1. Aw Sam 15:​1-5 go ɛp wi?

 INSAY di atikul bifo dis wan, wi bin lan se Jiova in savant dɛn we dɔn gi dɛn layf to am go bi strenja dɛn na in tɛnt we dɛn gɛt tayt padi biznɛs wit am. Bɔt wetin wi nid fɔ du fɔ bi strenja dɛn na in tɛnt? Sam 15 tɔk mɔ bɔt wetin wi nid fɔ du. (Rid Sam 15:​1-5.) Dis sam tɔk bɔt tin dɛn we go ɛp wi fɔ gɛt tayt padi biznɛs wit Gɔd.

2. Wetin go dɔn mek Devid tɔk bɔt Jiova in tɛnt?

² Sam 15 bigin wit di wɔd dɛn we se: “E Jiova, udat go de as strenja na yu tɛnt? Udat go de na yu oli mawntin?” (Sam 15:1) We Devid bin de tɔk bɔt Jiova in “tɛnt,” sɔntɛm i bin de tink bɔt di tabanakul we bin de na Gibiɔn fɔ sɔm tɛm. Devid tɔk bak bɔt Gɔd in “oli mawntin,” ɛn sɔntɛm i bin de tɔk bɔt Mawnt Zayɔn we de na Jerusɛlɛm. Da ples de bin de na di sawt pat na Gibiɔn, ɛn pɔsin go nid fɔ travul fɔ lɛk 10 kilomita (6.2 mayl) fɔ go de. Na de Devid bin mek wan tɛnt fɔ kip di agrimɛnt bɔks te dɛn bil di tɛmpul.​—2 Sam. 6:17.

3. Wetin mek wi want fɔ ɔndastand Sam 15? (Luk bak di pikchɔ.)

³ As wi ɔl no, bɔku Izrɛlayt dɛn nɔ bin ɛva wok na di tabanakul, ɛn di wan dɛn we bin de ɛnta na di ples usay dɛn bin kip di agrimɛnt bɔks nɔ bin bɔku. Bɔt ɔl Jiova in fetful savant dɛn go ebul bi strenja na in tɛnt bay we dɛn bi in padi dɛn ɛn kɔntinyu fɔ bi in padi dɛn. Dat na sɔntin we wi ɔl want. Sam 15 tɔk bɔt sɔm kwaliti dɛn we wi nid fɔ gɛt ɛn sho fɔ mek wi kɔntinyu fɔ bi Jiova in padi dɛn.

 BI PƆSIN WE NƆ GƐT WAN FƆLT ƐN WE DE DU WETIN RAYT

4. Aw wi no se Jiova nɔ jɔs want wi fɔ baptayz? (Ayzaya 48:1)

⁴ Na Sam 15:​2, di Baybul tɔk se Gɔd in padi na pɔsin “we nɔ gɛt wan fɔlt” ɛn “we de du wetin rayt.” Di wɔd dɛn “de du” min se na sɔntin we wi fɔ kɔntinyu fɔ du. Bɔt wi go rili ebul fɔ bi pɔsin “we nɔ gɛt wan fɔlt”? Yɛs. Pan ɔl we wi nɔn nɔ pafɛkt, Jiova go si wi as pipul dɛn we “nɔ gɛt wan fɔlt” if wi du wi bɛst fɔ obe am. We wi gi wi layf to Gɔd ɛn baptayz, dat na jɔs di bigin fɔ bi Gɔd in padi. Fɔ ɛgzampul, insay di tɛm we dɛn bin de rayt di Baybul, jɔs bikɔs pɔsin na Izrɛlayt nɔ min se in na Jiova in strenja. Sɔm pipul dɛn bin de pre to am bɔt “nɔto di tru we ɛn di rayt we.” (Rid Ayzaya 48:1.) Di Izrɛlayt dɛn we bin rili want fɔ bi Jiova in strenja dɛn bin nid fɔ lan bɔt Jiova in lɔ dɛn ɛn fala dɛn. Semweso, fɔ mek Gɔd gladi fɔ wi tide, wi nɔ jɔs fɔ baptayz ɛn bi wan pan Jiova Witnɛs dɛn. Wi fɔ “de du wetin rayt.” Wetin dat min?

