1. Yinki mambote beto lenda baka na kutadilaka Nkunga 15:1-5?

 NA DISOLO meluta, beto longukaka ti bantu yina kepesaka luzingu na bau na Yehova mpe ketatamanaka kuvuanda na kinkundi ya penepene na yandi, lenda vuanda banzenza na tenta na yandi ya kifuani. Kasi yinki beto fueti sala samu beto vuanda banzenza na yandi? Nkunga 15 metubila diambu yango. (Tanga Nkunga 15:1-5.) Nkunga yango kena kupesa malongi ya mfunu yina lenda sadisa beto beto pusana penepene ya Nzambi.

2. Yinki mbala yankaka Davidi vuandaka kanisa ntangu yandi tubilaka tenta ya Yehova?

² Nkunga 15 mebanda na biuvu: ‘O Yehova, nani lenda vuanda nzenza na tenta na nge? Nani lenda zinga na mongo na nge ya nlongo?’ (Nk. 15:1) Ntangu yandi tubilaka “tenta” ya Yehova, mbala yankaka Davidi nsoniki ya nkunga vuandaka kanisa tabernakle yina vuandaka na Gibeoni samu na mua ntangu. Davidi metubila diaka ‘mongo ya nlongo’ ya Nzambi, mbala yankaka yandi vuandaka tubila mongo ya Siona na Yerusaleme. Kuna na bakilometre mingi na sud ya Gibeoni, Davidi tungaka tenta samu na kutula kuna nkela ya luwawanu tii ntangu tempelo ketungama.​—2 Sam. 6:17.

3. Samu na yinki beto fueti sosa kubakusa Nkunga 15? (Tala diaka foto.)

³ Ya kedika Bayisaele mingi pesamaka ve yinsua ya kukuenda sala na tabernakle, mpe bantu fioti kaka vuandaka kota na kati ya tenta kisika bavuandaka lunda nkela ya luwawanu. Kasi bisadi ya Yehova nionso ya kukuikama lendaka vuanda na dikoki ya kuvuanda na tenta na yandi ya kifuani na kukumaka mpe na kubikanaka bankundi na yandi. Yau nde kevuandaka nsatu na beto nionso. Nkunga 15 metubila ndambu ya bikadulu yina beto fueti kudisa mpe beto fueti monisa samu na kubikana bankundi ya Yehova.

 TAMBULAKA NA KUKUIKAMA MPE SALAKA MAMBU YA MBOTE

4. Yinki mutindu beto mezaba ti kubaka mbotama kele kaka ve diambu yina Yehova kena kulomba beto? (Yezaya 48:1)

⁴ Na Nkunga 15:2, bametubila nkundi ya Nzambi lokola ‘muntu yina ketambulaka na kukuikama, mpe kesalaka mambu ya mbote.’ Bampova ‘ketambulaka’ mpe ‘kesalaka’ kena kumonisa diambu yina beto fueti tatamana kusala. Kasi beto lenda tambula mpenza na ‘kukuikama’? Ee. Atako muntu mosi ve kele ya kukoka, Yehova ketadila beto lokola bantu yina ‘ketambulaka na kukuikama’ kana beto kena kusala nionso yina beto lenda samu na kuzitisa yandi. Ntangu beto kekukipesaka na Nzambi mpe beto kebakaka mbotama, yakevuandaka kaka ebandeli. Zaba ti na ntama, kuvuanda Muyisalele vuandaka monisa ve ti muntu kele kaka nzenza ya Yehova. Bantu yankaka vuandaka sambila yandi kasi ‘na kedika mpe na lunungu ve.’ (Tanga Yezaya 48:1.) Samu na kumonisa ti bavuandaka mpenza na nsatu ya kuvuanda banzenza ya Yehova, yalombaka Bayisaele longuka mambu yina Yehova kelombaka mpe bazitisa yau. Mutindu mosi bubu yayi samu na kundimama na Nzambi, yakelombaka kaka ve beto suka na kubaka mbotama mpe kukuendaka na balukutakanu ya kimvuka. Beto fueti tatamana ‘kusala mambu ya mbote.’ Yinki mutindu beto lenda sala yau?

5. Yinki zola monisa kuzitisa Yehova na mambu nionso?

⁵ Na meso ya Yehova, ‘kutambula na kukuikama’ mpe ‘kusala mambu ya mbote’ zola monisa kaka ve kukuendaka mbala na mbala na balukutakanu na Yinzo ya Kimfumu. (1 Sam. 15:22) Beto fueti sala ngolo samu na kuzitisa Nzambi na mambu nionso yina beto kesalaka, ata ntangu beto kele na kisika ya beto mosi. (Bing. 3:6; Lon. 12:13, 14) Yakele na mfunu beto sosa kuzitisa Yehova ata na mambu ya fiotifioti. Kusala mutindu yina kemonisaka ti beto kezolaka yandi mpenza, yau kesalaka ti yandi zola beto.​—Yoa. 14:23; 1 Yoa. 5:3.

