1. Tussiaat 15:1-5 qanoq iluaqutigisin­naavagut?

 ALLAASERISAP matuma siuliani paasivarput Jehovap kiffai tunniul­luinnarsimasut taassumunngalu qanimut ikinngutaajuartut tupiani assersuutaasumiittut. Tassaniit­tuarumalluta susariaqarpugut? Tamanna Tussiaat 15-imi nassuiar­neqarpoq. (Tussiaat 15:1-5 atuakkit). Tussiaammi tamatumani siunnersuutigineqartut Guutimut qaninneruler­nissatsinnut iluaqutigingaarsin­naavagut.

2. Daavip Jehovap tupia eqqaagamiuk suna pigunarpaa?

² Tussiaat 15 ima aallartippoq: “Naalagaq, kinaava tupinni tikeraajusinnaasoq, qaqqanni illernartumi inissarsisinnaasoq?” (Tuss 15:1) Daavip Jehovap ‘tupia’ eqqaagamiuk Tupeq Naapeqatigiittarfik Gibeonimiittoq pigunarpaa. Daavip aamma Guutip ‘qaqqaa illernartoq’ eqqaavaa. Immaqa qaqqaq Zioni Gibeonimiit kilometerinik arlalinnik ungasitsigisumi Jerusalem­mimiittoq pivaa. Tassani Daavip tupeq napparpaa angerutsillu illerfia inissillugu. Angerutsip illerfia tassaniippoq Jerusalemmimi guutisiorfiup sananeqarnerata tungaanut. – Sam 2. 6:17.

3. Sooq Tussiaat 15 soqutigis­savarput? (Aamma asseq takuuk).

³ Israalikkut amerlanersaat Tupermi Naapeqatigiit­tarfimmi kiffartun­ngisaannarput, ikittuinnaallu tupermut angerutsip illerfiata inissisimaffianut isersin­naapput. Jehovalli kiffai aalajaatsut tamarmik taassumunnga ikinngutaajualer­nermikkut tupiani assersuutaasumiis­sinnaapput. Tamatta tassaniik­kusuppugut. Tussiaat 15-imi Jehovamut ikinngutaajuas­sagutta ineriar­tortittariaqakkatta ilaat eqqaaneqarput.

 ‘ASSUARNAALLUTIT INUUGIT INNARLUITSUMILLU ILIORTARLUTIT’

4. Qanoq nalunngilarput Jehovap imermut morsutsitaaneq kisiat piumasaqaatigin­ngikkaa? (Esaja 48:1)

⁴ Tussiaat 15:2 naapertorlugu Guutimut ikinngutaasoq tassaavoq “assuarnaalluni inuusoq, innarluitsumik iliortoq”. Inuuneq naallugu taamaat­tuusariaqarpugut. Kisianni ilumut ‘assuarnaatsuusin­naavugut’? Aap. Kukkusaraluarluta sapinngisatsinnik Jehova naalattuarutsigu taassuma ‘assuarnaatsutut’, tassa aalajaatsutut, isigissavaatigut. Guutimut tunniul­luinnarnerput imermullu morsutsitaanerput Guutimut ikinngutaaler­nitsinnut aallarniutaaginnarput. Assersuutigalugu Biibilip nalaani inuk Israalik­kuugaluartoq imaanngilaq aamma Jehovap tupianiis­sinnaasoq. Israalikkut ilaasa Guuti torlorfigisarpaat, ‘kisianni peqqusersuitsumik ilumoor­tumillu pinatik’. (Esaja 48:1 atuaruk). Israalikkut pimoorus­sinertik ersersin­niarlugu Jehovap piumasaqaatai paasisariaqarpaat maleruar­tariaqarlugillu. Tamatumunnga assingusumik nalitsinni Guutimit iluarisaas­sagutta imermut morsutsitaaneq ataatsimiigiar­tarnerlu naamman­ngillat. ‘Innarluitsumik iliortariaqarpugut.’ Tamannali qanoq paasisariaqarpa?

5. Jehova qanoq sutigut tamatigut naalassin­naavarput?

⁵ Jehovap isaani ‘assuarnaassuseq’ aamma ‘innarluitsumik iliortarneq’ tassaagin­nanngilaq Guutisioriar­tortarneq. (Sam 1. 15:22) Sutigut tamatigut Guuti sapinngisatsinnik naalattariaqarparput – aamma kisimiik­kaangatta. (Uss 3:6; Oqal 12:13, 14) Aamma soqutaan­ngippasittunut tunngatillugu Jehovamut naalattar­nissarput pingaaruteqarpoq. Taamaalior­tarnitsigut takutit­tarparput Jehova ilumut asallutigu, taassumalu asanerulis­savaatigut. – Joh 14:23; Joh 1. 5:3.

