NAʼLEBʼ RE TZOLOK 24
BʼICH 24 Taqeʼqo saʼ xtzuulul li Jehobʼa
Junelik choowanq saʼ li xmuhebʼaal li Jehobʼa
«At Qaawaʼ, ani truuq taahilanq saʼ laamuhebʼaal? Ani taawanq saʼ laaloqʼlaj tzuul?» (SAL. 15:1).
RUʼUJIL LI TZOLOM
Kʼaru naxpatzʼ qe li Jehobʼa re naq junelik toowanq saʼ amiiwil rikʼin ut chanru naraj naq tqilebʼ li ramiiw.
1. Chanru nokooxtenqʼa li Salmo 15:1-5?
SAʼ LI tzolom rubʼelaj, xqatzol naq ebʼ laj kʼanjel chiru li Jehobʼa naru teʼwanq joʼ rulaʼ saʼ li xmuhebʼaal wi teʼxkawresi li ramiiwil rikʼin. Abʼan, chanru tooruuq xbʼaanunkil aʼin? Li Salmo 15 naxkʼe li xsumenkil, xbʼaan naq chisaʼ naqataw li chaabʼil naʼlebʼ li nokooxtenqʼa re naq qʼaxal wiʼ chik toojiloq chixkʼatq li Yos (yaabʼasi Salmo 15:1-5).
2. Kʼaru tawiʼ kixkʼoxla laj David naq kiʼaatinak chirix li xmuhebʼaal li Jehobʼa?
2 Li Salmo 15 naxye: «At Qaawaʼ, ani truuq taahilanq saʼ laamuhebʼaal? Ani taawanq saʼ laaloqʼlaj tzuul?» (Sal. 15:1). Naq kiʼaatinak chirix li xmuhebʼaal li Jehobʼa, laj David maare kixkʼoxla li loqʼlaj naʼajej, li kiwank aran Gabaón chiru jun qʼehil. Joʼkan ajwiʼ, naq laj David kiʼaatinak chirix li loqʼlaj tzuul re li Yos, maare kiʼaatinak chirix Sion, li wank Jerusalén. Aran saʼ xteepal Gabaón, laj David kixyiibʼ jun li muhebʼaal re xkʼebʼal li xkaaxil li sumwank toj reetal naq tkabʼlamanq jun li naʼaj bʼarwiʼ teʼxkʼe (2 Sam. 6:17).
3. Kʼaʼut naqaj xtawbʼal ru li naxye li Salmo 15? (Chaawil li jalam u).
3 Yaal naq li xkʼihalil ebʼ laj Israel inkʼaʼ xeʼruuk kʼanjelak saʼ li loqʼlaj naʼajej chi moko xeʼruuk ok saʼ li muhebʼaal bʼarwiʼ wank li xkaaxil li sumwank. Abʼan chixjunilebʼ laj kʼanjel chiru li Jehobʼa naru teʼoq saʼ li xmuhebʼaal, wi nekeʼxkawresi li ramiiwil rikʼin ut aʼan li naqaj chiqajunilo. Saʼ li Salmo 15 natawmank wiibʼ oxibʼ li chaabʼil naʼlebʼ li tento tqayuʼami re naq junelik toowanq saʼ amiiwil rikʼin li Jehobʼa.
Ebʼ laj Israel li xeʼwank saʼ xkutankil laj David, inkʼaʼ xeʼchʼaʼajkoʼk chiru xtawbʼal ru kʼaru naraj xyeebʼal wank joʼ rulaʼ li Jehobʼa saʼ li xmuhebʼaal. (Chaawil li raqal 3).