6. Na kutadila Baebreo 6:10-12, yinki kele na mfunu kuluta mambu ya mbote yina beto mesalaka na ntama?

 ⁶ Yehova kesepelaka mingi na mambu yina beto mesalaka samu na yandi na ntama. Kasi, mambu ya mbote yina beto mesalaka na ntama kesala ve ti beto bikana kaka banzenza na tenta ya Yehova. Bametubila diambu yango puelele na Baebreo 6:10-12. (Tanga.) Yehova kezimbakanaka ve mambu ya mbote yina beto mesalaka na ntama. Kasi yandi kezolaka beto tatamana kusadila yandi na muela na beto ya mvimba “tii na nsuka.” Yandi kevuanda nkundi na beto samu na mvimbamvimba ‘kana beto bika ve.’​—Bag. 6:9.

TUBAKA KEDIKA NA NTIMA NA NGE

7. Yinki zola monisa kutuba kedika na ntima na beto?

⁷ Muntu yina zola vuanda nzenza yina mendimama na tenta ya Yehova fueti ‘tubaka kedika na ntima na yandi.’ (Nk. 15:2) Yazola monisa kaka ve kubika kuvuna. Yehova kezolaka ti beto vuanda ya kukuikama na mambu nionso yina beto ketubaka mpe yina beto kesalaka. (Baeb. 13:18) Yakele na mfunu, ‘samu Yehova keyinaka muntu ya luvunu, kasi yandi kesalaka kinkundi ya ntima na bantu ya mbote.’​—Bing. 3:32.

8. Yinki kikadulu beto fueti manga?

⁸ Bantu yina ‘ketubaka kedika na ntima na bau’ kesalaka kaka ve mambu ya mbote na meso ya bantu mingi mpe na ndambu yankaka bakena kubuka bansiku ya Nzambi na kinsueki. (Yez. 29:13) Bakemangaka kusala mambu na kusadilaka mayele ya yimbi. Muntu yina kele na mayele ya yimbi lenda banda kukanisa ti bansiku ya Yehova kevuandaka ntangu nionso ve yina meluta mbote. (Yak. 1:5-8) Yandi lenda manga kuzitisa Yehova na mambu yina yandi kena kumona ti yakele na mfunu mingi ve. Mpe kana kukondua luzitu na yandi kena kubimisina yandi ve mambu ya mpasi, yandi lenda banda kusala mambu yina kele yimbi kuluta. Atako yandi kena kukanisa ti yandi kena kusadila Nzambi, Yehova kendima nsambudulu na yandi ve. (Lon. 8:11) Kasi beto kezolaka kuvuanda ya kukuikama na mambu nionso.

9. Yinki dilongi beto lenda baka na disolo ya kukutana samu na mbala ya ntete ya Yesu mpe Natanaele? (Tala diaka foto.)

⁹ Beto lenda longuka mfunu ya kuvuanda na ntima ya kedika na disolo ya Yesu na Natanaele ntangu bakutanaka samu na mbala ya ntete.  Ntangu Filipi nataka nkundi na yandi Natanaele samu na kukutana na Yesu, diambu mosi ya kukamua salamaka. Atako Yesu salaka kutana ntete ve na Natanaele, Yesu tubaka: ‘Tala, muntu ya Yisaele ya kedika yina kele na luvunu ata fioti ve.’ (Yoa. 1:47) Kondua ntembe Yesu vuandaka tadila banlonguki na yandi yankaka lokola bantu ya kukuikama, kasi Yesu monaka na Natanaele kukuikama mosi ya spesiale. Mutindu mosi na beto, Natanaele vuandaka muntu ya kukondua kukoka. Kasi yandi vuandaka ve muntu ya luvunu, yandi vuandaka muntu ya kukuikama na mambu nionso. Yesu sepelaka na yau mpe yandi pesaka Natanaele felisitasion samu na yau. Ya kedika, beto nionso beto kezolaka ti Yesu mona mutindu yina samu na beto!

10. Samu na yinki beto fueti manga kusadila dikabu ya kutuba na mutindu ya yimbi? (Yakobo 1:26)

¹⁰ Mambu mingi yina melombama na Nkunga 15 metadila mutindu ya kusadila bantu yankaka mambu. Nkunga 15:3 metuba ti muntu yina kele nzenza na tenta ya Yehova ‘kevuninaka ve bantu mambu na ludimi na yandi, yandi kesadilaka finangani na yandi ata diambu mosi ve ya yimbi, mpe yandi ketubaka ve mambu ya luvunu samu na bankundi na yandi.’ Kana beto kena kuvunina bantu yankaka mambu, yalenda sala bau mpenza mpasi mpe beto kevuanda diaka ve banzenza na tenta ya Yehova.​—Tanga Yakobo 1:26.

