CIIN-BWAAL CYA KULONG CYA 24
MUSAMBW A 24 Luayi ku mukuna wa Yehowa
Shaal mu mutand a Yehow Buyiil!
“A Mawej [Yehow], i ngany udyobw mwa kutweej mu nzubw iibuh?”—MIS. 15:1.
BWAAL BUTAM
Bwiitut kumanyik citudy mwa kulong bwa kushaal balund ba Yehow ni bwa kutal myand yidyey mutakamin bwiitut kulongel balund nend.
1. I mushind kaay udy Misambw 15:1-5 mwa kwiitwambulwiish?
TULONGEL mu ciin-bwaal cishaal ney biin mudimw ba Yehow bady biilambul kudyey, bady mwa kushaal beeny mu mutand indiy a mu cifwaany hady woos wa kudyobw udy nend bulund bukasakan. Ki bikaam tulong biny bwa kushaal beeny bindiy? Musambw a 15 uleeleeb bivul habitaatal bwaal oobw. (Bal Misambw 15:1-5.) Musambw oow wiitwaakaakish malongweesh mady mwa kwiitwambulwiish bwa kufweej habwiih ni Mawej.
2. I biny byaakady Davih ulang misang yikwaabw haakadyey uleeb bwa mutand a Yehow?
2 Misambw 15 utaatang ni may aam: “A Mawej [Yehow], i ngany udyobw mwa kutweej mu nzubw [mutand] iibuh? I ngany udy mwa kushikat ha mulund iibuh mujilang?” (Mis. 15:1) Haakady mumb a misambw Davih uleeb bwa ‘mutand’ waakady misang yikwaabw ulang bwa nzubw a Mawej waakady ku Kabawoon ha ciisang kaahand. Davih uteeteel cikwaabw “mulund mujilang” a Mawej uleeleej misang yikwaakw mulund a Siyoon waakady mu Yeruzalem. Davih wiibakil mutand oow mu kilometel yivul kucyaash kwa Kabawoon bwa kuteekomw musheet a kuhwaan kuuhal kwa kwiibakobw cyaab cyaakadyobw mwa kwiikal bamuteekomw.—2 Sam. 6:17.
3. Bwaabiny bikaam tukontonon Misambw 15? (Tal cikwaabw cifwaatul.)
3 Biin-biin, biin Izaleel bavul kabaakadyoh bend bakal mudimw ku mutand a Mawej, ni teng baat bakeeh ki baakady batweel mund mwa mutand ha cyaab cyaakady musheet a kuhwaan. Ki biin mudimw ba Mawej ba lulamat boos baakady mwa kushaal beeny mu mutand indiy a mu cifwaany ha kudy nend bulund ni ha kutungunuk ni kushaal nend mu bulund. Ki citukaakaam tut boos. Musambw 15 uleeleej bimw biikadil bitudy ni bwa kwiikal naaby bwiitut kushaal balund ba Yehow.
Biin Izaleel ba ciisang cya Davih baakady mwa kumanyik biheehel cidy kwiikal mweeny mu mutand a Yehow kumvwiij (Tal cikos 3)
WENDEND KAY NI HA KUMUBAABIL NI ULOOLONG MYAND YIWAAKAN
4. Bilondeshel Yeshaay 48:1, i mushind kaay utudy bamanyik ney Yehow wiituloolomb bwa kulong myand yikwaabw hakufulok teng kuhet baatiisumw?
4 Mu Misambw 15:2 [NWT], bumvumvwiijomw mulund nend a Mawej ney: “I oow wendend kay ni ha kumubaabil, uloolong myand yiwaakan.” Myaak eey: “wendend” ni “uloolong” yiileeleej bwaal butudy ni bwa kutungunuk ni kulong. Ki tudyok biin-biin mwa ‘kwend katuy ni ha kwiitubaabilobw eeny’? Ing. Ning mudy muut ning waakaabumw kay muwaakan, Yehow udy mwa kutal bu ‘twendend katuy ni ha kwiitubaabil’ tut balong mwiitut moos bwa kumukooyel. Hatwiilaalambul kudy Mawej ni tuhet batiisumw, i butambwiil bituh. Cileejel, mu ciisang cifundilobw Bibl, kwiikal mwiin Izaleel kakwaakadyoh bend kulong bwa muut iikal mweeny a Yehow. Bakwaabw baakady bamulomb kabiy ‘mu biin-biin ni mu buwaakan.’ (Bal Yeshaay 48:1.) Biin Izaleel ba meej malengel baakady ni bwa kulong may ma Yehow ni kwiimakooyel. Bya mushind aakaabumw leel, bwa Yehow kwiitwanyishey bikaam tulong myand yikwaabw hakufulok kuhet baatiisumw ni kutweel mu bisangil. Bikaam tutungunuk ni ‘kulong cidy ciwaakan.’ I mushind kaay utudy mwa kulong naak?