6. Hebræerit 6:10-12 naapertorlugit siornatigut ajunngitsuliorsimanitsinnit suna pingaaruteqarnerua?

 ⁶ Jehovap siornatigut imminik pilluni iliuuserisimasagut pingaar­tingaarpai. Siornatigulli ajunngitsulior­tarsimanerput Jehovap tupianiit­tuarnis­satsinnut aalajangiisuunngilaq. Tamanna paasisin­naavarput atuarutsigit Hebræerit 6:10-12. (Atuakkit.) Jehovap siornatigut ajunngitsuliarisimasagut puiornavianngilai. Kissaatigaali ‘naggatissaq tikillugu’ uummaterput tamakkerlugu kiffartorfigis­sagitsinni. ‘Ajunngitsuliorneq qatsutin­ngikkutsigu’ naassaan­ngitsumik ikinngutigiumaarpaatigut. – Gal 6:9.

‘ILUMOORTUMIK UUMMAMMIT PISUMIK OQALUTTARIT’

7. Ilumoortumik uummammit pisumik oqalunneq qanoq paasisariaqarpa?

⁷ Jehovap tupianiik­kusuttoq kinaluunniit ‘ilumoortumik uummammit pisumik oqaluttariaqarpoq’. (Tuss 15:2) Tassani pineqaan­nanngilaq salluneq ajortoq. Jehovap kissaatigaa sutigut tamatigut unneqqaris­suussasugut. (Hebr 13:18) Tamanna pingaaruteqarpoq, “Jehovami sianiinaariniar­tartumik iluarin­ninngil­luinnarpoq, unneqqaris­sunulli ikinngutaal­luarpoq.” – Uss 3:32, NW.

8. Sunaveersaar­tariaqarpugut?

⁸ Inuk taamaallaat allanit isigineqaraangami Guutimut naalattartoq kisimiik­kaangamili naalakkun­naartartoq tassaanngilaq ‘ilumoortumik uummammit pisumik oqaluttartoq’. (Es 29:13) Tassaavorli inuk sianiinaariniartartoq. Taamaattup immaqa Jehovap inatsisaasa iluaqutaajuarnerat qularilissavaa. (Jaak 1:5-8) Immaqalu pingaaruteqan­ngissorisaminut tunngatillugu Jehova naalakkun­naarpaa. Taavalu naalannginnermi kingunipilui ingerlaannaq misigin­ngikkunigit ajornerusumik iliortalersinnaavoq. Guutimut kiffartorsorigaluartoq Jehovap tamanna iluarinngilaa. (Oqal 8:11) Uagulli sutigut tamatigut unneqqaris­soorusuppugut.

9. Jiisusip Nataanialimik naapitseq­qaarnera qanoq ilinniarfigisin­naavarput? (Aamma asseq takuuk).

⁹ Qamannga pisumik unneqqarissuuneq pingaaruteqarpoq. Tamanna Jiisusip Nataanialimut  oqaasiinit erserpoq. Fiilippip ikinngutini Nataaniali Jiisusimut ilisaritimmagu Jiisusip Nataaniali ima oqarfigaa: “Aajinnga Israalikkuusoq unneqqarissoq.” (Joh 1:47) Jiisusip nalunngilaa ilinniartitani tamarmik unneqqarissuusut, maluginiarpaali Nataaniali immikkuul­larissumik unneqqarissuusoq. Nataaniali uagutsitulli ajortiliuvoq, ilumoor­tuusaarnanili unneqqaril­luinnartuuvoq. Jiisusip tamanna iluarigamiuk tamanna pillugu Nataaniali nersualaarpaa. Soorunami tamatta kissaatigaarput Jiisusi uagut pilluta taamatut oqaaseqassasoq.

10. Qanoq oqalunnerluta sooq mianersuutigis­savarput? (Jaaku 1:26)

¹⁰ Piumasaqaatit Tussiaat 15-imi allassimasut amerlanerit allanik pinnittar­nitsinnut tunngapput. Tussiaat 15:3 naapertorlugu Jehovap tuperminut qaaqqusaa tassaavoq “oqaasipalaanik angallas­sinngitsoq, tullimi ajoqutissaanik iliunngitsoq, qaninnerpaasaminik tusagaanerlutsitsin­ngitsoq”. ‘Oqaasipalaanik angallas­sisarutta’ inoqatigut aliasutsis­sinnaavagut Jehovallu tupianiis­sinnaajun­naarluta. – Jaaku 1:26 atuaruk.

