1. Tũngĩgunĩka atĩa kuumana na Thaburi ya 15:​1-5?

 GĨCUNJĨ-INĨ kĩrĩa kĩhĩtũku, nĩ twerutire atĩ ndungata cia Jehova iria imwĩyamũrĩire no ituĩke ageni hema-inĩ yake ya mũhaano na njĩra ya gũkũria ũrata wa hakuhĩ hamwe nake. No tũngĩka atĩa nĩguo tũgĩe na ũrata ta ũcio? Thaburi ya 15 nĩ yonanĩtie ũrĩa tũngĩka. (Thoma Thaburi 15:​1-5.) Thaburi ĩyo nĩ ĩtwĩrĩte ũrĩa tũrabatara gwĩka nĩguo tũkuhĩrĩrie Ngai makĩria.

2. Nĩ kĩĩ hihi gĩatũmire Daudi arie ũhoro wĩgiĩ hema ya Jehova?

² Thaburi ya 15 yambagĩrĩria na ciũria ici: “Atĩrĩrĩ Jehova, nũũ ũngĩtuĩka mũgeni hema-inĩ yaku? Nũũ ũngĩtũũra kĩrĩma-inĩ gĩaku kĩamũre?” (Thab. 15:1) No kũhoteke Daudi akĩgweta ũhoro wĩgiĩ “hema” ya Jehova, eeciragia ũhoro wa gĩikaro kĩrĩa kĩamũre kĩrĩa kĩarĩ itũũra-inĩ rĩa Gibeoni kwa ihinda. Ningĩ Daudi akĩgweta ũhoro wĩgiĩ ‘kĩrĩma kĩamũre’ kĩa Ngai, no kũhoteke aaragia ũhoro wĩgiĩ Kĩrĩma gĩa Zayuni kĩrĩa kĩarĩ Jerusalemu. Kĩrĩma-inĩ kĩu kĩrĩa kĩarĩ kilomita cigana ũna mwena wa mũhuro wa Gibeoni, nĩho Daudi aambĩte hema ya kũiga ithandũkũ rĩa kĩrĩkanĩro o nginya rĩrĩa hekarũ ĩngĩakirũo.—2 Sam. 6:17.

3. Nĩkĩ nĩ ũndũ wa bata gũtaũkĩrũo nĩ Thaburi ya 15? (Ningĩ rora mbica.)

³ Ma nĩ atĩ, Aisiraeli aingĩ matietĩkĩrĩtio gũtungata gĩikaro-inĩ kĩrĩa kĩamũre, na no andũ anini tu maaingĩraga hema-inĩ ĩrĩa ithandũkũ rĩa kĩrĩkanĩro rĩaigĩtwo. No ndungata ciothe cia Jehova nĩ ingĩatuĩkire ageni hema-inĩ yake ya mũhaano na njĩra ya gũtuĩka arata ake na gũtũũria ũrata ũcio. Ithuothe  no twende kũgĩa na mweke ũcio. Thaburi ya 15 nĩ ĩgwetete ngumo imwe tũrabatara gũkũria nĩguo tũtũũre tũrĩ arata a Jehova.

THIAGA ŨTARĨ NA ŨCUKE NA WĨKAGE MAŨNDŨ MARĨA MAGĨRĨIRE

4. Nĩ kĩĩ kĩngĩtũma tuuge atĩ harĩ ũndũ ũngĩ Jehova erĩgagĩrĩra twĩke makĩria ma kũbatithio? (Isaia 48:1)

⁴ Thaburi 15:2 yonanagia mũrata wa Ngai nĩ “ũrĩa ũthiaga atarĩ na ũcuke” na “wĩkaga maũndũ marĩa magĩrĩire.” Ciugo “ũthiaga” na “wĩkaga” ironania ũndũ wa gũthiĩ mbere. No hihi no tũhote ‘gũthiaga tũtarĩ na ũcuke’? Ĩĩ. O na gũtuĩka gũtirĩ mũndũ mũkinyanĩru, maitho-inĩ ma Jehova no tũkorũo ‘tũgĩthiĩ tũtarĩ na ũcuke’ tũngĩĩrutanagĩria ũrĩa wothe tũngĩhota kũmwathĩkĩra. Kwĩyamũrĩra Ngai na kũbatithio nĩ ikinya rĩa bata, ĩndĩ kĩu no kĩambĩrĩria gĩa gũtwarana na Ngai. Kwa ngerekano, mahinda-inĩ ma Bibilia, gũkorũo mũndũ arĩ wa rũrĩrĩ rwa Isiraeli tokuo tu kuoonanagia atĩ nĩ aragĩrĩra gũtuĩka mũrata wa Jehova, tondũ kũrĩ amwe maamũkayagĩra no ti “na ũhoro wa ma na ũthingu.” (Thoma Isaia 48:1.) No nginya Mũisiraeli angĩerutanĩirie kũmenya ithimi cia Jehova na gũcirũmĩrĩra nĩgetha atuĩke mũrata wake. O na ithuĩ nĩguo twĩtĩkĩrĩke nĩ Ngai, harĩ ũndũ ũngĩ ũrabatarania makĩria ma kũbatithio na kũnyitanĩra na kĩũngano gĩa Gĩkristiano. No mũhaka tũthiĩ na mbere ‘gwĩkaga maũndũ marĩa magĩrĩire.’ Tũngĩka ũguo atĩa?

