MBANDU YAKUDILONGA 24
MWIMBU 24 Zenu ku Mulundu wa Jihova
Suluka mu Kutunga mu Balaka ya Jihova Katé ku Hádya ni Hádya!
“Jihova, nanyi u nanga mu balaka yé?”—JISÁ. 15:1
ITWANDADILONGA
Tumone se ihi itwatokala o kubhanga phala tusuluke mu kukala ni ukamba wambote ni Jihova, ni kyebhi ki twatokala kutalatala o makamba mê.
1. Mbote yahi itukatula mu kudilonga o Jisálamu 15:1-5?
MU MILONGI ya tundumu twadilongo kwila o yo adibhakula kwa Jihova atena kutunga mu balaka ya Jihova ni kukala ni ukamba wambote ni Jihova. Maji ihi itwatokala o kubhanga phala kunangenena mu balaka yê? Jisálamu 15 izwela yalungu ni maka enya. (Tanga Jisálamu 15:1-5.) O Sálamu yiyi izwela se ihi itwatokala kubhanga phala tukale ni ukamba wambote ni Nzambi.
2. Nange Davidi wexile muxinganeka mu ihi kyoso kyazwela yalungu ni balaka ya Jihova?
2 Jisálamu 15 yamateka ni ibhwidisu: “Jihova, nanyi u nanga mu balaka yé? nanyi u tunga ku mulundu wé wangene?” (Jisá. 15:1) Kyoso o mukwa Jisálamu Davidi kyazwela yalungu ni balaka ya Jihova nange mwene wexile muxinganeka mu balaka ya kutakanena yexile mu Ngibiyone mu kithangana kyenyokyo. Kyoso Davidi kyexile mu banza mu “mulundu ukola,” nange mwene wexile muxinganeka mu balaka yexile ku Mulundu wa Ziyone mu Jeluzaleme. Ku mbandu ya lwiji ya Ngibiyone, Davidi wabhange o balaka phala kuta o álaka ya kikutu kate kyeji zubha o kutunga o tembulu.—2 Sam. 6:17.
3. Mukonda dyahi twabhingi kutendela o divulu dya Jisálamu 15? (Tala we ofoto.)
3 Maji ku akwa Izalayele athu ofele ngo exile ni ujitu wa kukalakala mu balaka ya kutakanena, ofele ngó atene kubokona mwakexile o álaka ya kikutu. Maji o jiselevende joso jafiyele ja Jihova ejitena kutunga mu balaka yê ni kusuluka mu kukala ni ukamba wambote ni Jihova. Etwenyoso twabhindamena o kima kiki. O Sálamu 15 ijimbulula o idifwa itwatokala kukala nayu phala tusuluke mu kukala ni ukamba wambote ni Jihova.
O akwa Izalayele mu izuwa ya Davidi ejitena kutendela o kifika kyalungu ni kutunga mu balaka ya Jihova (Tala okaxi 3)
KALA U MUTHU WATENENA, BHANGA O MBOTE
4. Kyebhi ki twejiya kwila phala Jihova o batizu ki kyene ngo o kima kitubhinga mwene phala kubhanga? (Izaya 48:1)
4 Mu Jisálamu 15:2, o dikamba dya Jihova amwijiya kala “muthu wa tenena mu kwenda kwê, mukwa kukalakala ima yayuka.” O izwelu “kwenda” ni “kubhanga” kilombolola kubhanga jinga. O kwila tutena ‘kwenda ni kuyuka’? Kyene. Kidi kwila etwenyoso tu akwa ituxi, maji kyoso ki tubhanga yoso phala kubelesela Jihova, mwene utumona kala tu athu ayuka. Kyoso ki tudibhakula ni kudibatizala, tumateka kwenda ni Nzambi. O kukala mukwa Izalayele ki kyexile mulombolola kwila o muthu yu watokalele kutunga mu balaka ya Jihova. (Tanga Izaya 48:1.) Phala kulondekesa kwila amesenene mwene kutunga mu balaka ya Jihova akwa Izalayele atokalele kudilonga o ijila ya Jihova ni ku ikayela. Kyene we kimoxi netu lelu, phala kukala ni ukamba wambote ni Jihova kitwatokala ngo kudibatizala mba kutwixana tu Jimbangi ja Jihova. Mu veji dya kiki twatokala kusuluka mu kubhanga o ima yambote. Kyebhi ki tutena kubhanga kiki?
