1. Salamo 15:1-5 wakonsha kwitukwasha byepi?

 MU MUTWE wafumako, twafunjile kuba’mba bakalume ba Yehoba bepana bakonsha kwikala benyi mu tente wanji wa kifwanyikizho inge baikala na bulunda bwakosa ne aye. Pano ñanyi bintu byo twafwainwa kuba pa kuba’mba twikale na buno bulunda ne aye? Salamo 15 walumbulula bulongo byo twafwainwa kuba. (Tangai Salamo 15:1-5.) Uno Salamo witubuula bintu byo twafwainwa kuba pa kuba’mba tufwenye kwipi ne Lesa.

2. Ñanyi bintu nyimbi wa salamo aye Davida byo alangulukilengapo byo aambile pa tente wa Yehoba?

² Salamo 15 watendeka na byambo bya kuba’mba: “Anweba Yehoba, ñanyi wakonsha kwikala mwenyi mu tente wenu? Ñanyi wakonsha kwikala ku mutumba wenu wazhila?” (Sala. 15:1) Byo aambile pa “tente” wa Yehoba, kyamweka nyimbi wa salamo aye Davida walangulukilenga pa tente wa lusambakeno wajinga mu Gibeona pa kyokya kimye. Kabiji Davida byo aambile pa “mutumba wazhila” wa Lesa, kampe walangulukilenga pa mutumba wa Ziona wajinga mu Yelusalema. Ino mpunzha yaikejile ku buyeke bwa Gibeona kwalepele bingi. Ku ino mpunzha, Davida ko ko apopejile tente mo babikile jikwachi ja lulayañano, kufikatu ne kimye kyo bashimikile nzubo ya Lesa.​—2 Sam. 6:17.

3. Mambo ka o twafwainwa kumvwisha byaamba Salamo 15? (Monai ne kipikichala.)

³ Bena Isalela bavula kechi bebaswishishe kwingijila pa tente wa lusambakeno ne, kabiji bachechetu bo bonka bo baswishishe kutwela mukachi ka tente mo balaminanga jikwachi ja lulayañano. Pano bino, bakalume ba Yehoba ba kishinka bonse bakonsha kwikala benyi mu tente wanji wa kifwanyikizho inge batwajijila kwikala balunda nanji. Atweba bonse tukeba kwikala balunda nanji. Salamo 15 waamba pa byubilo bimo ne byo  twafwainwa kwibimwesha pa kuba’mba tutwajijile kwikala balunda ba Yehoba.

IKALAI BABULA KANENENO NE KUBANGA BYAOLOKA

4. Twayuka byepi kuba’mba kubatizhiwa kechi kyo kyonka Yehoba kyo akeba’mba tube ne? (Isaya 48:1)

⁴ Pa Salamo 15:2, mulunda wa Lesa bamulumbulula’mba ke “yewa wabula kaneneno, uba bintu byaoloka.” Abino byo byo twafwainwa kwikala atweba bonse. Nanchi kyakonsheka kwikala ‘babula kaneneno’ nyi? Ee. Nangwa byonkabyo, kafwako muntu walumbuluka ne. Pano bino Yehoba wakonsha kwitumona ‘babula kaneneno’ inge ke twibikeko kumukookela. Inge twipana kwi Lesa ne kubatizhiwa, ino yo ntendekelotu ya kwenda ne Lesa. Mu moba a kala, kwikala mu kisaka kya bena Isalela, kechi kwalumbululanga’mba pano muntu waikala mwenyi wa Yehoba ne. Bamo baitanga pe Lesa, pano bino kechi “mu bukine ne mu bololoke ne.” (Tangai Isaya 48:1.) Pa kuba’mba bena Isalela bamweshe’mba kine bakebelenga kwikala benyi ba Yehoba, bafwainwe kuyuka mizhilo ya Yehoba ne kwiilondela. Po pamotu ne lelo jino, pa kuba’mba twitabilwe kwi Lesa, kuji bintu bikwabo byo twafwainwa kuba, kechi kubatizhiwatu ne kupwanañana na bena Kilishitu mu kipwilo ne. Twafwainwa kutwajijila kuba “bintu byaoloka.” Twakonsha kuba byepi bino?