5. Wetin i min fɔ obe Jiova pan ɔltin?

⁵ To Jiova, fɔ bi pɔsin “we nɔ gɛt wan fɔlt” ɛn “we de du wetin rayt” nɔ jɔs min fɔ de atɛnd mitin dɛn na Kiŋdɔm Ɔl ɔltɛm. (1 Sam. 15:22) Wi fɔ tray tranga wan fɔ obe Gɔd pan ɔltin, ivin we na wi wangren de. (Prɔv. 3:6; Ɛkli. 12:​13, 14) I impɔtant fɔ mek wi tray fɔ obe Jiova ivin pan tin dɛn we wi tink se nɔ tu impɔtant. We wi du dat, wi de sho se wi rili lɛk am ɛn dat go mek i lɛk wi mɔ ɛn mɔ.​—Jɔn 14:23; 1 Jɔn 5:3.

6. Akɔdin to Ibruz 6:​10-12, wetin impɔtant pas di gud tin dɛn we wi bin dɔn du trade?

⁶ Jiova rili gladi fɔ di tin dɛn we wi  bin du fɔ am trade. Bɔt jɔs bikɔs wi bin du gud tin dɛn trade, nɔ min se wi go kɔntinyu fɔ bi strenja dɛn na Jiova in tɛnt. Wi si dis klia wan na Ibruz 6:​10-12. (Rid.) Jiova nɔ de fɔgɛt di gud tin dɛn we wi bin dɔn du trade. Bɔt i want wi fɔ kɔntinyu fɔ sav am fetful wan “te di ɛnd.” I go bi wi padi sote go “if wi nɔ taya.”​—Gal. 6:9.

BI PƆSIN WE DE TƆK TRU NA IN AT

7. Wetin i min fɔ tɔk na wi at?

⁷ Pɔsin we want fɔ bi strenja na Jiova in tɛnt fɔ de “tɔk tru na in at.” (Sam 15:2) Dis nɔ jɔs min se wi nɔ fɔ lay. Jiova want wi fɔ ɔnɛs pan ɔltin we wi de se ɔ du. (Ibru. 13:18) Dat na tin we impɔtant, bikɔs “Jiova et pɔsin we kɔni, bɔt i gɛt tayt padi biznɛs wit pɔsin we de du tin tret.”​—Prɔv. 3:32.

8. Us abit wi nid fɔ avɔyd?

⁸ Di wan dɛn we de “tɔk tru na [dɛn] at” nɔ de mek lɛk se dɛn de obe Gɔd in lɔ dɛn we ɔda pipul dɛn de si dɛn, bɔt nɔ de obe Gɔd in lɔ dɛn we nɔbɔdi nɔ de si dɛn. (Ayz. 29:13) Dɛn de avɔyd fɔ biev kɔni we. Sɔntɛm, pɔsin we kɔni go bigin fɔ dawt if Jiova in lɔ dɛn mek sɛns ɔltɛm. (Jems 1:​5-8) Sɔntɛm i nɔ go obe Jiova pan tin dɛn we i tink se nɔ tu impɔtant. Dɔn if i tan lɛk se bad tin nɔ apin to am we i nɔ obe Gɔd in lɔ dɛn, sɔntɛm dat go mek i gɛt maynd mɔ fɔ du tin dɛn we de agens Gɔd in lɔ dɛn, ɛn dat go mek Jiova si am as pɔsin we ipokrit. (Ɛkli. 8:11) Bɔt, wi want fɔ bi pipul dɛn we ɔnɛs pan ɔltin.