JUNELIK TIIKAQ QACHʼOOL UT QABʼAANUHAQ LI US
4. Kʼaʼut naq moko tzʼaqal ta naq tkubʼeeq qahaʼ re xtawbʼal li rusilal li Jehobʼa? (Isaías 48:1).
4 Li Salmo 15:2 naxye naq li ramiiw li Jehobʼa aʼan «li nawank chi maakʼaʼ xmaak ut naxkʼanjela li tiikilal; li naxye li yaal chi anchal xchʼool». Aʼin jun li naʼlebʼ li junelik tqabʼaanu. Abʼan, ma tooruuq wank chi maakʼaʼ qamaak? Tooruuq. Usta moko tzʼaqal ta re ru li qayuʼam, li Jehobʼa naxkʼe saʼ ajl naq naqakʼe qachʼool abʼink chiru. Xqʼaxtesinkil li qayuʼam chiru li Jehobʼa ut xkubʼsinkil qahaʼ aʼan li xtiklajik li qakʼanjel chiru li Yos. Qajultikaq naq saʼ najter qʼe kutan, moko tzʼaqal ta wank joʼ aj Israel re wank joʼ rulaʼ li Jehobʼa. Wankebʼ nekeʼxyaabʼa li xkʼabʼaʼ li Yos abʼan nekeʼxbʼaanu saʼ kaʼpakʼal u ut moko tiikebʼ ta xchʼool (yaabʼasi Isaías 48:1). Li nekeʼnaʼlebʼak saʼ tiikilal tento naq teʼxtzol xyuʼaminkil li xchaqʼrabʼ li Jehobʼa. Joʼkan ajwiʼ nakʼulmank saʼebʼ li qakutan: re xtawbʼal li rusilal li Jehobʼa moko tzʼaqal ta naq tkubʼeeq qahaʼ ut tooʼokenq saʼ li xchʼuut, tento bʼan tqabʼaanu li us. Ut kʼaru naʼokenk chisaʼ aʼin?
5. Kʼaru naraj xyeebʼal choʼq re li Jehobʼa wank chi tiik ru qachʼool ut xbʼaanunkil li us?
5 Choʼq re li Jehobʼa moko tzʼaqal ta naq junaq li kristiʼaan twulaq rajlal saʼebʼ li chʼutam re naq tixye naq tiik xchʼool ut naxbʼaanu li us (1 Sam. 15:22). Joʼ aj paabʼanel tento tqakʼe qachʼool chi abʼink saʼ chixjunil, usta wanko qajunes (Prov. 3:6; Ecl. 12:13,14). Aʼin naʼokenk abʼink chiru li Jehobʼa saʼebʼ li naʼlebʼ li naqakʼoxla naq maakʼaʼ xwankil. Wi nokoonaʼlebʼak chi joʼkaʼin, tqakʼutbʼesi naq naqara li Jehobʼa ut aʼin tixbʼaanu naq tooxra (Juan 14:23; 1 Juan 5:3).
6. Joʼ naxye Hebreos 6:10-12, kʼaʼut naq moko tzʼaqal ta rikʼin naq xoowank chi tiik ru qachʼool?
6 Li Jehobʼa naroxloqʼi chixjunil li xqabʼaanu saʼ xkʼabʼaʼ. Wi xoowank chi tiik ru qachʼool chiru moko tzʼaqal ta re naq tooʼoq saʼ li xmuhebʼaal joʼ naxye Hebreos 6:10-12 (yaabʼasi). Usta li Jehobʼa inkʼaʼ nasach saʼ xchʼool li chaabʼil naʼlebʼ li xqabʼaanu, aʼan naraj naq tqakʼe qachʼool re kʼanjelak chiru toj saʼ rosoʼjik. Wi inkʼaʼ nokoolubʼk, junelik toowanq saʼ amiiwil rikʼin (Gál. 6:9).
QAYEEHAQ LI YAAL CHI ANCHAL QACHʼOOL
7. Kʼaru naraj xyeebʼal naq tqaye li yaal chi anchal qachʼool?
7 Li Salmo 15:2 naxye naq li kristiʼaan li naxbʼoq li Jehobʼa saʼ li xmuhebʼaal aʼan «li naxye li yaal chi anchal xchʼool». Aʼin moko kaʼaj tawiʼ naraj xyeebʼal naq inkʼaʼ natikʼtiʼik, chaabʼil bʼan nanaʼlebʼak saʼ chixjunil (Heb. 13:18). Ut aʼin jwal wank xwankil «xbʼaan naq li Qaawaʼ xikʼ narilebʼ li inkʼaʼ usebʼ xnaʼlebʼ, abʼan naxrahebʼ li tiikebʼ xchʼool» (Prov. 3:32).
