1. Зәбур 15:1-5 чьрʹа бона мә керһати йә?

 ГОТАРА пешийа веда әм пеһʹәсийан, ԝәки хьзмәткʹаред Йаһоԝа дькарьн бьбьнә достед ԝи у бь ви щурʹәйи коне ԝийә симболикда бьбьнә меван. Ле әм гәрәке бона ве йәке чь бькьн? Зәбура 15 дина мә дькʹьшинә сәр һьнә тьштед фәрз (Бьхунә Зәбур 15:1-5). Дәрсед кӧ әм жь ван рʹеза һин бьн, дькарьн али мә бькьн дьһа незики Хԝәде бьн.

2. Гава Даԝьд бәʹса коне Йаһоԝа дькьр, дьбәкә әԝ дәрһәԛа чь дьфькьри?

² Зәбура 15 ӧса дәстпедьбә: «Хӧдано! Кʹи дькарә Коне Тәда бьминә? Кʹи ԝе сәре чʹийайе Тәйи пироз бьһеԝьрә?» (Зәбур 15:1). Гава Даԝьд Пʹадша бәʹса «коне» Йаһоԝа дькьр, дьбәкә әԝи дәрһәԛа коне пироз дьгот, йе кӧ ԝәʹдәки бажаре Гибәонеда мабу. Чахе Даԝьд рʹезеда ӧса жи бәʹса «чʹийайе . . . пироз» кьр, дьбәкә әԝ дәрһәԛа чʹийайе Сийоне дьфькьри, кʹижан кӧ бажаре Оршәлимеда бу. Ԝедәре, демәк чәнд километра алийе башуре Гибәоне, Даԝьд бона сьндоԛа пәймане кон дани. Һʹәта кӧ пʹарьстгәһ һатә авакьрьне, сьндоԛ ԝедәре бу (2 Самуйел 6:17).

3. Зәбура 15 бона мә чьрʹа фәрз ә? (Бьньһерʹә ӧса жи шькьл.)

³ Һәмьки һʹәчʹи зәʹф Исраели коне пирозда хьзмәт нәдькьрьн у изьна ԝана тʹӧнәбу бькʹәвьнә щийе кӧ  сьндоԛа пәймане данибун. Ле һʹәму хьзмәткʹаред Йаһоԝа дькарьбун бьбьнә достед ԝи у коне ԝийә пирозда бьбьнә меван. Нета мә һәр кәси һʹәма әв ә. Зәбура 15 бәʹса һьнә һʹӧнӧред фәрз дькә, йед кӧ әм гәрәке нав хԝәда пешда биньн, ԝәки бькарьбьн ча достед Йаһоԝа бьминьн.

БЕ ЛӘКʹӘ БЬМӘШӘ У ХԜӘ РʹИЙА ҺӘԚИЙЕ БЬГЬРӘ

4. Әм жь кʹӧ заньн, ԝәки ньхӧмандьн бәс нинә? (Ишайа 48:1)

⁴ Зәбур 15:2-да те готьне, кӧ досте Хԝәде «бе ләкʹә дьмәшә у хԝә рʹийа һәԛийе дьгьрә». Ча жь ве рʹезе те кʹьфше, әм гәрәке бәрдәԝам кьн ве йәке бькьн. Гәло бь рʹасти дьбә, ԝәки әм «бе ләкʹә» бьмәшьн? Бәле. Һәр кәс ԛьсурдар ә, ле һәрге әм чь жь дәсте мә те бькьн, ԝәки гӧһ бьдьнә Йаһоԝа, әԝе мә ча кәсед «бе ләкʹә» һʹәсаб кә. Гава әм соз дьдьнә Йаһоԝа, кӧ әме һʹәта-һʹәтайе жерʹа хьзмәт кьн у бенә ньхӧмандьне, әв йәк тʹәне дәстпека хьзмәтийа мә йә. Ԝәрә әм дина хԝә бьдьне, кӧ бәре, сәва кӧ кәсәк бьбуйа меване Йаһоԝа, бәс нибу кӧ әԝ тʹәне пʹара мьләте Исраеле буйа. Кʹьтеба Пирозда дәрһәԛа һьнәка жь ԝан, ӧса те готьне: «Гази Хԝәдайе Исраил дькьн, ле нә бь рʹасти у дьлсози» (Бьхунә Ишайа 48:1). Лазьм бу Исраелийед дьлсах пебьһʹәсийана, кӧ Йаһоԝа чь жь ԝан дәʹԝа дькьр у ль гора ве йәке бьжитана. Мина ве йәке, сәва кӧ Хԝәде жь мә рʹази бә, бәс нинә кӧ әм бенә ньхӧмандьне у пʹара щьвате бьн. Әм гәрәке хԝә «рʹийа һәԛийе» бьгьрьн. Ле гәло әв чь те һʹәсабе?

