1. Mauwa musinke natu gwanena mo mEpisarome 15:1-5?

 MOSIRONGWA sina ka pita, katu lirongere asi vantu ava va ligava kwaJehova nokukara nelikwatakano nendi, kuvhura kukara motende zaJehova zopasifanekeso. Nye yisinke twa hepa kurugana yipo tu kare vakaume vendi? MEpisarome egaununo 15 kwa uyunga mo yoyinzi kuhamena sitwa esi. (Resa Episarome 15:1-5.) Episarome eli kutupa magano aga naga tu vatera yipo tu kare vakaume wovanene vaKarunga.

2. Yisinke nampo ga gazarere Ndafita apa ga uyungire kuhamena tende zaJehova?

² Episarome egaununo 15 kwa tameka nomapuro aga asi: “HOMPA, yilye ogu ga fira kukara monzugo [motende] zoge? Yilye ogu ga fira kukara kondundu zoge zokupongoka zaSiyoni?” (Epis. 15:1) Apa mutjangi gEpisarome Ndafita ga uyungire kuhamena “tende” zaJehova, age nampo kwa gazarere nkongoronzugo ezi za kere moNgibiyoni posiruwo sina. Apa Ndafita ga uyungire hena kuhamena “ndundu zokupongoka” zaKarunga age nampo kwa gazarere ndundu zaSiyoni ezi za kere moJerusarema. Kondundu ozo zokupongoka ezi za kere koUrundu waNgibiyoni, Ndafita kwa tungire tende nokutura mo sikesa segwanekero dogoro konyima apa za pwire ntembeli kuzidika.​—2 Sam. 6:17.

3. Konda musinke natu harera kudiva eyi ya kare mEpisarome egaununo 15? (Tara hena efano.)

³ Sinzi soVaisraeli kapi ngava rugana monkongoronzugo, ntani wovasesu tupu ngava zi monda omu mwa kere sikesa segwanekero. Vakareli vaJehova navenye wovalimburukwi kuvhura kukara motende zendi zopasifanekeso nsene va twikira kukara vakaume vendi. Eyi yiyo twa hara natuvenye. MEpisarome egaununo 15, kwa tumbura mo yikara yimwe eyi twa hepa kutunga  po yipo tu twikire kukara vakaume vaJehova.

LIMBURUKWA KARUNGA MWANKENYE EYI OKU TO RUGANA UHUNGAMI

4. Ngapi omu tuna yi diva asi ekuho kapisi yiso selike sihepwa esi ana hepa ko Jehova kwetu? (Jesaya 48:1)

⁴ Episarome 15:2 kwa faturura kaume gwaKarunga asi kuna kara muntu ‘ogu a limburukwa Karunga mwankenye eyi oku ta rugana uhungami.’ Eyi yiyo twa hepa kurugana nkenye apa. Nye kuvhura sili tu ‘limburukwe Karunga ndi’? Nhi. Mokumona asi kwato muntu ogu ga sikilira mo, Jehova simpe nga tu tara asi ‘tu va limburukwi’ nsene tu rugana paapa twa hulira yipo tu mu limburukwe. Apa atu ligava nyamwetu kwaKarunga nokugwana ekuho, eli kuna kara tupu etameko lyokukarera Karunga. Pasihonena, mosiruwo sanare, ayo kapi ya tente asi nkenye Muisraeli kwa kere kaume kaJehova. Vamwe ngava mu karere nye kapisi monkedi zongwa. (Resa Jesaya 48:1.) Vaisraeli ava va kere neharo va hepere kulironga nompango daJehova nokudikwama. Mokulifana, mokuninka asi tu kare vakaume vaJehova, twa hepa kurugana unene kupitakana tupu kugwana ekuho nokulitumbura asi ose Nombangi daJehova. Twa hepa kutwikira kurugana yininke yoyiwa. Ngapi omu natu yi rugana?

5. Yisinke ayi tanta kulimburukwa Jehova moyininke nayinye?

⁵ KwaJehova, ‘kumulimburukwa’ ‘nokurugana youhunga’ kutanta yininke yoyinzi kupitakana tupu kuza komapongo. (1 Sam. 15:22) Twa hepa kukondja paapa twa hulira yipo tu limburukwe Karunga mwanayinye eyi atu rugana nampili nyoselike tuna kara. (Yis. 3:6; Muud. 12:13, 14) Ayo ya kara nomulyo tu limburukwe Jehova nampili moyininke yoyinunu. Nsene tu yi rugana ngoso, ayo ngayi likida asi twa mu hara ntani nage ga tu hara unene.​—Joh. 14:23; 1 Joh. 5:3.

