1. Ino Kulumbaisha 15:​1-5 inga yatucafwa buyani?

 MUMUTWI wamana twakeeya ayi basebenshi bakwe Yehova bakalyaaba inga baba beensu mu tente yakwe yacikoshanyo kwiinda mukuba abushicibusa buyumu anguwe. Sombi ino nshiinshi nshotuyandika kucita kwaamba ayi tube beensu bakwe? Kulumbaisha 15 ilaamba pamakani aya. (Amubelenge Kulumbaisha 15:​1-5.) Lilembo ili lilatulwiita nsheenga twaciita kwaamba ayi tube abushicibusa buyumu a Lesa.

2. Ino nshiinshi mpashi Defedi nshaakalinga kuyeeyawo ndyakaamba pa tente yakwe Yehova?

² Kulumbaisha 15 ilatalika amiipusho yakwaamba ayi: ‘No Yehova, anu ngani weenga wekala mu tente yanu? Anu ngani weenga wakonsha kwikala pakalundu kanu kasalalite?’ (Kulu. 15:1) Shikulumbaisha Defedi ndyaakaamba pa ‘tente’ yakwe Yehova, cilyeelete wakalinga kuyeeya pa tente yakulambililaako iyo yakalinga ku Gibyoni kwaciindi ciniini. Alimwi Defedi ndyakaamba pa ‘kalundu kakwe Lesa kasalalite,’ mpashi wakalinga kuyeeya pa tente yakalinga pa Kalundu ka Siyoni mu Jelusalemu. Kalundu aka kakalinga kumalenge lya Gibyoni alimwi pakalinga mushinso ushika pafwiifwi amakilomita ali 10 kuswa kumusena uyu. Pakalundu aka Defedi mpaakayaka tente yakulaminamo libokoshi lya cipangano kushikila tempele ndyeyakayakwa.—2 Samwe. 6:17.

3. Ino nceebonshi tulisuni kunyumfwishisha makani ngotucana mu Kulumbaisha 15? (Amubone acikope.)

³ Kwalo, bene Isilaeli baanji tabakalinga kusebensela pa tente yakulambililaako alimwi mbaniinibo bakalinga kunjila mu tente umo mwakalinga kulaminwa libokoshi lya cipangano. Sombi basebenshi bakwe Yehova bashomeka boonse bakalinga kucite coolwe cakuba beensu mu tente yakwe yacikoshanyo kwiinda mukuba abushicibusa anguwe akutolelela kushomeka kuli nguwe. Ici soonse ncotusuni. Kulumbaisha 15 ilatulwiita nshotuyandika kucita  kwaamba ayi tutolelele kuba abushicibusa a Yehova.

AMWEENDE CAKUBULA KAMPENDA AKUCITA SHINTU SHILULEME

4. Ino tulishi buyani ayi Yehova taatulangili kweelabo pakubombekwa? (Isaya 48:1)

⁴ Pa Kulumbaisha 15:​2, shicibusa wakwe Lesa alaambwa ayi ngu muntu “weenda cakubula kampenda, uyo ucita shintu shiluleme lyoonse.” Liswi lyakwaamba ayi “weenda” alyakwaamba ayi “ucita” alasansulula muntu utolelela kucita cintu cimwi. Ano sa ncakwiila inga twacikonsha ‘kweenda cakubula kampenda’? Ee. Nabi kwaamba ayi taakuwo muntu umaninite, Yehova alaakutubona ayi ‘tuleenda cakubula kampenda,’ na katucita nsheenga twacikonsha kumunyumfwila. Na twaaba buumi bwesu kuli Lesa akubombekwa, ngamatalikilobo akweenda a Lesa. Kucakubonenaako, muciindi camu Baibo, na muntu kaali mwine Isilaeli tacakalinga kusansulula ayi ngu mweensu wakwe Yehova. Bamwi bakalinga kumubona ayi ngu mweensu sombi kuteshi “mulushinisho nabi mukululama.” (Amubelenge Isaya 48:1.) Kwaamba ayi bene Isilaeli batondeshe ayi bakalinga kusunishishi kuba beensu bakwe Yehova, bakalinga kwiiya milawo yakwe akwiikonkela. Aswebo kwaamba ayi tube abushicibusa bubotu a Lesa, tatweelete kweelabo pakubombekwa akwiitwa ayi womwi wa Bakamboni Bakwe Yehova. Sombi tulyeelete kutolelela ‘kucita shintu shiluleme.’ Ino inga twacita buyani ubo?