5. Әм гәрәке чаԝа гӧһ бьдьнә Йаһоԝа?

⁵ Сәва кӧ Йаһоԝа мә ча кәсед «бе ләкʹә», йед кӧ сәр «рʹийа һәԛийе»  дьмәшьн, һʹәсаб кә, бәс нинә кӧ әм бәрдәԝам кьн һәрʹьн Ода Щьвате (1 Самуйел 15:22). Әм гәрәке тʹьме, гава тʹӧ кәс мә навинә жи, гӧһ бьдьнә Хԝәде (Мәтʹәлок 3:6; Ԝаиз 12:13, 14). Гәләк фәрз ә тьштед бьчʹукда жи гӧһ бьдьнә Йаһоԝа. Ӧса әме бьдьнә кʹьфше, кӧ әм бь рʹасти ԝи һʹәз дькьн. Һәрге әм ӧса бькьн, Йаһоԝа ԝе мә һе зедә һʹәз бькә (Йуһʹәнна 14:23; 1 Йуһʹәнна 5:3).

6. Ль гора Ибрани 6:10-12, чь дьһа фәрз ә, нә кӧ кьред мәйә бәре?

⁶ Йаһоԝа гәләк ԛимәт дькә, чь кӧ мә бәре бона ԝи кьрийә. Ле сәва кӧ әм коне ԝида ча меванед ԝи бьминьн, кьред мәйе бәре бәс ниньн. Әв йәк рʹьнд те кʹьфше жь Ибрани 6:10-12 (Бьхунә). Бәле, Йаһоԝа кьред мәйе бәре бир накә. Ле әԝ дьхԝазә ԝәки әм «һʹәта хьлазийе» бь дьл у щан жерʹа хьзмәт кьн. «Һәгәр әм нәдьнә дәр», Әԝе мә һʹәта-һʹәтайе ча достед хԝә һʹәсаб кә (Галати 6:9).

ДЬЛЕ ХԜӘДА ЖИ РʹАСТИЙЕ БЕЖӘ

7. Чь те һʹәсабе «дьле хԝәда рʹаст» хәбәр дьн?

⁷ Мәрьве кӧ дьхԝазә коне Йаһоԝада бьбә меван, гәрәке «дьле хԝәда рʹаст» хәбәр дә (Зәбур 15:2). Бәс нинә, кӧ әм дәрәԝа нәкьн. Йаһоԝа дьхԝазә ԝәки әм жь һәр алийава һʹәлал бьн (Ибрани 13:18). Кʹьтеба Пироз дьбежә, кӧ «мәрьве ԛәлп, ль бәр чʹәʹве Хӧдан зьвер ә, ле бәле Әԝ һәвале сьтԛе дьле рʹаст ә» (Мәтʹәлок 3:32).

8. Әм гәрәке жь чь хԝә дур бьгьрьн?

