1. Ongahelipi Epsalme 15:​1-5 tali dulu oku tu kwafela?

 MOSHITUKULWA sha tetekela, otwe lihonga kutya ovapiya vaJehova, ovo ve mu liyapulila, otava dulu okukala ovaenda metwali laye lopafaneko mokukala noukaume wopofingo naye. Ndele oshike twa pumbwa okuninga, opo tu kale ovaenda vaye? Epsalme 15 otali tu kwafele moshinima osho. (Lesha Epsalme 15:​1-5.) Epsalme olo ola yandja eenghedi tadi longo odo tadi dulu oku tu kwafela tu ehene popepi naKalunga.

2. Omupsalme David otashi dulika a li ta diladila shike, eshi a tumbula etwali laJehova?

² Epsalme 15 ola hovela nomapulo taa ti: “Omwene, olyelye ta itavelelwa okukala monduda yoye? Olyelye ta itavelelwa okukala komhunda yoye iyapuki?” (Eps. 15:1) Omupsalme David eshi a tumbula ‘onduda,’ ile tu tye etwali laJehova, otashi dulika a li e na momadiladilo etwalihangano, olo la li muGibeon pefimbo opo. David okwa tumbula yo ‘omhunda iyapuki’ yaKalunga, tashi dulika a li ta ulike komhunda Sion oyo i li muJerusalem. Oule weekilometa donhumba, kolukadi laGibeon, oko David a li a dika etwali omo mwa li tamu ka kala oshikefa shehangano, ofimbo kwa li kwa teelelika otembeli i tungwe. — 2 Sam. 6:17.

3. Omolwashike twa pumbwa okuuda ko Epsalme 15? (Tala yo efano.)

³ Ovaisrael vahapu kava li va pitikwa okulonga metwali laJehova, unene tuu metwalihangano, omo mwa li mu na oshikefa shehangano. Ashike ovapiya vaJehova aveshe ovadiinini otava dulu okukala ovaenda metwali laye lopafaneko, ngeenge ova twikile okukala ookaume kaye. Atushe otwa hala okukala ookaume kaye. Epsalme 15 ola divilika omaukwatya amwe oo  twa pumbwa okukulika, opo tu twikile okukala ookaume kaJehova.

TWIKILA OKWEENDA WA YUKILILA NOKULONGA OUYUKI

4. Otu shi shii ngahelipi kutya Jehova ina teelela ashike tu kale twa ninginifwa, opo tu kale ovaenda vaye? (Jesaja 48:1)

⁴ Epsalme 15:2 ola yelifa kutya kaume kaKalunga oye ‘ou ha ende a yukilila noha longo ouyuki.’ Outumbulilo ‘okweenda’ nosho yo ‘okulonga’ otau ulike kokuninga oshinima pandjikilile. Ndele mbela ohatu dulu ngoo ‘okweenda twa yukilila’? Heeno. Molwaashi inatu wanenena, Jehova ote ke tu tala ko hatu ‘ende twa yukilila,’ ngeenge ohatu kendabala ngaashi hatu dulu, opo tu dulike kuye. Okuliyapulila Kalunga nokuninginifwa, oku li ashike ehovelo molweendo letu naKalunga. Pefimbo Ombiibeli ya li tai shangwa, didilika kutya okukala Omuisrael hasho sha li tashi ufa kutya omunhu oku li metwali laJehova. Vamwe ova li have mu longele, ashike ‘hamoshili nomouyuki.’ (Lesha Jesaja 48:​1, KB 13.) Opo Omuisrael a kale a hokiwa kuJehova, okwa li a pumbwa okushiiva oiteelelwa yaye nokukala metwokumwe nayo. Sha faafana nokunena, opo tu kale twa hokiwa kuJehova, otwa pumbwa okuninga shihapu shihe fi ashike okuninginifwa nokukala hatu endafana neongalo lopaKriste. Otu na okutwikila ‘okulonga ouyuki.’ Ongahelipi hatu dulu okuninga ngaho?