5. Ino kunyumfwila Yehova mushintu shoonse cilaamba nshi?

⁵ Yehova alabona ayi ‘kweenda cakubula kampenda’ alimwi ‘akucita shintu shiluleme,’ teshibo kunoocanika kumabungano lyoonse ku Ŋanda ya Bwaami. (1 Samwe. 15:22) Tulyeelete kunoonyumfwila Lesa mushintu shoonse nshotucita nabi ndyetuli sweenka. (Tus. 3:6; Shiku. 12:​13, 14) Cilayandika kunokweelesha kunyumfwila Yehova nabibo mutuntu tuniini. Kucita boobo kulatondesha ayi tulimusuni abuumbi,  alimwi alakwe alatusuna abuumbi.—Joni 14:23; 1 Joni 5:3.

6. Kweelana a Bene Ebulu 6:​10-12, ino nciinshi ciyandika abuumbi kwiinda shintu shibotu nshotwakacita kale kale?

⁶ Yehova alalumba abuumbi pashintu nshotwakamucitila. Nacibi boobo, na twakamucitila shintu shibotu kale kale, tacaamba ayi tulaakutolelela kuba beensu mu tente yakwe. Aya ngomakani ngotucana pa Bene Ebulu 6:​10-12. (Amubelenge.) Yehova taalubi shintu shibotu nshotwakamucitila. Sombi alisuni kwaamba ayi tutolelele kumusebensela amoyo wesu woonse “kushikila akumamanino.” Alimwi alaakuba shicibusa wesu kwamuyayaya na ‘twabula kuboolela mwisule.’—Gala. 6:9.

AMWAAMBE LUSHINISHO LUSWA KUMOYO WANU

7. Ino kwaamba lushinisho luswa kumoyo wesu cilaamba nshi?

⁷ Muntu usuni kuba mweensu mu tente yakwe Yehova alyeelete ‘kunokwaamba lushinisho luswa kumoyo wakwe.’ (Kulu. 15:2) Ici cilaamba ayi taelete kweelabo pakuleya kunoobeca. Yehova alisuni ayi tunooshomeka mushintu shoonse nshotwaamba anshotucita. (Ebu. 13:18) Kucita boobo kulayandika abuumbi mukwiinga ‘Yehova ulipatite muntu wa bucenjeshi, sombi balo baluleme ulanyumfwanaabo.’—Tus. 3:32.

8. Ino nshiinshi nshotweelete kuleya kunoocita?

⁸ Abo baamba ‘lushinisho luswa kumoyo wabo’ tabanyumfwilibo Lesa na bamwi batobabona lyalo akucita shintu shibiibi na bali beenka. (Isa. 29:13) Balaleya kucita shintu munshila yabucenjeshi. Muntu ucita shintu munshila yabucenjeshi inga watalika kuyeeya ayi milawo yakwe Yehova teshi lyoonse ndyeiba kabotu. (Jemu. 1:​5-8) Inga wasalawo kutakonkela milawo yakwe Yehova mushintu nshaabona ayi tashiyandiki bunene. Lyalo na wabona ayi taakuwo shibiibi shitoswaamo nabi taana kunyumfwila milawo yakwe Lesa, inga watalika kucita shibiibi kwiindaawo. Nabi kayeeya ayi atosebensela Lesa, kulambila kwakwe teshi kukatambulwe kuli Yehova. (Shiku. 8:11) Nacibi boobo, swebo tulisuni kunooshomeka mushintu shoonse.

9. Ino nshiinshi shakacitika ciindi cakutaanguna Yesu ndyaakabonana a Natanaelo, alimwi ino ici cilatwiisha nshi? (Amubone acikope.)

⁹ Cilayandika abuumbi kuba muntu ‘waamba lushinisho luswa kumoyo wakwe.’ Ishi nshoshakacitika  paciindi Filipi ndyaakeeta Natanaelo shicibusa wakwe kwaamba ayi abonane a Yesu. Nabi kwaamba ayi ici ncocakalinga ciindi cakutaanguna Yesu kubonana a Natanaelo, Yesu wakaamba ayi: ‘Anooyu mwine Isilaeli wancinencine, muli nguwe taamu bucenjeshi.’ (Joni 1:47) Yesu wakalinga kucishi ayi bashikwiiya bakwe bamwi bakalinga kushomeka, sombi Natanaelo wakalinga kwiindaawo. Natanaelo wakalinga muntu utamaninite bweenka mbuli ndiswe, sombi wakalinga kushomeka mushintu shoonse. Yesu wakakumbwa mibo Natanaelo njaakalinga kucite alimwi wakamulumba pakutondesha mibo iyo. Ncakutatoonsha kwaamba ayi soonse mbotusuni ayi Yesu anoolinyumfwa pali ndiswe!

