LONGI DIA 24
NKUNGA WA 24 Nwiza ku Mongo a Yave
Kala Muna Saba kia Yave Yakwele Mvu!
“E Yave, nani onangina muna saba kiaku?”—NKU. 15:1.
DIAMBU DIASINA TULONGOKA
Tulongoka mambu mevavuanga muna kala se nkundi a Yave ye tufimpa una kazolele vo twakadilanga ye akundi andi.
1. O Nkunga 15:1-5, aweyi ulenda kutusadisila?
MUNA longi diaviokele, twalongokele vo e selo ya Yave ana bakiyekola balenda nangina muna saba kiandi, i sia vo, balenda kala ye kikundi kiambote yo Yave. Kansi, aweyi tulenda kuyifwanisina muna kala se akundi andi? O Nkunga 15 utoma vovelanga e diambu diadi. (Tanga Nkunga 15:1-5.) Muna nkunga wau, muna ye malongi malenda kutusadisa mu toma finama Nzambi.
2. Adieyi kayindulanga Davidi wa ntozi a nkunga vava kavovela e saba kia Yave?
2 E tini kiantete kia Nkunga 15 kivovanga vo: “E Yave, nani onangina muna saba kiaku? Nani lenda kala muna mongo aku avauka?” (Nku. 15:1) Vava kavovela “saba” kia Yave, Davidi wa ntozi a nkunga saba kiakala kuna Ngibone kayindulanga. O ‘mongo avauka’ kavovela Davidi, nanga i mongo a Zione kuna Yerusaleme. Tezo kia kilometa 10 wakala yakuna sude ya Ngibone, i kuna Davidi katungila e saba kimana e nkel’a kangu yakala mûna yavana kadi yo tungila e nzo ina ilenda kala yakwele mvu.—2 Sam. 6:17.
3. Ekuma dinina diamfunu vo twabakula Nkunga 15? (Tala mpe fwaniswa.)
3 Dialudi vo, ndonga muna Aneyisaele ke bakala yo nswa ko wa sadila muna saba. Akete kaka bavewa o nswa wa kota muna fulu kia lundilwanga e nkel’a kangu. Kansi, selo yawonso ya Yave bafwana kwau nangina muna saba, i sia vo, bafwana kwau kala se akundi andi. E diadi i diau tuvavanga yeto awonso. Muna Nkunga 15, Davidi wasoneka yaka fu tufwete yima ye mana tufwete vanga muna kala se akundi a Yave.
Aneyisaele muna lumbu ya Davidi bakimwenanga nze yau bena muna saba kia Yave (Tala e tini kia 3)
KANGALELANGA KUNA ZIKU YO VANGA MAMBU MANSONGI
4. Aweyi tuzayidi wo vo o luvubu ke diau kaka ko Yave kekutulombanga? (Yesaya 48:1)
4 Muna Nkunga 15:2 tutanganga vo nkundi a Nzambi “okangalelanga kuna ziku, ovanganga mambu mansongi.” O mvovo “okangalelanga” ye “ovanganga,” misonganga vo diambu tufwete vanganga ntangwa zawonso. Kansi, nga tulenda ‘kangalela kieleka kuna ziku’? Elo. Kana una vo ke vena muntu alunga ko, avo tuvangidi e ngolo muna lemvokela Yave, okutubadikila vo ‘kuna ziku tukangalelanga.’ Vava twakiyekola kwa Nzambi yo vubwa, twayantika kangala yo Nzambi. Kuna nz’ankulu, okala kaka musi Isaele ke diasonganga ko vo o muntu ndioyo olenda nangina muna saba kia Yave. Akaka bavovelanga nkumbu a Nzambi, kansi “ke mu ludi ko ngatu mu unsongi.” (Tanga Yesaya 48:1.) Aneyisaele ana bakala vo akwa ziku balongokanga e nkanikinu mia Yave yo lemvokela mio. Diau dimosi mpe o unu, muna vua e dienga dia Nzambi, mayingi mevavuanga ke vubwa kaka ko yo kalanga entwadi ye akweto Akristu muna nkutakani. Tufwete kwamanana ‘vanga mambu mansongi.’ Aweyi tulenda wo vangila?