⁸ Кәсед кӧ «дьле хԝәда рʹаст» хәбәр дьдьн, нә тʹәне бәр чʹәʹве хәлԛе ль гора ԛанунед Йаһоԝа дьжин, ле ӧса жи чахе мәрьв ԝана навиньн (Ишайа 29:13). Әԝана дӧрʹу ниньн. Ле мәрьве ԛәлп дьбәкә дӧдьли бә, һәла һьнә ԛанунед Йаһоԝа бь рʹасти керһати нә, йан на (Аԛуб 1:5-8). Әԝ ԝан тьштада гӧрʹа Йаһоԝа накә, чь кӧ бона ԝи ӧса фәрз ниньн. Һәрге нәгӧһдарибуна ԝи ахьрийа хьраб дәрберʹа нәйнә, дьбәкә әԝ  тьштед дьһа хьраб бькә. Мәрьве ӧса чьԛас жи хԝә ча хьзмәткʹаре Йаһоԝа һʹәсаб кә, Йаһоԝа ԝе хьзмәтийа ԝи ԛәбул нәкә (Ԝаиз 8:11). Ләма жи гәләк фәрз ә, ԝәки әм һәр тьштида һʹәлал бьн.

9. Гава Иса щара пешьн рʹасти Натанйел һат, әԝи чь гот, у әм жь ве йәке чь һин дьбьн? (Бьньһерʹә ӧса жи шькьл.)

⁹ Жь сәрһатикә Кʹьтеба Пироз те кʹьфше, кӧ һʹәлали һʹӧнӧрәки гәләк фәрз ә. Гава Филипо һәвале хԝә Натанйел щара пешьн тʹәви хԝә ани бал Иса, тьштәки һʹәԝас ԛәԝьми. Иса гот: «Ва йә исраелики һәԛи-һʹәлал кӧ дьле ԝида мьхәнәти тʹӧнә» (Йуһʹәнна 1:47). Бе шьк, Иса шагьртед хԝәйә дьн жи ча кәсед һʹәлал һʹәсаб дькьр, ле әшкәрә йә, кӧ бона Иса Натанйел бь щурʹә мәхсус һʹәлал бу. Рʹаст ә Натанйел жи мина мә мәрьвәки ԛьсурдар бу, ле дьле ԝида мьхәнәти у дӧрʹути ԛә тʹӧнә бу. Ләма жи Иса жерʹа һʹәйр-һʹӧжмәкʹар бу. Гәло тәйе нәхԝәста, ԝәки Иса дәрһәԛа тә жи тьштәки ӧса бьгота?

10. Чьрʹа фәрз ә, ԝәки әм зьмане хԝә рʹаст бьдьнә хәбате? (Аԛуб 1:26)

¹⁰ Һʹәчʹи зәʹф тьштед кӧ Зәбура 15-да тенә готьне, дәрһәԛа ве йәке нә, кӧ әм гәрәке һьндава мәрьвада чаԝа бьн. Мәсәлә, Зәбур 15:3 дьбежә, кӧ меванед Йаһоԝа «бь зьмане хԝә бӧхдана накә у хьрабийе тʹӧ кәси накә, щинаре хԝә беһӧрмәт накә». Һәрге әм бь зьмане хԝә зьраре бьдьнә кәсед дьн, әме нькарьбьн коне Йаһоԝада бьминьн (Бьхунә Аԛуб 1:26).

11. Чь те һʹәсабе бӧхдан, у кәсед кӧ ве йәке тʹобә накьн, һьндава ԝанда чь те кьрьне?

¹¹ Зәбурбеж хәбәра бӧхдан да хәбате, чь кӧ те һʹәсабе дәрәԝи, йа кӧ наве кәсәки рʹәш дькә. Кәсед кӧ бӧхдана давежьн мәрьва у тʹобә накьн,  жь щьвате тенә дәрхьстьне (Йерәмйа 17:10).

12-13. Һәрге әм фәсал нибьн, әм ча дькарьн беһʹәмде хԝә наве кәсәки рʹәш кьн? (Бьньһерʹә ӧса жи шькьл.)

¹² Ӧса жи, Зәбур 15:3 те готьне, кӧ меванед Йаһоԝа «хьрабийе тʹӧ кәси накә, щинаре хԝә беһӧрмәт накә». Гәло әв чь те һʹәсабе?