5. Kukooyel kudy Yehow mu myand yoos kumvumvwiij biny?
5 Bwa Yehow, ‘Kwend katuy ni ha kwiitubaabil’ ni ‘kulong cidy ciwaakan’ byumvumvwiij bivul ha kufulok kuy kwa mu bisangil ha ciibidil ku Nzubw a Bukaleng. (1 Sam. 15:22) Bikaam twiikashishomw bwiitut kukooyel kudy Mawej mu myand yoos yituloolong mu shikacil iitut ning hatudy ha kaayeet. (Tus. 3:6; Mul. 12:13, 14) Bidy ni buseeb bwiitut kukooyel kudy Yehow ning mu myand yimweemweek kayiy ni buseeb. Kulong nook kuleeleej ney tudy bamukat biin-biin, ni yiy byend wiitukaakat bikasakan.—Jah 14:23; 1 Jah 5:3.
6. Bilondeshel Biin Ebreh 6:10-12, i biny bidy ni buseeb buvul kuhitok myand yilengel yitulongel ha kal?
6 Yehow waanaan bikasakan bitwaakady bamulongel ha kal. Myand yilengel yitulongel ha kal kayiish mwa kulong bwiitut kushaal beeny mu mutand a Yehow. I bumvwiij bwaal oobw bilengel mu Biin Ebreh 6:10-12. (Bal.) Yehow kiishoh bend muvulamin myand yilengel yitulongel ha kal. I mukat bwa tutungunuk ni kumukadil mudimw “teng ni ku bulekel.” Wiiyiiy kwiikal mulund neet buyiil “tut balek kuhing haanyim.”—Kal. 6:9.
LEEB MYAND YA BIIN-BIIN TENG MUWIIYILAALANG
7. Kuleeb myand ya biin-biin teng muwiiyilaalang kumvumvwiij biny?
7 Muut ukaakaam kwiikal mweeny mu mutand a Yehow bikaam iikal ‘uleeb myand ya biin-biin yiikal teng mwiiyilaalangey aamw.’ (Mis. 15:2) Biineeby kabiish byumvwiij teng kulek makos. Yehow ukaakaam ney twiikal biin myand yijaalal mu byoos bituleeleeb ni bituloolong. (Ebr. 13:18) Bidy ni buseeb, “bwaal Mawej [Yehow] uleeleek baat baloolong myand yibiih ni ya cikis, i mukat teng baloolong myand yijaalal.”—Tus. 3:32.
8. Bikaam tweehuk biikadil kaay?
8 Aab ‘baleeleeb myand ya biin-biin ni yiikal teng mudyobw biiyilang’ kabiish baleej ha baat mukookooyelobw ku may ma Mawej, ki biikal balong myand yibiih mu busok. (Ye. 29:13) Beeheehuk myand ya muush-muush. Muut mwiin myand ya muush-muush udy mwa kutang kulang ney mikenj ya Yehow kayidyaakal teng yilengel. (Jak 1:5-8) Udy mwa kutang kukufabeel Yehow mu myand yidyey utal ney kayiish ni buseeb menmen. Ni yiy mutal kakuy bwaal bubiih bulongek hakuukufabeeley Yehow nook, udy mwa kutang kulong myand yitam yibiih. Ning mudyey ulang ney uloolongel Yehow mudimw, Yehow kaakwiitaboh bend kuhambidil kwindiy. (Mul. 8:11) Nook, bikaam twiikal ni bujaalal mu myand yoos.
9. I biny bilongekel haakady Yeez musambakeen ni Natanayel bwa musang a kuuhal, ni biituloolongweesh biny? (Tal cikwaabw cifwaatul.)
9 Kusambakeen kwa kuuhal kwa Yeez ni Natanayel kwiituloolongweesh buseeb budy naabw kwiikal ni mucim mutook. Haakady Filipw mwiiy ni Natanayel kudy Yeez, bwaal kaahand bukeekemesh bulongekel. Ning mwaakady Yeez kay mwanj kutaloh Natanayel, uleebel ney: “Talaay mwiin Izaleel a biin-biin ukiish ni makos mund mwindiy.” (Jah 1:47) Biin-biin Yeez waakady mumanyik ney biiyij bindiy bakwaabw baakady biin myand yijaalal, ki Natanayel waakady mwiin myand yijaalal a habwaah. Teng bu batut, Natanayel kaakadyoh bend muwaakan. Ki kaakadyoh bend mwiin myand ya muush-muush, ni waakady mwiin bujaalal mu myand yoos. Yeez ukemen bwa bwaal aabw ni kufwaakijey Natanayel. Tudy bakat ney Yeez umvw bya mushind aakaabumw oow bwiitut!