8. Kʼaru yibʼru aj naʼlebʼ tento tqatzʼeqtaana?
8 Li naxye li yaal chi anchal xchʼool moko naxbʼaanu ta naq naʼabʼink chiru li Yos naq wank rikʼinebʼ li junchʼol ut naq wank xjunes inkʼaʼ naʼabʼink chiru li Yos (Is. 29:13). Li naʼlebʼ aʼin jwal yibʼru ut inkʼaʼ naqaj xyuʼaminkil. Chanru truuq junaq li kristiʼaan tʼaneʼk saʼ li naʼlebʼ aʼin? Naq nawiibʼank xchʼool chirix li xchaqʼrabʼ li Jehobʼa (Sant. 1:5-8). Joʼkan naq, wi naxkʼe reetal naq maakʼaʼ nakʼulmank naq inkʼaʼ naʼabʼink chiru jun li naʼlebʼ li chanchan tawiʼ naq maakʼaʼ xwankil, maare moqon t-oq xbʼaanunkil li naʼlebʼ li qʼaxal yibʼru. Usta naxkʼoxla naq yook chi kʼanjelak chiru li Yos, li Jehobʼa inkʼaʼ naxkʼulubʼa li loqʼonink li naxbʼaanu (Ecl. 8:11). Abʼan laaʼo naqaj naʼlebʼak chi chaabʼil saʼ chixjunil.
9. Kʼaru naxkʼut chiqu li kikʼulmank naq li Jesús kixnaw ru laj Natanael? (Chaawil li jalam u).
9 Jwal wank xwankil naq tqaye li yaal chi anchal qachʼool, aʼin tooruuq rilbʼal rikʼin li kikʼulmank naq laj Felipe kixbʼoq laj Natanael re naq tixnaw ru li Jesús. Usta inkʼaʼ naxnaw ru laj Natanael, li Jesús kixye: «Kʼehomaq reetal, chʼolchʼo naq li winq aʼin aj Israel ut inkʼaʼ nabʼalaqʼik» (Juan 1:47). Li Jesús naxnaw naq ebʼ li xtzolom nekeʼxye li yaal, abʼan kixkʼe reetal naq laj Natanael qʼaxal wiʼ chik naxyuʼami li naʼlebʼ aʼin. Joʼ laaʼo, laj Natanael moko tzʼaqal ta re ru li xyuʼam, abʼan moko aj kaʼpakʼal u ta ut nanaʼlebʼak chi chaabʼil saʼ chixjunil. Joʼkan naq li Jesús kixye naq chaabʼil xnaʼlebʼ xbʼaan naq junelik naxye li yaal. Jwal loqʼ naq li Jesús joʼkan ajwiʼ tnaʼlebʼaq chiqix!
Naq li Jesús kixnaw ru laj Natanael kixye naq aʼan jun winq li inkʼaʼ nabʼalaqʼiik. Ma truuq li Jesús xyeebʼal aʼin chiqix? (Chaawil li raqal 9).
10. Kʼaʼut tento naq tqoksi chiʼus li ruʼuj qaqʼ? (Santiago 1:26).
10 Li xkʼihalil li naʼlebʼ li natawmank saʼ li Salmo 15 naʼaatinak chirix chanru rilbʼalebʼ li junchʼol. Saʼ li Salmo 15:3 naxye naq li kristiʼaan li naxkʼulubʼa li Jehobʼa saʼ li xmuhebʼaal aʼan li «inkʼaʼ nayoobʼank aatin chirix anihaq; li inkʼaʼ naxbʼaanu maaʼusilal re li ras riitzʼin chi moko naʼaatinak chirix xjolom li rechkabʼal». Wi moko us ta naqoksi li ruʼuj qaqʼ, tooruuq xrahobʼtesinkil xchʼoolebʼ li junchʼol ut li Jehobʼa inkʼaʼ tooxkʼulubʼa joʼ rulaʼ (yaabʼasi Santiago 1:26).