5. Kukookela Yehoba mu bintu byonse kwavwangamo ka?

⁵ Kwesakana na mumwena Yehoba, kwikala ‘babula kaneneno’ ne ‘kuba bintu byaoloka’ kulumbulula byavula, kechi kuyatu na kupwila pa Nzubo ya Bufumu ne. (1 Sam. 15:22) Twafwainwa kwibikangako kukookela Lesa mu bintu byonse byo tuba mu bwikalo bwetu nangwatu inge tuji kwa bunke. (Maana 3:6; Sapwi. 12:13, 14) Kyanema bingi kukookela Yehoba nangwatu mu tubintu tucheche. Kuba bino kumwesha’mba twamutemwa kabiji kino  kitulengela kufwenya kwipi ne aye.​—Yoa. 14:23; 1 Yoa. 5:3.

6. Kwesakana na Bahebelu 6:10-12, ñanyi kintu kyanema kukila bintu byawama byo twaubile kala?

⁶ Yehoba usanta bingi pa bintu byawama byo twamubila. Nangwa byonkabyo, bintu byawama byo twamubijile kala kechi byo byonka byafwainwa kwitulengela kutwajijila kwikala benyi mu tente wa Yehoba ne. Kino kishinka bekilumbulula bingi bulongo pa Bahebelu 6:10-12. (Tangai.) Yehoba kechi ulubamo bintu byawama byo twamubijile kala ne. Nangwa byonkabyo, ukeba’mba tutwajijile kumwingijila na muchima yense “kufika ne ku mpelo.” Uketufweta ne kwikala balunda nanji myaka ne myaka “umvwe twabula kukooka.”​—Nga. 6:9.

AMBAINGA BYA KINE MU MUCHIMA WENU

7. Kwamba bya kine mu muchima wetu kwavwangamo ka?

⁷ Muntu yense ukeba kwitabilwa ne kwikala mwenyi mu tente wa Yehoba, wafwainwa ‘kwambanga bya kine mu muchima wanji.’ (Sala. 15:2) Kino kechi kilumbulula kubula kwambatu bya bubela ne. Yehoba ukeba atweba kutwajijila kwikala ba kishinka mu byo twamba ne kuba. (Hebe. 13:18) Kino kyanema bingi “mambo Yehoba washikwa muntu wa bujimbijimbi, pakuba aba baoloka bo balunda nanji ba pa muchima.”​—Maana 3:32.

8. Ñanyi kyubilo kyo twafwainwa kuchinuzhuka?

⁸ Aba ‘bamba bukine mu muchima wabo’ kechi bebepekezha’mba baoloka ku bakwabo bino saka balala mizhilo ya Lesa inge baji kwa bunke ne. (Isa. 29:13) Bachinuzhuka kwikala bantu ba bujimbijimbi. Muntu wa bujimbijimbi utendeka kulanguluka’mba mikambizho ya Yehoba imo kechi yawama ne. (Yako. 1:5-8) Wakonsha kuleka kukookela Yehoba mu bintu byo amona aye mwine amba kechi byanema ne. Inge kafwako byatama byafumamo mu kubula kukookela kwanji ne, wakonsha kutwajijla kulala mizhilo ya Lesa kabiji mpopwelo yanji kechi itabilwa kwi Lesa ne. (Sapwi. 8:11) Nangwa byonkabyo, atweba bonse twafwainwa kwikala ba kishinka mu bintu byonse.

9. Ñanyi kintu kyamwekele Yesu byo amonañene ne Natanela, kabiji tufunjilako ka? (Monai ne kipikichala.)

⁹ Twafwainwa kwambanga bukine mu muchima  wetu kabiji kyanema bingi kuba bino. Twayuka kino na mambo a byamwekele kimye Filipai kyo aichile mulunda nanji aye Natanela kuba’mba bamonañane ne Yesu. Nangwa kya kuba Yesu kechi wakimonañenepo kala ne Natanela ne, Yesu waambile amba: “Talai, mwina Isalela wa kine wabula bujimbijimbi.” (Yoa. 1:47) Ibyo kuba’mba Yesu wamonanga baana banji ba bwanga bakwabo kuba’mba ba kishinka. Pano bino, Natanela wajinga wa kishinka bingi kukila bakwabo. Byonkatu byo tuji ne atweba, Natanela naye wajinga mbulwakulumbuluka. Pano bino mwi aye kechi mwajingapo bujimbijimbi ne, wajinga wa kishinka mu bintu byonse. Yesu wamwene bukishinka bwajinga ne Natanela kabiji wamusanchijile. Ne atweba kyakonsha kuwama bingi inge Yesu ke etumone’mba twi ba kishinka.