5. Gwathĩkĩra Jehova maũndũ-inĩ mothe nĩ kuuga atĩa?

⁵ Maitho-inĩ ma Jehova, ‘gũthiĩ tũtarĩ na ũcuke’ na ‘gwĩkaga maũndũ marĩa magĩrĩire’ nĩ makĩria ma gũthiĩ mĩcemanio tũtegũtĩrĩria Nyũmba-inĩ ya Ũthamaki. (1 Sam. 15:22) No mũhaka twĩrutanĩrie gwathĩkagĩra Ngai maũndũ-inĩ mothe ma ũtũũro witũ, nginya rĩrĩa tũrĩ oiki. (Thim. 3:6; Koh. 12:​13, 14) Tũbatiĩ gwathĩkagĩra Jehova nginya  tũmaũndũ-inĩ tũrĩa tũnini. Tweka ũguo nĩ tũrĩonanagia atĩ nĩ twendete Jehova kuuma ngoro, na ũndũ ũcio nĩ ũrĩtũmaga atwende o na makĩria.—Joh. 14:23; 1 Joh. 5:3.

6. Kũringana na Ahibirania 6:​10-12, nĩ kĩĩ kĩa bata o na makĩria gũkĩra maũndũ mega marĩa twekire ihinda ihĩtũku?

⁶ Jehova nĩ akenagio mũno nĩ maũndũ marĩa twamwĩkĩire mahinda mahĩtũku. No maũndũ macio twekire tene to mo Jehova aroraga nĩguo atwĩtĩkĩrie gũtũũra tũrĩ ageni hema-inĩ yake. Ũndũ ũcio nĩ wonanĩtio wega thĩinĩ wa Ahibirania 6:​10-12. (Thoma.) Jehova ndangĩriganĩrũo nĩ maũndũ mega marĩa twaneka. No ningĩ nĩ endaga tũthiĩ na mbere kũmũtungatĩra na ngoro yothe “o nginya mũthia.” Na ‘twaga gũkua ngoro,’ tũgũtũũra tũrĩ arata ake tene na tene.—Gal. 6:9.

ARAGIA ŨHORO WA MA NGORO-INĨ YAKU

7. Kwaria ũhoro wa ma ngoro-inĩ itũ nĩ kuuga atĩa?

⁷ Nĩgetha mũndũ akorũo arĩ mũgeni hema-inĩ ya Jehova, no mũhaka “[aragie] ũhoro wa ma ngoro-inĩ yake.” (Thab. 15:2) Kwaria ũhoro wa ma ngoro-inĩ itũ to gwĩthema kwaria maheeni. Jehova endaga ciugo na ciĩko citũ ikorũo irĩ cia kwĩhokeka hingo ciothe. (Ahib. 13:18) Na ũndũ ũcio nĩ wa bata “tondũ Jehova nĩ athũire mũndũ ũrĩ wara, no nĩ agĩaga ũrata wa hakuhĩ na arĩa arũngĩrĩru.”—Thim. 3:32.

8. Nĩ ũndũ ũrĩkũ tũbatiĩ gwĩthema?

⁸ Andũ arĩa ‘maragia ũhoro wa ma ngoro-inĩ ciao’ matiĩtuaga atĩ nĩ marathĩkĩra Ngai rĩrĩa marĩ mbere ya andũ, no makoina mawatho make rĩrĩa marĩ oiki. (Isa. 29:13) Nĩ methemaga gũkorũo na wara, tondũ mũndũ ũrĩ na wara no ambĩrĩrie gwĩkĩrĩra nganja mawatho mamwe ma Jehova. (Jak. 1:​5-8) No age gwathĩkĩra Jehova maũndũ-inĩ marĩa arona ta matarĩ ma bata mũno. Na angĩaga kuona maumĩrĩro moru ma kwaga gwathĩka, no athiĩ omĩtie ngoro na njĩra ya kwagarara mawatho mangĩ ma Ngai, nginya ũthathaiya wake ũkorũo ũrĩ wa ũhinga. (Koh. 8:11) No ithuĩ tũngĩenda gũkoragwo tũrĩ ehokeku maũndũ-inĩ mothe.

