1. Vɛɛ Sam 15:​1-5 mala yɛ naa?

 O BUŊGƐI naŋ hiou ve niŋ, miŋ pɛɛku maa wanaa yɔŋgu yoomula ndalaŋ o Chɛhowa lo wa, a tiuba ma wa mialaa nduaa o naa nduaa chalaa niŋ, nduyɛ ma nɔ chaŋyɛi kpɛɛluŋnde a ndu. Kɛ yɛɛ naŋ nɔ miŋ tosa le miŋ wa mialaa nduaa? Sam 15 tɛɛsial naa nyɛ naŋ nɔ miŋ tosa wo. (Nuawɔ Sam 15:​1-5.) Bolle Baabuileŋ ndeŋ le chɔm naa sɔɔŋ sɔvɛ mala naa, le miŋ sɔɔŋguu Mɛlɛka ikɛi kpɛɛluŋ ndoŋ.

2. A yɛɛ okɔɔ wana ŋchondoo Deeve wa yɛ yiyaŋndo, mɛɛ o soo a naa chalaa Mɛlɛkaa okɔɔ?

² Mi Sam 15 kandu a diomndaŋ ndaŋ aa, ‘oo Mɛlɛka Yaawɛɛ o nɛɛ niaa ŋ chɛllɛ le ma luɛi o naa chalaa numnda niŋ? Pembii num ii diandɛi, o nɛɛ niaa ŋ chɛllɛ ma wa lechoo?’ (Sam 15:1) Naapum a tɛndii Mɛlɛkaa, o wa Kibiɔŋ le teleŋ tiŋndo, wana ŋchondoo Deeve wa yiyaŋndo ni mɛɛ o wa suɛi a naa chalaa Mɛlɛkaa okɔɔ. Nduyɛ mɛɛ Deeve soo a pembii diandɛi Mɛlɛka ve okɔɔ, naapum a tɛndii wa o pembii Saayɔŋnde choo o Chulusalɛm niŋndo okɔɔ, o wa yiyaŋndo ni. Kibiɔŋ ba touwo pɔ tɛndiiyo hoo wa ni. Mi Deeve taŋgul tɛndii koŋ le mi kɔfu kpema Mɛlɛkaa wa loŋ le teleŋ tiŋ, haaa mi ndaa chii chiɛi Mɛlɛkaa taŋgul.—2 Saam. 6: 17.

3. Le yɛɛ naŋ nɔ yɛ miŋ nɔ yeemɛi o nyɛ Sam 15 dimi wo niŋ? (Tofa vɛlɛ fotueiyo.)

³ I cho tonya maa, Isɔluɛiyaa bɔɔbɔɔ ndaa tosa wallo o tɛndii Mɛlɛkaa niŋ te. Nduyɛ wanaa ndaa tosa wallo loŋ nda bɛɛ, o cho nda kpou le ndaa luɛi o fondaŋ kɔfu kpema Mɛlɛkaa wa o kɛsiaa wo le. Kɛ wana o wana wa Chɛhowa piɛiyo o laalaŋndo choo, ndoo tiuba mbo wa miallo o naa chalaa Mɛlɛkaa, te ndoo simnuŋ pɛ chaaŋ ndɔ, nduyɛ mbo hiou lachi a chaŋyɛi kɛndɛi nɔɔ a ndu. Hei naa kpou yeema ni. Sam 15 chɔm suliŋndaŋ lapum la naŋ nɔ miŋ nɔ, le halikpeŋ miŋ hiou lachi a waa chaaŋaa Mɛlɛkaa wa.