5. Ihi ilombolola kubelesela Jihova mu ima yoso?
5 Phala Jihova o muthu, “wa tenena mu kwenda kwê” ni “kukalakala ima yayuka” ki kilombolola ngo kubhanga ikalakalu mu kilunga mba kuya mu yonge mu kididi kya ubhezelu. (1 Sam. 15:22) Twatokala kubhanga nguzu phala kubelesela Jihova mu yoso i tubhanga ne mwene kyoso kitukala ubheka wetu. (Jisa. 3:6; Ndo. 12:13, 14) Kima kyambote kubhanga nguzu phala kubelesela Jihova ne mwene mu ima yofele. Se tubhanga kiki mwene wanda tuzola dingi kyavulu.—Nzw. 14:23; 1 Nz. 5:3.
6. Yalungu ni Jihebelewu 6:10-12, ihi yabeta dingi kota o ima yoso i twabhangele m’ukulu ndenge?
6 Jihova ubhana valolo yavulu mu yoso i twabhange kya mu sidivisu yê m’ukulu. Maji o ima itwabhangele m’ukulu ni ufiyele, ki kilombolola kwila twanda nangenena mu balaka wa Jihova. Twamono o kidi kiki mu Jihebelewu 6:10-12. (Tanga.) Jihova wamesena kwila tubhanga yoso i tutena mu sidivisu yê kate kyanda kwiza o “dizubhilu.” Se kitubhwila o ukamba wetu wanda nangenena kate ku hadya ni hadya.—Nga. 6:9.
ZWELA O KIDI KU MUXIMA WÉ
7. Ihi ilombolola kuzwela o kidi ku muxima wetu?
7 O yo wamesena kwila amuxikina mu balaka ya Jihova, watokala kuzwela o kidi ku muxima wê. (Jisá. 15:2) Kiki ki kilombolola ngo kukamba kuzwela makutu. Jihova wamesena kwila tukala tu athu a kidi mu yoso i tuzwela ni yoso itubhanga. (Jih. 13:18) Kiki kidi, mukonda “Ngana wa di-zemba ni athu abhukumuka, maji o kikutu kyê u ki jitwina athu oso ayuka muxima.”—Jisa. 3:32.
8. Ukexilu webhi utwatokala kuzemba?
8 O yo azwela o kidi ku muxima ki akwa mangonya mu kwamba, bhu pholo dya mundu abelesela Jihova maji kyoso kyala ubheka abhukumukina o itumu yê. (Iza. 29:13) O muthu mukwa makutu ubanza kwila o itumu ya Jihova ki yayuka. (Tiy. 1:5-8) Mwene utena kubhukumukina Jihova mu ima imona kwila ki yala ni valolo yavulu. Kyenyiki mwene utena kumona kwila seko maka kubhukumukina Nzambi. Mukubhita kithangana mwene usuluka mu kubhanga o ima yayibha mu kubanza kwila wa mubheza Nzambi ni kwila Jihova wanda muxikina. (Ndo. 8:11) Kyenyiki, etu twamesena kukala tu athu a kidi mu ima yoso.
9. Ihi yabhiti kyoso Jezú kyadisange mu veji yadyanga ni Natanayele ni ihi itutena kudilonga? (Tala we ofoto.)
9 Kima kyambote kukala tu athu a kidi. Tutena kumona o kidi kiki kyoso Jezú kyadisange ni Natanayele mu veji ya dyanga. Kwabhiti kima kyoso Filipe kyabheka kamba dyê Natanayele phala kwijiya Jezú. Sumbala Jezú nuka wamonene Natanayele, maji mwene wambe: “Talenu! O diyala didi mukwa Izalayele wa kidi, mwene ki mukwa makutu.” (Nzw. 1:47) Jezú wamonene kwila o maxibulu mê exile akwa kidi, maji Jezú wamono o kidi kwa Natanayele mu ukexilu wa katunda. Kala etu, Natanayele wexile mukwa ituxi, maji kexile mukwa makutu. Jezú wadiwanene ni ukexilu yu, anga wa mutendelesa kusuluka ni ukexilu yu. Etwenyoso twamesena kwila Jezú utumona we mu ukexilu yú!