5. Ameyi mevavuanga muna lemvokela Yave muna mambu mawonso?
5 Vana meso ma Yave, ‘okangalela kuna ziku’ yo ‘vanga mambu mansongi,’ mayingi divavanga, ke kwenda kaka mu tukutakanu ko muna Seka dia Kintinu. (1 Sam. 15:22) Tufwete vanganga e ngolo mu lemvokela Nzambi muna mambu mawonso ma zingu kieto, kana nkutu va fulu kia yeto kaka twina. (Nga. 3:6; Kim. 12:13, 14) Diamfunu twavavanga lemvokela Yave kana nkutu muna mambu makete. Ovanga ediadi disonga vo zola kikilu tukunzolanga. Muna diadi, oyandi mpe otoma kutuzola.—Yoa. 14:23; 1 Yoa. 5:3.
6. Nze una tutangidi muna Ayibere 6:10-12, nkia diambu disundidi o mfunu vana ntandu a mavangu meto ma kwikizi mavioka?
6 Yave otoma yangalelanga mana twavanga muna salu kiandi mu mvu miavioka. Kansi, mavangu ma kwikizi mavioka, ke malendi kutufwanisa ko mu nangina muna saba kia Yave. Ediadi ditoma kieseswanga muna Ayibere 6:10-12. (Tanga.) Yave kevilakananga mavangu meto mavioka ko. Kansi, ozolele vo twakwamanana kunsadila ye nsi a ntima “yakuna mbaninu.” “Avo tulembele yoya,” Yave okutusenda yo kutukitula se akundi andi yakwele mvu.—Ngal. 6:9.
VOVANGA E LUDI MUNA NTIMA
7. Ameyi mevavuanga muna vovanga e ludi muna ntima?
7 Konso muntu ona ozolele nangina muna saba kia Yave, kafwete ‘vovanga e ludi muna ntim’andi.’ (Nku. 15:2) Ediadi mayingi divavanga ke venga kaka vova luvunu ko. Yave ozolele vo twakalanga akwa ziku muna mvovo mieto miawonso ye muna ngindu zeto. (Ayib. 13:18) Ediadi diamfunu kikilu “kadi Yave omenganga mpuki, kansi okalanga se nkundi akola kw’ansongi.”—Nga. 3:32.
8. Nkia fu tufwete venga?
8 Awana ‘bevovanga e ludi muna ntima miau,’ ke belemvokelanga kaka Nzambi ko vava bekalanga vana ntadisi a wantu akaka yo kulula e nsiku mia Nzambi vava bekalanga va fulu kia yau kaka. (Yes. 29:13) Ke akwa nyindu miole ko. O nkwa nyindu miole olenda yindula vo ezak’e ntangwa, e nkanikinu mia Yave ke miansongi ko. (Yak. 1:5-8) Olenda kolamena Yave muna mambu mana keyindulanga vo ke mena mfunu ayingi ko. I bosi, avo omwene vo kabakidi mfwilu ko muna ukolami wandi, olenda vua diaka unkabu muna kulula e nsiku mia Nzambi yo kituka se mpuki muna nsambil’andi. (Kim. 8:11) Kansi, oyeto tuzolele kala akwa unsongi muna mambu mawonso.
9. Adieyi tulenda longoka muna moko kakala kiau Yesu vava kawanana yo Natanaele mu nkumbu antete? (Tala mpe fwaniswa.)
9 Tulenda longoka o mfunu wakala akwa ziku muna ntima muna moko kina Yesu kakala kiau yo Natanaele vava bawanana mu nkumbu antete. Vava Filipo kasunzula nkundi andi Natanaele kwa Yesu, diambu diamfunu diavangama. Kana una vo kasidi wanana yo Natanaele ko, Yesu wavova vo: “Tala Nyisaele akieleka, muna yandi ke muna umpûki ko.” (Yoa. 1:47) Kieleka, Yesu wabadikilanga alongoki andi akaka vo akwa ziku, kansi, Yesu wamona vo Natanaele nkwa ziku kikilu kakala. Kana una vo Natanaele muntu walembi lunga kakala nze yeto, ke mpûki ko, nkwa ziku kakala muna mambu mawonso. Yesu watoma sivika ye wasanisina Natanaele. Ekwe zitu kele vo Yesu kavova diambu diadi mu kuma kieto!
