1. Inki mutindu Nkunga 15:1-5 lenda sadisa beto?

 NA DISOLO ya me luta, beto monaka nde bansadi ya Yehowa yina me kudipesaka na yandi lenda vanda banzenza na tenta na yandi ya kifwani kana bo ke yedisa kinduku ya ngolo ti yandi. Kansi, nki beto fwete sala sambu na kuvanda ti kinduku ya mutindu yina ti Yehowa? Mvutu kele na Nkunga 15. (Tanga Nkunga 15:1-5.) Nkunga yina ke tubila mambu yina beto fwete sala sambu na kuvanda ti kinduku ya ngolo ti Yehowa.

2. Mbala ya nkaka, nki pusaka Davidi na kutubila tenta ya Yehowa?

² Nkunga 15 ke yantika ti bangogo yai: “O Yehowa, nani lenda vanda munzenza na tenta na nge? Nani lenda zinga na ngumba na nge ya santu?” (Nk. 15:1) Ntangu muyimbi-bankunga Davidi vandaka kutubila “tenta” ya Yehowa, mbala ya nkaka yandi vandaka kuyindula nzo-tenta yina vandaka na Gibeoni sambu na mwa ntangu. Davidi tubilaka mpi ‘ngumba ya santu’ ya Nzambi, mbala ya nkaka yandi vandaka kutubila Sioni na Yeruzalemi. Kuna, na bakilometre mingi na sudi ya Gibeoni, Davidi tungaka tenta sambu na kutula sanduku ya kuwakana tii kuna bo zolaka kutunga tempelo sambu na yo.​—2 Sam. 6:17.

3. Sambu na nki Nkunga 15 fwete benda dikebi na beto? (Tala mpi kifwanisu ya ke wakana ti paragrafe yai.)

³ Ya kieleka, bantu mingi ya Izraele vandaka ve kusala na nzo-tenta mpi bantu fioti mpamba vandaka kukota na tenta, kisika yina bo vandaka kubumba sanduku ya kuwakana. Kansi bantu yonso yina ke sadilaka Yehowa na mutindu ya mbote lenda vanda banzenza na tenta na yandi ya kifwani, kana bo kuma banduku na yandi mpi bo landa kuvanda banduku na yandi. Beto yonso ke zola kuvanda na tenta ya Yehowa. Nkunga 15 ke tubila mwa bikalulu yina beto fwete yedisa mpi mambu yina beto fwete sala sambu na kulanda kuvanda banduku ya Yehowa.

 TAMBULA KUKONDA KIFU MPI SALA MAMBU YA MBOTE

4. Sambu na nki beto ke tuba nde kubaka mbotika kele ve kaka kima mosi yina beto fwete sala? (Yezaya 48:1)

⁴ Nkunga 15:2 ke tuba nde nduku ya Nzambi kele “muntu yina ke tambulaka kukonda kifu, yina ke salaka mambu ya mbote.” Bangogo “ke tambulaka” mpi “ke salaka,” ke monisa mambu yina ke salamaka konso ntangu. Keti beto lenda tambula kibeni ‘kukonda kifu’? Ee. Ata beto yonso kele bantu ya kukonda kukuka, Yehowa ta mona nde beto “ke tambulaka kukonda kifu” kana beto ke sala yonso sambu na kulemfukila yandi. Kudipesa na Nzambi mpi kubaka mbotika kele kaka luyantiku. Mu mbandu na ntangu ya ntama, kana muntu kele na dikanda ya Izraele, yo vandaka kutendula ve nde yandi kele mpi munzenza ya Yehowa. Bantu ya Izraele ya nkaka vandaka kubinga Yehowa kansi bo vandaka kusala yo ve “na kieleka mpi na lunungu.” (Tanga Yezaya 48:1.) Bantu ya Izraele ya ntima-masonga vandaka kulonguka bansiku ya Yehowa mpi kuzitisa yo. Bubu yai mpi, katula kubaka mbotika mpi kuvukana ti bampangi na dibundu, beto fwete sala mambu ya nkaka sambu Nzambi kundima beto. Beto fwete landa ‘kusala mambu ya mbote.’ Yo ke tendula nki?

5. Kulemfukila Yehowa na mambu yonso ke tendula nki?

⁵ Sambu na Yehowa, ‘kutambula kukonda kifu’ mpi ‘kusala mambu ya mbote,’ ke tendula kaka ve kukwenda na balukutakanu mbala na mbala na Nzo ya Kimfumu, kansi yo ke tendula mpi mambu mingi ya nkaka. (1 Sam. 15:22) Beto fwete sala yonso sambu na kulemfukila Nzambi na mambu yonso yina beto ke sala ata ntangu beto kele beto mosi. (Bing. 3:6; Lon. 12:13, 14) Yo kele mfunu nde beto sala yonso sambu na kulemfukila Yehowa ata na mambu ya fioti-fioti. Kana beto ke sala mpidina, yo ta monisa nde beto ke zolaka yandi kibeni mpi yo ta sala nde yandi mpi kuzola beto mingi.​—Yoa. 14:23; 1 Yoa. 5:3.