 TOSA NYƐ BƐNDA MƐLƐKA O HƆL, NDUYƐ MBO WA SAKPO WO

4. Vɛɛ naŋ looku yɛ sina maa o cho ko yiŋɔɔ sɔla le Chɛhowa yeema naa o ba le? (Aisaya 48:1)

⁴ O Sam 15:2 niŋ, mi Baabuiyo tɛɛsiaa a wana cho chaaŋ o Mɛlɛka wo okɔɔ maa, mbo ‘tosa nyɛ bɛnda Mɛlɛka o hɔl nduyɛ mbo wa sakpo wo.’ Diomnda dimiŋ laŋ ndaŋ la sim maa, ŋ nɔ miŋ hiou lachi a nyɛ cho o kɛndɔɔ wo tosaa. Kɛ baa ŋ nɔla pa kpeekpei miŋ tosa hei? Ei. Mi che bɛɛ nuaa wana o wana cho walaŋ te, kɛ mi Chɛhowa che maa ŋ cho ‘nyɛ bɛnda ndu o hɔl nduyɛ mbo wa sakpo wo’ tosaa, te ŋ tosa pɛ nyɛ naŋ tiuba wo le ndu diikɔŋndo. Te ŋ yɔŋgu pɛ yoomula naalaŋ o Mɛlɛka lo, nduyɛ miŋ sɔla yiŋɔɔ, mɛɛ chaŋyɛi naŋ kandu keŋ kilaa a Chɛhowa ni. Loonuŋ maa o sindɔɔ niŋ o yɔŋ bɛɛ mi waŋndo ndoo wa Isɔluɛinɔɔ, kɛŋ ndii siiŋguu ndu mial Chɛhowaa le. Mi apum ndaa piɛi ndu, kɛ o ve “o nɛi tonyaa choo le.” (Nuawɔ Aisaya 48:1) Le mi Isɔluɛiya ndaa chɔm maa a nɔ yeemɛi kpeekpeiye le waa mialaa Chɛhowaa, ndaa nɔ ma pɛɛku sawala Chɛhowalaŋ nduyɛ ma tol taŋ kɔɔli. O nɛi pilɛ koŋ choo, naa bɛɛ le miŋ nɔ hau chaŋyɛi kpɛɛluŋnde a Chɛhowa, ŋ nɔ ko miŋ sɔla yiŋɔɔ, nduyɛ miŋ wa kɔlaŋ o bɔŋaŋndaŋ te. Ŋ nɔ miŋ hiou lachi a nyɛ cho sakpo wo tosaa. Vɛɛ naŋ tosa yɛ keŋ?

5. Yɛɛ Chɛhowa diikɔŋndo o nyɛ o nyɛ niŋ sim yɛ?

⁵ Le Chɛhowa, nyɛ bɛnda ndu o hɔl nduyɛ mbo wa sakpo wo tosaa sim ko sɔɔŋ tosaa teleŋ o teleŋ o ndu piɛiyo niŋ te. (1 Saam. 15:22) Ŋ nɔ miŋ kindiŋ le ndu diikɔŋndo o nyɛ o nyɛ naŋ tosa o yoomoo niŋ, o yɔŋ bɛɛ miŋ wa kpeele. (Pulɔ. 3:6; Ikili. 12:​13, 14) I cho suɛi sɔvɛ le miŋ diikuŋ Chɛhowa o yɔŋ bɛɛ o sɔɔŋ taaniŋndoŋ niŋ. Hei tosaa cho chɔm ni maa ŋ kaala ndu a kɔllo kpou, nduyɛ i mala naa miŋ sɔɔŋguu ndu ikɛi kpɛɛluŋ.—Chɔŋ 14:23; 1 Chɔŋ 5:3.

6. A mɛɛ Hibuluiya 6:​10-12 dimi yɛ, yɛɛnɛ cho yɛ o sɔvɛ mbo hiau sɔɔŋ kɛndɛŋ naŋ tosa o paandoo niŋndoŋ?

 ⁶ Chɛhowa nɔ balika melaa tau le nyɛ naŋ tosa le ndu o paandoo niŋndo. A koŋ kpou, sɔɔŋ kɛndɛŋ naŋ tosa le ndu o paandoo niŋndoŋ sim nuaa maa, ŋ cho wa mialla o naa nduaa chalaa lefafɛɛŋ te. Hei cho kpendekele te ŋ tofa pɛ Hibuluiya 6:​10-12. (Nuawɔ) I cho tonya maa Chɛhowa puɛɛnuŋ sɔɔŋ kɛndɛŋ naŋ tosa o paandoo niŋndoŋ te. Kɛ o yeema naa miŋ hiou lachi a ndu piɛiyo a kɔllo kpou “haaa o mɛɛlulaŋ.” O cho hiouwɔɔ lachi a waa o chaŋyɛi niŋ a naa lefafɛɛŋ, “te ŋ vi ŋdial te.”—Kalee. 6:9.