11. Yinki kele kuvunina bantu mambu, mpe yinki diambu kekumina bantu yina kevuninaka bantu mambu kondua ti babalula ntima?

¹¹ Nsoniki ya nkunga metubila mpenzampenza muntu yina kevuninaka bantu mambu. Yinki kele kuvunina bantu mambu? Mbala mingi yakevuandaka kutuba bampova ya luvunu yina kesalaka mpasi mpe yina lenda bebisa lokumu ya muntu. Kana muntu mosi kena kuvunina bantu yankaka mambu mpe yandi memanga kubalula ntima, yandi fueti bimisama na kimvuka ya Buklisto.​—Yer. 17:10.

12-13. Yinki kele ndambu ya mambu yina lenda sala ti beto bebisa lokumu ya bankundi na beto kondua ti beto kana yau? (Tala diaka foto.)

¹² Nkunga 15:3 kena kubambula beto diaka ti  banzenza ya Yehova kesalaka mambu ya yimbi ve na bafinangani na bau mpe bakebebisaka ve lokumu ya bankundi na bau. Yinki mutindu beto lenda bebisa lokumu ya bankundi na beto?

¹³ Beto lenda bebisa lokumu ya muntu kondua ti beto kana yau na kupanzaka bansangu ya yimbi samu na yandi. Na kifuani: (1) mpangi mosi ya nketo mebika kisalu ya mpasudi nzila, (2) bankuelani mosi kena kusala diaka ve lokola bampangi ya dibuta ya Betele, to (3) mpangi mosi ya bakala kena kusala diaka ve lokola nkulutu to nsadisi na kisalu. Yakevuanda yimbi kutubila bantu yankaka ti bampangi yango ya babakala mpe ya banketo salaka diambu mosi ya yimbi, mpe yakele samu na yau nde bamekutana na mambu yango. Yalenda vuanda na bamfunu mingi yina beto lenda zaba ve samu na nsobolo yango. Kutu muntu yina kele nzenza na tenta ya Yehova ‘kesadilaka finangani na yandi ata diambu mosi ve ya yimbi, mpe yandi ketubaka ve mambu ya luvunu samu na bankundi na yandi.’

KUMISAKA BANTU YINA KEBANGAKA YEHOVA

14. Sasila yinki mutindu banzenza ya Yehova ‘kemangaka muntu nionso ya mpambampamba.’

¹⁴ Nkunga 15:4 metuba ti nkundi ya Yehova ‘kemangaka konso muntu ya mpambampamba.’ Yinki mutindu beto lenda sala yau? Lokola beto kele bantu ya kukondua kukoka, beto kele ve na dikoki ya kuzaba kana muntu kele muntu ya mpambampamba. Samu na yinki? Lokola beto kele bantu ya kukondua kukoka, yakesalaka ti beto zola bantu yina beto kena kukanisa ti yakele pete samu beto wizana na bau mpe kuyina bantu yina kepesaka beto nganzi. Nzokande, beto fueti manga kaka bantu yina Yehova kemonaka ti bakele bantu ya ‘mpambampamba.’ (1 Bak. 5:11) Yamesangisa bantu yina kesalaka mambu ya yimbi mpe kebalulaka ntima ve, bantu yina kezitisaka ve kiminu mpe bindimeli na beto, to bantu yina kemekaka kulembisa kinkundi na beto na Yehova.​—Bing. 13:20.

15. Yinki kele mosi ya mitindu ya kupesa ‘bantu yina kebangaka Yehova’ lokumu?

¹⁵ Nzokande, Nkunga 15:4 kena kulomba beto beto kumisa ‘bantu yina kebangaka Yehova.’ Na yau beto kesosaka mitindu ya kumonisa kimpombo mpe luzitu na bankundi ya Yehova. (Bar. 12:10) Na yinki mutindu? Mosi ya mitindu yina Nkunga 15:4 metubila, kele ti muntu yina kele nzenza na tenta ya Yehova ‘kekokisaka nsilulu na yandi, ata kana yakele yimbi samu na yandi.’ Kana beto kena kukokisa ve bansilulu na beto, beto lenda sala mpenza bantu yankaka mpasi. (Mat. 5:37) Na kifuani, Yehova kena kulomba bantu yina kele banzenza na tenta na yandi na kuzitisa ndefi na bau ya dikuela. Yandi kevuandaka diaka na kiese kana bibuti kena kusala ngolo samu na kukokisa mambu yina bakelakaka bana na bau. Lokola beto kezolaka Nzambi mpe bantu yankaka, beto kesala nionso yina beto lenda samu na kukokisa bansilulu na beto.