10. Mambo ka o twafwainwa kuchinuzhukila kwingijisha kutama lujimi wetu? (Yakoba 1:26)

¹⁰ Bintu byavula byo betukambizha kuba biji mu Salamo 15 byaamba pa byo twafwainwa kwikalanga na bakwetu. Salamo 15:3 waamba’mba mwenyi mu tente wa Yehoba ‘kechi uba luntepentepe na lujimi wanji, kuba mukwabo bintu byatama, ne kwamba byatama pa balunda nanji ne.’ Kwingijisha kutama lujimi mu ano mashinda kwakonsha kukozha bakwetu ku muchima kabiji kino kyakonsha kwitulengela kubula kwikala benyi mu tente wa Yehoba.​—Tangai Yakoba 1:26.

11. Luntepentepe lulumbulula ka, kabiji ñanyi kintu kimwekela bantu ba luntepentepe babula kulapila?

¹¹ Nyimbi wa salamo waamba pa luntepentepe. Luntepentepe lulumbulula ka? Lulumbulula kwamba byambo bya bubela pa muntu byakonsha kutamisha jizhina janji jawama. Bantu ba luntepentepe babula kulapila bebapanga mu kipwilo kya bena Kilishitu.—Yele. 17:10.

12-13. Mu ñanyi mashinda amo mo twakonsha kwambila bakwetu bintu byatama kwa kubulatu nangwa kuyuka ne? (Monai ne kipikichala.)

¹² Kabiji Salamo 15:3 wituvululamo kuba’mba mwenyi wa Yehoba kechi uba bakwabo  bintu byatama nangwa kwamba byatama pa balunda nanji ne. Kuba bino kwavwangamo ñanyi bintu?

¹³ Kwa kubula nangwa kuyukatu ne, twakonsha kutamisha jizhina ja muntu inge ke twambe byatama pa yewo muntu. Akilangulukai pa bino bintu: (1) Nyenga waleka mwingilo wa kimye kyonse, (2) bamulume ne mukazhi baleka kwingijila pa Betele, (3) mulongo bamufumya pa bukulumpe mu kipwilo nangwa pa bunkwasho. Nanchi kijitu bulongo kusomba bintu byalengela luno lupimpu ne kutendeka kubuulako bantu byobyo bintu saka twabula kuyuka bishinka byonse nyi? Kwakonsha kwikala bine bintu byalengela lolo lupimpu byo twabula ne kuyuka ne. Kabiji mwenyi mu tente wa Yehoba ‘kechi uba mukwabo bintu byatama nangwa kwamba byatama pa balunda nanji ne.’

NEMEKAINGA BOBA BAKAMWA YEHOBA

14. Lumbululai benyi ba Yehoba byo bakana “mubi yense.”

¹⁴ Salamo 15:4 waamba’mba mulunda wa Yehoba “ukana mubi yense.” Pano twakonsha kuyuka byepi amba awe muntu mubi? Byo tuji bambulwakulumbuluka, kechi twakonsha kuyuka’mba awe muntu mubi nangwa ne. Mambo ka? Kampe twakonsha kutemwa bantu bo kitupelela kupwanañana nabo ne kushikwa bakwabo na mambotu a kuba’mba betufichisha ku muchima. Onkao mambo, twafwainwa kukanatu boba Yehoba bo amona’mba “babi.” (1 Ko. 5:11) Bano bavwangamo bantu boba byatama babula kulapila, balengulula bintu byo twaitabilamo nangwa boba bakeba konauna bulunda bwetu ne Yehoba.​—Maana 13:20.

15. Ñanyi jishinda jimo jo twakonsha kunemekelamo “boba bakamwa Yehoba”?

¹⁵ Kabiji Salamo 15:4 waamba’mba twafwainwa ‘kunemekanga boba bakamwa Yehoba.’ Onkao mambo, tumonapo mashinda o twakonsha kumwesheshamo lusa ne kunemeka balunda ba Yehoba. (Loma 12:10) Jishinda jimo jo baambapo pa Salamo 15:4, ke ja kuba’mba mwenyi uji mu tente wa Yehoba “ufikizha byo alaya, nangwa kya kuba byakonsha kumuletela lukatazho.” Kubula kufikizha byo tulaya kwakonsha kufichisha bakwetu ku muchima. (Mat. 5:37) Kintu kimo ke kya kuba’mba Yehoba ukeba benyi banji kufikizha luchipo lo bachipile kimye kyo besongwelenga. Kabiji Yehoba umvwa bingi bulongo inge bansemi bebikako kubila baana babo bintu byo bebalayile. Kutemwa Lesa ne bantu kuketulengela kufikizha bintu byonse byo tulaya.