¹³ Һәрге әм фәсал нибьн, әм дькарьн бе һʹәмде хԝә наве кәсәки рʹәш кьн. Мәсәлә, бьдә бәр чʹәʹв хԝә кӧ (1) хушкәк хьзмәтийа пешәнгтийе дьһелә, (2) жьн-мерәк ида Бәйтʹәледа хьзмәт накьн, (3) бьрак ида рʹуспи йан жи аликʹарчийе щьвате нинә. Дьбәкә әм мәʹнийа ван дәрәща ньзаньн. Гәло ԝе рʹаст бә, ԝәки һʹәзар фькьр бенә сәре мә, кӧ чьрʹа әв йәк ԛәԝьми у дәстпекьн дәрһәԛа ньһерʹандьна хԝә кәсед дьнрʹа жи бежьн? Һәмьки на. Гәрәке әм бир нәкьн, ԝәки меване коне Йаһоԝа «хьрабийе тʹӧ кәси накә», у «щинаре хԝә беһӧрмәт накә».

ԚӘДЬРЕ ԜАН БЬГЬРӘ, ЙЕД КӦ ЙАҺОԜА ДЬТЬРСЬН

14. Меванед Йаһоԝа һьндава мәрьвед хьрабда чаԝа ньн?

¹⁴ Зәбур 15:4-да те готьне, ԝәки бона досте Йаһоԝа «мәрьве хьраб» ԛимәт нинә. Әм мәрьвнә ԛьсурдар ьн, ләма жи дьбә һьнә мәрьв мә хԝәш бен у һьнәк жи на. Ле әм гәрәке тʹәне ԝан мәрьва инкʹар кьн, йед кӧ бь әʹмьрәки ӧса дьжин, кʹижан кӧ бәр чʹәʹве Йаһоԝа рʹәш ә (1 Корьнтʹи 5:11). Әԝ һәнә мәрьвед ӧса, йед кӧ хьрабийе дькьн у тʹобә накьн, ԛәдьре баԝәрийа мә нагьрьн у һәр тьшти дькьн, ԝәки достийа мә тʹәви Йаһоԝа хьраб кьн (Мәтʹәлок 13:20).

15. Әм ча дькарьн «ԛәдьре хԝәдехофа» бьгьрьн?

¹⁵ Жь алийе дьнва жи, Зәбур 15:4 дьбежә, ԝәки әм «ԛәдьре хԝәдехофа» бьгьрьн. Ләма жи, әм гәрәке мәщала бьгәрʹьн, ԝәки ԛәнщийе бона достед Йаһоԝа бькьн у ԛәдьре ԝан бьгьрьн (Рʹомайи 12:10). Мәсәлә, Зәбур 15:4 дьбежә, ԝәки меване Йаһоԝа «сонд дьхԝә у созе хԝә дьԛәдинә» һәла һе һьнге жи, гава зьраре дькʹәвә. Гәләк фәрз ә, ԝәки әм сондед хԝә нәтʹәрʹьбиньн, кӧ дьле мәрьва нәешиньн (Мәтта 5:37). Йәк жь ван сонда, сонде зәԝаще йә. Ӧса жи, де-бав гәрәке хирәт бькьн, ԝәки созед хԝә, йед кӧ әԝана дьдьнә зарʹед хԝә, биньн сери. Бәле, әм Хԝәде у мәрьва һәʹз дькьн, ләма жи чь жь дәсте мә те әм дькьн, ԝәки созед хԝә биньн сери.

16. Әм ча дькарьн бьдьнә кʹьфше, ԝәки әм ԛәдьре достед Йаһоԝа дьгьрьн?

¹⁶ Ӧса жи, әм гәрәке һьндава достед Хԝәде меванһʹәз у мәрʹд бьн (Рʹомайи 12:13). Гава әм ԝәʹде хԝә тʹәви хушк-бьра дәрбаз дькьн, достийа мә тʹәви ԝан у тʹәви Йаһоԝа дьһа ԛәԝи дьбә. Ӧса жи, гава әм меванһʹәз ьн, әм чʹәʹв дьдьнә Йаһоԝа.

ПʹӘРӘҺʹӘЗ НИБӘ

17. Зәбура 15 чьрʹа бәʹса пʹәра дькә?