11. Oqaasipalaanik angallassineq qanoq paasisariaqarpa, peqqissiminatillu taamaaliortartut qanoq pineqassappat?

¹¹ Oqaasipalaanilli angallassineq qanoq paasisariaqarpa? Tamanna isumaqarpoq oqaatis­suaaneq, tassa inoqammik nikassaalluni salluliuutiginninneq. Peqqissiminatik oqaatis­suaasartut ilagiinnit ilaajun­naarsitaassapput. – Jer 17:10.

12-13. Qaqugukkut ikinnguterput piaarinata tusagaanerlutsit­toorsin­naavarput? (Aamma asseq takuuk).

¹² Tussiaat 15:3 naapertorlugu Jehovap tupianiittoq ‘tullimi ajoqutissaanik iliorneq ajorpoq’, aamma ‘qaninnerpaasaminik tusagaanerlutsitsineq ajorpoq’. Ikinnguterpulli qanoq tusagaanerlutsit­toorsin­naavarput?

¹³ Taanna pillugu nikallor­nartumik oqalunnikkut tusagaanerlutsitsisoorsin­naavugut.  Assersuutit uku eqqarsaatigikkit: (1) qatanngut arnaq piffissaq tamaat kiffartorun­naarpoq, (2) aappariit Betelimi kiffartorun­naarput, aamma (3) qatanngut angut utoqqaaner­taajunnaarpoq ilagiin­niluunniit kiffartor­tuujunnaarluni. Tunngavis­saqarnata taakku ajortuliorsorigutsigit isumarpullu allanut oqaluttuarigutsigu tusaamanerlugaatitsissaagut. Imaassinnaavoq nalusatsinnik allamik pissuteqarlutik kiffartorun­naarsimasut. Eqqaamas­savarput Jehovap tupianiittoq tassaasoq “tullimi ajoqutissaanik iliunngitsoq, qaninnerpaasaminik tusagaanerlutsitsin­ngitsoq”.

JEHOVAMIK MIANERINNITTUT ATAQQIKKIT

14. ‘Guutip ajattugaanik asiginnaaneq’ qanoq paasisariaqarpa?

¹⁴ Tussiaat 15:4 naapertorlugu Jehovap ikinngutaa tassaavoq taassuma “ajattugaanik asiginnaasoq”. Naammal­luinnaan­ngitsuugatta nalilersin­naanngilarput kikkut ‘ajattor­neqassasut’. Sooq? Inuit ilaat nuannarisatsinnik pissuseqarput, allalli isumarput naapertorlugu paamitsannarput. Taamaattumik ‘Guutip ajattugai’ kisiisa ‘asiginnas­savagut’, tassa itigartis­savagut. (Kor 1. 5:11) Taakkua ilagaat peqqissiminatik ajortuliortartut, upperisatsinnik ataqqin­ninngitsut Jehovamullu ikinngutaanitsinnik ajoqusiiniartut. – Uss 13:20.

15. Jehovamik mianerinnittut ilaatigut qanoq ataqqisin­naavagut?

¹⁵ Tussiaat 15:4-mi aamma allassimavoq Jehovamik mianerinnittut ataqqis­sagigut. Taamaattumik Jehovap ikinngutaasa inussiar­nisaarfiginis­saannut ataqqin­nittuliorfiginis­saannullu periarfis­sarsior­tarpugut. (Rom 12:10) Qanoq taamaaliorsin­naavugut? Assersuutigalugu Tussiaat 15:4-mi nangilluni allassimavoq Jehovap tupianiittoq tassaasoq “nammineq ajunaarutigis­sagaluaruniul­luunniit uppernarsaamminik aalajangius­siinnartoq”. Neriorsuutitsitut iliunngikkutta allanik ajuallatsitsissaagut. (Mat 5:37) Assersuutigalugu Jehovap naatsorsuutigaa aappariit katinnermi neriorsoqatigiinnertik eqqortissagaat. Aamma angajoqqaat meeqqaminnut neriorsuutiminnik sapinngisaminnik eqqortitsiniartut iluarai. Guuti inoqaterpullu asagatsigit neriorsuutigut sapinngisatsinnik eqqortin­niartarpagut.