Filipo osunzwidi Natanaele wa nkundi andi ona wakondwa umpuki kwa Yesu. Nga wantu balenda vova mpe diambu diadi mu kuma kieto? (Tala e tini kia 9)
10. Ekuma tufwete kuyikebela mu mpila ina tusadilanga lubini lweto? (Yakobo 1:26)
10 Miayingi muna nkanikinu miasonama muna Nkunga 15, mitadidi una tukadilanga ye akaka. Muna Nkunga 15:3 tutanganga vo ndiona onangina muna saba kia Yave, “ke sadilanga lubini lwandi ko muna kumba ankaka, ke vanganga mbi kwa nkwandi ko, ke tiangunanga akundi andi ko.” O sadila lubini lweto muna kumba akaka yo kubatianguna dilenda kubatwasila e mpasi yo kutufila mu vidisa e lau dia nangina muna saba kia Yave.—Tanga Yakobo 1:26.
11. Nki i kumba? Adieyi dibwilanga akumbi ana ke bevilukanga ntima ko?
11 O ntozi a nkunga wavovela o kumba. Nki i kumba? Muna lukufi, o kumba i vunina muntu diambu ye kani dia safula e nkumbu andi. Akumbi ana ke bevilukanga ntima ko bevaikiswanga muna nkutakani ya Kikristu.—Yer. 17:10.
12-13. Mu nkia mambu tulenda tiangunuina akundi eto kana nkutu vo ke mu lukanu ko? (Tala mpe foto.)
12 E sono kia Nkunga 15:3 kikutusungamesanga mpe vo awana benangina muna saba kia Yave, ke bevanganga mbi kwa akwau ko ye ke betiangunanga akundi au ko. Aweyi tulenda tiangunuina akundi eto?
13 Ovovela muntu e mbi dilenda kutufila muna kuntianguna kana nkutu vo ke mu lukanu ko. Kasikil’owu: (1) mpangi ankento oyambwidi e salu kia ntangwa ke ntangwa, (2) mpangi ayakala yo nkaz’andi bayambwidi e salu kia Betele, yovo (3) mpangi ayakala oyambwidi kiyekwa kia nkuluntu yovo kiyekwa kia selo kia salu. Nga diambote mu banzikila vo mpangi zazi mambu mambi bavangidi muna yambula malau mau ma salu yo yantika mo zayisa kwa akaka? Valenda kala ye kuma ina katuzeye ko ibafididi mu yambula malau mau ma salu. Vana ntandu, ndiona onangina muna saba kia Yave, “ke vanganga mbi kwa nkwandi ko, ke tiangunanga akundi andi ko.”
Ke diampasi ko mu sayanesa nsangu za luvunu mu kuma kia akaka, dilenda kala vo kubakumba (Tala e tini kia 12-13)
ZITISANGA AWANA BEVUMINANGA YAVE
14. Sasila una muntu onanginanga muna saba kia Yave ‘kebembolwelanga muntu ambi.’
14 E sono kia Nkunga 15:4 kivovanga vo nkundi a Yave “obembolanga muntu ambi.” Aweyi tulenda vovela vo nengandi muntu ambi? Wau vo tu wantu alembi lunga, ke twafwana ko mu vova ye ziku kiawonso vo nengandi muntu ambi. Ekuma? Kadi tulenda zola wantu ankaka mu kuma kia fu yau ina tuyangalelanga yo fungila akaka makasi mu kuma kia fu yau ina ke tuyangalelanga ko. Kansi, tufwete bembola kaka awana bevanganga mambu malenda fila Yave muna kubayikila vo ‘wantu ambi.’ (1 Kor. 5:11) Vana vena wantu awaya vena mpe ye awana bevanganga mambu mambi lembi viluka o ntima, awana bevezanga lukwikilu lweto ye mana tukwikilanga yo vava fwasa e ngwizani eto yo Yave.—Nga. 13:20.
15. Nkia mpila mosi tulenda zitisila awana “bevuminanga Yave”?
15 Kuna diak’e sambu, e sono kia Nkunga 15:4 kikutuvovesanga vo ‘twazitisanga awana bevuminanga Yave.’ Muna diadi, tufwete vavanga e mpila tulenda vangila o wete yo zitisa akundi a Yave. (Roma 12:10) Nze una uyikwanga muna Nkunga 15:4, e mpila imosi kalenda wo vangila ndiona onangina muna saba kia Yave i “lungisanga nsilu andi, kana nkutu vo mfwilu dikuntwasila.” Olembi lungisa nsilu mieto dilenda kendeleka akaka. (Mat. 5:37) Kasikil’owu, Yave ovingilanga vo awana benangina muna saba kiandi, bazitisanga e ndofi a longo lwau. Oyangalelanga mpe vava mase ye ngudi belungisanga e nsilu besilanga wan’au. O zola kweto muna Nzambi ye akweto kukutufila mu vanga mawonso tulenda muna lungisanga e nsilu mieto.