11. Kʼaru naraj xyeebʼal li yoobʼank aatin ut kʼaru nabʼaanumank naq junaq li nayoobʼank aatin inkʼaʼ naxyotʼ xchʼool?
11 Laj salmiist kiʼaatinak chirix li yoobʼank aatin. Kʼaru naraj xyeebʼal li yoobʼank aatin? Aʼan xyeebʼal tikʼtiʼ chirix junaq li kristiʼaan, li tixbʼaanu naq inkʼaʼ chik us teʼaatinaq chirix. Ebʼ li nekeʼyoobʼank aatin ut inkʼaʼ nekeʼxyotʼ xchʼool, nekeʼisiik saʼ li chʼuut (Jer. 17:10).
12, 13. Saʼ kʼaru ebʼ li naʼlebʼ tooruuq xbʼaanunkil naq ebʼ li junchʼol inkʼaʼ us teʼaatinaq chirixebʼ li qamiiw? (Chaawil li jalam u).
12 Li Salmo 15:3 naxye naq li rulaʼ li Jehobʼa «inkʼaʼ naxbʼaanu maaʼusilal re li ras riitzʼin chi moko naʼaatinak chirix xjolom li rechkabʼal». Chanru tooruuq xbʼaanunkil naq ebʼ li junchʼol inkʼaʼ us teʼaatinaq chirixebʼ li qamiiw?
13 Maare inkʼaʼ tqakʼe reetal ut tooʼoq xyeebʼal li yibʼru aj naʼlebʼ chirix junaq rehebʼ li junchʼol. Qakʼoxlaq rix li oxibʼ chi naʼlebʼ aʼin: 1) jun li hermaan naxkanabʼ xkʼebʼal chixjunil li xhoonal re kʼanjelak chiru li Yos, 2) jun li sumal naxkanabʼ kʼanjelak Betel malaj 3) jun li hermaan moko wank ta chik joʼ cheekel winq malaj joʼ aj tenqʼanel saʼ li chʼuut. Moko us ta xyeebʼal rehebʼ li junchʼol naq ebʼ li hermaan aʼin xeʼxbʼaanu jun li maak ut joʼkan naq xeʼjalaak li xwanjik. Maare moko chʼolchʼo ta chiqu kʼaru tzʼaqal kikʼulmank. Ut qajultikaq naq li nawank joʼ rulaʼ li Jehobʼa saʼ li xmuhebʼaal «inkʼaʼ naxbʼaanu maaʼusilal re li ras riitzʼin chi moko naʼaatinak chirix xjolom li rechkabʼal».
Moko chʼaʼaj ta xyeebʼal li yibʼru aj naʼlebʼ chirixebʼ li junchʼol ut yoobʼank aatin chirixebʼ. (Chaawil li raqal 12 ut 13).
QOXLOQʼIIQ LI NEKEʼROXLOQʼI RU LI JEHOBʼA
14. Chanru naxnaw li rulaʼ li Jehobʼa naq jun li kristiʼaan tzʼeqtaananbʼil xbʼaan li Yos ut naq aajel ru xtzʼeqtaanankil?