5. Okukala hatu dulika kuJehova moinima aishe osha kwatela mo shike?

⁵ Pataleko laJehova, ‘okweenda twa yukilila’ nosho yo ‘okulonga ouyuki’ osha kwatela mo shihapu shihe fi ashike okukala hatu i kokwoongala pandjikilile. (1 Sam. 15:22) Otwa pumbwa okulonga noudiinini, opo tu dulike kuye mwaashishe osho hatu ningi, nonande otu li ofye atuke. (Omayel. 3:6; Omuud. 12:​13, 14) Osha fimana yo okukala hatu dulika  kuJehova, nokuli nomoinima oyo inini. Ngeenge otwa ningi ngaho, ohatu ka ulika kutya otu mu hole shili, notashi ke mu linyengifa yo a kale e tu hole unene. — Joh. 14:23; 1 Joh. 5:3.

6. Metwokumwe nOvaheberi 6:​10-12, oshike sha fimanenena shi dulife ouwa oo twa longa monakudiwa?

⁶ Jehova okwa lenga oinima iwa oyo twe mu longela monakudiwa. Ashike osho inashi hala okutya ohatu ka twikila okukala ovaenda metwali laye, molwaashi ashike twa longa ouwa monakudiwa. Ovaheberi 6:​10-12 ova yelifa nawa oshinima osho. (Lesha.) Jehova iha dimbwa ouwa oo twe mu longela monakudiwa. Ashike okwa hala tu twikile oku mu longela nomutima aushe “fiyo okexulilo.” Ota ka kala kaume ketu fiyo alushe, “ngeenge inatu loloka.” — Gal. 6:9.

KALA HO POPI OSHILI MOMUTIMA WOYE

7. Osha kwatela mo shike okukala omunashili?

⁷ Keshe oo a hala okukala metwali laJehova, oku na okukala ha “popi oshili momutima waye.” (Eps. 15:​2, KB-13) Osho osha kwatela mo shihapu, shihe fi ashike okupopya oipupulu. Jehova okwa hala tu kale ovanashili mwaasho hatu popi naasho hatu ningi. (Heb. 13:18) Osho osha fimana, molwaashi Ombiibeli oya ti kutya “omupukifi oye oixuna kOmwene, ndelenee Ye omushiiviki wovayuki.” — Omayel. 3:​32, KB-13.

8. Elihumbato lilipi twa pumbwa okuhenuka?

⁸ Ovo hava ‘popi oshili momutima,’ ihave liningifa va fa hava dulika, ngeenge ve li povanhu, ofimbo hava tauluka eemhango daKalunga meholeko. (Jes. 29:13) Ohava henuka okukala ovanaihelele. Omunhu omunaihelele otashi dulika a kale a limbililwa oiteelelwa yaJehova imwe. (Jak. 1:​5-8) Otashi dulika aha dulike kuJehova moinima oyo e wete inai fimana kuye. Nongeenge okwa mono kutya okuhadulika kwaye inaku mu etela oilanduliko ii, otashi dulika a naipale mokulonga owii. Ashike nonande ota diladila kutya ota longele Kalunga, Jehova ita kala e mu hokwa. (Omuud. 8:11) Fye otwa hala okukala ovanashili moinima aishe.

9. Oshike hatu lihongo koshimoniwa shaJesus, eshi a shakena oshikando shotete naNatanael? (Tala yo efano.)

 ⁹ Jesus okwe tu tulila po oshihopaenenwa shiwa shi na sha nokukala ovanashili, eshi a li a shakena naNatanael oshikando shaye shotete. Eshi Filippus a li a eta kaume kaye Natanael kuJesus, opa li pa ningwa oshinima shi didilikwedi. Nonande Jesus ka li a shakena nale naNatanael, Jesus okwa li a popya a ti: “Taleni Omuisrael washili ehe na oukengeleledi washa.” (Joh. 1:47) Oshoshili kutya Jesus okwa li a tala ko ovahongwa vaye ve li ovanashili, ashike okwa li a mona sha shididilikwedi muNatanael. Natanael ka li a wanenena, ngaashi ashike fye, ashike ka li omunaihelele, ndele okwa li omunashili mwaaishe. Jesus okwa li a lenga nokupandula Natanael omolwounashili waye. Nafye otwa hala Jesus a kale e tu uditile ngaho!