6. Kuliza noVahebeli 6:10-12, yisinke ya kara nomulyo unene kupitakana yirugana yoyiwa eyi twa rugana nare?

 ⁶ Jehova kumuhafesa unene yininke eyi twa mu ruganena nare. Nye nampili ngoso, mokumona asi ose kwa rugana yininke yoyiwa nare, ayo kapi ayi tanta asi ose ngatu twikira kukara vakaume vaJehova motende zendi zopasifanekeso. Egano eli kwa li tumbura moVahebeli 6:10-12. (Resa.) Jehova kapi a divara yirugana yetu yoyiwa eyi twa rugene nare. Nye age kuna hara tu twikire kumukarera “dogoro kouhura.” Age nga twikira kukara kaume ketu dogoro narunye “nsene tu dira kuroroka.”​—Gar. 6:9.

UYUNGA USILI MOMUTJIMA GOGE

7. Yisinke ayi tanta kuuyunga usili monomutjima detu?

⁷ Muntu ogu ana hara kukara kaume kaJehova motende zendi zopasifanekeso, ga hepa ‘kuuyunga usili momutjima gwendi.’ (Epis. 15:2) Yinzi ya hamena mo kupitakana tupu kunyokera po kutanta yipempa. Jehova kuna hara tu hungike mwanayinye eyi atu uyunga neyi atu rugana. (Heb. 13:18) Ayo kwa kara nomulyo morwa “HOMPA kwa tonda ava ava rugana udona, nye vahungami ta va tura mougami wendi.”​—Yis. 3:32.

8. Nkareso musinke twa hepa kunyokera po?

⁸ Ava ava uyunga usili monomutjima dawo kapi ava lininkisa kovantu wopeke asi awo valimburukwi, nye nani awo kuteza po nompango daJehova mokahore-hore. (Jes. 29:13) Awo kunyokera po kukumbagera. Muntu ogu a uyunga yipempa kuvhura a tameke kugazara asi nompango daJehova kwato mulyo. (Jak. 1:5-8) Age kuvhura a dire kulimburukwa Jehova moyininke yoyinunu eyi na mona asi kwato mulyo. Ano nsene a mona asi kwato yitundwamo yoyidona eyi yina kumuhorokera koyininke eyi ana dili kulimburukwa, age kuvhura kurugana yininke yoyidona unene. Nampili a gazare asi kuna kukarera Karunga, nye Jehova kapi na tambura ukareli wendi. (Muud. 8:11) Nye ose tuna hara kuhungika moyininke nayinye.

9. Yisinke ya horokere apa Jesus ga mwene Natanayera sikando sendi sokuhova ntani yisinke sina kuturonga sihorokwa esi? (Tara hena efano.)

⁹ Kuvhura tu lirongere ko mulyo gokukara nomutjima gomuwa, kosihorokwa esi sa horokere  apa Jesus ga ligwene sikando sendi sokuhova naNatanayera. Apa Filipusa ga retere kaume kendi Natanayera kwaJesus, kosili sininke somulyo sa horokere. Nampili ngomu Jesus ga dilire kumona rumwe Natanayera, age kwa uyungire asi: “Tareni Muisraeli mwene-mwene ogu ga dira umbudi.” (Joh. 1:47) Jesus ga yi divire asi varongwa vendi vamwe valimburukwi, nye Natanayera kwa kere mulimburukwi unene. Nampili ngomu Natanayera ga kere muntu gokudira kusikilira mo ngwendi nyose, age kapi ga lininkisire nye nga hungike mwanayinye. Jesus kwa haferere nkareso zaNatanayera ntani kwa mu pandadekere. Yosili natuvenye tuna hara Jesus a tu tare monkedi zokulifana.