16. Nkia mpila yankaka tulenda zitisila akundi a Yave?
16 Osonga e fu kia zola nzenza ye fu kia kaya i mpila yankaka tulenda zitisila akundi a Nzambi. (Roma 12:13) Katula e ntangwa tusalanga entwadi ye mpangi zeto muna salu kia umbangi ye ntangwa tukalanga muna tukutakanu, ovaula e ntangwa muna kalanga entwadi ye mpangi zeto, dilenda siamisa e kikundi kieto yo yau kumosi yo Yave. Vana ntandu, vava tusonganga e fu kia zola nzenza, Yave tutangininanga.
KUKADI NZODI A NZIMBU KO
17. Ekuma Nkunga 15 uvovelanga diambu dia nzimbu?
17 Muna kuma kia muntu onangina muna saba kia Yave tutanganga vo “ke sompekanga nzimbu ko muna baka nluta, ke tambulanga mbabu ko muna yelesa munkondwa-kuma.” (Nku. 15:5) Ekuma ntozi a nkunga wau kavovela e diambu dia nzimbu? E kuma kadi avo ke tuna ye ngindu zasikila ko muna sadila e nzimbu, tulenda kendeleka akaka yo fwasa kikundi kieto yo Nzambi. (1 Tim. 6:10) Kuna nz’ankulu, akaka babangikanga akwau ana bakala se asukami muna kubalomba e nluta vava babasompekanga e nzimbu. Kuna diak’e sambu, afundisi batambulanga mbabu yo vana ngielele kwa minkondwa-kuma. Mavangu mama mangemi kikilu vana meso ma Yave.—Yez. 22:12.
18. Nkia yuvu ilenda kutusadisa mu fimpa e mpila tubadikilanga e nzimbu? (Ayibere 13:5)
18 Diambote twayifimpanga mu zaya una tubadikilanga e nzimbu. Ukiyuvula: ‘Nga mambu ma nzimbu kaka iyindulanga ye lekwa ina ndenda sumba? Avo nsompele nzimbu zangani, nga kolo kiayingi iviokesanga mu futa zo? Nga iyindulanga vo ndiona unsompekele nzimbu, kavuidi zo kwandi mfunu ko? Nga okala ye nzimbu dikumfilanga mu yindula vo nsundidi akaka o mfunu? Nga diampasi dikalanga mu kayila akaka? Nga ibadikilanga mpangi zame vo akwa loko wau bena ye nzimbu? Nga ivanganga kaka kikundi ye awana bena ye nzimbu yo bembola awana bena vo mputu?’ Tuvuidi lau diampwena diakala se anangi muna saba kia Yave. Muna tatidila e lau diadi tufwete yambula vo e zingu kieto kia kondwa o zola muna nzimbu. Avo tuvangidi wo, Yave ke singa kutubembola ko.—Tanga Ayibere 13:5.
YAVE OZOLANGA AKUNDI ANDI
19. Ekuma Yave kazolele vo twasadila nkanikinu mia Nkunga 15?
19 E tini kia nsuka kia Nkunga 15 kisianga nsilu vo: “Ndiona ovanganga mambu mama ke nikunua ko.” (Nku. 15:5) E mvovo miami misonganga e kuma Yave kazolele vo twasadila nkanikinu miasonama mu nkunga wau. Ozolele vo twakala ye kiese. Muna kuma kiaki, okutuvananga malongi mekututwasila e nsambu ye lutaninu lwandi.—Yes. 48:17.
20. Awana benanginanga muna saba kia Yave, nkia vuvu bena kiau?
20 Awana Yave ketambulwilanga vo banangina muna saba kiandi bena ye vuvu kia vua zingu kiambote kuna sentu. Akuswa ana besikila ye kwikizi bezingila muna “fulu yayingi” ina Yesu kabakubikila kuna zulu. (Yoa. 14:2) Awana bena ye vuvu kia zingila ova ntoto, bevingilanga e ndungan’a nsilu miasonama muna Lusengomono 21:3. Ekwe lau diampwena wau vo Yave okutubokelanga kimana twanangina muna saba kiandi yakwele mvu!
NKUNGA WA 39 Tukivangila Nkumbu Ambote Vana Ndose a Nzambi