DIMI TONYAA CHƆNƆŊNDO O KƆLLO NIŊ DI

7. Yɛɛ o sim yɛ le tonyaa dimioo chɔnɔŋndo o kɔllo niŋ di?

⁷ Wana yeema mbo wa mial Chɛhowaa o naa nduaa chalaa wo, o nɔ mbo “dimi tonyaa chɔnɔŋndo o kɔllo niŋ di.” (Sam 15:2) Hei sim ko nuaa maa, ŋ nɔ miŋ dimi lachoo le le. Kɛ i sim maa, Chɛhowa yeema naa miŋ chɔm sandei o nyɛ naŋ dimi wo, a nyɛ naŋ tosa wo niŋ. (Hibu. 13:18) Hei cho suɛi sɔvɛ kanifuule, ‘Mɛlɛka Yaawɛɛ o tul wanaa tosa sɔɔŋ wɔɔŋndoŋ nda leyɛ. Kɛ wanaa tosa sɔɔŋ kɛndɔŋ nda, nda o wa o chaŋyɛi kpɛɛluŋnde niŋ a nda ni.’—Pulɔ. 3:32.

8. Sɔɔŋ kuɛɛ naŋ nɔ yɛ miŋ fafaŋ?

⁸ Wanaa dimi tonyaa chɔnɔŋndo o kɔllo niŋ di wa, chɔm waŋnda o hɔl maa a cho sawala Chɛhowalaŋ diikɔŋndo, kɛ ma wa laŋ tɛɛmbuuwo o lesɔŋgi le. (Aisaya 29:13) Mi wanaa waa nuaa fafaŋ balaŋ lueiyo o sɔɔŋ wɔɔŋndo niŋ. Lepum, mi wana tosa sɔɔŋ wɔɔŋndoŋ ndo, kandu kiisaŋndo nɔɔ a taasi cho o sawala Chɛhowalaŋ niŋndo okɔɔ. (Chemi. 1:​5-8) Naapum mi wana waa nuaa kɛɛ Chɛhowa diikɔŋndo, o sɔɔŋ o yiyaŋ maa ŋ cho ŋ sɔvɛ le woŋ niŋ. Nduyɛ te o tɛɛmbuu pɛ sawa Chɛhowa wo mbo sɔla fulamakɔɔli wɔɔŋ le keŋ te, naapum mi keŋ tosa mbo chɔɔlu balaŋ luei o sɔɔŋ wɔɔŋndoŋ tosaa niŋ. Mi che bɛɛ naa mbo yiyaŋ maa o cho Mɛlɛka piɛiyo a kɔllo kpou, kɛ kposoŋ bɛɛ Chɛhowa chɛl piɛile ndɔleŋ te. (Ikili. 8:11) Lelaŋ, ŋ nɔ miŋ chɔm sandei o nyɛ o nyɛ niŋ.

9. Yɛɛ naŋ pɛɛku yɛ o nyɛ Chiisu dimi a Nataaniɛɛ okɔɔ wo niŋ, teleŋ tase nda chiikaŋndo? (Tofa vɛlɛ fotueiyo)

⁹ Ŋ tiuba miŋ pɛɛku suɛi sɔvɛ sɔvɛi le Chɛhowa  piɛiyo a kɔllo kpou, o nyɛ Chiisu dimi a Nataaniɛɛ okɔɔ wo niŋ, teleŋ tase nda chiikaŋndo. Mɛɛ Filipi hiŋ a chaŋndɔ Nataaniɛɛ le mbo chiikaŋ a Chiisu, mi suɛi kɔndɔfille yɔŋnuŋ. Mi che bɛɛ Nataaniɛɛ ndoo chiikaŋ ndɔ a Chiisu lepilɛ bɛɛ le, kɛ mi Chiisu dimi aa: “Isɔluɛinɔɔ kpeekpei cho hoo ni, o nɔ sɔŋ o sɔŋ te wo.” (Chɔŋ 1:47) I cho tonya maa, Chiisu ndoo che buɛiyaa nduaa apiliaa maa a sandu. Kɛ mbo dimi maa Nataaniɛɛ sandu, nduyɛ ndoo nɔ sɔŋ o sɔŋ te. Mi chɛ bɛɛ wana hakioo Nataaniɛɛ wa ni, kɛ ndoo nɔ sondo yeelɛi o sɔɔŋ niŋ te, ndoo sandu o nyɛ o nyɛ niŋ. Mi keŋ nɛŋi Chiisu kɔllo tau nduyɛ mbo chandu Nataaniɛɛ le keŋ. Nuawɔ se dikeŋnaŋ bɛndu le naa, te Chiisu dimi pɛ keŋ a naa okɔɔ!

