɔm kɩdɛkɛdɩtʋ yɔ, ɖɩpɩzɩɣ nɛ ɖɩyɔɔdɩ tɔm ndʋ tɩtɩmʋna yɔ ɛ-yɔɔ nɛ ɖɩɩɖʋʋna. Kɩɖaŋ nɩɩyɩ yɔ: (1) koobu halɩñɩnʋ nɔɔyʋ yebi alɩwaatʋ tɩŋa Ɛsɔ sɛtʋ tʋmɩyɛ, (2) koobu abalɩñɩnʋ nɔɔyʋ nɛ ɛ-halʋ peyebi tʋmɩyɛ labʋ Betɛɛlɩ, yaa (3) koobu abalɩñɩnʋ nɔɔyʋ tɩtasɩ kɛʋ ɛgbɛyɛ taa ɛzʋtʋyʋ yaa ɛgbɛyɛ taa tʋmlaɖʋ. Pɩɩwɛɣ ɖeu se ɖiheyiɣ ɛyaa lalaa se pʋtɔma yɔ koobiya mba palabɩ kɩwɛɛkɩm nabʋyʋ, pʋyɔɔ pɛ-wɛtʋ lɛɣzaa. Pɩtɩla lɩmaɣza naayɛ yɔɔ pɛ-wɛtʋ lɛɣzaa nɛ ɖɩɩsɩŋ lɩmaɣza ana. Pɩtasɩ lɛ, weyi Yehowa mʋ-ɩ ɛgɔndʋ e-kizinziku tɛɛ yɔ, «ɛɛlakɩ ɛyʋ lɛlʋ mbʋ pɩfɛyɩ ɖeu yɔ, nɛ ɛɛyɔɔdʋʋ tɔm kɩdɛkɛdɩtʋ ɛ-taabalaa yɔɔ.»
Pɩwɛ kɛlɛʋ se ɖɩyɛlɩnɩ tɔm ndʋ tɩtɩmʋna yɔ lalaa yɔɔ, pɩpɩzɩɣ piyele nɛ ɖɩwɛɛkɩ pa-hɩla (Cɔnɩ tayʋʋ 12-13)
ÐƲ HƖÐƐ MBA PESEƔ YEHOWA SƆƆNDƲ YƆ
14. Ye pɔtɔm se mba Yehowa mʋʋ ɛgɔndʋ yɔ pa nɛ «kɩdɛkɛdɩm laɖaa paacakɩ» yɔ, pʋ-tɔbʋʋ lɛ suwe?
14 Keɣa 15:4 yɔɔdʋʋ se Yehowa taabalʋ «nɛ kɩdɛkɛdɩm laɖʋ paacakɩ.» Ɛbɛ pɩzɩɣ pɩsɩnɩ-ɖʋ nɛ ɖɩna se nɔɔyʋ kɛ kɩdɛkɛdɩm laɖʋ? Ðɩtɩtalɩ pilim, pʋyɔɔ lɛ ɖɩɩpɩzɩɣ nɛ ɖɩtɩlɩ se nɔɔyʋ kɛ kɩdɛkɛdɩm laɖʋ yaa ɛtɩkɛ. Ɛbɛ yɔɔ? Ðɩpɩzɩɣ nɛ ɖɩmaɣzɩ se ɛyaa nabɛyɛ tɔm fɛyɩ kaɖɛ nɛ ɖɩsɔɔlɩ-wɛ, ɛlɛ ɖɩpaɖɩ ɛyaa lalaa mbʋ pʋyɔɔ yɔ paɖʋʋ-ɖʋ ɖɩwɩzɩyɛ. Pʋyɔɔ lɛ, mba Yehowa kpakɩɣ se pɛkɛ kɩdɛkɛdɩm laɖaa yɔ, pe-ɖeke pɩpɔzʋʋ se ɖise. (1 Kɔr. 5:11) Ɛyaa mba Yehowa kpakɩɣ se pɛkɛ kɩdɛkɛdɩm laɖaa yɔ, pa-taa nabɛyɛ lɛ mba palakɩ kɩwɛɛkɩm nɛ paakpiɖiɣ yɔ, mba pɛfɛyɩnɩ ñamtʋ ɖe-tisuu yɔɔ yɔ, yaa mba pañakɩ pana se pɛwɛɛkɩ ɖa nɛ Yehowa ɖa-taabalɩyɛ yɔ.—Adu. 13:20.