10. Morwasinke natu takamesera monkedi omu atu uyunga? (Jak. 1:26)

¹⁰ Sinzi soyininke eyi va tumbura Mepisarome egaununo 15 kwa uyunga kuhamena omu natu tekura wopeke. Episarome 15:3 kuuyunga asi kaume kaJehova ogu ga kara motende zendi zopasifanekeso ‘kapi a rugana mukwawo yoyidona, age hena kapi a hanesa nomuga kovamaparambo vendi.’ Kuruganesa mbuuyungiso zetu mononkedi edi kuvhura kukoresa wopeke, ntani kuvhura kutuninkisa tu dire kukara vakaume vaJehova motende zendi zopasifanekeso.​—Resa Jakopo 1:26.

11. Yisinke kurundira ntani yisinke nayi horokera muntu ogu a rundire vakwawo nsene kapi ana kulitezurura?

¹¹ Muepisarome kwa uyungire kuhamena muntu ogu a rundire vakwawo. Yisinke azi tanta nkango kurundira? Azo kwa tamba konombudi doyipempa edi nadi vhura kuzonagura nkareso zongwa zomuntu. Vantu wokudira kulitezurura ava ava rundire vakwawo, kuvhura kuvagusa mo mombungakriste.​—Jer. 17:10.

12-13. Momaukaro musinke gamwe natu uyunga vakwetu momudona twa hana kuyidivira? (Tara hena efano.)

¹² Episarome 15:3 kutudiworokesa hena asi vakaume vaJehova kapi ava rugana vakwawo yoyidona ntani kapi ava hanesa nomuga kovamaparambo vawo. Yisinke ayi tanta eyi?

 ¹³ Ose kuvhura tu hanese nombudi donondona kuhamena gumwe twa hana kuyidivira. Gazadara ko komaukaro aga (1) munazinyetu gomukadi ta hageke kurugana uzuvhisi wokukarerera, (2) valikwali tava hageke kurugana koBeteli ndi (3) munazinyetu gomugara ta hageke kukara mukuronambunga ndi mukwafimbunga. Kapi nayi wapa tu tantere wopeke asi vanavazinyetu owo nampo kwa rugana yininke yoyidona. Kuvhura pa kare nokonda edi tuna dili kudiva, kweyi gana karere po malitjindjo ogo. Ntani kaume kaJehova ogu a kara motende zendi zopasifanekeso, ‘kapi a rugana mukwawo yoyidona ntani kapi a hanesa nomuga kovamaparambo vendi.’

FUMADEKA AVA VA TJIRA JEHOVA

14. Faturura omu vakaume vaJehova nava nyokera po vantu ‘ava va zumba Karunga.’

¹⁴ Episarome 15:4 kuuyunga asi kaume kaJehova “googu a dini [nyokere po] ogu ga zumba Karunga.” Ngapi omu natu yi rugana oyo? Ngovantu wokudira kusikilira mo, kapi twa kara nevhuliko lyokudiva nsene gumwe kuna kulimburukwa Karunga ndi hawe. Morwasinke? Morwa kuvhura tu hare vantu vamwe kuliza noyikara yawo ntani kuvhura tu dire kuhara vantu vamwe. Yipo nye, twa hepa kunyokera po vantu ava va “zumba Karunga.” (1 Kol. 5:11) Eyi kwa kwatera mo ava ava dili kulitezurura koyininke yoyidona eyi ava rugana ntani ava ava dili kufumadeka epuliro lyetu ntani eyi twa pura ntani ava ava hetekere ko kuteza po elikwatakano lyetu naJehova.​—Yis. 13:20.

15. Nkedi musinke zimwe natu ‘limburukwa ava ava fumadeke HOMPA’?

¹⁵ Episarome 15:4 kututantera hena nonkango edi asi ‘tu fumadeke ava ava limburukwa HOMPA.’ Yipo nye, twa hepa kupapara nonkedi yipo tu likide nkenda vakaume vaJehova noku va fumadeka. (Rom. 12:10) Monkedi musinke? Nkedi zimwe ezi va tumbura mEpisarome 15:4 kuna kara asi kaume kaJehova “kusikisa mo narunye eyi ga tumbwidira, mpili si mu gwane simpagwa.” Nsene tu dira kusikisa mo matumbwidiro getu, kuvhura ngayi korese wopeke. (Mat. 5:37) Pasihonena, Jehova kuna kundindira ko kovalikwali va sikise mo mugano gwawo gomononkwara. Age hena kumuhafesa apa vakurona ava sikisa mo matumbwidiro gawo kovana vawo. Mokumona asi ose kwa hara Karunga ntani nava wopeke, ose ngatu rugana paapa twa hulira yipo tu sikise mo matumbwidiro getu.