10. Le yɛɛ ŋ nɔ miŋ soliŋ ke naŋ nɔ le suɛiyo kpeku, o nɛi wɔɔŋndo choo le? (Chemisi 1:26)

¹⁰ Sɔɔŋ bɔɔbɔɔ o Sam 15 niŋ chiɛɛliaŋ a mɛɛ naŋ nɔ miŋ bii acheleŋnda yɛ. Le tamaseliiyo, Sam 15:3 dimi maa, wanaa wa mialla o naa chalaa Mɛlɛkaa wa, a “belu choolaŋ dimioo a chaanda okɔɔ le, a tosa dɛnɛ wɔɔŋ a chaaŋaa ndaa le, nduyɛ a belu a chaaŋaa ndaa o sondo le.” Ke naŋ nɔ le suɛiyo soliŋndo kpeku o nɛi wɔɔŋ waa nuaa choo, tɛɛmbuu acheleŋnda tɔɔ, nduyɛ mbo tosa ŋ suliŋ le waa mialla o naa chalaa Chɛhowaa le.—Nuawɔ Chemisi 1:26.

11. Yɛɛ cho yɛ choolaŋ dimioo a chaanda okɔɔ, nduyɛ yɛɛ yɔŋnuŋ yɛ te wana dimi choolaŋ a chandaa okɔɔ wo kɛɛ pɛ le yɔŋndɔ wɔɔŋndo malɔɔ?

¹¹ Mi wana ŋchondoo Deeve suaa a choolaŋ dimioo a chaanda okɔɔ. O kpeekpei niŋ, mi choolaŋ dimioo a waŋndo okɔɔ tɛɛmbuu tɔɔ kɛndɛ o nɔ wo. Te wana tɛɛmbuu acheleŋnda tɔɔ wo kɛɛ pɛ le yɔŋndɔ wɔɔŋndo malɔɔ, mi keŋ tosa mbo sɔla solioo o kunda leKilisiɔŋndo niŋ.—Chɛlui. 17:10.

12-13. Ɔɔ sɔɔŋ tiŋ ŋ naŋ dimi sɔɔŋ wɔɔŋndoŋ a chaaŋaa naa okɔɔ woŋ, kɛ ŋ ve o sina choo le? (Tofa vɛlɛ fotueiyo)

¹² Mi Sam 15:3 loonuŋ naa maa, mialaa Chɛhowaa tosa dɛnɛ wɔɔŋ a chaaŋaa ndaa le,  nduyɛ a belu a chaaŋaa ndaa o sondo le. Yɛɛ kɛŋ sim yɛ?

¹³ Miŋ dimi sɔɔŋ wɔɔŋndoŋ a waŋndo okɔɔ, nduyɛ miŋ tɛɛmbuu ndu diolaŋ, ŋ vɛ o sina choo le. Le tamaseliiyo, yiyaŋndɔ a sɔɔŋ ŋgaa woŋ muŋ okɔɔ: (1) ndepilɛnɔ kɛɛsiaa maa o cho hiouwɔɔ lachi a kɔɔfaleŋ tosaa le, (2) a soli pɔnɔɔ a lanɔɔ o Bɛtɛl, (3) puaapilɛnɔɔ cho lɛ bɛndu kunda ɔɔ buɛi malalaŋ te. Baa ŋ nɔ pa miŋ tuunuŋ o kɔl sabula yɛlɛmiaalaŋ ndaŋ la tosaŋndo, nduyɛ miŋ wa acheleŋnda tɛɛsiallo a laŋ okɔɔ? I cho tonya maa, mi sabulaŋ la wa tau le yɛlɛmiaala waa nuaa, mi che bɛɛ ŋ sina a laŋ okɔɔ le. Kɛ, mial Chɛhowaa o naa nduaa chalaa ‘tosa dɛnɛwɔɔŋ a chaaŋaa nduaa le, nduyɛ o belu a chaaŋaa nduaa o sondo le.’