10. Ino nceebonshi tulyeelete kuleya kutasebensesha kabotu cipo cakwaamba? (Jemusi 1:26)

¹⁰ Shiinji nshotuyandika kucita shilembetwe mu Kulumbaisha 15 shilaamba pa nshotweelete kunoocita kubamwi. Kulumbaisha 15:3 ilaamba ayi mweensu mu tente yakwe Yehova “ngumuntu utacite mulaka ubisha meena a babye, ee, ngooyo utacitili beshikamukobonyina shibiibi, nabi kwaamba makani akubeca pali mbabo.” Kutasebensesha kabotu mulaka wesu munshila iyi inga kwakalasha bamwi abuumbi alimwi inga tatutoleleli kuba mweensu mu tente yakwe Yehova.—Amubelenge Jemusi 1:26.

11. Ino muntu ubisha meena ababye ngumuntu uli buyani, alimwi ino nciinshi ceenga cacitika kumuntu uyo na katasuni kwaana?

¹¹ Shikulumbaisha wakaamba pa muntu ucite mulaka ubisha meena a babye. Ino muntu wamushobo uyo ngumuntu uli buyani? Liinji ngumuntu waamba makani akubeca eenga abisha mpuwo ya bamwi. Na muntu watolelela kubisha meena abamwi kaatasuni kwaana, alakushikwa mulibungano.—Jele. 17:10.

12-13. Ino mbukaalo nshi bumwi ndyeenga twatalika kubisha meena abeshicibusa besu mukutashiba? (Amubone acikope.)

¹² Kwiilikaawo, Kulumbaisha 15:3 ilatwibalusha ayi beensu bakwe Yehova tabacitili beshikamukobonyina shibiibi, nabi kwaamba makani akubeca pa beshicibusa babo. Ino inga twatalika  buyani kubisha meena abeshicibusa besu mukutashiba?

¹³ Inga twabisha liina lya muntu umwi mukutashiba na katulwiitako bamwi makani atabete kabotu pali nguwe. Kucakubonenaako: (1) nankashi wacileka kusebensa bupainiya bwaciindi coonse, (2) beebene bacileka kusebensela pa Bethel, na (3) mukwesu wacileka kusebensa mbuli munene nabi musebenshi ucafwilisha. Inga tacibi kabotu kutalika kulwiitako bamwi ayi kuli cimwi citabete kabotu bamakwesu abenankashi aba ncobakacita cakapa kwaamba ayi bukaalo bwaaluke. Inga kakuli shimwi shiinji nshotutacishiiwo shakapa kwaamba ayi bukaalo bwabo bwaaluke. Ncakutatoonsha kwaamba ayi mweensu mu tente yakwe Yehova “tacitili beshikamukobonyina shibiibi, nabi kwaamba makani akubeca pali mbabo.”

AMULEMEKE BAABO BANYUMFWILA YEHOVA

14. Amusansulule beensu bakwe Yehova mbobakaka “muntu uyo Lesa ngwaakaka.”

¹⁴ Kulumbaisha 15:4 ilaamba ayi shicibusa wakwe Yehova “ngooyo unyansha muntu uyo Lesa ngwaakaka.” Ino tulashiba buyani ayi Lesa wamukaka muntu umwi? Inga tatwaambi ayi Lesa wakamukaka muntu umwi ceebo ca nshotuyeeya anshotusuni sobeene. Ino nceebonshi? Mukwiinga tatumaninite, mpashi inga twasuuna bantu mbotubona ayi ncuubu kunyumfwanaabo akutasuna bamwi ceebo cakwaamba ayi balatukalasha. Aboobo tulyeelete kukakabo muntu uyo Yehova “ngwaakaka.” (1 Koli. 5:11) Bantu abo baleelikaawo baabo batolelela kucita shibiibi alimwi batasuni kwaana, batalemeki nshotushoma, na abo beelesha kunyonyoola bushicibusa bwesu a Yehova.—Tus. 13:20.

15. Ino ninshila nshi yomwi mbweenga twalemeka ‘baabo banyumfwila Yehova’?

¹⁵ Kwiilikaawo, Kulumbaisha 15:4 ilaamba ayi tulyeelete ‘kulemeka baabo banyumfwila Yehova.’ Aboobo tulacana nshila sha mbweenga twacita shibotu kubeshicibusa bakwe Yehova akubalemeka. (Loma. 12:10) Nshila yomwi yaambwa pa Kulumbaisha 15:4 mbweenga mweensu wakwe Yehova wacita boobo, nkwiinda mukucita “nshaakashomesha cakulumbila, nakubi kwaamba ayi lakwe mwiine cilamucisa.” Na twabula kukumanisha nshotwakashomesha, inga twakalasha bamwi. (Mate. 5:37) Kucakubonenaako, Yehova alalangila bali mucikwati kutolelela kucita kweelana ambobakashomesha cakulumbila ndyebakeebana. Alimwi alasangalala abuumbi na bashali kabeelesha kukumanisha nshobakashomesha bana babo. Kusuna Lesa abantu kulaakutupa kucita nsheenga twacikonsha kwaamba ayi tukumanishe nshotwakashomesha.