9. Wetin wi lan frɔm wetin bin apin di fɔs tɛm we Jizɔs ɛn Natanɛl bin si? (Luk bak di pikchɔ.)

⁹ Wi kin lan bɔt wetin mek i impɔtant fɔ bi pɔsin we ɔnɛs frɔm wetin bin apin di fɔs tɛm we Jizɔs ɛn Natanɛl bin si. We Filip bin kam wit in padi Natanɛl fɔ kam si Jizɔs, wan impɔtant tin bin apin. Pan ɔl we dis na di fɔs tɛm we Jizɔs ɛn Natanɛl bin si, Jizɔs bin se: “Una luk rial Izrɛlayt we nɔ bɛnbɛn atɔl.”  (Jɔn 1:47) Wan dawt nɔ de se Jizɔs bin de si in ɔda disaypul dɛn as pipul dɛn we ɔnɛs, bɔt Natanɛl bin ɔnɛs pas dɛn ɔl. Jɔs lɛk wi, Natanɛl nɔ bin pafɛkt. Bɔt in nɔto pɔsin we bin ipokrit, i bin ɔnɛs pan ɔltin. Jizɔs bin kɔle Natanɛl bikɔs ɔf dat ɛn i bin tɔk fayn tin bɔt am. I go bi big big ɔnɔ fɔ wi, if Jizɔs tɔk di sem tin bɔt wi!

10. Wetin mek wi fɔ tek tɛm wit wetin wi de tɔk? (Jems 1:26)

¹⁰ Bɔku pan di tin dɛn we Sam 15 se wi fɔ du gɛt sɔntin fɔ du wit di we aw wi de trit ɔda pipul dɛn. Sam 15:3 se pɔsin we na strenja na Jiova in tɛnt “nɔ de yuz in mɔt fɔ pwɛl ɔda pipul dɛn, i nɔ de du bad tin to in neba ɛn i nɔ de mek in padi dɛn shem.” If wi de pwɛl ɔda pipul dɛn nem, dat go mek dɛn rili fil bad ɛn wi nɔ go kɔntinyu fɔ bi strenja na Jiova in tɛnt.​—Rid Jems 1:26.

11. Wetin go apin to di wan dɛn we de yuz dɛn mɔt fɔ pwɛl ɔda pipul dɛn ɛn nɔ gri fɔ ripɛnt?

¹¹ Di pɔsin we rayt dis sam tɔk bɔt pɔsin we de yuz in mɔt fɔ pwɛl ɔda pipul dɛn. I de tɔk lay lay tin dɛn fɔ pwɛl ɔda pɔsin in gud nem. Di wan dɛn we de yuz dɛn mɔt fɔ pwɛl ɔda pipul dɛn nem ɛn we nɔ gri fɔ ripɛnt nɔ go kɔntinyu fɔ de na di kɔngrigeshɔn.​—Jɛr. 17:10.

12-13. Wetin na sɔm tin dɛn we go apin we go mek wi tɔk sɔntin we go mek wi padi dɛn shem pan ɔl we wi nɔ min fɔ du dat? (Luk bak di pikchɔ.)

¹² Sam 15:3 mɛmba wi bak se, Jiova in strenja dɛn nɔ de du bad to dɛn neba ɛn dɛn nɔ de tɔk tin dɛn we go mek dɛn padi dɛn shem. Aw wi go mek wi padi dɛn shem?

¹³ Wi kin tɔk sɔntin we go mek pɔsin shem pan ɔl we wi nɔ min fɔ du dat bay we wi de tɔk bad tin bɔt am. Fɔ ɛgzampul: (1) wan sista stɔp fɔ payɔnia, (2) wan brɔda ɛn in wɛf stɔp fɔ wok na  Bɛtɛl, ɔ (3) wan brɔda nɔto ɛlda ɔ ministerial savant igen. Yu tink se i go fayn fɔ mek wi tray fɔ no di rizin dɛn we mek dɛn nɔ kɔntinyu wit dɛn asaynmɛnt ɛn tɛl ɔda pipul dɛn wetin wi tink? Sɔntɛm bɔku rizin dɛn de we mek dɛn nɔ kɔntinyu wit dɛn asaynmɛnt we wi nɔ no bɔt. Pɔsin we na strenja na Jiova in tɛnt “nɔ de du bad tin to in neba, ɛn i nɔ de mek in padi dɛn shem.”