KE WANAA KE MƐLƐKA YAAWƐƐ BƐƐLEŊNDA BƐƐLEŊ

14. Tɛɛsiaa wɔ mɛɛ mialaa Chɛhowaa pɛɛsa wana dɛnɛ wɔɔŋndo yɛ?

¹⁴ Sam 15:4 dimi aa: ‘mi wana cho o chaŋyɛi niŋ a Chɛhowa wo pɛɛsa wana dɛnɛ wɔɔŋndo mɛɛ Chɛhowa pɛɛsa ndu yɛ.’ Vɛɛ naŋ tosa yɛ hei? Le mɛɛ naŋ cho wanaa lahakiaa yɛ, ŋ nɔ miŋ kilul waŋndo yamɛi maa wana dɛnɛ wɔɔŋndo le o cho le. Le yɛɛ? Kanifuule, lepum mii wa tɛtɛlɛ le miŋ wa o chaŋyɛi niŋ a wanaa naŋ hɛnaŋ a kaala ndalaŋ nda, mbo hiau wanaa kaala ndalaŋ la tosa miŋ tambu kɔllo wa. Lelaŋ, wanaa Chɛhowa che maa wanaa dɛnɛ wɔɔŋnda wa kinɛi naŋ nɔ ni miŋ fafaŋ. (1 Kɔliŋ. 5:11) Hei sim ni maa, ŋ nɔ miŋ fafaŋ wanaa kɛɛ yɔŋnda ndala wɔɔŋndaŋ malɔɔ wa, wanaa nɔ lebɛɛ le laalaŋnda naalaŋ te wa, ɔɔ wanaa kindiŋ le chaŋyɛi nɛi a Chɛhowa ve tɛɛmbuuwo wa.—Pulɔ. 13:20.

15. Ɔɔ nɛiyo opilɛ o naŋ ke wanaa ke Chɛhowa bɛɛleŋ nda bɛɛleŋ ndo?

¹⁵ O baa pilɔɔ choo, mi Sam 15: 4 dimi aa, ‘ŋ nɔ miŋ ke wanaa ke Chɛhowa bɛɛleŋnda bɛɛleŋ.’ Lelaŋ, ŋ nɔ miŋ ke chaaŋaa Chɛhowaa bɛɛleŋ nduyɛ miŋ nuuviaa nɛilaŋ le nda kɛndɛi tosallo. (Luomaŋ. 12:10) Vɛɛ naŋ tosa kɛŋ? A mɛɛ Sam 15:4 dimi yɛ, nɛiyo o pilɛ cho ni, wana cho hoo mial Chɛhowaa o naa nduaa chalaa wo, ‘te o chua buŋgɛi le suɛi tosaa pɛ, tosaa o tosa ndi ni, o luɛinuŋ maluɛinaŋ choo.’ Te ŋ kɛɛ pɛ le buŋgaŋ naŋ chuaa woŋ peeloo, mi keŋ tɛɛmbuu acheleŋnda kɔllo. (Maa. 5:37) Le tamaseliiyo, Chɛhowa cho wanaa cho o nɔlaŋ niŋnda kɔl le ma peelu buŋgɛi nda chua ve. Mbo naŋ vɛlɛ kɔl tau, te kalaŋ chuauwa dɔu pɛ sɛmbɔɔ le buŋgaŋ nda chuel Chuauwaa ndaa woŋ peeloo. Mi kaala naŋ nɔ le Mɛlɛka a waŋnda chieeya wo, nyindu naa le miŋ tosa nyɛ naŋ tiuba wo, le loo o le diom.

16. Ɔɔ nɛi cheleŋ naŋ ke chaaŋaa Chɛhowaa bɛɛleŋ ndo?

¹⁶ Nɛi cheleŋ naŋ ke chaaŋaa Mɛlɛkaa bɛɛleŋ ndo, cho nda veeloo o lanaa lo bɛɛ, miŋ bii nda nyɛkɛndɛi, nduyɛ miŋ tosal nda kɛndɛi ni. (Luomaŋ. 12:13) Mi teleŋ naŋ chuaa le baltaŋ dɔwɔɔ a puaapiliaa vɛlɛ a ndepiliaa naa wo, mala naa miŋ kindi chaŋyɛi naŋ nɔ a nda vɛlɛ a Chɛhowa ve poŋ. Nduyɛ, te ŋ wa nda pɛ veeloo o lanaa lo bɛɛ, miŋ bii nda nyɛkɛndɛi, mi keŋ chɔm maa ŋ cho tamasi Chɛhowaa tolɔɔ kɔɔli.