9. Gwathiire atĩa rĩrĩa Jesu maacemanirie rĩa mbere na Nathanieli, na ũndũ ũcio ũratũruta atĩa? (Ningĩ rora mbica.)

 ⁹ No twĩrute bata wa kwaragia ũhoro wa ma ngoro-inĩ citũ, kuumana na ũrĩa gwekĩkire rĩrĩa Filipu aatwarire mũrata wake Nathanieli kũrĩ Jesu. Jesu aaugire ũũ igũrũ rĩgiĩ Nathanieli o na gũtuĩka ndaacemanĩtie nake mbere ĩyo: “Ta rorai Mũisiraeli kũna ũtarĩ ũhinga.” (Joh. 1:47) Hatarĩ nganja Jesu nĩ aamenyaga atĩ o na arutwo acio angĩ maarĩ ehokeku, no nĩ oonire wĩhokeku wa Nathanieli ũrĩ wa mwanya. O na gũtuĩka Nathanieli aarĩ mũndũ ũtarĩ mũkinyanĩru o ta ithuĩ, ndaarĩ na ũhinga. Aarĩ mwĩhokeku maũndũ-inĩ mothe. Jesu nĩ aakenirio nĩ ũndũ ũcio na akĩgathĩrĩria Nathanieli nĩ ũndũ wa wĩhokeku wake. Na githĩ to tũkene mũno tũngĩigua Jesu akiuga ũndũ ta ũcio igũrũ ritũ?

10. Nĩkĩ nĩ twagĩrĩirũo kwĩmenyerera tũtikahũthĩre rũrĩmĩ rwitũ ũũru? (Jakubu 1:26)

¹⁰ Motaaro maingĩ marĩa magwetetwo thĩinĩ wa Thaburi ya 15 nĩ makonainie na ũrĩa tũbatiĩ kũrũmbũyania na andũ arĩa angĩ. Thaburi 15:3 yonanagia atĩ mũndũ ũrĩa ũnyitĩtwo ũgeni hema-inĩ ya Jehova, “ndacambanagia na rũrĩmĩ rwake, ndekaga mũndũ ũrĩa ũngĩ ũndũ mũũru, na ndacambagia arata ake.” Tũngĩhũthĩra rũrĩmĩ rwitũ ũũru na njĩra ta icio, no tũtuurithie andũ arĩa angĩ, na ũndũ ũcio ũtũme tũũrũo nĩ mweke wa gũkorũo tũrĩ ageni hema-inĩ ya Jehova.—Thoma Jakubu 1:26.

11. Gũcambania nĩ kuuga atĩa, na Mũkristiano ũcambanagia na akarega kwĩrira oyagĩrũo ikinya rĩrĩkũ?

¹¹ Mwandĩki wa Thaburi agweta ĩmwe kwa ĩmwe ũhoro wĩgiĩ gũcambania. Gũcambania nĩ kuuga atĩa? Nĩ gũtheremia ndeto itarĩ cia ma iria ingĩthũkĩria mũndũ rĩĩtwa. Mũkristiano ũracambania na akarega kwĩrira, nĩ eheragio kĩũngano-inĩ.—Jer. 17:10.

12-13. Nĩ maũndũ-inĩ ta marĩkũ tũngĩĩkora tũgĩcambia arata aitũ tũtekũmenya? (Ningĩ rora mbica.)

¹² Ningĩ Thaburi 15:3 nĩ ĩratũririkania atĩ mũrata wa Jehova ndekaga mũndũ ũrĩa ũngĩ  ũndũ mũũru na ndacambagia arata ake. Ũguo nĩ kuuga atĩa?