6. Baebreo 6:10-12 ke monisa nde nki kele mfunu mingi kuluta mambu ya mbote yina beto me salaka na bilumbu me luta?

 ⁶ Yehowa ke sepelaka mingi kibeni ti mambu yina beto me salaka sambu na yandi. Kansi yo ke tendula ve nde sambu beto salaka mambu ya mbote sambu na Yehowa na bilumbu me luta, beto ta landa kuvanda banzenza na tenta na yandi. Baebreo 6:10-12 ke monisa yo pwelele. (Tanga.) Yehowa ke vilaka ve mambu ya mbote yina beto me sadilaka yandi, kansi yandi ke zolaka nde beto landa kusadila yandi na ntima na beto ya mvimba “tii na nsuka.” Yandi ta landa kuvanda nduku na beto mvula na mvula “kana beto yambula ve.”​—Bag. 6:9.

TUBA KIELEKA NA NTIMA NA NGE

7. Kutuba kieleka na ntima na beto ke tendula nki?

⁷ Muntu yina ke zola kuvanda munzenza na tenta ya Yehowa fwete ‘tuba kieleka na ntima na yandi.’ (Nk. 15:2) Yo ke tendula kaka ve nde beto fwete kusa ve. Yehowa ke zola nde beto vanda masonga na mambu yonso yina beto ke tuba mpi ke sala. (Baeb. 13:18) Yo kele mfunu “sambu Yehowa ke mengaka muntu ya luvunu, kansi yandi ke taka kinduku ya ngolo ti bantu ya mbote.”​—Bing. 3:32.

8. Inki kikalulu beto fwete vanda ve ti yo?

⁸ Bantu yina ke tubaka kieleka na ntima na bo ke lemfukilaka Nzambi ntangu bo kele ti bantu ya nkaka mpi ntangu bo kele bo mosi. (Yez. 29:13) Bo ke salaka mambu na masonga yonso. Muntu yina kele ve masonga lenda yantika kuyindula nde bansiku ya nkaka ya Yehowa kele ve ya mbote. (Yak. 1:5-8) Yandi lenda lemfukila ve Yehowa na mambu yina yandi ke yindula nde yo kele ve mfunu mingi. Diaka, kana yandi me mona nde ata kima mosi ve ya mbi me kumina yandi sambu yandi lemfukilaka ve Yehowa, yandi lenda yantika kusala mambu ya mbi kuluta. Ata yandi ke yindula nde yandi ke sadila Nzambi, Yehowa ta ndima ve lusambu na yandi. (Lon. 8:11) Yo yina, beto ke zolaka kuvanda masonga na mambu yonso.

9. Mambu yina Yezu tubaka sambu na Natanaele ke longa beto nki? (Tala mpi kifwanisu ya ke wakana ti paragrafe yai.)

⁹ Mambu yina Yezu tubaka ntangu yandi kutanaka ti Natanaele na mbala ya ntete, lenda sadisa beto na kubakisa mfunu ya kuvanda masonga  na ntima na beto. Kima mosi ya kuyituka salamaka ntangu Filipo nataka Natanaele na Yezu. Ata yo vandaka mbala ya ntete yina Yezu kutanaka ti Natanaele, yandi tubaka nde: “Tala, muntu ya Izraele ya kieleka yina kele ve ti luvunu ata fioti.” (Yoa. 1:47) Ya kieleka, Yezu zabaka nde balongoki na yandi ya nkaka vandaka mpi masonga, kansi Natanaele vandaka masonga mingi kibeni. Natanaele vandaka muntu ya kukonda kukuka bonso beto. Kansi yandi vandaka masonga na mambu yonso. Yezu sepelaka ti kikalulu yina mpi yandi sikisaka Natanaele sambu na yo. Ya kieleka, yo ta vanda mbote kibeni kana Yezu kutuba mpi mutindu yina sambu na beto.

10. Sambu na nki beto fwete tuba ve mambu ya mbi sambu na bantu ya nkaka? (Yakobo 1:26)

¹⁰ Mambu mingi yina kele na Nkunga 15 ke tubila mutindu beto fwete sadila bantu ya nkaka mambu. Nkunga 15:3 ke tuba nde munzenza na tenta ya Yehowa “ke kusilaka ve bantu makambu na ludimi na yandi, yandi ke sadilaka ve nkweno na yandi ata diambu mosi ya mbi, mpi yandi ke tubaka ve mambu ya luvunu sambu na banduku na yandi.” Kana beto ke tuba mambu ya mbi sambu na bantu ya nkaka, yo lenda sala bo mpasi kibeni mpi yo lenda sala nde beto vanda diaka ve banzenza na tenta ya Yehowa.​—Tanga Yakobo 1:26.