FAFAŊ KAALA IKANIOO

17. Le yɛɛ Deeve soo yɛ a kaniei okɔɔ o Sam 15 niŋ?

¹⁷ Mialaa Chɛhowaa ke ‘bɛɛ waŋndo kuoo, a hol banasii lechoo le, nduyɛ a bii luɛiyɔɔ niŋ le wana nɔ dioo wo yaala le.’ (Sam 15:5) Le yɛɛ Deeve soo yɛ a kaniei okɔɔ o bolle Baabuileŋ ndeŋ niŋ? Kanifuule, te ŋ nɔ yiyaŋ kpeŋ kpeŋndo a kaniei okɔɔ le, mi keŋ tɛɛmbuu acheleŋnda kɔltaŋ, nduyɛ mii tɛɛmbuu chaŋyɛi nɛi a Mɛlɛka. (1 Timo. 6:10) O sindɔɔ niŋ,  mi wanaa Mɛlɛkaa apum ndaa handu banasiiyo o kueela ndaa wuu wanaa bala fonduaa laŋ choo, nduyɛ mi keŋ ndii tosa ma sɔla nda tɔnɔɔ o ba. O faŋaŋ okoŋ kɔɔli, mi wanaa kialaa ŋyamaa ndaa bii luɛiyɔɔla niŋndaŋ, okoŋ ma kilul waŋnda yamaŋ o kafalaŋ choo. Chɛhowa tul bɔɔ kaalaŋ ndaŋ leyɛ.—Isi. 22:12.

18. Nyunala kuɛɛ mala yɛ naa le miŋ yaasiaa yiyaŋ naŋ nɔ a kaniei okɔɔ wo? (Hibuluiya 13:5)

¹⁸ I cho suɛi sɔvɛ le miŋ yaasiaa yiyaŋ naŋ nɔ a kaniei okɔɔ wo. Nyunaŋndɔ aa: ‘Baa mi yiyaŋ pa teleŋ o teleŋ a kaniei okɔɔ, vɛlɛ a nyɛm ya piandu a kaniei yoŋ? Te i bii pɛ kuoo waŋndo o ba, baa mi yiyaŋ pa maa wana koŋ o heuba a kanii keŋ te, okoŋ i yala ndi paawa le? Baa mi kaniei tosa pa mi cheŋnuŋ maa i cho wana sɔvɛ? Baa mii wa pa ikala ya o ba, le acheleŋnda kɛndɛi tosallo a kaniei? Le mɛɛ puaapiliaa a ndepiliaa niaa nɔ kaniei yɛ, baa mi kilul nda pa yamɛi maa a kaala bɔɔ nyɛm kiɔɔŋ? Baa a wanaa sulaa koni ya tosa chaŋyɛi ni, okoŋ mi fafaŋ wanaa bala fonduaa?’ Naa kpou sɔla dikeŋnaŋ bɛndu bɛndoo le waa mialaa Chɛhowaa. Nduyɛ ŋ tiuba miŋ hiou lachi a dikeŋnaŋndo hoo nɔɔ, te ŋ fafaŋ pɛ kaala ikanioo. Te ŋ tosa pɛ hei, fɛɛŋ bɛɛ Chɛhowa mel naa le.—Nuawɔ Hibuluiya 13:5.

CHƐHOWA KAALA CHAAŊAA NDUAA

19. Ɔɔ sabu kpeekpei Chɛhowa yeema naa miŋ diikuŋ sawala cho o Sam 15 niŋndaŋ?

¹⁹ Mi Sam 15 mɛɛlu a diomndaŋ ndaŋ aa: “wanaa tosa sɔɔŋ kɛndɛŋ waa nuaa wa, nyɛ o nyɛ hiiluu nda le.” (Sam 15:5) Diomndaŋ ndaŋ la tɛɛsiaa sabu kpeekpei Chɛhowa yeema naa miŋ diikuŋ sawala cho o bolle Baabuileŋ ndeŋ niŋndaŋ. O yeema naa miŋ wa a kɔl kɛndɛ. Lelaŋ, mbo chɔm naa sɔɔŋ naŋ nɔ miŋ tosa le miŋ sɔla sala ndɔɔ, nduyɛ mbo manda naa woŋ.—Aisaya 48:17.

20. Chila sɔvɛla kuɛɛ Mialaa Chɛhowaa nɔ yɛ?

²⁰ Mialaa Chɛhowaa nɔ chila sɔvɛ sɔvɛlaŋ. Kilisiɔŋaa pɔyaŋaa cho loo o laalaŋ ndaa choo wa, cho lakɔ o yiyala Chiisu bɛɛndiaa le nda o choo choo niŋndaŋ. (Chɔŋ 14:2) Wanaa nɔ tiindaŋndo le waa o lɛŋndeŋ choo wa, cho chɔ diomnda mɛyaala cho o Sɔɔŋ Chɔɔmaŋndoŋ 21:3 niŋ ndaŋ o peelɔŋndo. A tonya, dikeŋnaŋ bɛndoo pila Chɛhowa ke naa ni, le naa veeloo o naa nduaa chalaa niŋ lefafɛɛŋ.