¹⁷ Хенщи ве йәке, меване Йаһоԝа «пʹәред хԝә бь сәләф надә, жь бәр бесущва рʹӧшәте һьлнадә» (Зәбур 15:5). Әв рʹез чьрʹа бәʹса пʹәра дькә? Чьмки мәрьвед кӧ пʹәра һʹәз дькьн, дькарьн зьраре бьдьнә һьм кәсед дьн, һьм жи достийа хԝә тʹәви Хԝәде (1 Тимотʹейо 6:10). Ԝәʹде бәре, һьнә мәрьва бь сәләфа пʹәрә дәйни дьданә хушк-бьред  хԝәйә кʹәсиб. Ӧса жи, һьнә һʹакьма рʹӧшәт ԛәбул дькьрьн у диԝана нәрʹаст дькьрьн. Йаһоԝа Хԝәде тьштед ӧса нәфрʹәт дькә (Һәзәԛел 22:12).

18. Кʹижан пьрс дькарьн али мә бькьн, ԝәки әм тедәрхьн һәла ньһерʹандьна мә сәр пʹәра рʹаст ә йан на? (Ибрани 13:5)

¹⁸ Ле ньһерʹандьна тә сәр пʹәра чь щурʹәйи йә? Һәла жь хԝә бьпьрсә: «Гәло әз тʹьме дьфькьрьм дәрһәԛа пʹәра у тьштед кӧ әз дьхԝазьм бькʹьрʹьм? Гава әз дәйни пʹәра һьлдьдьм, гәло әз дәйне хԝә дәрәнг вәдьгәрʹиньм, жь бәр кӧ әз дьфькьрьм, ԝәки кәсе кӧ дәйни дабу мьн, һʹәԝще пʹәра нинә? Чахе пʹәрә дәсте мьнда һәйә, гәло әз хԝә жь кәсед дьн четьр һʹәсаб дькьм? Гәло әз йәки тьма мә? Гәло әз дьфькьрьм, кӧ һәрге кәсәк дәԝләти йә, әв те һʹәсабе, ԝәки әԝ пʹәра дьһа зедә һʹәз дькә, нә кӧ Йаһоԝа? Гәло әз дьһа зедә тʹәви дәԝләтийа һәвалтийе дькьм?» Йаһоԝа һазьр ә мә ча меванед хԝә ԛәбул кә, ләма жи ԝәрә әм пʹәрәһʹәз нибьн у ви ԛәдьре кӧ мәрʹа һатийә дайине, ӧнда нәкьн. Һәрге әм ӧса бькьн, Йаһоԝа ԝе тʹӧ щара мә нәһелә (Бьхунә Ибрани 13:5).

ЙАҺОԜА ДОСТЕД ХԜӘ ҺʹӘЗ ДЬКӘ

19. Чьрʹа Йаһоԝа дьхԝазә, ԝәки әм һʹәму гьлийед жь Зәбура 15 биньн сери?

¹⁹ Хьлазийа Зәбура 15 те готьне, кӧ кʹе ван тьшта дькә, «тʹӧ щар әԝе нәлькʹӧмә» (Зәбур 15:5). Бәле, ԛанунед Йаһоԝа бона кʹара мә нә. Һәрге әм хԝә ль рʹийа ԝи бьгьрьн, Әԝе мә бьпʹарезә, у әʹмьре мә жи ԝе дьһа баш бә (Ишайа 48:17).

20. Меванед Йаһоԝа һивийа чь нә?

²⁰ Меванед Йаһоԝа һивийа рʹожед хԝәш ьн. Кәсед бь рʹӧһʹ кʹьфшкьри ԝе һәрʹьн сәр әʹзмана, щийе кӧ Иса ԝанрʹа һазьр кьрийә (Йуһʹәнна 14:2). Кәсед кӧ ԝе сәр әʹрде бьжин, ԝе пе чʹәʹве хԝә бьвиньн, кӧ чаԝа гьлийед жь Әʹйанти 21:3 тенә сери. Бона мә бь рʹасти ԛәдьрәки гәләк мәзьн ә, кӧ Йаһоԝа мә ча дост у меванед хԝәйә һәрһәйи тʹәглифи коне хԝә дькә!