11. Inki lenda kumina muntu yina ke kusilaka bantu makambu mpi ke balula ve ntima?

¹¹ Muyimbi-bankunga tubilaka mingi-mingi kikalulu ya kukusila bantu makambu. Kana muntu ke kusila muntu ya nkaka makambu, yandi ke kota yandi nsoki sambu yandi ke bebisa kibeni lukumu ya muntu yina. Muntu yina ke bebisaka lukumu ya bantu mpi ke balula ve ntima, bo lenda basisa yandi na dibundu.​—Yer. 17:10.

12-13. Inki mambu lenda sala nde beto tuba mambu ya luvunu sambu na banduku na beto? (Tala mpi kifwanisu ya ke wakana ti paragrafe yai.)

¹² Nkunga 15:3 ke tuba mpi nde munzenza na tenta ya Yehowa ke sadilaka ve nkweno na yandi ata diambu mosi ya mbi mpi yandi ke tubaka ve mambu ya luvunu sambu na banduku na yandi. Yo ke tendula nki?

 ¹³ Beto lenda tuba mambu ya luvunu sambu na muntu mosi kana beto ke mwanga bansangu ya mbi sambu na yandi. Mu mbandu: (1) mpangi-nkento mosi me zenga kisalu ya kimupasudi-nzila, (2) mpangi-bakala mosi ti nkento na yandi ke sala diaka ve na Betele mpi (3) mpangi-bakala mosi kele diaka ve nkuluntu to nsadi ya kisalu. Yo ta vanda mbi na kusonga bantu ya nkaka nde bampangi yina salaka diambu mosi ya mbi yina me sala nde mambu yina kukumina bo. Yo lenda vanda ti bikuma mingi ya nkaka yina beto me zaba ve ya lenda sala nde mambu ya mutindu yina kusalama. Yo yina, munzenza na tenta ya Yehowa “ke sadilaka ve nkweno na yandi ata diambu mosi ya mbi, mpi yandi ke tubaka ve mambu ya luvunu sambu na banduku na yandi.”

PESA BANTU YINA KE WAKA YEHOWA BOMA LUKUMU

14. Inki mutindu munzenza ya Yehowa ke buyaka “konso muntu yina bo ke vwezaka”?

¹⁴ Nkunga 15:4 ke tuba nde nduku ya Yehowa “ke buyaka konso muntu yina bo ke vwezaka.” Inki mutindu beto lenda sala yo? Muntu ya kukonda kukuka lenda zaba ve kana muntu mosi kele muntu yina bo ke vwezaka to ve. Sambu na nki? Sambu beto kele bantu ya kukonda kukuka, beto lenda sepela ti bantu ya nkaka sambu beto ke wakanaka ti bo kukonda mpasi mpi beto lenda zola ve bantu ya nkaka sambu bo ke salaka mambu yina ke pesaka beto makasi. Yo yina, beto fwete buya kaka bantu yina Yehowa ke monaka nde bo kele ‘bantu yina bo ke vwezaka.’ (1 Bak. 5:11) Mu mbandu, bantu yina ke salaka mambu ya mbi mpi ke balulaka ve ntima, bantu yina ke zitisaka ve lukwikilu na beto mpi bantu yina ke sosaka kubebisa kimpeve na beto.​—Bing. 13:20.

15. Inki mutindu beto lenda kumisa “bantu yina ke waka Yehowa boma”?

¹⁵ Nkunga 15:4 ke tuba nde beto fwete kumisa “bantu yina ke waka Yehowa boma.” Yo yina, beto ke salaka yonso sambu na kuzitisa banduku ya Yehowa mpi kumonisila bo ntima ya mbote. (Bar. 12:10) Inki mutindu? Nkunga 15:4 ke tubila mutindu mosi ya kusala yo. Yo ke tuba nde munzenza ya Yehowa “ke lungisaka lusilu na yandi, ata kana yo kele mbi sambu na yandi.” Kana beto ke lungisa ve balusilu na beto, yo lenda sala bantu ya nkaka mpasi kibeni. (Mat. 5:37) Mu mbandu, Yehowa ke zolaka nde bakala ti nkento yina me kwelana kuzitisa lusilu na bo ya makwela. Yandi ke sepelaka mpi mingi ntangu bibuti ke salaka yonso sambu na kulungisa mambu yina bo ke silaka bana na bo. Zola na beto sambu na Yehowa mpi sambu na bantu ya nkaka, fwete pusa beto na kusala yonso sambu na kulungisa balusilu na beto.