16. Jehovap ikinngutai qanoq allatigut ataqqisin­naavagut?

¹⁶ Inoroorsaarnikkut tukkortuunikkullu Guutip ikinngutai aamma ataqqisin­naavagut. (Rom 12:13) Ataatsimiinnerit oqaluus­sinerullu saniatigut qatanngutigut piffissaqarfigigutsigit taakkununnga Jehovamullu ikinngutaal­luarnerulissaagut. Aamma inoroorsaarnikkut Jehova ilaartarparput.

ANINGAASERITUUN­NGOQINAK

17. Sooq aningaasanik atuineq Tussiaat 15-imi eqqartor­neqarpa?

¹⁷ Aamma allassimavoq Jehovap tupianiittoq tassaasoq “ernialikkanik taarsigas­sarsisitsin­ngitsoq, pinngitsuusumillu pisuutitsin­ngitsoq uffa pisuutitsinis­saminut akilerniar­neqaraluarluni”. (Tuss 15:5) Sooq aningaasanik atuineq Tussiaammi matumani eqqartor­neqarpa? Aningaasat pingaar­tippallaarutsigit Guutimut inoqatitsinnullu attaveqarluarnerput ajoquser­neqarsin­naammat. (Tim 1. 6:10) Biibilip nalaani ilaasa inoqatitik piitsut aningaasanik atortik­kaangamikkit iluanaar­niutigalugu ingasattumik ernialiisarput. Aamma eqqartuussisut ilaat akilerneqarlutik peqquserluttarput pisuussuteqan­ngitsunik pillaanermikkut. Jehovap iliuutsit taamaattut uumigai. – Ez 22:12.

18. Aningaasanut qanorpiaq isiginnit­taaseqar­nerluta paasiumallugu apeqqutit suut iluaqutigisin­naavagut? (Hebræerit 13:5)

 ¹⁸ Silatusaar­neruvoq aningaasanut isiginnit­taaserput eqqumaf­figeqqis­saarutsigu. Apeqqutit uku eqqarsaatigikkit: ‘Aningaasat pisiarineqarsin­naasullu eqqarsaatigikulasarpakka? Aningaasanik taarsigas­sarsiguma utertik­kumaataar­tarpakka isumaqarama taarsigas­sarsiffigisama pisariaqar­tinngikkai? Aningaasaateqarama inunnit allanit naleqar­nerusutut misigisarpunga? Tukkortuunissaq sapernar­tippara? Qatanngutikka aningaasaaterpas­suallit allamik pissuteqarnanga aningaaserituujusutut isigisarpakka? Pisuut ikinngutiginiar­nerusarpakka piitsulli soqutiginagit?’ Apeqqutit taakkua eqqarsaatiginissaat pingaaruteqarpoq Jehovap tupianut qaaqqusaagatta. Immikkut pisinnaatitaaffik tamanna erligalugu ersersis­sinnaavarput aningaaserituujunerup pinaveersaar­neratigut. Taamaaliorutta Jehovap imminiin­ngisaan­nassavaatigut! – Hebræerit 13:5 atuaruk.

JEHOVAP IKINNGUTINI ASAVAI

19. Sooq Jehovap Tussiaat 15-imi allassimasut uagutsinnut piumasaqaatigai?

¹⁹ Tussiaat 15 ima naggaser­neqarpoq: “Tamakkuninnga tamanik maleruaasoq patajalin­ngisaan­nassaaq.” (Tuss 15:5) Neriorsuummi tamatumani tussiaasiortoq nassuiaavoq sooq Guuti taamatut piumasaqaateqartoq. Jehovap kissaatigaa pilluas­sasugut. Taamaattumik iluaqutigisin­naasatsinnik illersuutigisin­naasatsinnillu siunnersorpaatigut. – Es 48:17.

20. Jehovap tupianiittut suna qilanaarisin­naavaat?

²⁰ Jehovap tupianiit­tuartut siunissaq nuannivissoq qilanaarisin­naavaat. Tanitat aalajaatsut ‘ininut’ Jiisusip ‘piareersagaanut’ isersin­naanngor­tinneqarumaarput. (Joh 14:2) Nunarsuarmilu inuunissamik neriugisallit Saqqummersitat 21:3-mi neriorsuutip eqquunnissaa qilanaarisin­naavaat. Naassaan­ngitsumik Jehovap tupianiit­tuarnissamut periarfissarput ilumut immikkut pisinnaatitaaf­ferujussuuvoq!