16. Nkedi musinke hena zimwe natu fumadeka vakaume vaJehova?

¹⁶ Nkedi zimwe hena omu natu fumadeka vakaume vaKarunga kuna kara pokutambura vagenda ntani noku kara nougavi. (Rom. 12:13) Apa atu litulire po siruwo sokukara kumwe novanavazinyetu, ayo kutuvatera tu va dive unene ntani tu hedere unene Jehova. Ntani apa atu tambura vagenda, ose kuhonena Jehova.

NYOKERA PO KUHARA UNENE YIMALIWA

17. Morwasinke Episarome 15 lya uyungira kuhamena yimaliwa?

¹⁷ Bibeli kuuyunga asi kaume kaJehova “yimaliwa yendi kapi ayi gavere asi nga gwanene po nsonso, age kapi a tambura yomoufutunkume kogu ga dira kuzona yuma.” (Epis. 15:5) Morwasinke mepisarome eli va tumbwira mo kuhamena yimaliwa? Morwa nsene tu hara unene yimaliwa, ayo ngayi kara nomulyo unene kwetu kupitakana vantu ntani kupitakana hena Karunga. (1 Tim. 6:10) Mosiruwo sanare, vamwe kwa tekwire vapuli vakwawo woruhepo momudona pokuvaninka va fute yimaliwa yoyinzi kupitakana poyimaliwa eyi vava korotesere. Ntani vapanguli vamwe ngava tambura yimaliwa yomoufutunkume ntani nokupangura  vantu momudona. Jehova kwa nyenga yininke oyo.​—Hes. 22:12.

18. Mapuro musinke naga tu vatera tu likonakone nyamwetu kuhamena omu atu tara yimaliwa? (Vahebeli 13:5)

¹⁸ Ayo ya kara nomulyo tu likonakone nyamwetu kuhamena omu atu tara yimaliwa. Lipura asi: ‘Ame nkenye apa kugazara yimaliwa ntani neyi nani ka randa ndi? Nsene na korota yimaliwa, ame kugusa siruwo mokufuta yimaliwa oyo ntani nokugazara asi muntu ogo kapi ana yi hepa ndi? Kukara noyimaliwa kuninkisa nge ni lizuvhe asi ame mulyo kupitakana wopeke ntani kuninkisa nge ni kare nougu ndi? Ame kupangura vanavazinyetu asi va hara emona morwa yeeyi va kara noyimaliwa ndi? Ame kwa hara kutulisa po ukaume novantu wonongawo nye kapisi nava woruhepo ndi?’ Ayo ya kara nomulyo tu lipure mapuro aga morwa ose twa gwana mpito zokukara vakaume vaJehova. Nye ose kuvhura tu twikire tupu kukara vakaume vaJehova nsene tu nyokera po kuhara yimaliwa. Nsene tu yi rugana ngoso, Jehova kapi nga tu siga.​—Resa Vahebeli 13:5.

JEHOVA KWA HARA VAKAUME VENDI

19. Morwasinke Jehova ana tu harere tu rugane yininke nayinye eyi va tumbura MEpisarome egaununo 15?

¹⁹ Episarome 15 kwa hagesa nononkango edi asi: “Ogu a dili kurugana eyi kapi nga zapuka dogoro narunye.” (Epis. 15:5) MEpisarome eli kufaturura konda zeyi Jehova ana tu harere tu rugane yininke nayinye eyi va tumbura megaununo 15. Jehova kuna tu harere tu hafe. Yipo nye, age kutupa mavyukiso aga aga tu retere uwa ntani nokutupopera.​—Jes. 48:17.

20. Yisinke vana kundindira komeho vakaume vaJehova?

²⁰ Vakaume vaJehova kuvhura va ndindire eparu lyewa eli lina kara komeho. Vagwavekwa wovalimburukwi ngava ka parukira meguru omu Jesus ga va wapaikira “evango.” (Joh. 14:2) Ano ava va kara nehuguvaro lyokukaparukira paapa pevhu kuna kundindira nononkondo eyi va tumbwidira mEhororo 21:3. Azo mfumwa zonene kweyi Jehova ga tu zigida tu kare vakaume vendi narunye, motende zendi zopasifanekeso.