10. Omolwashike tu na okuhenuka okulongifa nai elaka letu? (Jakob 1:26)

¹⁰ Ihapu yomoiteelelwa oyo ya tumbulwa mEpsalme 15 oi na sha nanghee hatu ungaunga navamwe. Epsalme 15:3 ola popya kutya oo e li metwali laJehova ke na okukala ha “popyaana nelaka laye noita ningile omukwao owii, nomushiinda waye ite mu fifa ohoni.” Ngeenge otwa kala hatu longifa nai elaka letu, otashi dulu okuyahameka vamwe, noku tu ningifa tuha kale vali ovaenda metwali laJehova. — Lesha Jakob 1:26.

11. Okulundila umwe osha hala okutya shike, noshike hashi ningilwa oo ina hala okweefa po okulundila vamwe?

¹¹ Omupsalme okwa popya kondadalunde oshitya okulundila. Osha hala okutya shike okulundila? Osha hala okutya okupopya oinima ihe li paushili kombinga yaumwe nelalakano lokunyona po edina laye liwa. Ovo inava hala okweefa po oikala yokulundila vamwe ohava kondwa mo meongalo lopaKriste. — Jer. 17:10.

12-13. Omeenghalo dilipi tashi dulika tu fife vamwe ohoni inatu shi nongela? (Tala yo efano.)

¹² Epsalme 15:3 otali tu dimbulukifa yo kutya  ovaenda vaJehova ihava ningile vakwao owii, ile ve va fife ohoni. Ongahelipi tashi dulika tu fife umwe ohoni?

¹³ Otashi dulika tu fife umwe ohoni inatu shi nongela mokwaandjakaneka ouyelele u na sha naye. Natu ka tale koihopaenenwa tai shikula: (1) omumwameme a efa po okukokola ondjila, (2) ovalihomboli ihava longo vali koBetel, ile (3) omumwatate ehe fi vali omukulunhuongalo, ile omuyakuliongalo. Mbela otashi ka kala ngoo pandunge okulombwela vamwe kutya omolwashike osho she va ningilwa? Otashi dulika pe na omatomheno mahapu, oo tuhe shii kutya omolwashike osho sha ningwa. Shikwao vali, oo e li metwali laJehova ke na okuningila “omukwao owii, nomushiinda waye ite mu fifa ohoni.”

FIMANEKA OVO HAVA TILA JEHOVA

14. Osha hala okutya shike okuhenuka ‘okweendafana naavo ve na eenghedi dii’?

¹⁴ Epsalme 15:4 ola popya kutya kaume kaJehova “iha endafana naavo ve na eenghedi dii.” Ongahelipi hatu dulu okudidilika mo kutya omunhu oku na eenghedi dii? Tu li ovanhu inatu wanenena, ohashi kala shidjuu okudidilika ngeenge omunhu oku na eenghedi dii. Omolwashike? Omolwaashi otashi dulika tu nanenwe kuumwe omolwomaukwatya aye, nokukala hatu ningilwa nai kuvamwe. Onghee otu na okuhenuka okweendafana novanhu ovo Jehova a tala ko ve na “eenghedi dii.” (1 Kor. 5:11) Osho osha kwatela mo ovo inava fimaneka eitavelo letu, ile hava kendabala okunyona po ekwatafano letu naJehova. — Omayel. 13:20.

15. Onghedi imwe ilipi hatu dulu okuulika kutya otwa fimaneka ovo “hava tila Kalunga”?

¹⁵ Epsalme 15:4 ola popya kutya otu na okufimaneka ovo “hava tila Kalunga.” Onghee ohatu kongo eenghedi omo hatu dulu okukenukila ookaume kaJehova noku va fimaneka. (Rom. 12:10) Ngahelipi mbela? Epsalme 15:4 ola popya yo kutya nonande oo e li metwali laJehova okwa “anene oshiponga shaye, eano laye ite li lundulula.” Ngeenge otwa dopa okuwanifa po omaudaneko etu, otashi dulu okuyahameka vamwe. (Mat. 5:37) Pashihopaenenwa, Jehova okwa teelela ovaenda vaye va kale metwokumwe neano lavo li na sha nohombo. Oha kala yo a hafa, ngeenge ovadali tava wanifa po omaudaneko oo va ningila ovana. Ohatu ulike kutya otu hole Kalunga nosho yo ovanhu vakwetu, ngeenge hatu wanifa po omaudaneko etu.