¹³ No twĩkore tũgĩthũkĩria mũndũ rĩĩtwa tũtekũmenya na njĩra ya gũtheremia ndeto itarĩ njega imwĩgiĩ. Ta wĩcirie ngerekano ici: (1) mwarĩ wa Ithe witũ agatiga ũtungata wa mahinda mothe, (2) mũrũ wa Ithe witũ na mũtumia wake magatiga gũtungata Betheli, kana (3) mũrũ wa Ithe witũ agatiga gũtungata arĩ mũthuri wa kĩũngano kana ndungata ya kĩũngano. Nĩ ũkuona ta arĩ wega kwĩihũrĩria kĩrĩa kĩratũmire mogarũrũku macio mekĩke na ũkambĩrĩria gũtheremia mawoni macio kũrĩ andũ arĩa angĩ? No gũkorũo na itũmi nyingĩ tũtoĩ iria iratũmire kũgĩe na ũgarũrũku ũcio. Ningĩ mũndũ ũnyitĩtwo ũgeni hema-inĩ ya Jehova “ndekaga mũndũ ũrĩa ũngĩ ũndũ mũũru, na ndacambagia arata ake.”

TĨAGA ARĨA METIGĨRĨTE JEHOVA

14. ‘Kũregana na mũndũ o wothe ũnyararĩtwo’ nĩ kuuga atĩa?

¹⁴ Thaburi 15:4 yugaga atĩ mũrata wa Jehova “nĩ aregaga mũndũ o wothe ũnyararĩtwo.” Tũngĩmenya atĩa mũndũ ũrĩa ũnyararĩtwo? Ti ithuĩ tũbatiĩ gwĩtuĩra nũũ ũnyararĩtwo. Nĩkĩ? Nĩ ũndũ wa kwaga gũkinyanĩra, no twĩkore tũgĩtuĩra andũ kũringana na mawoni maitũ, rĩngĩ tũkagucĩrĩrio nĩ andũ amwe nĩ ũndũ wa ngumo ciao njega, no tũkaga kũgucĩrĩrio nĩ arĩa angĩ. Kwoguo tũbatiĩ kũregana na arĩa tu Jehova onaga marĩ a ‘kũnyararũo.’ (1 Kor. 5:11) Andũ amwe ta acio nĩ arĩa mekaga maũndũ moru na makaga kwĩrira, arĩa matatĩĩte wĩtĩkio witũ, kana arĩa mageragia gũthũkia ũrata witũ na Jehova.—Thim. 13:20.

15. Nĩ njĩra ĩrĩkũ ĩmwe tũngĩonania nayo atĩ nĩ tũtĩĩte “arĩa metigĩrĩte Jehova”?

¹⁵ Ũndũ ũngĩ Thaburi 15:4 ĩgwetete, nĩ atĩ nĩ tũbatiĩ gũtĩaga “arĩa metigĩrĩte Jehova.” Kwoguo nĩ tũcaragia njĩra cia kuonia arata a Jehova ũtugi na gĩtĩo. (Rom. 12:10) Njĩra ĩmwe nĩ ta ĩrĩkũ? Kũringana na Thaburi 15:​4, mũndũ ũrĩa ũnyitĩtwo ũgeni hema-inĩ ya Jehova “ndagaga kũhingia ũndũ ũrĩa eranĩire, o na angĩkorũo gwĩka ũguo nĩ gũgũtũma one ũũru.” Rĩrĩa twaga kũhingia ciĩranĩro citũ nĩ tũtuurithagia arĩa angĩ. (Mat. 5:37) Kwa ngerekano, Jehova erĩgagĩrĩra mũthuri na mũtumia wake mahingie mwĩhĩtwa wao wa kĩhiko. Ningĩ nĩ akenaga rĩrĩa aciari merutanĩria kũhingia maũndũ marĩa merĩire ciana ciao. Kwenda Ngai na kwenda andũ nĩ kũrĩtũtindĩkaga gwĩka ũrĩa wothe tũngĩhota nĩguo tũhingie maũndũ marĩa twĩranĩire.

16. Nĩ njĩra ĩrĩkũ ĩngĩ tũngĩonania nayo atĩ nĩ tũtĩĩte arata a Jehova?

¹⁶ Njĩra ĩngĩ ya kuonia arata a Ngai gĩtĩo nĩ gũkorũo tũrĩ anyitani ũgeni na tũrĩ ataana. (Rom. 12:13) Tũngĩkoragwo na mahinda ma gwĩkenia hamwe na aarĩ na ariũ a Ithe witũ, nĩ tũrĩkĩraga hinya ũrata witũ nao o hamwe na Jehova. Ningĩ rĩrĩa twanyitana ũgeni, tũkoragwo tũkĩĩgerekania na Jehova.