Filipw uleeleej Yeez mulund nend Natanayel, muut waakady kay ni makos. Bady mwa kuleebok nook bwiitut eeny? (Tal cikos cya 9)
10. Bilondeshel Jak 1:26, bwaabiny bikaam twiikal badimuk bwa bituleeleeb?
10 Myand yiituloolombobw bwa kulong mu Misambw 15, yitaatal mushind utuloolongel baat bakwaabw myand. Misambw 15:3 uleeleeb ney mweeny mu mutand a Yehow ‘ kiish udingilanganomw myand ni ludimy lwindiy, kiish ulongel mwaanaabw bibiih, kiish unyangil mwiikaj nend luumw.’ Tut tudingilomw bakwaabw myand, bidy mwa kwiibatah ku micim ni katwaakwiikaloh bend beeny mu mutand a Yehow.—Bal Jak 1:26.
11. Kudingidilanganomw myand i biny, ni i biny biikal mwa kufikil muut udiidingidilanganomw myand kay waalabul micim? (Tal cikwaabw cifwaatul.)
11 Mumb a misambw uteeteel hatook kudingidilanganomw myand. Kudingidilanganomw myand i biny? Nang-nang, i kuleeb myand ya makos yidy mwa kunyang luumw lwa muut. Muut udiidingidilanganomw myand kay waalabul micim, bamwiihaahat mu cisumbw cya biin Krist.—Jer. 17:10.
12-13. I mu shikacil kaay mutudy mwa kunyangil biikaj neet luumw katuy bamanyik? (Tal cikwaabw cifwaatul.)
12 Misambw 15:3 wiituvuuvulwiij kabidy ney beeny ba Yehow kabiish mwa kulongel baan-baabw bwaal bubiih eecy kunyangil biikaj naabw luumw. I mu mushind kaay mutudy mwa kunyangil biikaj neet luumw?
13 Tudy mwa kunyangil muut luumw katuy bamanyik hakumumwangalajil myand ya makos. Cileejel: 1) Mwiin-kweet mwaan-mukaj wiimaamanyik mudimw indiy a bu seb a njil, 2) biin maluw balaaluk ku Betel, eecy 3) i baful mwiin-kweet mu bukul eecy mu bukwanjok bwa mudimw. Biikaakal bibiih tut twambil bakwaabw ney biin-kweet aab i balong bwaal kaahand bubiih ki bwaabiny i biibaful mu midimw eey. Kudy mwa kwiikal tubingil tukwaabw tutudy katuy bamanyik bwa mushind udy myand yishiituluk aaw. Cikwaabw, mweeny mu mutand a Yehow “kiish ulongel mwaanaabw bibiih, ni unyangil mwiikaj nend luumw.”
I biheehel bwa kumwangalaj myand ya makos habitaatal bakwaabw, misang yikwaabw tutang kudingidilanganomw myand (Tal cikos cya 12-13)
NEEMEK BACIICIIN YEHOW
14. Umvwiij mudy beeny ba Yehow balek “muut uloolong myand yibiih.”
14 Misambw 15:4 uleeleeb ney mulund nend a Yehow “uleelek muut uloolong myand yibiih.” Tudy mwa kumanyik bicy ney muut kaahand i muut mubiih? Bu mutudy baat bakiish bawaakan, katwiish bakumban bwa kumanyik ney muut kaahand i muut mubiih. Bwaabiny? Tudy mwa kukat bamw baat bwa biikadil byaababw biitusaasangej ki bakwaabw naabw biitukaay. Ki bwaabiny tuleelek teng baat baloolong myand yidy Yehow uleeb ney i ‘yibiih.’ (1 Kor. 5:11) Mu baat aab mudy aab baloolong myand yibiih kabay baalabul micim, bakiish baneemek diitabij diitut ni malongweesh miitut eecy bakaakaam kunyang bulund bwiitut ni Yehow.—Tus. 13:20.
15. I umw mushind kaay utudy mwa kuneemek ‘aab baciiciin Yehow’?
15 Cikwaabw, Misambw 15:4 uleeleeb ney bikaam tuneemek ‘aab baciiciin Yehow.’ Nook, tukaakaam mishind ya kulongel balund nend ba Yehow myand yilengel ni kwiibaleej kaneemw. (Rom 12:10) Mu mushind kaay? Mushind aakaabumw i udyobw baleejmu Misambw 15:4 wa ney mweeny mu mutand a Yehow “ning byaakadyey mulay biiy bimukasakeen, kiish waalabul byaakadyey muleeb.” Tut balek kukumbaj myand yitwaakady balay, twiiyiiy kutah bakwaabw ku micim. (Mat. 5:37) Cileejel, Yehow i mutakamin ney beeny bindiy baneemek mucih a maluw. Bimuloolong musangal hady balel biikashishomw bwa kukumbaj myand yilaalayobw baan baababw. Lukat lutudy bakat naalw Mawej ni muut neet, lwiitusaasak bwiitut kutungunuk ni kukumbaj may miitut.