16. Ñanyi jishinda jikwabo jo twakonsha kunemekelamo balunda ba Yehoba?

¹⁶ Jishinda jikwabo jo twakonsha kumwesheshamo’mba tunemeka balunda ba Lesa ke kwikala na muchima wa kutambwila benyi ne bumpanyi. (Loma 12:13) Kimye kyo twikala pamo na balongo ne banyenga, tukosesha bulunda bwetu ne abo ne Yehoba. Inge ke tutambwile benyi, tukamwesha’mba tubena kulondela Yehoba.

KECHI MWAFWAINWA KUTEMWISHA MALI NE

17. Mambo ka Salamo 15 o aambila pa mali?

¹⁷ Tutanga kuba’mba mwenyi wa Yehoba “kechi ukongwesha mali amba bamubikilepo nsubu ne, kabiji kechi utambula mazhikakanwa amba azhachishe muntu wabula mambo ne.” (Sala. 15:5) Mambo ka uno Salamo o aambila pa mali? Mambo kutemwisha mali kwakonsha kufichisha bakwetu ku muchima ne konauna bulunda bwetu ne Lesa. (1 Timo. 6:10) Mu moba a kala, bantu bamo bajiilanga makusu pa mutwe bena Kilishitu bakwabo bajinga bayanji kupichila mu kwibambila’mba babikepo nsubu pa kwibabwezhezha mali o bebakongweshanga. Kabiji bamitonyi bamo batambulanga mazhikakanwa ne kufwisha bantu mambo a  bubela. Byubilo bya uno mutundu ke bya bunya kwi Yehoba.​—Ezi. 22:12.

18. Ñanyi mepuzho akonsha kwitukwasha kulangulukapo ne kuyuka inge twatemwisha mali nangwa ne? (Bahebelu 13:5)

¹⁸ Kyawama bingi kimye kyonse kulangulukangapo inge twatemwisha mali nangwa ne. Iipuzhai’mba: ‘Nanchi jonse ñendatu na kulanguluka pa kwikala na mali nyi? Inge nakongola mali, nanchi mbanda kwiabwezha ne kulanguluka’mba mwinao kechi ubena kwiakeba nenyi? Nanchi kwikala na mali kundengela kwimona’mba nanema ne kukankalwa kukwasha boba bakajilwa mali nyi? Nanchi nzhachisha balongo ne banyenga kuba’mba batemwa bingi bintu bya ku mubiji na mambotu a kuba’mba baji na mali nyi? Nanchi nkebatu banonshi kwikala balunda nami kukila bayanji nyi?’ Kyanema bingi kwiipuzha ano mepuzho mambo atweba bonse twi benyi ba Yehoba. Pano bino, tukatwajijilatu kwikala benyi ba Yehoba inge twabula kutemwisha mali. Inge twauba bino, Yehoba kechi uketusha ne.​—Tangai Bahebelu 13:5.

YEHOBA WATEMWA BALUNDA NANJI

19. Mambo ka Yehoba o akebela’mba tulondelenga mikambizho yanji?

¹⁹ Salamo 15 wapezhako na mulaye wa kuba’mba: “Yense uba bino bintu, kechi ukasunkena nangwa pachechetu ne.” (Sala. 15:5) Mu bino byambo, nyimbi wa salamo wamwesha ene mambo Lesa o akebela’mba tulondelenga mikambizho yanji. Yehoba ukeba’mba twikale na lusekelo. Onkao mambo, inge ke tube bintu Lesa byo akeba’mba tubenga, aye uketupesha ne kwituzhikijila.​—Isa. 48:17.

20. Ñanyi bintu bitengela benyi ba Yehoba?

²⁰ Bantu Yehoba bo aitabizha kwikala benyi banji batengela bintu byawama bingi biji kulutwe. Bashingwa ba kishinka bakekalanga mu “mapunzha a kwikalamo avula” Yesu o ebanengezhejile mwiulu. (Yoa. 14:2) Aba baji na luketekelo lwa kwikala pano pa ntanda batengela bintu byawama byo baambapo pa Lumwekesho 21:3. Kyanema bingi kuba’mba Yehoba witwita atweba bonse kwikala balunda nanji ne kwikala benyi mu tente wanji myaka ne myaka.