ƆNƆ DI WAN DƐN WE DE FRED JIOVA

14. Ɛksplen aw Jiova in strenja dɛn nɔ de gladi fɔ “ɛnibɔdi we nɔ gɛt rɛspɛkt.”

¹⁴ Sam 15:4 tɔk se Jiova in padi “nɔ de gladi fɔ ɛnibɔdi we nɔ gɛt rɛspɛkt.” Aw wi go no se pɔsin nɔ gɛt rɛspɛkt fɔ Jiova? Bikɔs wi nɔ pafɛkt, wi nɔ ebul fɔ no if pɔsin gɛt rɛspɛkt ɔ i nɔ gɛt rɛspɛkt fɔ Jiova. Wetin mek? I nɔmal fɔ mek wi lɛk pipul dɛn we gɛt abit dɛn we wi lɛk ɛn nɔ lɛk pipul dɛn we gɛt abit dɛn we wi nɔ lɛk. So, di pipul dɛn nɔmɔ we wi nɔ fɔ gladi fɔ na di wan dɛn we Jiova se “nɔ gɛt rɛspɛkt.” (1 Kɔr. 5:11) Dat na pipul dɛn we de kɔntinyu fɔ du bad ɛn nɔ ripɛnt, we nɔ gɛt rɛspɛkt fɔ wetin wi biliv, ɔ we de tray fɔ pwɛl wi padi biznɛs wit Jiova.​—Prɔv. 13:20.

15. Wetin na wan we, we wi go ɔnɔ di wan dɛn we “de fred Jiova”?

¹⁵ Afta dat, Sam 15:4 kɔntinyu fɔ tɔk se wi fɔ ɔnɔ “di wan dɛn we de fred Jiova.” So wi de luk fɔ we dɛn fɔ du gud to Jiova in padi dɛn ɛn sho se wi rɛspɛkt dɛn. (Rom. 12:10) Aw? Wan we, we Sam 15:4 tɔk bɔt, na dat pɔsin we na strenja na Jiova in tɛnt “de du wetin i prɔmis ilɛksɛf tin nɔ kɔmɔt fayn fɔ am.” We wi nɔ du di tin dɛn we wi prɔmis fɔ du, dat go mek ɔda pipul dɛn fil bad. (Mat. 5:37) Fɔ ɛgzampul, Jiova de ɛkspɛkt maredman ɛn mareduman dɛn fɔ kip di prɔmis we dɛn bin mek to dɛnsɛf di de we dɛn mared. I de gladi bak we mama ɛn papa dɛn de tray tranga wan fɔ du wetin dɛn dɔn prɔmis dɛn pikin dɛn. Di lɛk we wi lɛk Gɔd ɛn wi neba dɛn go mek wi tray tranga wan fɔ du wetin wi dɔn prɔmis.

16. Us ɔda we wi go ɔnɔ Jiova in padi dɛn?

¹⁶ Wan ɔda we, we wi go ɔnɔ Gɔd in padi dɛn na we wi kia fɔ dɛn ɛn gɛt fri-an. (Rom. 12:13) We wi de spɛn tɛm wit wi brɔda ɛn sista dɛn apat frɔm we wi kin de na mitin ɔ fil savis, dat de ɛp fɔ mek wi padi biznɛs wit dɛn ɛn wit Jiova tayt mɔ ɛn mɔ. Dɔn bak, we wi kia fɔ dɛn, wi de falamakata Jiova.