WĨTHEME KWENDA MBECA

17. Nĩ kĩĩ gĩtũmĩte Thaburi ya 15 yarĩrĩrie ũhoro wĩgiĩ mbeca?

¹⁷ Ningĩ mũrata wa Jehova aratuĩka atĩ “ndakombithanagia mbeca ciake nĩguo one maciaro, na ndamũkagĩra ihaki nĩguo ahinyĩrĩrie mũndũ ũtarĩ na mahĩtia.” (Thab. 15:5) Nĩ kĩĩ gĩtũmĩte Thaburi ĩyo ĩgwete ũhoro wĩgiĩ mbeca? Tondũ tũngĩkorũo tũtarĩ na mawoni maigananĩru megiĩ mbeca, no tũtuurithie arĩa angĩ na tũthũkie ũrata witũ hamwe na Ngai. (1 Tim. 6:10) Mahinda-inĩ ma Bibilia, andũ amwe nĩ maahinyagĩrĩria arĩa maarĩ athĩni na njĩra ya kũmetia maciaro ma mbeca iria mamakombithĩtie. Ningĩ atuanĩri ciira  amwe nĩ maamũkagĩra mahaki na makogomia ciira wa mũndũ ũtarĩ na mahĩtia. Jehova nĩ athũire mũno ciĩko ta icio.—Ezek. 22:12.

18. Nĩ ciũria irĩkũ ingĩtũteithia gũthuthuria mawoni maitũ megiĩ mbeca? (Ahibirania 13:5)

¹⁸ Nĩ wega gũthuthuria mawoni maitũ megiĩ mbeca. No wĩyũrie ũũ: ‘Hihi kaingĩ nĩ ndĩkoraga ngĩciria ũhoro wĩgiĩ mbeca na kĩrĩa ingĩhota kũgũra? Ingĩkomba mbeca-rĩ, hihi nĩ hũthagĩrĩria kũrĩha ngĩciria atĩ mũndũ ũcio ũngombithĩtie ndaracibatara? Hihi gũkorũo na mbeca nĩ gũtũmaga ndĩyone ndĩ wa bata ĩndĩ ngaritũhĩrũo kuonania ũtaana? Hihi nĩ nyonaga ta aarĩ na ariũ a Ithe witũ mendete indo cia kĩĩmwĩrĩ atĩ tondũ tu nĩ atongu? Hihi nyendaga kũgĩa ũrata na andũ arĩa atongu no ngaga gũtindanĩra na arĩa athĩni?’ Nĩ ũndũ wa bata kwĩyũria ciũria icio, tondũ nĩ tũheetwo mweke wa mwanya wa gũkorũo tũrĩ ageni a Jehova. No tũtũũrie mweke ũcio na njĩra ya gwĩthema kwenda mbeca. Tweka ũguo, Jehova ndarĩ hĩndĩ agaatũtiganĩria.—Thoma Ahibirania 13:5.

JEHOVA NĨ ENDETE ARATA AKE

19. Jehova endaga twathĩkĩre maũndũ marĩa magwetetwo thĩinĩ wa Thaburi ya 15 nĩkĩ?

¹⁹ Thaburi ya 15 ĩrĩkagĩrĩria na kĩĩranĩro gĩkĩ: “Mũndũ ũrĩa wĩkaga ũguo ndarĩ hĩndĩ akenyenyeka.” (Thab. 15:5) Mũhari ũcio nĩ ũronania kĩrĩa gĩtũmaga Jehova ende twathĩkĩre maũndũ macio magwetetwo thĩinĩ wa Thaburi ĩyo. Endaga tũkorũo na gĩkeno. Kwoguo rĩrĩa twathĩkĩra Jehova nĩ tũgĩaga na ũtũũro mwega na agatũgitĩra.—Isa. 48:17.

20. Nĩ irathimo irĩkũ arata a Jehova merĩgagĩrĩra?

²⁰ Arata a Jehova marĩ na kĩĩrĩgĩrĩro kĩega kĩa ihinda rĩũkĩte. Arĩa aitĩrĩrie maguta marĩ na mweke wa gũgathiĩ kũrĩa igũrũ, kũrĩa Jesu amahaarĩrĩirie “ciikaro nyingĩ.” (Joh. 14:2) Nao arĩa marĩ na kĩĩrĩgĩrĩro gĩa gũgaatũũra gũkũ thĩ, nĩ merĩgagĩrĩra gũkoona ciĩranĩro iria irĩ thĩinĩ wa Kũguũrĩrio 21:3 ikĩhinga. Hatarĩ nganja, ithuothe tũrĩ na mweke wa mwanya wa kũnyitwo ũgeni nĩ Jehova tũtũũre hema-inĩ yake tene na tene!