16. Yinki kele mutindu yankaka ya kupesa bankundi ya Yehova lokumu?

¹⁶ Mutindu yankaka ya kupesa bankundi ya Nzambi lokumu kele na kuvuandaka na kikadulu ya kuyamba banzenza mpe ya kukaba. (Bar. 12:13) Kana beto kena kulutisa ntangu kintuadi na bampangi na beto katula na balukutakanu mpe na kisalu ya kusamuna, kinkundi na beto kekuma ngolo na bau, mpe na Yehova. Yina meluta nionso na kumonisaka kikadulu ya kuyamba banzenza, beto kena kulanda kifuani ya Yehova.

KUVUANDAKA VE NA NZOLA YA MBONGO

17. Samu na yinki Nkunga 15 metubila mambu metadila mbongo?

¹⁷ Beto ketangaka ti muntu yina kele nzenza ya Yehova ‘kedevisaka ve mbongo na yandi samu na kubaka benefisi, mpe yandi kendimaka ve kaniaka samu na kubuisa muntu yina sala diambu ya yimbi ve.’ (Nk. 15:5) Samu na yinki nsoniki ya nkunga metubila mbongo? Samu kutadila mbongo na mutindu ya yimbi lenda sala bantu yankaka mpasi mpe kubebisa nguizani na beto na Nzambi.  (1 Tim. 6:10) Na ntangu ya ntama bantu yankaka vuandaka niokola bampangi na bau yina vuandaka bamputu na kulombaka bau benefisi na mbongo yina bavuandaka devisa bau. Diaka bazuzi yankaka vuandaka ndima kaniaka, mpe na manima bavuandaka sambisa na mutindu ya kukondua lunungu bantu yina salaka ata kima mosi ve. Yehova keyinaka mambu ya mutindu yina.​—Ezek. 22:12.

18. Yinki biuvu beto lenda kukiyuvusa samu na kumona mutindu beto ketadilaka mbongo? (Baebreo 13:5)

¹⁸ Yakele mbote beto kanisa na zulu ya mutindu beto ketadilaka mbongo. Kukiyuvusa: ‘Munu kekanisaka ntangu nionso kaka mbongo mpe bima yina munu lenda sumbila yau? Kana munu medeva mbongo, yakevuandaka mpasi samu munu futa yau, na kukanisaka ti muntu yina devisaka yau kele ve na nsatu na yau? Kuvuanda na mbongo kesalaka munu kukimona ti munu kele na mfunu kuluta bantu yankaka? Yakevuandaka mpasi samu na munu na kukabila bantu yankaka? Munu ketubaka ti bampangi na munu ya babakala mpe ya banketo kezolaka bima ya kinsuni kaka samu bakele na mbongo? Munu kesepelaka kuvuanda nkundi ya bantu yina kele bamvuama kasi ve ya bantu yina kele bamputu?’ Beto mebakaka diluaku ya nene ya kuvuanda banzenza ya Yehova. Beto lenda tanina diluaku yango kana beto kele ve na nzola ya mbongo. Kana beto mesala mutindu yina, Yehova kebika beto ata fioti ve!​—Tanga Baebreo 13:5.

YEHOVA KEZOLAKA BANKUNDI NA YANDI

19. Samu na yinki Yehova kezolaka ti beto sala mambu nionso yina kele na Nkunga 15?

¹⁹ Nkunga 15 mesuka na nsilulu yayi: ‘Muntu yina kesalaka mambu yango yandi keningana ata fioti ve.’ (Nk. 15:5) Awa nsoniki ya nkunga mesasila mfunu yina Yehova zola ti beto sala mambu nionso yina kele na nkunga yango. Yehova zola ti beto vuanda na kiese. Yau yina yandi kena kupesa beto lutuadusu yina kenatina beto lusakumunu mpe lutanunu na yandi.​—Yez. 48:17.

20. Yinki banzenza ya Yehova lenda vingila na nsatu ya ngolo?

²⁰ Bantu yina mendimama lokola banzenza ya Yehova lenda vingila na nsatu ya ngolo luzingu mosi ya kiese na bilumbu kena kuiza. Bantu ya kukuikama yina metulua mafuta kevuanda na “bisika ya kuzinga . . . mingi” yina Yesu mebongisaka samu na bau na dizulu. (Yoa. 14:2) Bantu yina kele na kivuvu ya kuzinga na ntoto kena kuvingila na nsatu ya ngolo mambu yina Kusonga 21:3 melaka. Kondua ntembe, yakele lokumu samu na beto mutindu Yehova mebokidisa beto samu beto vuanda banzenza na tenta na yandi samu na mvula na mvula!