BI PƆSIN WE NƆ LƐK MƆNI

17. Wetin mek Sam 15 tɔk bɔt mɔni?

¹⁷ Wi rid se Jiova in strenja “nɔ de lɛnt mɔni ɛn aks fɔ intrɛst, ɛn i nɔ de tek brayb fɔ du bad to di wan we inosɛnt.” (Sam 15:5) Wetin mek dis shɔt sam tɔk bɔt mɔni? Na bikɔs if wi nɔ de tink di rayt we bɔt mɔni, dat go mek wi du tin we go mek ɔda pipul dɛn fil bad ɛn ambɔg wi padi biznɛs wit Gɔd. (1 Tim. 6:10) Insay di tɛm we dɛn bin de rayt di Baybul, sɔm pipul dɛn nɔ bin de trit dɛn brɔda dɛn we po fia wan bay we dɛn bin de mek dɛn pe mɔni we pas di mɔni we dɛn lɛnt to dɛn. Dɔn bak, sɔm jɔj dɛn bin de tek brayd ɛn jɔj inosɛnt pipul dɛn di kayn we we nɔ fia. Jiova et we pipul dɛn de du ɛni wan pan dɛn tin dɛn ya.​—Izi. 22:12.

18. Us kwɛstyɔn dɛn go ɛp wi fɔ no aw wi de si mɔni? (Ibruz 13:5)

 ¹⁸ I fayn fɔ mek wi chɛk wisɛf fɔ no aw wi de si mɔni. Aks yusɛf: ‘Fɔ se bɔku tɛm a de tink bɔt mɔni ɛn wetin a go yuz am fɔ bay? If a lɛnt mɔni, a de westɛm fɔ pe di pɔsin bak, bikɔs a tink se di pɔsin nɔ nid am? Fɔ se we a gɛt mɔni a kin fil se a bɛtɛ pas ɔda pipul dɛn? I nɔ izi fɔ mek a du gud to ɔda pipul dɛn? Fɔ se a kin tink se if brɔda ɛn sista dɛn gɛt bɔku mɔni na bikɔs dɛn lɛk mɔni pas aw dɛn lɛk Jiova? Fɔ se na pipul dɛn nɔmɔ we gɛt mɔni a kin mek padi ɛn nɔ bisin bɔt di wan dɛn we po? I impɔtant fɔ mek wi aks wisɛf dɛn kwɛstyɔn dɛn ya bikɔs na big big ɔnɔ wi gɛt fɔ bi Jiova in strenja dɛn. Wi go ebul fɔ protɛkt da ɔnɔ de bay we wi de liv wi layf di kayn we we de sho se wi nɔ lɛk mɔni. If wi du dat, Jiova nɔ go ɛva lɛf wi!—Rid Ibruz 13:5.

JIOVA LƐK IN PADI DƐN

19. Wetin mek Jiova want wi fɔ du ɔl di tin dɛn we de na Sam 15?

¹⁹ Sam 15 ɛnd wit di prɔmis we se: “Natin nɔ go ɛva shek di wan we de du dɛn tin dɛn ya.” (Sam 15:5) Na dis vas, di pɔsin we rayt dis sam sho di rizin we mek Jiova want wi fɔ du ɔl di tin dɛn we de na Sam 15. Jiova want wi fɔ gɛt gladi-at. So, i de tɛl wi wetin fɔ du fɔ mek i blɛs wi ɛn protɛkt wi.​—Ayz. 48:17.

20. Wetin Jiova in strenja dɛn fɔ op fɔ gɛt tumara bambay?

²⁰ Jiova in strenja dɛn fɔ op se dɛn tumara bambay go rili fayn. Di anɔyntɛd Kristian dɛn we fetful go go na di “bɔku ples [we] de fɔ tap” we Jizɔs dɔn rɛdi fɔ dɛn na ɛvin. (Jɔn 14:2) Di wan dɛn we gɛt op fɔ de na di wɔl de op fɔ si we di prɔmis dɛn we de na Rɛvɛleshɔn 21:3 de kam tru. Fɔ tru, na big big ɔnɔ wi gɛt fɔ mek Jiova invayt wi fɔ bi strenja dɛn na in tɛnt sote go!