15. Nʋmɔʋ ŋgʋ yɔɔ ɖɩpɩzɩɣ nɛ ɖɩtɩŋna nɛ ɖɩɖʋ hɩɖɛ «mba peseɣ Yehowa sɔɔndʋ» yɔ?
15 Pʋwayɩ lɛ, Keɣa 15:4 heyiɣ-ɖʋ se ɖɩɖʋ hɩɖɛ «mba peseɣ Yehowa sɔɔndʋ yɔ.» Pʋyɔɔ ɖɩñɩnɩɣ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla camɩyɛ lakasɩ Yehowa taabalaa nɛ ɖɩñam-wɛ yɔ. (Roma 12:10) Ɛzɩma tɩyɛ? Keɣa 15:4 yɔɔdɩ nʋmɔŋ ɛnɩ ɩ-taa kʋɖʋmʋʋ tɔm se weyi Yehowa mʋ-ɩ ɛgɔndʋ e-kizinziku tɛɛ yɔ, «ye eɖuwaa yɔ, ɛɛpɩsɩɣnɩ wayɩ, halɩ paa pɩɖʋzʋʋ-ɩ yɔ.» Ye ɖɩtɩɖɔ ɖo-ɖuutu yɔɔ yɔ, pɩtʋʋ fɛyɩ se pɩkɔŋnɩ lalaa kaɖɛ. (Mat. 5:37) Kɩɖaʋ nakʋyʋ yɔ: Yehowa sɔɔlaa se mba ɛmʋʋ-wɛ ɛgɔndʋ yɔ, pɔɖɔ pe-nesi ɖɔkʋʋ ɖuutu yɔɔ. Ɛ-taa lakɩ leleŋ ɖɔɖɔ alɩwaatʋ ndʋ lʋlɩyaa ñakɩ pana siŋŋ se pɔɖɔ tamasɩ nzɩ palakɩ pe-piya yɔ sɩ-yɔɔ yɔ. Sɔɔlɩm mbʋ ɖɩwɛnɩ Ɛsɔ nɛ ɛyaa lalaa yɔɔ yɔ, pɩkaɣ-ɖʋ seɣtuu nɛ ɖɩla mbʋ payɩ ɖɩpɩzɩɣ yɔ nɛ ɖɩɖɔ ɖo-ɖuutu yɔɔ.
16. Nʋmɔʋ ŋgʋ yɔɔ ɖɩpɩzɩɣ ɖɩtɩŋna nɛ ɖɩɖʋ Ɛsɔ taabalaa hɩɖɛ?
16 Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩɖʋ Ɛsɔ taabalaa hɩɖɛ yɔ ŋgʋ yɔ: ɖɩmʋʋ-wɛ ɛgɔndʋ nɛ ɖɩlakɩ-wɛ kʋjɔŋ. (Roma 12:13) Pɩtasɩnɩ kediɣzisi lɛ, ye ɖɩkpakɩɣ alɩwaatʋ nɛ ɖa nɛ ɖo-koobiya ɖɩcakɩ yɔ, pɩsɩɣnɩ-ɖʋ se ɖɩcɛyɩsɩ taabalɩyɛ nɖɩ ɖɩwɛ ɖa nɛ wɛ ɖɛ-hɛkʋ taa yɔ nɛ ɖɩtɛ ɖɩcɛyɩsɩ taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ. Pɩtasɩ lɛ, ye ɖɩmʋʋ lalaa ɛgɔndʋ yɔ, ɖɩmaɣzɩɣnɩ Yehowa.
TAAWƐƐ LIIDIYE LAƔZAƔ
17. Ɛbɛ yɔɔ pɔyɔɔdɩ liidiye tɔm Keɣa 15 taa?
17 Bibl yɔɔdʋʋ se weyi Yehowa mʋʋ-ɩ ɛgɔndʋ yɔ, «ɛɛkɩndɩɣ e-liidiye se paahɛyɩ-ɩ nɛ kɛzɛɣa, ɛɛmʋʋ kʋjɔʋ se emuli weyi ɛtɩɖɔɔ wɛɛ yɔ.» (Keɣ. 15:5) Ɛbɛ yɔɔ pɔyɔɔdɩ liidiye tɔm keɣa kanɛ ka-taa? Mbʋ pʋyɔɔ yɔ ye ɖɩfɛyɩnɩ lɩmaɣza wena amʋnaa yɔ liidiye yɔɔ yɔ, pɩpɩzɩɣ nɛ pɩkɔnɩ lalaa kaɖɛ nɛ pɩwɛɛkɩ ɖa nɛ Ɛsɔ ɖa-taabalɩyɛ. (1 Tim. 6:10) Bibl alɩwaatʋ taa, nabɛyɛ mulaɣ po-koobiya mba pɛkɛ kʋñɔndɩnaa yɔ. Ɛzɩma tɩyɛ? Pakɩndaɣ-wɛ liidiye nɛ pɔpɔzʋʋ-wɛ se pɛhɛyɩnɩ kɛzɛɣa. Pɩtasɩ lɛ, tɔm hʋyaa tisaɣ nɛ pataɣ pɔ-nɔsɩ num nɛ pakʋʋ mba patɩɖɔɔ wɛɛ yɔ pɔ-tɔm. Yehowa paɖɩɣ lakasɩ nzɩ.—Ezek. 22:12.