14 Li Salmo 15:4 naxye naq li ramiiw li Jehobʼa «xikʼ naril li tento xtzʼeqtaanankil». Abʼan, chanru naqanaw ani tzʼeqtaananbʼil xbʼaan li Jehobʼa? Inkʼaʼ tooruuq xyeebʼal naq jun li kristiʼaan tzʼeqtaananbʼil xbʼaan li Jehobʼa yal saʼ xkʼabʼaʼ li naqakʼoxla malaj li nawulak chiqu. Kʼaʼut? Xbʼaan naq laaʼo aj maak maare twulaq chiqu wank rikʼinebʼ li kristiʼaan li inkʼaʼ nachʼaʼajkoʼk xkʼambʼal qibʼ saʼ usilal rikʼinebʼ abʼan tqatzʼeqtaana li nekeʼxbʼor qajosqʼil. Joʼkan naq, kaʼajwiʼ tqatzʼeqtaana ebʼ li kristiʼaan li tzʼeqtaananbʼilebʼ xbʼaan li Jehobʼa (1 Cor. 5:11). Joʼ li nekeʼxbʼaanu li maak ut inkʼaʼ nekeʼxyotʼ xchʼool, ebʼ li nekeʼxtzʼeqtaana li qapaabʼal ut li nekeʼxbʼaanu naq inkʼaʼ toowanq saʼ amiiwil rikʼin li Jehobʼa (Prov. 13:20).
15. Chanru tooruuq xkʼutbʼesinkil naq naqoxloqʼi ebʼ li nekeʼroxloqʼi li Jehobʼa?
15 Joʼkan ajwiʼ, li Salmo 15:4 naxye naq tento tqoxloqʼi li nekeʼroxloqʼi li Jehobʼa. Joʼkan naq, naqasikʼ chanru xkʼutbʼesinkil li usilal choʼq rehebʼ li ramiiw li Jehobʼa (Rom. 12:10). Chanru xbʼaanunkil? Li Salmo 15:4 naxye naq li rulaʼ li Jehobʼa saʼ li xmuhebʼaal «inkʼaʼ naxjal ru li xyeechiʼom rikʼin jurament, us ta ra tixkʼul saʼ xkʼabʼaʼ li yaal». Joʼkan naq, wi inkʼaʼ tqabʼaanu li xqaye, tooruuq xtochʼbʼal xchʼoolebʼ li junchʼol (Mat. 5:37). Jun eetalil, li Jehobʼa naroybʼeni naq li sumsukebʼ teʼxbʼaanu li xeʼxyeechiʼi naq xeʼsumlaak. Joʼkan ajwiʼ, naraj naq ebʼ li naʼbʼej yuwaʼbʼej teʼxkʼe xqʼe re xbʼaanunkil li xeʼxyeechiʼi rehebʼ li ralal xkʼajol. Saʼ xkʼabʼaʼ naq naqara li Jehobʼa ut ebʼ li qas qiitzʼin, naqabʼaanu li naqaye.
16. Chan chik ru naqoxloqʼi ebʼ li ramiiw li Jehobʼa?
16 Naq nokookʼehok ochochnal ut nokoosihink naqakʼutbʼesi ajwiʼ naq naqoxloqʼi ebʼ li ramiiw li Jehobʼa (Rom. 12:13). Naq naqanumsi hoonal rikʼinebʼ li hermaan, naqakawresi li qamiiwil rikʼinebʼ ut rikʼin li Jehobʼa ajwiʼ. Ut naq nokookʼehok ochochnal, naqakʼam qe rikʼin li Jehobʼa.