16. I mushind kaay mukwaabw wa kuneemek balund nend ba Yehow?
16 Mushind mukwaabw wa kuneemek balund nend ba Mawej i wa kwiikal kwiibaak ku cibel kwiitut eecy kwiikal kwiibaakishok biit. (Rom 12:13) Hatuhiihitish diib divul ni biin-kweet, biitwambambulwiish bwiitut kukashish bulund bwiitut naab ni butudy bady ni Yehow. Cikwaabw, hatwiibaabaak ku cibel kwiitut twiidiidikij Yehow.
LEK LWIIS LWA FWALANG
17. I biny bidy Misambw 15 uleeb bwa fwalang?
17 Tubaabal ney mweeny a Yehow “yiy musombeshangan fwalang, kiish ukaam bwa bamuhingijil ni yikwaabw hamut. Kiish wiitab kwangat biit bya bukish bwa kufwiish naay mubing.” (Mis. 15:5) Bwaabiny Musambw oow uteeteel fwalang? Bwaal bakwaabw bady mwa kukaakal kutal fwalang mu mushind mulengel ni yinyang bulund bwiitut ni Mawej. (1 Tim. 6:10) Mu ciisang cifundilobw Bibl, baat bakwaabw baakady bafucish baan baabw balam-lam baakady biisomb fwalang kudyobw, fwalang yikwaabw ya hamut. Cikwaabw, bamw ba zuj baakady biitab bwa kwiibakosobw mishik ni balumbulwiish bibiih muut ukiish ni bwaal. Yehow i mukin myand ya nook.—Ezek. 22:12.
18. Bilondeshel Biin Ebreh 13:5, i majooj kaay matudy mwa kwiiyihinguj bwiitut kumanyik mutudyaakal tutal fwalang?
18 I bilengel bwiitut kwiikontonon bwa kumanyik mutudyaakal tutal fwalang. Iijooj ney: ‘Nadyaakal teng nalangil ha makut ni binady mwa kusumb eeny? Hanadyaakusomb makut, nadyaakuneng bwa kwiimahingij nalang ney mwiinem kiish wiimakaam eeny? Hanadyaakal ni makut, nadyaakal niiyumvw ni buseeb ki biikasakeen bwa mim kwaakishoh bakwaabw eeny? Nadyaakulangok ney biin-kweet bady ni fwalang yivul aab, i bakat fwalang kuhitok Yehow eeny? Nadyaakal mukat kudy bulund teng ni baahet ki neehuk balam-lam eeny?’ Tudy bahet dyaakatook diidiin dya kwiikal beeny ba Yehow. Tudy mwa kulam dyaakatook eedy hakweehuk lwiis lwa makut. Tut balong nook, Yehow kiish wiiy wiitushiy ning bicy!—Bal Biin Ebreh 13:5.
YEHOW I MUKAT BALUND NEND
19. Bwaabiny Yehow ukaakaam ney tulong myand yoos yidy mu Musambw 15?
19 Musambw 15 uhwaah ni mulay oow: “Muut uloolong nook kiish mwa kuhon ning bicy.” (Mis. 15:5) Hiinaah, mumb a misambw umvumvwiij bwaabiny Yehow ukaakaam bwa tulong myand yoos yidy mu Musambw oow. I bwaal Yehow ukaakaam ney twiikal ni musangal. Ki bwaabiny, wiitwaakaakish buludik bwiikal mwa kwiitulam ni kwiituhetesh mabenesh.—Ye. 48:17.
20. Beeny ba Yehow i batakamin biny?
20 Beeny ba Yehow badyey mwanyish i batakamin myand yilengel mu mafuk maciiyiiy. Bashing diisaby ba lulamat biiyiiy kushikat ha “byaab bivul bya kushikat” bidy Yeez mwiibalongolweel mu diiwul. (Jah 14:2) Bady ni kutakamin kwa kushikat ha bulab, i batakamin cidy Myand yisokolweel Jah 21:3 mulay. Biin-biin, i dyaakatook diidiin dya kwiikal beeny ba Yehow mu mutand indiy buyiil!
MUSAMBW A 39 Tuikale ne dîna dimpe kumpala kua Nzambi