Filipe walondekesa kwa Jezú kamba dyê Natanayele, diyala mukwa Izalayele wa kidi, kexile mukwa makutu (Tala okaxi 9)
10. Mukonda dyahi twatokala kudilanga mu ima ituzwela? (Tiyaku 1:26)
10 O idifwa yamukwa yala mu Sálamu 15 yalungu ni ukexilu ututalatala akwetu. O Jisálamu 15:3 yamba kwila phala kutunga mu balaka ya Jihova o muthu katokala kuxinga “ndaka ni dimi dyê, ka xikina kubhanga phulu kwa mukwá, kende ni kabódyo mu sanzala.” O kukalakala ni dimi dyetu mu ukexilu yu utena kutubhekela maka avulu ni kwila Jihova kanda tuxikina kutunga mu balaka yê.—Tanga Tiyaku 1:26.
11. O kabódio ihi, ni ihi yandabhita ni muthu kalungulula o ukexilu yu?
11 O mukwa Jisálamu watumbula o kizwelu kabódyo. O kabódyo ihi? Makutu atena kuxidisa o wendelu wa muthu. Se o muthu mukwa kabodio anga kalungulula o ukexilu yu atokala ku mukaya mu kilunga.—Jel. 17:10.
12-13. Ima yebhi itena kutubhangesa kumwanga makutu alungu ni muthu sé kukimesena? (Tala we ofoto.)
12 O Jisálamu 15:3 itulembalesa we kwila o muthu wa tungu mu balaka ya Jihova kaxikina kubhanga phulu kwa mukwá, kate kabódyo mba jimbwembwe jalungu ni makamba mâ. Kiki kibhita kyebhi?
13 Tutena kumwanga makutu alungu ni muthu sé ku kimesena. Mu kifika: (1) Phange ya muhatu uxisa o sidivisu ya thembu yoso, (2) dikaza kamusidivila dingi ku Betele (3) phange kamusidivila dingi kala kafunga mba mukwatekexi wa tufunga. O kwila kima kyayibha kuzwela ku athu engi kwila o jiphange jiji nange abhange kima kyayibha mukonda dya kiki a akatula o maujitu? Nange kwene ima yavulu kitwejiya itena kubhangesa o muthu kuxisa o ikalakalu yiyi. O muthu watungu mu balaka ya Jihova “ka xikina kubhanga phulu kwa mukwá,” mwene we kata jimbwembwe jalungu ni akwâ.
Tutena kumwanga makutu alungu ni muthu sé ku kimesena (Tala ojikaxi 11-13)
BHANA KIJINGU KWA YO AZOLO JIHOVA
14. Jimbulula kyebhi yo atungu mu balaka ya Jihova kyene mudibhana ni athu akambe valolo.
14 O Sálamu 15:4 yamba kwila o kamba dya Jihova, o “muthu wala kifusa mwene u mu mona kusekala.” Kyebhi kitutena kubhanga kiki? Kuma tu akwa ituxi kitwala ni kutena kwa kumona se o muthu kale ni valolo. Mukonda dyahi? Mukonda dya kukala tu akwa ituxi, twawabhela kudibhana ni athu utwazolo, ni kukamba kudibhana ni athu atukwatesa njinda. Kyenyiki twatokala kumona ngo o muthu kwila wakambe valolo se ubhanga o ima “yayibhila” Jihova. (1 Ko. 5:11) Yá ene o athu abhanga ima yayibha maji kadyela o ituxi yâ ni yo asota kuzanga o ukamba wetu ni Jihova.—Jisa. 13:20.
15. Kyebhi kitutena kuxila “oso akwa woma wa Jihova”?
15 O Sálamu 15:4 yamba we kwila twatokala kuxila “oso akwa woma wa Jihova.” Etu twatokala kuzola ni kuxila o makamba a Jihova. (Lom. 12:10) Kyebhi? O Sálamu 15:4 yamba kwila o muthu watungu mu balaka ya Jihova, “se wa loka kyá, k’aluluka dingi bhu dimi, né wa di fumbu.” O kukamba kukumbidila i twakanena itena kubhekela ibhidi ku akwetu. (Mat. 5:37) Mu kifika Jihova ukingila kwila o yo atungu mu balaka yê atokala kukumbidila yoso yakanena mu kizuwa ukaza wâ. Ene we asanguluka kyoso o jitata kyabhanga nguzu phala kukumbidila o ima yakanena ku twana twâ. Kuma twazolo Nzambi ni akwetu, twanda bhanga yoso i tutena phala kukumbidila yoso itwakanena.