16. Inki kele mutindu ya nkaka ya kukumisa banduku ya Yehowa?

¹⁶ Beto ta kumisa mpi banduku ya Yehowa kana beto kele ti kikalulu ya kuyamba banzenza mpi ya kukaba. (Bar. 12:13) Katula na balukutakanu ti na kisalu ya kulonga nsangu ya mbote, kana beto ke lutisa mpi ntangu ti bampangi na beto, yo ta sadisa beto na kukumisa kinduku na beto ti bo ngolo. Yo ta kumisa mpi kinduku na beto ti Yehowa ngolo. Diaka, kana beto kele ti kikalulu ya kuyamba banzenza, beto ke landa mbandu ya Yehowa.

KUZOLA VE MBONGO

17. Sambu na nki Nkunga 15 ke tubila mbongo?

¹⁷ Munzenza ya Yehowa “ke defisaka ve mbongo na yandi sambu na kubaka luta, mpi yandi ke ndimaka ve avoka sambu na kubedisa muntu yina me sala mbi ve.” (Nk. 15:5) Sambu na nki bo ke tubila mbongo na nkunga yai? Sambu kana beto ke zola mbongo, yo lenda kuma mfunu mingi sambu na beto kuluta bantu mpi yo lenda bebisa kinduku na beto ti Nzambi. (1 Tim. 6:10) Na ntangu ya ntama, bantu ya nkaka vandaka kusadila bampangi na bo ya bansukami mambu ya mbi. Mu mbandu, bo vandaka kudefisa bo mbongo mpi kulomba bo na kuvutula kuluta yina bo defaka. Diaka, bazuzi ya nkaka vandaka kundima  bima yina bo vandaka kupesa bo sambu na kubedisa bantu yina salaka mbi ve. Yehowa ke mengaka kibeni mambu yina.​—Ezek. 22:12.

18. Inki bangiufula lenda sadisa beto na kuditadila mbote-mbote na mambu ya me tala mbongo? (Baebreo 13:5)

¹⁸ Yo kele mfunu nde beto tadila mbote-mbote mutindu na beto ya kutadila mbongo. Kudiyula nde: ‘Keti mbala mingi mono ke yindulaka mbongo mpi bima yina mono lenda sumba kana mono kele ti mbongo? Kana mono me defa mbongo, keti mono ke futaka yo ve nswalu mpi mono ke yindulaka nde muntu yina defaka mono kele ve ti mfunu na yo? Keti mono ke yindulaka nde mono me luta bantu ya nkaka sambu mono kele ti mbongo? Keti yo ke vandilaka mono mpasi na kukabila bantu ya nkaka? Keti mono ke yindulaka nde bampangi yina kele ti mbongo mingi ke zolaka mingi bima ya kinsuni? Keti mono ke taka kinduku kaka ti bamvwama kansi ve ti bansukami?’ Beto kele ti dibaku ya nene ya kuvanda banzenza ya Yehowa. Beto ta landa kaka kuvanda banzenza ya Yehowa kana beto ke sala yonso sambu na kuzola ve mbongo. Kana beto sala mpidina, Yehowa ta yambula beto ve ata fioti.​—Tanga Baebreo 13:5.

YEHOWA KE ZOLAKA BANDUKU NA YANDI

19. Sambu na nki Yehowa ke zola nde beto sala mambu yonso yina kele na Nkunga 15?

¹⁹ Nkunga 15 ke sukisa nde: “Muntu yina ke salaka mambu yai ta nikana ve ata fioti.” (Nk. 15:5) Na verse yai, muyimbi-bankunga ke tendula sambu na nki Yehowa ke zola nde beto sala mambu yonso yina kele na Nkunga 15. Yandi ke zola nde beto vanda na kiese. Yo yina, kana beto ke sala mambu yina Yehowa ke lomba beto, beto ta vanda ti luzingu ya mbote kibeni mpi yandi ta tanina beto.​—Yez. 48:17.

20. Inki banzenza ya Yehowa ke vingila na kiese yonso?

²⁰ Banzenza yina Yehowa ke ndimaka, ke vingila na kiese yonso mambu ya mbote yina ta salama na bilumbu ke kwisa. Bakristu yina bo me tulaka mafuta ya ke sadilaka Yehowa na mutindu ya mbote, ta kwenda kuzinga na ‘bisika mingi ya kuzinga’ yina Yezu me yidikilaka bo na zulu. (Yoa. 14:2) Bakristu yina kele ti kivuvu ya kuzinga na ntoto ke vingila na kiese yonso mambu yina Kusonga 21:3 ke tubaka. Ya kieleka, yo kele dibaku ya nene mutindu Yehowa me bingisaka beto na kuvanda banduku na yandi mpi na kuvanda banzenza na tenta na yandi mvula na mvula.