16. Ino ninshila nshi aimwi mbweenga twalemeka beshicibusa bakwe Yehova?

¹⁶ Nshila aimwi mbweenga twalemeka beshicibusa bakwe Lesa nkwiinda mukuba amushimu wakutambula beensu akuba baabi. (Loma. 12:13) Kucana ciindi cakucita shakulikondelesha pomwi abamakwesu abenankashi kulatucafwa kuba abushicibusa buyumu ambabo alimwi a Yehova. Kwiilikaawo, na katutambulako bamwi, tulakonkela cakubonenaako cakwe Yehova.

AMULEYE KUSUNISHISHA MAALI

17. Ino nceebonshi maali akaambwawo mu Kulumbaisha 15?

¹⁷ Tulabelenga ayi mweensu wakwe Yehova “ulakweletesha cakutalangila cinyona mucila peculu. Taatambuli makulo kwaamba ayi apenshe bantu batacite mulandu.” (Kulu. 15:5) Ino nceebonshi maali akaambwawo mulilembo ili? Nceebo cakwaamba ayi maali inga aba cintu ciyandika abuumbi kuli ndiswe kwiinda bantu alimwi inga anyonyoola bushicibusa bwesu a Lesa. (1 Timo. 6:10) Muciindi camu Baibo, bamwi bakalinga kucita shintu shitabete kabotu kubamakwababo bakandu kwiinda mukubalipilisha maali aanji kwiinda ngobakakongola. Alimwi boomboloshi bamwi bakalinga kutambula  makulo lyalo akoombolosha muntu utacite mulandu munshila itabete kabotu. Yehova cilamucisa abuumbi na bantu kabacita shintu shamushobo uyu.—Esek. 22:12.

18. Ino njimiipusho nshi njeenga twaliipusha kwaamba ayi tushibe mbotulinyumfwa pa maali? (Bene Ebulu 13:5)

¹⁸ Cili kabotu kunolilanga langa kwaamba ayi tushibe mbotulinyumfwa pa maali. Amuliipushe ayi: ‘Sa liinji ndayeeya pamaali alimwi ansheenga ndoola? Sa na ndakongola maali ndacelwa kwaboosha ceebo cakuyeeya ayi uyo wankongwesha taatoyeeya kwaasebensesha conoono? Sa kuba amaali kulampa kulinyumfwa kuyandika kwiinda bamwi sombi kacimbeta ciyumu kutondesha mushimu wa bwaabi? Sa ndayeeya ayi na bamakwesu abenankashi balicite maali aanji nkokwaamba ayi balisunishi maali kwiinda Yehova? Sa ndasuna kubabo bushicibusa abantu babile lyalo akukaka kuba bushicibusa abakandu?’ Twakapekwa coolwe cinene cakuba beensu bakwe Yehova. Sombi inga twatolelelabo kuba beensu bakwe na twacita nsheenga twacikonsha kuleya kusunishisha maali. Na twacita boobo, Yehova teshi akatushiyewo!—Amubelenge Bene Ebulu 13:5.

YEHOVA ALIBASUNI BESHICIBUSA BAKWE

19. Ino nceebonshi Yehova alatulangila kucita shoonse shaambwa mu Kulumbaisha 15?

¹⁹ Kulumbaisha 15 ilamana acishomesho cakwaamba ayi: “Uyo woonse ucita shintu ishi, teshi akatenkaanishikweewo napaceyi.” (Kulu. 15:5) Shikulumbaisha ndyaakaamba maswi aya, wakaamba ceebo cinene cipa kwaamba ayi Yehova anotulangila kucita shoonse shaambwa mulilembo ili. Alisuni kwaamba ayi tube basangalete. Na twakonkela shintu Lesa nshaatulwiita kucita, tulaba abuumi buli kabotu alimwi alaakutushitilisha.—Isa. 48:17.

20. Ino nshiinshi beensu bakwe Yehova nshobatolangila?

²⁰ Beensu bakwe Yehova inga balangila kuba abuumi buli kabotu kunembo. Bananikitwe bashomeka balaakunjila mu “misena iinji yakwikalaamo” Yesu njaakababambila kwiculu. (Joni 14:2) Abo batolangila kukala pacishi capanshi batolangila kukumanishikwa kwa shishomesho nshotucana pa Ciyubululo 21:3. Ncoolwe cinene abuumbi kwaamba ayi Yehova alisuni ayi tube beensu mu tente yakwe kwamuyayaya!