MIXIK QACHʼOOL CHI XRAHINKIL RU LI TUMIN
17. Kʼaʼut li Salmo 15 naʼaatinak chirix li tumin?
17 Saʼ li Salmo 15 naxye ajwiʼ naq li rulaʼ li Jehobʼa aʼan «li nakʼehok tumin chi toʼ ut inkʼaʼ naxpatzʼ ral, li inkʼaʼ naraj tuminaak re xrahobʼtesinkil li maakʼaʼ xmaak» (Sal. 15:5). Kʼaʼut li Salmo aʼin naʼaatinak chirix li tumin? Xbʼaan naq naru naq inkʼaʼ chik us toonaʼlebʼaq ut tooʼoq xrahinkil ru li tumin. Ut wi naqakʼul aʼin, aʼin truuq xchʼaʼajkinkil ebʼ li junchʼol ut li qamiiwil rikʼin li Yos (1 Tim. 6:10). Jun eetalil, saʼ najter qʼe kutan wankebʼ nekeʼxpatzʼ xkomon ral li tumin rehebʼ li rechpaabʼanel li nebʼaʼebʼ. Joʼkan ajwiʼ, wankebʼ laj raqol aatin li xeʼxkʼulubʼa naq teʼtuminaaq ru ut moqon moko us ta xeʼraqok aatin saʼ xbʼeenebʼ li qas qiitzʼin li maakʼaʼebʼ xmaak. Chixjunil li naʼlebʼ aʼin, xikʼ naril li Jehobʼa (Ezeq. 22:12).
18. Kʼaru ebʼ li patzʼom naru tqabʼaanu? (Hebreos 13:5).
18 Jwal us raj naq tqakʼoxla chanru nokoonaʼlebʼak chirix li tumin. Qakʼoxlaq aʼin: «Ma junelik naxik inchʼool chi xkʼoxlankil li tumin ut li nawaj xloqʼbʼal? Wi nekeʼxtoʼoni intumin, ma ninbʼayk xqʼaxtesinkil xbʼaan naq ninkʼoxla naq inkʼaʼ naʼajmank chiru? Ma ninkʼoxla naq jwal wank inwankil xbʼaan naq wank intumin? Ma nachʼaʼajkoʼk chiwu sihink? Ma ninkʼoxla naq chixjunilebʼ li wankebʼ xtumin nekeʼxik xchʼool chirix li bʼihomal? Ma nawulak chiwu wank joʼ ramiiw li wank xtumin ut nintzʼeqtaana li nebʼaʼ?». Aajel ru naq tqabʼaanu ebʼ li patzʼom aʼin xbʼaan naq jun loqʼlaj maatan wank joʼ rulaʼ li Jehobʼa, abʼan kaʼajwiʼ tooruuq wank joʼ rulaʼ li Jehobʼa wi inkʼaʼ naxik qachʼool chi xraabʼal li tumin. Wi joʼkan nokoonaʼlebʼak, li Jehobʼa maajunwa tooxtzʼeqtaana (yaabʼasi Hebreos 13:5).
LI JEHOBʼA NAXRAHEBʼ LI RAMIIW
19. Kʼaʼut li Jehobʼa kixkʼe qe ebʼ li naʼlebʼ li natawmank saʼ li Salmo 15?
19 Li Salmo 15 naxraq rikʼin li yeechiʼom aʼin: «Li nabʼaanunk re chixjunil aʼin, maajaruj taachʼinanq xchʼool chirix li Yos» (Sal. 15:5). Chi joʼkan, laj salmiist naxye naq li Jehobʼa naxkʼe ebʼ li naʼlebʼ aʼin xbʼaan naq naraj naq sahaq qachʼool. Naq naqabʼaanu li naraj li Jehobʼa, us nokooʼelk saʼ li qayuʼam ut junelik nokooxkol (Is. 48:17).
20. Chanruhaq li xyuʼamebʼ li rulaʼ li Jehobʼa saʼ li kutan chalk re?
20 Ebʼ li rulaʼ li Jehobʼa li teʼwanq chi tiik ru xchʼool chaabʼilaqebʼ li xyuʼam saʼ li kutan chalk re. Ebʼ li yulbʼilebʼ ru teʼxik choxa, bʼarwiʼ li Jesús kixkʼubʼ «naabʼal li naʼaj» (Juan 14:2). Ut li teʼwanq saʼ Ruuchichʼochʼ, nekeʼroybʼeni naq ttzʼaqloq ru li naxye Apocalipsis 21:3. Jun loqʼlaj maatan wank joʼ ramiiw li Jehobʼa! Tooruuq wank joʼ rulaʼ li Jehobʼa saʼ li xmuhebʼaal junqʼe junqʼe kutan!
BʼICH 28 Chanru toowanq choʼq ramiiw li Jehobʼa