18. Tɔm pɔzʋʋ mbʋ pɩzɩɣ nɛ pɩsɩnɩ-ɖʋ nɛ ɖɩna lɩmaɣza wena ɖɩwɛnɩ liidiye yɔɔ yɔ? (Ebree mba 13:5)
18 Pɩwɛɣ ɖeu se ɖɩmaɣzɩ nɛ ɖɩna lɩmaɣza wena ɖɩwɛnɩ liidiye yɔɔ yɔ. Pɔzɩ ña-tɩ se: «Ðoŋ ɖoŋ lɛ, mamaɣzɩɣ liidiye nɛ mbʋ manpɩzɩɣ nɛ maya yɔ pɩ-yɔɔ? Ye mankɩndɩ nɔɔyʋ cɔlɔ liidiye yɔ, maahɛyɩɣ-ɩ ɖɩ lɔŋ nɛ mamaɣzɩɣ se ɛfɛyɩ liidiye kɛdɛɖaɣ taa? Liidiye nɖɩ mɛwɛna yɔ ɖiyeki nɛ mamaɣzɩɣ se mamʋ ñɩm nɛ pɩkɩlɩ lalaa na? Pɩwɛ-m kaɖɛ se malakɩ lalaa kʋjɔŋ na? Mamaɣzɩɣ se ye koobu nɔɔyʋ ɛwɛnɩ liidiye sakɩyɛ yɔ, pɩwɩlɩɣ se ɛsɔɔlɩ liidiye nɛ pɩkɩlɩ Yehowa? Manɖʋʋ taabalɩyɛ nɛ ñɩm tɩnaa nɛ man-paa fɛyɩnɩ kʋñɔndɩnaa na?» Ðihiɣ waɖɛ sɔsɔɖɛ se ɖɩkɛ agɔma Yehowa kizinziku tɛɛ. Ye ɖɩfɛyɩ liidiye laɣzaɣ yɔ, ɖɩpɩzɩɣ nɛ ɖiwolo pɩ-yɔɔ nɛ ɖɩkɛ agɔma Yehowa kizinziku tɛɛ. Ðɩnɛ ɛlɛ Yehowa ɛɛkaɣ-ɖʋ lɔʋ kaaʋ.—Kalɩ Ebree mba 13:5.
YEHOWA SƆƆLƖ Ɛ-TAABALAA
19. Ɛbɛ yɔɔ Yehowa sɔɔlaa se ɖɩla mbʋ payɩ pɩ-tɔm ɛyɔɔdɩ Keɣa 15 taa yɔ?
19 Keɣa 15 tɛmnɩ lidaʋ tɔm tʋnɛ: «Ɛyʋ weyi ɛlakɩ mbʋ yɔ, pɩɩkaɣ-ɩ ñamsʋʋ kpa.» (Keɣ. 15:5) Mayaɣ ŋga ka-taa, keɣa maɖʋ wɩlɩɣ mbʋ pʋyɔɔ Ɛsɔ sɔɔlaa se ɖɩla mbʋ payɩ pɩ-tɔm ɛyɔɔdɩ keɣa ŋga ka-taa yɔ. Yehowa sɔɔlaa se ɖɩwɛɛ taa leleŋ taa. Ye ɖɩlakɩ mbʋ ɛpɔzʋʋ-ɖʋ se ɖɩla yɔ, piɖeɣni-ɖʋ nɛ pɩkɩlɩ nɛ ɛkaɣ ɖɔ-yɔɔ kandɩyʋʋ.—Iza. 48:17.
20. Mba Yehowa mʋ-wɛ ɛgɔndʋ e-kizinziku tɛɛ yɔ, ɛbɛ paɖaŋaa kpam?
20 Mba Yehowa mʋ-wɛ ɛgɔndʋ e-kizinziku tɛɛ yɔ, papɩzɩɣ nɛ paɖaŋ cee wayɩ kɩbaŋʋ kpam. Patam numwaa mba pɔɖɔkɩ pe-siɣsiɣ wɛtʋ yɔ, pakaɣ kpaʋ ɛsɔdaa nɛ pacaɣ «ɖɩjaɣyɛ sakɩyɛ» nɖɩ Yesu ñɔɔzaa nɛ ɛsɩɩ-wɛ yɔ ɖɩ-taa. (Yoh. 14:2) Piyele nɛ mba pɛwɛnɩ lidaʋ se pakaɣ caɣʋ tɛtʋ yɔɔ yɔ, paɖaŋ lidaʋ tɔm ndʋ tɩwɛ Natʋ 21:3 taa yɔ kpam. Pɩkɛnɩ-ɖʋ hɩɖɛ ɖʋʋ siŋŋ se Yehowa sɔɔlaa se ɛmʋ-ɖʋ ɛgɔndʋ e-kizinziku tɛɛ nɛ ɖɩwɛɛ peeɖe tam.
HENDU 39 Ðɩwɛɛnɩ hɩɖɛ kɩbanɖɛ Ɛsɔ ɛzɩdaa