16. Omonghedi vali imwe ilipi hatu dulu okuulika kutya otwa fimaneka ookaume kaJehova?

¹⁶ Onghedi imwe vali omo hatu dulu okuulika kutya otwa fimaneka ookaume kaKalunga, omokukala hatu yakula vamwe nohatu yandje. (Rom. 12:13) Okukala efimbo novamwatate novamwameme ohashi tu kwafele tu pameke oukaume wetu navo nosho yo naJehova. Shikwao vali, ngeenge ohatu yakula vamwe, kungaho ohatu hopaenene Jehova.

INATU KALA TU HOLE OIMALIWA

17. Omolwashike Epsalme 15 la kundafana shi na sha noimaliwa?

¹⁷ Ombiibeli oya popya kutya oo e li metwali laJehova ‘iha yandje oimaliwa yaye a pewe oishoshela, ye ita tambula ombubo nokati kokeenyala.’ (Eps. 15:​5, KB-13) Omolwashike Epsalme la kundafana shi na sha noimaliwa? Omolwaashi okukala netaleko lihe li pandjele li na sha noimaliwa, otashi dulu okuyahameka vamwe nokunyona po ekwatafano letu naKalunga. (1 Tim. 6:10) Pefimbo Ombiibeli ya li tai shangwa, vamwe ova li hava ungaunga nai novamwaxe ovo va hepa, moku va pula oishoshela, ngeenge ve va kwafela oimaliwa. Shikwao vali, ovapanguli vamwe ova  li hava tambula ombubo nokutokola ovanhu ovo vehe na ondjo shihe li pauyuki. Jehova oku tonde oinima ya tya ngaho. — Hes. 22:12.

18. Omapulo elipi taa dulu oku tu kwafela tu shiive kutya otu na etaleko la tya ngahelipi li na sha noimaliwa? (Ovaheberi 13:5)

¹⁸ Osha fimana okulikonakona, opo tu mone kutya otu na etaleko la tya ngahelipi li na sha noimaliwa. Lipula kutya: ‘Mbela luhapu ohandi lihange handi diladila kombinga yoimaliwa nosho yo osho handi dulu okulanda nayo? Ngeenge nda indila oimaliwa, mbela ohandi ongaonga oku i shunifa, molwaashi handi diladila kutya oo e i kwafela nge ine i pumbwa? Mbela ngeenge ndi na oimaliwa ohashi ningifa nge ndi kale ndi udite kutya onda fimana noihandi kala nda hala okuyandja? Mbela ohandi diladila kutya, ngeenge ovamwatate novamwameme ove na oimaliwa ihapu kave hole Jehova? Mbela ohandi pange ashike oukaume naavo va punapala nokuhenuka ovo va hepa?’ Osha fimana okulipula omapulo oo, molwaashi otwa shivwa tu ninge ovaenda vaJehova. Ohatu ka twikila okukala ovaenda vaJehova, ngeenge otwa henuka okukala tu hole oimaliwa. Ngeenge otwa ningi ngaho, Jehova ota ka kala pamwe nafye! — Lesha Ovaheberi 13:5.

JEHOVA OKU HOLE OOKAUME KAYE

19. Omolwashike Jehova a hala tu wanife po oinima aishe oyo ya tumbulwa mEpsalme 15?

¹⁹ Epsalme 15 ola xula neudaneko tali ti: “Ou ta yukilile nawa ngaha, ye ita pundauka fiyo alushe.” (Eps. 15:​5, KB-13) Omupsalme okwa yelifa kutya omolwashike Kalunga a hala tu wanife po oinima aishe oyo ya tumbulwa mEpsalme. Jehova okwa hala tu kale twa hafa. Nomolwaasho e tu pa ewiliko olo tali tu etele omanangeko noupuna noku tu amena. — Jes. 48:17.

20. Ovaenda vaJehova ova teelela nodjuulufi shike?

²⁰ Ovaenda vaJehova ove na eteelelo li na sha nonakwiiwa itunhula. Ovavaekwa ovadiinini otava ka pewa “eenhele dihapu,” odo Jesus e va longekidila meulu. (Joh. 14:2) Ovo ve na eteelelo loku ka kala nomwenyo kombada yedu ova teelela oku ka wanifilwa Ehololo 21:3. Oshi li oufembanghenda munene kufye, eshi twa shivwa okukala ovaenda metwali laJehova fiyo alushe.