16. Kyebhi dingi kitutena kuxila o makamba a Jihova?
16 O ukexilu wengi wa kuxila o makamba a Nzambi, o kwazalela. (Lom. 12:13) O kubhita kithangana ni jiphange jetu ku tukwatekesa kukolesa o ukamba wetu ni ene ni Jihova. Kyoso ki tukala ni ukexilu wa kuzalela twamukayela o phangu ya Jihova.
KANA KUZOLA O KITADI
17. Mukonda dyahi o Sálamu 15 izwela yalungu ni kitadi?
17 Twatange kwila o muthu wa tungu mu balaka ya Jihova “ka bhana kitadi mu kutambula avasu, ka xikina kitadi kya kúdya mangonya.” (Jisá. 15:5) Mukonda dyahi o Sálamu yiyi izwela yalungu ni kitadi? Mukonda se tuzola kyavulu o kitadi, kyene kitena kukala o kima kya beta-kota ku mwenyu wetu o athu ni Nzambi ndenge. (1Ti. 6:10) M’ukulu say athu kexile mutalatala o jiphange exile jingadyama ni kuyuka exile mwa jijidika kubandekesa dingi mu kitadi kya asobhesele. Ku mbandu ya mukwa, o afundixi exile we mutambula avasu ni kwila kexile mufundisa ni kuyuka kwoso. Jihova wazembe o athu abhange o ima yiyi.— Ize. 22:12.
18. Ibhwidisu yebhi itwatokala ku dibhanga yalungu ni kitadi? (Jihebelewu 13:5)
18 Kima kyambote kutonginina o ukexilu wetu wa kumona o kitadi. Dibhwidise: ‘O kwila ngibhita ithangana yavulu mu kubanza mu kitadi ni ihi i ngitena kusumba? O kwila se ngi sobha kitadi ngi banza kwila o mukwa kitadi ka kibhindamena luwa? O kwila o kukala ni kitadi ki ngibhangesa kudimona kwila eme nga beta dingi kota, akwetu ndenge ni kukamba kuzalela akwetu? O kwila ngibanza kuma o jiphange ala ni kitadi kyavulu azolo dingi o kitadi, Jihova ndenge? O kwila ngisota kubhanga ukamba ni jimvwama, o jingadyama kana?’ Yiyi ibhwidisu yambote mukonda twala ni ujitu wa kutunga mu balaka ya Jihova. Twatokala kubhanga yoso phala kulanga o ujitu yu ni kudilanga phala kituzole o kitadi. Se tubhanga kiki Jihova nuka wanda twehela!—Tanga Jihebelewu 13:5.
JIHOVA WAZOLO O MAKAMBA MÊ
19. Mukonda dyahi Jihova wamesena kwila tubhanga o ima yoso yotumbule mu Sálamu 15?
19 O Sálamu 15 izubha ni kikanenu kiki: “Woso u bhanga ima yiyi wemana kididi, ka mu lundumuna.” (Jisá. 15:5) Bhabha o mukwa Jisálamu wajimbulula se mukonda dyahi Jihova wamesena kwila tubhanga o ima yoso yotumbule mu Sálamu yiyi. Jihova wamesena kwila tusanguluka. Mukiki-phe, kyoso kitubhanga yoso i tubhinga Nzambi twanda kala ni mwenyu wambote ni kwila mwene wanda tulanga.—Iza. 48:17.
20. Yo atungu mu balaka ya Jihova atena kukingila ihi?
20 O yo atungu mu balaka ya Jihova atena kukingila kukala ni mwenyu wambote ku hadya. O Jikidistá a undu anda kwa ehela kutunga mu “ididi iavulu” yayudika Jezú ku dyulu. (Nzw. 14:2) Oso ala ni kidyelelu kya kutunga mu ixi a mukingila ni hanji yoso o kikumbidilu kya izwelu itusanga mu Dijingunwinu 21:3. Ujitu wa dikota kuxikina o kixanu kyamutubhanga Jihova phala kutunga mu balaka yê kate ku hadya ni hadya!
MWIMBU 39 Dijina Dyambote Bhu Pholo ya Nzambi
